O fanau a le Atua o loo uunaia e “saili i le aoaoina, … e ala i le suesue ma le faatuatua foi” (MF&F 88:118). O le mulimuli i lenei mamanu e fesoasoani ai i tagata taitoatasi ia agavaa, mo le fesoasoaniga a le Agaga Paia i le faagasologa o le aoaoga. O le aso, o le Initoneti ma isi punaoa ua saunia le tele o faamatalaga—o nisi o mea moni, o nisi o mea sese, ma o nisi mea e taufaasese—e uiga i aoaoga faavae o le Ekalesia, talafaasolopito, ma tofiga i mataupu faaagafesootai, ma faia ia faapitoa lona taua mo i tatou, e tatou te faalagolago atu ai i le Agagag Paia e fesoasoani ia i tatou e iloa le sao mai le sese. A’oa’oina ia iloa ma faaaoga punaoa talafeagai o faamatalaga o se vaega o lenei faagasologa.
Faitauga Faaopoopo
Dieter F. Uchtdorf, “What Is Truth?” (Faigalotu a le Church Educational System, Ian. 13, 2013), lds.org/broadcasts.
Faitau leotele le faamatalaga lenei o le Aoga a Perofeta na faia i Katelani, Ohaio:
“I le 1833, sa mauaina ai e le Perofeta ma se vaega o le Au Paia i Katelani, se avanoa faapitoa e aoao ai le talalelei. Ia Ianuari o lena tausaga, e tusa ai ma le poloaiga a le Alii (tagai MF&F 88:127–41), sa faatulagaina ai e le Perofeta le Aoga a Perofeta, e aoaoina ai i latou o loo umiaina le perisitua mo la latou galuega i le talaiga ma faasaunia ai i latou e folafola atu le talalelei. O le aoga sa faia lea i le potu o le fogafalelua o le faleoloa o Newel K. Whitney, lea sa nofo ai le Perofeta. E tusa ma le 25 usoga sa auai, o nisi sa faimalaga mai i le fia selau o maila mo le avanoa o le aoaoina o le talalelei i se potu e le tele atu nai lo le 11 i le 14 futu. O le toatele o nei alii o le a mulimuli ane avea ma Aposetolo, Fitugafulu, ma isi taitai o le Ekalesia. E ui o le Perofeta ma nisi o le usoga sa faapea ona aoaoina soo gagana, ae sa ave pea le faamuamua i le aoaoina o mataupu faavae o le talalelei, naunautaiga e faataunuuina a latou aoaoga mai i le taeao po seia oo i le leva o le aoauli. O lenei aoga sa faia mo le fa masina, ma o nisi aoga faapea sa faia mulimuli ane i Katelani ma faapea foi i Misuri, lea sa auai i ai le selau ma selau o tagata” (Aoaoga a Peresitene o le Ekalesia: Iosefa Samita [2007], 261).
Faamatala atu o le Mataupu Faavae ma Feagaiga 88 ua i ai faatonuga mai le Alii mo i latou o le a auai i le Aoga a Perofeta. Valaaulia tamaiti aoga e faitau le leoa le Mataupu Faavae ma Feagaiga 88:118 , ma vaai mo le mamanu o le aoaoina ua tuuina mai e le Alii. Ona talanoaina lea o fesili nei:
O le a sou manatu i le uiga o le “saili le aoaoina, … e ala i le suesue ma e ala foi i le faatuatua”?
O a ni auala e mafai i le mulimuli i lenei mamanu ona faateleina lo tatou mafai ona aoao? (Atonu e tuuina mai e tamaiti aoga ni tali eseese, ae ia mautinoa ua manino e faapea afai tatou te faaaofia le faatuatua i le faagasologa o le aoaoina, ua tatou agavaa mo le fesoasoani a le Alii. )
Valaaulia ni nai tamaiti aoga e feauauai i le faitauina leotele mai i le Mataupu Faavae ma Feagaiga 88:121–26, lea o loo faamaumauina ai nisi faatonuga mai le Alii mo le Aoga a Perofeta. Fai i le vasega e mulimuli i le faitauga, ma vaai mo mataupu faavae o loo fesoasoani ai ia i tatou, e malamalama pe faapefea ona tatou a’oa’oina e ala i le faatuatua. Atonu e te manao e fautuaina tamaiti aoga e faailoga mea ua latou maua. Mafaufau e lisi nei mataupu faavae i le laupapa a o faasoa mai e tamaiti aoga. Atonu e te manao e fautua atu i tamaiti aoga e tusi le fuaitau “mataupu faavae o loo aoao mai ai le ala e aoaoina ai e ala i le faatuatua” i tafatafa o a latou mau e sosoo ma nei fuaiupu. (Manatua: O le faia o faamatalaga i autafa o mau e mafai ona fesoasoani ai i tamaiti aoga, e faafaigofie ona sue ma manatua mataupu faavae taua.) Afai e lava le taimi, e mafai ona e fai i tamaiti aoga e sue le Alema 32:28, 41–43 ma le Ioane 7:17 mo nisi mataupu faavae faaopoopo.
