Folasaga i le O Iesu Keriso ma le Talalelei Faavavau Tusi Lesona a le Faiaoga (Mataupu Faalelotu 250)

O le a se mea ua faamoemoeina mai i se faiaoga o mataupu faalelotu?

A o e saunia e aoao atu, e taua le malamalama i Faamoemoega o Seminare ma Inisitituti o Mataupu Faalelotu:

“O lo tatou faamoemoega o le fesoasoani lea i le autalavou laiti ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o o latou aiga, ma isi mo le ola e faavavau faatasi ma lo latou Tama i le Lagi”Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], x).

E mafai ona e ausia lenei faamoemoega i le ola ai i le talalelei, aoaoina atu ma le atoatoa le talalelei i au tamaiti aoga, ma le auauna atu ma le tonu i lau vasega po o le polokalama. A o e saunia ma aoao atu le talalelei i nei auala, o le a e agavaa mo le uunaiga a le Agaga Paia.

O lou avanoa e fesoasoani ai i tamaiti aoga e aoao e ala i le Agaga ina ia mafai ona latou faamalolosia lo latou faatuatua ma faalolotoina lo latou liua. E mafai ona e fesoasoani i tamaiti aoga e ausia lenei mea a o e taitaia i latou e faailoa mai, malamalama, lagona le upumoni ma le taua o le, ma saunia e faaaoga aoaoga ma mataupu faavae taua o le talalelei a Iesu Keriso.

O le tusitaulima o leAoao Atu ma le Aoaoina Mai o le Talalelei o se punaoa taua mo le malamalama ma le faagasologa o le aoaoina atu ma le ala e faamanuiaina ai i le potuaoga. Ia tagai soo i lenei tusitaulima.

O a faamoemoega o lenei kosi?

O le kosi, O Iesu Keriso ma le Talalelei Faavavau (Mataupu Faalelotu 250), e tuuina atu i tamaiti aoga le avanoa e suesue ai le galuega faavavau a Iesu Keriso, i le taulai atu i Ana matafaioi paia i Lona muai olaga, faaletino, ma le maea ai o le olaga faaletino. O tusitusiga faavae, upu a perofeta o aso nei, ma le tusiga e faaautu“O Le Keriso Soifua: O Le Molimau a le Au Aposetolo” (Ensign po o le Liahona, Ape. 2000, 2–3) o loo faaaogaina o ni punaoa musuia mo lenei kosi. Na faamamafaina mai e Elder Richard G. Scott o le Korama a Aposetolo e Toasefululua le taua o le suesueina o le soifuaga ma le misiona a Iesu Keriso:

“Ou te faamalosiau atu ma le malosi ia amata sau lava fuafuaga e te suesue ai ina ia e malamalama lelei ai ma talisapaia ia taunuuga le mafaatusalia, faavavau, le iu o le faataunuuina atoatoa e Iesu Keriso o Lona valaauga paia faalelagi, o lo tatou Faaola ma le Togiola. O le mafaufau loloto faaletagata lava ia i mau e o faatasi ma le tatalo mai le loto, o le a faamalosia ai lou malamalama ma le talisapaia o Lana Togiola e le mafaatauina”O Loo Soifua o Ia! Ia Viia Lona Suafa!” Ensign po o le Liahona, Me 2010, 77).

A oo ina malamalama tamaiti aoga ma talisapaia le taua o le valaauga paia a le Faaola ma le taua o Ia i o latou olaga, o le a faamalolosia i latou agai i luitau o le olaga ma lagona le saunia sili atu e talanoaina matafaioi paia a le Faaola i le fuafuaga o le faaolataga, lea e avea ai o latou olaga patino o se vaega taua tele.

O le a le mea ua faamoemoeina mai tamaiti aoga?

E tatau ona faitau e tamaiti aoga fuaitau o tusitusiga paia ma lauga faaperofeta o loo lisiina i le vaega o le Faitauga a Tamaiti Aoga i lesona taitasi. E tatau foi i tamaiti aoga ona ausia le auai manaomia ma faaalia le tomai i tusi a le vasega.

E faapefea ona faatulagaina lesona i lenei tusi lesona?

