Lesona 23

Faasologa i le Au Peresitene

Folasaga

I le latalata i le faaiuga o lona soifua, na tuuina atu ai e Iosefa Samita ki o le perisitua o lenei tisipenisione i sui o le Korama a Aposetolo e Toasefululua. Ina ua mavae le maliu faamaturo o le Perofeta, i se fonotaga na faia ia Aokuso 8, 1844, na maua e le toatele o le Au Paia se faaaliga faaleagaga e faamaonia ai ia i latou o Polika Iaga, lea na Peresitene i le Korama a Aposetolo e Toaseflululua, o le a taitaia le Ekalesia. Ao malamalama tamaiti aoga i mataupu faavae e faatatau i le faasologa i le Au Peresitene o le Ekalesia, o le a latou maua le lagona toafimalie faapea na filifilia ma saunia e le Alii tagata taitoatasi e avea ma Peresitene o Le Ekalesia a Iesu Keriso o le Au Paia o Aso e Gata Ai.

Faitauga Faaopoopo

“Succession in the Presidency,” mataupu 3 i Teachings of the Living Prophets Student Manual (Tusi lesona Church Educational System, 2010), 28–41.
“The Twelve to Bear Off the Kingdom,” chapter 23 in Church History in the Fulness of Times Student Manual, lom. 2 (Tusi lesona a le Church Educational System , 2003), 286–96.
Brent L. Top ma Lawrence R. Flake, “‘The Kingdom of God Will Roll On’: Succession in the Presidency,” Ensign, Aok. 1996, 22–35.

Fautuaga mo le Aoaoina Atu

Mataupu Faavae ma Feagaiga 107:33; 112:30–32

E umia e aposetolo ki o lenei tisipenisione

Fai atu le fesili lenei:

E faapefea ona ese le faasologa o le filifilia o se Peresitene fou o Le Ekalesia a Iesu Keriso o le Au Paia o Aso e Gata Ai mai le ala e ono filifili ai taitai o isi faalapotopotoga?

Tau atu i tamaiti aoga o lenei lesona o le a iloiloina ai le faasologa o le taitaiga o le Ekalesia ina ua mavae le maliu o le Perofeta o Iosefa Samita. Faamatala atu faapea ini nai tausaga talu lona maliu, na maua e le Perofeta faaaliga e faatatau i le Au Peresitene Sili ma le Korama a Aposetolo e Toasefululua. Fai i tamaiti aoga e suesue le Mataupu Faavae ma Feagaiga 107:33 ma le 112:30–32 ma vaai mo le faamatalaga a le Alii o le pule o le perisitua na umia e sui o le Au Peresitene Sili ma le Korama a le Toasefululua.

Na faapefea ona faamatalaina e le Alii le pule o le Au Peresitene Sili ma le Korama a Aposetolo e Toasefululua? (Ia mautinoa ua malamalama tamaiti aoga i le mataupu faavae lenei: O sui o le Au Peresitene Sili ma le Korama a Aposetolo e Toasefululua e umia ki o le perisitua i lenei tisipenisione, ma e galulue le Toasefululua i lalo o le taitaiga a le Au Peresitene Sili.)

pepa e tufa atu, Faasologa i le Au Peresitene

Tufa se kopi o pepa e tufa atu o loo maua i le faaiuga o le lesona i tamaiti aoga taitasi. Faamatala atu o Iosefa Samita na faaalu le ono masina mulimuli o lona soifuaga e fono soo ai ma sui o le Korama a Aposetolo e Toasefululua e saunia ai i latou e taitai le Ekalesia. Tuu atu i se tamaitiiti aoga e faitau leotele le vaega o pepa e tufa atu ua faaautuina “Fonotaga ma Aposetolo e Toasefululua, Mati 1844.” Tau atu i tamaiti aoga o se tala puupuu lenei o se fonotaga na faia e le Perofeta o Iosefa Samita ma Aposetolo ma isi taitai o le Ekalesia, e pei ona faamaumauina e Peresitene Uilifoti Uitilafi, o le sa avea ma Aposetolo i lena taimi. A uma le faitauga, fesili atu:

