I le senituri lona 20, ao salalau atu le galuega faafaifeautalai i le lalolagi, na tatalo taitai o le Ekalesia mo le taitaiga e faatatau i le faasaina o le faauuga o le perisitua ma sauniga o le malumalu mo tagata o le Ekalesia e tupuga mai tagata Aferika. Na oo mai se faaaliga manino ia Peresitene Spencer W. Kimball, ona fesoasoani i le Au Peresitene Sili, ma sui o le Korama a Aposetolo e Toasefululua i le Malumalu o Sate Leki ia Iuni 1, 1978. Ao auai tamaiti aoga i lenei lesona o le a latou malamalama atili i le ala e tali atu ai i fesili o le talalelei i se ala faatuatua ma o le a aoao foi i tulaga ma upumoni e faatatau i lenei faaaliga manino.
Faitauga Faaopoopo
Gordon B. Hinckley, “Priesthood Restoration,” Ensign, Oke. 1988, 69–72.
“Race and the Priesthood,” Gospel Topics, lds.org/topics.
Taliina o fesili o le talalelei i se ala faatuatua
Tuu atu lenei vaaiga i lau vasega:
Ina ua tuua le aoga i se tasi aso, sa alu atu se tasi tagata o le Ekalesia faatoa atiina ae ni fesili e uiga i aoaoga faavae o le Ekalesia ia Scott. Na lagona e Scott na ia mafai ona saunia se fesoasoani i lana uo, ae na ia mafaufau pe o le a se mea na te ono fai i se isi ala i le isi taimi e fesili atu ai se tagata o le Ekalesia faapea ia te ia.
Fesili i tamaiti aoga po o a mea na latou faia e fesoasoani ai i tagata o le Ekalesia e oo atu ia i latou ma ni fesili faamaoni e uiga i le Ekalesia po o ona aoaoga faavae.
Faaali atu ma faitau le saunoaga lenei mai ia Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“O le fesili o le amataga lea o se molimau. E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. O le faia o fesili e le o se faailoga lea o le vaivai; ae o se teuteuala mo le tuputupu a’e.
“Ua poloaiina i tatou e le Atua e saili i tali i a tatou fesili ma ia ole atu tatou te maua ai ‘ma le loto faamaoni, ma le manatu moni i ai, ma le faatuatua ia Keriso’ [Moronae 10:4]. A tatou faia faapea, o le a mafai ona faaali mai ia i tatou le tonu o mea uma “i le mana o le Agaga Paia” [Moronae 10:5].
“Aua le fefefe; ia fesili atu. Ia fia iloa, ae aua le masalosalo! Ia tamau pea i le faatuatua ma i le malamalama ua uma ona e mauaina” (“The Reflection in the Water” [Faigalotu mo le autalavou matutua a le Church Educational System , Nov. 1, 2009], 7, ldschurchnewsarchive.com).
O le a le aoaoga a Peresitene Uchtdorf e mafai ona fesoasoani i se tasi e i ai ni fesili e uiga i aoaoga faavae, talafaasolopito, po o mataupu lautele e faatatau i le Ekalesia? (Fesoasoani i tamaiti aoga ia malamalama i le mataupu faavae lenei: Afai tatou te faaaoga le faatuatua ia Iesu Keriso, ona iu lea ina mafai ona aumaia e fesili faamaoni tali mai lo tatou Tama i le Lagi.)
Faamatala atu faapea o se tasi o mataupu faaletalafaasolopito sa i ai ni fesili a tagata o le Ekalesia mai se tulafono a le Ekalesia na i ai mai le ogatotonu o le 1800 i le 1978 na faasa ai alii e tupuga mai tagata Aferika mai le faauuina i le perisitua. Na faasaina ai foi tamaitai ma alii uli mai le auai i le faaeega paia o le malumalu po o sauniga faamau. Valaaulia se tamaitiiti aoga e faitau leotele le fuaitau lenei, o se vaega o le faatomuaga i le Folafolaga Aloaia 2 (o loo maua i le Mataupu Faavae ma Feagaiga). Fai i tamaiti aoga e mafaufau pe faapefea e lenei faamatalaga ona mafai ona fesoasoani ia i latou o loo popole e uiga i lenei mataupu faaletalafaasolopito.
