O le tala i le Uluai Faaaliga a Iosefa Samita o loo maua i le Penina Tautele, na tusiaina ina ia faasao ai lipoti sese e uiga i le Ekalesia. I lona soifuaga atoa, na saunia ai e le Perofeta o Iosefa Samita ni nai tala o le Uluai Faaaliga. O nei tala e mafai ona faateleina ai lo tatou malamalama o lena aafiaga, ma faamalosia ai lo tatou faatuatua i le Toefuataiga. O lenei lesona ua fuafuaina e fesoasoani i tamaiti aoga, ia malamalama ai i le taua o le mauaina o se molimau i lenei mea taua na tupu.
Na tusia e le Perofeta le Uluai Faaaliga e faasaoina ai lipoti sese
Faamatala atu e faapea i le 1838, na amata ai ona galue Iosefa Samita i lana talafaasolopito aloaia. O le vaega i le Penina Tautele e taua o le Iosefa Samita—Talafaasolopito sa tusia mai i se talafaasolopito e sili atu le umi.
Valaaulia se tamaitiiti aoga e faitau leotele le Iosefa Samita—Talafaasolopito 1:1–2. Fai i le vasega e mulimuli i le faitauga, ma vaai mo mafuaaga na tuuina mai e Iosefa Samita mo le tusiaina o lana talafaasolopito.
E tusa ai ma le fuaiupu 1, o le a le tala na feaveai i tagata i aso popofou o le Ekalesia?
O le a le faamoemoega o i latou na lagolagoina lipoti e tetee atu ai i le Ekalesia?
O a ni mea e tutusa ma lenei tulaga o loo tutupu i o tatou aso?
Faamalamalama atu e faapea, o loo faaauauina pea ona i ai tagata taitoatasi ma faapotopotoga i le taimi nei, o e o loo faasalalauina faamatalaga sese po o faamatalaga taufaasese e uiga i le Ekalesia faatasi ai ma le faamoemoega e faaleagaina le faatuatua.
O a mafuaaga na tuuina mai e Iosefa mo le tusiaina o lana talafaasolopito? (Ina ia “faasaʼoina mafaufauga o tagata lautele, ma tuu atu i tagata sailiili uma le mea moni, a o latou … maua tala sao” Iosefa Samita—Talafaasolopito 1:1].)
Aisea e taua ai i “tagata e fia iloa le mea moni” e uiga i le Toefuataiga ona faalagolago i le tala a Iosefa Samita lava ia? (Atonu e faaaoga e tamaiti aoga ni upu eseese, ae ia mautinoa ia manino e faapea o le faalagolago i le tala a le Perofeta e mafai ona fesoasoani i tagata e aloese ai mai le faaseseina e faamatalaga le moni pe taufaasese foi. )
Faaali atu le fautuaga lenei a Elder Neil L. Andersen o le Korama a Aposetolo e Toasefululua, ma valaaulia tamaiti aoga e faitau le leoa:
Ata
Elder Neil L. Andersen
“O loo i ai pea nisi e mananao e tauleagaina le Ekalesia ma faaumatia le faatuatua. O aso nei o loo latou faaaogaina le Initoneti.
“O nisi o faamatalaga e uiga i le Ekalesia, e tusa lava po o le a le talitonuina, e le moni lava” ((“Tofotofoina o Lo Outou Faatuatua,” Ensign po o le Liahona, Nov. 2012, 41).
O a punaoa e tatau ona tatou sailia, ma talitonuina i la tatou sailiga ia iloa le upumoni e faatatau i le Uluai Faaaliga, le Toefuataiina o le talalelei, ma isi mea na tutupu i le talafaasolopito o le Ekalesia? Aisea? (Fesoasoani i tamaiti aoga ia malamalama i le mataupu faavae lenei: Ina ia aloese mai le faaseseina e faamatalaga le moni pe taufaasese, o i latou o e saili i le upumoni e tatau ona saili atu i punaoa lelei o faamatalaga e uiga i le Ekalesia, ma lona talafaasolopito nai lo le taliaina lava o soo se faamatalaga latou te faalogo pe faitau i ai, e aofia ai faamatalaga e maua mai i se suesuega i le Initoneti.)
