Aoao

A ou aoga loa, e faapefea ona faamanuiaina a’u?

Taimi:Seti le taimi i le 45 minute mo le vaega Aoao.

Faitau:Ua tele lo tatou alualu i luma i le fuafuaga o a tatou aoaoga. Ae tatou te aooga moni loa, o le a se mea o le a faamanuiaina ai?

Vaiaso 1	Vaiaso 2	Vaiaso 3	Vaiaso 4	Vaiaso 5	Vaiaso 6
O le a se ituaiga galuega o le a fesoasoani ia te a’u ina ia ola tutoatasi?	O le a se aoaoga o le a faaagavaaina a’u mo la’u galuega?	E faapefea ona ou totogiina la’u aoga?	E faapefea ona ou talosaga mo se nonogatupe a le Tupe Faaagaga mo Aoga?	E faapefea ona faamanuiaina au i totonu o le potuaoga?	E faapefea ona faamanuiaina au i fafo atu o le potuaoga?

Faitau:I le vaiaso lenei, o le a tatou saili ai ni tali i lenei fesili ma o le a tatou faaaogaina lenei faatinoga:

Faitau:FESILI O LE VAIASO—E faapefea ona faamanuiaina a’u i totonu o le potuaoga?

FAATINOGA O LE VAIASO—Faamalosia lo’u usiusitai i mataupu faavae faaleagaga ma faaleleia o’u tomai ma mausa faaleaoaoga?

Aisea e fautuaina ai i tatou e le Alii ina ia aoao?

Faitau:Ua fautuaina i tatou e le Alii ma Ana perofeta ina ia saili i le aoaoga, ia maua ni tomai e maua ai ni galuega lelei , ma ia galue malosi.

Maimoa:“O Le Aoaoga o le Ki lea i Avanoa” (Leai se vitio? Faitau le itulau 93.)

Talanoaina:Ia taitoatolu i ni vaega. Faaaoga ni nai minute e talanoaina ai ia fesili nei. Ona otooto mai lea o mea sa outou aoaoina o se vaega.

1. Aisea e finagalo ai le Alii ia tatou maua ni aoaoga? E Mafai Ona Ia Fesoasoani ia i Tatou ina ia Faamanuiaina?

2. E mafai faapefea ona fesoasoani ia aoaoga e “faalautele le valaauga” ua tuuina mai ia i tatou e le Atua?

E faapefea ona ou aoao e ala i le faatuatua?

Faitau:Faitau le mau o loo i le taumatau.

“Ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi.”

Mataupu Faavae ma Feagaiga 88:118

Faataitai:Filifili se mataupu faavae se tasi o i le siata ma faitau e oe lava ia. Fesili ifo ia te oe lava ia: “E faapefea ona suia e lenei mea le ala o ou aoao ai?”

MATAUPU FAAVAE O LE FAATUATUA
Tumau i le agavaa. “Afai tou te gauai ma outou faalogo, tou te aai ai mea lelei o le laueleele” (Isaia 1:19); “Ma a tatou maua se faamanuiaga…e maua i le usiusitai i lena tulafono ua faavae ai i luga” (MF&F 130:21).
Saili atu i le Agaga. “A o le Fesoasoani … na te aoao ia te outou i mea uma lava; e faamanatu mai foi o ia ia te outou i mea uma” (Ioane 14:26); “Saili ma le filiga, tatalo e le aunoa, ma ia talitonu” (MF&F 90:24).
Faalogo, mafaufau loloto, talitonu. “Faalogo mai ia i le siufofoga o Iesu Keriso, lo outou Togiola” (MF&F 29:1); “Ua faapea ona fetalai mai o le leo itiiti ma le filemu” (MF&F 85:6); “[Ia] le ofo … aua le masalosalo, ae ia talitonu” (Mamona 9:27).
Galue; ia punouai. “Ai se tasi e fia fai lona finagalo, e iloa ai e ia” (Ioane 7:17); “O le a ou alu ma fai mea ua poloaiina e le Alii” (1 Nifae 3:7); “E tatau i tagata ona auai ma le naunautai … ma aumai le amiotonu tele” (MF&F 58:27).

Talanoa faatasi o se vaega, mea sa e aoaoina. E faapefea ona e faaaogaina nei mataupu faavae e fa i lou olaga? E faapefea ona e aoao atua i lou aiga?

Faitau:E mafai ona tatou aoao e ala i le faatuatua aua ua tatou iloa le upumoni! O le Atua o lo tatou Tama ma o i tatou o Ana fanau. E finagalo o Ia ia tatou pei o Ia. E mafai ona faamalosia i tatou e le Faaola i Lona mana. E mafai e le Agaga Paia ona faateleina lo tatou malamalama ma fesoasoani ia i tatou ia manatua. Ona ua tatou iloa nei upumoni, e mafai ona tatou maua le faatuatua ia avea ai ma tagata aoaoina maoae!

