Lesona 10

Sau, Mulimuli Mai ia te A’u

Folasaga

Sa fetalai mai Iesu Keriso, “O a’u nei le ala, ma le upu moni, ma le ola” (Ioane 14:6). “O le auala [a Iesu] o le ala e taitai atu i le fiafia i lenei olaga ma le ola e faavavau i le lalolagi a sau”“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3). O lenei lesona e faamamafaina le valaaulia a Iesu Keriso i tagata uma e mulimuli ia te Ia ma avea ma Ona soo. O lenei lesona foi e iloiloina le uiga o le savali i le ala o le avea ma soo.

Faitauga Faaopoopo

Dieter F. Uchtdorf, “O Le Ala o le Soo,”Ensign po o le Liahona, Me. 2009, 75–78.
Joseph B. Wirthlin, “Mulimuli Mai ia te Au,” Liahona, Iulai 2002, 15–17.

Fautuaga mo le Aoaoina Atu

Ioane 1:35–47; 2 Nifae 26:33; Alema 5:33–34

Ua valaaulia e Iesu Keriso tagata uma e avea ma Ona soo

Valaaulia se tamaitiiti aoga e faasoa puupuu mai se taimi na ia malaga ai i se nofoaga ae na sese le auala na afe ai pe na alu i se auala sese. Ona valaaulia lea o tamaiti aoga e faitau le Ioane 14:6 ma faamatala ia latou lava upu le aoaoga faavae o loo aoaoina mai e Iesu i lenei fuaiupu. (Atonu e faaaoga e tamaiti aoga ni upu eseese, ae e tatau ona latou malamalama ua na o le pau lava le auala e mafai ai ona tatou toe foi atu i le afioaga o le Tama Faalelagi o le mulimuli lea ia Iesu Keriso.

Tau i tamaiti aoga ina ua uma ona papatisoina Iesu Keriso ma faaosoosoina i le vao, na Ia valaaulia isi e mulimuli ia te Ia. O i latou na mulimuli i le Faaola i na taimi ma le taimi nei e taua o soo. Valaaulia tamaiti aoga e faailoa mai i le Ioane 1:35–47 o igoa o nisi o soo muamua o le Faaola ma le mea na uunaia ai i latou e mulimuli ia te Ia.

Faaali atu le saunoaga lenei a Peresitene James E. Faust (1920–2007) o le Au Peresitene Sili, ma fai i se tamaitiiti aoga e faitau leotele:

“O le upu soo ma le upu puleaina e maua uma mai le upu Latina o loo faapogai mai le—discipulus; o lona uiga o le aoao. O loo faamamafa ai le faata’ita’i po o le faatino. O le pulea o le tagata lava ia ma le amio pulea e ogatasi, ma o ni uiga faifaipea o e mulimuli ia Iesu. …

“O le a le avea ma soo? O le usiusitai lea i le Faaola” (“Avea ma Soo,” Ensign po o le Liahona, Nov. 2006, 20).

O le a le mea ua tau mai e lenei faamatalaga o le avea ma soo e uiga i olaga o soo anamua o Iesu Keriso na i ai?

Valaaulia tamaiti aoga e faitau ma faatusatusa le 2 Nifae 26:33 ma le Alema 5:33–34 e vaai po o ai isi na valaaulia e Iesu e o mai ia te Ia. Ona talanoaina lea o fesili nei:

O a mea ua aoao mai e nei fuaitau e uiga i le valaaulia a le Faaola e o mai ia te Ia? (A uma ona tali mai tamaiti aoga, tusi le upumoni lenei i le laupapa: E valaaulia e Iesu Keriso tagata uma e o mai ia te Ia ma avea ma Ona soo.
E tusa ai ma le saunoaga a Alema, o le a le mea na folafola atu e le Faaola ia i latou e taliaina le valaaulia e o mai ia te Ia?
O le a le uiga o nei folafolaga ia te oe?