Na faapefea e lenei tuuina atu o ki i sui o le Korama a Aposetolo e Toasefululua ona fesoasoani e saunia i latou mo le taimi pe a oo i le taimi e le toe i ai ai le Perofeta o Iosefa Samita faatasi ma i latou? (Na latou maua na lava ki o le perisitua na umia e le Perofeta o Iosefa Samita.)
Aisea na taua ai mo Iosefa Samita le tuuina atu o nei ki i Aposetolo ae lei maliu o ia? (I lena taimi, na o Iosefa Samita le tagata na umia ki uma o le perisitua o lenei tisipenisione. Pe ana faapea na te le tuuina atu nei ki i isi, semanu e toe o mai agelu i le lalolagi e toefuatai mai.)

Mataupu Faavae ma Feagaiga 124:127-28

Na suitulaga Polika Iaga ia Iosefa Samita o le Peresitene o le Ekalesia

Faamatala atu ina ua faatulaga muamua le Korama a Aposetolo e Toasefululua i le 1835, na fai le faatulaga o tulaga i tausaga. O Thomas B. Marsh, lea na talitonuina i lena taimi o le Aposetolo aupito i matua, na taua o le Aposetolo sinia (ona iloaina lea o David W. Patten o le Aposetolo aupito matua moni lava).

Valaaulia se tamaitiiti aoga e faitau leotele le Mataupu Faavae ma Feagaiga 124:127-28. Faamatala atu faapea ia Oketopa 1838, na liliuese Peresitene Marsh ma tuua le Ekalesia ma na maliu David W. Patten. Na avea Polika Iaga ma Aposetolo sinia, e pei ona faamatalaina i nei fuaiupu. I le mulimuli ai i le uluai filifiliga o Aposetolo ma faaauau ai lava e oo mai nei, o le sinia i le Korama a Aposetolo e Toasefululua e fuafuaina i le aso o le faauuga.

Faamatala atu faapea ina ua maliliu faamaturo Iosefa ma Ailama Samita ia Iuni 27, 1844, o le Toasefululua, sei vagana ai Ioane Teila ma Uiliata Risati, sa auauna atu faamisiona i le Iunaite Setete i sasae. I totonu o le tolu vaiaso, e ui i lea, ua silafia uma e Aposetolo le tala fou matautia ma toe foi faavave mai ai i Navu. Ao taunuu mai Aposetolo, na latou mauaina le le mautonu i tagata o le Ekalesia po o ai o le a taitaia le Ekalesia. O nisi o tagata o le Ekalesia na talitonu o le taitaiga na pau tonu lava i le Korama a Aposetolo e Toasefululua. I le isi ono masina, na tuuina atu e ni nai alii ni manatu na i ai ia i latou le pule e taitai ai le Ekalesia. Fai ini tamaiti aoga se toalua e faitau leotele vaega o le pepa e tufa atu ua faaautuina “Manatu o Sini Rikitone” ma “Manatu o James Strangs.” Ao faalogo le vasega, valaaulia i latou e mafaufau i popolega atonu latou te maua e uiga i nei manatu pe ana faapea latou te i ai i Navu i lena taimi.

Toe tulitatao i le fesili atu i tamaiti aoga:

Aisea na le lelei ai manatu na faia e nei alii? (Atonu e te manaomia le faasino atu faapea e ui lava o Sini Rikitone sa avea o se sui o le Au Peresitene Sili, e lei tuuina atu e Iosefa ki o le perisitua ia te ia,)

Valaaulia se tamaitiiti aoga e faitau leotele le vaega o le pepa e tufa atu ua faaautuina “Aokuso 7, 1844.” Talanoaina lenei fesili ma le vasega:

Aisea na taua ai le molimau a Polika Iaga i ki o le galuega faaaposetolo? (A uma ona tali mai tamaiti aoga, tusi le aoaoga faavae lenei i le laupapa: E umia e Aposetolo ki uma o le perisitua e manaomia e pule faamalumalu ai i le Ekalesia.)

