Lesona 21

O Le Misiona Faaperofeta a Iosefa Samita

Folasaga

Ina ua mavae le maliu fasia o Iosefa Samita, o Ioane Teila, lea na faatasi ma Iosefa Samita ina ua fasiotia o ia, na saafi i le Perofeta (atonu e faatasi ai ma se tasi po o le sili atu o le Au Paia) i le faamaumauina: “O Iosefa Samita, le Perofeta ma le Tagatavāai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai” (MF&F 135:3). O lenei lesona o le a fesoasoani i tamaiti aoga e iloa ai le galuega a le Perofeta na faataunuuina ai valoaga anamua. O lenei lesona o le a iloiloina ai saofaga na fai e Iosefa Samita i le faaolataga o fanau uma a le Atua.

Faitauga Faaopoopo

Neil L. Andersen, “Iosefa Samita,”Ensign po o le Liahona, Nov. 2014, 28–31.
Tad R. Callister, “Iosefa Samita—O Le Perofeta o le Toefuataiga,” Ensign po o le Liahona, Nov. 2009, 35–37.
“MF&F 135:3. O Iosefa Samita e tele atu mea na ia faia vagana ai lava Iesu, mo le faaolataga o tagata,” Doctrine and Covenants Student Manual (Tusi lesona a le Church Educational System, 2001), 349–50.

Fautuaga mo le Aoaoina Atu

2 Nifae 3:1-21

O le misiona muai tofia o Iosefa Samita

Fai i tamaiti aoga e faasoa mai le mea e oo muamua mai i o latou mafaufau pe a latou mafaufau ia Iosefa Samita. Valaaulia ni nai tamaiti aoga e faasoa faapuupuu atu se taimi na latou lagona ai le faafetai mo le Perofeta o Iosefa Samita.

Tau atu i tamaiti aoga faapea na faamaumauina e le Perofeta o Nifae ni fautuaga faapea na tuuina atu e Liae i lona atalii o Iosefa. O lenei fautuaga ua faamaumauina i le 2 Nifae 3 ma e aofia ai se valoaga na tuuina atu e Iosefa o Aikupito e faatatau i le aiga o Liae ma aso e gata ai. Atonu na silafia e Liae nei valoaga mai le faitauina o papatusi apamemea. I le 2 Nifae 3, ua tatou aoao ai faapea na valoia e Iosefa o Aikupito le misiona a Iosefa Samita i aso e gata ai. Fai atu i se tamaitiiti aoga e faitau leotele le 2 Nifae 3:6-9. Uunaia le vasega e mulimuli i le faitauga ma vaai mo le ala na faamatalaina ai e Iosefa o Aikupito ia Iosefa Samita.

O a ni upu po o fuaitau na faamatalaina e Iosefa o Aikupito ia Iosefa Samita? (O tali o tatau ona aofia ai “tagata vaai filiilia,” na maualuga le faaeaina, “maoae i ou mata,” ma “maoae e pei o Mose.” Atonu e te manao e fautua atu faapea o tamaiti aoga ia faailoa nei upu ia latou tusitusiga paia; i talaane o fuaiupu 6–9, e mafai foi ona latou tusia Iosefa Samita.)
O a auala na pei ai Iosefa Samita o Mose ma Iosefa o Aikupito? (Tagai foi Faaliliuga a Iosefa Samita, Kenese 50:24–35 [i le faaopoopoga o le Tusi Paia].)
E tusa ai ma fuaiupu 7–8, o a mea na muai vaaia e Iosefa o Aikupito e faatatau i le galuega a Iosefa Samita? (Ia mautinoa ua malamalama tamaiti aoga i lenei upumoni: O le a faatulai mai e le Alii Iosefa Samita e aumaia tagata i le malamalama o Ana feagaiga ma ia faia Lana galuega.)

Valaaulia tamaiti aoga e galulue ini paga ma suesue le 2 Nifae 3:7, 11–15, 18–21. Fai i paga taitasi e fai se lisi o mea ua tau mai e tusitusiga paia o le a faia e Iosefa Samita e fesoasoani ai i le faatuina o le galuega a le Alii. Atonu e te manao e fautua atu i tamaiti aoga e fai lenei lisi i le faailogaina o fuaitau taua latou te maua i nei fuaiupu. A uma se taimi talafeagai, valaaulia tamaiti aoga e faasoa mai mea na latou mauaina. (O tali e tatau ona aofia ai mea nei: aumaia tagata i le malamalama o feagaiga [fuaiupu 7]; aumaia le Tusi a Mamona [fuaiupu 13, 18–21]; faamaonia i tagata le moni o le Tusi Paia[fuaiupu 11]; faia ia malosi[fuaiupu 13]; ma aumaia tagata i le faaolataga [fuaiupu 15].)

