Lesona 18

Na Auauna Atu le Faaola i le Lalolagi o Agaga

Folasaga

I le taua ai o le Faaola, ua molimau mai Aposetolo o aso nei: “O Lana [taulaga] o se meaalofa sili foaifua mo i latou uma e soifua mai i luga o le fogaeleele”( “O le Keriso Soifua: O le Molimau a le Au Aposetolo,” Ensign po o le Liahona, Ape. 2000, 2). Ona o le taulaga togiola a le Faaola ma Lana galuega i le lalolagi o agaga, o fanau uma a le Atua o i latou uma na soifua i le lalolagi o le a maua le avanoa e talia ai pe teena le talalelei. I lenei lesona, o le a aoao tamaiti aoga e uiga i le matafaioi a le Faaola i le lalolagi o agaga ma la tatou matafaioi i le faaolaina o e ua maliliu.

Faitauga Faaopoopo

Spencer J. Condie, “O le Asiasiga a le Faaola i le Lalolagi o Agaga,” Liahona, Iulai 2003, 26–30.
Richard G. Scott, “O Le Olioli i le Faaolaina o E Ua Maliliu,”Ensign po o le Liahona, Nov. 2012, 93–95.

Fautuaga mo le Aoaoina Atu

Luka 23:39–43; Mataupu Faavae ma Feagaiga 138:11–24

Na asiasi atu Iesu Keriso i le lalolagi o agaga

Mafaufau e faaali atu ata o le Lagomau o Iesu(Tusi Ata o le Talalelei [2009], nu. 58; tagai foi i le LDS.org) ma Maria ma Iesu Keriso Toetu (Tusi Ata o le Talalelei, nu. 59).

Valaaulia se tamaitiiti aoga e faitau leotele le faamatalaga lenei a Elder Spencer J. Condie o le Fitugafulu:

“O mea moni e uiga i le Maliu ma le Toetu o Iesu o loo taliaina e faatuatuaga Kerisiano o ni talitonuga faavae. Ae ui i lea, o le mea na faia e le agaga o Iesu ina ua maea Lona maliu ma a o lei toetu mai, o se mea lilo i tagata uma sei vagana ai le Au Paia o Aso e Gata Ai. Ma o le taua o le mea sa Ia faia i na itula, ua maua ai le faamoemoega autu mo le fausiaina o malumalu i le lalolagi atoa. E le gata i lea, o se molimau i le mea sa Ia faia e mafai ona faamafanafanaina ai i latou o e faanoanoa i le maliu o se tasi e pele” (“O le Asiasiga a le Faaola i le Lalolagi o Agaga,” Liahona, Iulai 2003, 26-30).

Vaai i ata ma fesili atu i le vasega:

O le a le mea na faia e Iesu i le va o Lona lagomau ma Lona Toetu?

Ina ia saunia se talaaga, valaaulia tamaiti aoga e faitau le Luka 23:39–43.

O le a le fetalaiga a le Faaola i le pagota i luga o le satauro? (Faasino atu faapea o le Perofeta o Iosefa Samita na aoaoina faapea o le uiga e sili atu ona sao o upu a le Faaola o le, “O le aso e te faatasi ai ma au i le lalolagi o agaga” [i le History of the Church, 5:424–25]. O upu a le Faaola i le pagota ua sese ona faauigaina e le toatele o Kerisiano faapea e mafai e se tagata ona salamo i agasala matuia i le taimi mulimuli lava o lona soifua. Ae ui i lea, ua aoao mai tusitusiga paia e le tatau ona tatou faatuai lo tatou salamo.)
E faapefea e nei upu ona faaataata mai ai le gaoioiga a le Faaola na fai a o i ai Lona tino i le tuugamau? (Tagai foi i le1 Peteru 4:6.