Valaaulia se tamaitiiti aoga e faitau leotele le vaega e tufa atu ua faaautuina “Aokuso 8, 1844, 10:00 i le Taeao.”

Na faapefea ona faamanuiaina e le Alii le Au Paia ia iloa po o ai ua Ia tofia e taitai le Ekalesia?
E faapefea ona tatou iloa o taitai o le aso ua valaauina e le Atua? (A uma ona tali mai tamaiti aoga, tusi le aoaoga faavae lenei i le laupapa:E ala mai le Agaga Paia, e mafai ona tatou maua se molimau o i latou ua taitaia le Ekalesia ua valaauina e le Atua.)
O le a le taimi na e lagonaina ai ua molimau mai le Agaga ia te oe o le Peresitene o le Ekalesia i le aso ua valaauina e le Atua?

Faamatala atu i le taimi o le fonotaga na faia i le 2:00 i le afiafi ia Aokuso 8, na saunoa ai Polika Iaga ma isi Aposetolo. Tuu atu i se tamaitiiti aoga e faitau leotele le vaega e tufa atu ua faaautuina Aokuso 8, 1844, 2:00 i le Afiafi.”

Faamatala atu faapea ina ua maliu Iosefa Samita, o Polika Iaga, le Aposetolo sinia, na mafai loa lava ona faaaoga ki uma o le perisitua. Mo le silia ma le tolu tausaga talu le maliu faamaturo o le Perofeta, o le Korama a Aposetolo e Toasefululua na pule faamalumalu i le Ekalesia, i lalo o le taitaiga a Polika Iaga. Ona oo lea ia Tesema 5, 1847, na lagolagoina Polika Iaga o le Peresitene o le Ekalesia ma na faatulagaina le Au Peresitene Sili.

Na siitia Sini Rikitone i Pittsburgh, Pennsylvania, ma faatulaga se Ekalesia a Keriso i aposetolo, perofeta, faitaulaga, ma tupu. O lenei lotu na faaumatia i le 1847. Ma e ui lava o le manao o James Strang i le au peresitene na sese, o le toatolu o Aposetolo muamua e Toasefululua—William E. McLellin, John E. Page, ma William Smith—na lagolagoina o ia. Na fasiotia Strang i le 1856 e ni soo le fiafia.

Ina ia fesoasoani i tamaiti aoga ia malamalama i le faagasologa o le faasologa i le Au Peresitene o le Ekalesia i le aso, faaali atu le saunoaga lenei a Peresitene Boyd K. Packer o le Korama a Aposetolo e Toasefululua e uiga i le mea na tupu i le mavae ai o le maliu o Peresitene Gordon B. Hinckley. Fai atu i se tamaitiiti aoga e faitau leotele le saunoaga.

“Sa le fesiligia lava le mea o le a fai, e leai se faatuai. Na matou iloa lava o le Aposetolo sinia o le Peresitene lea o le Ekalesia. Ma i lena fonotaga paia, na lagolagoina ai e le Korama a Aposetolo e Toasefululua ia le Susuga a Peresitene Thomas S. Monson o le Peresitene o le Ekalesia. … O lenei, e pei ona tuuina mai e tusitusiga paia, ua na o ia lava le tagata i luga o le fogaeleele ua i ai le aia tatau e faaaoga ai ia ki uma. Ae o loo umia e i matou uma i le avea ai o ni Aposetolo. E toatasi lava le tagata o i matou e valaauina ma faauuina, ma e avea o ia o le Peresitene O Le Ekalesia a Iesu Keriso o le Au Paia o Aso e Gata Ai” (“O le Toasefululua,” Ensign po o le Liahona, Me 2008, 83).

A mavae le maliu o le Peresitene o le Ekalesia, o ai o le a avea ma le isi Peresitene o le Ekalesia? (O le Aposetolo sinia, lea e avea ma Peresitene o le Korama a Aposetolo e Toasefululua.)

