Lesona 16

Faaolataga mo e ua Maliliu

Folasaga

I le avea ai ma se vaega o le Toefuataiga o mea uma i le tisipenisione o le atoatoaga o taimi, na toefuatai mai e le Alii le aoaoga faavae o le faaolaina o e ua maliliu e ala mai i le Perofeta o Iosefa Samita. O lenei aoaoga faavae na toefuatai mai “o lea fuaitau i luga o lea fuaitau.” O le galuega o le faaolaina o e ua maliliu e manaomia i le faaolaina o e o soifua ma e ua maliliu, ma na aoao mai le Perofeta o Iosefa Samita i le taua o le auai i lenei galuega: “O le tiutetauave silisili i lenei lalolagi ua faataatiaina mai e le Atua i o tatou luga o le sailia lea o o tatou tagata oti” (Aoaoga a Peresitene o le Ekalesia: Iosefa Samita [2007], 475).

Faitauga Faaopoopo

Richard G. Scott, “O Le Olioli i le Faaolaina o E ua Maliliu,” Ensign po o le Liahona, Nov. 2012, 93–95.
D. Todd Christofferson, “O le Togiolaina o e Oti ma le Molimau ia Iesu Keriso,” Liahona, Nov. 2000, 9–12.
“O Le Avea ma Faaola i Luga o Mauga o Siona,” mataupu 41 i le Aoaoga a Peresitene o le Ekalesia: Iosefa Samita: Iosefa Samita [2007], 499.
Mataio S. McBride, “Letters on Baptism for the Dead: MF&F 127, 128,” Revelations in Context series, Me 29, 2013; history.lds.org.

Fautuaga mo le Aoaoina Atu

Mataupu Faavae ma Feagaiga 137

O le faaaliga a le Perofeta o Iosefa Samita o le malo selesitila

Faasoa atu le tala lenei i tamaiti:

“Ia Novema 1823, na faafuasei lava ona mai tigaina Alevine Samita, le tama matua a Lusi Maki Samita ma Iosefa Samita le Matua na toetoe a oti. O Alevine sa 25 tausaga le matua, o se alii talavou malosi ma le agavaa; o lona galue malosi na fesoasoani tele i le tulaga mautu tau tupe a lona aiga. Na faamatalaina e lona tina o ia o se ‘talavou e uiga ese le lelei o lona natura,’ o lona ‘tamalii ma lona matamau’ na faamanuiaina i latou na latalata ia te ia ‘i itula uma o lona ola.’ …

“Ina ua iloa o le a oti o ia, na valaau ai e Alevine ona uso ma tuafafine e o mai ia te ia ma tautala atu ai ia i latou taitoatasi. Ia Iosefa, lea toeitiiti lava atoa le 18 tausaga ma e lei mauaina papatusi auro, na faapea atu Alevine, ‘Ou te manao ia avea oe ma se tama lelei ma fai mea uma i lou malosi ia maua papatusi. Ia faamaoni i le mauaina o faatonuga, ma i le tausiga o poloaiga uma ua tuuina mai ia te oe. …’

“Ina ua oti Alevine, na talosaga se faifeau Peresipeteriane i Palamaira, Niu Ioka, na te taitaia lona sauniga. Talu ai o Alevine e lei avea ma se tasi o le aulotu a le faifeau, na tau mai ai e le faifeau i lana lauga o Alevine e le mafai ona faaolaina. Na manatuaina e Viliamu Samita, le uso laitiiti o Iosefa: “Na matua ta’u mai ma le malosi e [le faifeau] … o [Alevine] ua alu i seoli, aua o Alevine e le o se tagata o se ekalesia, ae o ia o se tama lelei ma e le i fiafia i ai lo’u tama” (Aoaoga a Peresitene o le Ekalesia: Iosefa Samita [2007], 401, 403).

Ona e lei toefuataiina mai le aoaoga faavae o le faaolaina o e ua maliliu i le taimi o le maliu o Alevine, o a popolega o le aiga o Samita na i ai e uiga i le faaolataga o Alevine?

