Lesona 13

“O Le Faaaliga”

Folasaga

O le faaaliga na tuuina atu i le Perofeta o Iosefa Samita, ua faapea ona faamaumauina i le Mataupu Faavae ma Feagaiga 76 ua tuuina mai ai ia i tatou se malamalamaaga autu o le olaga pe a mavae le oti, e aofia ai tikeri o le mamalu. Mai i lea mea, ua tatou aoaoina mai ai foi le mea e tatau ona tatou faia, ina ia toe nonofo ai i le afioaga o le Tama Faalelagi ma Iesu Keriso.

Faitauga Faaopoopo

• L. Tom Perry, “O le Fuafuaga o le Faaolataga,” Ensign po o le Liahona, Nov. 2006, 69–72.

• Matthew McBride, “‘The Vision’: MF&F 76,” Revelations in Context series, Mat. 11, 2013, history.lds.org.

Fautuaga mo le Aoaoina Atu

Mataupu Faavae ma Feagaiga 76

Malamalamaaga autu o le olaga pe a mavae le oti

Faamatala atu e faapea i le vaitau o le 1830, e toatele Kerisiano na taofi i le tasi mai le lua talitonuga e uiga i le lagi ma seoli, o nisi taimi e faamatalaina o se vaaiga “masani” ma “faalelalolagi”. O le “faalelalolagi” ua vaaia o se lagi faigofie mo e amiotonu ma seoli mo e le usiusitai. O le “faalelalolagi” i le vaaiga e faapea, o le Atua o le a le faasalaina e faavavau tagata agasala, aua o le a faaolaina tagata uma lava i le malo o le Atua. I le taimi lea, o tagata o le Ekalesia a Iesu Keriso, ua itiiti lo latou iloa nai lo isi Kerisiano e uiga i le lagi ma seoli. Ia Fepuari 1832, na mauaina ai e Iosefa Samita ma Sini Rikitone se faaaliga lea na matuai suia ai lava le Au Paia o Aso e Gata ai, i lo latou malamalamaaga i le ma le talitonuga i tala atu o le oti. O lenei faaaliga, o loo faamaumauina i le Mataupu Faavae ma Feagaiga 76 , na faaalia ai se tuufaatasiga atoa o le alofa o le Atua, alofa mutimutivale, faamasinoga tonu, ma le faamasinoga, ma na tatalaina ai se faitotoa i se vaaiga e sili atu le atoatoa o le fuafuaga a le Tama Faalelagi. Mo le tele o tausaga, o tagata muamua o le Ekalesia na latou taua lenei faaaliga faigofie o “se Faaaliga.” (Tagai i le Matthew McBride, “‘O le Faaaliga’: MF&F 76,” Revelations in Context series, Mat. 11, 2013, history.lds.org.)

Fai i se tamaitiiti aoga, e tuuina mai se faamatalaga puupuu o mea ua faamaumauina i le Mataupu Faavae ma Feagaiga 76. Faaali atu le fuaitau lenei mai ia Peresitene Uilifoti Uitilafi (1807–98), ma valaaulia se tamaitiiti aoga e faitau leotele:

“Ou te mafaufau faapea o le Mataupu Faavae ma Feagaiga, o loo [aofia] i ai le faatulagaga o folafolaga sili ona mamalu, sili ona faale-Atua ua faia mo le aiga o le tagata. O le a ou talanoa e uiga i le “Faaaliga” [i le vaega 76] na o ia lava, o se faaaliga ua tuuina atu se malamalama e sili atu, upumoni e sili atu ma aoaoga faavae e sili atu nai lo se isi lava faaaliga o loo i ai i se isi lava tusi ua tatou faitauina. E na te faamaninoina mai i lo tatou malamalamaaga lo tatou tulaga i le taimi nei, o fea na tatou o mai ai, aisea ua tatou i ai iinei, ma o fea foi tatou te agai atu i ai. E mafai e soo se tagata ona iloa e ala i lena faaaliga, lana vaega ma lona tulaga o le a i ai” (Aoaoga a Peresitene o le Ekalesia: Uilifoti Uitilafi [2004], 120–21).

Valaaulia se tamaitiiti aoga e faitau leotele le ulutala o le Mataupu Faavae ma Feagaiga 76. Valaaulia se isi tamaitiiti aoga e faitau leotele le Matapu Faavae ma Feagaiga 76:15-19.