Tau i tamaiti aoga na maua e Peresitene Iosefa F. Samita se faaaliga na faamatalaina ai le asiasiga a Iesu Keriso i le lalolagi o agaga. Ina ia fesoasoani i tamaiti aoga ia malamalama i le tusiga o lenei faaaliga, otooto le vaega o le folasaga ma fuaiupu muamua e 10 o le Mataupu Faavae ma Feagaiga 138. Ona fai lea i ni nai tamaiti aoga e feauauai i le faitauina leotele o le Mataupu Faavae ma Feagaiga 138:11–12, 15–16, 18–19, 23–24. Talanoaina fesili nei:

E tusa ai ma lenei faaaliga, o le a le mea na fai e le Faaola i le va o Lona lagomau ma le Toetu? (E tatau i tamaiti aoga ona faaleo mai faapea A o i ai Lona tino i le tuugamau, na asiasi atu Iesu i agaga amiotonu i le lalolagi o agaga.)
Aisea na faatumuina ai nei agaga amiotonu i le olioli ma le fiafia? (A o tali mai tamaiti aoga, faamamafa atu le upumoni lenei: E tusa ai ma le fuafuaga a le Atua, o e ua oti ae na faamaoni i le olaga faitino e mafai ona faaolaina mai le oti pe a mavae le Toetu o Iesu Keriso. Atonu e te manao e faailoa atu sa leai ni faifeautalai na auina atu e talai ia i latou i le lalolagi o agaga seia mavae le maliu ma le Toetu o le Faaola [tagai i le Luka 16:19–31; Mose 7:36–39].)

Mataupu Faavae ma Feagaiga 138:20–37

O fanau uma a le Atua o le a maua le avanoa e faalogo ai i le talalelei

Valaaulia tamaiti aoga e faitau le leoa le Mataupu Faavae ma Feagaiga 138:20–21, 25–28 ma faailoa mai le fesili na mafaufau loloto i ai Peresitene Samita. (Manatua: Ina ia fesoasoani i tamaiti aoga e iloa le taua o le faia o fesili lelei ma saili tali a o latou suesue i tusitusiga paia, faasino atu o le tele o faaaliga ua faamaumauina i tusitusiga paia na tuuina mai o se taunuuga o se fesili faamaoni.) A uma ona tali mai tamaiti aoga, fai i ai e faitau le Mataupu Faavae ma Feagaiga138:29–30, ma vaai pe faapefea ona faalogo agaga i le falepuipui i le talalelei. Fesili atu:

O le a le mea na fai e le Faaola i e amiotonu a o asiasi atu i le lalolagi o agaga? (Ia mautinoa ua faailoa mai e tamaiti aoga le upumoni lenei: A o i ai i le lalolagi o agaga, na faatulaga e Iesu le galuega o le faaolataga mo e ua maliliu.

Faatulaga tamaiti aoga i paga. Fai ia i latou e suesue le Mataupu Faavae ma Feagaiga 138:30–37 ma talanoaina le taua o le upu uma e pei ona faaaogaina i fuaiupu 30, 31, ma le 37. A maea se taimi talafeagai, fesili atu:

O le a le faamoemoega o le galuega a le Faaola i le lalolagi o agaga? (E tatau i tamaiti aoga ona mafai ona faaupu le upumoni lenei: Na saunia e le Faaola se auala mo fanau uma a le Atua e faalogo ai i le talalelei ma maua se atoatoaga o le olioli.)
Aisea e manaomia ai ona talaiina atu le talalelei i fanau uma a le Atua? (Tagai i le MF&F 138:33-34; 1 Peteru 3:18–20.)
O le a le mea ua aoaoina ai i tatou e lenei mea e uiga i aafiaga o le galuega togiola a Iesu Keriso? (O aafiaga o le Togiola e oo atu i le lalolagi o agaga.)