“Ua aoao mai le Tusi a Mamona faapea ‘e tutusa tagata uma i le Atua,‘ e aofia ai ‘uliuli pe paʼepaʼe, e pologa pe saoloto, o tane ma fafine’ 2 Nifae 26:33). I le talafaasolopito atoa o le Ekalesia, o tagata o ituaiga uma ma lanu i le tele o atunuu ua papatisoina ma soifua oni tagata faamaoni o le Ekalesia. I le soifuaga atoa o Iosefa Samita, na faauuina ai ni nai alii uli o le Ekalesia i le perisitua. I le popofou o lona talafaasolopito, na taofia ai e taitai o le Ekalesia le tuuina atu o le perisitua i tamatane uli e tupuga mai tagata Aferika. E leai ni faamaumauga manino a le Ekalesia i le amataga o lenei faiga” faatomuaga i le Folafolaga Aloaia 2).
O a upumoni taua o loo i lenei fuaitau mo i latou atonu o loo tauivi ma lenei mataupu?
Faasino atu le laina o loo faapea mai, “E leai ni faamaumauga o le Ekalesia o loo faamanino mai ai le amataga o lenei faiga.” Atonu e fautuaina mai e nisi tagata pe aisea na le faauuina ai e tupuga mai tagata Aferika i le perisitua mo se taimi, atonu e le sao na mafuaaga. Valaaulia se tamaitiiti aoga e faitau le faamatalaga a Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“Afai e te faitauina tusitusiga paia ma lenei fesili i le mafaufau, ‘Aisea na poloaiina ai e le Alii lenei mea po o le aisea na ia poloaiina ai lena mea,’ e te mauaina ai e itiiti ifo ma le tasi i le selau poloaiga na tuuina mai ai se mafuaaga. E le o le mamanu a le Alii le tuuina mai o mafuaaga. O i tatou [tagata ola] e mafai ona tuuina mafuaaga i faaaliga. E mafai ona tatou tuuina mafuaaga i poloaiga. Afai tatou te faia, ua tuua na o i tatou. O nisi tagata ua tuuina mafuaaga i lea o loo tatou talanoaina iinei [ituaiga ma le perisitua], ma na aliae mai ai lo latou matuai sese lava. …
“… Sei o tatou taofia le faia o lena mea sese na faia muamua, iinei ma isi eria, o le taumafai e tuu mafuaaga i faaaliga. Ua aliae mai o mafuaaga na faia e tagata i se tulaga faalauaitele” Life’s Lessons Learned [2011], 68–69).
Aisea e atamai ai le aloese mai taumatematega i mafuaaga o le le tuuina atu o le perisitua po o le le faatagaina o sauniga o le malumalu i tagata e tupuga mai tagata Aferika i tua atu o le 1978? (E tautala le tagata mai se vaaiga faatapulaa, ae lei tau maia e le Atua ia i tatou mafuaaga.)
Faamamafa atu o le aso, ua teena ai e le Ekalesia manatu na faasalalauina muamua i lenei mataupu: o le pau uliuli o se faailoga o le le fiafia mamana po o se fetuu; o le pau uliuli o se faailoga o amioga le amiotonu i le muai olaga, o faaipoipoga i le va o tagata uli ma isi o se agasala; po o tagata uli po o se isi lava ituaiga po o lanu e maualalo atu i soo se auala i se isi lava tagata. O taitai o le Ekalesia i le aso ua faaleaogaina ma le manino faailoga lanu uma lava, i taimi ua tuanai ma le taimi nei, i soo se ituaiga. (Tagai “Race and the Priesthood,” Gospel Topics, lds.org/topics.)
E mafai faapefea e le faatuatua o tagata ia Iesu Keriso ona fesoasoani ia i latou e tali a latou fesili ma popolega e uiga i le faasaina o le perisitua ao lei aulia le 1978?
Perisitua ma faamanuiaga o le malumalu ua tuuina atu i tagata agavaa uma o le Ekalesia
Faamatala atu faapea ae lei oo i le 1978, e faitau afe tagata e tupuga mai Aferika i atunuu eseese na iloa le moni o le talalelei toefuataiina. Na maua e taitai o le Ekalesia i le Aai o Sate Leki le tele o tusi mai tagata liliu mai o Niteria ma Kana e lei papatisoina na talosaga mai e auina atu ni faifeautalai i Aferika. Mo ni tausaga, na mafaufau ma le agaga tatalo taitai o le Ekalesia i le mataupu ae na lagonaina e lei oo mai le taimi e auina atu ai faifeautalai i Aferika. I Pasila, na fesoasoani tagata uli faatuatua e fausia le Malumalu o Sao Paulo, na faasilasila mai i le 1975, e ui lava na latou iloaina o le a le mafai ona latou ulu atu i le malumalu.
