Lesona 6

O Le Faatulagaina o le Ekalesia.

Folasaga

I se faaaliga i le Perofeta o Iosefa Samita, na poloaiina ai e le Alii e faapea o Lana Ekalesia ia faatulagaina ia Aperila 6, 1830 (tagai i le MF&F 20, vaega o ulutala; MF&F 20:1). O lenei faaaliga na saunia ai foi tagata lotu mo se malamalama sili atu o le misiona ma aoaoga a le Faaola. I se faaaliga o loo faamaumauina i le Mataupu Faavae ma Feagaiga 1:30, na faailoa mai ai e le Alii le Ekalesia toefuataiina o “se ekalesia moni ma le ola e tasi i luga o le lalolagi atoa,” lea e faamamafaina le taua o le matafaioi a le Ekalesia i aso e gata ai i o tatou olaga.

Faitauga Faaopoopo

Henry B. Eyring, “O le Ekalesia Moni ma le Ola,”Ensign po o le Liahona, Me 2008, 20-24.
“Faatulagaina o le Ekalesia a Iesu Keriso,” mataupu 6 i le Talafaasolopito o le Ekalesia i le Atoatoaga o Taimi Tusi a Tamaiti Aoga, lom. 2 (Church Educational System manual, 2003), 67–68.
Boyd K. Packer, “O le Ekalesia Moni e Tasi,” Liahona, Ian. 1986, 64–66.
Jeffrey G. Cannon, “‘Faatulaga Lau Ekalesia’: MF&F 18, 20, 21, 22,” Revelations in Context series, Ian. 3, 2013, history.lds.org.

Fautuaga mo le Aoaoina Atu

Mataupu Faavae ma Feagaiga 20:1-3

O Le Toefuataiga o le Talalelei a Iesu Keriso

Amata le lesona i le fai atu i tamaiti aoga e faamatala mai mea ua latou iloa i le Ekalesia na faatuina e Iesu Keriso i le vaitaimi o le piriota o le Feagaiga Fou. Ona fesili atu lea:

O le a le mea ua tatou talitonu na tupu i le Ekalesia a Iesu Keriso ina ua mavae le maliliu o Aposetolo?
E faapefea e lenei mea ona faamatalaina le manaomia o se toefuataiga o le Ekalesia a Iesu Keriso?

Fai i se tamaitiiti aoga e faitau leotele le fuaitau lenei, a o faalogologo le vasega mo auala na faatulagaina ai e le Ekalesia a Iesu Keriso o le Au Paia o Aso e Gata Ai, le toefuataiina mai o uiga faapitoa o le Ekalesia na faatuina e Iesu Keriso i taimi o le Feagaiga Fou.

“I le aso 6 Aperila, 1830, i le na o le sefulutasi aso talu ona faasalalauina le Tusi a Mamona mo le faatauina atu, na i ai se faapotopotoga o tagata e tusa o le 60, na faapotopoto i le fale ogalaau o Pita Uitimera i Faieti, i Niu Ioka. O iina na faatulagaina aloaia ai e Iosefa Samita le Ekalesia, lea na mulimuli ane tuuina mai i se faaaliga o se, O Le Ekalesia a Iesu Keriso o Aso e Gata Ai (tagai i le MF&F 115:4). O se aso na matua olioli ai, faatasi ai ma le maoae o le sasaa mai o le Agaga. Na faapaiaina ma tufatufaina atu le faamanatuga, na papatisoina le au talitonu, o le meaalofa o le Agaga Paia sa faaeeina, ma na faauuina alii i le perisitua. I se faaaliga na maua ai i le taimi o le fonotaga, na tofia ai e le Alii ia Iosefa Samita e avea o se taitai o le Ekalesia: “o se tagata vaai, o se faaliliu upu, o se perofeta, o se aposetolo a Iesu Keriso, o se toeaina o le ekalesia e tusa ai ma le finagalo o le Atua le Tama, ma le alofa tunoa o lo outou Alii o Iesu Keriso” (MF&F 21:1). O Le Ekalesia a Iesu Keriso na toe faatuina i luga o le fogaeleele”(Aoaoga a Peresitene o le Ekalesia: Iosefa Samita [2007], 8–9).

