Seminare ma Inisitituti
Lesona 2: O Iesu Keriso e Totonugalemu i le Talafaasolopito o Tagata Ola Uma

Lesona 2

O Iesu Keriso e Totonugalemu i le Talafaasolopito o Tagata Ola Uma

Folasaga

I le molimau atu i le matafaioi taua a Iesu Keriso i le fuafuaga a le Tama Faalelagi, ua folafola mai e perofeta o aso nei, “Matou te tautino atu ma le faamaoni aiai, o Lona soifua, lea e totonugalemu i le talafaasolopito o tagata uma, e le’i amataina mai i Peteleema pe faaiuina foi i luga o Kalevario”(“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). O lenei lesona o le a fesoasoani i tamaiti aoga ia sili atu le malamalama faapea na faatuina e le Tama Faalelagi Lana fuafuaga o le faaolataga i le muai olaga ma muai faauuina Ieova, le Iesu Keriso a o lei fanau mai, e avea ma tagata tutotonu i lena fuafuaga. O le a uunaia tamaiti aoga ia tuu Iesu Keriso i le totonugalemu o o latou olaga faaletino.

Faitauga Faaopoopo

Fautuaga mo le Aoaoina Atu

Alema 12:22–34

O le Faaola e totonugalemu i le fuafuaga a le Atua.

Faaali atu le faamatalaga lenei mai ia Elder Alexander B. Morrison o le Fitugafulu, ma fai atu i se tamaitiiti aoga e faitau leotele. Valaaulia le vasega e mulimuli i ai ma faailoa mai le mea na tuuina atu e le Tama Faalelagi i Ana fanau i le muai olaga:

Elder Alexander B. Morrison

“I aso ua leva, a o lei i ai le lalolagi o loo tatou nonofo ai nei, sa faatuina ai e le Atua lo tatou Tama … se fuafuaga. … [O lena] fuafuaga na saunia ai le auala atoatoa mo fanau uma a le Atua ina ia maua ai le tino ola pea ma le ola e faavavau” (“Life—the Gift Each Is Given,” Ensign, Dec. 1998, 15–16).

  • O a faamanuiaga na tau mai e Elder Morrison e mafai ona iu lava ina tatou maua i le avea ai ma se vaega o le fuafuaga a le Atua? (Faamatala atu o le tino ola pea e faatatau i le toetu—e le toe oti faaletino lava—ma o lena ola e faavavau e faatatau i le ituaiga olaga o loo soifua ai le Atua.)

Valaaulia tamaiti aoga e faitau le leoa le Alema 12:25 ma faailoa mai pe na faapefea ona faatatau Alema i le fuafuaga a le Atua ma le taimi na saunia ai. Fai atu ia i latou e lipoti mai mea ua latou mauaina. (Na aoao mai Alema faapea o le “fuafuaga o le togiola” a le Atua na faataatia “mai le faavaega o le lalolagi.” A uma ona tali mai tamaiti aoga, e mafai ona e tau atu o isi igoa o le fuafuaga a le Atua e aofia ai “le fuafuaga alofa mutimutivale a le Foafoa Silisiliese” [2 Nifae 9:6]; “le fuafuaga o le faaolataga” [Alema 24:14]; “fuafuaga tele a le Atua Faavavau” [Alema 34:9]; “fuafuaga tele o le fiafia” [Alema 42:8]; ma le “feagaiga e faavavau” [MF&F 22:1; 45:9; 66:2].

Ona valaaulia lea o tamaiti aoga e suesue i paga le Alema 12:22–32, ma vaavaai mo mafuaaga e taua ai le fuafuaga a le Atua o le fuafuaga o le togiola. A uma se taimi talafeagai, valaaulia ni nai tamaiti aoga e faasoa mai mea na latou maua i le vasega. Fesoasoani i tamaiti aoga ia malamalama atili i nei fuaiupu e ala i le fesili atu:

  • E tusa ai ma aoaoga a Alema, o le a lo tatou malaia faavavau pe ana leai le fuafuaga o le togiola? (A aunoa ma se fuafuaga o le togiola, o le a leai se toetu o e ua oti po o le togiolaina mai agasala, e tuua ai tagata ua leiloloa ma pauu ma i se tulaga o le oti faaletino ma le faaleagaga e faavavau [tagai foi i le 2 Nifae 9:6–13].)

  • Aisea e taua ai se auala ia saunia mo i tatou e manumalo ai i nei tulaga?

