Lesona 26: O Le a Pule Iesu Keriso o se Tupu o Tupu ma le Faamasino o le Lalolagi
Lesona 26
O Le a Pule Iesu Keriso o se Tupu o Tupu ma le Faamasino o le Lalolagi
Folasaga
I le taimi o le Meleniuma, o Iesu Keriso “o le a pule o Ia o se Tupu o Tupu ma nofotupu foi o se Alii o Alii, ma o le a tootutuli tulivae uma ma tapua’i laulaufaiva uma ia te Ia. O le a tatou tutu atu taitoatasi e faamasino e Ia e tusa ma a tatou galuega ma manaoga o tatou loto” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3). O lenei lesona o le a fesoasoani i tamaiti aoga ia malamalama latou te manaomia le aua le faatali seia oo i le Meleniuma e fiafia ai i nisi o ana faamanuiaga.
Faitauga Faaopoopo
Mataupu 45, “O le Meleniuma,” Mataupu Faavae o le Talalelei [2009], 287–92.
Afai e maua: Mataupu e 37, “The Millennium and the Glorification of the Earth,” Doctrines of the Gospel Student Manual, lom. 2 (Church Educational System manual, 2010), 104–6.
Fai i tamaiti aoga e fai se lisi i se pepa o mea latou te masani ona tatalo ia maua pe tatalo foi i ai. Valaaulia ni nai tamaiti aoga e faasoa mai mea na latou tusia, pe afai latou te lagonaina le to’alelei e fai ai.
Valaaulia se tamaitiiti aoga e faitau leotele le vaega o le folasaga mo le Mataupu Faavae ma Feagaiga 65. (Afai e le maua e tamaiti aoga le vaega e 2013 o tusitusiga paia, faamatala atu faapea o lenei vaega o se faaaliga i le tatalo na tuuina atu e le Perofeta o Iosefa Samita.) Faamatala atu faapea i lenei faaaliga, ua tau mai e le Alii ia i tatou se mea e tatau ona tatou tatalo i ai, ae maise lava o i tatou o molimau i le faataunuuina o mea na valoia e tutupu i aso e gata ai.
Valaaulia ni tamaiti aoga se toalua e feauauai i le faitauina leotele o le Mataupu Faavae ma Feagaiga 65:1-2. Fai i le vasega e mulimuli i le faitauga, ma vaai mo le faamatalaga a le Alii i le faasalalauina atu o le talalelei. Ona fesili atu lea:
O le a le mamao o le a salalau atu i ai le talalelei a Iesu Keriso? (E tatau ona faailoa mai e tamaiti aoga le aoaoga faavae lenei: O le talalelei a Iesu Keriso o le a agai i luma i le iuga o le lalolagi. Tusi le aoaoga faavae lenei i le laupapa.)
E tusa ai ma le fuaiupu 2, o le a le maa ua tofiaina mai le mauga e aunoa ma ni lima?
A uma ona tali mai tamaiti aoga, faitau le saunoaga lenei a Peresitene Spencer W. Kimball (1895–1985):
Ata
Peresitene Spencer W. Kimball
“O le Ekalesia a Iesu Keriso o le Au Paia o Aso Gata Ai … o le malo lenei ua faatuina e le Atua o le lagi, e le mafai ona faaumatia pe suitulaga ai se tasi malo. … O le amataga o le seneturi e sefuluiva na oo mai ai le taimi … [lena] na faatuina ai le Ekalesia. I se vaega e toaitiiti lava, e na o le toaono tagata, i le faatusatusa i le maa e lei tofia i lima ae nutimomomoina isi malo ma e taavale mai ma faatumuina ai le lalolagi atoa. … O loo taavale i luma le maa e faatumulia ai le lalolagi” (“Ua Tofia le Maa ae lei Tofia e Lima,” Liahona, Oke 1976, 3, 9).
O le a le uiga o le avea ma se vaega o le malo o le Atua i le lalolagi?
Valaaulia se tamaitiiti aoga e faitau leotele le Mataupu Faavae ma Feagaiga 65:3-4. Valaaulia se isi tamaitiiti aoga e faitau leotele fuaiupu 5:-6. Fai i le vasega e mulimuli i le faitauga, ma vaai mo le fautuaga a le Alii i le mea e tatau ona tatou tatalo ai. Ona talanoaina lea o fesili nei:
E tusa ai ma nei fuaiupu, o le a le mea e tatau ona tatou tatalo ai a o tatou saunia mo le Afio Mai Faalua? (A o tali mai tamaiti aoga i lenei fesili, atonu e te manao e faatusatusa le fuaiupu 6 ma upu o le tatalo a le Alii i le Mataio 6:10.)
O a malo e lua o loo taua i le fuaiupu 6? (O le “malo o le Atua” i le lalolagi [po o le Ekalesia] ma le “malo o le lagi.”)
O le a le mea ua poloaiina e le Alii le “malo o le Atua” i le lalolagi e fai? (A o tali mai tamaiti aoga, faamamafa atu le aoaoga faavae lenei: O le malo o le Atua i le lalolagi, po o le Ekalesia a Iesu Keriso, o le a salalau atu i le salafa o le lalolagi ma saunia tagata o le lalolagi mo le nofotupu o Keriso i le Meleniuma.)
(Manatua: Atonu e te manao e faamamafa atu faapea i le taimi o le Meleniuma, o le a faaaoga e Iesu Keriso le faamasinoga faapolokiki ma faalelotu i le fogaeleele uma. [Afai e maua, tagai i le Mataupu Faavae ma Feagaiga Tusitaiala a Tamaiti Aoga, lom. 2 (Ofisa o Aoga a le Ekalesia tusi lesona, 2001), 139–40.])
