E saunia e le Aualofa tamaitai mo faamanuiaga o le ola faavavau i le fesoasoani ia i latou e faateleina lo latou faatuatua ma le amiotonu patino, faamalosia aiga ma auaiga, ma fesoasoani ia i latou e le tagolima” (“The Purpose of Relief Society,” lds.org/callings/relief-society/purposes). O le a fesoasoani lenei lesona i tamaiti aoga ia malamalama atili i le faatulagaina o le Aualofa ma ona faamoemoega. O le a vaai foi tamaiti aoga faapea o loo i ai i tamaitai avanoa ma tiutetauave o le fausiaina o le malo o le Atua lena e faapitoa lava ia i latou.
Faaali atu le faamatalaga lenei mai ia Peresitene Spencer W. Kimball (1895–1985), ma fai atu i se tamaitiiti aoga e faitau leotele:
Ata
Peresitene Spencer W. Kimball
“O le tele o le faatupulaia ua oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi … o le a tosina mai i le Ekalesia i ni vaega toatele. O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga, atoa foi ma le maualuga o loo vaaia ai tamaitai o le Ekalesia o ni tamaitai iloga ma le tulaga ese—i ni tulaga fiafia—mai tamaitai o le lalolagi” (Aoaoga a Peresitene o le Ekalesia: Spencer W. Kimball [2006], 222–23).
O a ni manatu na e maua ao e mafaufau i lenei fuaitau?
Pe e te iloaina ni tamaitai na faataitaia le ola fiafia i le amiotonu? Na faapefea ona latou faia se eseesega i olaga o i latou na iloaina i latou?
Faamatala atu o lenei lesona o le a taulai atu i auala ua faamanuiaina ai e le Aualofa afafine ma atalii o le Tama Faalelagi i le Ekalesia toefuataiina a Iesu Keriso.
Fai i tamaiti aoga e sue i le Mataupu Faavae ma Feagaiga 25 ma vaai i le ulutala o le vaega e sue le tagata na fetalai atu i ai le Alii i lenei faaaliga. Ona faitau leotele lea o le fuaiupu 3. Faamatala atu i tamaiti aoga faapea i fofoga o le Alii, o Ema Samita o se “tamaitai filifilia.” I le fonotaga muamua a le Tamaitai o le Aualofa o Navu, na faamatalaina e Iosefa faapea “o le filifilia o lona uiga o le filifilia i se galuega faapitoa.” Na ia saunoa foi faapea o le faaaliga ua tuuina atu ia Ema Samita na “faataunuuina i le valaaulia o le Tuafafine o Ema i le Au Peresitene o le Aualofa” (i le History of the Church, 4:552–53). Vaelua le vasega, ma valaaulia le afa o le vasega e faitau le Mataupu Faavae ma Feagaiga 25:4–9 ma le isi afa e faitau le Mataupu Faavae ma Feagaiga 25:10–15. Valaaulia tamaiti aoga e sue tofiga ma valaauga na tuuina atu e le Alii ia Ema Samita. E mafai ona latou faia se lisi o nei tiutetauave pe faailoga ia latou tusitusiga paia. A uma se taimi talafeagai, valaaulia tamaiti aoga e faasoa mai mea na latou mauaina.
O le a faapefea e le faataunuuina o nei tiutetauave ona saofaga i le faatupulaia o le Ekalesia?
O a faamanuiaga na folafola atu e le Alii ia Ema Samita pe afai e usitai o ia i Ana poloaiga?
Ao tuuina atu lenei faaaliga ia Ema Samita, o a auala e mafai ai ona faatatau upu a le Alii ia Ema ia i tatou? (O aoaoga e uiga i le usiusitai ma isi mataupu faavae o le talalelei ua aoaoina i lenei faaaliga e faatautau i tagata uma lava. [Faamatalaga: Faamatala atu o le faatatauga o tusitusiga paia i o tatou lava aafiaga o se tomai taua o suesuega faaletusitusiga paia e mafai ona fesoasoani ia i tatou e iloa ai le tutusa o o tatou aafiaga ma tagata i tusitusiga paia.])
Ao faasoa mai e tamaiti aoga a latou tali i lenei fesili, fesoasoani ia i latou ia malamalama i le upumoni lenei: Ao tatou tausia ma le faamaoni poloaiga ma faataunuu o tatou tofiga mai le Alii, o le a tatou maua se pale o le amiotonu. Atonu e te manao e molimau atu e uiga i lenei upumoni.