O nisi tamaiti aoga atonu e mafaufau po o le a le taimi e maua ai e le Peresitene o le Ekalesia ki e manaomia e pule faamalumalu ai i le Ekalesia. Faamatala atu o Aposetolo taitasi ua tuuina i ai ki uma lava i le uluai taimi e faauuina ai o se Aposetolo. Valaaulia se tamaitiiti aoga e faitau leotele le faamatalaga lenei mai ia Peresitene Gordon B. Hinckley: (1910–2008):

“Ae o le pule e faaaoga ai ia ki, e nao le Peresitene lava o le Ekalesia na te umia. A maliu, ona pau atu lea o le pule e faaaoga ai ia ki uma i le Aposetolo sinia, o le e tofia, ma faauu, e avea ma perofeta ma Peresitene, e ona uso o le Aufono a le Toasefululua” (“O Mai ma Taumamafa,” Liahona, Iulai 1986, 41).

O a lagona ua e maua ao e iloaina faapea o le malo o le Alii i le lalolagi o le a agai i luma ma sina faafitauli itiiti lava pe a mavae le maliu o se Peresitene o le Ekalesia?

Atonu e te manao e faaiu lenei lesona i le molimau atu faapea o ki ma mana lava na o le perisitua na tuuina atu e Iosefa Samita ia Polika Iaga ma sui o le Korama a Aposetolo e Toasefululua o loo umia nei e le Peresitene o le Ekalesia, ona fesoasoani i le Au Peresitene Sili, ma sui o le Korama a Aposetolo e Toasefululua. E mafai foi ona e faasoa atu le ala na e maua ai lau molimau faapea o taitai o le Ekalesia ua valaauina e le Atua. Valaaulia tamaiti aoga e saili ma le agaga tatalo ina ia maua pe faamalosia a latou molimau o upumoni na latou talanoaina i le aso.

Faitauga a Tamaiti Aoga

Mataupu Faavae ma Feagaiga 107:33; 112:30–32; 124:127–28.
Boyd K. Packer, “O Le Toasefululua,,”Ensign po o le Liahona, Me 2008, 83–87.

Faasologa i le Au Peresitene o le Ekalesia

O Faavae o le Toefuataiga—Lesona 23

Fonotaga ma Aposetolo e Toasefululua, Mati 1844

Na faamatalaina e Peresitene Uilifoti Uitilafi (1807–98):

“Ou te manatuaina le tautalaga faaiu lava na tuuina mai e [Iosefa Samita] ia i matou a o lumanai lona maliu. … Na tu o ia mo se tolu itula. Na faatumuina le potu e pei o se afi mumu, o ona fofoga na manino e pei o le pulu manino samasama o le laau o le paina, ma na faaofuina o ia i le mana o le Atua. Na ia faamalamalamaina mai ia i matou o matou tiute. Na ia faataatia mai i o matou luma le atoatoaga o lenei galuega taua a le Atua; ma i lana saunoaga ia i matou na ia faapea mai ai: ‘Na faamauina i luga o lo’u ulu ki uma, o mana uma, ma aoaoga faavae uma o le ola ma le faaolataga ia na tuuina mai e le Atua i soo se tagata o e na ola i luga o le fogaeleele. Ma o nei mataupu faavae ma lenei Perisitua ma le mana a lenei augatupulaga faaiu ma le maoae lea na finagalo le Atua o le Lagi e tuuina mai Lona aao e faatuina i le lalolagi. O lenei,’ na ia saunoa mai ai, e faasino i le Toasefululua, ‘Ua ou faamauina i luga o o outou ulu ki uma, mana uma, ma mataupu faavae uma ia na faamauina i luga o lo’u ulu.’ …

“Ina ua maea ona laugaina i matou i lenei mea na ia saunoa mai: ‘Ou te tauina atu ia te outou, o avega mamafa o lenei malo ua taatia nei i luga o o outou tauau; ua matua tatau ona outou tauaveina i le lalolagi atoa’” (upusii i Aoaoga a Peresitene o le Ekalesia: Iosefa Samita [2007], 532).