Valaaulia se tamaitiiti aoga e faitau leotele le Alema 12:33–34. Fai atu i le vasega e mulimuli i le faitauga, ma vaavaai mo mea na saunia e le Atua e togiola ai Ana fanau. Fesoasoani i tamaiti aoga e tau mai se aoaoga faavae po o se mataupu faavae o loo aoaoina i nei fuaiupu e ala i le fesili atu:

  • O le a faapefea ona e otootoina mea ua faia e Iesu mo i tatou i le fuafuaga a le Atua? (O tali e tatau ona aofia ai mea nei: Afai tatou te salamo ma aua le faamaaaina o tatou loto, o le a tatou maua le alofa tunoa ma le faamagaloina o agasala e ala i le Alo e Toatasi na Fanaua o le Atua. Ua na o Iesu Keriso lava e mafai ai ona tatou maua ai le faamagaloina o agasala ma ulufale atu ai i le afioaga o le Tama Faalelagi.

Molimau atu o Iesu Keriso o le totonugalemu lea o le fuafuaga a le Atua ma e ala mai i Lana Togiola ua saunia le ala mo i tatou e maua ai le tino ola pea ma le ola e faavavau.

Aperaamo 3:24–27; 1 Peteru 1:19–20

Na muai faauuina Iesu Keriso e avea ma o tatou Faaola.

Valaaulia tamaiti aoga e suesue i le Aperaamo 3:24–27 ma le 1 Peteru 1:19–20, ma vaai po o a mea ua aoao mai e nei fuaitau e uiga i le matafaioi a le Faaola i le fuafuaga a le Atua. Ona fai atu lea o fesili nei. Manatua: E ala i le fai atu o na fesili, e mafai ona e fesoasoani ai i tamaiti aoga e aoao e iloilo fuaitau o mau ma faailoa aoaoga faavae o loo aoaoina mai ai.

  • I le Aperaamo 3:26, o le a le uiga o fuaitau “setete muamua” ma le “setete lona lua”? (O le “Setete muamua” e faatatau i le muai olaga, ma le “setete lona lua” e faatatau i le olaga faaletino.)

  • O ai tagata e toatolu o loo taua i le Aperaamo 3:27 , ma o a mea na faia e i latou taitoatasi? (Tama Faalelagi, Iesu Keriso, ma Satani. Faamamafa atu faapea i le muai olaga, na muai faauuina ai e le Tama Faalelagi Lona Alo Ulumatua, o Iesu Keriso, e avea ma tagata tutotonu o Lana fuafuaga.

Ia mautinoa ua malamalama tamaiti aoga faapea o Iesu na taua o Ieova i le muai olaga. Ona fesili atu lea:

  • Ina ua faapea atu Ieova i le Tama, “ O Au lenei, auina atu Au,” o le a le mea na ia tautino atu e fai i le lalolagi? (Aoao Atu Lana talalelei, faatuina Lana Ekalesia, puapuagatia ma maliu mo a tatou agasala, ma toetu mai le oti.)

  • O le a le mea na faia mo i tatou e le filifilia e Tama Faalelagi o Ieova e avea ma o tatou Togiola, i tulaga o lo tatou avanoa i le lumanai?

Fai atu i tamaiti aoga e suesue le leoa le Mose 4:2, ma vaai mo isi meamoni e uiga i le filifilia o Ieova e Tama Faalelagi e avea ma o tatou Faaola ma le Togiola. A o faamatala mai e tamaiti aoga mea na latou maua, ia mautinoa latou te faailoa mai meamoni nei: na filifilia Ieova mai lava i le amataga. O le tasi mafuaaga na filifilia ai Ieova ona sa Ia saili e fai le finagalo o le Tama ma tuuina atu le mamalu atoa i le Tama. Ina ia faamamafaina nei upumoni, faaali atu ma faitau leotele le fuaitau lenei a Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

“O [Iesu Keriso] e foliga mai ua na o Ia ua atoatoa lona loto maualalo ma loto i ai i le fono tele i le muai olaga e muai faauuina [faataunuuina le Togiola e le Iu]” (“O Le Togiola a Iesu Keriso,” Liahona, Mat. 2008, 35).

Fai atu i tamaiti aoga e vaai faalemafaufau pe faapei le i ai iina ina ua tau atu e Tama Faalelagi i Ana fanau faapea o Lona Alo Ulumatua, o Ieova, o le a avea ma Faaola. Ona faaali atu lea o le fuaitau lenei mai le Perofeta o Iosefa Samita (1805–44), ma fai atu i se tamaitiiti aoga e faitau leotele:

Perofeta o Iosefa Samita

“I le muai faapotopotoga i le lagi sa tatou i ai uma faatasi ma vaai ai i le Faaola ua filifilia ma tofia ma le ata o le faaolataga ua faia, ma tatou taliaina” (Aoaoga a Peresitene o le Ekalesia: Iosefa Samita [2007], 209).

