Lesona 22

O Le Maliu Fasia o le Perofeta o Iosefa Samita

Folasaga

O tagata faatuiese i totonu o le Ekalesia ma fili i fafo o le Ekalesia na aumaia le maliliu fasia o le Perofeta o Iosefa Samita ma lona uso o Ailama Samita. O le la maliu na faaopoopoina se faamau faailoga mamana ia la molimau o le Tusi a Mamona, le Mataupu Faavae ma Feagaiga, ma le talalelei toefuataiina a Iesu Keriso. O se suesuega i le soifuaga ma le maliu faamaturo o le Perofeta o Iosefa Samita o le a fesoasoani i tamaiti aoga e mafaufau ai i le tele o faamanuiaga ua tuuina mai e le Alii e ala mai le galuega a le Perofeta o Iosefa Samita, lea na ala mai ai Lona toefuatai mai o Lana talalelei i aso e gata ai.

Faitauga Faaopoopo

Thomas S. Monson, “O Le Perofeta o Iosefa Samita: O Se Faiaoga e Ala i Faataitaiga,” Ensign po o le Liahona, Nov. 2005, 67–70.
(Tagai i le Church History in the Fulness of Times Student Manual, lom. 2 [Tusi lesona a le Church Educational System, 2003], 273–85.)
“O Le Maliu Fasia: Ua Faamaufaailogaina e le Perofeta Lana Molimau i Lona Toto,” mataupu 46 i Aoaoga a Peresitene o le Ekalesia: Iosefa Samita (2007), 529–40.

Fautuaga mo le Aoaoina Atu

Mataupu Faavae ma Feagaiga 135:4–5; 136:36–39

Na saili le fili e fasioti Iosefa Samita

Faaali atu se ata o le Falepuipui o Karefasi. Faamatala i tamaiti aoga faapea ia Iuni 27, 1844, o Iosefa Samita ma lona uso o Ailama, le Peteriaka o le Ekalesia, na maliliu fasia i lenei falepuipui i Karefasi, Ilinoi. Sa 38 tausaga o Iosefa Samita i le taimi o lona maliu, ao Ailama na 44.

Valaaulia se tamaitiiti aoga e faitau leotele le Mataupu Faavae ma Feagaiga 136:36-39, ao mulimuli le vasega i le faitauga. Uunaia tamaiti aoga ao latou faitau ina ia faailoa mai le ala na otooto ai e le Alii le soifuaga o Iosefa Samita ma le galuega na ia faia. Ona talanoaina lea o le fesili nei:

Na faapefea ona faamatala e le Alii le soifuaga ma le galuega a le Perofeta o Iosefa Samita? (O tali a tamaiti aoga e mafai ona aofia ai upumoni nei: Na faataatia e Iosefa Samita le faavae o le galuega a le Atua i lenei tisipenisione o le talalelei. Na mama le Perofeta o Iosefa Samita i le taimi o lona maliu, ma na ia faataunuuina ma le faatuatua le misiona na tuuina atu ia te ia e le Atua.

Ina ia fesoasoani i tamaiti aoga ia malamalama i nisi o faatosinaga na aumaia ai le maliu o le Perofeta, tau atu ia te i latou faapea o le Au Paia na nonofo i se tulaga o le filemu i le setete o Ilinoi pe a ma le tolu tausaga, ae oo atu i le 1842, ua latou toe aafia foi i feteenaiga. O tagata na tetee i le Ekalesia e aofia ai tagatanuu o Ilinoi na fefefe i le faatosinaga faalemalo o le Au Paia. O isi na faateleina le manaonao i le faatupulaia o le tamaoaiga o Navu ma na faitio i le malosiaga o le malo ma le autau o le aai o Navu. O nisi na malamalama sese i ni aoaoga ma faatinoga faapitoa tulagaese faaMamona. O fili i totonu o le Ekalesia ma tagata tetee i fafo o le Ekalesia na tuufaatasi a latou taumafaiga e tau agai i le Perofeta ma le Ekalesia.

