Lesona 16: Na Togiolaina e le Faaola Agasala a Tagata Uma
Lesona 16
Na Togiolaina e le Faaola Agasala a Tagata Uma
Folasaga
“O [Iesu Keriso] na tuuina atu Lona soifua e togiolaina ai agasala a tagata uma. O Lana [taulaga] o se meaalofa foaifuaina mo i latou uma na soifua i luga o le fogaeleele” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). Na aoao mai Elder Richard G. Scott faapea “o le Togiola o le elemene taua lea i le fuafuaga o le fiafia a lo tatou Tama oi le Lagi ana leai semanu e le mafai ona faatino lena fuafuaga” (“O loo Soifua o Ia! Ia Viia Lona Suafa e Faavavau!” Ensign po o le Liahona, Me 2010, 75-76). O lenei lesona o le a taulai atu i le puapuagatia matuia o le Faaola, lea na amata i Ketesemane ma faaiu i luga o le satauro, ma o le a faamatalaina ai le ala e mafai ai e Iesu Keriso ona fesoasoani ia i tatou e manumalo ia tatou agasala ma faamalosia i tatou i lo tatou ola ai i aso uma e ala i Lana Togiola.
Na puapuagatia Iesu Keriso i tiga o le Togiola ma le loto i ai
Mafaufau e amata le vasega i le valaaulia o tamaiti aoga e usu le “Ou Te Tu Ma Ofo” (Viiga, nu. 107) po o se isi viiga e uiga i le Faaola. Ma, a amata le lesona, fesili atu:
E faapefea e le usuina o le “Ou te Tu ma Ofo” (po o se isi viiga e uiga i le Faaola) ona saunia oe e suesue i le Togiola a Iesu Keriso?
Valaaulia tamaiti aoga e faitau le leoa le Mareko 14:33–36, ma vaai mo fuaitau na e faamatalaina puapuaga o le Faaola i Ketesemane. Lisi i le laupapa fuaitau ua faailoa mai e tamaiti aoga.
O a uiga ua aumaia e nei fuaitau ia te oe?
Valaaulia tamaiti aoga e suesue le Luka 22:39–44; 2 Nifae 9:21; ma le Mosaea 3:7 mo isi faamatalaga e uiga i le puapuagatia o le Faaola i le taimi o Lana taulaga togiola. Atonu e te manao e fautuaina tamaiti aoga e faailoga fuaitau o mau fesootai nei i a latou tusitusiga paia.
O a upumoni taua ua aoao mai e nei fuaitau e uiga i le puapuagatia na onosaia e Iesu mo i tatou? (O tali e tatau ona aofia ai le upumoni lenei: O le puapuagatia o Iesu Keriso i Ketesemane na mafua ai ona afutoto o Ia mai puninii uma.
Faasino i tamaiti aoga faapea o le Togiola a Iesu Keriso na aofia ai Lona puapuagatia mo agasala i Ketesemane ma luga o le satauro, le faamaligiina o Lona toto, Lona maliu i le satauro, ma Lona toetu mai le tuugamau. Valaaulia se tamaitiiti aoga e faitau leotele le saunoaga lenei a Elder Jeffrey R. McConkie o le Korama a Aposetolo e Toasefululua:
Ata
Elder Bruce R. McConkie
“Tatou te le iloa, e le mafai ona tatou faamatalaina, e le mafai ona malamalama i ai le mafaufau faaletino i le taua atoa o le mea na faia e Iesu i Ketesemane.
“Ua tatou iloa sa puna mai le afutoto i puninii uma o Lona tino a o Ia inuina ‘alu o lena ipu oona na tuuina atu e Lona Tama ia te Ia.
“Ua tatou iloa sa puapuagatia o Ia, i le tino ma le agaga, e sili atu nai lo mea e mafai ona tigaina ai le tagata, sei vagana ai e oo i le oti. …
“Ua tatou iloa sa faō o Ia i luga o le eleele ona o tiga ma mafatiaga o se avega e le mafuatia lea na mafua ai ona gatete o Ia ma na toetoe a le mafai ona Ia inuina le ipu oona. (“O le Mana Faamama o Ketesemane,” Liahona, Ape. 2011, 57).
O a ou lagona i le puapuagatia o Iesu Keriso na onosaia i Ketesemane ma luga o le satauro?
Na puapuagatia Iesu ina ia tatou le manaomia ona puapuagatia e pei ona Ia oo i ai
Fai atu le fesili lenei:
Aisea e te manatu ai na naunau Iesu e matuai puapuagatia mo i tatou?