Valaaulia tamaiti aoga e faamatala nisi o uiga o le Ekalesia toefuataiina a Iesu Keriso e tutusa ai ma na o le Ekalesia o le Feagaiga Fou.

Faamatala atu pe a faitau mai i le Mataupu Faavae ma Feagaiga, e mafai ona avea ma se fesoasoaniga le faitauina o ulutala o vaega. O lenei mea e fesoasoani e faatulaga ai se talafaasolopito o faaaliga. Valaaulia se tamaitiiti aoga e faitau leotele le vaega o ulutala o le Mataupu Faavae ma Feagaiga 20. (Atonu e te manao e faasino atu e faapea i le lomiga o le 2013 o le Mataupu Faavae ma Feagaiga, o nisi o faamatalaga o le talafaasolopito e leo aafia i le lomiga i le 1981 na faaopoopo i le ulutala o le vaega.) Valaaulia se isi tamaitiiti aoga e faitau leotele le Mataupu Faavae ma Feagaiga 20:1–3. Fai atu i le vasega e mulimuli i le faitauga, ma vaai mo fuaitau e faatatau i le Toefuataiina o le talalelei. Fesili atu:

O a upumoni e uiga i le Toefuataiga o le talalelei ua aoaoina i nei fuaiupu? (O se tasi o aoaoga faavae e tatau ona faailoa mai e tamaiti aoga o le, o Iosefa Samita na valaauina e le Atua ma poloaiina e faatulagaina le Ekalesia a Iesu Keriso.)

Faitau leotele le saunoaga lenei a Peresitene Gordon B. Hinckley (1910–2008):

“Sa potopoto ai Iosefa Samita ma ona fesoasoani i se fale laupapa e tau le iloa, i le faatoaga a Peteru Uitimera i le nuu toagaogao o Faieti, i Niu Ioka, ma faatulagaina ai le Ekalesia a Keriso. …

Mai uluai uso e toaono o le ekalesia, ua tutupu mai ai se aiga tele o le au tapuai. Mai lena nuu toagaogao, ua tupu mai ai se galuega ua salalau atu i atunuu e 160 o le lalolagi. … O se tulaga ola ofoofogia lena. Ua sili atu tagata o le Ekalesia o loo nonofo i fafo atu o lenei atunuu, nai lo iinei. O se mea ofoofogia foi lena mea. E leai se isi ekalesia na amata mai i laueleele o Amerika, e televave lona salalau. … O se atinae ofoofogia e le i vaaia muamua” “E Agai Pea i Luma le Ekalesia,” Liahona, Iuni 2002, 4).

O le a se mea e uiga ese ia te oe e uiga i le faatupulaia vave o le Ekalesia i aso e gata ai?
E mafai faapefea e i tatou o ni tagata taitoatasi ona fesoasoani i le Ekalesia a le Alii e faaauau pea ona tuputupu ae i o tatou aso?

Mataupu Faavae ma Feagaiga 20:17–37, 68–69

O le aoaoga faavae o le Ekalesia a Iesu Keriso ma tiute o tagata ua papatisoina

Faamatala atu e faapea o le vaega 20 o le Mataupu Faavae ma Feagaiga, sa iloa e tagata muamua o le Ekalesia o se Mataupu ma Feagaiga o le Ekalesia. O lenei vaega o loo i ai le tele o faatonuga a le Alii, e faatatau i aoaoga faavae o le Ekalesia a Iesu Keriso ma tiute a ona tagata. O lenei faaaliga na faitauina leotele i nisi o konafesi muamua a le Ekalesia.

Valaaulia tamaiti aoga e vaai faalemafaufau e faapea, o i latou o ni tagata fou o le Ekalesia i le 1830 ma o loo saili ia iloa le mea e tatau ona latou talitonu i ai o ni tagata o le Ekalesia a Iesu Keriso. Valaaulia le afa o le vasega e faitau le leoa le Mataupu Faavae ma Feagaiga 20:17–28 ma le isi afa e faitau fuaiupu 29–36, ma vaai mo aoaoga faavae lea e taua mo tagata uma o le Ekalesia toefuataiina a le Alii ia iloa. Atonu e te manao e fautuaina e faailoga mea latou te mauaina.

