Ko e Taimi ke Fakakaukau ai ki he Tokoni Fakapalofesinalé

ʻOku ʻikai fie maʻu pe poupouʻi e kau taki ʻo e Siasí ke nau hoko ko ha kau mataotao ʻi he moʻui lelei fakaʻatamaí. Ka ‘oku faʻa kumi tokoni e niʻihi fakafoʻituitui ʻoku faingataʻaʻia ʻi he ngaahi tuʻunga peheé, ki honau kau takí ke ʻilo e meʻa ke faí.

Neongo ʻe meimei aʻusia ʻe he tokotaha kotoa ha faʻahinga palopalema fakaʻatamai ʻi ha ngaahi taimi kehekehe ʻi he moʻuí, ka ʻe lava ke fakatupu mafasia ʻi heʻene tōtuʻá. Ko e niʻihi ko ia ʻoku siʻisiʻi e ngaahi faingataʻa ʻoku nau fepaki mo iá, ʻe faʻa ʻaonga kiate kinautolu e ngaahi fokotuʻu ʻi he tohi Fakaangaanga ki he Moʻui Fakafaifekaú (kiʻi tohi tufa, 2013). Neongo naʻe teuteuʻi e maʻuʻanga tokoni ko ʻení maʻá e kau faifekaú, ka ʻoku tokoni ia ke ʻiloʻi e ngaahi founga ʻe lava ai ʻe ha tokotaha pē ʻo tali ʻaki e ngaahi faingataʻá. ʻIkai ngata aí, ʻe ala tokoni e poupou loto ʻofa meiate koe, kau mēmipa ʻo e fāmilí, mo e niʻihi kehé ke foua ʻe he fakafoʻituituí ha faingataʻa fakaʻatamai.

Ka neongo ia, kapau ʻoku ʻikai ʻaonga e ngaahi foungá ni ki he tokotahá, ʻe ala fie maʻu leva ha palofesinale tokoni fakaʻatamai ke ne ʻomi ha faleʻi totonu.

ʻOku ʻoatu ʻi lalo ha ngaahi palopalema fakaʻatamai ʻe ala fie maʻu ki ai ha fakafuofua mei ha palofesinale tokoni fakaʻatamai pea ʻe ala fehangahangai mo e kau taki ʻo e kāingalotú ʻi he Siasí ʻi honau uōtí pe koló:

• Ngaahi fakakaukau pe feinga ke taonakitá

• Ongoʻi mafasia fuoloá

• ʻIkai malava ke fakahoko e ngaahi ngāue mahuʻinga fakaʻahó

• Loto mamahí, siva e ʻamanakí, fehiʻa pē ʻiate kitá

• Hifi, tuʻusi, fakalaveaʻi kitá

• Manavasiʻi naʻa fuʻu tōtuʻa e sisinó, lahi pe tōtuʻa ʻa e tutué pe ko e toe sino lahi angé

• ʻIkai lava mapuleʻi hoto sinó pe toutou fakahoko ʻa e lea pe tōʻonga tatau

• ʻĀʻāvea pe toutou fakakaukau ki he meʻa tatau pe ngaahi ongo holi

• Toutou vetehia ki he ngaahi meʻa iiki

• ʻIkai lava mapuleʻi e ilifiá, hohaʻa pe puputuʻu e fakakaukaú

• Liʻekina

• Tōtuʻa e feliliuaki ʻi he tōʻongá pe ongó

• Ongoʻi ʻita, ngaahi fakakaukau hala, fanongo ki he ngaahi leʻo

• ʻUlungaanga fakasekisuale fakatuʻutāmaki

• Ngaahi toʻonga fakatuʻutāmakí (ʻita, fekeʻikeʻi, fakatupu kē)

‘I he ngaahi meʻá ni mo e ngaahi tūkunga kehe ʻoku fai ki ai e hohaʻá, fakakaukau ki ha faifaleʻi fakapalofesinale ko ha fili ʻoku malava ke fakahoko“(vakai, Faifaleʻi Fakapalofesinale mo e Fakamālohisinó,” Tohi Tuʻutuʻuni Fakakātoa, 31.2.6). ‘E lava ke feongoongoi ʻa e kau taki ‘o e Siasí mo e Ngaahi Tokoni ki he Fāmilí (ʻi he feituʻu ʻoku maʻu aí) pe ‘ōfisi fakaʻēliá ke ‘iloʻi e founga ke tokoniʻi ai e fakafoʻituituí pea kumi ‘a e ngaahi maʻu‘anga tokoní.