Lesona 11

O le Siufofoga o le Alii i le Mataupu Faavae ma Feagaiga

Folasaga

O le Mataupu Faavae ma Feagaiga o se faamaoniga e faapea, o loo fetalai mai le Atua i perofeta i aso e gata ai ma o loo Ia faasauniaina le lalolagi mo le Afio Faalua Mai o Iesu Keriso. Pe a tatou faitau i faaaliga o loo maua i le Mataupu Faavae ma Feagaiga, e mafai ona tatou lagonaina le siufofoga o Iesu Keriso. Pe a tatou oo mai i le taua o le malamalama i Mataupu Faavae ma Feagaiga, o le a tatou faatauaina ana aoaoga e sili atu i oa uma a le lalolagi.

Faitauga Faaopoopo

Ezra Taft Benson, “O le Tusi a Mamona ma le Mataupu Faavae ma Feagaiga,” Liahona, Ian. 2005, 8–12.

Fautuaga mo le Aoaoina Atu

Faatomuaga i le Mataupu Faavae ma Feagaiga

O le Siufofoga o le Alii i le Mataupu Faavae ma Feagaiga

Faaali atu le saunoaga lenei mai ia Peresitene Ezra Taft Benson (1899–1994). Fai atu i se tamaitiiti aoga e faitau leotele a o mulimuli i ai le vasega.

“O le Tusi a Mamona e aumaia tagata ia Keriso. O le Mataupu Faavae ma Feagaiga e aumaia tagata i le malo o Keriso, o le Ekalesia a Iesu Keriso o le Au Paia o Aso e Gata Ai, ‘le ekalesia ola e tasi ma le faamaoni i luga o le fogaeleele atoa’ [MF&F 1:30]. Ua ou iloa lena mea.

“O le Tusi a Mamona o le ‘maa’au’au’ o la tatou tapuaiga, ae o le Mataupu Faavae ma Feagaiga o le maa aupito i luga, o loo i ai faaaliga faifaipea o aso e gata ai. Ua uma ona tuuina e le Alii Lana faamaufaailoga i luga o le maa’au’au ma le maa aupito i luga” (“O le Tusi a Mamona ma le Mataupu Faavae ma Feagaiga,”Liahona, Ian. 2005, 8).

O le a se mea na e mauaina i le Mataupu Faavae ma Feagaiga o lo o faaalia ai le taua o le tusi i le Ekalesia ma tagata taitoatasi?

Fai i le vasega e sue a latou tusitusiga paia i le faatomuaga i le Mataupu Faavae ma Feagaiga , o loo maua i le amataga o le Mataupu Faavae ma Feagaiga. Valaaulia ni nai tamaiti aoga e feauauai i le faitauga o le parakalafa tasi ma le tolu leotele, ao mulimuli le isi vaega o le vasega i le faitauga. Fai i le vasega e vaai mo auala e ese ai le Mataupu Faavae ma Feagaiga mai isi tusi o tusitusiga paia, ma matau le faamamafa o le faatomuaga i le faalogo i le siufofoga o le Alii. Ona fesili atu lea:

E faapefea ona ese le Mataupu Faavae ma Feagaiga mai i isi tusitusiga faavae?
O le a le mea o loo tau mai e le faatomuaga e uiga i le “siufofoga o le Alii o Iesu Keriso”? (Fesoasoani i tamaiti aoga ia malamalama e faapea a o tatou suesue i le Mataupu Faavae ma Feagaiga, e mafai ona tatou aoaoina ia iloa le siufofoga o le Alii o Iesu Keriso. Faamatala atu e faapea o le fuaitau “siufofoga o le Alii,” po o se isi faaupuga, e sili atu i le 40 taimi o loo taua ai i le Mataupu Faavae ma Feagaiga [mo se faataitaiga, tagai i le MF&F 1:2; 18:35–36; 76:30]; o le fuaitau “ua faapea ona fetalai mai le Alii” e sili atu i le 60 taimi o loo taua ai i le Mataupu Faavae ma Feagaiga [mo se faataitaiga, tagai i le MF&F 36:1; 56:14].) O le faalogo i le siufofoga o le Alii o se autu taua i le Mataupu Faavae ma Feagaiga.

Faaali atu le fuaitau lenei mai ia Elder Neal A. Maxwell (1926–2004) o le Korama a Aposetolo e Toasefululua. Fai atu i se tamaitiiti aoga e faitau leotele a o mulimuli i ai le vasega.