Tufa atu se kopi o le pepa e tufa atu o loo maua i le faaiuga o lenei lesona i tamaitiiti aoga taitasi. Valaaulia se tamaitiiti aoga e faitau leotele le vaega ua faaautuina “Tetee i le Perofeta ma le Ekalesia.”

Faamatala atu faapea e tusa ai ma tulafono na faaaogaina i na taimi o le maliu o le Perofeta, e leai se tulafono na solia pe a faaleagaina se lolomi tusi. Faaali atu le saunoaga lenei mai ia Elder Dallin H. Oaks o le Korama a Aposetolo e Toasefululua:

“O le faasaoga o le Tulafono Faavae o le Iunaite Setete na faalauiloaina atu ai le faamaoniaina o le saolotoga o le autusitala ina ia puipuia mai gaoioiga a aai ma setete sa faatoa faaaoaina i le 1868, ma faatoa faamalosia e avea ma tulafono a le malo i le 1931. … E tatau ona tatou faamasinoina ia gaoioiga a o tatou augatuaa e tusa ai ma le tulafono ma poloaiga ma tulaga o o latou aso, ae le o tatou” (“Iosefa, o le Tagata ma le Perofeta,” Liahona, Iulai 1996, 86).

Aisea e taua ai le manatua o le fuaiupu mulimuli o le saunoaga a Elder Oaks ao tatou mafaufau i faatinoga a uluai taitai o le Ekalesia? (Atonu e te manao e faasino atu faapea o le toatele o tagata o le fono a le aai o Navu o tagata o le Ekalesia, ae sa latou galulue i lo latou malosiaga oni auauna filifilia faalauaitele ina ua latou faatonuina le lomitusi ia faaleagaina. O le Ekalesia i le avea ai ma se faalapotopotoga e lei faia se faatinoga faasaga i le lomitusi, ae o le fono a le aai na faia le faatinoga ia “aveesea le … faafitauli” [i le History of the Church, 6:432]).

Valaaulia se tamaitiiti aoga e faitau leotele le vaega o le pepa e tufa atu ua faaautuina “Ua Faasalaina Sese Iosefa ma Ailama.” Valaaulia se isi tamaitiiti aoga e faitau leotele le Mataupu Faavae ma Feagaiga 135:4. Valaaulia le vasega e mulimuli i le faitauga, ma vaai mo le valoaga a Iosefa Samita na faia ao ia malaga agai i Karefasi.

E ui lava e le atoatoa uma tagata, o le a sou manatu i le mea o le a faia e se tasi ia maua “se mafaufaufuatiaifo ua aunoa ma se faatausuai e faasaga i le Atua, ma faasaga i tagata uma”? (MF&F 135:4).

Faamatala atu faapea ao sauni Ailama Samita e alu i le Falepuipui o Karefasi, na ia faitau le Eteru 12:36-38 ona ia gagau lea o le itulau. Valaaulia se tamaitiiti aoga e faitau leotele Mataupu Faavae ma Feagaiga 135:5, o se upusii tuusao lea o nei fuaiupu mai ia Eteru, ao mulimuli le vasega i le faitauga. Valaaulia tamaiti aoga e mafaufau pe aisea e ono aoga ai lenei fuaitau o le mau ia Ailama. E mafai ona e fautua atu i tamaiti aoga ia latou faailoga soo se upu po o fuaitau na e tulaga ese ia i latou.

O a upu po o fuaitau faapitoa i nei fuaiupu mai le tusi a Eteru e te manatu semanu e aoga ia Ailama ao ia feagai ma le falepuipui ma le oti o ono oo mai?
O le a sou manatu i le uiga o le fuaitau: “O le a iloa e tagata uma o ou ofu ua le pisipisia i lou toto”? (Mafaufau e tuu atu i tamaiti aoga e fesootai mau fuaiupu 5 ma le Iakopo 1:19 ma le Mosaea 2:27 ina ia iloa ai le uiga o lenei fuaitau. O le aoao e fesootai-mau o se mau ma isi mau e maua ai se vaaiga faaopoopo o se tomai taua faalesuesuega o tusitusiga paia.)

