Lesona 5

O Iesu Keriso o Ieova i le Feagaiga Tuai

Folasaga

I le molimau atu i le Faaola o Iesu Keriso, ua folafola mai e perofeta o aso nei: “O Ia o le Ieova Sili o le Feagaiga Tuai” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). O Iesu Keriso, i le avea ai ma Ieova, na faavaeina le talalelei faavavau a le Tama Faalelagi i le lalolagi i tisipenisione o taimi taitasi ina ia faapotopotoina mai fanau taitasi uma a le Atua na leiloloa. O lo tatou faatuatua ia Iesu Keriso e mafai ona faamalosia a o tatou iloaina Lona natura le fesuisuiaia ma Lana talalelei faavavau.

Faitauga Faaopoopo

Russell M. Nelson, “Feagaiga,” Ensign po o le Liahona, Nov. 2011, 86–89
“O Le Feagaiga FaaAperaamo,” O Le Penina Tau Tele Tusitaiala a le Tamaitiiti Aoga (Ofisa o Aoaoga a le Ekalesia tusitaiala, 2000), 93–98.
“Vaega Faatamaoaigaina A: O Ai le Atua o le Feagaiga Tuai?” Feagaiga Tuai Tusi Lesona a Tamaiti Aoga: Kenese−2 Samuelu, lom. lona 3. (Ofisa o Aoga a le Ekalesia tusi lesona 2003), 45-48.

Fautuaga mo le Aoaoina Atu

Esoto 3:11–14; 6:2–3; Ioane 8:52–53, 56–59; 18:5, 8; 3 Nifae 15:5; Aperaamo 1:16; 2:8

O Iesu Keriso o Ieova i le Feagaiga Tuai

Valaaulia tamaiti aoga e faasoa mai ni nai suafa ma faalagina o le Faaola ua latou iloa. Tusi a latou tali i luga o le laupapa. Tau atu i tamaiti aoga o le aso o le a outou talanoaina ai se suafa taua, po o se tofi, na iloa ai Iesu Keriso a o lei faia Lana galuega faaletino. Valaaulia i latou e faitau le leoa le Ioane 8:52–53, 56–59. Ona fesili atu lea:

O a fesili na fai atu e tagata Iutaia i le Faaola?
O le a sou manatu i le uiga o le tali a Iesu, “Sa au i ai, a o lei leai se Aperaamo”? fuaiupu 58

Ina ia fesoasoani i tamaiti aoga e faamatala le fuaitau “O au,” vaevae tamaiti aoga i ni paga ma fai atu ia i latou e faitau le Esoto3:11–14; 6:2–3, ma vaai pe na faapefea ona faailoaina e le Atua o le Feagaiga Tuai o Ia lava. A uma se taimi talafeagai, fai atu fesili nei:

E tusa ai ma nei fuaiupu, o a suafa na faailoaina ai e le Atua o le Feagaiga Tuai Ia lava? (Faasino atu faapea o le Faaliliuga a Iosefa Samita o le Esoto 6:3 e faitauina, “O Au le Alii le Atua Silisiliese; le Alii o IEOVA. Ma o lou igoa sa le iloa ia i latou.” Tagai foi i le Aperaamo 1:16.)
E faapefea e nei fuaiupu ona faamaninoina le taua o le fetalaiga a Iesu Keriso, “Sa au i ai, ae lei iai se Aperaamo”? (E tatau ona iloa e tamaiti aoga o Iesu Keriso o Ieova, le Atua o le Feagaiga Tuai ma le silisiliese O AU.)

Faaali atu saunoaga nei:

“O se faamautinoaga sili lenei ona manino ma tuusao o le faaleAtua ua faia e soo se tagata pe mafaia foi ona faia. ‘Ae lei iai Aperaamo sa i ai au o Ieova.’ O lea, ‘O au le Atua Silisiliese, O AU le Silisili. O au o Le ola, Le Faavavau e Toatasi. O au o le Atua o o outou tama. O lou igoa o: “O AU LAVA O AU” (Bruce R. McConkie, Doctrinal New Testament Commentary, 3 vol. [1965–73], 1:464).

O Ieova o le “suafa faafeagaiga ma le tatau o le Atua o Isaraelu. Ua tau mai ai ‘Le e Le Feliuliuai’”(Bible Dictionary, “Jehovah”).

Aisea e taua ai le iloa o Iesu Keriso o Ieova i le Feagaiga Tuai? (O tali e tatau ona aofia ai le upumoni lenei: E masani lava ona taitaia e le Atua Lana talalelei e ala atu i Lona Alo, o Iesu Keriso. Tagai foi i le 3 Nifae 15:5, lea e faamaumau ai le aoaoga a le Faaola o Ia na tuuina mai le tulafono.)