O le Aualofa o se vaega taua o le Ekalesia toefuataiina a Iesu Keriso
Tau atu i tamaiti aoga faapea na faaali mai e le Alii le faalapotopotoga o le Ekalesia i lea laina i lea laina. O se vaega o lenei faagasologa, na Ia tuuina atu ai se valaauga taua ia Ema Samita. Valaaulia se tamaitiiti aoga e faitau leotele le aotelega lenei o le faatulagaga o le Aualofa. Fai i tamaiti aoga e faalogo i le ala na faalautele ai le faaaliga a le Perofeta o Iosefa Samita o le Aualofa le uluai faaaliga a tamaitai.
I Navu, na faamanuiaina tamaitai o le Au Paia o Aso e Gata Ai i la latou lava faalapotopotoga i le Ekalesia. Na amataina lava ina ua faatulagaina e ni nai tamaitai, na taitaia e Sarah Granger Kimball, ia faia ni ofutino mo alii na galulue i le malumalu. Na filifili tamaitai ia faatulagaina aloaia, ma na latou fai atu ia Eliza R. Snow e tusi se folafolaga mo la latou vaega. Ina ua faafesootaia le Perofeta o Iosefa Samita, na ia tau atu ia i latou o la latou folafolaga na sili ona lelei ae na ofo atu e faatulaga tamaitai i se ala e sili atu. Ia Mati 17, 1842, o le Perofeta, faatasi ai ma Elder Ioane Teila ma Uiliata Risati, na fono ma tamaitai e 20 i le potu i luga o le Faleoloa Piliki Mumu, lea na faatulaga ai e le Perofeta le Aualofa a Tamaitai o Navu. Na filifilia Ema Samita o le peresitene o le faalapotopotoga, o lea na faataunuu ai le faaaliga na faailoaina ai o ia o se “tamaitai filifilia” (Mf&F 25:3). Na taua mulimuli ane e le Perofeta faapea o le faamoemoega o le faalapotopotoga o le “laveaiina o e matitiva” ma “faaolaina agaga” (Aoaoga a Peresitene o le Ekalesia: Iosefa Samita [2007], 453).
Ia Aperila 28, 1842, na toe feiloai ai le Perofeta ma tamaitai. Na ia tau atu ia te i latou o le a latou maua faatonuga e ala atu i le faatulagaga o le perisitua ma faapea atu, “ma o lenei ua ou tuuina atu le ki ia te outou i le suafa o le Atua, ma o le a olioli lenei Sosaiete, ma o le a tafe mai ai i lalo le poto ma le atamai mai lenei taimi” (Aoaoga: Iosefa Samita,451).
E mafai ona e faasino atu faapea e mafai ona latou faitau mataupu o fono muamua a le Aualofa i josephsmithpapers.org/paperSummary/Nauvoo-relief-society-minute-book.
Na faapefea e le faaaliga a le Perofeta i le malosi o le Aualofa ona faalauaitele ai le uluai lafo a Sarah Kimball?
O le a sou manatu i le uiga o le saunoaga lenei a le Perofeta o Iosefa Samita: “Ua ou tuuina atu nei ki ia te outou i le suafa o le Atua”? (Na faatulagaina le Aualofa i lalo o le taitaiga o le perisitua e i latou na umia ki o le perisitua.)
Faaali atu saunoaga nei a Sister Zina D. H. Young (1821–1901) ma Sister Julie B. Beck, o peresitene aoao muamua o le Aualofa, e faatatau i faamoemoega o le Aualofa, ma valaaulia ni tamaiti aoga se toatolu e faitau ia saunoaga. Fai i le vasega e mulimuli i le faitauga ma mafaufau i mea ua aoao mai e nei fuaitau e uiga i faamoemoega o le Aualofa.
Ata
Zina D. H. Young
“O le Aualofa … na muamua faatulagaina i le toeitiiti afa seneturi talu ai, e le Perofeta o Iosefa Samita; i le mamanu o le Perisitua Paia, ma i lalo o lana taitaiga, ina ia tuuina atu faamanuiaga i e matitiva ma le tagolima: ma tuuina atu le faamalosiauga i e vaivai, ma faasa’o e sese, ma mo le atiina ae sili atu, ma faaaoga le agaalofa o tamaitai, ma agalelei, ina ia maua e ia le avanoa e maua ai le malosi faaleagaga, ma le mana mo le faataunuuina o le lelei sili atu i le galuega o le faaolaina o le aiga o tagata” (Zina D. H. Young, “First General Conference of the Relief Society,” Woman’s Exponent, Ape. 15, 1889, 172).
