Lesona 15

O Iesu Keriso na Faavaeina le Faamanatuga

Folasaga

“O Le Keriso Soifua: O Le Molimau a le Au Aposetolo” e faitauina faapea: “[O Iesu Keriso] na faavaeina le faamanatuga e avea o se faamanatu o Lana taulaga togiola maoae” (Ensign po o le Liahona, Ape. 2000, 2). A tatou fetagofi atu i le faamanatuga, ua faamanatu mai ai ia i tatou o le Faaola na afutoto i puninii uma ma maliu mo i tatou; tatou te faafou foi a tatou feagaiga ma le Alii.

Faitauga Faaopoopo

Dallin H. Oaks, “Sauniga Faamanatuga ma le Faamanatuga,” Ensign po o le Liahona, Nov. 2008, 17–20.
Jeffrey R. Holland, “Tou te Faia le Mea Nei ma Faamanatuga ia te Au,” Liahona, Nov. 1995, 67–69.

Fautuaga mo le Aoaoina Atu

Mataio 26:26–28; Luka 22:15

Na faavaeina e Iesu Keriso se feagaiga fou

Faaali atu le ata faatusa o loo avatu faatasi po o se isi ata faatusa o le Paseka Mulimuli, ma valaaulia se tamaitiiti aoga e faamatala mai se mea na tupu o loo faaalia i le ata:

Fesili i tamaiti aoga:

O le a sou lagona pe afai o le Faaola lava Ia na saunia, faamanuiaina, ma tuuina atu ia te oe le faamanatuga?

Valaaulia se tamaitiiti aoga e faitau leotele le Luka 22:15. Uunaia le vasega e mafaufau i le taimi o le lesona pe aisea na manaomia ai e le Faaola le faatasi ma Ona Aposetolo i le Paseka.

Valaaulia se tamaitiiti aoga e faitau leotele le Mataio 26:26–28 a o mulimuli le vasega i le faitauga. Faamatala le upu feagaiga e ala i le faamatalaina faapea na faaliliuina mai se upu Eleni o lona uiga o le “feagaiga” (atonu e te manao e fautua atu i tamaiti aoga e tusi lenei faamatalaga i autafa o a latou mau). Talanoaina le fesili lenei:

Afai o Iesu na faavaeina se feagaiga fou, po o le feagaiga, o le a le feagaiga o le a ia sui ai?

O le faamatalaga lenei o le a saunia le faavaa po o le tusiga o le a fesoasoani mo la outou talanoaga: I aso anamua, a osi e Ieova Ana feagaiga ma le aiga o Isaraelu, na aoaoina i latou e Mose i upu a Ieova ma na osi feagaiga tagata e usiusitai i na upu. Ona ofoina atu lea e Mose se taulaga i manu, aumai le toto mai le manu, ma sausauina ai le nuu, ma faapea atu, “Faauta i le toto o le feagaiga ua osia e Ieova ma outou.” (Tagai i le Esoto 24:3–8.) Na suia e Iesu le aoaoga a Mose ina ua Ia aoao atu o le a Ia faavaeina se feagaiga fou ma fanau a le Atua i le faamaligiina o Lona toto (e pei lava o le sausauina o le toto o manu e faatusa i le aiga o Isaraelu ua ulu atu i le feagaiga tuai ma Ieova). Ina ua tuuina atu e Iesu le ipu uaina i Ona Aposetolo, na Ia faailo atu le faataunuuina o le feagaiga tuai ma le faavaeina o le feagaiga fou (tagai i le Eperu 9:12–15).} O le Tulafono a Mose (le feagaiga tuai) sa, i le tele o auala, o se valoaga maoae o le Mesia. O Iesu Keriso o le faataunuuina o lena valoaga (tagai i le 2 Nifae 11:4; Iakopo 4:5; Alema 34:13–14), e faapitoa lava i le iloaina na Ia faataunuuina le faamoemoega tupito o lena tulafono e ala i Lana taulaga togiola.

O le a le mea e tosina atu ai o tatou mafaufau i feagaiga tuai ma le fou i le ofoina atu o le toto? (O le Togiola a Iesu Keriso ma le faamaligiina o Lona toto mo le faamagaloina o agasala.)

Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma valaaulia se tamaitiiti aoga e faitau leotele:

“O le faamanatuga o le sauniga lea ua suia ai taulaga toto ma taulaga mu o le tulafono a Mose, ma ina ua oo mai le folafolaga a le Faaola: “Ai se sau foi ia te au ma le loto momomo ma le agaga salamo, ou te papatisoina o ia i le afi ma le Agaga Paia ‘(3 Nifae 9:20)” (“Sauniga Faamanatuga ma le Faamanatuga,” Ensign po o le Liahona, Nov. 2008, 19).

O le a faapefea ona e otootoina upumoni ua uma ona tatou talanoaina e uiga i le Tausamaaga Mulimuli? (A o tali mai tamaiti aoga, faamamafa atu o Iesu Keriso na faataunuuina le feagaiga tuai, ma na Ia faavaeina le feagaiga fou e ala i le faamanatuga.)

Luka 22:14–20; 3 Nifae18:7, 11

E fesoasoani le faamanatuga ia i tatou e manatua le Faaola

Vaevae tamaiti aoga i ni paga. Valaaulia paga taitasi e faitau le Luka 22:19–20 ma le 3 Nifae 18:7, 11. Fai atu ia i latou e faailoa mai se isi mafuaaga (e ese mai le faatuina o se feagaiga fou) pe aisea na faavaeina ai e le Faaola le faamanatuga. Talanoaina fesili nei:

O le a le mafuaaga na tuuina mai e le Faaola mo le faavaeina o le faamanatuga? (E tatau i tamaiti aoga ona faailoa mai le upumoni lenei: A o tatou fetagofi atu i le faamanatuga e tatau ona tatou manatuaina le Faaola.)
Aisea e taua ai lo tatou taumafai e manatua le Faaola a o tatou fetagofi atu i le faamanatuga?
Afai tatou te le manatuaina le Faaola ma mea na Ia faia mo i tatou, o le a le uiga o le faamanatuga?

Mafaufau e saunia mo tamaiti aoga taitasi se kopi o le pepa e tufa atu o loo avatu faatasi ai, o loo i ai vaega o le lauga a Elder Jeffrey R. Holland o le Korama a Aposetolo e Toasefululua. Valaaulia tamaiti aoga e faitau lē leoa pepa e tufa atu. A maea le taimi talafeagai, talanoaina fesili nei:

O le a se fautuaga o le a e tuuina atu i se tasi o loo tauivi ma le taulai atu i le Faaola ma Lana taulaga i le taimi o le faatautaia o le faamanatuga? (A o tali mai tamaiti aoga, atonu e te faasino atu faapea a o tatou vaai mo avanoa e mafaufau ai i le soifuaga ma le galuega a le Faaola i le aluga o le vaiaso, o le a sili atu ona faigofie mo i tatou le taulai atu ia te Ia i le taimi o le faatautaia o le faamanatuga i le Aso Sa.)
O a faamanuiaga ua e lagonaina a o e taumafai e manatua le Faaola ma Lana Togiola a o e tago atu i le faamanatuga?

1 Korinito 11:27–30; 3 Nifae 18:28–29; 20:8–9

O le fetagofi atu ma le agavaa i le faamanatuga e faafou ai a tatou feagaiga.

Valaaulia tamaiti aoga e faitau le leoa ma faatusatusa le 1 Korinito 11:27–30 ma le 3 Nifae18:28–29; 20:8–9. Fai atu ia i latou e faailoa mai se lapataiga ua tuuina mai e uiga i le faamanatuga. Ona fesili atu lea:

Aisea e le poto ai le fetagofi atu i le faamanatuga ma le le agavaa?

Atonu e fesoasoani le faasoa atu o le saunoaga lenei a Elder John H. Groberg o le Fitugafulu, lea na faamatalaina le uiga o le fetagofi atu i le faamanatuga ma le agavaa:

“Afai tatou te mananao e faaleleia i tatou lava (o le salamo lea) ma e le o i lalo o se vaavaaiga a le perisitua, o lona uiga, i lou lava manatu, o loo agavaa i tatou. Ae afai tatou te le fia salamo ma faaleleia, ma afai tatou te le naunau e mulimuli i le taitaiga a le Agaga, e ao ona tatou fesili, pe o tatou agavaa ea e tago i le faamanatuga, pe o tatou tauemuina ea le faamomoega tonu o le faamanatuga, o le a avea lea ma sui o le salamo patino ma le faaleleia?” (“O le Matagofie ma le Taua o le Faamanatuga,” Liahona, Iulai 1989, 48).