Mafaufau e faasoa atu le faamatalaga lenei a Peresitene Iosefa Filitia Samita(1876–1972):

“[Ae] faapefea le fia afe o e na maliliu ae lei faalogo lava ia Keriso, e lei maua lava se avanoa e salamo ma maua ai le faamagaloga o a latou agasala, e lei feiloai lava i se faifeautalai o le Ekalesia o loo umia le pule? O nisi o o tatou tuaoi Kerisiano o le a faapea mai ia te oe ua leiloloa i latou e faavavau. …

“Pe o le a fetaui ea lena mea? Pe o le a amiotonu ea? Leai! O le a tuu atu e le Alii i tagata uma le avanoa e faalogo ai ma maua le ola faavavau, po o se nofoaga i lona malo” (Doctrines of Salvation, tuuf. Bruce R. McConkie, 3 vol. [1954–56], 2:132).

Aisea e taua ai nei upumoni e uiga i le lalolagi o agaga? O le a le eseesega e tulai mai pe a iloa e se tagata nei upumoni e uiga i le lalolagi o agaga?
E faapefea ona faamafanafanaina oe e le malamalama i le galuega a le Faaola i le lalolagi o agaga?

E mafai ona tatou fesoasoani e saunia le faaolataga mo e ua maliliu

Saunia mo tamaiti aoga taitasi se kopi o auina faatasi atu o le pepa e tufa atu, “Galuega o Aso e Gata ai mo e ua maliliu.” Vaevae tamaiti aoga i ni vaega toalaiti po o paga. Valaaulia i latou e faitau fuaitau i pepa e tufa atu, ma vaai ma talanoaina faamanuiaga ua folafolaina ia i latou e auai i le galuega o le faaolaina o e ua maliliu.

A maea se taimi talafeagai, fai atu fesili nei:

E faapefea ona fesoasoani lo tatou auai i le malumalu ma galuega o talafaasolopito o aiga ia i latou ua maliliu ina ia maua faamanuiaga e oo mai ona o le taulaga togiola a Iesu Keriso?
E faapefea e sauniga sui mo e ua maliliu ona fesoasoani ia i tatou ia sili atu ona avea e pei o le Faaola? (A o tali mai tamaiti aoga, faamamafa atu le mataupu faavae lenei: A o tatou auai i sauniga o le malumalu mo o tatou aiga ua maliliu, ua tatou fesoasoani e saunia lo latou faaolataga ma ua faamalolosia ai i tatou e faasaga i le fili.)

Mafaufau e faasoa atu le faamatalaga lenei a Peresitene Gordon B. Hinckley (1910–2008) i le ala e tutusa ai le galuega sui mo e ua maliliu ma le galuega faaola a le Faaola:

“O mea e fai i totonu o le Maota o le Alii, … e sili ona latalata atu i le agaga o le taulaga a le Alii nai lo o se isi lava mea ua ou iloa. Aisea? Ona e fai e i latou e ofo fua mai le taimi ma meatotino, e aunoa ma se faamoemoe mo ni faafetai po o se taui, e faia mo isi e le mafai ona faia mo i latou lava” (“A Century of Family History Service,” Ensign, Mat. 1995, 62–63; tagai foi i le Opetaia 1:21).

Toe faasino tamaiti aoga i fuaitau i le pepa e tufa atu, ma fesili atu:

O anafea na e vaaia ai pe na lagona ai faamanuiaga na folafolaina ia i latou e auai i le galuega o le faaolaina o e ua maliliu?

Valaaulia tamaiti aoga e mafaufau loloto i fesili nei:

O fea o nei folafolaga e te manao ia e maua i lou olaga i le taimi nei lava, ma o le a le mea ua e tautino atu e fai ina ia maua ai?

Ia luitauina tamaiti aoga e feiloai i le fautua o talafaasolopito o aiga a le uarota ma aoao atili e uiga i le ala e fai ai galuega mo o latou tuaa ua maliliu. Faitau leotele le Mataupu Faavae ma Feagaiga 128:22 ma molimau atu i le galuega faavavau a Iesu Keriso ma le galuega paia mo e ua maliliu lena na faauuina a o lei faavaeina le lalolagi.