• O a mea a Iosefa ma Sini na fai, sa faataunuuina ai lo la mauaina o lenei faaaliga?

• O le a se mea ua mafai ona tatou aoaoina mai i lo laua aafiaga, e uiga i le taua o le suesue ma le mafaufau loloto i tusitusiga paia? (Ia mautinoa ua matauina e tamaiti aoga le sootaga i le va o le mafaufau loloto i tusitusiga paia, ma le mauaina o faaaliga.)

Manatua: Faamamafa atu o le aoaoina e mafaufau loloto i tusitusiga paia, o se tomai taua tau i le suesueina o tusitusiga paia, lea e tuuina atu ai i le Agaga Paia se avanoa e sili atu, e faaali mai ai le upumoni ia i tatou.

Mataupu Faavae ma Feagaiga 76:1-10

Folafolaga i e faatuatua

Valaaulia se tamaitiiti aoga e faitau leotele le Mataupu Faavae ma Feagaiga 76:1–4. Fai atu i le vasega e mulimuli i le faitauga, ma vaavaai mo upu po o fasi fuaitau o loo faamatalaina ai Iesu Keriso. Atonu e te manaomia le fautuaina le faailogaina e tamaiti aoga o mea ua latou mauaina. Faamatala atu e faapea, o uiga o le Faaola ua faamatalaina i nei fuaiupu, o ni faataitaiga o se lisi o mau. O se lisi o mau “o se fesootaiga o le faagasologa o mafaufauga, manatu, po o ni faatonuga. O le vaavaai mo lisi i tusitusiga paia, e mafai ona fesoasoani ai i faiaoga ma tamaiti aoga, e faailoa mai ai manatu autu o loo faamamafaina e le tusitala” (Aoao Atu ma le Aoaoina Mai o le Talalelei [2012], 23). Faasino atu e faapea o le Mataupu Faavae ma Feagaiga 76 o loo i ai ni nai lisi o mau.

• O le a se uiga o Iesu Keriso o loo taua i fuaiupu 1–4 e sili atu ona taua ia te oe? Aisea?

Valaaulia tamaiti aoga e faitau le leoa le Mataupu Faavae ma Feagaiga 76:5-10, ma vaavaai mo folafolaga a le Alii i e faatuatua. Valaaulia tamaiti aoga e matauina le lisi o folafolaga i fuaiupu 6-10. E mafai ona e fautuaina le makaina e tamaiti aoga o aitema o loo i lenei lisi, e faamamafaina ai folafolaga a le Alii.

• E tusa ai ma le fuaiupu 5, o le a se mea e tatau ona tatou faia, ina ia tatou mauaina ai le alofa mutimutivale o le Faaola, agaalofa, ma le faamamaluina?

Fesoasoani i tamaiti aoga, e faailoa mai le mataupu faavae lenei mai i lo latou suesueina o fuaiupu nei:A o tatou matatau i le Alii ma auauna atu ia te Ia i le amiotonu, o le a Ia faamamaluina i tatou ma alofa mutimutivale ia i tatou. Faamanatu i tamaiti aoga e faapea i lenei tusiga, o le “mata’u” i le Alii o lona uiga o le ava ia te Ia.

Ina ia fesoasoani e faateleina le malamalamaaga o tamaiti aoga i lenei mataupu faavae, fai atu fesili nei:

• I folafolaga na outou faailoaina mai i fuaiupu 5–10 , o le fea o [folafolaga] o le a faapitoa lo outou mananao e mauaina? Aisea?

• O le a sou manatu i se mea e tatau ona e faia, ina ia e mauaina ai lena faamanuiaga?

Tuu atu i tamaiti aoga se taimi e mafaufau loloto ai, pe aisea e aoga ai le tulimataiina o nei faamanuiaga, ma iloilo lelei pe o faapefea ona faaali atu ai le ava i le Alii, ma le auauna atu ia te Ia i le amiotonu ma le upumoni.

Faasino atu i tamaiti aoga e faapea e amata i le fuaiupu 11, o le vaega o totoe o le vaega 76 o loo faamaumauina ai le faaaliga a le Alii o “mea lilo o lona malo,” lea “ua sili mamao atu i malamalamaaga uma i le mamalu” (fuaiupu 114). Ua tatalaina e lenei faaaliga lo tatou malamalamaaga i mea ofoofogia o le faavavau, aoaoina i tatou e uiga i le olaga a sau ma faailoa mai mea sa lei iloaina muamua.

