Lesona 25: O Le Taua a Iuta ma le Fasiga Tele i Mountain Meadows
Lesona 25
O le Taua a Iuta ma le Fasiga Tele i Mountain Meadows
Folasaga
I le vaitau o le 1950, o le matau ma le le femalamalamaai i le va o le Au Paia o Aso e Gata Ai ma taitai o le malo o le Iunaite Setete na taitai atu ai i le Taua a Iuta o le 1857-58. Ia Setema o le 1857, o nisi o le Au Paia o Aso e Gata Ai i le Teritori o Iuta i sasae ma ni tagata malaga o se solo o taavale solofanua i lo latou malaga atu i Kalefonia na i ai se feteenaiga, ma o le Au Paia o Aso e Gata Ai, i le uunaia e le ita ma le fefe, na fuafua ma fasiotia pe a ma le 120 tagata malaga. O lenei gaoioiga matuia ua iloaina nei o le Fasiga Tele i Mountain Meadows.
Faitauga Faaopoopo
Richard E. Turley Jr., “The Mountain Meadows Massacre,” Ensign, Set. 2007, 17–21.
“Peace and Violence among 19th-Century Latter-day Saints,” Gospel Topics, lds.org/topics.
Henry B. Eyring, “150th Anniversary of Mountain Meadows Massacre,” Set. 11, 2007, mormonnewsroom.org/article/150th-anniversary-of-mountain-meadows-massacre.
Fautuaga mo le Aoaoina Atu
Na faateleina le feteenaiga i le va o uluai Au Paia o Aso e Gata Ai ma le malo o le Iunaite Setete
Tufa atu se kopi o le pepa e tufa atu i le faaiuga o le lesona i tamaiti taitoatasi. Fai i se tamaitiiti e faitau leotele le pepa e tufa atu ua faaautuina “O le faatupulaia o le Matau na Taitai atu i le Taua a Iuta.”
Afai o oe o se Au Paia o Aso e Gata Ai i le 1857 ma na faalogo faapea o se autau tele lava ua lalata mai i le tou aai, o a ni popolega atonu e te maua? (Atonu e taua e tamaiti aoga faapea o le Au Paia na matu’ia lava le tulieseina mai Ohaio, Misuri, ma Ilinoi; e toatele na leiloloa ni meatotino taua ma fanua; ma o nisi na fasiotia ma na maliliu mai sauaga. O tala fou o le autau ua lalata mai na mafua ai ona popole nisi o le Au Paia faapea nei tupu na mea i Iuta.)
Valaaulia se tamaitiiti aoga e faitau leotele le pepa e tufa atu ua faaautuina “Saunia e Puipuia le Teritori.”
Na tulai mai se feteenaiga i le va o nisi o le Au Paia o Aso e Gata Ai ma tagata o se malaga o le solo o taavale solofanua.
Faaali atu se faafanua e tai tutusa ma lea o loo faaali atu iinei, pe tusi se tasi i le laupapa.
Valaaulia se tamaitiiti aoga e faitau leotele le pepa e tufa atu ua faaautuina “Feteenai ma le Malaga a le Solo a Taavale Solofanua.”
Valaaulia tamaiti aoga e mafaufau i ni taimi na latou feteenai ai ma se isi tagata po o se vaega o tagata. Valaaulia se tamaitiiti e faitau leotele le 3 Nifae 12:25. Fai i le vasega e mulimuli i le faitauga, ma vaai mo se mataupu faavae na aoao mai e Iesu Keriso e mafai ona taitaiina i tatou pe a tatou aafia i se feteenaiga ma isi.
O le a sou manatu i le uiga o le “vave ona e ioe faatasi ma lou fili”?
Ina ia fesoasoani i tamaiti aoga ia malamalama i lenei fuaitau, atonu e te manao e fai i se tamaitiiti aoga e faitau leotele le faamatalaga lenei mai ia Elder David E. Sorensen o le Fitugafulu:
Ata
Elder David E. Sorensen
“Na fetalai mai le Faaola, ‘Ia vave ona oulua lelei ma le o loo tagi i ana mea … ,’ o lea ua poloaiina ai i tatou ina ia vave ona faaleleia o tatou feeseeseaiga, ina nei faateteleina le malosi o le lagona i lena taimi ma oo ai ina mafatia i la le tino po o lagona, ma tatou nofo pologa ai i lo tatou ita” (“O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 11).