Ata
Julie B. Beck
Busath.com
“Na faamalamalama mai e le Perofeta o Iosefa Samita le faamoemoega o le Aualofa ma aoaoina tamaitai i lo latou faamoemoega. … O la tatou faalapotopotoga e faaauau pea ona taitaia i ona po nei e perofeta, tagata vaai ma talifaaaliga” (Julie B. Beck, “O le Aualofa: O se Galuega Paia,” Ensign po o le Liahona, Nov. 2009, 110–11).
“Pei lava ona faaauau pea e perofeta a le Alii ona aoao atu i toeaina ma faitaulaga sili i o latou faamoemoega ma tiute, ua faapena foi ona latou faasoa mai la latou silasila mamao mo tuafafine o le Aualofa. Mai a latou fautuaga, ua manino ai o faamoemoega o le Aualofa o le faateleina lea o le faatuatua ma le amiotonu o le tagata lava ia, faamalolosia auaiga ma aiga, ma sailia ma fesoasoani ia i latou e le tagolima. Faatuatua, aiga, ma le toomaga—o nei upu faigofie e tolu ua faamatala ai le silasila mamao a perofeta mo tuafafine i le Ekalesia” (Julie B. Beck, “O le Silasila Mamao a Perofeta e Faatatau i le Aualofa: Faatuatua, Aiga, Toomaga,” Ensign po o le Liahona, Me 2012, 83).
E faapefea ona faamanuiaina le Ekalesia atoa i faamoemoega o le Aualofa? (E tatau ona faailoa mai e tamaiti aoga le upumoni lenei: E saili le Aualofa ia faateleina le faatuatua ma le amiotonu patino, faamalosia aiga ma auaiga, ma saunia le toomaga i le sailia ma fesoasoani i e le tagolima. Ua faamanuiaina le Ekalesia atoa ao faataunuuina nei faamoemoega.)
Ua faapefea ona e vaaia le faataunuuina e le Aualofa o ona faamoemoega?
Faaali atu le saunoaga lenei, ma fai i se tamaitiiti aoga e faitau leotele:
“Na folafola mai e le Perofeta o Iosefa Samita, ‘E lei atoatoa lava ona faatulagaina le Ekalesia seia tusa ai ona faatulagaina tamaitai’ [Aoaoga: Iosefa Samita,480]. …
“E ese mai ia Iosefa Samita, ua molimau mai isi perofeta o aso e gata ai o le faalapotopotoga o le Aualofa o se vaega musuia o le Toefutaiga, lea e valaaulia ai tamaitai i le Ekalesia i tofiga faalelotu e auauna atu le tasi i le isi ma faamanuia le Ekalesia atoa. Na saunoa mai Peresitene Iosefa F. Samita …, ‘O lenei faalapotopotoga ua faia i le paia, pulea i le paia, faatuina i le paia, faauuina i le paia o le Atua e auauna atu ai mo le faaolataga o agaga o tamaitai ma alii’ [Aoaoga a Peresitene o le Ekalesia: Iosefa F. Samita (1998), 184]” (Afafine i Lou Malo: O le Talafaasolopito ma le Galuega a le Aualofa [2011], 7).
O a mea ua aoao mai e lenei fuaitau e uiga i le vaega ua faia e le Aualofa i le Toefuataiga o le talalelei? (Ao tali mai tamaiti aoga, ia mautinoa ua latou malamalama i lenei upumoni, e tusa lava pe ua faaupuina i ni upu eseese: O le aualofa o se vaega musuia paia o le Toefuataiga o le Ekalesia a Iesu Keriso. Tusi lenei upumoni i luga o le laupapa.)
E faapefea e le iloaina faapea o le faalapotopotoga o le Aualofa o se vaega o le Toefuataiga ona faia se eseesega i lou olaga?
E faapefea ona fesoasoani le auai o tamaitai i valaauga i le Ekalesia ina ia “atoatoa le faatulagaga”?
Tamaitai ma le perisitua
Faamatala i tamaiti aoga e i ai nisi e fesili pe aisea e le faauuina ai tamaitai i tofi o le perisitua. Faamamafa atu faapea ao tatou le iloa pe aisea ua le faauuina ai tamaitai i tofi o le perisitua, ua tatou iloa o tamaitai e auai i le perisitua i o latou valaauga i le Ekalesia ma totonu o o latou aiga.