O lenei kosi ua fuafuaina o se kuata le umi ma lesona e 28 ua tusia mo le 50-minute i le vasega e tasi. Afai e faalua ona feiloai lau vasega i le vaiaso, aoao atu le lesona e tasi i le vasega e tasi. Afai e feiloai lau vasega na o le faatasi i le vaiaso mo le 90 i le 100 minute, tuufaatasi ma aoao atu lesona e lua i le vasega e tasi. O le otootoga o lesona taitasi e i ai vaega e fa:

• Folasaga

• Faitauga Faaopoopo

• Fautuaga mo le Aoaoina Atu

• Faitauga a Tamaiti Aoga

Folasaga

O lenei vaega e maua ai se folasaga puupuu i autu ma faamoemoega o le lesona.

Faitauga Faaopoopo

O lenei vaega o loo taua ai punaoa, e pei o savali mai perofeta o aso nei, e mafai ona fesoasoani ia te oe ia malamalama atili ai i aoaoga, mataupu faavae, ma upumoni o le talalelei o loo aofia ai i le otootoga o le lesona.

Fautuaga mo le Aoaoina Atu

O le vaega o Fautuaga mo le Aoaoina Atu e aofia ai mea e fesoasoani ia te oe e iloa ai po o a mea e aoao atu ma e faapefea ona aoao atu (tagai foi vaega 4.3.3 ma le 4.3.4 i le Aoao Atu ma le Aoao Mai o le Talalelei tusitaulima). O gaoioiga e aoao ai ua fautuaina atu ua fuafuaina e fesoasoani i tamaiti aoga e faailoa ai, malamalama, ma faaaoga upumoni paia. E mafai ona e filifili e faaaoga nisi po o fautuaga uma a o fetuunaia ia fetaui ma lau auala patino e aoao atu ai ma ia talafeagai ma manaoga ma tulaga o au tamaiti aoga. A o e mafaufau i le auala e faafetaui ai tusiga o le lesona, mulimuli i le fautuaga lenei a Elder Dallin H. Oaks o le Korama a Aposetolo e Toasefululua:

“Sa masani ona ou faalogo o aoao mai Peresitene Packer, tatou te talia muamua, ona faafetaui ai lea. Afai tatou te masani lelei ma le lesona o le a tatou tuuina atu, ona tatou mulimuli lea i le Agaga e faafetauiina. Ae e i ai le faaosoosoga, a tatou talanoa e uiga i lenei fetuunaiga, i le amata muamua i le faafetauiga nai lo le taliaina. O se fua. O se luitau e faaauau pea. Ae o le faaaogaina o le talia muamua ona faafetaui ai lea o se auala lelei e tumau ai i luga o le laueleele mautu” (“A Panel Discussion with Elder Dallin H. Oaks” [Seminaries and Institutes of Religion Satellite Broadcast, Aok. 7, 2012]; si.lds.org).

O le vaega Fautuaga mo le Aoaoina Atu e maua ai e le itiiti ifo i le tasi se aoaoga po o se mataupu faavae, lea e faaalia i mataitusi tetele. A o iloaina e tamaiti aoga nei aoaoga ma mataupu faavae ma faasoa atu mea na latou aoaoina, e mafai ona eseese a latou upu mai na o loo taua i le tusi lesona. A tupu lenei mea, ia faaeteete aua nei faapea e sese a latou tali. Ae ui i lea, afai e tatau ona sili atu le sao o se fuaitau, ia fesoasoani ma le faaeteete e faamanino le malamalama.

Ina ia fesoasoani ia avea tamaiti aoga ma ni tamaiti aoga o tusitusiga paia i le olaga atoa, aoao i latou e faaaoga fesoasoani i suesuega o loo maua i lomiga o tusitusiga paia a le Au Paia o Aso e Gata Ai. Faaaoga avanoa i le vasega e fesoasoani ai i tamaiti aoga e faataitai tomai ma auala o suesuega i tusitusiga paia (tagai i leAoao Atu ma le Aoao Mai o le Talalelei, 20–23). A o e faia, o le a faalolotoina e tamaiti aoga lo latou fiafia i tusitusiga paia, faamamanaina e sue tali ia latou fesili, ma aoao ina ia taitaia e le mana o le Agaga Paia.