Faitauga a Tamaiti o le Vasega

Luka 23:39–43; 1 Peteru 3:18–20; 4:6; Mataupu Faavae ma Feagaiga 128:15, 22; 138:1–37.
Spencer J. Condie, “O le Asiasiga a le Faaola i le Lalolagi o Agaga,” Liahona, Iulai 2003, 26–30.

Galuega o Aso e Gata ai Mo e ua Maliliu

Na aoao mai e Elder John A. Widtsoe (1872–1952) o le Korama a Aposetolo e Toasefululua le mea lenei e faatatau i la tatou misiona muaifaauuina e fesoasoani e faaolaina ai atalii ma afafine o le Atua:

“I le nofoaga sa tatou i ai ae tatou te le’i o mai i le olaga nei, i le taimi o le fono tele i le lagi, sa tatou faia ai se maliliega ma le Silisili ese. Na tuuina mai ai e le Alii se fuafuaga na ia fuafuaina. Sa tatou taliaina! Ona o le fuafuaga e faasino tonu mo tagata uma, o lea na avea ai i tatou ma tagata e aafia i le faaolataga o tagata uma i lalo o le fuafuaga. Na tatou malilie ai iina i le avea o i tatou e le gata o faaola mo i tatou lava, ae … avea fo’i ma faaola mo le aiga tagata atoa. Na tatou faia ni auala faapaaga ma le Alii. O le faatinoina o le fuafuaga ua le gata e na o le galuega a le Tama ma le Faaola, ae ua avea fo’i ma a tatou galuega. O le aupito i laitiiti o i tatou, e sili ona lotomaualalo, ua faipaaga ma le Silisiliese i le faataunuuina o le faamoemoe o le fuafuaga faavavau (“The Worth of Souls,” Utah Genealogical and Historical Magazine, Oke. 1934, 189)” (i le Mataupu Faavae ma Feagaiga ma le Talafaasolopito o le Ekalesia: Tusi Lesona o Aoaoga Faavae o le Talalelei [1999], 173).

Na uunaia e Elder Richard G. Scott le autalavou o le Ekalesia e fai galuega o le malumalu mo o latou lava tuaa:

“Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona [e] maua ai faamanuiaga sili atu. …

“Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i lou olaga? Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. … E leai se isi puipuiga sili atu mai faatosinaga a le fili i lou olaga e mafai ona ou mafaufau i ai” (“O le Olioli i le Faaolaina o i Latou ua Maliliu,” Ensign po o le Liahona, Nov. 2012, 93–94).

Na faamatala e Elder David A. Bednar o le Korama a Aposetolo e Toasefululua le valaaulia ma le folafolaga lenei:

“Ou te valaau atu i tupulaga talavou o le Ekalesia ina ia aoao ma ia iloa le Agaga o Elia. Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu (tagai MF&F 124:28–36). Ma ou te uunaia outou ia fesoasoani atu i isi tagata ia iloa talafaasolopito o o latou aiga.

“A outou tali atu ma le faatuatua i lenei valaaulia, o le a liliu atu o outou loto i tamā. O folafolaga na faia ia Aperaamo, Isaako, ma Iakopo o le a totoina i o outou loto. O lou faamanuiaga faapeteriaka, faatasi ai ma le tautinoga mai o lou gafa, o le a faafesootaia oe i nei tamā ma o le a ‘anoa atili ai ia te oe. O le a faateleina lou alofa ma lou lotofaafetai mo ou augatama. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai uunaiga faateleina a le tiapolo. A o outou auai i le faatinoga ma outou fiafia i lenei galuega paia, o le a malupuipuia outou i lo outou talavou ma i o outou olaga” (“O le a Liliu Atu Loto o Fanau i o Latou Tama,” Ensign po o le Liahona, Nov. 2011, 26–27).