My Foundation [Ang Aking Saligan]: Ang Self-Reliance ay Isang Alituntunin ng Kaligtasan—Maximum na Oras: 20 Minuto

Pag-isipang mabuti:Juan 10:10 (sa kanan)

“Ako’y naparito upang sila’y magkaroon ng buhay, at magkaroon ng kasaganaan nito.”

Juan 10:10

Talakayin:Ano ang masaganang buhay?

Panoorin:“He Polished My Toe,” makukuha sa srs.lds.org/videos. (Walang video? Basahin ang pahina 5.)

Pinakintab Niya ang Aking Daliri sa Paa

Kung hindi ninyo mapapanood ang video, basahin ang script na ito.

Elder Enrique R. Falabella: Noong lumalaki ako, mahirap lang kami. Naaalala ko nang lapitan ko ang aking ama isang araw at sinabi ko sa kanya, “Papa, kailangan ko po ng bagong sapatos. Sira na po itong suot ko.” Tumigil siya at tiningnan ang sapatos ko at nakita niya na talagang luma na ito. Sabi niya, “Palagay ko maaari nating ayusin ito.” Kumuha siya ng kaunting itim na shoe polish at pinakintab ang sapatos ko, at makinis at maganda na ito. Sabi niya sa akin, “Hayan, maayos na ang sapatos mo, anak.” Sumagot ako, “Hindi po, hindi pa. Kita pa rin po ang daliri ng paa ko.” Sabi niya, “Kung gayon, aayusin din natin iyan!” Kumuha siya ng kaunti pang shoe polish at pinakintab niya ang daliri ko sa paa!

Noong araw na iyon nalaman ko na may solusyon sa bawat problema. Kumbinsido ako na ang alituntuning ito ng self-reliance at ang inisyatibong ito ay isang paraan para mapabilis ang gawain ng Panginoon. Bahagi ito ng gawain ng kaligtasan. Tayong lahat ay maaaring maging mas mabuti pa kaysa ngayon. Kailangan ninyong kalimutan ang kawalan ng interes. Maraming beses tayong kampante, at sumisira ito sa ating pag-unlad. Araw-araw ay maaari akong umunlad kung ipapasiya kong gumawa ng isang bagay na kakaiba para mapaganda ang hindi magandang nagawa ko noon. Kung gagawin mo ito nang may pananalig, na nagpapakita ng pananampalataya at pag-asa kay Cristo na nariyan Siya para tumulong sa iyo, makikita mo ang paraan para umunlad sa temporal at espirituwal na mga bagay. Ito ay dahil sa ang Diyos ay buhay, at ikaw ay Kanyang anak.

Bumalik sa pahina 4

Talakayin:Naniniwala ka ba na may mga solusyon sa iyong problema? Paano tayo magiging marapat sa kapangyarihan ng Panginoon na tulungan tayo?

Basahin:Reperensya sa Handbook 2 at ang pahayag ni Elder Dallin H. Oaks (sa kanan). Ang pagiging self-reliant ay hindi nangangahulugan na maaari nating magawa o makamtan ang anumang naisin natin. Sa halip, ito ay paniniwala na sa pamamagitan ng biyaya, o nagbibigay-kakayahang kapangyarihan, ni Jesucristo at sa ating sariling pagsisikap, nakakamtan natin ang lahat ng espirituwal at temporal na pangangailangan sa buhay para sa ating sarili at sa ating pamilya. Ang self-reliance ay katibayan ng ating tiwala o pananalig sa kapangyarihan ng Diyos na pagalawin ang mga bundok sa ating buhay at bigyan tayo ng lakas na magtagumpay sa mga pagsubok at paghihirap.

“Ang pag-asa sa sarili [self-reliance] ay ang kakayahan, tapat na pangako, at pagsisikap na tustusan ang espirituwal at temporal na mga pangangailangan sa buhay para sa sarili at sa pamilya. Kapag natutong umasa sa sarili ang mga miyembro, mas napaglilingkuran at napangangalagaan din nila ang iba.”

Handbook 2: Administering the Church (2010), 6.1.1

“Anuman ang dahilan ng pag-asa natin sa iba para sa mga desisyon o kabuhayang mailalaan naman natin sa ating sarili ay nagpapahina sa ating espirituwalidad at nagpapabagal sa pag-unlad natin tungo sa dapat nating marating.”

Dallin H. Oaks, “Pagsisisi at Pagbabago,” Ensign o Liahona, Nob. 2003, 40

Talakayin:Paano ka natulungan ng biyaya ni Cristo na matamo ang espirituwal at temporal na mga pangangailangan mo sa buhay?

Aktibidad

Step 1: Pumili ng isang partner, at basahin ang bawat alituntunin sa ibaba.

Step 2: Talakayin kung bakit makakatulong sa iyo ang paniniwala sa mga katotohanang ito para maging self-reliant.

Mga Alituntunin sa Doktrina tungkol sa Self-Reliance
Ang self-reliance ay isang kautusan.	“Iniutos ng Panginoon sa Simbahan at mga miyembro nito na tumayo sa sariling mga paa at magsarili” (Mga Turo ng mga Pangulo ng Simbahan: Spencer W. Kimball [2006], 139).
Maaaring magbigay at magbibigay ang Diyos ng paraan maging self-reliant ang matwid Niyang mga anak.	“At layunin ko ito na maglaan para sa aking mga banal, sapagkat lahat ng bagay ay akin” (D at T 104:15).
Ang temporal at espirituwal ay iisa para sa Diyos.	“Dahil dito, katotohanang sinasabi ko sa inyo na ang lahat ng bagay sa akin ay espirituwal” (D at T 29:34).

Talakayin:Basahin ang pahayag ni Pangulong Marion G. Romney (sa kanan). Paano mo nalalaman kung nagiging mas self-reliant ka?

“Kung hindi aasa sa sarili ang isang tao hindi niya magagawang maglingkod. Paano tayo magbibigay kung wala naman tayong ibibigay? Ang pagkain para sa nagugutom ay hindi nagmumula sa mga estanteng walang laman. Ang perang pantulong sa nangangailangan ay hindi magmumula sa pitakang walang laman. Ang suporta at pag-unawa ay hindi magmumula sa hungkag na damdamin. Ang pagtuturo ay hindi magmumula sa walang alam. At higit sa lahat, ang espirituwal na patnubay ay hindi magmumula sa taong mahina ang espirituwalidad.”

Marion G. Romney, “The Celestial Nature of Self-Reliance,” Ensign, Nob. 1982, 93

Mangakong Gawin:Mangakong gawin ang mga sumusunod sa linggong ito. Lagyan ng tsek ang box kapag nakumpleto mo ang bawat gawain:

• Basahin ang liham ng Unang Panguluhan sa loob ng pabalat sa harapan, at salungguhitan ang ipinangakong mga pagpapala. Ano ang kailangan mong gawin para matamo ang mga ito? Isulat ang mga ideya mo sa ibaba.

• Ibahagi sa iyong pamilya o mga kaibigan ang natutuhan mo ngayon tungkol sa self-reliance.