Lesona 28

Faanatinatiina o le Galuega o le Faaolataga

Folasaga

I tausaga talu ai, na faamamafaina e taitai o le Ekalesia le valoaga a le Alii o le a Ia “faanatinatiina [Lana] galuega” (MF&F 88:73). O le galuega o le faaolataga e aofia ai le galuega faamisiona, faatumauina o tagata liliu mai, faatoaagaina mai o tagata ua le malolosi mai, galuega o le malumalu ma talafaasolopito o aiga, ma le aoaoina atu o le talalelei. O lenei lesona o le a fesoasoani i tamaiti aoga ia malamalama atili ia latou tiutetauave o se tagata o le Ekalesia a Iesu Keriso o le Au Paia o Aso e Gata Ai ia auai i lenei galuega.

Faitauga Faaopoopo

Dieter F. Uchtdorf, “O E Moe i Lenei Taimi o le Toefuataiga?” Ensign po o le Liahona, Me 2014, 58-62.
“Faanatinatiina o le Galuega o le Faaolataga,” Liahona, Oke. 2013, 36–39.

Fautuaga mo le Aoaoina Atu

Mataupu Faavae ma Feagaiga 138:53-56

Ua faanatinatiina e le Alii Lana galuega

Tau atu i tamaiti aoga faapea ina ua latalata lava i lona maliu, na maua e Peresitene Iosefa F. Samita se faaaliga o le lalolagi o agaga, lea ua faamaumauina o le Mataupu Faavae ma Feagaiga 138. Na ia aoaoina faapea o taitai o le tisipenisione mulimuli ma “le tele o isi” na saunia i le muai olaga mo o latou tiutetauave faalelalolagi. Valaaulia se tamaitiiti aoga e faitau leotele le Mataupu Faavae ma Feagaiga 138:53-56 ao mulimuli i ai le vasega ma vaai mo tiutetauave na tuuina atu i nei taitai i le muai olaga.

O a tiutetauave na tuuina atu i nei taitai i le muai olaga? O a sauniuniga na latou maua iina?
O a tiutetauave atonu na tuuina atu ia te oe i le muai olaga? O a sauniuniga atonu na e mauaina? (Ao faasoa mai e tamaiti aoga o latou manatu, fesoasoani ia i latou e faailoa mai lenei mataupu faavae: Na saunia i tatou i le muai olaga e o mai i le lalolagi i le atoatoaga o taimi e galulue i le faaolataga o agaga o tagata.)

Faaali atu le saunoaga lenei a Peresitene Thomas S. Monson, ma fai i se tamaitiiti aoga e faitau leotele:

“O e silafia e 98 tausaga o le Ekalesia toefuataiina ao lei atoa le 100 o ona siteki? Ae e itiiti ifo ma le 30 tausaga mulimuli ane, ae faatulagaina e le Ekalesia ona siteki e 100 lona lua. Ma e na o le valu tausaga ua mavae talu mai lena taimi ae ua silia ma le 300 siteki a le Ekalesia. I le aso ua tatou maua le silia ma le 3,000 siteki malolosi.

“Aisea ua tupu ai lenei tuputupu ae i se tulaga faavavevave? Pe ona ua sili atu lo tatou silafia? Pe ona o le aulelei o o tatou falelotu?

“E taua nei mea, ae o le mafuaaga ua faatupulaia ai le Ekalesia i lenei vaitaimi ona sa faailoa mai e le Alii o le a [tupu]. I le Mataupu Faavae ma Feagaiga, ua Ia fetalai mai, ‘Faauta, o le a Ou faanatinatiina la’u galuega i lona taimi’ [MF&F 88:73].

“I le avea ai o i tatou ma fanau agaga a lo tatou Tama Faalelagi, ua auina mai i tatou i le lalolagi ina ia mafai ona tatou auai i le faanatinatiina o lenei galuega maoae.” (“Faanatinatiina o le Galuega,” Liahona, Iuni 2014, 4).