Faaali atu le fuaitau lenei mai ia Peresitene Polika Iaga (1801-77), ma valaaulia se tamaitiiti aoga e faitau leotele:

“Sa filifilia i le aufono o le faavavau, ae le i taitai ona oo i le faavaeina o le fogaeleele, o ia, o Iosefa Samita, o le tagata, i le tisipenisione mulimuli o lenei lalolagi, na te aumaia le upu a le Atua i tagata. … Sa silasila i ai le Alii ia te ia, ma lona tama, ma le tama o lona tama, ma tagata uma o lona aiga seia oo i tua … ia Atamu. Sa ia silasila i lena aiga ma lena toto ao puna mai i lona amataga seia oo mai i le aso na soifua mai ai lena tagata. Sa muai faamanuiaina o ia i le faavavau e pule faamalumalu i lenei tisipenisione mulimuli” (Aoaoga a Peresitene o le Ekalesia: Polika Iaga [1997], 96).

Ina ia fesoasoani i tamaiti aoga e lagona le upumoni ma le taua o le muai faauuina o le misiona a Iosefa Samita, talanoaina mea nei:

Aisea e taua ai mo oe le iloa o Iosefa Samita na muai faauuina ma saunia i le muai olaga e avea ma Perofeta o le Toefuataiga?

Mataupu Faavae ma Feagaiga 135:3

O Iosefa Samita “e tele atu mea na ia faia, vagana ai lava Iesu, mo le faaolataga o tagata”

Fai i tamaiti aoga e faasoa mai le mea o le a latou fai atu pe molimau atu ai e uiga ia Iosefa Samita pe afai e tuuina atu ia i latou ni nai fuaiupu e fai ai. Faamatala atu ina ua mavae le maliu o Iosefa Samita, na tusia se saafiafiga ia Iosefa Samita ma faasaoina mulimuli ane mo i tatou i le Mataupu Faavae ma Feagaiga. Fai i se tamaitiiti aoga e faitau leotele le fuaiupu muamua o le Mataupu Faavae ma Feagaiga 135:3. Fesili atu:

O le a le upumoni e uiga ia Iosefa Samita ua folafolaina mai i lenei fuaiupu? (E tatau i tamaiti aoga ona faailoa mai le upumoni lenei: O Iosefa Samita e tele atu mea na ia faia, vagana ai lava Iesu mo le faaolataga o tagata i lenei lalolagi.)

Ina ia iloiloina le galuega ma saofaga a le Perofeta o Iosefa Samita, faatulaga tamaiti aoga ini vaega laiti. Tofi i latou e vaai faavave i le Mataupu Faavae ma Feagaiga ma mafaufau i tua i lesona na talanoaina i lenei kosi e oo mai i lenei taimi. Fai ia i latou e fai se lisi o faamanuiaga ma aoaoga faavae na toefuatai mai e ala mai i le Perofeta o Iosefa Samita lena e saofaga i lo tatou faaolataga. A maea se taimi talafeagai, valaaulia tamaiti aoga e filifili se aitema i la latou lisi e faasoa atu i la latou vaega le ala ua ia faatosina ai o latou olaga ma taitai ai i latou i le faaolataga.

Ina ia aotele tali a tamaiti aoga, faaali atu le fuaitau lenei a Elder Tad R. Callister, lea na auauna atu i le Au Peresitene o le Fitugafulu. Fai i se tamaitiiti aoga e faitau leotele ao mulimuli tamaiti aoga i le faitauga:

“E ala mai ia Iosefa Samita ua toefuatai uma mai ai mana, ki, aoaoga ma sauniga e manaomia mo le faaolataga ma le faaeaga. E le mafai ona e alu i se isi lava mea o le lalolagi e maua mai ai. E le maua i se isi lava ekalesia. E le maua mai i ni filosofia a tagata po o ni suesuega faasaienisi po o se malaga toatasi i se nofoaga paia, e tusa lava pe foliga atamai. O le faaolataga e na o le tasi lava le nofoaga e maua ai e pei ona faatulagaina e le Alii Lava Ia, ina ua Ia fetalai o lenei ‘o le ekalesia ola e tasi ma le faamaoni i luga o le fogaelele atoa’ (MF&F 1:30)” (“Iosefa Samita—Perofeta o le Toefuataiga,” Ensign po o le Liahona, Nov. 2009, 35).