Manao o Sini Rikitone

O Sini Rikitone, le Fesoasoani Muamua i le Au Peresitene Sili, na taunuu i Navu mai Pittsburgh, Penisilivania, ia Aokuso 3, 1844. Na ia taloina se fonotaga faapitoa ia faia i le Aso Lua, Aokuso 6, ina ia filifilia e tagata o le Ekalesia se leoleo mo le Ekalesia. Na foliga mai e pei na taumafai Sini Rikitone e fai lenei fonotaga ia faamaonia ai e tagata o le Ekalesia lona tulaga o se leoleo o le Ekalesia ae lei taunuu mai uma Aposetolo e Toasefululua mai a latou misiona i le Iunaite Setete i sasae. O le mea e lelei ai, ona o taumafaiga a Elder Uiliata Risati ma Elder Pale P. Palate, na tolopo le fonotaga i le Aso Tofi, Aokuso 8, 1844, i le taimi lena ua toe foi mai le toatele o Aposetolo i Navu.

Na manao Sini Rikitone ona o ia lea na valaauina talu ai ma faauuina o se failauga mo Iosefa Samita (tagai i le MF&F 100:9), o lona tiutetauave le “vaai ua taitaia le Ekalesia i le ala sao” (i History of the Church, 7:229).

Manao a James Strang

Ina ua maliu Iosefa Samita, o James Strang, lea na papatiso ia Fepuari 1844, na faapea mai na ia maua se tusi mai ia Iosefa Samita ua faapea mai na tofia o ia e Iosefa e sui ia te ia. O le tusi o se saini pepelo, ae na foliga mai na aofia ai le saini a Iosefa Samita, ma na faaseseina ai nisi tagata o le Ekalesia ina ua faaali atu ia i latou e Strang. Na faapea mai foi Strang na asiasia o ia e se agelu, lea na tuuina atu ia te ia ki.

Aokuso 7, 1844

O Elder Ioane Teila, Uiliata Risati, Pale P. Palate, ma Siaosi A. Samita na i ai lava i Navu ina ua taunuu mai Sini Rikitone. O le toatele o Aposetolo, e aofia ai Polika Iaga, na toe foi mai i Navu i le afiafi o Aokuso 6, 1844. O le aso na sosoo ai, Aokuso 7, na feiloai ai Aposetolo e fono i le fale o Ioane Teila. Mulimuli ane i lena aoauli, o Aposetolo e Toasefululua, le au lagolago maualuga, ma faitaulaga sili na fono faatasi. Na fai atu Peresitene Iaga ia Sini Rikitone e tau atu lana savali i le Au Paia. Na tautino atu e Sini Rikitone ma le toa na ia vaai i se faaaliga ma e leai se tagata e mafai ona suitulaga ia Iosefa Samita o se Peresitene o le Ekalesia. Ona ia faatu atu lea o ia lava ia tofia o le leoleo o tagata.

Ina ua faaiu le saunoaga a Sini Rikitone, na saunoa atu Polika Iaga (1801-77):

“Ou te le popole po o ai e taitaia le Ekalesia, … ae tasi le mea e tatau ona ou iloa, ma o lena mea e faapea po o le a le finagalo o le Atua i ai. O loo ia te au ki ma mea e manaomia mo le mauaina o le finagalo o le Atua i le mataupu. …

“Na tuuina mai e Iosefa i luga o tatou ulu ki uma ma mana o le galuega faaAposetolo ia na ia umiaina ae lei aveesea o ia, ma e leai se tagata po o se vaega o tagata e mafai ona tovaina Iosefa ma le Toasefululua i lenei lalolagi po o le lalolagi a sau.

“Ua faafia ona saunoa mai Iosefa i le Toasefululu, Ua ou faataatiaina le faavae ae e tatau ona outou fausiaina ai i luga, aua ua taoto i luga o o outou tauau le malo” (i History of the Church, 7:230).

Aokuso 8, 1844, 10:00 i le taeao.