Tau atu i tamaiti aoga o lenei lesona o le a fesoasoani ia i latou e malamalama ai na faaalia mai faasolosolo e le Alii le aoaoga faavae o le faaolaina o e ua maliliu, o lea fuaitau i luga o lea fuaitau. Valaaulia tamaiti aoga e faitau le autu o le vaega i le Mataupu Faavae ma Feagaiga 137. Faamatala atu o lenei faaaliga na muamua mai i le faapaiaga o le Malumalu o Katelani ini nai masina. (E mafai ona e faasino atu faapea i le lomiga o le 2013 o le Mataupu Faavae ma Feagaiga, na faia ai ni suiga i le autu o le vaega 137.)

Valaaulia se tamaitiiti aoga e faitau leotele le Mataupu Faavae ma Feagaiga 137:1-6, ma fai atu i le vasega e mulimuli i le faitauga. Talanoaina mea nei:

O ai na vaai i ai Iosefa Samita i le malo selesitila? (Atonu e fiafia tamaiti aoga e iloa o le tama ma le tina o Iosefa Samita na soifua i le taimi na maua ai lenei faaaliga; o le mea moni, sa i ai le tama o Iosefa faatasi ma ia i le taimi na tupu ai le faaaliga.)
E tusa ai ma le fuaiupu 6, aisea na ofo ai Iosefa Samita faapea o lona uso o Alevine na i ai i le malo selesitila? (Atonu e te manao e faamanatu i tamaiti aoga faapea o lenei faaaliga na maua i ni nai tausaga ae lei aoao Iosefa Samita i le aoaoga faavae o le faaolaina o e ua maliliu.)

Valaaulia se tamaitiiti aoga e faitau leotele le Mataupu Faavae ma Feagaiga 137:7-9. Fai i le vasega e mulimuli i le faitauga ma vaai mo se aoaoga faavae na fesoasoani i le Au Paia o Aso e Gata Ai ia malamalama atili i le fuafuaga a le Atua e faaolaina Lana fanau.

O le a le mea na aumai e le fuafuaga a le Atua mo i latou e pei o Alevine Samita na maliu e aunoa ma le avanoa e maua ai le talalelei a Iesu Keriso po o le sauniga o le papatisoga? (Ao faasoa mai e tamaiti aoga o latou manatu, fesoasoani ia i latou e faailoa mai le aoaoga faavae lenei: O tagata uma e maliliu e aunoa ma le malamalama o le talalelei, o e semanu latou te taliaina lenei malamalama pe ana latou faalogo i ai, o le a mautofi i le malo selesitila.
O a mea ua aoao mai e lenei aoaoga faavae ia te oe i le uiga o le Tama Faalelagi ma Lona alofa mo Ana fanau?
O anafea na e maua ai le lagona fiafia i lenei aoaoga faavae? O anafea na e vaai ai i nisi, atonu o i latou na e aoaoina o se faifeautalai, ua maua le fiafia mai le malamalama i lenei aoaoga faavae?

Mataupu Faavae ma Feagaiga 124:30–34; 127:5–8; 128:1–18; 138:28–37

Sauniga sui mo e ua maliliu

Na muamua saunoa le Perofeta o Iosefa Samita i lenei aoaoga faavae o le papatisoga mo e ua maliliu i le sauniga o le maliu o Seymour Brunson ia Aokuso 15, 1840, i le faatoa uma ona faatulagaina e le Au Paia i latou lava i Navu, Ilinoi. Na ofo tagata o le Ekalesia ma fiafia ina ua latou iloaina lenei aoaoga faavae faaalia. Mo ni nai masina talu le faasilasilaga, na faatinoina loa e le Au Paia papatisoga i le Vai o Misisipi e lata ane e sui mo i latou e pele ia i latou ua maliliu (tagai i Teachings: Joseph Smith, 403; Church History in the Fulness of Times Student Manual, lom. 2 [Tusi lesona a le Church Educational System, 2003], 251).

E faapefea e lenei lauga ona faaopoopo i le faatupuina o le malamalama i le fuafuaga a le Tama Faalelagi e faaola Ana fanau? (Ao tali mai tamaiti aoga, tusi le upumoni lenei i le laupapa: O le sauniga faaola o le papatisoga e mafai ona fai mo i latou e lei taliaina le talalelei ao i ai i le lalolagi.)
E faapefea i lou manatu ona e tali atu pe ana faapea ua e faalogo o saunoa mai le Perofeta o Iosefa Samita e uiga i le papatisoga mo e ua maliliu mo le taimi muamua i lenei tisipenisione?