O a faamanuiaga mo i latou e fetagofi atu ma le agavaa? (tagai 3 Nifae 20:8–9). (Ia mautinoa ua malamalama tamaiti aoga faapea afai tatou te fetagofi atu i le faamanatuga ma le agaga tatalo ma se agaga salamo, e mafai ona tatou maua le faamagaloina o agasala, e pei lava ona tatou faia ina ua tatou papatiso.

Faaali atu le saunoaga lenei a Elder Dallin H. Oaks o le Korama a Aposetolo e Toasefululua, ma fai i se tamaitiiti aoga e faitau leotele:

“A aunoa ma nisi mea mo lo tatou faamamaina pe a mavae lo tatou papatisoga, semanu ua aunoa i tatou uma taitoatasi ma mea faaleagaga. E le mafai ona tatou maua le mafutaga a le Agaga Paia, ma i le famasinoga mulimuli o le a fusifusia i tatou ma ‘lafoina i fafo e faavavau’ (1 Ni. 10:21). E maua lo tatou agaga faafetai ina ua sauniaina e le Alii se fuafuaga mo tagata papatiso taitoatasi o Lana Ekalesia ina ia faamamaina mai i lea taimi i lea taimi mai le agasala. O le faamanatuga o se vaega taua lea o lena fuafuaga” (“O le Perisitua Arona ma le Faamanatuga,” Liahona, Ian. 1999, 43).

E tusa ai ma le saunoaga a Elder Oaks, aisea ua avea ai le faamanatuga ma se sauniga taua tele o le talalelei ?

Faasoa atu le isi saunoaga lenei a Elder Oaks:

“Ua poloaiina i tatou ina ia salamo mai a tatou agasala ma ia o mai i le Alii ma se loto momomo ma se agaga salamo, ma taumamafa i le faamanatuga e ogatasi ma ona feagaiga. A tatou faafouina a tatou feagaiga o le papatisoga i le auala lenei, e faafouina e le Alii aafiaga faamama o o tatou papatisoga. O le auala lenei e faamamaina ai i tatou ma e mafai ai ona faatasi pea Lona Agaga ma i tatou. O le taua o lenei mea e iloa ai i le poloaiga a le Alii ina ia tatou aai ma feinu i le faamanatuga i vaiaso taitasi (tagai i le MF&F 59:8–9)” (“O Le Perisitua Arona ma le Faamanatuga,” Liahona, Ian. 1999, 43).

E mafai ona e faamatala atu afai tatou te aai ma feinu ma le agavaa i le faamanatuga, tatou te “faafouina feagaiga uma na tatou osia ma le Alii” (Delbert L. Stapley, i le Conference Report, Oke. 1965, 14; faaopoopo le faatusilima; tagai foi i le L. Tom Perry, “ A o Tatou Fetagofi atu nei i le Faamanatuga,” Ensign po o le Liahona, Me 2006, 41).

Valaaulia tamaiti aoga e iloilo le Luka 22:15. Ona fesili atu lea:

Afai e fesili atu se tasi ia te oe pe aisea e te manatu ai sa matuai manao lava Iesu e faaaluina le Paseka faatasi ma Ona Aposetolo, o le a sau tali? O le a le molimau o le a e tuuina atu?

Molimau atu a o tatou manatua Iesu Keriso ma Lana taulaga togiola, ma a o tatou fetagofi atu ma le agavaa i le faamanatuga, ua tatou faafouina a tatou feagaiga ma le Atua. Uunaia tamaiti aoga e mafaufau loloto pe faapefea ona latou ofoina atu faaletagata se “loto momomo ma se agaga salamo” pe a latou fetagofi atu i le faamanatuga. Luitauina i latou e faia le sauniga o le faamanatuga o se aafiaga faaleagaga masani.