Mataupu Faavae ma Feagaiga 76:19-24

Faaaliga o le Tamā ma le Alo

Faamatala atu o le Mataupu Faavae ma Feagaiga 76 o loo i ai se faagasologa o faaaliga. Ina ia tuuina atu i tamaiti aoga se vaaiga lautele o mea na vaai i ai Iosefa Samita ma Sini Rikitone i nei faaaliga, faaali atu le ata faatusa o loo avatu faatasi ai, po o le sauniaina o ni kopi mo tamaiti taitasi. Faamatala atu o nei aitema taitasi o loo i le ata, e taulai uma atu i le faaaliga e tasi.

Faasino atu e faapea, o se tasi o faaaliga na tatalaina atu ia Iosefa Samita ma Sini Rikitone i lena aso, o se faaaliga o le Tama ma Lona Alo, o Iesu Keriso. Faaali atu fesili nei, po o le tusi i luga o le laupapa:

O a ni upumoni e mafai ona tatou aoaoina mai e uiga ia Iesu Keriso mai i lenei faaaliga?

O fea o nei upumoni e mafai ona e molimau atu ai? E faapefea ona e iloaina e moni?

Valaaulia tamaiti aoga e faitau le leoa le Mataupu Faavae ma Feagaiga 76:19-24 ma mafaufau pe faapefea ona latou taliina fesili o loo i le laupapa. A maea se taimi e tatau ai, valaaulia tamaiti aoga e faasoa mai a latou tali i fesili. Atonu o le a eseese tali a tamaiti aoga, ae ia mautinoa ua latou malamalama i mataupu faavae nei. O Iesu Keriso o se tagata soifua, faamamaluina. O Iesu Keriso o le Atalii Pele e Toatasi o le Tama. O Iesu Keriso o le Foafoa o lenei lalolagi ma isi lalolagi. O tagata o lenei ma isi lalolagi o ni atalii ma ni afafine faapelepeleina o le Atua.

Mafaufau e faasoa atu lau molimau o le Faaola.

Mataupu Faavae ma Feagaiga 76:25-113

O le fuafuaga o le faaolataga.

Faamatala atu o fuaiupu 25–113 o le vaega 76 o loo aoao mai ai upumoni ofoofogia e uiga i le fuafuaga o le faaolataga. Valaaulia tamaiti aoga e filifili se vaega se tasi o nei fuaiupu e pei ona lisiina i le ata ma faitau faavavevave. Vaevae tamaiti aoga i ni pea ma fai ia i latou e talanoaina mea na latou aoaoina, po o mea na latou mauaina na musuia ai i latou mai i fuaiupu na latou faitauina. Ona talanoaina lea o fesili nei o se vasega:

• O a aoaoga faavae autu e uiga i le olaga ma le oti i le Mataupu Faavae ma Feagaiga 76 ua fesoasoani ia i tatou ia malamalama ai? (E mafai ona faaaogaina e tamaiti aoga ni upu eseese ae ia mautinoa ua latou malamalama e faapea i le Mataupu Faavae ma Feagaiga 76, tatou te mauaina se malamalamaaga autu o le olaga pe a mavae le oti, ma le mea e tatau ona tatou faia ina ia tatou toe nonofo ai i le afioaga o le Tama Faalelagi ma Iesu Keriso,)

Faamatala atu o se tasi o faaaliga e sili ona taua na tuuina ia Iosefa Samita ma Sini Rikitone e faatatau lea i le malo selesitila. Valaaulia tamaiti aoga e faitau le Mataupu Faavae ma Feagaiga 76:50–53, ma vaai mo se lisi o mea e manaomia ona ulu atu ai i le malo selesitila. E mafai ona fautuaina tamaiti aoga e makaina pe faanumeraina nei mea e manaomia ia latou tusitusiga paia. A uma ona faasoa mai e se tamaitiiti aoga mea na ia faailoa mai, fai atu fesili e pei o nei:

• O le a sou manatu i le uiga o le mauaina o se “molimau ia Iesu”? (Ia mauaina le faatuatua i le misiona faaola a le Faaola ma ola e tusa ai ma Ana poloaiga.)

• O le a le uiga o le “manumalo e ala i le faatuatua”? (Manumalo i faaosoosoga ma agasala e ala i le faatinoina o le faatuatua ia Iesu Keriso ma tumau faamaoni seia oo i le iuga.)