Mataio 4:18–22; Luka 5:11; 9:57–62; 14:25–33

Avea ma soo o Iesu Keriso

Vaevae tamaiti aoga i ni paga. Valaaulia i latou e suesue le Mataio 4:18–22 ma le Luka 5:11 ma faailoa mai ni osigataulaga na faia e nisi o soo anamua ina ia taliaina le valaaulia e mulimuli ia te Ia. Talanoaina fesili nei:

E faapefea ona e faamatalaina le tali a nei soo anamua i le poloaiga a le Faaola e mulimuli ia te Ia? (Talanoaina le uiga o upu ma fuaitau e pei o “ona la tuua loa lea o laua upega,” “tuua loa lea,” ma “tuu ai lea o mea uma.”
O a upumoni taua ua faaopoopo mai e nei fuaitau i le uiga o le avea ma soo o Iesu Keriso? (A uma ona tali mai tamaiti aoga, tusi le upumoni lenei i le laupapa: O le avea ma soo o Iesu Keriso e manaomia ai le usiusitai ma le ositaulaga.

Ia saunia ni kopi o le lauga lenei a Elder Joseph B. Wirthlin (1917–2008) o le Korama a Aposetolo e Toasefululua, ma fai i se tamaitiiti aoga e faitau leotele le:

“O upega e tele lava ina faauigaina o ni fuafuaga ia mo le pu’eina o se mea. I se isi manatu … ae sili atu ona taua, e mafai ona tatou faauigaina se upega o soo se mea lea e toso ese maia pe taofia ai i tatou mai le mulimuli atu i le valaau a Iesu Keriso, le Alo o le Atua soifua.

“O le faaaogaina o upega i le tulaga lea e mafai ona faatusa i a tatou galuega, o mea tatou te fiafia i ai, o o tatou faanaunauga, ma le vaega e silisili atu, o o tatou faaosoosoga ma agasala. Pe a faapuupuu, o se upega o soo se mea lea e mafai ona toso ese mai ai i tatou mai le mafutaga ma lo tatou Tama Faalelagi po o Lana Ekalesia ua toefuataiina. …

“E le mafai ona lisiina atu le tele o upega ia e mafai ona maileia ai i tatou ma taofia ai i tatou mai le mulimuli i le Faaola. Ae afai tatou te faamaoni i lo tatou naunau e mulimuli ia te Ia, e tatau ona tatou tuuese loa ia upega lavelave o le lalolagi ma mulimuli atu ia te Ia.

“… Ua matua faigofie ona faatumulia o tatou olaga i fuafuaga, fonotaga, ma galuega. E faigofie ona lavelavea i le tele o upega ia e i ai nisi taimi e oo lava i sina fautuaga ina ia tuusaoloto mai ai, e foliga mai e taufaamata’u ma e taufaafefe foi ia i tatou.

“O nisi taimi tatou te lagona ai o lo tatou pisi tele, o le silisili foi lena o lo tatou taua—e ui lava o lo tatou “pisi tele” e iloa ai lo tatou agavaa. Uso e ma tuafafine, e mafai ona alu uma taimi o lo tatou olaga atoa e pisi solo ai e le malolo, i le faiga o lea mea ma lea mea, ae o le mea moni lava e leai a se uiga i le i’uga.

“O le tele o mea tatou te faia atonu e le taua tele. Ia tatou taulai atu le malosi o o tatou mafaufau, o o tatou loto, ma o tatou agaga i mea e faavavau le taua—ma e aoga” (“Mulimuli Mai ia te Au,” Liahona, Me 2002, 15–16).

Afai o ia, upega, ma vaa na tuua e tagata faifaiva e suitulaga i o latou manaoga faaletino, o a ni mea atonu e manaomia e le Faaola ona e tuueseina ina ia mulimuli ia te Ia?
Aisea e faigata ai i nisi taimi ona tuua manaoga faaletino?
E mafai faapefea e se tagata ona iloa po o lavelavea o ia i le ituaiga upega na taua e Elder Wirthlin?

Valaaulia tamaiti aoga e faasoa mai se taimi i o latou olaga na latou tali atu ai i le valaaulia a le Faaola e mulimuli ia te Ia (atonu o le tuua o auala tuai po o le taliaina o se valaauga i le Ekalesia). Ona fesili atu lea:

Na faapefea ona faamanuiaina lou olaga i le tali atu i lenei valaaulia?

Faaali atu mau fesootai nei ma fesili, pe tusi i le laupapa:

Luka 9:57–62—O a mea e mafai ona taofia ai i tatou mai le mulimuli i le Faaola?

Luka 14:25–27, 33—O a mea e manaomia e le Faaola mai i Ona soo?

Luka 14:28–32—E faapefea ona fesootai le upu faauma i mea e manaomia e avea ai o se soo?