E faapefea ona ou aoao e ala i le suesue?

Faitau:E le gata i le aoaoina e ala i le faatuatua, e tatau foi ona tatou aoao e ala i le suesue. O le suesue e aofia ai mea tatou te faia i totonu o le potuaoga ma le auala o tatou saunia ai i fafo atu o le potuaoga. Mo le vaega o totoe o lenei sauniga o le a tatou taulai atu i nei ki mo le faamanuiaina i totonu o le potuaoga. O le vaiaso e sosoo ai o le a tatou talanoa i sauniuniga i fafo atu o le potuaoga.

Aoao e ala i le suesue: i totonu o le potuaoga.

Faamaumau ma manatua mea sa ou aoaoina

Auai ma le naunautai, faasoa atu i le vasega

Aoao ma ia ausia faamoemoega

Aoao e faia ma le lelei ia suega

E faapefea ona ou faia ni tusitusiga e faamaumau ai mea sa ou aoaoina?

Faitau:Tatou te tusia ni faamatalaga e faamaumau ai mea sa tatou vaai ma faalogo i ai i totonu o le potuaoga. Tatou te toe iloiloina na tusiga ina ia manatua ai mea sa tatou aoaoina.

Faataitai:Filifili se tagata se toatasi e faitau le “Real-Life Education” i le itulau 94. E tatau ona faalogo isi o i le vaega ma tagai i tusiga o i lalo. Pe na faamaumauina e nei tusiga le saunoga a Peresitene Eyring?

1. Tusi le autu, suafa o le failauga.

2. A o latou talanoa mai, tusi ni manatu autu i le avanoa tele lenei; faafaigofie.

3. O le taimi lava e uma ai le vasega, otooto mai au tusitusiga i le avanoa lenei.

4. Filifili le mea e sili ona taua ma ia manatua ma faia.

AOAOGA MONI O LE OLAGA: HENRY B. EYRING
E finagalo le Alii ia ou aoao; o le a fesoasoani mai Lona alofa tunoa	O le liua e aumaia le manao ia aoao
	E finagalo le Alii ia tatou aoao ma auauna atu
	E fesoasoani mai Lona alofa tunoa ina ia vave ma lelei ona tatou aoao
O le aoao e mafai ai ona ou auauna atu	O le mea e faamuamua o le aoaoina faaleagaga
O le olaga moni o le ola e faavavau!	E silafia e le Alii le mea e tatau ona tatou faia?
	O le olaga moni o le ola e faavavau
	O le mea tatou te aoaoina e tumau ia i tatou
	E finagalo le Atua ia tatou aoao, auauna atu
	Tatalo atili e uiga i suesuega, faalagolago atu i le Agaga Paia

Talanoaina:O le a se mea sa e aoaoina e uiga i le faia o ni tusitusiga lelei?

Faataitai:Ia, filifili se tagata se toatasi e faitau le “Aoaoina ma le Au Paia o Aso e Gata Ai” o i le itulau 95. Faalogo ma tusi ni faamatalaga i le avanoa o i lalo:

1. I le pito i luga, tusi ai le ulutala, failauga, ma le aso.

2. A o e faalogologo, tusi ia manatu autu i le itu taumatau (avanoa tele).

3. A uma le faitauga, faaaoga ni minute se lua e fai ai se otootoga i le itu agavale.

4. I le pito i lalo, tusi ai ni mea sa e manao e suia pe faia ia lelei.

Talanoaina:Faatusatusa au tusitusiga ma isi tagata o le vaega. Na lelei ni au faamatalaga na tusia? E faapefea ona e faataitaia lenei mea e avea ai ma se vaisu?

Faitau:Sei o tatou manatuaina nei mea e faamaumauina ai mea na tatou aoaoina:

• Tusi ni laina i a tatou pepa tusitusi e vaelua ai; mulimuli i laasaga.

• Faamaumau ia manatu autu; faatumu ia faamatalaga i se taimi mulimuli ane.

• I lou mafaufau, faafesootai ia faamatalaga fou i se mea ua uma ona e iloa.

E faapefea ona ou manatuaina mea ua ou aoaoina?

Faitau:Afai tatou te agavaa, o le a mafai e le Agaga Paia ona “faamanatu mai foi … ia te [i tatou] i mea uma” (Ioane 14:26). E mafai foi ona tatou faateleina ia mea ua tatou manatua i le toe iloiloina i taimi o malologa patino. Ua faaalia e saienitisi e toeitiiti lava a mafai ona tatou manatuaina uma mea na tatou aoaoina pe afai tatou te mulimuli i le mamanu lenei:

Faamatalaga fou	1 le itula mulimuli ane	1 le aso mulimuli ane	1 le vaiaso mulimuli ane	1 le masina mulimuli ane
Faitau se mea pe aoao se mea i le vasega ma tusi ni faamatalaga	Faaalu ni minute se 10 e toe iloilo ai au faamatalaga tusitusia	Faaalu ni minute se 10 e toe iloilo ai; otooto mai au faamatalaga tusitusia	Faaalu ni minute se 10 e toe iloilo ai	Faaalu ni minute se 10 e toe iloilo ai; e le tatau ona galo ia te oe!