E mafai faapefea e le ola ai i mataupu faavae o lo o aoaoaina mai i nei fuaiupu, ona fesoasoani ia i tatou e aoaoina e ala i le suesue ma e ala i le faatuatua? (A o tali mai tamaiti aoga, atonu e te manao e faamamafa atu e faapea, o le mulimuli i nei mataupu faavae o le a fesoasoani ai ia i tatou ia agavaa mo le fesoasoaniga a le Agaga.)
Afai ua tatou agavaa ia mauaina le Agaga o le Alii e faatasi ma i tatou, e faapefea e lenei Agaga ona aafia la tatou sailiga mo le upumoni?
Faaali atu le saunoaga lenei a Peresitene Dieter F. Uchtdorf o le Au Peresitene Sili, ma valaaulia se tamaitiiti aoga e faitau leotele:
Ata
Peresitene Dieter F. Uchtdorf
“E lei i ai lava i le talafaasolopito o le lalolagi se taimi na faigofie ai lo tatou mauaina o le tele o faamatalaga—o nisi e sao, o nisi e sese, ma o le tele lava e i ai ni nai mea moni.
“O le taunuuga, e lei i ai lava i le talafaasolopito o le lalolagi, se taimi na sili atu ai ona taua le aoaoina pe faapefea ona iloa le eseesega o le sao ma le sese” “What Is truth?” [Faigalotu a le Ofisa o Aoga a le Ekalesia, Ian. 13, 2013], 3, lds.org/broadcasts).
O a ni taunuuga e ono oo i ai pe afai tatou le aoaoina e iloa le eseesega o le mea sao ma le mea sese?
Tusi le fesili lenei i luga o le laupapa:
E faapefea ona e iloaina sa’o le eseesega o le mea moni ma le mea sese?
Faamatala atu o le faaaliga na faamaumauina i le Mataupu Faavae ma Feagaiga 91 na aoaoina ai Iosefa Samita i le ala e iloa ai po o se mea na ia faitauina i le Apokalifa ua sao. Fai i se tamaitiiti aoga e faitau leotele le ulutala o le vaega 91 a o mulimuli le vasega i le faitauga. Ona valaaulia lea o tamaiti aoga e mafaufau i le fesili i le laupapa a o latou suesueina le Mataupu Faavae ma Feagaiga 91 o se vasega.
Faamatala atu o le Apokalifa o se tuufaatasiga o tusi paia a tagata Iutaia. O nei tusi e lei aofia muamua i le Tusi Paia a Iutaia (Feagaiga Tuai) ae na aofia i le faaliliuga faaEleni o le Tusi Paia ae toeitiiti lava oo i le taimi o Keriso. Ina ua tuufaatasi e Kerisiano muamua tusi o le Tusi Paia ini senituri mulimuli ane, na latou faaaofia ai tusi o le Apokalifa o se faaopoopoga. O nisi lotu Kerisiano na faapea o tusi o le Apokalifa o le tusi paia, ae o isi lotu na latou le talitonu oni tusitusiga musuia. O le kopi o le Tusi Paia lea sa faaaogaina e Iosefa Samita e fatu ai ana faaliliuga musuia o loo iai le Apokalifa. Na fesili atu Iosefa i le Alii pe tatau ona aofia ai nei tusi i lana faaliliuina o le Tusi Paia.
O le a se mea na aoaoina e Iosefa Samita e uiga i le Apokalifa? (Atonu e te manao e faamatala atu e faapea o se faaofi o se tusiga sa faaopoopo i se tusitusiga, o nisi taimi e taunuu ai i le faaleagaina o le tusi muamua.)