Tufa atu se kopi o le saunoaga lenei a Elder Dallin H. Oaks o le Korama a Aposetolo e Toasefululua i tamaiti aoga taitasi, ma fai i se tamaitiiti aoga e faitau leotele. Valaaulia tamaiti aoga e faailoa mai auala e mafai ai e tamaitai ona faaaoga le pule o le perisitua:
Na saunoa mai Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“I se saunoaga i le Aualofa, sa saunoa ai Peresitene Iosefa Filitia Samita, o le taimi lena o loo avea ma Peresitene o le Korama a Aposetolo e Toasefululua e faapea: “E ui e le tuuina atu i tuafafine le Perisitua, e le faaeeina atu i o latou luga, ae e le faapea ai la ua le tuuina atu e le Alii ia i latou le pule. … E mafai ona tuu atu i se alii le pule, po o se tuafafine, e faia ai ni mea patino i le Ekalesia lea e fusia ai ma talafeagai tonu mo lo tatou faaolataga, e pei o le galuega o loo faia e o tatou tuafafine i totonu o le Maota o le Alii. Ua ia i latou le pule na tuu atu ia i latou e faia ai nisi o mea silisili ma ofoofogia, e paia i le Alii, ma fusia atoatoa ai e pei lava o faamanuiaga o loo tuuina atu e le alii o loo umiaina le Perisitua.” [‘Relief Society—An Aid to the Priesthood,’ Relief Society Magazine, Ian. 1959, 4].
“I lena lauga iloga, sa tau atu pea lava pea e Peresitene Samita e faapea ua tuuina atu i tamaitai le pule. Sa ia faapea atu i tamaitai, “E mafai ona outou tautatala atu i le pule, ona ua tuu atu e le Alii le pule ia te outou.” Sa ia tau atu foi e faapea “ua tuu atu i le Aualofa le mana ma le pule e faia ai le tele o mea silisili. O le galuega o loo latou faia o loo faia i le pule faalelagi.’ Ma e moni lava, o le galuega a le Ekalesia o loo faia e tamaitai po o alii, pe o totonu o le malumalu po o totonu o uarota po o paranesi, o loo faia i lalo o le taitaiga a i latou o loo umiaina ki o le perisitua. O lea, a o saunoa ai e uiga i le Aualofa, sa faamalamalama mai ai e Peresitene Samita, “Ua tuu atu e le Alii ia i latou lenei faalapotopotoga maoae lea ua latou maua ai le pule e auauna ai i lalo o taitaiga a epikopo o uarota … , i le vaavaaia o mea e fiafia i ai o tatou tagata i le faaleagaga ma le faaletino.” [‘Relief Society—An Aid to the Priesthood,’ 4–5]. …
“E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia, ae o le a se isi pule o i ai? Pe a vaetofiaina se tamaitai—talavou pe matua—e talai le talalelei o se faifeautalai faamisiona, ua tuu atu ia te ia le pule o le perisitua e faatino ai se matafaioi faaleperisitua. E moni foi lena mea pe a vaetofiaina se tamaitai e galue o se taitai po o se faiaoga i se faalapotopotoga o le Ekalesia i lalo o le taitaiga a se tasi o loo umiaina ki o le perisitua. Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina” (“O Ki ma le Pule o le Perisitua,” Ensignpo o le Liahona, Me 2014, 50–51).
O a upumoni e uiga i matafaioi ma tiutetauave o tamaitai i le Ekalesia ua e aoao mai ia Elder Oaks? (Ao faasoa mai e tamaiti aoga a latou tali, ia mautinoa ua latou malamalama i lenei upumoni: Pe a vaetofia tamaitai e auauna atu i le Ekalesia, latou te maua le pule o le perisitua e fai ai o latou tiutetauave.
Ina ia faateleina le malamalama o tamaiti aoga ma o latou lagona e uiga i upumoni na latou talanoaina i le vasega, vaevae tamaiti aoga i ni paga ma fai ia i latou e talanoaina mea nei:
E faapefea ona tatou faaleleia mea tatou te fai atu e uiga i tamaitai o le Ekalesia e faaalia ai le taua moni o lo latou sao?
Valaaulia tamaiti aoga e faasoa mai o latou lagona e uiga i le faatosinaga a tamaitai ma le galuega ua latou faia oni soo o le malo o le Alii. Uunaia tamaiti aoga e faatino mea ua latou lagonaina i le taimi o le lesona, ae maise lava i le siitiaina o le taua o le Aualofa i o latou olaga.