E faapefea ona e otootoina le aoaoga a le Faaola o loo i le 3 Nifae 12:25? (Ao tali mai tamaiti, tusi se mataupu faavae e tutusa ma lenei e i le laupapa:Afai tatou te foia feteenaiga ma isi i le ala a le Alii, ona tatou aloese lea mai aafiaga leaga o le finauga.)
O le a le ala semanu e faia e i latou na fuafua e faaleaga tagata o le solo a taavale solofanua e faaaoga ai lenei mataupu faavae?
Tuu atu i se tamaitiiti aoga e faitau leotele le pepa e tufa atu ua faaautuina “Faanatinatiina o le Finauga.”
O a mea sa tatau ona fai e taitai o le Ekalesia i Cedar City ina ua fautuaina i latou e William Dame e aua le faaaogaina le militeri? O le a le mea na taitaia i latou e fai e le tetee i le fautuaga? (A uma ona tali mai tamaiti aoga, tusi le mataupu faavae lenei i le laupapa: Afai tatou te le amanaia fautuaga e fai le mea sao, ona sili atu lea ona faigofie ona tatou fai filifiliga leaga ma e oo lava i agasala. Atonu e mafai foi ona e faasino atu faapea e i ai le atamai tele i le faatulagaga o fonotaga lea e taitaia ai le Ekalesia.)
Valaaulia ni nai tamaiti aoga e feauauai i le faitauga leotele o le pepa e tufa atu ua faaautuina “Osofaiga o Tagata Malaga,” ma valaaulia tamaiti aoga e vaai mo le ala na faaauau ai e taitai o Cedar City ona fai filifiliga agasala ina ua le amanaia le fautuaga na latou mauaina.
O a taunuuga o le filifiliga mai taitai o le Cedar City e le usitaia le fautuaga a le taitai au o le militeri, o William Dame?
I lenei tulaga, o a filifiliga na i ai ia i latou na faia le osofaiga? (E mafai ona latou tautau atu mea na latou faia ma maua taui, po o lo latou taumafai e nana a latou mea sese ma agasala.)
Valaaulia tamaiti aoga e mafaufau i fesili nei:
O le a le mea e te faia pe a e faia se mea sese? Pe e te tautau atu mea sese na e faia ma maua le taunuuga, pe e te taumafai e nana le agasala e ala i le taufaasese?
O nisi o le Au Paia o Aso e Gata Ai na fuafua ma faataunuuina le Fasiga Tele i Mountain Meadows
Faamatala atu faapea o tagata o le Ekalesia na aafia i osofaiga o tagata malaga na filifili e taumafai e nana a latou agasala. Valaaulia le vasega e faalogo mo le mea na tupu o se taunuuga o lenei filifiliga ao feauauai tamaiti aoga e faitau leotele vaega o pepa e tufa atu ua faaautuina “O le Fasiga Tele i Mountain Meadows” ma “Taunuuga Matautia.”
Faamatala atu o filifiliga a nisi o taitai o le Au Paia o Aso e Gata Ai ma e na nofoia le Teritori o Iuta i saute na taitai atu ai i le Fasiga Tele i Mountain Meadows. I le isi itu, o taitai o le Ekalesia ma teritori i le Aai i Sate Leki na foia le feteenaiga ma le malo o le Iunaite Setete e ala i talanoaga filemu ma fetuunaiga i le 1858. I lenei feteenaiga—lea na taua mulimuli ane o le Taua a Iuta—o le autau a le Iunaite Setete ma alii o le militeri a Iuta na auai i gaoioiga o le feitagai ae leai lava se taua.
O le a faapefea ona e otootoina filifiliga na taitai atu ai i le Fasiga Tele i Mountain Meadows?
O a mataupu faavae e mafai ona tatou aoaoina mai lenei mea matautia? (E mafai e tamaiti aoga ona faailoa mai ni mataupu faavae eseese, e aofia ai mea nei: O le filifili e nana a tatou agasala e mafai ona taitai atu ai i le faia o isi agasala. O le filifili e nana a tatou agasala e aumaia ai le faanoanoa ma le puapuaga.
Faamautinoa atu i tamaiti aoga afai ua latou amata agai i lalo o le ala o mea sese ma agasala, e mafai ona latou taofia le lototiga ma le faanoanoa i le lumanai e ala i le liliu atu i le Alii ma salamo ia latou agasala.
