Lesona 21: Na Faatulagaina e Iesu Keriso Lana Ekalesia
Lesona 21
Na faatulagaina e Iesu Keriso Lana Ekalesia
Folasaga
I le tolu-tausaga o lana galuega i le lalolagi, na faaee ai e Iesu Keriso ki o le perisitua i Ana Aposetolo e Toasefululua. Faatasi ai ma nei ki, o le Ekalesia a Iesu Keriso na “atiina ae i luga o le faavae o le au aposetolo ma perofeta” (Efeso 2:20.) O lenei lesona o loo talanoaina ai pe na faapefea, ina ua mavae Lona Toetu, ona faaauau e le Faaola ona taitaia ma faatonuina Ana Aposetolo ma Lana Ekalesia e ala mai i le galuega a le Agaga Paia ina ia mafai ona latou fesoasoani e faataunuu le feagaiga faaAperaamo e faapotopoto Isaraelu ua faataapeapeina.
Na faatulagaina e Iesu Keriso Lana Ekalesia i luga o le faavae o aposetolo ma perofeta
Faaali atu i tamaiti aoga se ki po o se seti o ki, ma fesili atu po o le a le uiga pe a tatou faaaogaina le upu ki i tusiga o le talalelei. Valaaulia ni nai tamaiti aoga e feauauai i le faitauina leotele o fuaitau i le filifili o mau lenei. Fai i le vasega e mulimuli i le faitauga ma faailoa mai le mea taua o loo faamatalaina pe faatatau i ai fuaitau taitasi.
Mataio 16:19 (Ua folafolaina ia Peteru ki o le Perisitua [tagai i le Taiala i Tusitusiga Paia, “Ki o le Perisitua”; scriptures.lds.org].)
Mataio 17:3–7 (“Na tuuina atu e le Faaola, Mose , ma Elia [Elaia], ki ia Peteru, Iakopo, ma Ioane, i le mauga, ina ua latou liua i ona luma” [Aoaoga a Peresitene o le Ekalesia: Iosefa Samita (2007), 105].)
Mataio 18:18 (O le taua o le fusifusia ma le tatalaina i le lalolagi ma i le lagi e faatatau tonu lava i ki o le perisitua na folafolaina atu foi i isi Aposetolo.)
Atonu e te manao e faamatala atu faapea o “ki” na taua pe na faatatau i ai i nei fuaitau e tutusa ma le mana faamau (tagai i le Boyd K. Packer, O le Malumalu Paia [1980], 81–87).
Fesili atu i tamaiti aoga:
O le a le uiga o ki o le perisitua?
Aisea e taua ai le umiaina e Aposetolo o ki o le perisitua?
Valaaulia se tamaitiiti aoga e faitau leotele mai le faamatalaga lenei mai ia Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“O ki o le perisitua o le pule lea ua tuuina mai e le Atua i [e umia] le perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele.; [Tusitaulima 2: Taitaiina o le Ekalesia [2010], 2.1.1]. O mea uma e fai po o sauniga i le Ekalesia e faia i lalo o le pule tuusao pe mai se isi foi e umia ki mo lena galuega. E pei ona faamatalaina e Elder M. Russell Ballard, ‘O i latou o e ua i ai ki o le perisitua … ua mafai moni ai lava mo tagata uma o e auauna atu pe galulue faamaoni i lalo o la latou taitaiga ona faatino le pule o le perisitua ma maua le mana o le perisitua’ [M. Russell Ballard, “Alii ma Tamaitai i le Galuega a le Alii,” New Era, Ape. 2014, 4; Liahona, Ape. 2014, 48]” (“O Ki ma le Pule o le Perisitua,” Ensign po o le Liahona, Me 2014, 49).
O a ni auala ua faamanuiaina ai e ki o le perisitua tagata taitoatasi o le Ekalesia?
Valaaulia se tamaitiiti aoga e faitau leotele le Efeso 2:19–20. Ona fesili lea i le vasega:
O le a le mea ua tatou aoao mai lenei fuaitau e uiga i le faavae o le Ekalesia a le Faaola? (E tatau i tamaiti aoga ona faailoa mai le upumoni lenei: O Iesu Keriso, o le maa tulimanu lea, na faatulagaina Lana Ekalesia i luga o se faavae o aposetolo ma perofeta.)
O a mea e fai e se faavae ma se maa tulimanu mo se fale? (O le faavae e saunia le malosi ma le lagolago mo le fale. E muamua ona tuuina le maa i le faavae, o le maa tulimanu o le autu lea mo isi maa uma o le faavae ma e fuafuaina le tulaga o le fale atoa. E fesoasoani foi e faamautu ai puipui i le tulaga tatau ai.)
Valaaulia tamaiti aoga e talanoaina ma se isi o nofo i o latou tafatafa fesili nei:
O a auala o loo avea ai Iesu Keriso ma “maa tulimanu autu”?