Fai i tamaiti aoga e mafaufau i lagona atonu na oo ia Iosefa ma Ailama i le iloaina na la faataunuuina o la valaauga ma tiute mai le Atua i le mea sili na la mafaia.

O a mea tatou te aoao mai faataitaiga a Iosefa ma Ailama Samita e mafai ona fesoasoani ia i tatou e faataunuu ai tiutetauave tatou te maua mai le Atua?

Mataupu Faavae ma Feagaiga 135:1-3, 6-7

Maliu Fasia i le Falepuipui i Karefasi ma saafiafiga ia Iosefa Samita

Valaaulia se tamaitiiti aoga e faitau leotele le faatomuaga mo le vaega o le Mataupu Faavae ma Feagaiga 135. (Atonu e te manao e faasino atu o le eseesega i le va o lenei faatomuaga i lomiga o le 1981 ma le 2013 o tusitusiga paia ua faaalia mai ai le tulaga o aoaoga talu ai nei.) Valaaulia ni nai tamaiti aoga e feauauai i le faitauga leotele Mataupu Faavae ma Feagaiga 135:1-2 ma le vaega o pepa e tufa atu ua faaautuina “Maliu Fasia i le Falepuipui o Karefasi.” Fai i le vasega e mulimuli i le faitauga ao faitau e nei tamaiti aoga.

O le a sou manatu i le uiga o le fuaitau “ia faamauina le molimau a lenei tusi ma le Tusi a Mamona”?

Ao faasoa mai e tamaiti aoga o latou manatu, mafaufau e tusi le faamatalaga lenei i le laupapa: ina ia “faamauina” o le faatuina tumau lea o se mea, e pei o se molimau. Atonu e te manao e fautua atu i tamaiti aoga e tusi lenei faamatalaga i a latou tusitusiga paia i talaane o le fuaiupu 1.

Fai i tamaiti aoga e faitau le leoa le Mataupu Faavae ma Feagaiga 135:3, 6–7, ma vaai mo nisi o upumoni tatou te aoao mai lenei faasilasilaga o le maliu fasia o Iosefa ma Ailama Samita.

O a upumoni na e aoaoina mai lenei faasilasilaga o le maliu fasia o Iosefa Samita ma Ailama Samita? (E mafai e tamaiti aoga ona faailoa mai le tele o upumoni, e aofia ai mea nei: Ua sili atu mea ua faia e Iosefa Samita mo le faaolataga o tagata nai lo se isi lava tagata sei vagana ai Iesu Keriso. O le Tusi a Mamona ma le Mataupu Faavae ma Feagaiga na aumaia mo le faaolataga o le lalolagi.)
O a auala faapitoa i lou manatu o le a ese ai lou olaga e aunoa ma le galuega talai a le Perofeta o Iosefa Samita?

Fai i se tamaitiiti aoga e faitau leotele le saunoaga lenei mai ia Elder Dallin H. Oaks o loo maua i le vaega o pepa e tufa atu ua faaautuina “Saafiafiga mo le Perofeta o Iosefa Samita.”

Aisea e taua ai le iloaina o i latou na felatai ma Iosefa Samita na mafaufau o ia o se perofeta ma o se “tagata faamamaluina, ma mama”?

Faaiu i le fesili atu i tamaiti aoga pe i ai se isi e fia faasoa mai a latou molimau ia Iosefa Samita. Uunaia tamaiti aoga e vaai mo avanoa i nai isi aso o sosoo ai e faasoa atu ai i isi a latou molimau o le Perofeta o Iosefa Samita ma lana matafaioi i le toefuataiga o le talalelei a Iesu Keriso.

