Lesona 28

O Se Molimau Patino ia Iesu Keriso

Folasaga

O le Au Peresitene Sili ma le Korama a le Au Aposetolo e Toasefululua na folafola mai: “Matou te molimau atu, i le avea ai ma Ana Aposetolo faauuina—o Iesu o le Keriso Soifua, le Alo tino ola pea o le Atua” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3). I le aluga o lenei kosi, ua tatou aoaoina le galuega faavavau a Iesu Keriso ma molimau a perofeta e uiga ia te Ia. A o tatou mauaina se molimau patino e ala i le Agaga Paia e faapea o Iesu o le Keriso Soifua, ua tatou saunia e faasoa atu a tatou lava molimau o le Faaola faatasi ma isi.

Faitauga Faaopoopo

D. Todd Christofferson, “Avea o se Molimau a Keriso,” Liahona, Mat. 2008, 58–63.

Fautuaga mo le Aoaoina Atu

2 Nifae 25:26; Mosaea 18:8–11

Tu Atu o se Molimau a Keriso

Fesili i tamaiti aoga pe i ai se tasi na i ai i se tulaga faapea ua na o i latou o ni tagata o le Ekalesia pe na o le pau lea o le tagata sa naunau e avea ma sui o tulaga faatonuina o le Ekalesia. Valaaulia i latou e tali mai i fesili nei:

O le a sou lagona ina ua e tali atu i lena tulaga i le avea ai o se soo o Iesu Keriso?
O a nisi o tulaga aoga pe faigata o lou aafiaga?

Faamanatu i tamaiti aoga le tala i le Tusi a Mamona ia Alema, lea sa liua i aoaoga a le perofeta o Apinati. Ina ua mavae lona liua, na amata loa e Alema ona talai atu foi le talalelei. I le Mosaea 18, e mafai ona tatou faitau ai i ana aoaoga e uiga i le feagaiga o le papatisoga. Fai i se tamaitiiti aoga e faitau leotele le Mosaea 18:8–11. Valaaulia tamaiti aoga e mulimuli i le faitauga ma faailoa mai uiga faaalia ma gaoioiga e faailoa ai o se tagata ua saunia e faia ma tausia le feagaiga o le papatisoga. A uma ona tali mai tamaiti aoga, faasino atu le fuaitau “tutu o ni molimau a le Atua i taimi uma ma i mea uma, ma i nofoaga uma” i le fuaiupu 9. Ona fesili atu lea:

O le a le uiga o le tu atu e avea ma molimau a le Atua le Tama ma Iesu Keriso “i taimi uma ma i mea uma, ma i nofoaga uma”? (Mosaea 18:9).

Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma fai i se tamaitiiti aoga e faitau leotele:

“Ua i aposetolo le valaauga ma le faauuga e avea ma molimau faapitoa o le suafa o Keriso i le lalolagi atoa (tagai i le MF&F 107:23), ae o le tiute e molimau ma tautino atu e uiga ia Keriso i taimi uma, ma mea uma, e a tagata uma o le Ekalesia o e ua maua le molimau a le Agaga” (“Molimau o Keriso,” Liahona, Ian. 1991, 31).

E tusa ai ma le saunoaga a Elder Oaks, o ai o loo i ai le tiutetauave e fai ma molimau a Iesu Keriso? (Ia mautinoa ua iloa e tamaiti aoga le upumoni lenei:Ua osi feagaiga uma tagata o le Ekalesia e tutu atu o ni molimau a le Tama Faalelagi ma Iesu Keriso.)
E ese mai le faaleoina o o tatou talitonuga ma molimau, o a nisi auala e mafai ona tatou tutu ai o se molimau a Keriso? (Ina ia fesoasoani i tamaiti aoga e tali lenei fesili, mafaufau e valaaulia i latou e suesue le Mataio 5:14–16 ma le 3 Nifae 18:24.)

Faaali atu le saunoaga lenei a Elder D. Todd Christofferson o le Korama a Aposetolo e Toasefululua, ma fai i se tamaitiiti aoga e faitau leotele:

“I Lana misiona i le itulagi i Sisifo, na tuuina atu ai e le Faaola le poloaiga lenei: ‘Ia outou sii i luga lo outou malamalama ina ia pupula atu ai i le lalolagi. Faauta, o A’u o le malamalama tou te sii i luga—o mea ua ou fai ua outou vaai i ai’ (3 Nifae 18:24). E tatau ona vaaia e tagata ia i tatou se vaega o Iesu Keriso. O a tatou amio, tautala, vaai, e oo lava i manatu ia atagia mai ai o Ia, ma ona ala” (“Avea o se Molimau o Keriso,” Ensign po o le Liahona, Mat. 2008, 60).