“Afai o le a tuuina atu le fesili po o le fea tusi o tusitusiga paia o loo sili ona maua ai le avanoa e faalogo soo ai o fetalai mai le Alii, e toatele tagata o le latou muai manatu e faapea o le Feagaiga Fou. O le Feagaiga Fou o se tuufaatasiga maoae lea o galuega ma le tele o aoaoga faavae na faataunuuina e le Mesia. Ae o le Mataupu Faavae ma Feagaiga e mafai ona tatou maua ai oa o le upu moni lea e tuu sao mai i le Alii. (“O le Mataupu Faavae ma Feagaiga: o le Siufofoga o le Alii,” Liahona, Ian. 1980, 4).

E ono faapefea e le aoaoina e faalogo ma iloa le siufofoga o le Alii e ala i le suesueina o le Mataupu Faavae ma Feagaiga ona faia se eseesega i lou olaga?

Tuu atu ni nai minute i tamaiti aoga e suesue ai le parakalafa lona valu o le faatomuaga i le Mataupu Faavae ma Feagaiga. Fai ia i latou e faailoa mai aoaoga faavae ua faamaumauina i le Mataupu Faavae ma Feagaiga. A maea se taimi talafeagai, fesili atu:

O le a se mea ua faatusa i ai le Mataupu Faavae ma Feagaiga o le “tau i le Ekalesia o oa uma o le lalolagi”?

Mafaufau e faasoa atu le saunoaga a Elder Steven E. Snow o le Fitugafulu e uiga i faaaliga o lo o maua i le Mataupu Faavae ma Feagaiga:

“E ui i nei faaaliga musuia ma siitia, o le Mataupu Faavae ma Feagaiga ua aoaoina ma faamamafaina mai ai aoaoga taua. … Na tusia e Elder John A. Widtsoe (1872–1952), ‘O aoaoga faavae uma e aoaoina e le Ekalesia a Iesu Keriso o le Au Paia o Aso e Gata Ai e maua, a le o le otootoina pe faaataata mai, i le Tusi o le Mataupu Faavae ma Feagaiga. E tusa ai ma mea ua ou iloa, e leai se aoaoga faavae ua aoaoina e le Ekalesia, e le o mauaina i se auala po o se isi ala i lenei tusi.’ Na ia faaopoopo mai e faapea, o le Mataupu Faavae ma Feagaiga e taua, aua ‘e leai se isi o a tatou tusi paia e mafai ona faataatia maia se aoaoga faapea i se suesuega atoa, o aoaoga faavae uma lava a le Ekalesia’ [The Message of the Doctrine and Covenants (1969), 117]” (“Treasuring the Doctrine and Covenants,” Ensign, Ian. 2009, 52).

Valaaulia tamaiti aoga e faasoa mai pe faapefea e le suesueina o le Mataupu Faavae ma Feagaiga ona faamanuiaina o latou olaga.

Mataupu Faavae ma Feagaiga 1:1–17; 5:10

Talafaasolopito o le Mataupu Faavae ma Feagaiga

Faamatala i tamaiti aoga e faapea o le faaaliga o lo o faamauina i le Mataupu Faavae ma Feagaiga 1 na muamua ona tuuina mai e le Alii o se muai tusiga i le Tusi o Poloaiga, o se tuufaatasiga muamua o faaaliga a Iosefa Samita. O lenei tuufaatasiga o faaaliga, faatasi ai ma le tele o isi faaaliga a le Perofeta ma le Lauga i le Faatuatua, na mulimuli ane lolomiia o se Mataupu Faavae ma Feagaiga. Vaega 1 ua tuuina mai ai le manaomia mo lenei tusi o tusitusiga paia i o tatou aso. Valaaulia se tamaitiiti aoga e faitau leotele le ulutala o le Mataupu Faavae ma Feagaiga 1. Fesoasoani i tamaiti aoga e iloilo le ulutala o le vaega i le fai atu o fesili nei:

O le a le faaiuga na ioeina i le konafesi faapitoa a toeaiina? (O faaaliga na mauaina e Iosefa Samita seia oo mai i le taimi nei, o le a lolomiina i le tusi. Faamanatu i tamaiti aoga e ui lava o lenei tusi na taua muamua o le Tusi o Poloaiga, o le a taua mulimuli ane o le Mataupu Faavae ma Feagaiga.)