E tusa ai ma le saunoaga a Peresitene Monson, aisea ua auina mai ai i tatou i le lalolagi i lenei taimi? (Ao faasoa mai e tamaiti aoga a latou tali, fesoasoani ia i latou ia malamalama i lenei mataupu faavae:Ua ia i tatou le tiutetauave o le auai i le faanatinatiina o le galuega a le Tama Faalelagi.)
O a nisi o auala ua e molimauina ai le “faanatinatiina” o le galuega a le Atua? (E tele tali i lenei fesili, e aofia ai le suiga o tausaga mo le galuega faafaifeautalai, le faateleina o le aofai o faifeautalai, le faateleina o le aofai o malumalu, le faateleina o meafaigaluega ua faafaigofie atili ai le galuega o talafaasolopito o aiga.)

Faasino atu faapea o nei tali ua saunia ai le faamaoniga faapea ua faanatinatiina e le Alii Lana galuega i itu uma o le veli. Faamatala atu o taitai o le Ekalesia ua tuuina mai le faamamafa i eria e lima o le galuega o le faaolataga ma ua augani mai ia i tatou ia auai i nei eria ina ia faanatinatiina ai le galuega a le Atua i nei aso e gata ai. Faaali atu le saunoaga lenei a Elder L. Whitney Clayton o le Au Peresitene o le Fitugafulu, ma fai i se tamaitiiti aoga e faitau leotele. Tuu atu i le vasega e faailoa mai eria e lima ia o ni vaega o le galuega o le faaolataga:

“O loo aoao mai perofeta ma aposetolo soifua ‘e auina atu tagata o le Ekalesia a Iesu Keriso “e galulue i lona tovine mo le faaolataga o agaga o tagata” (MF&F 138:56). O lenei galuega o le faaolataga e aofia ai le galuega faamisiona a tagata o le au paia, faatumauina o tagata liliu mai, faatoagaina mai o tagata ua le malolosi mai, galuega o le malumalu ma talafaasolopito o aiga, ma le aoaoina atu o le talalelei’ [Tusitaulima 2: Taitaiina o le Ekalesia (2010), 5.0]” (“O le Galuega o le Faaolataga: Taimi Lena ma le Taimi Nei,” Liahona, Set. 2014, 63).

Ao faailoa mai e taimaiti aoga eria e lima, tusi mea nei i le laupapa:

Galuega faafaifeautalai a tagata o le ekalesia

Faatumauina o tagata liliu mai

Faatoaagaina mai o tagata o le ekalesia ua le toaaga mai

Galuega o le malumalu ma talafaasolopito o aiga

Aoaoina atu o le talalelei

Mataupu Faavae ma Feagaiga 88:73

E mafai faapefea ona tatou auai i le faanatinatiina o le galuega a le Alii?

Fai i se tamaitiiti aoga e faitau le Mataupu Faavae ma Feagaiga 88:73 ao mulimuli i le faitauga isi tamaiti aoga. Ona faamatala atu lea i tamaiti aoga faapea o i tatou taitotasi e tatau ona taumafai e faateleina lo tatou saofaga i le faanatinatiina o le galuega a le Alii. Tufatufa atu le tusitaulima i le faaiuga o le lesona, ma faamatala atu o lenei tusitaulima o le a fesoasoani ia i latou e mafaufau ai e uiga i le ala e mafai ai ona latou faateleina lo latou saofaga i le galuega. Valaaulia tamaiti aoga e filifili ma faitau le leoa se tasi po o le sili atu o fuaitau i le pepa e tufa atu ma saunia e tali fesili o i ai.

pepa e tufa atu, Faanatinatiina o le Galuega o le Faaolataga

A uma se taimi talafeagai mo tamaiti aoga e faitau ma saunia ai, mafaufau e valaaulia se tamaitiiti aoga e faitau leotele le upusii muamua. Ona fai lea ini nai tamaiti aoga e saunia a latou tali i fesili e tolu i le pepa e tufa atu, i le taulai atu i le galuega faafaifeautalai a tagata lotu. Toe fai le gaoioiga lenei mo upusii taitasi e lima.

Fesoasoani i tamaiti aoga e lagona le moni ma le taua o le auai i le galuega o le faaolataga i le faia o fesili nei:

O a faamanuiaga na e maua ao e auai i se tasi po o le sili atu o nei eria o le galuega o le faaolataga? O le a se aafiaga na e maua ao auai i se tasi o nei eria na sili ona taua ia te oe?

