Na folafola mai e le Perofeta o Iosefa Samita e uiga ia Iesu Keriso: “O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, mā te faia ia te ia: O loo soifua o ia!” (MF&F 76:22). O le faamoemoega o lenei lesona ia fesoasoani i tamaiti aoga ia malamalama o loo soifua le Faaola i le aso, o Ia o le Fautua i le Tama, ma e ala mai ia te Ia ona avea i tatou ma “atalii ma afafine na fanaua e le Atua” (MF&F 76:24; tagai foi i le Kalatia 3:26).
Faitau leotele le tala lenei i se aafiaga o Peresitene Lorenisio Senoa(1814–1901), e pei ona faamatalaina e le tama teine a lona afafine o Alice Pond:
Ata
Peresitene Lorenso Snow
“‘I totonu o le poletito tele e oo atu ai i le potu selesitila, sa ou muamua atu i nai laa i luma o tamāmatua, ina ua ia taofi a’u ma faapea mai: “Faatali mo sina taimi, Allie, e i ai se mea ou te fia ta’uina atu ia te oe. O i tonu lava na faaali mai ai le Alii o Iesu Keriso ia te au i le taimi o le maliu o Peresitene Woodruff. Sa Ia faatonuina au ou te alu atu faavave ma toe faatulaga le Au Peresitene Sili o le Ekalesia, ma aua le toe faatali e pei ona sa faia ina ua mae’a le maliliu o peresitene na muamua atu, ma ia ou suitulaga ia Peresitene Woodruff.”
“‘Ona faalatalata mai lea o tamāmatua i sina laa, ma tuu mai lona lima agavale ma faapea mai: “Sa Ia tu tonu lava ii, pe tusa ma le tolu futu i luga a’e o le fola. Sa foliga mai pei sa Ia tu i luga o se ipu auro mafolafola malo.”
“‘Sa ta’u mai e tamāmatua ia te au, sa maeu le mamalu o le tino mai o le Faaola, ma faamatalaina Ona lima, vae, foliga vaaia ma ofu talaloa papae matagofie, o ia mea uma sa foliga o se mamalu e paepae ma susulu, ma sa faigata ai ona ia pulato’a atu ia te Ia.
“‘Ona ia toe laa teisi mai lea ma tuu lona lima taumatau i luga o lou ulu ma fai mai: “Ia, si ou afafine, ou te manao ia te oe ia manatua o le molimau lenei a lou tamamatua, lea ua ia tau atu ia te oe i ona lava laugutu e faapea sa ia vaai tino i le Faaola, iinei i le Malumalu, ma talanoa faafesagai ma Ia”’ [Alice Pond, i le LeRoi C. Snow, “An Experience of My Father’s,” Improvement Era, Set. 1933, 677]” (Aoaoga a Peresitene o le Ekalesia: Lorenzo Snow [2012], 238–39).
O a ni ou manatu a o e faalogo i lenei tala?
Tau i tamaiti aoga o le Mataupu Faavae ma Feagaiga o loo i ai ni tala se lua i le oo mai o le Faaola i tagata i aso e gata ai: o se tasi o Ona oo mai ia Iosefa Samita ma Sini Rikitone i Hiram, Ohio (tagai i le MF&F 76), o le isi Ona oo mai ia Iosefa Samita ma Oliva Kaotui i le Malumalu i Katelani (tagai i le MF&F 110). Tusi fesili nei e tolu i luga o le laupapa:
O le a le mea na latou vaaia? O le a le mea na latou faalogoina? O le a le mea na latou aoaoina?
Valaaulia le vasega e vaai mo tali i nei fesili i tusitusiga paia. Tofi le afa o le vasega e faitau le Mataio 76:19–24 ma le isi afa e faitau le Mataupu Faavae ma Feagaiga 110:1–4. A uma se taimi talafeagai, fai i le vasega e faasoa mai mea na latou maua. Tusi mea na latou maua i le laupapa i lalo o fesili talafeagai. Ona fesili atu lea:
O a ni mea o loo aoao mai e nei mau e uiga ia Iesu Keriso? (E mafai e tamaiti aoga ona faailoa mai ni aoaoga faavae eseese, e aofia ai nei: O Iesu Keriso o se tagata soifua, faamamaluina; o lo tatou Tama Faalelagi ma Iesu Keriso o ni peresona mavaevae; e ala mai le faatuatua ia Iesu Keriso ma le taliaina o Lana talalelei, e avea ai i tatou ma atalii ma afafine o le Atua; ma o Iesu Keriso o lo tatou Fautua i le Tama.)