Faitauga a Tamaiti Aoga

O lenei vaega o loo lisiina ai fuaitau ma lauga faaletusipaia a le au pulega aoao o le Ekalesia ia o le a faaleleia le malamalama o le tamaitiiti aoga i autu o loo maua i lesona. Uunaia tamaiti aoga e faitau nei tusiga a o lei o mai i le vasega. A o latou suesue i nei tusiga musuia, e le gata o le a sili atu lo latou saunia e auai i talanoaga i le vasega, ae o le a latou maua foi se malamalama lautele atu o autu o le vasega. Saunia mo tamaiti aoga se lisi o “Faitauga a Tamaiti Aoga” uma lava i le amataga o le kuata.

E mafai faapefea ona ou saunia e aoao atu?

O le a fesoasoani le Alii ia te oe e saunia e aoao atu. A o e saunia, atonu e te iloa e fesoasoani le fai ia te oe lava ia o fesili nei:

• Pe na ou tatalo ina ia maua le taitaiga a le Agaga Paia?

• Pe na ou suesueina poloka o mau ua tofiaina ma le faitauga faaopoopo?

• Pe ua ou faitauina le faatulagaga o aoaoga ma fuafua pe i ai se mea iina ou te manaomia le faafetauia pe suia ina ia talafeagai ma manaoga o au tamaiti aoga?

• E mafai faapefea ona ou tulitataoina le faitauga a tamaiti aoga ina ia mautinoa o loo tele ni mea aoga e maua mai ai e tamaiti aoga?

• E mafai faapefea ona ou fesoasoani i tamaiti aoga taitasi e auai atoatoa i le lesona?

Atonu o le a aoga foi fautuaga nei:

• Uunaia tamaiti aoga e faitau fuaitau ma tusiga o mau ua tofia a o lei amataina le vasega.

• Faamoemoeina tamaiti aoga e faataunuu lo latou matafaioi o ni tagata aoao.

• Saunia soo ni avanoa mo tamaiti aoga e faamatala mai ai aoaoga ma mataupu faavae ia latou lava upu, faasoa mai aafiaga talafeagai, ma molimau mai i mea latou te iloa ma lagonaina.

• Faaeseese gaoioiga ma auala e aoao ai e te faaaogaina i vasega taitasi ma mai lea aso i lea aso foi.

• Ia fatuina se siosiomaga e aoao ai lena e valaauliaina le Agaga ma e mafai ai e tamaiti aoga ona maua le faamanuiaga ma le avanoa e aoao atu ma aoao mai ai le tasi i le isi (tagai i le MF&F 88:78, 122).

Na aoaoina e Elder Richard G. Scott o le Korama a Aposetolo e Toasefululua:

“Ia mautinoa e faatele le auai aua o lena faaaogaina o le faitalia o se tamaitiiti aoga e faatagaina ai le Agaga Paia e faatonuina. … A o tauina atu e tamaiti upumoni, o nei upumoni o le a faamautu i totonu o o latou agaga ma faamalosia a latou molimau faaletagata lava ia” (“To Understand and Live Truth”[evening with Elder Richard-,G. Scott, Fep. 4, 2005] 3;si.lds.org.

E mafai faapefea ona ou faafetauia lesona mo i latou e i ai manaoga faapitoa?

A o e saunia e aoao atu, ia manatua tamaiti aoga e i ai manaoga faapitoa. Fesuiai gaoioiga ma mea e faamoemoeina ina ia fesoasoani ia latou manuia. Mo se faataitaiga, o nisi tamaiti aoga atonu e aoao mai le faalogologo i le pueina o tusitusiga paia. E faigofie lava le pueina o nei mea mai le LDS.org.

Mo nisi manatu ma punaoa, faafesootai le itulau o Disability Resources i le disabilities.lds.org ma le tusitaiala o aiaiga a Seminare ma Inisitituti o Mataupu Faalelotu ua faaautu Vasega Fetuunai ma le Polokalama mo Tamaiti e i ai Manaoga Faapitoa.