Valaaulia ni nai tamaiti aoga e feauauai i le faitauina leotele mai o le Mataupu Faavae ma Feagaiga 1:1–5. Ona fesili lea i le vasega:

O ai sa fetalai i ai le Alii i fuaiupu nei?
E faapefea ona e otootoina le totonugalemu o le savali o loo faamauina i nei fuaiupu?
E faapefea ona fetalai mai le Alii o le a Ia tuuina mai Ana lapataiga i tagata uma? (E mafai e tamaiti aoga ona faailoa mai mataupu faavae lenei: E fetalai mai le Alii i Ana lapataiga i tagata uma, e ala mai i Ona soo filifilia.

Valaaulia se tamaitiiti o le vasega e faitau leotele le Mataupu Faavae ma Feagaiga 1:12. Ona fesili atu lea:

E tusa ai ma le vaefaamatalaga 12e, o le a le mea o lo o finagalo le Alii ia saunia i ai le lalolagi? (A uma ona tali mai tamaiti aoga, e mafai ona e uunaia i latou e vaai i vaefaamatalaga e faamanino ma faalauteleina ai lo latou malamalama i le mau.)

Fai i tamaiti aoga e faitau le Mataupu Faavae ma Feagaiga 1:14–16} le leoa, ma vaai mo le faamatalaina e le Alii o le lalolagi o loo tatou nonofo ai. A uma ona faasoa mai tamaiti aoga i mea na latou mauaina, fai ia i latou e faitau le fuaiupu 17ma faamatala mai le mea na faia e le Alii e tusa ai ma le faafitauli o lo o faamatalaina i fuaiupu 14–16.

Fai i se tamaitiiti aoga e faitau le Mataupu Faavae ma Feagaiga 5:10 leotele a o mulimuli atu le vasega. Ona talanoaina lea o fesili nei:

O le a se mea ua e aoaoina mai i lenei fuaitau e uiga i le valaauga tulaga ese o Iosefa Samita? (E tatau i tamaiti aoga ona faailoa mai le upumoni lenei:Na valaauina e le Alii Iosefa Samita e tuuina mai Lana afioga i le lalolagi.).

Valaaulia se tamaitiiti aoga e faitau le faamatalaga a Elder Jeffrey R. Holland o le Korama a Aposetolo e Toasefululua:

“Mai mea uma lava na ia ausia … na tuua ai e Iosefa ia i tatou e sili atu nai lo mea uma se talatuu mausali o faaaliga paia—e leai se faaaliga e tasi ma tupito e aunoa ma se faamaoniga po o se taunuuga, ma e leai “ma se musumusuga pei e vaivai e ofi atu i mafaufau o tagata lelei uma” i soo se mea, ae o ni taitaiga patino ma le maoti faifaipea mai le Atua. E pei ona faaupu manino ai e se uo lelei ma le atamai o le Au Paia o Aso e Gata Ai, “I se taimi na matuai osofaia ai lava ia faapogai o le faaKerisiano e malosiaga o le atamai fetuunai, na toe faafoi atu ai ma le manino e Iosefa Samita [e toatasi] le faaKerisiano o ona po nei i ona uluai faapogai o loo i totonu o faaaliga’ [Richard L. Bushman, “A Joseph Smith for the Twenty-First Century,” i le Believing History (2004), 274]” (“Perofeta, Tagata Vaai, ma Tali Faaaliga,” Ensign po o le Liahona, Nov. 2004, 8).

Ua faapefea e lenei lesona ona faalolotoina lou malamalama i le faamoemoega ma le taua o le Mataupu Faavae ma Feagaiga?
Ua faapefea e le Mataupu Faavae ma Feagiaga ona faamalosia lau molimau i le valaauga paia o Iosefa Samita o se perofeta a le Atua?

Faaiu i le fai atu i tamaiti aoga pe i ai se isi e fia faasoa mai a latou molimau i aoaoga faavae, mataupu faavae, ma upumoni ua faamaumauina i le Mataupu Faavae ma Feagaiga.

Faitauga a Tamaiti Aoga

Faatomuaga i le Mataupu Faavae ma Feagaiga; Mataupu Faavae ma Feagaiga 1:1–39; 5:10.
Ezra Taft Benson, “O le Tusi a Mamona ma le Mataupu Faavae ma Feagaiga,” Liahona, Ian. 2005, 8–12.