O le a le mea ua aoao mai e lenei mau ia i tatou e uiga i le sootaga i le va o le Faaola (le maa tulimanu) ma aposetolo ma perofeta (le faavae)?
Valaaulia se tamaitiiti aoga e faitau leotele le Efeso 4:11–14. Fai i le vasega e mulimuli i le faitauga ma faailoa mai mafuaaga na tuuina mai e Paulo tatou te manaomia ai ni aposetolo, perofeta, ma isi taitai o le Ekalesia e taitaia le Au Paia.
Faaali atu le saunoaga lenei a Elder Jeffrey R. Holland o le Korama a Aposetolo e Toasefululua, ma fai i tamaiti aoga e faitau leotele:
Ata
Elder Jeffrey R. Holland
“Ina ia faavaeina se ekalesia lea o le a faaauauina pea i lalo o Lana taitaiga e ui lava ina sa aveeseina o Ia mai le lalolagi, na maliu atu Iesu … i le “mauga e tatalo, ua aoina lana tatalo i le Atua.
“Ua ao foi, ona valaau atu lea o ia i ona soo, ua filifilia e ia ni o latou e toasefulu ma le toalua, ua faaigoa foi i latou e ia o aposetolo’ [Luka 6:12–13].
“Mulimuli ane, na aoao mai Paulo e faapea, na silafia lava e le Faaola, e mautinoa o Lona maliu, o lea na faia ai lenei mea ina ia tuu atu ai i le Ekalesia se “faavae o … aposetolo ma perofeta, [tagai i le Efeso 2:19–20]. O nei Uso ma isi taitai o le Ekalesia o le a auauna atu i lalo o le taitaiga a le Keriso toetu.
“Aisea? O isi mafuaaga, ina “ia le toe tama ninii i tatou o loo felafoaiina e pei o peau, ma feaveaiina i matagi uma lava o mataupu, i le pepelo o tagata, i togafiti leaga ua saunia e faasese ai [Efeso 4:14]” (“Perofeta, Tagatavaai, ma Talifaaaliga,” Ensign po o le Liahona, Nov. 2004, 6–7).
O a auala ua e vaai ai i aposetolo ma perofeta o aso nei o saunia ni malosiaga faafaavae ma le mautu i le Ekalesia?
Na taitaiina e Iesu Keriso Aposetolo e ala i le Agaga Paia
Fai i tamaiti aoga e faitau leotele le Galuega 1:1–2. Ona fesili lea i le vasega:
Na faapefea i le tala a Luka ona faaauau e le Iesu Keriso toetu ona taitai Ana Aposetolo ina ua mavae Lona Afio Ae i le lagi? (Na Ia tuuina mai poloaiga ma faatonuga e ala mai i le Agaga Paia.)
Molimau atu ina ua mavae Lona Toetu ma le Afio Ae i le lagi, na taitaia e Iesu Keriso Aposetolo e ala i le galuega a le Agaga Paia. Ina ia fesoasoani i tamaiti aoga e vaai i faataitaiga o lenei taiala, vaevae le vasega i ni vaega se fa ma tuu atu ia i latou tofiga nei:
Suesue le Galuega 2:1–6, 14–26, ma vaai pe na faapefea ona fesoasoani le Agaga Paia ia Peteru ma Aposetolo i le aso o le Penetekoso.
Suesue le Galuega 4:1–13, 18–21, ma vaai pe na faapefea ona fesoasoani le Agaga Paia ia Peteru e tali atu i taitai Iutaia.
Suesue le Galuega 15:1–20, ma vaai pe na faapefea ona aafia faaiuga a Peteru i faaaliga ua mavae mai ia Iesu Keriso e ala mai le Agaga Paia ma le lagolago na tuuina atu e isi taitai o le Ekalesia i lenei faaiuga i le konafesi i Ierusalema.
A uma se taimi talafeagai, fai i tagata mai vaega uma e otooto mai mea na latou faitauina ma faamatala mai pe na faapefea ona taitaia e Iesu Keriso taitai o le Ekalesia e ala mai i le galuega a le Agaga Paia. Faamatala atu o le Agaga Paia e faia Ana tiute i lalo o le taitaiga a le Faaola (tagai i le Ioane 16:13–14).
Mafaufau e faaaoga le 3 Nifae 19:7–9, 19–20 e faaalia ai o taitai o le Ekalesia tatou te faitau i ai i le Tusi a Mamona na mauaina foi le fesoasoani a le Agaga Paia i la latou galuega.
Talanoaina ma tamaiti aoga le fesili lenei:
E faapefea ona e faamatala i se tasi pe aisea e taua ai le iloa faapea ina ua mavae Lona maliu, na faaauau e Iesu Keriso ona taitai Ana Aposetolo?