E faapefea e le fautuaga i fuaiupu 4–6 ona fesoasoani ia i tatou ia iloa le mea sao mai le mea sese ma fuafua ai le moni o mea ua tatou faitauina? (E mafai ona faaaogaina e tamaiti aoga ni upu eseese, ae ia mautinoa latou te faailoa mai le upumoni lenei: E mafai e le Agaga Paia ona fesoasoani ia i tatou ia iloa pe moni mea o lo o tatou faitauina.
Faamatala atu o le tele naua o faamatalaga ua maua i le Initoneti, ua faatupuina ai le manaomia faateteleina mo i tatou taitoatasi, ina ia maua le meaalofa faaleagaga o le iloaina (tagai i le MF&F 46:23 ina ia tatou iloa lelei le mea sao mai le mea sese. (Mo nisi faamatalaga e uiga i le meaalofa o le iloaina e matua taua lava i o tatou olaga, tagai i le tusiga a Elder David A. Bednar“Ia Atamai,” Ensign po o le Liahona, Tes. 2006, 15–20.)
Tuu atu i tamaiti aoga taitoatasi se kopi o le saunoaga a Elder Steven E. Snow o le Fitugafulu. Valaaulia tamaiti aoga e suesue parakalafa muamua e lua mo le fautuaga a Elder Snow, sa tuuina mai e uiga i le iloiloina o faamatalaga atonu tatou te faitauina i le talafaasolopito ma aoaoga o le Ekalesia.
Na saunoa mai Elder Steven E. Snow o le Fitugafulu:
“O le Initoneti ua tuuina ituaiga uma o faamatalaga i tumutumu o o tatou tamatamailima—lelei, leaga, moni, le moni—e aofia ai faamatalaga i le talafaasolopito o le Ekalesia. E mafai ona e faitau i se vaega tele e uiga i lo tatou talafaasolopito, ae e taua le faitau i ai ma malamalama i ai i le talaaga. O le faigata o nisi faamatalaga i le initoneti o le, ua see ese ma le anotusi ma e te le iloa lelei ai le ata atoa.
“O faamatalaga o loo taumafai e faamaasiasi le Ekalesia e masani ona mamafa pitotasi ma lē talafeagai. E tatau ona tatou sailia punavai e sili atu ona le faaituau e faamatalaina o tatou talitonuga ma lo tatou talafaasolopito. O nisi uepisaite e ese le agaga-faalealofa ma e mafai ona maoae i le ala latou te tuuina atu ai faamatalaga. Vaavaai mo punavai e i ai tusitalafaasolopito ua faamamaluina ma faaaloalogia, e tusa po o i latou o ni tagata o le Ekalesia pe leai.
“O nisi tagata talavou e tetei ma lē talitonu i tusi ma mea e tetee-i Mamona i luga o le Initioneti ona latou te le’i saunia i latou lava e tetee atu i ai. Atonu e le’i lava se taimi na latou faaaluina i le itu faaleagaga e sauni ai ma faamalolosia ai i latou lava mo soo se mea e ono oo mai. A oo mai aafiaga o le olaga e faafuasei ai ona oo mai faigata mo i latou, e taua lo latou faia o na mea faavae lea tatou te talanoa soo i ai: faaauau ona suesue i tusitusiga paia ma fai ni tatalo anoa ma lo tatou Tama Faalelagi. O na mea faavae e saunia ai tagata mo ituaiga uma o faigata, e aofia ai tusiga e tetee ai i Mamona o le a latou tau i ai i luga o le initoneti.”(“Faapaleniina o le Talafaasolopito o le Ekalesia,” Liahona, Iuni 2013, 44–45).
Ona tatou te manaomia le iloilo ma le faaeteete o le moni o punaoa o faamatalaga e uiga i le talafaasolopito ma aoaoga o le Ekalesia, e mafai faapefea ona e faaaogaina aoaoga a Elder Snow, e fesoasoani ai ia te oe e iloilo ai le moni o se mea na e faitauina e uiga i le Ekalesia?
Valaaulia tamaiti aoga e faitau le leoa le parakalafa lona tolu o le saunoaga a Elder Snow. Ona talanoaina lea o le fesili lenei:
O le a faapefea ona fesoasoani le fautuaga a Elder Snow pe a e feagai ma ni faamatalaga e ono luiina ai ou talitonuga?