Faitauga a Tamaiti Aoga

Mataupu Faavae ma Feagaiga 135:1–7; 136:36–39.
Peresitene Thomas S. Monson, “O Le Perofeta o Iosefa Samita: O Se Faiaoga e Ala i Faataitaiga,” Ensignpo o le Liahona, Nov. 2005, 67–70.

O Le Maliu Fasia a le Perofeta o Iosefa Samita

O Faavae o le Toefuataiga—Lesson 22

Faafeagai i le Perofeta ma le Ekalesia

Ia Iuni 1844, o le agaleaga i le Ekalesia na matuai faateleina. O nisi o tagatanuu o Ilinoi na talanoaina le tutuliese o le Au Paia mai le setete, ae o isi na fuafua e fasioti le Perofeta. O nisi o i latou na fuafua faalilolilo agai i le Perofeta ma le Ekalesia oni tagata tuai o le Ekalesia na liliuese. Ia Iuni 7, 1844, o William Law, na auauna atu o se Fesoasoani Lua i le Au Peresitene Sili, ma isi na liliuese na lolomia le tusiga muamua o se nusipepa na taua o le Nauvoo Expositor. I se taumafaiga e faaita tagata lautele i le Perofeta ma le Ekalesia, na faaaoga ai e nei alii lenei nusipepa e faaleaga ai Iosefa Samita ma isi taitai o le Ekalesia. O Iosefa Samita, i le galue ai o le pulenuu o Navu, ma le toatele o le aufono o le aai o Navu na iloaina o le nusipepa taufaaleaga o le a taitai atu i le vevesi faatupufaalavelave agai i le aai. Na latou folafola atu o le nusipepa o se faalavelave i tagata lautele ma faatonuina le Nauvoo Expositor ia faaleagaina.

Ua Molia Sese Iosefa ma Ailama

“O se faaiuga o le [faaleagaina o le Nauvoo Expositor] e le pulenuu ma le aufono a le aai, na oo mai ai se moliaga le faavaea a le pulega o Ilinoi e tetee ai i le Perofeta, o lona uso o Ailama, ma isi au taitai o le aai o Navu.” Na faatonuina e le kovana o Ilinoi, o Thomas Ford, ia alii e tulai i le faamasinoga i Karefasi, Ilinoi, lea na i ai le nofoaga o le pulega faalemalo o le itumalo, ma sa folafola atu ia i latou lo latou puipuiga. Na iloa lava e Iosefa afai e alu o ia i Karefasi, o le a matua lamatia lona ola mai tagata leaga o e na taufaamata’u ia te ia.

“I le talitonuga e na o i laua na mananao i ai tagata leaga, o lea na filifili ai Iosefa ma Ailama e malaga atu i Sisifo e faasaoina ai o la ola. I le aso 23 o Iuni, na la sopoia ai le Vaitafe o le Misisipi, ae peitai i se taimi mulimuli ane i lena aso, na maua e uso mai Navu le Perofeta ma sa ta’u atu ia te ia o le a osofaia le aai e vaegaau pe afai o le a ia le tuuina atu ia lava i le pulega i Karefasi. Na talia e le Perofeta lona faia o lenei mea, ma lona faamoemoe o le a faamalieina ai le au taitai o le malo ma tagata leaga. I le aso 24 o Iuni, na faamavae atu Iosefa ma Ailama i o la’ua aiga ma malaga atu ma isi taitai o le aai o Navu agai i Karefasi, ma ofo e tuuina atu i laua lava i au taitai o le itumalo i Karefasi i le aso e sosoo ai. Na maea ona tatalaina i tua ia uso i le totogiina o le tupe mo le uluai moliaga, ae na toe molia sese i laua i le taufaalata i le setete o Ilinoi, taofia, ma faafalepuipuiina i le Falepuipui i Karefasi e faatali ai se faamasinoga. O Elder Ioane Teila ma Uiliata Risati, pau ia o uso o le Toasefululua o e na le i o i ni misiona i le taimi lea, na ofo ane e faatasi ma i laua” (Aoaoga a Peresitene o le Ekalesia: Iosefa Samita [2007], 529–30).