  • O le a sou manatu i le mea na e iloa e uiga ia Ieova lena semanu e taitaia oe e lagolago Lona valaauga ma le tofiga i le avea ai ma o tatou Faaola ma le Togiola?

Faaali atu le fuaitau lenei mai ia Elder Neal A. Maxwell (1926–2004) o le Korama a Aposetolo e Toasefululua. Ona tuu atu lea i tamaiti aoga ni nai minute e tusi ai soo se manatu ma lagona latou te maua e uiga i le Faaola a o latou mafaufau loloto i le meamoni mamana na aoao mai e Elder Maxwell:

Elder Neal A. Maxwell

“E lei ofoina atu lava e se isi se aofaiga maoae i ni tagata se toatele i ni upu e sili ona laiti e pei o le taimi na fetalai atu ai Iesu, “O Au lenei, auina atu au.” (Ape. 3:27.)” (“Jesus of Nazareth, Savior and King,” Ensign, May 1976, 26).

Mafaufau e fai atu i ni nai tamaiti e faasoa mai i le vasega mea na latou tusia.

O le tuuina o le Faaola i le totonugalemu o o tatou olaga faaletino

Faasino tamaiti i tua i le Aperaamo 3:25, lea tatou te aoao ai sa fuafuaina e Tama Faalelagi le olaga faaletino e avea ma se taimi o le suega, e vaai pe tatou te usiusitai i Ana poloaiga. Faaali atu le saunoaga lenei a Elder Robert D. Hales o le Korama a Aposetolo e Toasefululua: Fai atu i se tamaitiiti aoga e faitau leotele le saunoaga a o vaai le vasega mo se filifiliga e tatau ona tatou faia o se vaega o la tatou suega faaletino:

Elder Robert D. Hales

“Mafaufau i ai: i lo tatou muai setete sa tatou filifili e mulimuli i le Faaola o Iesu Keriso! Ona sa tatou usiusitai, sa faatagaina i tatou e o mai i le lalolagi. Ou te molimau atu o le faia o le filifiliga lava lea e mulimuli nei i le Faaola, a o tatou i ai i le lalolagi, o le a tatou maua ai se faamanuiaga sili atu i le faavavau. Ae ia iloaina lenei mea: e tatau ona tatou faaauau ona filifili e mulimuli i le Faaola. Ua i ai i se tulaga lamatia le faavavau, ma o a tatou amioga ma le faaaogaina ma le atamai o le faitalia e taua lea ina ia tatou maua ai le ola e faavavau” (“Faitalia: E Taua i le Fuafuaga o le Olaga,” Ensign po o le Liahona, Nov. 2010, 25).

Ina ia fesoasoani i tamaiti aoga ia iloa ma malamalama i se mataupu faavae po o se upumoni ua aoao mai e Elder Hales, fai atu fesili nei:

  • O le a se mea ua e aoao mai i le saunoaga a Elder Hales e uiga i filifiliga i lenei olaga? (A uma ona tali mai tamaiti aoga, molimau atu e ala i le filifili e tuu le Faaola i le totonugalemu o o tatou olaga a o tatou i ai i le lalolagi, o le a tatou maua ai faamanuiaga i le faavavau.)

  • O le a sou manatu i le uiga o le fuaitau a Elder Hales “ua tulaga lamatia le faavavau”?

  • O a nisi o uiga ma amioga ua faaalia ai o se tasi ua filifili e mulimuli ia Iesu Keriso? (Tusi tali a tamaiti aoga i le laupapa.)

Faamatala atu faapea o le toatele o i tatou, e faigofie le taulai atu i le Faaola i aso Sa. Ae faapefea ona tatou faia o Ia o se vaega e sili atu o o tatou olaga i le vaiaso? Tuu atu i tamaiti aoga le taimi e mafaufau loloto ai i mea na latou faia i le aso e taulai ai i le Faaola. Valaaulia i latou e tusi i lalo mea e mafai ona latou faia i le aso e tuu ai le Faaola ia sili atu le atoatoa i le totonugalemu o o tatou olaga. Uunaia i latou ia tautino le leoa atu i le Tama Faalelagi o le a latou faia.

Faaiu le lesona i le tuuina atu o le molimau i meamoni na aoaoina i le aso.

Faitauga a Tamaiti Aoga