Faamatala atu faapea i le taimi o le konafesi aoao o Oketopa 1841 a le Ekalesia i Navu, Ilinoi, na folafola atu ai e le Perofeta o Iosefa Samita faapea ua finagalo le Alii e taofi le faia o papatisoga mo e ua maliliu seia mafai ona faia papatisoga i Lona maota (tagai i le MF&F 124:29–34). Ia Novema 8, 1841, na faapaia ai e Polika Iaga, ao Peresitene o le Korama a Aposetolo e Toasefululua, le vai i le fale a lalo o le Malumau e lei maea o Navu, ma na amata ai ona faia e tagata o le Ekalesia papatisoga e sui mo e ua maliliu.

Fai i tamaiti e faitau le vaega autu o le Mataupu Faavae ma Feagaiga 127, lea e faamatala ai faapea o le vaega 127 o se tusi mai le Perofeta o Iosefa Samita i le Au Paia, ua faatonuina ai i latou e tausia faamaumauga o papatisoga na latou faia mo e ua maliliu. Faamatala atu faapea e tusa ai ma le vaiaso mulimuli ane, na tusi ai e Iosefa se isi tusi i le mataupu o le papatisoga mo e ua maliliu, o loo maua i le Mataupu Faavae ma Feagaiga 128.

Tusi mau faasino nei i luga o le laupapa. (Aua le aofia ai tusiga o loo puipuia; ua saunia mo oe, le faiaoga.)

Mataupu Faavae ma Feagaiga 127:5-7; 128:8 (Pe a faia se sauniga e le pule o le perisitua ma tausia lelei le faamaumauga, ua faamauina le sauniga i le lalolagi ma i le lagi.)

Mataupu Faavae ma Feagaiga 128:6-7 ( O faamaumauga o sauniga sui o le a aofia ai i tusi na o le a tatalaina e faamasino ai e ua maliiu.)

Mataupu Faavae ma Feagaiga 128:15, 17–18 (O le faaolataga o o tatou tuaa ua maliliu e manaomia mo lo tatou faaolataga.)

Tofi ni tamaiti aoga e faitau fuaitau taitasi i le laupapa. Fai ia i latou e vaai mo aoaoga faavae ua faaopoopo i lo latou malamalama i le fuafuaga a le Atua mo le faaolaina o e ua maliliu. Valaaulia ni tamaiti aoga e aotele le aoaoga faavae o le faaolaina o e ua maliliu ua aoaoina i mau fuaitau taitasi. Fai i ni nai tamaiti aoga e tusi aoaoga faavae i le laupapa e sosoo ma fuaitau. Faasino atu o faaaliga i le Mataupu Faavae ma Feagaiga 127ma le 128 ua faaalia ai se mamanu masani o loo maua i le Toefuataiga o le talalelei—e faaalia mai e le Alii upumoni mai lea fuaitau i luga o lea fuaitau, nai lo le taimi lava e tasi.

Faamatala i tamaiti aoga faapea i le tele o tausaga talu ona maua nei faaaliga, na saunia e le Alii le malamalama atili o Lana fuafuaga e faaolaina e ua maliliu. I le 1918, na maua ai e Peresitene Iosefa F. Samita se faaaliga e uiga i le faaolaina o e ua maliliu. Na oo mai le faaaliga ao ia faanoanoa i le maliu o lona atalii o Ailama M. Samita, lea na maliu i le amataga o lena tausaga ao auauna atu o se tasi o le Korama a Aposetolo e Toasefululua.

Valaaulia tamaiti aoga e faitau le Mataupu Faavae ma Feagaiga 138:28-37, ma vaai mo upumoni na faaalia ia Peresitene Iosefa F. Samita e faatatau i le faaolaina o e ua maliliu.

O a upumoni e uiga i le faaolaina o e ua maliliu ua aoaoina i nei fuaiupu? (Ao faasoa mai e tamaiti aoga upumoni na latou maua, ia mautinoa ua latou malamalama i lenei upumoni: I lalo o le faatonuga a Iesu Keriso, ua aoao atu ai le talalelei e avefeau amiotonu ia i latou i le falepuipui o agaga.)
E faapefea e nei upumoni faaopoopo ona fesoasoani ia te i tatou ia malamalama ai pe faapefea e se tasi ua maliu e aunoa ma le mauaina o sauniga o le talalelei, e pei o Alevine Samita, ona mafai ona mautofi i le malo selesitila?