Valaaulia se tamaitiiti aoga e faitau leotele le vaega o le pepa e tufa atu ua faaautuina “Ua Iloa e Taitai o le Ekalesia le Fasiga Tele.”
Faamatala atu faapea ona o ni nai Au Paia o Aso e Gata Ai o le lotoifale na faia le fuafuaga ma le faatinoina o le Fasiga Tele i Mountain Meadows, na faaaoga e nisi tagata lenei mea e leaga ai la latou vaaiga i le Ekalesia atoa lava.
Aisea e taua ai le iloa o faatinoga sese a nisi o tagata o le Ekalesia e le faaalia ai le moni o le talalelei?
Valaaulia se tamaitiiti aoga e faitau le saunoaga a Peresitene Henry B. Eyring o le Au Peresitene Sili o loo maua i le vaega o le pepa e tufa atu ua faaautuina “150 Tausaga o le Fasiga Tele i Mountain Meadows.”
O le a faapefea ona tatou tali atu pe a tatou aoao i taimi na le mafai ai e tagata o le Ekalesia ona ola e tusa ai ma aoaoga a Iesu Keriso?
Valaaulia se tagata o le vasega e faitau leotele le Helamana 5:12 . Fai i le vasega e mulimuli i le faitauga, ma vaai i mea e mafai ona tatou atiina ae ma maua ai a tatou molimau ina ia oo i taimi faigata, e pei o se taimi tatou te aoao ai i ni tagata o le Ekalesia na le mafai ona ola e tusa ai ma aoaoga a Iesu Keriso, o le a le maluelue ai lo tatou faatuatua.
E tusa ai ma Helamana 5:12, o a mea e mafai ona tatou faia e atiina ae ai ma faatumauina ai a tatou molimau? (A uma ona tali mai tamaiti aoga, atonu e te manao e tusi lenei mataupu faavae i le laupapa:E mafai ona tatou atiina ae ni molimau malolosi i le fausia o lo tatou faatuatua i le faavae o Iesu Keriso.)
Ina ia faaali atu lenei mataupu faavae, faaali atu le vaega lenei ma valaaulia se tamaitiiti aoga e faitau leotele:
“O James Sanders o le atalii o le atalii o le tama-matua o … o se tasi o tamaiti na sao mai le fasiga tele [ma o se tasi foi o le Ekalesia]. … O Brother Sanders … na saunoa mai faapea o le iloaina o lona tuaa na fasiotia i le fasiga tele ‘e lei aafia ai lona faatuatua ona e faavae ia Iesu Keriso, e leo se isi tagata i le Ekalesia’” (Richard E. Turley Jr., “The Mountain Meadows Massacre,” Ensign, Set. 2007, 21).
E faapefea e lo tatou faatuatua ia Iesu Keriso ona faamalosia i tatou pe a tatou aoao i taimi na le mafai ai e tagata o le Ekalesia ona ola e tusa ai ma aoaoga a le Faaola?
O a mea e te faia e fesoasoani ai ia te oe e fausia lou faatuatua i le faavae o Iesu Keriso?
Molimau atu i le taua o le ola i aoaoga a le Faaola ma faavae o tatou faatuatua ia te Ia ma Lana talalelei. Valaaulia tamaiti aoga e mafaufau loloto i le ala e mafai ona latou fausia atili ai lo latou faatuatua i le faavae o Iesu Keriso ma faatu se sini ina faia.
Faitauga a Tamaiti Aoga
“Peace and Violence among 19th-Century Latter-day Saints,” Gospel Topics, lds.org/topics.
O le Taua a Iuta ma le Fasiga Tele i Mountain Meadows
O Faavae o le Toefuataiga—Lesona 25
O le Faatupulaia o Feteenaiga na Taitai Atu ai i le Taua a Iuta
E tolu tausaga talu ona taunuu paionia o le Au Paia muamua i le Vanu o Sate Leki, ae faatulaga e le malo o le Iunaite Setete le Teritori o Iuta ma tofia Polika Iaga o le kovana muamua o le teritori. I le ogatotonu o le 1857, na faalogo ai taitai o le Au Paia o Aso e Gata Ai i tala feaveai faapea atonu o le a suia e le malo o setete tuufaatasi Polika Iaga i se kovana fou o le Teritori o Iuta, lea o le a lagolagoina e se vaega tele o autau a le malo. Ia Iulai 24, 1857, na faatasi ai Peresitene Polika Iaga ma se vaega o le Au Paia i le faailogaina o le 10 tausaga o lo latou taunuu i le Vanu o Sate Leki ae ona ia mauaina loa se faamautinoaga o tala fou muamua faapea o se autau ua agai mai i le Aai o Sate Leki.