Vaevae le vasega i ni vaega se tolu, ma tofi vaega taitasi e suesue se tasi o fuaitau ma le fesili e fetaui i ai. A maea se taimi talafeagai, valaaulia tamaiti aoga e faasoa mai pe na faapefea e fuaitau na latou faitauina ona taliina le latou fesili. A uma ona talanoaina uma fuaitau, fesili atu:

O le a le mea e manaomia e avea ai ma soo o loo faaalia mai i nei tala a le Faaola? (A o talanoaina e tamaiti aoga lenei fesili, fesoasoani ia i latou ia malamalama i le upumoni lenei: O le avea ma soo e manaomia ai la tatou tautinoga mautu e tuua mea uma ae mulimuli ia Iesu Keriso.

Faamatala atu a o tuuina mai o le avea ma soo tatou te faamalosia ai pea la tatou tautinoga ma le tuuto e mulimuli i le Faaola, e le finagalo o Ia ia tatou tamomoe e sili atu i lo tatou malosi (tagai i le Mosaea 4:27).

Tuu atu i tamaiti aoga se kopi o le lauga lenei a Peresitene Dieter F. Uchtdorf o le Au Peresitene Sili, ma valaaulia se tamaitiiti aoga e faitau leotele:

“O le laasaga muamua i le auala o le avea ma soo e amata, o le mea e laki ai, i le nofoaga tonu lava lena e te tu ai! E le tau manaomia lo tatou muai agavaa e faia lena laasaga muamua. E le afaina pe tatou te mauoa pe matitiva. E le tau manaomia le aoaoina, poto e tautala, po o le poto salalau. E le faapea e tatau lava ona tatou atoatoa pe fiafia i ai tagata e oo foi i le amio-lelei.

“O oe ma au e mafai ona savavali i le auala o le avea ma soo i le aso. Ia tatou lotomaualalo; ia tatou tatalo atu i le Tama i le Lagi ma o tatou loto atoa ma faaleo atu o tatou manaoga e faalatalata atu ia te Ia ma aoao ia te Ia.

“Ia Faatuatua. Saili, ma o le a e maua. Tuitui atu, ma o le a tatalaina le faitotoa [tagai i le Mataio 7:7 Auauna i le Alii e ala i le auauna atu i isi. Ia avea ma se tagata toaga i lau uarota po o le paranesi. Faamalolosia lou aiga e ala i le tautino atu e ola i mataupu faavae o le talalelei. Ia tasi le loto ma ia tasi le manatu i lau faaipoipoga ma i lou aiga.

“O le taimi lenei e faafetaui ai o outou olaga ina ia mafai ona maua se pepa faataga o le malumalu ma faaaoga. O le taimi lenei e fai ai ni afiafi faaleaiga anoa, ia faitau ai le afioga a le Atua, ma talanoa atu i le Tama Faalelagi i le tatalo faatauanau. O le taimi lenei e faatumu ai o tatou loto i le agaga faafetai mo le Toefuataiina o Lana Ekalesia, mo perofeta soifua, le Tusi a Mamona, ma le mana o le perisitua lea ua faamanuiaina ai o tatou olaga. O le taimi lenei e talia fiafia ai le talalelei a Iesu Keriso, avea ma Ona soo, ma savali i Ona ala” (“O le Auala o le Soo,” Ensign po o le Liahona, Me 2009, 77).

O fea le auala na saunoa ai Peresitene Uchtdorf e amata ai le avea ma se soo?
E faatatau i le saunoaga a Peresitene Uchtdorf, o fea le taimi e amata ona savalia ai le ala o se soo?

Tusi le faamatalaga lenei i luga o le laupapa:

O le taimi lenei mo au e …

Valaaulia tamaiti aoga e mafaufau loloto pe faapefea ona latou faauma lenei fuaitau i se auala e tasi e latou te faatino ai i le avea ai ma soo o Iesu Keriso. Uunaia i latou e faatino nei loa i soo se mea e oo mai i o latou mafaufau, aua o na mafaufauga e moni lava o musumusuga mai le Agaga Paia. Molimau atu ao latou faia le sitepu muamua, o le a fesoasoani le Alii ia i latou e avea ma Ona soo.

Faitauga a Tamaiti o le Vasega

Ioane 1:35–47; 2 Nifae 26:33; Alema 5:33–34; Mataio 4:18–22; Luka 5:11; 9:57–62; 14:25–33.
Dieter F. Uchtdorf, “O le Auala o le Soo,” Ensign po o le Liahona, Me 2009, 75–78.