Tumau i le faatuatua pe a tulai mai ni fesili
Faamatala atu e faapea o tagata o le Ekalesia atonu e i ai taimi e i ai ni fesili pe oni masalosaloga foi e uiga i aoaoga, talafaasolopito, po o tulaga i mataupu faaagafesootai o le Ekalesia. Faasoa atu le saunoaga lenei a Peresitene Dieter F. Uchtdorf i au tamaiti aoga:
Ata
Peresitene Dieter F. Uchtdorf
O se mea masani le i ai o fesili—o sina fatu itiiti o le fesili faamaoni ua tele lava ina tupu ae ma avea ma se laau mafalā o le malamalama. O loo i ai ni nai tagata o le Ekalesia o e, po o le a lava le taimi, e lei tauivi lava ma ni fesili matuia pe maaleale. O se tasi o faamoemoega o le Ekalesia o le faafailele lea ma atiae le fatu o le faatuatua—e oo lava i nisi o taimi i eleele matutu o le masalosalo ma le le mautonu” (“Sau, Auai Faatasi ma i Matou,” Ensign po o le Liahona, Nov. 2013, 23).
Saunia mo tamaiti taitoatasi se kopi o pepa e tufa atu “Iloaina o le Mea Sao Mai le Mea Sese,” e aofia ai fautuaga mai taitai o le Ekalesia mo i latou e i ai fesili po o masalosaloga. Valaaulia tamaiti aoga e faitau le leoa fuaitau i pepa e tufa atu ma faailoa mai mataupu faavae o le a fesoasoani ai i se tasi e foia fesili po o masalosaloga i se tulaga faamaoni. A maea se taimi talafeagai, valaaulia tamaiti aoga e faamatala mai le ala e mafai ai ona fesoasoani se mea na latou faitauina i le pepa e tufa atu, i se tasi o i ai se fesili po o se masalosaloga e uiga i aoaoga faavae, talafaasolopito, po o tulaga i mataupu faaagafesootai o le Ekalesia.
A o e faaiuina le lesona, faamamafa atu e faapea, e ui lava atonu e i ai ni fesili tatou te le maua ni tali i ai i o tatou olaga, e mafai ona tatou maua tali i a tatou fesili e sili ona maoae pe a tatou usiusitai i poloaiga, suesue punaoa talafeagai o faamatalaga—ae maise lava upu a perofeta soifua—saili le taitaiga e ala i le tatalo, ma faatino le onosai ma le faatuatua.
Valaaulia tamaiti aoga e faasoa atu aafiaga na latou mauaina, ina ua latou lagonaina le taitaiga a le Alii i le fesoasaoni ia i latou e saili le mea moni ma tali ia latou fesili.
Uunaia tamaiti aoga e toe iloilo fuaitau i pepa e tufa atu, ma valaaulia i latou e mulimuli i le fautuaga mai le lesona, e saili ai le aoaoina e ala i le suesue ma le faatuatua.
Dieter F. Uchtdorf, “What Is Truth?” (Faigalotu a le Ofisa o Aoga a le Ekalesia, Ian. 13, 2013), lds.org/broadcasts.
Iloaina o le Mea Sao mai le Mea Sese
O Faavae o le Toefuataiga—Lesona 10
I tisipenisione uma lava o le talalelei, o malosiaga a le tiapolo ua tetee i le Atua ma Lana galuega. Ae o le galuega a le Atua o le a le mafai ona faalavelaveina. I nei aso e gata ai, ua uma ona tofia le maa mai le mauga, ma o le a “taavale atu, seia tumu ai le lalolagi atoa” (MF&F 65:2). Ae ui i lea, ona o tagata taitoatasi o le Ekalesia e mafai ona faaseseina, e manaomia e i tatou taitoatasi ona “mataala ma tatalo e le aunoa” (3 Nifae 18:18).
Ata
Peresitene Thomas S. Monson
“E le manaomia e oe ma au, i lenei vaitaimi ua anoanoai ai mea ua iloa ina ua toefuatai mai le atoaga o le talalelei, ona sailia le upumoni i ala e le i faia muamua ai lava. Ua uma ona tosi e se Tama Faalelagi alofa lo tatou ala ma saunia se taiala faatuatuaina—o le usiusitai lea. O le iloa o le upumoni ma tali i a tatou fesili silisili e oo mai ia i tatou pe a tatou usiusitai i poloaiga a le Atua. (Thomas S. Monson, “O le Usiusitai e Aumaia ai Faamanuiaga,” Ensign po o le Liahona, Me 2013, 89).
