Punaoa

Saunia Faaleagaga

Feauauai i le faitauina o mea nei.

JULIE B. BECK

O le gafatia e agavaa ai mo le, mauaina, ma faatino ia faaaliga a le tagata lava ia o se tomai e tasi e sili ona taua e mafai ona mauaina i lenei olaga. O le agavaa mo le Agaga o le Alii e amata i se manao mo lena Agaga ma e faatatau i ai se vaega o le agavaa.

O le tausia o poloaiga, salamo, ma le faafouina o feagaiga na faia i le papatisoga e taitai atu ai i faamanuiaga o le i ai pea o le Agaga o le Alii e faatasi ma i tatou [tagai MF&F 20:77]. O le osia ma le faia o feagaiga o le malumalu e faaopoopo atu ai le malosi ma le mana faaleagaga. …

O le tele o tali i fesili faigata o loo maua i le faitauina o tusitusiga paia aua o tusitusiga paia o se fesoasoani i faaaliga [tagai 2 Nifae 32:3]. O malamalamaaga o loo maua i mau e faateleina i le aluga o taimi, o lea e taua ai le faaaluaina o sina taimi i totonu o tusitusiga paia i aso taitasi.

O le tatalo i aso taitasi e taua foi i le mauaina o le Agaga o le Alii e faatasi ma i tatou (tagai 3 Nifae 19:24–33). O i latou o e saili ma le naunautai se fesoasoani e ala i le tatalo ma suesue i tusitusiga paia e masani lava ona i ai se pepa ma se penitala e latalata ane e tusi ai ni fesili ma faamaumau ai ni uunaiga ma ni manatu.

E mafai ona oo mai faaaliga i lea itula ma lea itula ma i lea taimi i lea taimi a o tatou faia mea sa’o. … O faaaliga a le tagata lava ia e aumaia ia i tatou le malamalama o mea tatou te faia i aso taitasi ina ia faateleina ai le faatuatua ma le amiotonu a le tagata lava ia, faamalosia aiga ma auaiga, ma saili i latou o e manaomia la tatou fesoasoani. Talu ai o faaaliga a le tagata lava ia o se puna o le malosi e faafouina pea lava pea, e mafai ona lagona le faamamaina i le fesoasoani e oo lava i taimi faigata.

Ua tauina mai ia i tatou ia faatuatua i lena Agaga lea e tataia i tatou “ia fai mea sao, ia savali ma le lotomaualalo, ia faamasino ma le amiotonu” (MF&F 11:12). Ua tauina mai foi ia i tatou o le a faamalamalamaina o tatou mafaufau e lenei Agaga, faatumuina o tatou agaga i le olioli, ma fesoasoani ia i tatou ia iloa mea uma e tatau ona tatou faia (tagai MF&F 11:13–14).

O faaaliga folafolaina a le tagata lava ia e oo mai pe a tatou talosagaina, saunia i ai, ma agai i luma i le faatuatua, talitonu o le a liligiina mai i o tatou luga. (“Ou te Liligi Ifo foi lo’u Agaga i Auauna Fafine i Ia ona Aso,” Ensign po o le Liahona, Me 2010, 11)

Toe foi i le itulau 101

Saili le Aoaoina e ala i le Faatuatua

Faitau na o oe le savali lenei pe ma se isi o tagata o le vaega. Faitau ma faailoga e faaaoga ia manatu o i le itulau 104. Toe iloilo i se taimi mulimuli o lenei aso, i se vaiaso, ma i se masina. Afai e te faia, o le a toeitiiti e manatuaina mea uma sa e aoaoina!

DAVID A. BEDNAR

O le a le uiga o le saili o le aoaoina e ala i le faatuatua?

… O i tatou o atalii ma afafine o lo tatou Tama Faalelagi, ua faamanuiaina i tatou i le meaalofa o le saolotoga. … I le avea ai o i tatou ma ni tagata e aoao, e tatau ia te oe ma a’u ona galulue e faatino ma avea ma e anaana i le upu. … Pe o oe ma a’u ea o ni sui o loo galulue e faatino ma saili e aoao e ala i le faatuatua, pe o ta faatalitali ea i isi e aoao ma galueaiina i taua? … Ua tatau ia i tatou uma ona matua galulue punouai e ole atu, saili, ma tu’itu’i atu [tagai3 Nifae14:7].