Tuu atu i tamaiti aoga se avanoa e faasoa mai ai a latou molimau o nei aoaoga faavae e ala i le fai atu o fesili nei:
O fea o nei upumoni e faapitoa le taua ia te oe? Aisea?
Tau atu i tamaiti aoga o le vaega o totoe o le lesona o le a taulai atu i aoaoga faavae e lua o loo maua i fuaitau na latou faitauina: “O Iesu Keriso o lo tatou Fautua i le Tama” ma “E ala mai i le faatuatua ia Iesu Keriso ma le taliaina o Lana talalelei, e avea ai i tatou ma atalii ma afafine o le Atua.”
Tusi le upu fautua i le laupapa ma fesili i tamaiti aoga po o le a lona uiga. (Afai e manaomia, faamatala atu o le fautua e faatatau i se tagata e tautala atu e lagolago pe talosaga mo se isi tagata.) Valaaulia tamaiti aoga e faitau le leoa le Mataupu Faavae ma Feagaiga 110:4. Ona fesili atu lea:
E faapefea ona auauna atu le Faaola o se fautua? (A o faasoa mai e tamaiti aoga o latou lagona, vaai mo avanoa e molimau atu ai o Iesu Keriso o lo tatou Fautua i le Tama.)
Faaali atu fesili nei, pe tusi i latou i le laupapa:
O a mea e agavaa ai Iesu Keriso e avea ma o tatou Fautua?
O le a le mea e faatosina atu i ai e Iesu le finagalo o le Tama a o Ia augani atu mo i tatou?
Fai i tamaiti aoga e galulue i paga ma sue tali i nei fesili i le Eperu 4:15; Mataupu Faavae ma Feagaiga29:5; 38:4; ma le 45:3–5. A uma ona faitau e tamaiti aoga fuaitau ma talanoaina fesili i le laupapa, valaaulia nisi e ofo mai e faasoa mai a latou tali i le vasega.
A o faamatala mai e tamaiti aoga mea na latou aoaoina, ia mautinoa ua latou malamalama i le mea lenei: E agavaa Iesu Keriso e talosaga atu mo i tatou i luma o le Tama aua o Ia e atoatoa le amiotonu ma e mafai ai ona faamalieina mea e manaomia o le faamasinoga tonu mo a tatou agasala. E agavaa o Ia e talosaga mo i tatou aua o Ona agavaa, Lona soifua atoatoa, ma Lona toto, lea na Ia faamaligiina mo i tatou. E leai ni o tatou agavaa e faatagaina i tatou e talosaga mo i tatou lava (tagai i le Alema 22:14).
Valaaulia se tamaitiiti aoga e faitau leotele le Mataupu Faavae ma Feagaiga 45:3–5 a o mulimuli i le faitauga le vasega. Faamatala atu faapea o le galuega ma le mamalu a le Tama Faalelagi o le faaeaina o Ana fanau. O le mea lea, a o fautua Iesu mo i latou e talitonu ia te Ia, e fesoasoani o Ia e faataunuu le galuega a le Tama a o tuuina atu foi le mamalu i le Tama (tagai foi i le Mataio 10:32).
Ina ia fesoasoani i tamaiti aoga ia malamalama i le galuega a Iesu Keriso o se Fautua, valaaulia i latou e faitau upu a Senosa i le Alema 33:3–10. Fai ia i latou e faailoa mai fuaitau na toe faia e Senosa (fesuiaiga o le “ua e alofa mutimutivale tele mai” ma le “sa e faafofoga mai ia te au”). Ona fesili atu lea:
O le a le mea na aoao e Senosa e uiga i le Atua e ala mai i ona aafiaga i le tatalo faamaoni?
Valaaulia se tamaitiiti aoga e faitau leotele le Alema 33:11. Ona fesili lea i le vasega:
O ai na tuuina atu i ai e Senosa le faafetai mo le alofa mutimutivale agalelei o le Tama?
Aisea e liliuese ai e le Atua Ana faamasinoga mai ia i tatou?
E mafai faapefea e aoaoga a Senosa ona fesoasoani ia te oe ia malamalama atili ai ma faafetaia le matafaioi a le Faaola o se Fautua i lou lava olaga?
Faaali atu le saunoaga lenei a Elder D. Todd Christofferson o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder D. Todd Christofferson
“E taua tele lena mea ia te au, i le mafai e au i soo se taimi ma i soo se tulaga, ona faalatalata atu i le nofoalii o le alofa tunoa e ala i le tatalo, ma o le a faafofoga mai lo’u Tama Faalelagi i la’u olega, ma o lo’u Fautua, o lē ua aunoa ma se agasala, o le na faamasaaina lona toto, o le a Ia aioi atu mo au. (Tagai i le MF&F 45:3–5.)” (“Ou te Iloa Le Ou Te Faalagolago I Ai,”Liahona, Iulai 1993, 83).
