Te u poupou fēfē ki he liliú?

ʻOku maʻu ʻe he kau pīsopé ʻa e fatongia toputapu ke nau hoko ko e kau fakamaau ki ʻIsilelí, ke tokoniʻi ʻa e kāingalotú ʻi hono fakamālohia honau vā fetuʻutaki mo e ʻOtuá, pea ke nau hoko ko e kau faiako fakalaumālie. ʻOku fatongia ʻaki ʻe he fakafoʻituituí hono fakamālohia honau vā fetuʻutaki mo e ʻOtuá ʻo fakafou ʻi he fakatomalá mo e fakamolemolé. ʻOku maʻu ʻe he fakafoʻituituí, kae ʻikai ko e kau taki ʻo e Siasí, ʻa e fatongia ke nau ʻiloʻi ʻa e meʻa ʻe ala fie maʻu ke liliu ʻaki honau ʻulungaanga ʻikai taaú. (Vakai, “Identifying and Understanding Influences” ʻi he “Addressing Pornography” konga ʻo e ChurchofJesusChrist.org.) ʻE ala fie maʻu heni ʻa e fakahā fakatāutaha naʻe maʻu ʻi he akó mo e lotú. ʻOku fatongia ʻaki foki ʻe he kāingalotú ke nau fakamahino mo fakahā ʻa e mamahi hono fakaʻaongaʻi ʻo e ponokalafí ʻa ia kuó ne uesia kinautolu mo e niʻihi kehé.

ʻI hoʻo tokoniʻi e kāingalotú ke nau faifeinga ke maʻu ʻa e fakamolemolé, tokanga taha ki hono ako‘í mo hono fakamamafaʻí:

Tokāteliné
Tauʻatāina ke Filí mo e ʻEkeʻi Meiate Kita ʻa e Meʻa ʻOkú Te Fai pe Taʻe Faí
Toutou Fakaʻaongaʻi ʻa e Tuí
Vilitaki

Tokāteliné

ʻOku mahuʻinga ʻa e tokāteline ʻo e Fakalelei ʻa Sīsū Kalaisí ke mahino ʻa e founga ki he fakatomalá pea maʻu ʻa e fakamolemolé. ʻOku mahuʻinga ki he liliú ʻa hono tokoniʻi ʻo e kāingalotú ke mahino kiate kinautolu ʻa Sīsū Kalaisi mo Hono fatongiá ʻi heʻenau moʻuí. ʻE tataki koe ʻi he founga lelei taha ke akoʻi ai ʻení mo e ngaahi moʻoni kehé. ʻOku toe mahuʻinga foki ʻa e ngaahi fakakaukau tatau ko ʻení ʻi he ngāue fakaetauhi ki he ngaahi hoa malí mo e niʻihi kehe ne fakalaveaʻi ʻe he ʻulungaanga ko ʻení. Fakakaukau ke toe vakai‘i ʻa e ngaahi peesi ko ‘ení ʻi he Ngaahi Tefito ʻo e Ongoongoleleí:

Tauʻatāina ke Filí mo e ʻEkeʻi Meiate Kita ʻa e Meʻa ʻOkú Te Fai pe Taʻe Faí

Fakalotolahiʻi ʻa e fakafo‘ituituí ke ne haʻisia ki heʻene ngaahi filí. ʻOku fie maʻu ʻe he fakafoʻituituí ke mahino ʻa e taimi ʻoku fie maʻu ke vete hia aí. Ko ha vete hia ki hono malí, mātuʻá (kapau ko ha taʻu siʻi ʻoku nofo ʻi ʻapi), pe ko e pīsopé ʻoku tokoni maʻu pe ʻi he laka ki muʻá. ʻE ala fakahoko ha ngaahi feinga tuʻo lahi ke vahevahe kimuʻa pea mateuteu ha fakafoʻituitui ke loto tauʻatāina kakato mo lea moʻoni fekauʻaki mo e tōʻonga ne ʻosi fakahokó. Ngāue ʻaki ʻa e faʻa kātakí lolotonga ʻa e ngāué ni, fakahaaʻi hoʻo ongoʻingofuá, ʻofá, mo e māfana ke ueʻi mo fakalotolahiʻi ʻa e taha kotoa pē ke mātuʻaki faitotonu. ʻOua naʻá ke fakamaaʻi pe fakamālohiʻi ha taha ke ne vete hia kimuʻa ʻoku teʻeki ke ne mateuteu ki ai.