Ata
Peresitene Dieter F. Uchtdorf
“Au uo pele—faamolemole, ia muamua e masalosalo i ou masalosaloga ae e te lei masalosalo i lou faatuatua. Ia le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso” (Dieter F. Uchtdorf, “Sau, Auai Faatasi ma i Matou,” Ensign po o le Liahona, Nov. 2013, 23).
Ata
Peresitene Dieter F. Uchtdorf
“O Satani o le taufaasese maoae, ‘le ua molia [o le] uso’ [Faaaliga 12:10], le tama o pepelo uma [tagai i le Ioane 8:44], o le ua faaauauina pea ona saili e faasese ina ia mafai ona ia faatoilaloina i tatou [tagai i le MF&F 50:3]. …
“Mo i latou ua latou talisapaia le upumoni, o lana fuafuaga autu o le faasalalauina lea o fatu o le masalosalo. Mo se faataitaiga, ua ia faia le tele o tagata o le Ekalesia ia tautevateva, pe a latou iloaina faamatalaga e uiga i le Ekalesia e foliga mai e feteenai i mea na latou aoaoina muamua.
“Afai e te aafia i se taimi faapena, manatua i lenei vaitau o faamatalaga e faapea, e toatele i latou e fatuina le masalosalo e faatatau i soo se mea ma mea uma, i soo se taimi ma nofoaga uma. …
“… Ma e taua i taimi uma le manatua e le faapea ona o se mea ua lolomiina i le pepa, faaalia i le Initoneti, e faaali soo mai, pe e toatele se vaega e talitonu i ai e le faapea ai ua moni.
“O nisi taimi o manatu ma faamatalaga e tuuina mai i se auala latou te foliga mai ai e matuai moni lava. …
“… O le mea na foliga mai e feteenai atonu ua malamalama atoatoa nei i ai a o tatou saili i ai ma maua nisi faamatalaga aoga” (Dieter F. Uchtdorf, “What Is Truth?” [Faigalotu a le Church Educational System, Ian. 13, 2013], lds.org/broadcasts).
Ata
Elder Dallin H. Oaks
“Pe a tatou amata i le faatusatusaina o faatinoga faaonapo nei, ma feteenaiga i mea ua tatou iloa i le fuafuaga a le Atua, ma tulaga ua tuuina mai i le upu a le Atua ma aoaoga a Ana perofeta soifua, … tatou te iloa ai o lenei mea ua tuuina ai i tatou i se tulaga saogalemu faavavau” (Dallin H. Oaks, “As He Thinketh in His Heart” [o se afiafi ma Elder Dallin H. Oaks, Fep. 8, 2013], lds.org/broadcasts).
Ata
Elder Jeffrey R. Holland
I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua ia te oe, tusa lava pe itiiti lena faatuatua. … A alia’e mai na taimi ma oo mai faafitauli, ma a le vave ona maua se vaifofo, ia taofi mau i mea ua uma ona outou iloa ma tutu malolosi seia oo mai se isi malamalama” (Jeffrey R. Holland, “Le Alii e, Ua Ou Faatuatua,” Ensign po o le Liahona, Me 2013, 93–94).
Ata
Elder Neil L. Andersen
Atonu tatou te faamanatu atu i le tagata suesue faamaoni o faamatalaga o loo i le Initoneti e le o faamamaeseina ai ia faamatalaga le “sa’o”. O nisi faamatalaga, e tusa lava po o le a le faatalitonuina, e le moni lava.” (Neil L. Andersen, “Iosefa Samita,” Ensign po o le Liahona, Nov. 2014, 29).
Ata
Elder Paul V. Johnson
“O tali i fesili faaleagaga e tuuina atu i tagata taitoatasi, o e e le faamaaaina o latou loto; o e fesili atu i le faatuatua, talitonu o le a latou mauaina; ma e e tausia ma le filiga poloaiga” (Paul V. Johnson, “A Pattern for Learning Spiritual Things” [Lauga i faiaoga faalelotu a le Church Educational System, Aug. 7, 2012], si.lds.org).
Ata
Elder Neal A. Maxwell
“Suesueina o le Ekalesia… e ala i le vaaiga a e na liliuese[e] pei o le faatalanoaina o Iuta ia malamalama ia Iesu” (Neal A. Maxwell, “All Hell Is Moved” [Faigalotu a le Iunivesite Polika Iaga, Nov. 8, 1977], 3, speeches.byu.edu).