Valaaulia tamaiti aoga e suesue le leoa le Ioane 15:13; 1 Peteru 3:18; ma le Mataupu Faavae ma Feagaiga19:15–19, ma vaai mo mafuaaga na puapuagatia ai Iesu Keriso ma le loto i ai i tiga o le Togiola. A uma se taimi talafeagai, fai i tamaiti aoga e faasoa mai mea na latou maua. A o tali mai tamaiti aoga, mafaufau e otootoina a latou tali i le laupapa faapenei:
Ina ia faaalia Lona alofa tele mo i tatou.
Ina ia taofia lo tatou puapuagatia atoatoa mo a tatou agasala.
Ina ia faatagaina i tatou e salamo ma ia faamagaloina a tatou agasala.
Ina ia faamamaluina le Tama.
E faatagaina i tatou e toe foi atu i le Atua.
Ina ia aumaia i tatou i le Atua.
A o e tuuina atu nei fesili, tuu atu i tamaiti aoga le taimi e mafaufau loloto ai ia latou tali a o lei valaauliaina i latou e tali mai. (Faamanatu i tamaiti aoga a o latou aoao e mafaufau loloto i mea na latou mauaina i tusitusiga paia, o le a faaali atu soo isi upumoni ia i latou.)
O a mea ua aoaoina ai oe e nei mafuaaga mo le puapuagatia o Iesu Keriso e uiga ia te Ia?
E faapefea ona fetaui lelei nei mafuaaga ia te oe lava ia?
Faamamafa atu i tamaiti aoga faapea e ala mai i le Togiola, na avea ai Iesu Keriso ma o tatou Sui—na Ia suitulaga ia i tatou, na Ia tauaveina la tatou avega, na Ia puapuagatia mo a tatou agasala. Na faaupuina e le Aposetolo o Paulo: “Aua o ia [le Atua le Tama] na faia lea e ia [o Keriso le Alo] ma agasala, o le na sui [o Iesu Keriso na leiloa le agasala]; ina ia avea i tatou ma amiotonu a le Atua ia te ia” (2 Korinito 5:21). E pei o lo tatou Alii ma le Faaola na faia lenei ofo mo i tatou uma: “O mai ia te au. O le a ou tauaveina a outou agasala, ma o le a ou tuuina atu ia te outou lau amiotonu.”
Molimau atu faapea ona o Iesu Keriso na faia le Togiola, o le a mafai ona faamagaloina i tatou mo a tatou agasala pe afai tatou te salamo. Ona o Lana taulaga mo i tatou, ua saunia ai le ala mo i tatou e toe foi atu ai e nonofo faatasi ma lo tatou Tama Faalelagi i se iunite faaleaiga faavavau. Na taliaina e Iesu Keriso le Togiola ona o Lona alofa mo le Tama Faalelagi ma i tatou. Uunaia tamaiti aoga e mafaufau loloto pe faapefea ona latou ono saili atili atu ma olioli i faamanuiaga o le Togiola i o latou olaga.
O le Togiola a Iesu Keriso e oo mai ai ia i tatou Lona alofa tunoa po o le mana malosi
Faaali atu le saunoaga lenei a Elder Neal A. Maxwell o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder Neal A. Maxwell
“Ina ua oo le mamafa o le avega i luga o Keriso, sa oo ifo i lona finagalo se malamalamaaga manino o le mea e tatau ona ia fai ua loa ona tatau ona malamalama i ai! …
“Sa oo ifo i le Alo alofa le pona ma atoatoa le mamafa o agasala—ua mavae atu ma le taimi nei ma le lumanai—! Sa faaopoopo foi i ai o tatou vaivaiga ma tiga uma, i le matuia o le Togiola. (Tagai i le Alema 7:11–12; Isa. 53:3–5; Mata. 8:17.) …
“… O Lona mafatia—le, mamafa e le mafaatusalia—na alaga atu ai Lona agaga i le satauro, o se alaga o le tuu lafoaiina. (Tagai i le Mata. 27:46.)” (“Gauai Atu,” Liahona, Iulai 1985, 67–69).
O le a sou manatu i le uiga o le saunoaga a Elder Maxwell i le “matuia o le Togiola”?
I le faaopoopo atu ia tatou agasala, o le a le isi mea na faailoa atu e Elder Maxwell e saofaga i puapuagatia o le Faaola?