Faitauga a Tamaiti Aoga

Mataio 26:26–28; Luka 22:17–20; 1 Korinito 11:27–30; 3 Nifae 18:1–11, 28–29; 20:8–9; Mataupu Faavae ma Feagaiga 20:75–79.
Dallin H. Oaks, “Sauniga Faamanatuga ma le Faamanatuga,” Ensign po o le Liahona, Nov. 2008, 17–20.

Fuaitau mai ia Jeffrey R. Holland,“Tou te Faia le Mea Nei ma Faamanatuga ia te Au”

“Afai o le mea aupito taua tatou te faia o le manatua, o a ni mea tatou te manatua pe a tuu mai ia i tatou na faatusa faigofie ma le taua?

“E mafai ona tatou manatua le muai soifuaga o le Faaola ma mea uma ua tatou iloa na faia e ia, o Ieova silisiliese o le na faia mea uma i le lagi atoa ma le lalolagi ma mea uma o i ai. E mafai ona tatou manatua lena, e oo lava i le Fono Sili i le Lagi, sa ia alofa ia te i tatou ma sa matua malosi lava, ina ia tatou olioli iina i le mana o Keriso ma lo tatou faatuatua i le toto o le Tamai Mamoe (tagai i le Faaa. 12:10–11).

“E mafai ona tatou manatua le taua tele o lona soifua mai i le tino. …

“E mafai ona tatou manatua vavega ma aoaoga a Keriso, o Ana faamalologa ma fesoasoani. E mafai ona tatou manatua na ia faapupula tauaso ma faalagona e tutuli ma faasavavali e pipili, setu ma e gase [o latou tino]. O le mea lea, o aso faapea, a tatou lagona ua tuta’ia lo tatou alualu i luma po o lo tatou fiafia ma ua faanenefu la tatou vaaiga mo le lumanai, e mafai ona tatou fetaomi atu i luma ma le faatuatua e le faamaluelueina ia te ia ma se faamoemoe atoatoa lelei. …

“E mafai ona tatou manatua e oo lava i se misiona paia na tuuina atu ia te ia, sa maua lava e le Faaola le fiafia tele i lona soifuaga; sa ia fiafia i tagata ma sa ia tau atu i ona soo ina ia lototetele. Sa ia fetalai mai, e tatau ona matua mitamita i le talalelei e pei lava o se tasi ua na mauaina se oa tele, o se penina tautele i le faasitepu o o tatou lava faitotoa. …

“E mafai ona tatou manatua sa valaauina e Iesu Ona soo o uo. …

“E mafai—ma e tatau ona—tatou manatua mea matagofie ua oo mai i o tatou olaga ma ‘o mea uma e lelei, e mai ia Keriso’ (Moronae 7:24). …

“O nisi aso o le a i ai mafuaaga tatou te manatua ai faiga le alofa na Ia mauaina, o le tuulafoaiina o ia, ma le amioletonu—oi le amioletonu—sa ia onosa’ia. O i tatou foi, pe a tatou fetaiai ma nisi o na mea i le olaga, e mafai ona tatou manatua o Keriso sa mafatia i itu uma, ae lei faaatuatuvaleina; le mautonu, ae le fememeai; faasauaina, ae le tuulafoaiina; lafotuina i lalo, ae le fano (tagai i le 2 Kor. 4:8–9).

“A oo mai na taimi faigata ia te i tatou, e mafai ona tatou manatua sa alu ifo Iesu i lalo o mea uma a o le’i alu a’e i le mea maualuga, ma sa Ia onosa’ia mea tiga ma puapuaga, ma tofotofoga uiga eseese ina ia faatumuina o ia i le alofa, ma silafia ai le ala e tausi a’i lona nuu e tusa ma o latou vaivaiga (tagai i le MF&F 88:6; Alema 7:11–12).

“Mo i latou o e tautevateva, o loo i ai o ia iina e fesoasoani ma faamalosia i tatou. I le iuga o loo i ai o ia iina e laveai i tatou, ma o nei mea uma, ua ia ofo atu ai lona soifua. …

“… O nei mea uma e mafai ona tatou manatua, pe a valaaulia i tatou e se alii ositaulaga talavou i le tatalo o le faamanatuga ia manatua pea Keriso” (Liahona, Ian. 1996, 79–82).