Faamatala atu o le au faitio i le Ekalesia e finau agai i le moni o le Uluai Faaaliga, i le faia o tala e faapea e lei faamaumauina e Iosefa Samita lona aafiaga faatasi ma le faaaliga, seia mavae le tele o tausaga talu ona tupu. Faamatala atu e faapea o le 14-tausaga o Iosefa Samita, na tau musu e tautala atu ai e uiga i lana faaaliga, ina ua mavae tali na tuuina mai e i latou na ia taua muamua i ai (tagai i le Iosefa Samita—Talafaasolopito 1:21–26). Na ia faamaumauina le aafiaga ina ua ia lagonaina o le taimi sao lea e fai ai. Na faatonuina e le Faaola Peteru, Iakopo, ma Ioane e aua le tautatala i lo latou aafiaga, i le Mauga o Liua seia mavae Lona Toetu (tagai i le Mataio 17:9), e faamanino atu ai e faapea o nisi o aafiaga paia e tatau ona faatoa faasoa atu pe a uunaia e le Agaga.
Tala o le Uluai Faaaliga
Manatua: A o e aoaoina atu lenei vaega o le lesona, ia lava le taimi e aoao atu ai le vaega mulimuli o le lesona, e aofia ai Iosefa Samita—Talafaasolopito 1:8–20.
Faamatala atu i tamaiti aoga e faapea na tusia e Iosefa Samita, pe o ia lava ia pe na fesoasoani i ai tusiupu, e le itiiti ifo i le fa tala eseese o le Uluai Faaaliga. Ma le isi foi, o nai nisi tala o lenei faaaliga na faamaumauina e i latou na soifua i le taimi o Iosefa Samita. O tala taitasi e faamamafa ai manatu eseese o le aafiaga o Iosefa, ae na latou faasoaina elemene taua o mea na vaai ma faalogo i ai Iosefa. Ina ia fesoasoani e faamatala pe aisea ua i ai eseesega i tala eseese, fai i tamaiti aoga e mafaufau i le mea lenei:
Mafaufau i se aafiaga taua pe aoga foi na e maua i lou olaga. E mafai faapefea ona ese lau tala o lena aafiaga e fuafua lava po o ai o loo faalogologo? O le a faapefea ona suia e fuafua lava i le taimi pe aisea foi ua e faamatalaina ai le aafiaga?
Valaaulia se tamaitiiti aoga e faitau le saunoaga lenei leotele, ma fai i tamaiti aoga e faalogologo i le faamoemoega o tusi o talafaasolopito pe a faamatalaina soo se aafiaga:
“O tala eseese o le Uluai Faaaliga ua faamatalaina ai se tala e tutusa, e ui lava e masani ona eseese mea e faamamafaina ma faamatalaga. O tusitalafaasolopito e faamoemoe afai e toe faamatalaina e se tasi se aafiaga i ni tulaga eseese ini tagata faalogologo i ni tausaga se tele, o tala taitasi o le a faamamafa ai ni manatu eseese o le aafiaga ma e maua ai ni faamatalaga tulaga ese. E moni lava, o eseesega e tutusa ma tala i le Uluai Faaaliga e maua i le tele o tala faaletusi paia o le faaaliga a Paulo i le ala i Tamaseko ma le aafiaga a Aposetolo i le Mauga o Liua[Galuega 9:3–9; 22:6–21; 26:12–18; Mataio 17:1–13; Mareko 9:2–13; Luka 9:28–36]. Ae e ui lava i eseesega, e i ai pea se faavae tumau i tala uma o le Uluai Faaaliga. O nisi ua finau sese e faapea, soo se eseesega lava i le toefaamatalaina o le tala o se faamaoniga o le talafatu. I le isi itu, o le faamaumauga anoa o le talafaasolopito, ua mafai ai ona tatou aoao atili e uiga i lenei mea taua na tupu, nai lo le mea semanu tatou te aoaoina pe ana faapea e laitiiti faamatalaga na maua”(“First Vision Accounts,” Gospel Topics, lds.org/topics).