Valaaulia se tamaitiiti aoga e faitau leotele le Alema 7:11–13. Fai i le isi vaega o le vasega e mulimuli i le faitauga ma faailoa mai isi tulaga o le olaga faitino lea na puapuagatia ai le Faaola. Fai atu i tamaiti aoga e faasoa mai mea na latou maua, ma lisi a latou tali i le laupapa. (O tali e tatau ona aofia ai tiga, puapuaga, faaosoosoga, ma’i, le atoatoa, ma le maliu.) Talanoaina uiga o tulaga nei ma le ala e mafai ai ona faamanuiaina i tatou e Iesu Keriso e ala mai le Agaga Paia pe a tatou aafia ai.
Valaaulia se tamaitiiti aoga e faitau le faamatalaga lenei a Elder David A. Bednar o le Korama a Aposetolo e Toasefululua:
Ata
Elder David A. Bednar
“Na puapuagatia le Faaola e le mo na o o tatou agasala ae faapea foi mo le le tutusa, o le fai mea le amiotonu, o le tiga, o le ita, ma le pologa faalelagona lea e masani ona tatou pagatia ai. E leai se tiga faaletino, leai se ita o le loto, leai se puapuaga o le agaga, leai se ma’i po o le vaivai e te oo i ai pe ou te oo i ai i la tatou malaga i le olaga faitino e le’i oo muamua i ai le Faaola. I se taimi o le vaivai tatou te ono tagi atu ai, E leai se tasi na te iloaina pe faape’i. E leai se tasi e malamalama i ai. E leai se tasi e iloa.’ Atonu e leai se tagata soifua na te iloa. Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega a’o le’i tatou tauaveina. Ma ona ua Ia totogiina le tau faaiu ma tauaveina lena avega, ua ia te Ia le tiga-alofa atoatoa ma e mafai ona ia faaloaloa mai Lona aao o le alofa mutimutivale ia i tatou i le tele o vaega o lo tatou olaga. E mafai ona aapa mai o Ia, pai mai, ma fesoasoani … ma faamalosia i tatou ia avea atili ma tagata e mafai ona avea ai i tatou ma fesoasoani ia tatou faia na mea e le mafai ona tatou faia e ala i le faalagolago i lo tatou lava malosi” (“O le Togiola ma le Malaga i le Olaga Faitino,” Liahona, Ape. 2012, 47).
Fesili i tamaiti aoga pe faapefea ona latou otootoina aoaoga a Elder Bednar. Ona fesili atu lea:
E faapefea e faamanuiaga o loo avanoa e ala mai le Togiola ona saunia se ala mo i tatou e toe foi atu ai i le afioaga o le Tama Faalelagi? (A o tali mai tamaiti aoga, faamamafa atu faapea ona o le Togiola a Iesu Keriso, e mafai ona tatou maua le lago malie ma le malosi e ala mai le Agaga Paia ina ia onosaia ai “tiga ma puapuaga ma faaosoosoga uma” [Alema 7:11].)
Ina ia fesoasoani i tamaiti aoga e malamalama i le mana malosi o le Faaola, po o le alofa tunoa, valaaulia i latou e suesue taitoatasi se tasi o fuaitau o mau nei ma saunia e faasoa mai mea na latou maua. (Mafaufau e tusi mau fesootai nei i le laupapa.)
Mafaufau i ni auala na faamalosia ai tagata ua faamatalaina i nei fuaitau o mau ia Iesu Keriso e ala i le Togiola. O anafea na tai tutusa ai le faamalosia o oe po o se tasi e te iloaina?
Aisea e taua ai mo i tatou le malamalama faapea e mafai ona tatou maua le mana malosi o Iesu Keriso?
Faaali atu le saunoaga lenei a Elder Richard G. Scott o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder Richard G. Scott
O loo i ai se tulaga e matua manaomia mo i tatou taitoatasi ia faamalosia lo tatou malamalama i le taua o le Togiola a Iesu Keriso, ina ia avea ai i tatou ma faavae e le maluelue e fausia ai o tatou olaga. …
“Ou te faamalosiau atu ma le malosi ia amata sau lava fuafuaga e te suesue ai ina ia e malamalama lelei ai ma talisapaia ia taunuuga le mafaatusalia faavavau, le iu o le faataunuuina atoatoa e Iesu Keriso o Lona valaauga paia faalelagi ma o lo tatou Faaola ma le Togiola” (“O Loo Soifua o Ia! Ia Viia Lona Suafa e Faavavau!” Ensign po o le Liahona, Me 2010, 77).
A o e faaiuina le lesona, uunaia tamaiti aoga e faatuina se fuafuaga o le suesuega patino o Iesu Keriso ma Lana Togiola.