Faaali atu le saunoaga lenei a Peresitene Dieter F. Uchtdorf o le Au Peresitene Sili, ma fai atu i se tamaitiiti aoga e faitau leotele:

“A maea lo tatou taimi i le olaga nei, o a ni aafiaga o le a mafai ona tatou faasoa atu e uiga i lo tatou sao i lenei vaitau taua o o tatou olaga atoa ai ma le faalauteleina o le galuega a le Alii? Mata e mafai ona e fai atu sa afe i luga lima o o tatou ofu ma galulue ma o tatou loto atoa, mafaufau, manatu, ma le malosi atoa? Pe o le a tatou tautino atu o o tatou matafaioi sa tele lava na o le matamata i isi o galulue?” (“O E Moe i Lenei Taimi o le Toefuataiga?” Ensign po o le Liahona, Me 2014, 59).

Valaaulia tamaiti aoga e fuafua mea o le a latou faia ina ia sili atu ona atoatoa lo latou auai i le galuega o le faaolataga i le fesili atu:

O a nisi auala ua e vaaia ai isi o fesoasoani i le faanatinatiina o le galuega a le Alii?
O a nisi auala ua e fuafuaina e saofaga ai i le faanatinatiina o le galuega a le Alii?
E faapefea e lo tatou malamalama ma le molimau o le Toefuataiga ona uunaia i tatou ia sili atu le auai atoatoa i le galuega o le faaolataga?

Valaaulia ni nai tamaiti aoga e faasoa ma molimau mai i se mea na latou aoaoina e uiga i le Toefuataiga o le talalelei ia latou suesuega i lenei kosi. Faaiu i le molimau atu i le moni o le Toefuataiga o le talalelei e ala mai i le Perofeta o Iosefa Samita.

Faitauga a Tamaiti Aoga

Dieter F. Uchtdorf, “O E Moe i Lenei Taimi o le Toefuataiga?” Ensign po o le Liahona, Me 2014, 58-62.

Faanatinatiina o le Galuega o le Faaolataga

O Faavae o le Toefuataiga—Lesona 28

Mafaufau loloto i fesili nei e fesootai i eria taitasi e lima ia oni vaega o le faaolataga:

E faapefea e au taumafaiga i lenei eria o le galuega a le Alii ona aumaia isi ia latalata atili i faamanuiaga o le faaolataga?
O a aafiaga na oo i ai ma faamanuiaga na e maua ao e auai i lenei eria o le galuega a le Alii o le faaolataga?
O a mea e mafai ona e faia, e tusa lava po o le a lou valaauga o i ai nei i le Ekalesia, e saofaga ai i lenei eria o le galuega o le faaolataga?

Galuega Faafaifeautalai a Tagata

Ua aoao mai Elder Neil L. Andersen o le Korama a Aposetolo e Toasefululua:

“Uso e ma tuafafine, e pei lava ona uunaia e le Alii le toatele o faifeautalai e auauna atu, ua Ia fagua foi mafaufau ma tatala loto o le toatele o tagata lelei ma faamaoni e taliaina Ana faifeautalai. Ua tou silafia pe o le a silafia i latou. Latou te i ai i tou aiga ma o ni tou tuaoi. Tou te fepasiai i le auala, nofo i ou autafa i le aoga, ma tou te fesootai i le initoneti. O oe foi o se vaega taua o lenei vavega o loo tupu.

“Afai e le o oe o se faifeautalai faamisiona e i ai se pine faifeautalai e faamau i lou pelaue, o le taimi la lenei e vali ai se pine i lou loto— ia vali e pei ona fai mai Paulo, ‘e le tusia i le vaitusi, a o le Agaga o le Atua soifua.’[2 Korinito 3:3]. … E tofu i tatou uma ma se saofaga e faia i lenei vavega” (“O se Vavega Lava,” Ensign po o le Liahona, Me 2013, 78).

Faatumauina o Tagata Liliu Mai

Na aoao mai Elder M. Russell Ballard o le Korama a Aposetolo e Toasefululua:

“E tatau ia te oe ma au ona faia mea uma ina ia faaaumeaina atoatoa tagata uma o le Ekalesia ma olioli i faamanuiaga o le talalelei.