Fai i se tamaitiiti aoga e faamatala mai i ana lava upu le mataupu faavae na aoaoina e Elder Christofferson. Ona fesili atu lea:
E mafai faapefea e le mauaina o se molimau patino o lenei aoaoga ona fesoasoani ia te oe i taimi faigata?
E ala mai i le faatuatua ia Iesu Keriso ma le taliaina o Lana talalelei, e avea ai i tatou ma atalii ma afafine o le Atua na fanaua
Valaaulia se tamaitiiti aoga e faitau leotele le Mataupu Faavae ma Feagaiga 76:24, ma valaaulia le vasega e mulimuli i le faitauga. Faasino atu upu “e mai ia te ia, ma e ala mai ia te ia, ma o ia … [o i tatou] o atalii ma afafine o le Atua na fanaua.”
Fesili atu i tamaiti aoga:
O le a le uiga o le avea ma “atalii ma afafine o le Atua na fanaua”? (MF&F 76:24; tagai foi i le MF&F 25:1).
Ia mautinoa ua malamalama tamaiti aoga e ui lava o i tatou uma lava o fanau agaga a le Tama Faalelagi, o le faaupuga “atalii ma afafine o le Atua na fanaua” e faapitoa lava le faatatau ia i latou ua “toe fanauina.” Tau atu i tamaiti aoga o loo faaalia mai e le Tusi a Mamona le faagasologa o le toe fanauina.
Faaali atu le siata lenei pe kopi i le laupapa (aua le faaaofia ai tusiga o loo i puipui):
O a mea na naunau le nuu o Peniamina e fai?
O a taunuuga o a latou gaoioiga?
(Ulu atu i se feagaiga e usiusitai i poloaiga uma a le Atua)
(Tauave i o latou luga le suafa o Keriso)
(Faatinoina le faatuatua ia Keriso)
(Na suia o latou loto)
(Na fanauina i latou ia Keriso)
(Na avea Keriso ma o latou Tama o le feagaiga)
Otooto faapuupuu le savali a le Tupu o Peniamina i le Mosaea 2–4. Ona faamatala atu lea o upu a le Tupu o Peniamina na i ai se aafiaga maoae i lona nuu, ma o le Agaga o le Alii na faia se “liuga tele” i o latou loto (tagai i le Mosaea 5:2). Valaaulia tamaiti aoga e suesue leMosaea 5:2–8, 15 taitoalua, ma vaai mo tali i fesili i le siata. A maea se taimi talafeagai, fai i tamaiti aoga e faasoa mai mea na latou maua. Ona fesili atu lea:
E tusa ai ma mea na e aoaoina e uiga i le nuu o le Tupu o Peniamina, e faapefea ona avea oe ma atalii po o se afafine o le Atua ua fanaua? (E tatau i tamaiti aoga ona faaleo mai le mataupu faavae lenei: A o tatou taliaina Iesu Keriso ma faia ma tausia feagaiga e usiusitai i poloaiga a le Atua, e avea i tatou ma atalii ma afafine o Keriso na fanaua.)
A o talanoaina e tamaiti aoga nei fuaiupu, atonu latou te manaomia le fesoasoani e malamalama ai i le aoaoga faavae faapea e avea i tatou ma fanau a Keriso. Faitau leotele le faamatalaga lenei a Peresitene Iosefa Filitia Samita (1876–1972):
Ata
Peresitene Iosefa Filitia Samita
“E avea le Faaola ma lo tatou Tama … aua ua ia ofoina mai ia i tatou le ola, ola faavavau, e ala mai i le togiola na ia faia mo i tatou. …
“… E avea i tatou ma fanau, atalii ma afafine o Iesu Keriso, e ala mai ia tatou feagaiga o le usiusitai ia te ia” (Doctrines of Salvation, comp. Bruce R. McConkie, 3 vol. [1954–56], 1:29).
E tusa ai ma le Mosaea 5:15, o a faamanuiaga tatou te maua i le avea ai ma atalii ma afafine o Iesu Keriso?
O a ou manatu ma lagona i le avea ai ma atalii po o afafine o Iesu Keriso?
A o e faaiuina le lesona, uunaia tamaiti aoga e mafaufau loloto i le ala ua faamanuiaina ai o latou olaga i le iloaina o loo soifua le Faaola, o loo Ia auauna o lo tatou Fautua i le Tama, ma e mafai ona avea i tatou ma atalii ma afafine o le feagaiga a Keriso.