O se faataitaiga o eseesega i tala, e mafai ona e tauina atu i tamaiti aoga e faapea “ona o le tala i le 1832 e faamamafaina tele ai le tala patino a Iosefa Samita o se alii talavou o loo saili le faamagaloga, o le tala i le 1838 e taulai atu i le faaaliga i le avea ai ma amataga o le ‘tulai mai ma le alualu i luma o le Ekalesia” (“First Vision Accounts,” Gospel Topics, lds.org/topics). Faamanatu i tamaiti aoga e faapea, o a latou faitauga atofaina e aofia ai i le tusiga o “Tala o le Uluai Faaaliga” o Autu o le Talalelei, lea e saunia ai se iloiloga e sili atu ona auiliiliina o tala eseese taitasi o le Uluai Faaaliga. Valaaulia tamaiti aoga e suesue le tusiga i fafo atu o le vasega, ina ia malamalama atili ai pe faapefea e tala taitasi ona saofaga i lo tatou malamalamaaga e uiga i le Uluai Faaaliga. (Manatua: Faamanatu i tamaiti aoga le taua o le faitauina o galuega atofaina i lalo o le “Faitauga a Tamaiti Aoga” a o lei amataina le vasega. O le faia o lea mea o le a fesoasoani ia i latou e faasoa mai i talanoaga a le vasega.)
O le a mafai faapefea i le tele o tala o le Uluai Faaaliga, ona lagolagoina le moni ma faateleina ai lo tatou malamalamaga i lenei mea paia? (Fesoasoani i tamaiti aoga ia malamalama e faapea o le tele o tala o le Uluai Faaaliga a Iosefa Samita, ua mafai ai ona tatou aoao atili ai e uiga i lenei aafiaga paia, nai lo le mea tatou te aoaoina pe ana le tele tala ua lelei ona tusia.)
Faaali atu le fuaitau lenei mai ia Peresitene Gordon B. Hinckley (1910–2008), ma valaaulia se tamaitiiti aoga e faitau leotele:
Ata
Peresitene Gordon B. Hinckley
“E le sili atu lou popole faapea na tuuina mai e le Perofeta o Iosefa Samita se tala i le uluai faaaliga vaaia, nai lo lou popole e toafa tagata tusitala eseese o le talalelei i le Feagaiga Fou, e tofu lava ma ona manatu, ma le faamatalaga e uiga i mea na tutupu e faafetaui ma le pogai na ia tusia ai i lena taimi” (“Ua le Foaiina Mai e le Atua ia i Tatou le Agaga e Matau ai,” Liahona, Fep. 1985, 9).
Tuuina atu lau molimau i le moni o le Uluai Faaaliga ma le Toefuataiga o le talalelei e ala mai i le Perofeta o Iosefa Samita.
O a nisi o upumoni taua ua tatou aoaoina mai fuaiupu 16–17? (A o tali mai tamaiti aoga, faamamafa atu e faapea o upumoni e faavavau na toefuatai mai i le lalolagi ina ua faaali mai le Tama Faalelagi ma Iesu Keriso ia Iosefa Samita.)
Faaali atu ma faitau leotele le saunoga lenei a Elder Tad R. Callister, o le sa auauna atu i le Au Peresitene o Fitugafulu. A o e faitauina lenei saunoaga, atonu e te manao e fautuaina tamaiti aoga e faailoga ia latou tusitusiga paia upumoni na faamamafa mai e Brother Callister. E mafai foi ona e fautua atu latou te tusi upumoni na aoaoina e Iosefa Samita i talaane o le Iosefa Samita—Talafaasolopito 1:16–19. (Manatua:O le aoaoina e faailoga ma tusi faamatalaga i tusitusiga paia, o se tomai taua tau i le suesueina o tusitusiga paia e mafai ona e fesoasoani ai i tamaiti aoga ia atiinaeina [tagai i le Aoaoina Atu ma le Aoaoina Mai: O se Tusitaulima a Faiaoga ma Taitai i Seminare ma Inisitituti o Mataupu Faalelotu (2012), 21].)