‘Oku totonu ke toe vakaiʻi ʻe he kau pīsopé mo e kau palesiteni fakakoló ʻa e Tohi Tuʻutuʻuni Fakakātoá, 32.8.2, ki ha tokoni lahi ange. Tokoni‘i ʻa e fakafoʻituituí ke mahino kiate ia ko e fānau ia ʻa e ʻOtuá pea ko hono fakaʻaongaʻi ʻo e ponokalafí ko ha ʻulungaanga ia ʻoku ʻikai fenāpasi mo e tuʻunga fakalangi ʻokú ne maʻú.

Ko Hono Ngāue ʻAki ʻo e Tuí

ʻOku mahuʻinga ʻa e lotu mo e ako folofola maʻu peé ki hono fakatupulaki ʻo e tui ki he Tamai Hēvaní mo Sīsū Kalaisí. ʻOku mahuʻinga hono ngāue ʻaki ʻa e tui kia Sīsū Kalaisí ke aʻusia ai ha fuʻu liliu lahi ʻo e lotó. Ko e ngaahi lotu ʻoku fakahoko ʻaki ʻa e loto moʻoní ʻoku nau takiekina ʻa e taha kotoa pē ke fekumi ki he fakamolemole mei he ʻOtuá pea meiate kinautolu kuo nau fakalaveaʻí. ʻE malava ke maʻu foki ʻe he taha kotoa pē ha mālohi lahi ʻaki ʻene ako ʻa e fakahinohino mei he konifelenisi lahí mo e ngaahi talanoa ʻi he ngaahi makasini ʻa e Siasí fekauʻaki mo e ngaahi tefito ko ʻení.

Kuo pau ke tui ʻa e fakafoʻituituí te ne lava ʻo liliu. ʻAi e leleí pea toe vakaiʻi ʻa e ngaahi tefitoʻi moʻoni ʻo e tui ki he Tamai Hēvaní mo Sīsū Kalaisí. Fakalotolahiʻi ʻa e moihū ʻo e Sāpaté, tokoni ki he niʻihi kehé, mo e ngaahi tōʻonga kehe ʻoku fenāpasi mo e ʻulungaanga ʻo Kalaisí.

Vilitaki

ʻOku totonu ke fekumi ʻa e fakafoʻituituí ki ha fakahā fakatāutaha ʻi hono fokotuʻutuʻu ʻa e ngaahi palaní fekauʻaki mo hono fakaʻaongaʻi ʻo e ponokalafí. ʻOku totonu ke fakakaukauʻi ʻe he tokotaha kotoa pē ʻa ʻene ngaahi fiemaʻu makehe ʻi hono fakakaukauʻi ʻa e ngaahi meʻa ke fakaleleiʻi ʻakí mo e meʻa ke fakahokó. Ka neongo ko e taumu‘a mahuʻinga ke taʻofi hono fakaʻaongaʻi ʻo e ponokalafí, poupouʻi ʻa e fakafoʻituituí ke tokanga taha ke fekumi ki he ngaahi ʻulungaanga faka-Kalaisí pea hoko ko ha ākonga kuo ului ʻa Sīsū Kalaisi. ʻE tokoni ʻa e ngaahi peesi ko ʻeni ʻi he uepisaiti Addressing Pornography ki he kāingalotú ʻi he founga ko ʻení:

Hokohoko atu hono fakamanatu ki he kāingalotú ʻoku fie maʻu ha taimi ki he liliú. Mahalo te ke fie maʻu ke fakamahinoʻi ange ko hono fakahoko fakatāutaha ʻo e fatongiá, ʻo fakahoko maʻu pē ʻi he ngāue, pea fakatokangaʻi ʻa e mamahi ʻoku fakatupu ʻe hono fakaʻaongaʻi ʻo e ponokalafí ko e konga kotoa ia ʻo hono toe fokotuʻu ʻa e fefalalaʻaki mo hono malí, mātuʻá, pe kau mēmipa kehe ʻo e fāmilí. ʻOku angamaheni ʻaki e toe fakakaukau ki he ngaahi meʻa ʻo e kuohilí. Fakalotolahiʻi ʻa e fakafoʻituituí ke faitotonu ʻi hono fakahā e ngaahi meʻa ko ʻeni ne hoko ʻi he kuohilí ki honau malí pe mātuʻá, ke ako mei ai, pea foki vave leva ki he ngaahi ʻulungaanga fakamoʻui leleí.