Atonu e te manao e valaaulia se tamaitiiti aoga e faitau leotele le saunoaga lenei a Peresitene Iosefa Filitia Samita (1876–1972):

“O faaaliga uma talu mai le pau na oo mai e ala ia Iesu Keriso, o le Ieova o le Feagaiga Tuai. … O le Tama [Elohima] e lei galulue tuusao lava patino ma tagata talu mai le pau, ma e lei faaalia mai lava sei vagana ua faailoa mai ma molimau mai i le Alo”(Doctrines of Salvation, tuuf. Bruce R. McConkie, 3 vol. [1954–56], 1:27).

E faapefea i le iloaina o Ieova, po o Iesu Keriso, e le feliuliuai ona fesoasoani ia te oe ia maua ai le faatuatua ia te Ia? (O tali e ono aofia ai o le malamalama faapea o Iesu Keriso e le feliuliuai e fesoasoani ia i tatou e maua ai le faatuatua faapea, e pei ona Ia tausia Ana folafolaga i tagata tatou te faitau i ai i tusitusiga paia, o le a Ia tausia Ana folafolaga ia i tatou.)

Faasino atu faapea i le popofou ina ua mavae taimi o le faatusipaia, o le igoa Eperu mo Ieova (sa masani ona sui i le Yaweh i tusiga tala) sa mafaufauina e paia tele mo le faaleoina. Mo lenei mafuaaga, vagana ai ni nai faatagaga (tagai i le Esoto 6:3; Salamo 83:18; Isaia 12:2; 26:4), o le au faaliliu o le King James Version o le Tusi Paia na suia le upu Ieova i le ALII (i mataitusi tetele uma). I le faaIutaia o aso nei, ua suia i le upu Adonai, o lona uiga “Alii.”

Kenese 13:14–16; 17:1–9; Mose 6:51–52, 64–66; Aperaamo 1:18–19; 2:8–11

Na faavaeina e Ieova le talalelei faavavau anamua

Faatasi ai ma tamaiti aoga o loo galulue pea taitoalua, fai atu ia i latou e faitau le Mose 6:51–52, 64–66 ma faailoa mai le mea na aoao atu e Ieova ia Atamu. Tau atu ia i latou faapea i fuaiupu 51–52, na fetalai atu Ieova e avea ma sui o le Tama. Ona fesili atu lea:

O le a le mea na e matauina e uiga i le talalelei na aoaoina ia Atamu? (O le talalelei lava lea e tasi o loo aoaoina nei. [Tagai i le 2 Nifae 31:10–16 mo se faataitaiga o le talalelei lava lea e tasi na aoaoina i le atu Amerika.] Mafaufau e faamamafa atu lenei upumoni e ala i le tusia o lenei saunoaga i le laupapa: O le talalelei a Iesu Keriso e faavavau ma e le feliuliuai i tisipenisione taitasi o le talalelei.)

Faailoa atu i tamaiti aoga faapea i se tisipenisione mulimuli ane, na faafouina e Ieova Lana talalelei faavavau e ala i se feagaiga ma Aperaamo ua taua o le feagaiga faaAperaamo. Vaelua le vasega. Tofi le afa o le vasega e suesue le Kenese 13:14–16; 17:2–8; Aperaamo 1:18–19; 2:8–11 ma faia se lisi o folafolaga na faia e le Alii ia Aperaamo. Tofi le isi afa o le vasega e suesue le Kenese 17:1–5, 9; Aperaamo 1:19; 2:8–11 ma faia se lisi o mea na manaomia e faia e Aperaamo ina ia maua ai faamanuiaga folafolaina. Manatua: A o aoao tamaiti aoga pe faapefea ona faailoa lisi i tusitusiga paia, o le a sili atu ona latou mafaia ona iloa manatu autu na fuafua le tusitala o le mau e faamamafaina.)

A o suesue tamaiti aoga, kopi le siata lenei i le laupapa, tuu se avanoa e lisi ai tali:

Feagaiga Faa-Aperaamo
Folafolaga na Faia ia Aperaamo	Tiutetauave o Aperaamo

A maea se taimi talafeagai, valaaulia ni nai tamaiti aoga mai vaega taitasi e o mai i le laupapa ma tusi mea na latou maua i lalo o le autu talafeagai. Mafaufau e otooto le feagaiga faaAperaamo e ala i le faaali atu ma tuu atu i se tamaitiiti aoga e faitau leotele le saunoaga lenei:

“Na maua e Aperaamo le talalelei ma sa faauuina i le perisitua maualuga (MF&F 84:14; Ape. 2:11), ma na ia ulu atu i le faaipoipoga faaselesitila, o le feagaiga lea o le faaeaga (MF&F 131:1–4; 132:19, 29). Na maua e Aperaamo se folafolaga o faamanuiaga uma o nei feagaiga o le a ofoina atu i ana fanau faaletino (MF&F 132:29–31; Ape. 2:6–11). Faatasi ai, o nei feagaiga ma folafolaga e taua o le feagaiga faaAperaamo. O le toefuataiina o lenei feagaiga o le toefuataiina lea o le talalelei i aso e gata ai, aua e ala mai ai le faamanuiaina o atunuu uma o le lalolagi (Kal. 3:8–9, 29; MF&F 110:12; 124:58; Ape. 2:10–11)” (Taiala i Tusitusiga Paia, “Feagaiga FaaAperaamo”; scriptures.lds.org).