Kopi le siata lenei i le laupapa pe saunia o se pepa e tufa atu i tamaiti aoga taitoatasi (aua le aofia ai mea o loo puipuia):
(O le filemu, lotogatasi, ma le amiotonu o le a faatuina i le lalolagi. O le a leai se mana o Satani i loto o tagata.)
(Manatua: Atonu e te manao e faamatala atu o lenei gaoioiga o le a faaalia ai le taua o le suesueina i nisi taimi o tusitusiga paia i autu. Afai tatou te suesueina tusitusiga paia i autu, e mafai ona tatou vaai i auiliiliga—e pei o mamanu ma autu—i se vaaiga e manino atu.)
Vaevae le vasega i ni vaega e taitoafa. Fai i le tamaitiiti aoga e toatasi i vaega taitasi e suesue mau fesootai ma tali le fesili i le laina muamua o le siata. Fai i le isi tamaitiiti aoga i le vaega e fai le mea lea e tasi i le laina lona lua, ma faapena ai lava. Faatonu tamaiti aoga e taulai faapitoa lava i upu ma fuaiupu e fesoasoani e tali ai a latou fesili atofaina. Atonu e te manao e fautuaina tamaiti aoga e faailoga mea ua latou maua. A maea se taimi talafeagai, valaaulia tamaiti aoga e talanoaina mea na latou aoaoina faatasi ma isi tamaiti o le latou vaega.
Manatua:Afai e maua i le taimi o le sauniuniga o le lesona, vaai i le tusi lesona lenei mo faamatalaga i le 1 Nifae 22:26: Tusi a Mamona Tusi Taiala a le Tamaitiiti Aoga [Ofisa o Aoga a le Ekalesia Tusi Lesona, 2009], 48.)
Ona fai atu lea o fesili nei:
Mai mea na tou talanoaina, o le a le mea e sili ona e tulimatai i ai i le Meleniuma? (A uma ona tali mai tamaiti aoga, tusi le aoaoga faavae lenei i le laupapa: O le Faaola o le a nofotupu Ia lava i le lalolagi i le taimi o le Meleniuma.)
O a nisi o auala e mafai ona tatou faatagaina ai le Faaola e nofotupu i o tatou lava olaga i le taimi nei?
O le a faapefea ona suia o tatou olaga pe afai tatou te faatagaina Keriso e nofotupu i o tatou olaga?
Faaiu i le saunoaga lenei mai ia Peresitene Spencer W. Kimball:
Ata
Peresitene Spencer W. Kimball
“Pe a saisaitia Satani i se aiga se tasi—pe a saisaitia Satani i se olaga se tasi—ua amatalia le Meleniuma i lena aiga, i lena olaga” (The Teachings of Spencer W. Kimball, lol. Edward L. Kimball 1982, 172).
Tuu atu i tamaiti aoga le taimi e mafaufau loloto ai i mea o le a latou faia e valaaulia ai le Faaola e nofotupu i o latou lava olaga ma aiga.
Fai i tamaiti aoga e vaai faalemafaufau pe faapefea ona latou tali atu pe a fesili mai se uo i le fesili lenei: “O ai o le a avea ma o tatou faamasino i le Aso o le Faamasinoga?” ma “O a mea o le a faamasinoina ai i tatou?” Faataga ni nai minute mo tamaiti aoga e suesue ai fuaitau o loo lisiina i le laupapa ma fatu se tali i lenei fesili. A maea ni nai minute, valaaulia tamaiti aoga e talanoaina a latou tali ma se tagata o loo nofo i o latou tafatafa. Ona fesili lea i le vasega:
O a mea ua e aoaoina e uiga i le Aso Faamasino? (E tatau i tamaiti aoga ona faailoa mai le aoaoga faavae lenei: O Iesu Keriso o le a avea ma o tatou faamasino.)
O a mea o le a faamasinoina ai i tatou e le Faaola? (O tali e tatau ona aofia ai le aoaoga faavae lenei: O le a faamasinoina i tatou e le Faaola e tusa ai ma a tatou upu, mafaufauga, ma amioga, ma manaoga o o tatou loto.)
Faitau leotele le saunoaga lenei a Elder Richard G. Scott o le Korama a Aposetolo e Toasefululua:
Ata
Elder Richard G. Scott
“Sa soifua lo tatou Matai i se soifuaga atoatoa e leai se agasala, ma o lea foi na saoloto ai o ia mai poloaiga a le faamasinoga tonu. E atoatoa o Ia i soo se uiga, e aofia ai le alofa, agaalofa, onosai, usiusitai, faamagalo atu, ma le lotomaualalo. …
“Ou te molimau atu o puapuaga ma mafatiaga e le mafai ona mafaufauina i le mafaufau i se tau e le mafuatia, na maua ai e le Faaola Lana aia tatau e avea ai ma o tatou Fautua, o lo tatou Togiola, ma lo tatou Faamasino Mulimuli” (“E Mafai e le Togiola ona Faamautu Lou Filemu ma le Fiafia,” Ensign po o le Liahona, Nov. 2006, 42).
E faapefea ona aafia ou lagona e uiga i le Faamasinoga Mulimuli i le iloaina lea o Iesu Keriso o le a avea ma o tatou “Faamasino Mulimuli”?
Uunaia tamaiti aoga e tusi le fesili lenei i se kata po o se fasi pepa ma faaali atu i se nofoaga e iloagofie ai: O le a faapefea ona ou faatagaina Iesu Keriso e nofotupu i lou olaga i le aso?