“Ua faamanatu mai ia te oe ma au e Peresitene Gordon B. Hinckley o o tatou tiutetauave e galulue soosoo tauau ma le Alii i le faataunuuina o Lana fuafuaga mo le Ekalesia. I se faasalalauga o le satelite na saunoa ai Peresitene Hinckley:

“Ua tuuina mai e le Alii ia i tatou se poloaiga ina ia aoao atu le talalelei i tagata uma. E manaomia ai taumafaiga silisili a faifeautalai uma—faamisiona ma le siteki. E manaomia ai taumafaiga silisili a epikopo uma ma fesoasoani uma o le epikopo, o tagata uma o aufono faaleuarota …’ (‘Saili Tamai Mamoe, Fafaga Mamoe’ Liahona, Iulai 1999, 118). E manaomia ai taumafaiga silisili a tagata uma”(“O Tagata o le Ekalesia o le Ki Lea,” Liahona, Set. 2000, 12).

Faatoaagaina Mai o Tagata o le Ekalesia ua Le Toaaga Mai

“O la tatou matafaioi [o ni Au Paia] o le faatofuina o i tatou lava ina ia alolofa ma auauna atu ia i latou o siomiaina i tatou—faamafanafana atu i se tagata lua te faigaluega o loo i ai se manaoga, valaaulia a tatou uo i se papatisoga, fesoasoani atu i se tuaoi matua i se galuega o lona fanua, valaauliaina o se tagata ua le o toe malosi mai mo se taumafataga, po o le fesoasoani i se tuaoi i lana talafaasolopito o le aiga. O ni auala masani uma nei ma le fiafia e valaaulia ai ni tagata ua le o toe malolosi mai ma i latou tatou te le o tapuai faatasi i o tatou olaga ma faasolosolo atu ai lava ina ia malamalama i le talalelei. O le fetufaai atu ma i latou i taimi malie ma taimi paia o o tatou olaga atonu o se auala sili lea ona lelei e mafai ai e soo se tasi o i tatou ‘e galulue i lona [Iesu Keriso] tovine ma le faaolataga o agaga o alii [ma tamaitai]’ (MF&F 138:56)” (“Faanatinatiina o le Galuega o le Faaolataga,” Liahona, Oke. 2013, 36).

Galuega o le Malumalu ma Talafaasolopito o Aiga

Na aoao mai Elder Quentin L. Cook o le Korama a Aposetolo e Toasefululua:

“Ua tuuina mai e taitai o le Ekalesia se valaau manino i le tupulaga faiae ia taimua i le ala i le faaaogaina o tekinolosi ia maua ai le agaga o Elia, ia saili i o tatou tuaa, ma ia faatino sauniga o le malumalu mo i latou. O le tele o le mamafa o le galuega i le faanatinatiina o le galuega o le faaolataga mo e uma o soifua ma e ua maliliu o le a faia e outou o tagata talavou” (“O Aa ma Lala,” Ensign po o le Liahona, Me 2014, 46).

Aoao Atu le Talalelei

“O le matafaioi o le aoaoina atu o le talalelei e le o faatapulaaina na o i latou o i ai ni valaauga taualoa e avea ai ma faiaoga. O le avea ai ma se tagata O le Ekalesia a Iesu Keriso o le Au Paia o Aso e Gata Ai, ua ia te oe le tiutetauave ina ia aoao atu le talalelei. I le avea ai ma se tamã po o se tina, atalii, afafine, tane, ava, uso, tuafafine, taitai o le Ekalesia, faiaoga i le potuaoga, faiaoga o aiga, faiaoga asiasi, paaga faigaluega, tuaoi, po o se uo, ua ia te outou ia avanoa e aoao atu ai. O nisi taimi e mafai ai ona e aoao atu faalauaitele ma tuusao e ala i mea e te tautala atu ai ma molimau atu ai. Ma e te aoao atu pea e ala i faataitaiga” (O Le Aoao Atu, E Leai Se Isi Valaauga E Sili Ai: O Se Risosi Taiala mo le Aoaoina Atu o le Talalelei [1999], 3–4).