Ata
Tad R. Callister
“O Iosefa Samita o le na faauuina e le Alii e toefuatai mai le Ekalesia a Keriso i le lalolagi. Ina ua aluese mai o ia mai le vao, na iu ina ia aoaoina ni upumoni autu se fa sa lei aoaoina e le toatele o le lalolagi Kerisiano i ona po nei.
“Muamua, sa ia iloa o le Atua le Tama ma Lona Alo, o Iesu Keriso, o ni tagata mavaevae se toalua. …
“O le upumoni maoae lona lua na iloa e Iosefa Samita, o le Tama ma le Alo e i ai ni tino faamamaluina o aano ma ivi. …
“O le upumoni lona tolu na aoaoina e Iosefa Samita, o loo tulei saunoa mai pea lava le Atua i tagata i lenei vaitaimi—e le o tapunia le lagi. …
“O le upumoni lona fa lea na aoaoina e Iosefa Samita, o le atoatoaga o le Ekalesia sa lei i ai i lena taimi i le lalolagi”(“Iosefa Samita—o le Perofeta o le Toefuataiga,” Ensign po o le Liahona, Nov. 2009, 35–36).
Aisea e taua ai le iloa ma malamalama i nei upumoni e uiga i le Tama Faalelagi ma Iesu Keriso?
E mafai faapefea e le manaomia o nei upumoni ona fesoasoani e faamatalaina ai pe aisea na taumafai ai Satani e taofia Iosefa Samita talavou mai le tatalo?
Ina ia faamaotiina le taua o le Uluai Faaaliga a Iosefa Samita, faaali atu le saunoaga lenei a Peresitene Gordon B. Hinckley ma valaaulia se tamaitiiti aoga e faitau leotele:
Ata
Peresitene Gordon B. Hinckley
“E faalagolago lo tatou malosi atoa i le lelei o [le Uluai Faaaliga]. A le tupu o lona uiga e le i tupu lava. Afai e leai, o lona uiga o se taufaasese lenei galuega. Afai na tupu, o lona uiga o le galuega aupito taua ma le ofoofogia lenei i lalo o le lagi. …
“… Ona oo mai lea i le 1820, le faaaliga mamalu o le tali mai i le tatalo a se taulealea sa faitau i le Tusi Paia a lona aiga e uiga i upu a Iakopo: “Ae afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia’ (Iakopo 1:5).
E faapefea ona fesootai le moni o le Ekalesia ma le Uluai Faaaliga a Iosefa Samita?
Aisea e taua ai le i ai o se molimau na vaai Iosefa Samita i le Atua le Tama ma Lona Alo, o Iesu Keriso? (Atonu e tuuina mai e tamaiti aoga ni tali eseese, ae ia mautinoa ua manino lenei mataupu faavae: Pe a tatou mauaina se molimau faapea o Iosefa Samita na vaai i le Atua le Tama ma Lona Alo, o Iesu Keriso, e mafai foi ona tatou iloa le moni o le Toefuataiga o le talalelei.
A o e faaiuina lenei lesona, faamamafa atu le taua o le mauaina o se molimau patino o le moni o le Uluai Faaaliga. O lenei molimau patino, na fausia i luga o le papa o faaaliga, e fesoasoani ia i tatou ia tumau malosi ai i lo tatou faatuatua, pe a tatou feagai ma faamatalaga sese e uiga i le Perofeta o Iosefa Samita ma le Ekalesia. Molimau atu e faapea o le ala na iloa ai e Iosefa Samita le mea moni o le a aoga foi mo i tatou. E mafai ona tatou saili le upumoni, faitau i tusitusiga paia, mafaufau loloto, ma iu lava ina fesili atu i le Atua, ma o le a Ia tali mai (tagai i le Iakopo 1:5). Valaaulia tamaiti aoga e mafaufau loloto i le ala na latou mauaina ai se molimau e faapea, na faaali le Tama ma le Alo ia Iosefa Samita. Faataga se taimi mo se tamaitiiti se tasi pe lua e faasoa mai le ala na la maua ai se molimau o le Uluai Faaaliga.