E faapefea ona e vaai i amio, tautatala, po o foliga o isi o faaalia ai lo latou talitonuga ia Iesu Keriso?
E faapefea ona e fautuaina se tasi e manumalo i le musu po o le fefe e avea ma se molimau ia Iesu Keriso?

Tusi ia fuaitau nei i luga o le laupapa:

Tautalatala e uiga ia Keriso

Olioli ia Keriso

Talai atu Keriso

Vavalo ia Keriso

Tusitusi ia Keriso

Valaaulia tamaiti aoga e faitau le leoa le 2 Nifae 25:26, ma fai ia i latou e faamatala mai pe faapefea e se tagata ona faasoa atu a latou molimau ia Iesu Keriso i auala ua otootoina atu i le laupapa. Ina ia fesoasoani i le talanoaga a le vasega, faaaoga le saunoaga lenei a Elder D. Todd Christofferson pe a manaomia:

“I le fasi fuaitau a Nifae ‘ua matou tautalatala ia Keriso[2 Nifae 25:26] ua ta’u mai ai e le tatau ona faatuai ona tatou talanoa atu i o tatou lagona e faatatau i le Faaola i talanoaga ma fetufaaiga faasamasamanoa. E masani lava o tulaga tasi-i-le-tasi, lea e fefaasoaai ai faauo, tatou te talanoaina ai pe o ai o Ia ma pe o a mea sa Ia fai ma a’oa’o atu, ma faamalosi atu i isi ia alolofa ma ia mulimuli ia te Ia.

“‘Ua matou olioli ia Keriso,’ e ta’u mai ai o loo tatou ola i se vaaiga lautele i uiga e atagia ai lo tatou faatuatua ia Keriso. Ua tatou iloa ua ‘lava lona alofa tunoa’ mo i tatou e faaolaina ai mai le oti ma le agasala, ma faaatoatoaina ia te Ia (tagai Moronae 10:32–33). E ui ina tatou feagai ma tulaga le faamalieina ma puapuaga matautia, ua tatou iloa ona o Ia, ua mautinoa ai lo tatou fiafia faavavau. A’o susulu atu lo tatou faatuatua ia Iesu Keriso, ua tatou faaali atu i isi o e o ‘puapuagatia ma mafatia i avega’ le ala e maua ai le mapusaga ia te Ia (tagai Mataio 11:28–30).

“‘Ua matou talai atu Keriso’ e faatatau tonu ia i latou o loo galulue faamisiona mo le taimi atoa, ae e aofia ai foi mea o loo tatou fai i a tatou sauniga tapuai, vasega o le Aoga Sa, atoa ma soo se nofoaga faapea, o loo avea ai o Ia ma mataupu autu i suesuega ma aoaoga. O lo tatou auai o ni faiaoga pe o tamaiti aoga, o se vaega o le tuuina atu o la tatou molimau ia te Ia. …

“‘Ua matou vavalo atu ia Keriso,’ o lona uiga ua tatou faaali atu a tatou molimau ia te Ia, e ala i le mana o le Agaga (tagai i le 1 Korinito 12:3). ‘O le agaga o le valoaga o le mau lea ia Iesu’ (Faaaliga 19:10). E pei ona vavalo mai i latou anamuā i Lona uluai afio mai, ua faapena foi ona tatou faamaonia i upu ma mea e fai, valoaga o Lona Afio Mai Faalua. …

“‘Ma ua matou tusitusi e tusa ma a matou valoaga’ e ta’u mai ai le faautauta i le faia o faamaumauga mausali o a tatou molimau ia Keriso. Ua tatou malamalama o molimau tatou te tuuina atu, ‘ua tusia i le lagi ina ia vaavaai i ai agelu; o loo olioli foi i latou ona o [i tatou]’ (MF&F 62:3). E mafai ona vaavaai mai o tatou tuaa ma isi, ma olioli ona o a outou molimau ia Keriso ua tusitusia ma faamaumauina mo lo latou foi iloa” (“Avea o se Molimau a Keriso,” Liahona, Mat. 2008, 62–63).

A o e faaiuina lenei vaega o le lesona, uunaia tamaiti aoga e mafaufau i se tasi o vaega i le laupapa ma faatuina se sini i le mea o le a latou faia ina ia avea ma molimau e sili atu le malosi ia Iesu Keriso.