I tausaga ua mavae, o feeseeseaiga ma feteenaiga na taunuu ai i le faatupulaia o le va o le Au Paia o Aso e Gata Ai ma taitai o le malo o le Iunaite Setete. Na mananao le Au Paia ia taitaia i latou e taitai o la latou lava filifiliga ma na teena tagata na totofi mai e setete tuufaatasi o e na ese o latou tulaga faatulagaina, o nisi o i latou na le faamaoni, piopio, ma amio leaga. O nisi o taitai o setete na talitonu o faatinoga a le Au Paia o lona uiga ua tetee i latou i le malo o le Iunaite Setete.
Na auina mai e le Peresitene o le Iunaite Setete o James Buchanan le autau e toa 2,500 i le Aai o Sate Leki e faafeao mai le kovana fou ma le saogalemu i Iuta ma aveese le mea na ia manatu o se feteenaiga i totonu o le Au Paia. O lenei filifiliga na faia e aunoa ma se faamatalaga sao e uiga i le tulaga i totonu o Iuta (tagai i le Church History in the Fulness of Times Student Manual, lom. 2 [Tusi lesona a le Church Educational System , 2003], 368–71).
Saunia e Puipui le Teritori
I lauga i le Au Paia, na faamatala e Peresitene Iaga ma isi taitai o le Ekalesia ia autau ua o mai o ni fili. Na latou fefefe nei tuliaese le Au Paia mai Iuta, e pei ona tulieseina ai i latou muamua mai Ohaio, Misuri, ma Ilinoi. O Polika Iaga, lea na aoaoina le Au Paia ia teuina le saito, na faafouina ana faatonuga ina ia latou maua meaai e ai pe a manaomia lo latou sosola ese mai autau. I le avea ai ma kovana o le Teritori o Iuta, na ia taitaia foi le autau a le teritori e saunia e puipui le teritori.
Feteenaiga ma le Solo a Taavale Solofanua na Malaga mai
Sa ulufale mai i Iuta se malaga a se solo o taavale solofanua mai sisifo agai i Kalefonia i le taimi tonu lava ua saunia ai le Au Paia o Aso e Gata Ai e puipuia le teritori agai i autau o loo o mai a le Iunaite Setete. O nisi o tagata o le solo o taavale solofanua na le fiafia ona sa faigata le faatauina mai o saito na matuai manaomia lava mai le Au Paia, ia na faatonuina e faasaoina la latou saito. O tagata malaga na feteenai foi ma le Au Paia o e na le mananao i le solo a taavale solofanua ma le tele o a latou solofanua ma povi e faaaoga meaai ma punaoa o vai na manaomia e le Au Paia mo a latou lava manu.
Na tulai mai se feteenaiga i Cedar City, o le nofoaga mulimuli lea na nofoia i Iuta i le ala i Kalefonia. O fefinauaiga na tupu i le va o nisi o tagata o le solo a taavale solofanua ma nisi o le Au Paia o Aso e Gata Ai. O nisi tagata o le solo a taavale solofanua na taufaamatau mai o le a latou auai atu i autau a le malo e faasagatau i le Au Paia. E ui lava na otegia e le kapeteni o le solo taavale solofanua ona tagata mo le faia o nei taufaamatau, na vaai lava nisi taitai ma tagata o Cedar City i tagata malaga o ni fili. Na tuua e le solo taavale solofanua le taulaga i se itula talu ona taunuu, ae o nisi o tagata ma taitai i Cedar City na mananao e tuliloaina ma faasalaina alii na faatiga ia i latou.