Tau atu i tamaiti aoga o leFolafolaga Aloaia 2 o loo i ai le faasilasilaga aloaia o se faaaliga na maua e Peresitene Spencer W. Kimball, ona fesoasoani i le Au Peresitene Sili, ma le sefulu sui o le Korama a Aposetolo e Toasefululua. Na maua le faaaliga ia Iuni 1, 1978. Valaaulia se tamitiiti aoga e faitau leotele le parakalafa muamua i lalo o upu “Uso Pele e.” Valaaulia le vasega e mulimuli i le faitauga, ma vaavaai mo le mea na saunoa i ai taitai o le Ekalesia na latou molimauina.
O le a le mea na molimauina e taitai o le Ekalesia i le lalolagi atoa?
O a mea na uunaia ai taitai o le Ekalesia ao latou molimauina le faasalalauina atu o le galuega a le Alii?
Valaaulia se tamaitiiti aoga e faitau leotele le isi parakalafa, lea e amata i upu “I le matou iloa lelei o folafolaga.” Valaaulia le vasega e vaai mo le ala na faatino ai e taitai o le Ekalesia o latou manao musuia. Fesili atu:
Na faapefea e Peresitene Spencer W. Kimball ma isi taitai o le Ekalesia ona faatino o latou manaoga musuia?
E tusa ai ma laina e tolu muamua o lenei parakalafa, o a mea na silafia e taitai o le Ekalesia e uiga i le faasaina o le perisitua? (Na latou silafia e i ai se taimi, o le a maua ai e alii agavaa uma le avanoa e maua ai le perisitua.)
Faamatala atu faapea mo le tele o tausaga i tua atu o le 1978, i le silafiaina o se faaaliga e manaomia mo se suiga ina ia faia, na talanoaina ai e le Au Peresitene Sili ma le Korama a Aposetolo e Toasefululua le taofia o le perisitua ma tatalo i ai. Faaali atu le faamatalaga lenei mai ia Peresitene Spencer W. Kimball (1895–1985) ma fai atu i se tamaitiiti aoga e faitau leotele:
Ata
Peresitene Spencer W. Kimball
“Mai lea aso i lea aso sa ou alu ai toatasi i le faamaoni, ma le naunautai tele i le potu i luga o le malumalu, o iina sa ou tuuina atu ai lo’u agaga ma tuuina atu au taumafaiga e faaalualu ai i luma le polokalama. Sa ou manao e fai le mea sa ia finagalo ai. Sa ou talanoa ia te ia i lenei mea ma faapea atu, ‘Le Alii e, na o le mea sa’o lava ou te manao ai. Matou te le o faia lava ni fuafuaga ina ia maoae ni faatinoga. Na pau le mea matou te mananao i ai o le mea e te finagalo ai, ma matou te mananao i ai i le taimi e te finagalo ai ae le o le seia afea’”Aoaoga Peresitene o le Ekalesia: Spencer W. Kimball [2006], 238).
O a mea ua aoao mai e upu a Peresitene Kimball ia i tatou e uiga i le ala e saili ai e perofeta faaaliga? (Ao tali mai tamaiti aoga, atonu e te manao e tusi le upumoni lenei i le laupapa: E saili e perofeta le finagalo o le Alii i le taitaiga o le Ekalesia.)
Valaaulia se tamaitiiti aoga e faitau leotele isi parakalafa e lua i le Folafolaga Aloaia 2, e amata i le “Ua faafofogaina e Ia a matou talosaga.” Fai i le vasega e vaai mo le tali a le Alii i tatalo a Peresitene Kimball, ona fesoasoani i le Au Peresitene Sili, ma sui o le Korama a Aposetolo e Toasefululua.
