Foki ki he Ngāué

ʻE lava ke maʻu ʻe he kau faifekau ʻoku nau foki vave mai ki ʻapí ha holi ke foki ki heʻenau ngāue fakafaifekaú pe fekumi ki ha ngaahi faingamālie kehe ke ngāue. ʻI he ngaahi tūkunga pehení,fakakaukau ki he ngaahi meʻa ko ʻení:

1.Toe fakafoki ki ha misiona malanga taimi kakato.

ʻOku mahuʻinga ke fakakaukauʻi lelei ‘e he faifekaú ʻa e ʻuhinga ʻo hono tukuange ia teʻeki ʻosi hono taimí pea tatau pē mo ha toe hoko ʻa e ngaahi palopalemá, kapau ʻe toe fakafoki ia ki he ngāué. ʻI he taimi ʻoku faʻa foki vave mai ʻa e kau faifekaú ki ʻapi teʻeki ʻosi honau taimí, kuo siʻisiʻi ʻa e ongoʻi mafasia ki he ngāué kae tupulaki ʻa e ngaahi tuʻunga fakafaitoʻó pe moʻui lelei fakaʻatamaí. Manatuʻi ko e ngaahi fiemaʻu mo e ngaahi meʻa fakatupu mafasia ʻo e ngāue fakafaifekaú ʻoku faʻa kovi ange ia ʻi he ngaahi tuʻunga ko ʻení.

Hangē ko e akonaki ʻa Palesiteni Kōtoni B. Hingikelií, “ʻOku mahuʻinga ʻa e moʻui lelei fakaesino mo fakaʻatamaí. … Ko e hā pē ha tōnounou pe fokoutua fakaesino pe fakaʻatamai ʻa ha faifekau ʻi he taimi ʻokú ne ʻalu atu ai ke ngāué ʻoku toe fakautuutu ia ʻi he fiemaʻu ʻa e ngāué. … ‘Oku tau fie maʻu ha kau faifekau ka kuo pau ke nau lava ʻo fakahoko ʻa e ngāué. … Kuo pau ke ʻi ai ʻa e moʻui lelei mo e ivi fakaesino mo fakaʻatamai fakatouʻosi ki he ngāué, he ʻoku lahi e fiemaʻu ʻi he ngāué, ko e taimí ʻoku lōloa, pea ʻe malava ke faingataʻa ʻa e loto-mafasiá.” (“Missionary Service,” First Worldwide LeadershipTraining Meeting, Jan. 2003, 17–18). ʻOku fie maʻu ke fakapapauʻi ʻe he tokotahá te ne lava ʻo tokangaʻi ʻa e tuʻungá ʻi heʻene foki ki he malaʻe ʻo e ngāue fakafaifekaú. Ke toe fakafoki ki ha ngāue fakafaifekau malanga, ʻoku fie maʻu ke ʻave ʻe he palesiteni fakasiteikí ʻa e fakamatala ko ʻení ki he Potungāue Ngāue Fakafaifekaú:

Ko ha tohi mei ha palesiteni fakasiteikí ʻo kole hano toe fakafoki mo fakahā ai ʻoku feʻunga ʻa e faifekaú ke ngāue, pea kuo fakaleleiʻi kakato ʻa e ngaahi meʻa kotoa ʻoku kaunga ki he tukuangé, pea kuó ne ʻinitaviu ʻa e faifekaú pea ne ongoʻi fakatouʻosi mo e faifekaú te ne lava ʻo ngāue lelei ʻi he malaʻe ngāue fakafaifekaú.
Ko ha tohi mei he faifekau ne fakafoki ʻoku teʻeki ʻosi hono taimí ʻo fakamatala ʻene ngaahi ongo fekauʻaki mo ʻene toe foki ki he ngāue fakafaifekaú.
Ko ha tohi mei ha taha toketā fakapalofesinale, maʻanautolu ne foki ki ʻapi ko ha ngaahi ʻuhinga fakafaitoʻo pe fakaʻatamaí, ʻo fakamatalaʻi ʻa e tūkungá, faitoʻo ne faí, meʻa ne hoko hili hono faitoʻó, foʻiʻakau pe ngaahi faitoʻo kehe ʻe fie maʻu lolotonga e ngāue fakafaifekaú, mo fakafuofuaʻi ʻenau malava ke ngāue ʻi he ngaahi fiemaʻu fefeka ʻo e ngāue fakafaifekaú mo ha ngaahi hoá.
ʻE fie maʻu ha ngaahi foomu fakafaitoʻo mo e fakanifo foʻou, kapau kuo fuoloa ange hono tukuange ʻo e faifekaú ʻi he taʻu ʻe tahá.

2. Ngāue fakafaifekau tokoni (SM).

ʻE lava ke fakakaukauʻi ha faingamālie ke ngāue ʻi ha ngaahi fatongia kehekehe ʻi ha vahaʻataimi kehekehe pē. Kātaki ʻo vakai ki he uepisaiti ChurchofJesusChrist.org/service-missionary ki ha fakamatala lahi ange.

3. Ngaahi uiuiʻi kehé.

ʻI he ngaahi feituʻu ʻoku ʻikai maʻu ai ha ngaahi faingamālie ngāue fakafaifekau tokoní, pe ʻi he taimi ʻoku ʻikai ko ha ngāue lelei ʻeni maʻá e faifekaú, fakakaukau ke uiuiʻi ia ko ha faifekau fakauooti pe taha ngāue fakatemipale pe feinga ke ʻilo ha faingamālie fakalotofonua ʻoku feʻungá ke ngāue tokoni ai.