Maliu Fasia i le Falepuipui o Karefasi

Ia Iuni 27, 1844, na tuu mai ai e se tasi na asiasi atu se fana ia Iosefa. Ao taumafai le au faatupu faalavelave e ulufale mai i le potu na taofia ai le Perofeta ma isi alii, na fanaina Ailama ma maliu ai lava, i le taumafaiga e puipui tagata uma na i ai i le potu. Na oso atu Iosefa i le faitotoa ma aapa atu faataamilo i le faitotoa e faapa atu le fana i totonu o le potu tele. E na o le tolu mai i pulu e ono na faapa, na manunua ai ni nai tagata faatupu faalavelave. Ona faamalosi atu lea e le au faatupu faalavelave a latou fana i le faitotoa na afa mai le matala, ma na taumafai Ioane Teila e tasasa ese a latou fana i se tootoo laau.

Ao faateleina le feteenaiga i le faitotoa, na taumafai Ioane Teila e sola mai le potu i se faamalama. Ao ia taumafai e oso i fafo o le faamalama, na fanaina o ia i le ogavae mai le faitotoa ma na fanaina foi e se isi mai fafo. Na ia pau i le fola, ma ao taumafai e oo atu i lalo o le moega i tafatafa o le faamalama, na matuai manua lava o ia i nisi pulufana se tolu. O le taimi lea, ao tuu mai fana i le faitotoa, na amata ona tasasa e Uiliata Risati i se tootoo.

Ona filifili lea o Iosefa e taumafai e sola atu i le faamalama. Ao faaauau e Uiliata Risati le tetee atu i le aufaatupu faalavelave i le faitotoa, na oso atu le Perofeta i le faamalama na matala. Ao ia faia o lea, na lavea o ia i pulufana mai itu uma i totonu ma fafo o le falepuipui. Na pau o ia i fafo o le faamalama, ao faapea atu, “Lou Alii e, lou Atua!” ma pau loa i lalo i le eleele. O tagata faatupu faalavelave na i totonu o le falepuipui na laga atu i fafo ia mautinoa e i latou lava ua maliu Iosefa. E ui e leai ni tagata o le Ekalesia na o mai i Karefasi, ae na alaga atu se tagata, “Ua o mai Mamona!” ma na sosola ese uma le aufaatupu faalavelave.

Saafiafiga i le Perofeta o Iosefa Samita

Ua saunoa mai Elder Dallin H. Oaks o le Korama a Aposetolo e Toasefululua:

“O tagata na latou iloa lelei Iosefa na tutu latalata atu ia te i le taitaiga o le Ekalesia ma alolofa ma lagolagoina o ia o se perofeta. O lona uso o Ailama na filifili e oti i ona tafatafa. O John Taylor, o le sa faatasi foi ma ia ina ua tagatavaleina, sa faapea mai: ‘Ou te molimau atu i luma o le Atua, agelu, ma tagata uma, o ia o se tagata lelei, mamalu ma mama …—ma o lona tagata mamalu ma aloaia sa sili atu mea na ia faia—ma sa ia ola ma oti o se tagata o le Atua’ (The Gospel Kingdom [1987], 355; tagai foi MF&F 135:3). Na faalauiloa mai e Polika Iaga faapea: ‘Ou te manatu e leai se tagata e soifua mai i le lalolagi e sili atu lona iloa o [Iosefa Samita] nai lo au; ma ou te fia faamamafaina atu e faapea, sei vagana ai lava Iesu Keriso, e leai se isi tagata na soifua pe o le a soifua mai i lenei lalolagi e pei o ia’ [Discourses of Brigham Young, sel. John A. Widtsoe (1954), 459]” (“Iosefa, o le Tagata ma Perofeta,” Liahona, Iulai 1996, 73).