Tuu atu i tamaiti aoga se taimi e mafaufau loloto ai i le ala na saofaga ai le galuega a Iosefa Samita i lo latou faaolataga, ona fesili atu lea:

O a ni auala faapitoa e ono ese ai lou olaga e aunoa ma le galuega a le Perofeta o Iosefa Samita?

Mataupu Faavae ma Feagaiga 122:1–2; Iosefa Samita—Talafaasolopito 1:33

O le igoa o Iosefa “o le a tauleleia ma tauleagaina i totonu o atunuu uma”

Tau atu i tamaiti aoga e ui lava i mea lelei uma na faataunuuina e Iosefa Samita, na tele ona fili, ae maise lava i le latalata ai i le faaiuga o lona soifua. O lenei vaega o lona soifua na muai vaaia foi e perofeta anamua (tagai, mo se faataitaiga, 3 Nifae 21:10). Valaaulia se tamaitiiti aoga e faitau leotele le mea ua tau mai e Moronae ia Iosefa Samita e uiga ia i latou o le a tetee ia te ia, o loo faamaumauina i le Iosefa Samita—Talafaasolopito 1:33. Valaaulia se isi tamaitiiti aoga e faitau leotele le Mataupu Faavae ma Feagaiga 122:1-2. Fesoasoani i tamaiti aoga e tau mai se upumoni ua maua i nei fuaitau i le fesili atu:

O le a faapefea ona e aoteleina mea ua e aoao mai nei fuaitau o mau e uiga i le ala o le a tali atu ai tagata ia Iosefa Samita? (Ao faasoa mai tamaiti aoga ia latou aotelega, fesoasoani ia i latou ia malamalama i lenei upumoni: Ao toatele tagata i le lalolagi o le a faitio ia Iosefa, o e amiotonu o le a saili faamanuiaga ua maua mai i lana galuega.)
Aisea i lou manatu ua toatele naua ai le au faitio ma fili o Iosefa Samita, e ui lava ua tele tausaga talu ona maliu? (O se molimau o le Toefuataiga e tautau i luga o le moni po o le le moni o Iosefa Samita o se perofeta na faia le galuega a le Atua. O le mea lea, e faaauau pea e Satani le tauivi e faaleaga Iosefa Samita.)

Valaaulia se tagata o le vasega e faitau le faamatalaga lenei a Elder Neil L. Andersen o le Korama a Aposetolo e Toasefululua.

“O le toatele o i latou o e le amanaiaina le galuega o le Toefuataiga e le talitonu faapea o loo talanoa mai tagata faalelagi i tagata i le fogaeleele. Ua latou fai mai e le mafai ona auina mai e se agelu ni papatusi auro, ma faaliliuina i le mana o le Atua. Mai lena le talitonu, sa vave ai lava ona latou teenaina le molimau a Iosefa, ma o le mea e leaga ai, o nisi sa latou tautino ai e faamaasiasi le Perofeta ma tauleagaina lona tagata.

Tatou te matua faanoanoa lava pe afai e aluese mai se tasi sa faaaloalo ia Iosefa mai i ona talitonuga maumaututu sa i ai ae faitio i le Perofeta.

“O le suesue i le Ekalesia … e ala atu i mata a ona tagata pepelo,” sa saunoa mai ai Elder Neal A. Maxwell, e pei lava o le ‘faatalanoaina o Iuta ina ia malamalama ia Iesu. O tagata pepelo e tau mai lava ia i tatou e sili atu ia i latou lava nai lo lea na latou o ese mai ai’ [“All Hell Is Moved” (Faigalotu a le Brigham Young University, Nov. 8, 1977), 3; speeches.byu.edu]. …

“O manatu faaalia le lelei e uiga i le Perofeta o Iosefa Samita o le a faateleina a o tatou agai atu i luma i le Afio Mai Faalua o le Faaola. O faamatalaga taufaasese ma tala pepelo maaleale o le a le faaitiitia. O le a i ai tagata o le aiga ma uo o le a manaomiaina lau fesoasoani. O le taimi lenei e saunia ai e fesoasoani atu i isi o e o sailia le mea moni” (“Iosefa Samita,” Ensign po o le Liahona, Nov. 2014, 28–30).