O le a le tali a le Alii i tatalo a Lana perofeta? (Faamamafa atu le savali a le Alii na maua i lenei faaaliga: O faamanuiaga o le talalelei a Iesu Keriso e mafai ona maua e fanau uma a le Tama Faalelagi.)
Ina ia fesoasoani i tamaiti aoga ia malamalama pe na faapefea ona maua le faaaliga i le Folafolaga Aloaia 2, faasoa atu le fuaitau lenei a Peresitene Gordon B. Hinckley (1910–2008), o le na i ai i le aso na maua ai le faaaliga i le malumalu:
Ata
Peresitene Gordon B. Hinckley
“Na i ai se lagona o le paia ma le faamamaina i totonu o le potu. Mo au, o se lagona e pei o se faitotoa vaapiapi ua matala i le va o le nofoalii faalelagi ma le perofeta a le Atua o loo tootuli, ma augani atu lea na faatasi atu i ai ona Uso. Na i ai iina le Agaga o le Atua. Ma i le mana o le Agaga Paia na oo mai i lena perofeta se faamautinoaga o le mea na matou tatalo ai ua sao, ma ua oo mai le taimi, ma o faamanuiaga ofoofogia o le perisitua ua tatau nei ona faasafuaina atu i alii agavaa uma i soo se mea e tusa lava po o le a le tupuaga. …
“O i matou uma na iloa ua oo mai le taimi mo se suiga ma ua oo mai le filifiliga mai le lagi. Na manino le tali. Sa i ai se lototasi atoatoa ia i matou i la matou aafiaga ma i lo matou malamalama” (“Priesthood Restoration,” Ensign, Oke. 1988, 70).
Faamatala atu e lei umi lava talu ona maua le faaaliga o le faamutaina o le faasaina o le perisitua, ae auina atu loa faifeautalai i Aferika. Ua fausia malumalu i lena konetineta, ua silia ma le selau siteki ua faatulagaina, ma e faitau selau afe tagata ua maua sauniga o le talalelei mo i latou lava ma mo o latou tuaa ua maliliu. (Tagai, mo se faataitaiga, “Mormons in Africa: A Bright Land of Hope,” mormonnewsroom.org; “Emerging with Faith in Africa,” vaega 1–3, lds.org/prophets-and-apostles/unto-all-the-world.)
Faaali atu le saunoaga lenei a Elder Russell M. Nelson o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder Russell M. Nelson
“I konetineta uma ma motu i le moana, ua faapotopotoina ai o e faatuatua i le Ekalesia a Iesu Keriso o le Au Paia o Aso e Gata Ai. O eseesega i tu ma aganuu, gagana, ituaiga, ma foliga, ua tuuese atu ia uiga faatauvaa uma ina ua tuuina atu e le au paia i latou lava e auauna atu i lo latou Faaola pele. Ua taunuu ai le tautinoga a Paulo: “Aua o outou uma lava ua papatisoina ia Keriso, ua outou oofu ia Keriso.
“‘E le o i ai se Iutaia po o Eleni, e le o i ai se pologa po o se saoloto, e le o i ai se tane po o se fafine, aua ua tasi lava outou uma ia Keriso Iesu’ [Kalatia 3:27–28].
“Na o le malamalama i le tulaga moni Faaletama o le Atua e mafai ai ona tatou talia atoatoa le tulaga moni o le usoga faaletagata. O lena malamalama e tupu ai le manao e fausia alalaupapa o le galulue faatasi nai lo le fausia o pa e tuueseese ai” (“A’oa’o Mai ia i Matou le Faapalepale ma le Alofa,” Liahona, Iulai 1994, 90).
Ua faapefea ona saunia e le talalelei i tatou ia lotogatasi ma tagata mai isi tulaga eseese?
O a ni faataitaiga ua e vaaia i tagata o le Ekalesia mai tulaga eseese ua ola faatasi i le lotogatasi ma galulue faatasi?
I le faaiuga, valaaulia tamaiti aoga e mafaufau i le ala e mafai ona latou tali atu ai pe a fesiligia i latou pe aisea na le faauuina ai e le Ekalesia alii e tupuga mai tagata Aferika i le perisitua mo se taimi. Faamautinoa atu e manaomia le faamatala atu i isi tatou te le iloa pe aisea na amata ai ona faasa le perisitua ma e tatau ona tatou faasoa atu ma molimau atu i upumoni ua tatou iloa.