My Foundation [Ang Aking SALIGAN]: Magtrabaho: Maging Responsable at Magtiyaga—Maximum na Oras: 20 Minuto

Pag-isipang mabuti:Bakit nais ng Ama sa Langit na maging responsable ako sa buhay ko?

Panoorin:“Sedrick’s Journey,” makukuha sa srs.lds.org/videos. (Walang video? Basahin ang pahina 99.)

Ang Paglalakbay ni Sedrick

Kung hindi ninyo mapapanood ang video, basahin ang script na ito.

Sedrick: Ako si Sedrick Kambesabwe. Nakatira ako sa Democratic Republic of the Congo. Miyembro ako ng LDS Church.

Branch missionary ako sa nayon ng Kipusanga. Kailangan kong maghanda sa pagmimisyon sa ibang bansa. Para makapagmisyon, kailangan ko ng passport, na nagkakahalaga ngayon ng 250 U.S. dollars.

Para kumita, bumibili kami ng tatay ko ng mga saging. Maraming inaaning saging ang ilang nayon: Tishabobo, Lusuku, at Kamanda.

Ang Tishabobo ay mga 9 na milya ang layo mula rito. Ang Lusuku ay 18 milya. Gayon din ang Kamanda. Pumupunta kami roon at bumibili ng mga saging, at ibinibenta rito sa amin.

Para makapunta sa mga nayon, nagbibisikleta kami. Ang kaya naming dalhin ay apat o anim na buwig ng saging.

Kapag nakabisikleta ako, inaabot ng isa’t kalahating oras ang papunta at gayon din ang pabalik, kung hindi sira ang bisikleta at may lakas pa ako. Kapag tanghaling-tapat at masyadong mainit, mabagal ang pagbisikleta ko dahil sa tindi ng sikat ng araw.

Dalawang biyahe ang magagawa ko kada araw kung madaling-araw ako gigising. Magandang paraan ito para mabayaran ang passport ko.

Ngayon kumikita na ako ng pera, paunti-unti, kaya nag-iimpok ako para sa pag-aaral at misyon ko. At ngayon, makalipas ang apat na taong pagtatrabaho, may pambayad na ako para sa passport ko at 70 dollars na ipon.

Bumalik sa pahina 98.

Talakayin:Paano tayo natututong magpatuloy, kahit mahirap ang trabaho?

Basahin:Doktrina at mga Tipan 42:42 at ang sinabi ni Pangulong James E. Faust (sa kanan)

“Huwag kayong maging tamad; sapagkat siya na tamad ay hindi makakakain ng tinapay ni makapagsusuot ng kasuotan ng manggagawa.”

Doktrina at mga Tipan 42:42

“Ang pagtitiyaga ay makikita sa mga taong … hindi sumusuko kahit sabihin pa ng iba na, ‘Hindi magagawa ito.’”

James E. Faust, “Pagtitiyaga,” Ensign o Liahona, Mayo 2005, 51

Talakayin:Basahin ang sinabi ni Elder D. Todd Christofferson (sa pahina 99). Bakit inaasahan ng Panginoon na pagtrabahuhan natin ang ating tinatanggap?

“Ipinlano ng Diyos ang mortal na buhay na ito na nangangailangan ng patuloy na paggawa. … Sa pamamagitan ng paggawa natutustusan natin at napagiginhawa ang buhay. … Ang paggawa ay nagpapalakas at nagdadalisay ng pagkatao, lumilikha ng kagandahan, at ang kasangkapan sa ating paglilingkod sa isa’t isa at sa Diyos. Ang buhay na inilaan ay puno ng paggawa, minsan paulit-ulit, … minsan hindi napahahalagahan ngunit palaging [paggawa na] nagpapaunlad, … nakatutulong, [at] nagpapabuti.”

D. Todd Christofferson, “Larawan ng Isang Buhay na Inilaan,” Ensign o Liahona, Nob. 2010, 17

Aktibidad

Step 1: Pumili ng partner at magkasama ninyong basahin ang bawat hakbang sa huwaran sa ibaba.

Step 2: Sabihin ninyo sa isa’t isa na magsalita tungkol sa isang napakahirap na gawain o hamon na kasalukuyang kinakaharap ng isa.

Step 3: Tulungan ang isa’t isa na gamitin ang apat na hakbang sa ibaba sa mahirap na gawain o hamon.

❶ Magkaroon ng Mabuting Pag-uugali	❷ Tandaan na Magtulungan	❸ Palitan ng Pananampalataya ang Takot	❹ Sumulong nang May Pagtitiyaga at Tapang
Ilista ang iyong mga pagpapala.	Magpatulong sa mga kaibigan, kasamahan, kagrupo, at iba pa.	Iwasang mag-alinlangan. Tandaan na taglay ng Panginoon ang lahat ng kapangyarihan. Manalangin sa Kanya at tanggapin ang Kanyang kalooban.	Huwag na huwag sumuko; magtiis nang may pananampalataya. Maghanap ng mga lesson na maaaring itinuturo sa iyo ng Panginoon.

Step 4: Sumulat ng dalawa o tatlong paraan na makakasulong ka nang may pananampalataya, na nagtitiwala na maglalaan ang Diyos.

Pag-isipang mabuti:Basahin ang sinabi ni Pangulong Thomas S. Monson (sa kanan). Paano ako tumutugon kapag nakakaranas ako ng kabiguan?

“Responsibilidad nating umangat mula sa pagiging karaniwan lamang tungo sa pagiging mahusay, bumangon mula sa kabiguan tungo sa tagumpay. Ang tungkulin natin ay maabot ang pinakamahusay natin. Isa sa pinakadakilang mga kaloob ng Diyos sa atin ay ang kagalakan sa pagsisikap na muli, dahil hindi kailangang sa kabiguan magtapos ang lahat.”

Thomas S. Monson, “The Will Within,” Ensign, Mayo 1987, 68

Mangakong Gawin:Mangakong gawin ang mga sumusunod sa linggong ito. Lagyan ng tsek ang box kapag nakumpleto mo ang bawat gawain:

• Pumili ng isang bagay na mahirap o hindi komportableng gawin at tapusin ang gawain. Isulat ito sa ibaba.

• Ibahagi sa iyong pamilya at mga kaibigan ang natutuhan mo ngayon tungkol sa trabaho at pagtitiyaga.