A uma se taimi talafeagai, valaaulia tamaiti aoga e faasoa mai upumoni na latou faailoaina, ma faamatala mai pe aisea e taua ai upumoni taitasi ia i latou. Mafaufau e tusi le upumoni lenei i le laupapa:E ala mai i faaaliga, e faamanino e le Alii aoaoga ma mataupu faavae i luga o loo faavaeina ai Lana talalelei.

Ona valaaulia lea o i latou e faitau le Mataupu Faavae ma Feagaiga 20:37, ma vaavaai mo tulaga manaomia mo i latou o e mananao ia papatisoina. Fai i le isi afa o le vasega e faitau le Mataupu Faavae ma Feagaiga 20:68–69, ma vaai mo mea ua faamoemoeina e le Alii mai ia i tatou pe a uma ona tatou papatisoina. Faasino atu o faatonuga i nei fuaiupu, o loo maua ai se mamanu manino mo tagata o le Ekalesia e mulimuli ai.

Talanoaina nei fesili faatasi ma le vasega:

O le a se mea e tatau ona faatino e se tagata a o lei papatisoina se alii po o se tamaitai? (E tatau ona faailoa mai e tamaiti aoga le mea lenei: A o le’i mafai ona papatisoina ni tagata, e ao ona latou lotomaualalalo, salamo, loto e tauave i o latou lava luga le suafa o Iesu Keriso, ma naunautai e auauna atu ia te Ia e oo i le iuga.)
O le a se mea ua faamoemoeina e le Alii mai ia i tatou pe a uma ona tatou papatisoina? (Atonu e eseese tali a tamaiti aoga, ae e tatau ona latou faailoa mai le mataupu faavae lenei: A uma le papatisoga, tatou te faaali atu lo tatou agavaa i le Alii, e ala i lo tatou savalivali ma le tautatala faaleatua.
O le a sou manatu i le uiga o le “faaali atu … le savali ma le tautala faaleatua”? (MF&F 20:69).
Aisea e oo mai ai faamanuiaga i tagata o le Ekalesia o e “savavali i le paia i luma o le Alii?” (MF&F 20:69).

Pe a lava le taimi, e mafai ona e faasino atu i tamaiti aoga e faapea, o aoaoga faavae ma faatinoga a le Ekalesia o loo faamauina i le Mataupu Faavae ma Feagaiga 20 o loo faamatalaina mai foi i le Tusi a Mamona, ua fesoasoani ai e tatou te malamalama ai o le Ekalesia a Iesu Keriso na tutusa lava le faavaeina i tisipenisione uma lava. Mo se faataitaiga, o aoaoga faavae o loo faamatalaina i le Mataupu Faavae ma Feagaiga 20:17–36 o loo faamatalaina mai foi i le Tusi a Mamona. E faapena foi, o sauniga ma faatinoga o loo faamauina i le Mataupu Faavae ma Feagaiga 20:73–80 o loo faamaumauina foi i le Tusi a Mamona.

Mataupu Faavae ma Feagaiga 1:30.

O le “ekalesia moni ma le ola e tasi”

Faamatala atu e toatele i latou i o tatou aso, e talitonu e moni lotu uma lava ma e tutusa uma le sao i le silafaga a le Atua. Ae ui i lea, pe tusa ma le tasi ma le afa tausaga talu ona faatulagaina le Ekalesia a Iesu Keriso o le Au Paia o Aso e Gata Ai, na tuuina mai ai e le Alii se faamatalaga taua o le Ekalesia. Valaaulia tamaiti aoga e faitau le leoa le Mataupu Faavae ma Feagaiga 1:30. Ona fesili atu lea:

Na faapefea ona faamatalaina e le Alii le Ekalesia toefuataiina? (E tatau ona faaleo mai e tamaiti aoga le upumoni lenei: O le Ekalesia a Iesu Keriso o le Au Paia o Aso e Gata Ai ua na o le pau lea o le lotu moni ma le ola i luga o le fogaeleele.)
O le a le uiga ia te oe o le faaupuga lea, O Le Ekalesia a Iesu Keriso o le Au Paia o Aso e Gata Ai “ua na o le pau lea o le Ekalesia moni ma ola i le lalolagi? (A o lei tali mai tamaiti aoga, atonu e te manao e faamanatu atu ia i latou, o lenei aoaoga faavae e leo faamoemoeina tatou te faapea ai ua sili i tatou nai lo isi.