… O le aoaoina e ala i le faatuatua e manaomia ai le malosi faaleagaga, faalemafaufau ma faaletino ae le na o le tau lava ina talia. … O le aoaoina e ala i le faatuatua e manaomia uma ai le “loto ma le mafaufau malie” (MF&F 64:34). O le aoao i le faatuatua o le taunuuga lena o le tauaveina e le Agaga Paia o le mana o le upu a le Atua e le gata i le loto ae faapea foi i totonu o le loto. O le aoaoina e ala i le faatuatua e le mafai ona sii mai i se faiaoga i se tagata aoga…nai lo lena e tatau i le tagata aoga ona faaaoga le faatuatua ma galue ai ina ia maua le malamalama mo ia lava.

Sa malamalama le taulealea o Iosefa Samita … i le uiga o le saili o le aoaoina e ala i le faatuatua. … Na manino lona sauniaina o ia lava e “ole atu ma le faatuatua” [Iakopo 1:6] ma ia faatino. …Matau e le’i taulai atu fesili a Iosefa na o se mea na manaomia ona ia iloa, ae pe o le a foi le mea e tatau ona ia fai… O lana tatalo sa le na o lē fea le lotu e sa’o. O lana fesili sa faapea po o le fea lotu e tatau ona ia auai. Sa alu Iosefa i le togavao e aoao ai e ala i le faatuatua. Sa ia naunau e faatino. …

E moni, o se tasi o luitau tele i le olaga nei o le saili e aoao i le faatuatua. … Na aoao mai e Iosefa, “O le ala sili lava e maua ai upumoni ma le poto e le o se saili atu i tusi ae ia o i le Atua i le tatalo, ma maua mai ai aoaoga faalelagi” [History of the Church, 4:425]. …

… O aafiaga sa mafai ai ona ou malamalama, o se tali e aumai i se isi tagata e masani lava e le umi se taimi e manatua ai. … Peitai o se tali tatou te maua e ala i le faaaogaina o le faatuatua, e masani lava ona manatua i le olaga atoa. …

O le matafaioi e saili e aoao i le faatuatua, e i luga lava o i tatou taitoatasi. … E taua le aoao e ala i le faatuatua mo lo tatou atinaega faaleagaga patino, ma le tuputupu ae o le Ekalesia. … Talosia ia tau fai fia feinu moni i tatou taitoatasi i le amiotonu ma ia faatumulia i le Agaga Paia [tagai 3 Nifae12:6]—ina ia tatou saili ai e aoao i le faatuatua. (“Saili i le Aoao e Ala i le Faatuatua,” Ensign, Sept. 2007, 63–68 po o le Liahona, Sete. 2007, 19–24)

Toe foi i le itulau 106

Gaoioiga i le Aiga: Pe Ua Ou Saunia ina ia Faamanuiaina i le Aoga?

E tatau ona tatou saunia ina ia faamanuiaina i la tatou aoaoga po o aoaoga faalematata. Faamaea i lou lava taimi le iloiloga lenei. E mafai ona e talosaga atu i isi e aumai ni o latou manatu.

Tuu se fuainumera i luma o faamatalaga taitasi, a le o le 1, 2, po o le 3. 1 = manaomia se galuega 2 = o loo lelei 3 = lelei tele

Tusi nisi o manatu e uiga i le auala e faaleleia ai i lena eria.

• Uunaiga e Oe Lava Ia E mafai ona uunaia au lava e faia ni galuega faigata. Ou te galue i aso taitasi e aunoa ma le uunaia o au e isi.

• Auala e faaleleia ai:

• Filifiliga o le Galuega. Ua i ai sau sini manino, ma ou tautino e faauma le aoga.

• Auala e faaleleia ai:

• Manao e Aoao. E i ai sou naunau e aoao, ma ou te le tuu i luitau e faalavelave mai.

• Auala e faaleleia ai:

• Fuafuaina: Ou te puleaina lo’u olaga. Ou te fuafuaina ou aso ma vaiaso, ma ou te faataga le Agaga e taialaina a’u.

• Auala e faaleleia ai:

• Lagolago. E i ai tagata o loo siomia a’u o e o le a lagolagoina a’u, taitaiina a’u, ma alolofa ia te a’u. Afai e leai, o le a ou saili ni tagata e tuuina mai le lagolagosua.

• Auala e faaleleia ai:

• Puleaina o Tupe. E mafai ona ou maua ni tupe ma sefeina. Ou te totogiina a’u pili pe a ua tatau ona totogi, e aofia ai le totogina o la’u nonogatupe a le TFA. Ou te ola i mea ou te maua.

• Auala e faaleleia ai:

O le a se mea na e aoaoina mai lenei aafiaga? Faasoa faapuupuu atu ou manatu i lou aiga po o uo.