Faitau leotele le saunoaga lenei a Elder David A. Bednar o le Korama a Aposetolo e Toasefululua:

“I le avea ai ma tagata o le Ekalesia toefuataiina a Keriso, ua ia te i tatou le tiutetauave o le feagaiga e sailia o tatou augatama ma tuuina atu mo i latou ia sauniga faaola o le talalelei. “E le mafai ona atoatoa i latou e aunoa ma i tatou’ (Eperu 11:40; tagai foi iAoaoga: Iosefa Samita, 475). Ma ‘e le mafai foi ona tatou atoatoa e aunoa ma o tatou aiga ua maliliu’ (MF&F 128:15)” (“O le a Liliu atu Loto o Fanau i o Latou Tama,” Ensign po o le Liahona, Nov. 2011, 25).

Aisea e tatau ai ona avea le faaolaina o e ua maliliu o se faamuamua i o tatou olaga?
E faapefea e le saunia o sauniga faaola mo o tatou aiga ua maliliu ona fesoasoani ia i latou ma tatou ina ia atoatoa?

Faitau leotele le saunoaga lenei a Elder Russell M. Nelson o le Korama a Aposetolo a Toasefululua:

“Ao i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. O loo i ai se uunaiga faamama ia i latou o loo faia lea galuega. O loo latou fesoasoani moni lava e faaeaina o latou aiga” (“O Tupulaga e Sosoo i le Alofa,” Ensign po o le Liahona, Me 2010, 93).

E faapefea e le aoaoga faavae o le faaolaina o e ua maliliu ona molimau mai i le aoga e le iu o le Togiola a Iesu Keriso?

Faitau leotele le saunoaga lenei a Elder Richard G. Scott o le Korama a Aposetolo e Toasefululua:

“Sa faaali mai e le Alii i le Perofeta o Iosefa Samita ia aoaoga faavae musuia e faatatau i le sauniga paia o le papatisoga. Sa oo mai le malamalama ina ua aoaoina ekalesia Kerisiano o le oti e le masuia, faavavau, ma e iloa ai le taunuuga o le agaga. Sa latou aoaoina o le papatisoina e tauia i le olioli e le gata, ae o isi e feagai ma faasalaga e faavavau, e aunoa ma le faamoemoe o le togiolaina. …

“O lenei aoaoga faavae mamalu o le isi lea molimau o le natura maoae o le Togiola a Iesu Keriso. Ua Ia aumaia ai le faaolataga i tagata uma ua salamo. O Lana Togiola ua faatoilaloina ai le oti, ma ua Ia faatagaina le tagata agavaa ua maliu e maua uma ia sauniga o le faaolataga e ala atu i se tagata e fai ma sui” (“O le Olioli i le Faaolaina o e ua Maliliu,” Ensign po o le Liahona, Nov. 2012, 93).

O a aafiaga na aoaoina ai oe i le taua o le auai i le galuega o le faaolaina o e ua maliliu?
Ua faapefea ona faateleina lau molimau ona ua e auai i le galuega o le faaolaina o e ua maliliu? (Valaaulia ni nai tamaiti aoga e faasoa mai a latou molimau.)

Uunaia tamaiti aoga e mafaufau pe faapefea ona latou auai i le galuega tele o le faaolaina o e ua maliliu, pe ala atu i le suesuega o talafaasolopito o aiga pe ala atu i le auauna atu o ni sui i le faia o sauniga i le malumalu. Faasoa atu lau molimau faapea e ala atu i le galuega e faia i totonu o malumalu o aso nei, e mafai ona maua e fanau uma a le Tama Faalelagi sauniga e manaomia mo le faaolataga.

Faitauga a Tamaiti Aoga

Mataupu Faavae ma Feagaiga 124:30–41; 127:1–9; 128:1–18; 137:1–10; 138:28–37.
Richard G. Scott, “O Le Olioli i le Faaolaina o E ua Maliliu,”Ensign po o le Liahona, Nov. 2012, 93–95.