Faaali atu le saunoaga lenei a Peresitene Henry B. Eyring o le Au Peresitene Sili ma Elder David A. Bednar o le Korama a Aposetolo e Toasefululua, ma valaaulia se tamaitiiti aoga e faitau leotele. Fai i le vasega atoa e mulimuli i le faitauga, ma vaai pe aisea ua faapea ai o le Ekalesia a Iesu Keriso o le Au Paia o Aso e Gata Ai ua “na o le pau lea o le lotu moni ma le ola.”

“O le Ekalesia moni lenei, le Ekalesia moni e tasi, aua o loo i ai i totonu ia ki o le perisitua. E na o totonu o lenei Ekalesia ua tuuina mai i ai e le Alii le mana e faamaufaailogaina ai i le lalolagi ma faamaufaailogaina ai i le lagi e pei ona sa Ia faia i le taimi o le Aposetolo o Peteru. O na ki na toefuataiina mai i a Iosefa Samita o le na faatagaina e faaee atu i luga o uso o le Korama a le Toasefululua” (Henry B. Eyring, “O le Ekalesia Moni ma le Ola,” Ensign po o le Liahona, Me 2008, 20).

“Na tautino mai e le Alii e faapea O Le Ekalesia a Iesu Keriso o le Au Paia o Aso e Gata Ai o “le ekalesia faamoni ma ola e tasi i luga o le lalolagi atoa” (MF&F 1:30). O lenei Ekalesia toefuataiina e moni aua o le Ekalesia a le Faaola; o Ia “o le ala, o le upumoni, ma le ola Ioane 14:6). Ma o se Ekalesia ola ona o galuega ma meaalofa a le Agaga Paia” (David A. Bednar, “Ia Maua le Agaga Paia,” Ensign po o le Liahona, Nov. 2010, 97).

E faapefea e upumoni ua faailoa mai e Peresitene Eyring ma Elder Bednar, ona faia le Ekalesia a Iesu Keriso o Aso e Gata Ai ma mea e ese mai ai i isi lotu uma lava i le lalolagi? (O le Ekalesia a le Faaola, o loo i ai galuega ma meaalofa o le Agaga Paia, ma ki o le perisitua o loo faavaeina ai. Atonu e te manao e fautuaina tamaiti aoga, e tusi nisi o nei manatu i le laina o a latou tusitusiga paia i autafa o le Mataupu Faavae ma Feagaiga 1:30.

Faamatala atu na sii mai e Peresitene Boyd K. Packer o le Korama a Aposetolo e Toasefululua le Mataupu Faavae ma Feagaiga 1:30 ma faamatalaina le aisea e lenei faamatalaga paia ua tuuina atu i le Ekalesia le sili ona taua. Valaaulia se tamaitiiti aoga e faitau leotele le faamatalaga lenei a Peresitene Packer:

“A tatou lafoai lenei mataupu ua leai se aoga o le Toefuataiga. …

“Matou te lei fatuina le mataupu lenei o le Ekalesia moni e tasi. O le mataupu mai le Alii. Po o a lava manatu o isi tagata ia te i tatou, pe manatu ua tatou faasausili, po o a lava faitioga e fai mai, e tatau lava ona tatou aoao atu lenei mataupu i e fia faalogo ai. …

“Matou te lei fai atu foi e leai ni upumoni i isi Ekalesia. Ua fetalai mai le Alii, ua ia i latou foi ni “foliga faaleatua.” E mafai lava e tagata liliu mai i le Ekalesia ona latou taofimau i upumoni na latou aoaoina mai isi Ekalesia ma faaopoopo atili i ai” (“O le Ekalesia Moni e Tasi,” Liahona, Ian. 1986, 65).

E faapefea e lenei aoaoga faavae ona faamaninoina le manaomia o le Toefuataiga?

Valaaulia tamaiti aoga e faamatala mai le ala, e mafai ai e tagata taitoatasi ona iloa mo i latou lava le moni O Le Ekalesia a Iesu Keriso o le Au Paia o Aso e Gata Ai.

Faitauga a Tamaiti Aoga

Mataupu Faavae ma Feagaiga 1:30; 20:1–3, 17–37, 68–69.
Henry B. Eyring, “O Le Ekalesia Moni ma le Ola, Ensign po o le Liahona, Me 2008, 20-24.