Faamamafa atu faapea mai le amataga, sa osi feagaiga le Tama ma Ana fanau e faapotopotoina i latou faatasi e ala mai i upumoni, sauniga, ma faamanuiaga o le talalelei faavavau. O le toefuataiina o le talalelei e aofia ai le toefuataiina o le feagaiga faaAperaamo. O le mea lena, o le feagaiga faaAperaamo o se vaega taua o le feagaiga fou ma le faavavau, o le atoatoaga lea o le talalelei a Iesu Keriso. Fesili atu i tamaiti aoga:

E faapefea e le iloaina o i tatou o tupuaga o Aperaamo ma suli i mea uma na folafola mai e le Atua ia te ia ona faatosinaina le ala e te ola ai?
E faapefea e le avanoa o faamanuiaga na folafolaina ia Aperaamo ma ana fanau ona faamalolosia aiga ma taialaina i tatou i filifiliga tatou te faia?

Valaaulia tamaiti aoga e faasoa mai ni auala e mafai ona latou faamautuina ai faamanuiaga folafolaina o lenei feagaiga mo i latou lava ma o latou aiga, i le tuanai, taimi nei, ma le lumanai.

Iosua 24:3–13; 1 Nifae 17:23–32

Na faamanuiaina ma taitaia e Ieova Isaraelu anamua

Tau atu i tamaiti aoga i le avea ai ma se vaega o le feagaiga faaAperaamo, na folafola atu e Ieova faamanuiaga o le talalelei i fanau a Aperaamo ma i latou na faapotopoto faatasi ma i latou. Valaaulia le afa o le vasega e faitau le Iosua 24:3–13, ae valaaulia le isi afa e faitau le 1 Nifae 17:23–32. Fai atu i tamaiti aoga e vaai mo upu ma fuaitau o loo aoao mai ai mea na faia e Ieova mo Isaraelu anamua. Atonu e te manao e fautuaina e faailoga mea latou te mauaina. A maea se taimi talafeagai, fai atu i tamaiti aoga e faasoa mai mea na latou aoaoina. Toe faaupu tali a tamaiti aoga i le laupapa. Mo se vaaiga pe aisea na faia ai e Ieova nisi o mea na Ia faia, fai atu i tamaiti aoga e faitau leotele le Esoto 6:2–6. Fesili i le vasega:

O a mafuaaga na tuuina mai e Ieova mo le faia o le tele o mea ua e faitau i ai i le Iosua ma le 1 Nifae?
O le a le mea ua tau mai e lenei mea ia te oe e uiga i folafolaga na faia e le Alii ia te oe? (A o tali mai tamaiti aoga, tusi le mataupu faavae lenei i le laupapa: Afai tatou te ola faamaoni, o le a tausia e le Alii folafolaga na Ia faia i ai tatou.

Valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf:

“Talu ai ona o loo faamaoni pea ma tausia e le Atua Ana folafolaga i aso ua mavae, o lea e mafai ai ona tatou faamoemoe ma le mautinoa o le a tausia e le Atua Ana folafolaga ia i tatou i le taimi nei ma le lumanai. I taimi o le faanoanoa, e mafai ona tatou pipii mau i le faamoemoe o le a galulue faatasi mea uma mo lo [tatou] lelei’ [MF&F 90:24]” (“O le Mana e le Iu o le Faamoemoe,” Ensign po o le Liahona, Nov. 2008, 23).

E faapefea e le iloaina e uiga i gaoioiga a Ieova anamua ona fesoasoani ia te oe i taimi o faigata?
O le a le mea na Ia faia mo Isaraelu anamua lea o le a Ia faia foi mo oe?

Molimau atu faapea i tisipenisione uma o taimi, ua faamanuiaina e Iesu Keriso fanau a le Atua i le talalelei faavavau. E pei lava o tagata o le feagaiga anamua na mauaina folafolaga mai le Alii, e mafai foi e i tatou e tusa ai ma lo tatou usiusitai.

Faitauga a Tamaiti Aoga

Ioane 8:51–59; 18:5, 8; Esoto 3:11–14; 6:2–3; 3 Nifae 15:5; Mose 6:51–52, 64–66; Kenese 17:1–9; Aperaamo 1:18–19; 2:8–11.
“Vaega Faamauoaina: O ai le Atua o le Feagaiga Tuai?” Tusi Lesona a Tamaiti Aoga Feagaiga Tuai: Kenese 2 Samuelu, lom. lona 3 (tusi lesona a le Ofisa o Aoga a le Ekalesia, 2003), 45–48.