E faatonutonu e Iesu Keriso taitai o le Ekalesia i le aso e ala mai le Agaga Paia
Faaali atu saunoaga nei a Peresitene Thomas S. Monson ma Peresitene Henry B. Eyring o le Au Peresitene Sili (pe tufa atu i le vasega), ma fai i se tamaitiiti aoga e faitau leotele:
Ata
Peresitene Thomas S. Monson
“Ou te molimau atu … o lo tatou Faaola o Iesu Keriso o loo i le ao o lenei Ekalesia lea o loo tauaveina ai Lona suafa. Ua ou iloa o aafiaga sili ona matagofie i lenei olaga atoa o le lagonaina lea o Ana musumusuga a o Ia taitaiina i tatou i le faalauteleina o Lana galuega” (Thomas S. Monson, “Tepa i Tua ma Agai i Luma,” Ensign po o le Liahona, Me 2008, 88).
Ata
Peresitene Henry B. Eyring
“Na oo mai faaaliga ma musumusuga ia te ia [Peresitene Thomas S. Monson] a o o’u i ai, lea ua faamautuina ai ia te au o loo faamamaluina e le Atua [ki o le perisitua o loo umia e le perofeta]. O au o se molimau patino” (Henry B. Eyring, ”O Le Ekalesia Moni ma le Ola,“ Ensign po o le Liahona, Me 2008, 24).
E faapefea e nei fuaitau ona faaalia le fesootaiga i le va o le Ekalesia o le Feagaiga Fou ma le Ekalesia a Iesu Keriso o le Au Paia o Aso e Gata Ai? (Fesoasoani i tamaiti aoga ia malamalama i le upumoni lenei: E pei lava ona taitaia e Iesu Keriso Ana Aposetolo i le Feagaiga Fou, o loo Ia taitaia taitai o le Ekalesia i aso nei e ala i auala eseese, e aofia ai le galuega a le Agaga Paia. )
Valaaulia se tamaitiiti aoga e faitau le saunoaga lenei a Elder Jeffrey R. Holland o le Korama a Aposetolo e Toasefululua: Fai atu i le vasega e faalogo ma mafaufau pe aisea e manaomia ai e taitai o le Ekalesia le taitaia e le Faaola.
Ata
Elder Jeffrey R. Holland
“O le faavae o le tofi faaaposetolo ma le faaperofeta o le Ekalesia o le faamanuia lea i taimi uma ae maise lava i taimi o faigata po o tulaga matautia, o taimi atonu tatou te lagonaina ai le pei o ni tamaiti, o le fenumiai po o le le mautonu, atonu o sina fefe, o taimi o uiga le taupulea o tagata po o le le taupulea o le tiapolo o le a taumafai e faafenumiai po o le faasese po o le taitaisese. I le saunia mo taimi faapea pe a oo mai i o tatou vaitaimi, ua tofia ai le Au Peresitene Sili ma le Korama a le Toasefululua e le Atua ma outou lagolagoina e avea ma “perofeta, tagatavaai ma tali faaaliga,” faatasi ai ma le Peresitene o le Ekalesia e lagolagoina o leperofeta, tagatavaai, ma tali faaaliga, o le aposetolo sinia lea, ma e na o le pau lea o le tagata ua faataga e faaaogaina uma ia ki o faaaliga ma le taitaiga o le Ekalesia. I taimi o le Feagaiga Fou, i taimi o le Tusi a Mamona, ma taimi o ona po nei, o nei taitai e fausia mai ai maa faavae o le Ekalesia moni, e faatutuina ma maua mai lo latou malosi mai le maatulimanu sili, “le papa o lo tatou Togiola, o [Iesu] Keriso lea, o le Alo o le Atua,” Helamana 5:12]” (“Perofeta, Tagatavaai, ma Tali Faaaliga,” Ensign po o le Liahona, Nov. 2004, 7).
Tulitatao e ala i le fai atu o nisi po o fesili uma nei i tamaiti aoga:
O le a sou manatu i le uiga faapea o taitai o le Ekalesia o loo pulefaamalumalu o loo “faatulagaina faataamilo” ma mauaina le malosi mai le maatulimanu, o Iesu Keriso?
O a ni faamaoniga ua e vaaia pe o anafea foi na e lagonaina ai o loo taitaia e le Faaola i latou o loo pulefaamalumalu i le Ekalesia i aso nei?
O a auala ua fesoasoani ai le auai i konafesi aoao ia te oe e sau ia Keriso ma fausia i luga o le faavae o aposetolo ma perofeta?
Faaali atu pe tusi fesili nei i le laupapa. Valaaulia tamaiti aoga e mafaufau loloto i fesili ona tusi lea o a latou tali i a latou api talaaga patino po o api talaaga mo suesuega i tusitusiga paia e fuafua ai e faaleleia i na eria.
O le a se mea e mafai ona ou faia e faamalosia ai lau molimau i Aposetolo a le Faaola o aso nei?
O a auala e mafai ona ou faalagolago ai i perofeta o aso nei ina ia mafai ona ou faavae ai ia Iesu Keriso?