Talanoaina fesili nei:

Aisea e taua ai le iloa e ui lava ua tele tausaga talu ona mavae le maliu o Iosefa Samita, o loo faaauau pea e fili o le Ekalesia ona osofaia lona tagata?
O le a le mea e mafai ona tatou faia ia i latou o loo saili le upumoni ia iloa pe o Iosefa Samita o se perofeta a le Atua?

Faaali atu le saunoaga lenei a Elder Neil L. Andersen, ma fai i se tamaitiiti aoga e faitau leotele:

“E tatau ona vaai le tagata suesue faamaoni i le faasalalau atu o le talalelei toefuataiina o se fua o le galuega a le Alii e ala mai le Perofeta. …

“Sa fetalai mai Iesu:

“E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. …

“‘… O lea foi tou te iloa ai i latou i o latou fua’ [Mataio 7:18, 20].

“O nei faamatalaga e faatalitonuina le tagata, ae e le tatau i le tagata suesue faamaoni ona faalagolago atoatoa i ai e faamalie ai lana sailiiliga mo le mea moni.

“E manaomia e tagata talitonu taitasi se faamaoniga faaleagaga e uiga i le misiona paia ma le ituaiga tagata e i ai le Perofeta o Iosefa Samita. E moni lenei mea mo augatupulaga uma. O fesili faaleagaga e talafeagai i ai tali faaleagaga mai le Atua” (“Iosefa Samita,” Ensign po o le Liahona, Nov. 2014, 29–30).

Tuu atu i tamaiti aoga se avanoa e molimau mai ai ia Iosefa Samita i le fai atu o fesili nei:

O a vaega o le Ekalesia a Iesu Keriso o le Au Paia o Aso e Gata Ai ua e vaaia ai se faamaoniga o le misiona faaperofeta a Iosefa Samita?
O a ni aafiaga na e maua ua saofaga i lau molimau i le Perofeta o Iosefa Samita?

Faaiu i le faaali atu o saunoaga nei a Bathsheba W. Smith (1822–1910), lea na auauna atu o le peresitene aoao lona fa o le Aualofa, ma Peresitene Polika Iaga (1801–77). Na masani uma Sister Smith ma Peresitene Iaga ia Iosefa Samita i la le tino. Valaaulia se tamaitiiti aoga e faitau leotele nei saunoaga.

“Ina ua ou faalogo i le Talalelei, sa ou iloaina e moni; i le taimi muamua na ou faitau ai i le Tusi a Mamona, sa ou iloaina e musuia e le Atua; ina ua ou faatoa vaai ia Iosefa Samita, sa ou iloaina ua ma faafesagai ma se perofeta a le Atua soifua, ma sa leai se masalosalo i lo’u mafaufau e uiga i lana pule.” (Bathsheba W. Smith, upusii i Afafine i Lou Malo: O le Talafaasolopito ma le Galuega a le Aualofa [2011], 34).

“Ou te lagona le fia alaga Aleluia, i taimi uma, pe a ou mafaufau i lo’u iloaina o Iosefa Samita, le Perofeta sa faatuina ma faauuina e le Alii, ma o le na ia tuu i ai ki ma le mana e fausia ai le Malo o le Atua i luga o le fogaeleele” (upusii i Aoaoga a Peresitene o le Ekalesia: Iosefa Samita [2007], 495).

Valaaulia tamaiti aoga e mafaufau ia latou molimau i le Perofeta o Iosefa Samita ma mea latou te ono faia e faasoa atu ai i isi, pe faaletagata pe faaaoga ai agafesootai. Uunaia i latou e faailoa mai se isi latou te mananao e faasoa i ai lenei molimau ma tulitatao lo latou manao.

Faitauga a Tamaiti Aoga

2 Nifae 3:1–21; Mataupu Faavae ma Feagaiga 122:1–2; 135:3; Iosefa Samita—Talafaasolopito 1:33.
Neil L. Andersen, “Iosefa Samita,”, Ensign po o le Liahona, Nov. 2014, 28–31.