Ia Aokuso 8, 1844, na faapotopoto le Au Paia i Navu i le 10:00 i le taeao e faalogo ia Sini Rikitone o faaali ona manao o se leoleo o le Ekalesia. Na ia saunoa atu i le fia afe o le Au Paia na potopoto mo le itula ma le afa, ma faamatala atu pe aisea e tatau ai ona avea ia ma leoleo o le Ekalesia. Sa faamatalaina e ni nai tagata lana saunoaga faapea e le musuia.

Na saunoa faapuupuu atu Peresitene Polika Iaga ma faapea atu ua ia filifili e sau i Navu e faanoanoa mo le Perofeta nai lo le tofia o se taitai fou. Na ia faasilasila atu o le a faia se fonotaga a taitai ma tagata mulimuli ane i le 2:00 i le afiafi. Na molimau mai ni nai tagata mulimuli ane faapea ao saunoa Polika Iaga, na latou vaaia ua suia ona fofoga ma faalogoina lona siufofoga ua suia, ma o ona foliga ma le siufofoga o Iosefa Samita uma lava.

Na manatua e Emily Smith Hoyt: “O manatu faaalia, o foliga vaaia, le faalogo atu i le leo na faateia ai lou agaga atoa. … Na ou iloa ua maliu Iosefa. Ae sa faateia soo au ma vaai atu i le tulaga e aunoa ma se mafaufau i ai e vaai pe le o Iosefa lena. E leai, o Polika Iaga” (upusii i Lynne Watkins Jorgensen, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, no. 4 [1996–97], 142).

Na tusia e Uilifoti Uitilafi, “Ana faapea ou te lei vaai muamua ia te ia i ou lava mata, e leai se isi e mafai ona faatalitonuina atu e leo Iosefa Samita, ma soo se tasi e mafai ona molimau i lenei mea lea na masani lelei ma nei alii e toalua” (i History of the Church, 7:236).

Aokuso 8, 1844, 2:00 i le afiafi.

I le 2:00 i le afiafi, na faapotopoto le Au Paia mo le mea na latou iloa o se fonotaga taua tele. Na saunoa faapuupuu lava Polika Iaga e uiga i le lafo a Sini Rikitone o se leoleo ma lona agaleaga ia Iosefa Samita i le lua tausaga talu ai ona faapea atu lea:

“Afai e mananao tagata ia Peresitene Rikitone e taitaia i latou e mafai ona latou maua o ia; ae ou te fai atu ia te outou o le Korama a le Toasefululua o loo i ai ki o le malo o le Atua i le lalolagi atoa.

“O le Toasefululua ua tofia e le tamatamai aao o le Atua. O Polika lenei, pe na faavaivai ea ona tulivae? Pe na pepelo ea ona laugutu? O Heber [C. Kimball] lenei ma le isi vaega o le Toasefululua, o se tino tutoatasi ua i ai ki o le perisitua—o ki o le malo o le Atua e tuuina atu i le lalolagi atoa: e moni lenei mea, ia fesoasoani mai le Atua ia te au. Ua latou tutu i tafatafa o Iosefa, ma o le Au Peresitene Sili o le Ekalesia” (i History of the Church, 7:233).

O le toatele o le Au Paia na faapea mai na foliga mai Polika Iaga ma o lona leo na pei lava o Iosefa Samita ao ia saunoa i lena aoauli. I le faaopoopo i ai i lenei vavega, o le toatele o le Au Paia na lagonaina foi le Agaga Paia o molimau mai ia i latou faapea o Polika Iaga ma le Korama a le Toasefululua na valaauina e le Atua e taitai le Ekalesia. I le faaiuga o lenei fonotaga, na autasi le palota a le Au Paia e lagolagoina le Korama a Aposetolo e Toasefululua, ma Polika Iaga i lo latou ulu, e taitaia le Ekalesia. Ae ui i lea, e leo tagata uma o le Ekalesia na iu ina filifili e mulimuli i Aposetolo. O nisi tagata na filifili nai lo o lena e mulimuli i tagata e pei o Sini Rikitone ma James Strang, ia na faatuina a laua lava lotu.