Faanatinatiina le Feteenaiga
Ona o nei Au Paia e lei foiaina la latou feteenaiga ma tagata malaga i le ala a le Alii, na iu ina matautia le tulaga na oo i ai. O Isaac Haight, le pulenuu o Cedar City, le taitai o le autau, ma le peresitene o le siteki, na talosaga mai mo le faatagaga mai le taitai au a le militeri, na nofo i le nuu e lata ane o Parowan, e valaau i le militeri e faafetaiai le fili mai le solo taavale solofanua. Na fautuaina e le taitai militeri, o William Dame, o se tagata o le Ekalesia, ia Isaac Haight e aua le amanaiaina taufaamatau a tagata malaga. Nai lo le taliaina o lenei fautuaga, na filifili Isaac Haight ma isi taitai o Cedar City e faaoso ni Initia o le lotoifale e osofai le solo a taavale solofanua ma gaoi a latou povi o se auala e faasala ai le au malaga. Na fai atu Isaac Haight ia John D. Lee, o se tagata o le Ekalesia ma le taitai autu o le militeri, e taitai lenei osofaiga, ma na fuafua le toalua lea e tuuaia Initia mo le gaoioiga.
Osofaiga i Tagata Malaga
Na tuuina atu e Isaac Haight le fuafuaga e osofai le solo a taavale solofanua i se fono a taitai o le lotoifale i le Ekalesia, alalafaga ma le militeri. Na matuai le ioeina lava e sui o le fono le fuafuaga ma fesili atu ia Haight pe na ia fesili atu ia Peresitene Polika Iaga e uiga i le mataupu. I le fai atu na te lei faia, na ioe Haight e auina atu se avefeau, o James Haslam, i le Aai o Sate Leki ma se tusi e faamatala ai le tulaga ma fesili atu i le mea e tatau ona fai. E ui i lea, ona o le Aai o Sate Leki e 250 lelei lava maila mai Cedar City, o le a manaomia ai se vaiaso o le tietie saoasaoa atu i se solofanua mo le avefeau ia taunuu ai i le Aai o Sate Leki ma toe foi mai i Cedar City ma faatonuga mai ia Peresitene Iaga.
Na vave lava ae lei auina atu e Isaac Haight lana tusi ma le avefeau, na osofai loa e John D. Lee ma se vaega o Initia le tolauapiga a le malaga i se nofoaga e taua o Mountain Meadows. Na taitai e Lee le osofaiga ae na ia nanaina ona foliga ina ia faapea e nao Initia lava na aafia. O nisi o tagata malaga na fasiotia pe manunua, ae o e na totoe na tau malosi e tutuli ese le au osofai, lea na faamalosia ai Lee ma Initia e tuumuli ese. Na vave lava ona toso faatasi mai e tagata malaga a latou taavale solofanua i se lio, po o se pa faataamilo, mo le puipuiga. E lua isi osofaiga na mulimuli mai i le lima aso o le poloka i le solo a taavale solofanua.
I se tasi tulaga, na iloa e alii o le militeri a Cedar City ni alii malaga e toalua i fafo o le pa o taavale solofanua. Na tafaga atu e alii o le militeri i laua, ma na fasiotia ai le toatasi. O le isi na sola ma aumaia le tala fou i le tolauapiga a taavale solofanua faapea o alii papae na aafia i osofaiga ia i latou. O e na fuafuaina le osofaiga ua maua nei i la latou taufaasese. Afai e faatagaina le au malaga e faaauau i Kalefonia, o le a faasalalau atu ai le tala fou o le Au Paia o Aso e Gata Ai na mafua ai le osofaiga i le solo a taavale solofanua. Na fefefe le au faufau leaga o lenei tala fou o le a aumaia ni taunuuga leaga ia i latou ma o latou tagata.
O Le Fasiga Tele i Mountain Meadows
I se taumafaiga e taofia le tala fou mai le faasalalauina atu faapea o le Au Paia o Aso e Gata Ai na aafia i osofaiga i le solo o taavale solofanua, na faia loa e Isaac Haight, John D. Lee, ma isi taitai o le militeri ma le Ekalesia o le lotoifale se fuafuaga e fasiotia uma e o totoe o le aumalaga sei vagana ai tamaiti laiti. I le faatinoina o lenei fuafuaga, na agai atu John D. Lee i le aumalaga ma fai atu o le a puipuia i latou e le militeri mai nisi osofaiga i le toe taitaiina atu saogalemu o i latou i Cedar City. Ao savavali atu le aumalaga agai i Cedar City, na liliu atu alii o le militeri ma tafaga i latou. O nisi Initia na aumaia e tagata o le nuu na feosofi mai nofoaga na lalafi ai ma auai i le osofaiga. Mai le 140 lelei lava o tagata malaga o se vaega o le solo a taavale solofanua, e na o le 17 tamaiti laiti na faasaoina.