• O le a le uiga o le “faamauina e ala i le Agaga Paia o le folafolaga”? (O le Agaga Paia, o le foi o le Agaga Paia o le Folafolaga, e molimauina i le Tama e faapea ua tatou mauaina atoatoa sauniga o le faaolataga o Lana talalelei, ma ua tatou tausia ma le faatuatua feagaiga na tatou faia.)

Otooto le Mataupu Faavae ma Feagaiga 76:54-70 e ala i le faamatalaina atu e faapea, o nei fuaiupu ua lisiina le tele o faamanuiaga o le a mauaina e tagata faaeaina i le malo selesitila. Tuu atu i tamaiti aoga ni nai minute e faitau ai nei fuaiupu, ma vaai mo faamanuiaga po o tulaga folafolaina e faapitoa lo latou taua ia tei i latou.

• O le a se faamanuiaga folafolaina mo e faatuatua o lo o i ai se uiga faapitoa mo oe? Aisea?

• E faapefea e le fuaiupu 69 ona fesoasoani ia i tatou ia malamalama i le matafaioi a le Faaola i olaga o i latou o e mautofi i le malo selesitila? (O i tatou taitoatasi, po o le a lava le malosi o lo tatou taumafai, o le a le faamanuiaina i le faia o mea uma e manaomia ai ona mautofi i le malo selesitila. Ua na o le taulaga togiola lava a le Faaola, e mafai ona faamamaina ai a tatou agasala ma faaatoatoaina ai.)

• E mafai faapefea e le iloaina o le upumoni e uiga i le fuafuaga o le faaolataga i le Mataupu Faavae ma Feagaiga 76 ona fesoasoani ia i tatou e faia ni filifiliga sili atu i le olaga?

Faaali atu le saunoaga lenei a Peresitene Boyd K. Packer, ma valaaulia se tamaitiiti aoga e faitau leotele:

“A aunoa ma se malamalama o le fuafuaga o le talalelei, o le solitulafono e foliga mai o se mea masani, mama, e oo lava i le tauamiotonuina. E leai se puipuiga sili atu mai le fili nai lo i tatou ia iloa le upumoni—ia iloa le fuafuaga!” (Our Father’s Plan [1994], 27).

• O a ni auala e mafai ai e le malamalama o upumoni o lo o maua i le Mataupu Faavae ma Feagaiga 76 ona fesoasoani e puipuia i tatou mai faatosinaga a Satani?

• O a ni auala ua mafai ai e lou malamalama i le fuafuaga a le Tama Faalelagi, ona fesoasoani e puipuia ma faamanuiaina oe?

Valaaulia se tamaitiiti aoga e faitau leotele le Mataupu Faavae ma Feagaiga 76:114-117. Fai i le vasega e mulimuli i le faitauga, ma vaai mo le folafolaga ua tuuina atu ia i latou o e faamamaina i latou lava. Valaaulia tamaiti aoga e faamatala mai le folafolaga i lena fuaitau.

A uma ona tali mai tamaiti aoga, faaali atu le saunoaga lenei a le Perofeta o Iosefa Samita (1805–44) e tusa ai ma le faaaliga na faamauina i le Mataupu Faavae ma Feagaiga 76:

“E mafai ona ou faamatalaina e sili atu i le faaselau nai so se isi lava taimi ia mamalu o malo na faaalia mai ia te au i le faaaliga, pe ana faatagaina au, pe ana saunia foi tagata e taliaina” (i le History of the Church 5:402).

Ina ia fesoasoani i tamaiti aoga e faaaoga mea na latou aoaoina i le vasega, faaali pe tusi fuaitau nei e lei maea i le laupapa:

A uma ona suesueina le Mataupu Faavae ma Feagaiga 76:

Ua ou iloa …

Ou te fia …

O le a ou …

Valaaulia tamaiti aoga e faauma fuaitau nei i se fasi pepa. Uunaia i latou e mafaufau pe o filifiliga o lo o latou faia, o le a latou agavaa ai e maua le malo selesitila ma fesoasoani ia i latou e agavaa ai mo isi faamanuiaga ua folafolaina mai i le Mataupu Faavae ma Feagaiga 76. Ia faasoa atu lau molimau o le upumoni na talanoaina i le vasega i le aso.

Faitauga a Tamaiti Aoga

• Mataupu Faavae ma Feagaiga 76.

• L.Tom Perry, “O Le Fuafuaga o le Faaolataga,” Ensign po o le Liahona, Nov. 2006, 69–72.