Talanoaina:E faapefea ona e suia au vaisu suesue ma le faatulagaga e faaaofia ai ia iloiloga nei? Ae a oe?

E faapefea ona ou auai ma le punouai i le vasega?

Talanoaina:Aisea e taua ai le auai i se vasega po o le vaega? O le a se mea e te faaali atu i le faiaoga pe a e auai?

Faataitai:Iloilo pe o le a le lelei o lou auai i le taliina o fesili nei.

Faailoga le “x” i se tasi o pusa e fa i talane o faamatalaga taitasi e faaalia ai pe o faapei mai oe i eria taitasi nei.
I la tatou vaega o le ola tutoatasi, ua ou saunia. Ou te taliina fesili ma auai soo.	Lei faia lava	O nisi taimi	Tele o taimi	Taimi uma
Pe a ou i ai i se vasega o le aoga, ua ou saunia. Ou te faia la’u vaega, tali fesili, ma faia gaoioiga uma e manaomia.	Lei faia lava	O nisi taimi	Tele o taimi	Taimi uma
Ou te taumafai e fesoasoani ia i latou i la’u vaega po o le vasega i le faalogologo atu ma i le suesue punouai pe galulue faatasi ma i latou.	Lei faia lava	O nisi taimi	Tele o taimi	Taimi uma
Ou te suesue i aso uma; ou te fuafuaina lo’u taimi ma mulimuli i la’u fuafuaga; e maea lelei a’u galuega atofaina.	Lei faia lava	O nisi taimi	Tele o taimi	Taimi uma
Ou te taumafai e fesoasoani i lo’u faiaoga po o le faufautua i le faalogologo ma le faia o nisi mea e sili atu nai mea na te faamoemoeina.	Lei faia lava	O nisi taimi	Tele o taimi	Taimi uma

Talanoaina:E faapefea ona e faaleleia lou auai punouai i aso taitasi?

E faapefea ona ou sueina ma le mataalia ni suega?

Faitau:E mafai ona faigata le sueina o suega. Ae e manaomia mo i tatou e faaali atu ai le lelei o le tatou aoaoina. E manaomia lo tatou tali atu ia i latou—o se mea lelei pe a fai tatou te mananao ia faamanuiaina!

Talanoaina:I le avea ai ma se vaega, faasoa atu ou manatu e uiga i fesili nei:

1. O le a se mea ua e faia e sueina atu ma le mataalia ou suega?

2. O a mea e te fefe ai e uiga i suega? E faapefea ona e foiaina?

3. E mafai faapefea ona e suia le ala e te saunia ai mo suega?

Faitau:O nisi nei o mea e mafai ona tatou faia e avea ai ma tagata lelei e sueina ni suega:

• Tatalo ma le faatuatua! Tatalo ao lei suesue ma ao lei faia le suega.

• Galue malosi e saunia ai; fai lau lava suega ao lei oo i le taimi.

• Pulea lou taimi i le faagasologa o se suega; fuafua po o le a le tele o le taimi e mafai ona e faaaluina i fesili po o vaega taitasi a o e amata.

• Faitau ma toe faitau ma le faaeteete ia faatonuga; o le a se mea latou te mananao moni lava i ai?

• Fai muamua fesili e sili ona faigofie e maua ai le toafimalie, ona toe foi lea i tua i isi [fesili].

• Fesili pe o le a e maua ni togi le lelei mo tali sese; afai e leai, mate.

E faapefea ona ou faia le mea o faamoemoe i ai le faiaoga?

Talanoaina:Aisea e taua ai le iloa ma faataunuu faamoemoega a ou faiaoga?

Faataitai:Liliu atu i se isi tagata o le vaega. O se tasi o oulua o le a avea ma se faiaoga ao le isi o le a avea ma tagata aoga. E tatau ona fai atu e le faiaoga ia fesili nei. E mafai ona faia e faiaoga ni tali. Ona fesuiai lea o matafaioi ma toe fai.

1. E faapefea ona faamanuiaina a’u i lau vasega?

2. O le a se mea e te manao ia matou aoaoina ma faia?

3. E faapefea ona e iloiloina la’u faatinoga?

4. O le a se mea e sili ona e faatauaina? Auai, vave, sauniuniga? E i ai se isi mea?

Talanoaina:O lea la ua e faataitaiina lenei mea, e mafai la ona e faia ma ou faiaoga mo’i? O a fea o le a e faia ai lenei mea?