E lua aso talu ona uma le fasiga tele, ae taunuu mai James Haslam i Cedar City ma le savali o le tali a Peresitene Iaga, na faatonuina ai taitai o le lotoifale e faataga le solo a taavale solofanua e o ma le filemu. “Ina ua faitau Haight i upu a Iaga, na ia tagi lotulotu e pei o se tamaitiiti ma na pau upu na ia mafaia, ‘Tuai tele, tuai tele’” (Richard E. Turley Jr., “The Mountain Meadows Massacre,” Ensign, Set. 2007, 20).
Taunuuga Matautia
O le Fasiga Tele i Mountain Meadows na le gata ina faaoo ai le oti i le tusa ma le 120 tagata, ae na oo ai foi le puapuaga i tamaiti na feola ma isi tausoga o e na maliliu. O nisi Au Paia o Aso e Gata Ai na aumaia ma tausia tamaiti o le malaga na feola mai le fasiga tele. I le 1859, na ave ai e taitai o setete nei tamaiti ma faafoi atu i latou i tausoga i Arkansas. Na puapuagatia foi Initia Paiute mai le tuuaia mo le solitulafono.
Ua Iloaina e Taitai o le Ekalesia le Fasiga Tele
“E ui lava na silafia e Polika Iaga ma isi taitai o le Ekalesia i le Aai i Sate Leki le fasiga tele ina ua faatoa uma ona tupu, o lo latou malamalama i le auai tele o tagatanuu ma faamatalaga matautia o le solitulafono na faasolosolo mai lava i le faasologa o le taimi. I le 1859 na latou faamalolo mai o latou valaauga le peresitene o le siteki o Isaac Haight ma isi taitai autu o le Ekalesia i Cedar City na aafia i le fasiga tele. I le 1870 na latou tapeina ai igoa o Isaac Haight ma John D. Lee mai le Ekalesia.
“I le 1874 na faasalaina aloaia ai e le faamasinoga maualuga o le teritori alii e toaiva mo lo latou matafaioi i le fasiga tele. O le toetele o i latou na iu ina faafalepuipui, e ui lava na o Lee na faamasinoina, faafalepuipuiina, ma faasalaina i le oti mo le solitulafono. O se isi alii na tuuaia na faaliliu atu faamaoniga a le setete [ma le loto i ai na molimau ma tuuina atu faamaoniga agai i isi na molia], ae o isi na tele tausaga o sosola mai le tulafono. O isi alii o le militeri na faatinoina le fasiga tele na galulue i aso o totoe o o latou olaga i lalo o se lagona o le nofosala ma mititaufaafefe faifaipea o mea na latou faia ma vaaia” (Richard E. Turley Jr., “The Mountain Meadows Massacre,” Ensign, Set. 2007, 20).
150 Tausaga o le Fasiga Tele i Mountain Meadows
Na saunoa mai Peresitene Henry B. Eyring o le Au Peresitene Sili:
“E fitoitonu mo le [Fasiga Tele i Mountain Meadows] i taitai o le lotoifale o le Ekalesia a Iesu Keriso o le Au Paia o Aso e Gata Ai i nofoaga e latalata i Mountain Meadows o e na umia tofiga i le nuu ma le militeri ma tagata o le Ekalesia na faatinoina i lalo o la latou taitaiga. …
“… O le talalelei a Iesu Keriso tatou te lagolagoina, e inoino i le fasiotiga o alii, tamaitai, ma tamaiti e aunoa ma se mafuaaga. E moni lava, na aumaia le filemu ma le faamagaloga. O le mea na faia [i Mountain Meadows] i le tele o tausaga ua mavae e tagata o le Ekalesia na faaalia ai le matautia ma le le maalofia o le le ola i aoaoga ma uiga faaKerisiano. … E aunoa ma le masalosalo o le Faamasinoga Tonu Mamana o le a tuuina atu le faasalaga i e faasino tonu i ai le fasiga tele. …
“… Tau ina ia faamanuia mai i tatou e le Atua o le Lagi, e ana atalii ma afafine o i tatou uma lava, ia faamamaluina i latou na maliliu iinei e ala i le faaali atu o le alofa e le tasi i le isi le alofa mama ma le agaga o le faamagalo lea na faatinoina e Lona Alo e Toatasi na Fanaua” (“150th Anniversary of Mountain Meadows Massacre,” Sept. 11, 2007, mormonnewsroom.org/article/150th-anniversary-of-mountain-meadows-massacre).