Molimau e uiga ia Iesu Keriso

Fai i tamaiti aoga e toe mafaufau i le kosi o le kuata ma faailoa mai nisi o matafaioi a Iesu Keriso ma nisi o autu na faatatau ia te Ia na talanoaina i le vasega. Otooto tali a tamaiti aoga i luga o le laupapa. (O matafaioi e mafai ona aofia ai le Puluvaga, Faaola, Togiola e Toatasi, Ulumatua, Le Alo Pele e Toatasi, Ieova, Mesia, Foafoa. O autu e mafai ona aofia ai mea nei: o le totonugalemu o Iesu Keriso i le fuafuaga a le Atua; Lana galuega i le muai olaga; o le mea moni o loo soifua o Ia; Lana galuega ina ua mavae le oti; le Afio Mai Faalua; Lona nofotupu i le Meleniuma; le Toefuataiina o Lana talalelei; Lana taitaiga o le Ekalesia; ma auala na avea ai o Ia ma Malamalama ma le Ola o le Lalolagi.)

Sii mai ma faaali atu le vitio o le saunoaga lenei a Peresitene Gordon B. Hinckley (1910–2008), lea na ia faasoa atu ai lana molimau ia Iesu Keriso. Afai e le maua le vitio i lau gagana, valaaulia se tamaitiiti aoga e faitau leotele le saunoaga lenei.

“O Iesu Keriso o la’u uo. E leai se tasi ua ia tuuina mai ia te au ni mea ua tele naua. ‘E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo’ (Ioane 15:13). Na Ia tuuina mai Lona soifua mo au. Na Ia tatalaina le ala i le ola faavavau. E na o se Atua lava e mafai ona faia lea mea. Ou te faamoemoe o loo o’u agavaa e avea ma uo ia te Ia.

“O Ia o lou faaaoao. O le ala na Ia soifua ai, o Ona uiga e matua le faapito lava, o Lona aapa atu i e le tagolima, ma Lana taulaga faaiu o se faataitaiga nei mea uma ia te au. …

“O Ia o lou faiaoga. E leai se isi leo ua saunoa i se ituaiga gagana ofoofogia. …

“O Ia o lou fomai. Ou te matua maofa lava i Ana vavega ofoofogia. …

“O Ia o lo’u taitai. Ua faamamaluina au i le avea ma se tasi o le solo umi a i latou o e alolofa ia te Ia, ma mulimuli ia te Ia i le lua afe tausaga ua mavae talu Lona soifua mai. …

“O Ia o lou Faaola ma lou Togiola. O le tuuina mai o Lona soifua i le tiga ma le puapuaga e aunoa ma se upu, na Ia aapa mai ai i lalo ma sii ae au, ma i tatou uma taitoatasi, ma atalii ma afafine uma o le Atua, mai le loloto le mafuatiaina o le pogisa e faavavau pe a mavae le oti. … E leai se tuaoi o lou agaga faafetai. E leai foi se faaiuga o lau faafetai i le Alii.

“O Ia o lou Atua ma lou Tupu. Mai le vavau e oo atu i le faavavau, o le a nofotupu o Ia ma pule o le Tupu o Tupu ma le Alii o Alii. E leai se iuga o Lona malo. E leai foi se po i Lona mamalu” (“O Lau Molimau,” Liahona, Iulai 2000, 82).

Tuu atu i au tamaiti aoga le vaaiga lenei: Afai e fesili atu se isi ia te oe pe o le a lou talitonuga ia Iesu Keriso, o a ni manatu se tolu pe fa e sili ona e manao e faamamafa atu? Tuu atu i tamaiti aoga se taimi e tusi ai o latou manatu. Ona valaaulia lea o tamaiti aoga e fai paga ma faasoa a latou tali i le isi. Uunaia i latou e talanoaina pe aisea na latou filifili ai mea na latou faia ma soo se aafiaga na latou oo i ai atonu na faamalosia ai lo latou malamalama i le alofa mo le Faaola. A uma se taimi talafeagai, fesili i tamaiti aoga pe i ai se tasi o i latou e manao e faasoa mai a latou molimau ia Iesu Keriso i le vasega.

Faaiu i le tuuina atu o lau lava molimau i le faavavau o le galuega a le Keriso Soifua. Mafaufau e faaleo atu lau faafetai mo le tele o matafaioi taua na faataunuuina e le Alii o Iesu Keriso i le taimi atoa. Ona tuu atu lea i tamaiti aoga le luitau lenei: A o e faaiuina lenei vasega, mafaufau loloto po o ai e te iloa o le a faamalosia e ala i le faalogo i lau molimau i le Faaola. I le faagasologa o le vaiaso a sau ma luma atu, filifili po o ai o le a e faatosinaina ma pe faapefea ona e faasoa atu lau molimau.

Faitauga a Tamaiti Aoga

Mataio 5:14–16; 2 Nifae25:26; Mosaea 18:8–11; 3 Nifae 18:24.
D. Todd Christofferson, “Avea ma se Molimau a Iesu Keriso,” Liahona, Mat. 2008, 58–63.