Seminare ma Inisitituti
Lesona 27: O Iesu Keriso O Le Malamalama, o le Ola, ma le Faamoemoe o le Lalolagi

Lesona 27

O Iesu Keriso O Le Malamalama, o le Ola, ma le Faamoemoe o le Lalolagi

Folasaga

O Iesu Keriso “o le malamalama, o le ola, ma le faamoemoe o le lalolagi” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3). O lenei lesona o le a fesoasoani i tamaiti aoga e malamalama faapea a o latou o mai ia Keriso, o le a latou maua le faamoemoe sili atu mo le ola faavavau ma o le a latou maua le naunautaiga sili atu e onosaia faigata o le olaga.

Faitauga Faaopoopo

Fautuaga mo le Aoaoina Atu

Ioane 1:1–9; Mataupu Faavae ma Feagaiga 88:6–13

O Iesu Keriso o le Malamalama o le Lalolagi

Faitau leotele le saunoaga lenei a Peresitene Dieter F. Uchtdorf o le Au Peresitene Sili. Fai i le vasega e faalogo mo tulaga e ono maua ai e se tagata le lagona faapei ua siomia i latou e le pogisa:

Peresitene Dieter F. Uchtdorf

“E i ai sa’u atavali i lo’u ofisa e faaulutalaina Faitotoa i le Malamalama. Sa fatu e sa’u uo, o le tusiata Tenimaka o Johan Benthin, o le sa avea ma uluai peresitene o le siteki i Copenhagen, Tenimaka.

“O loo faaalia i le atavali lea se potu pogisa o loo i ai se faitotoa o loo matala lea e susulu mai ai le malamalama. E mata’ina lava ia te au ona o le malamalama lea e sau mai le faitotoa e le o malamalama uma ai le potu atoa—ae ua na o le avanoa o loo i luma tonu o le faitotoa.

“Ia te au, o le pogisa ma le malamalama i lenei atavali o se faataoto mo le olaga. O se vaega o lo tatou tulaga o tagata i la le tino lea i nisi taimi e lagonaina e pei o loo siomia i tatou e le pogisa. Atonu ua maliu se tasi e pele ia i tatou; atonu ua se ese se tasi o le fanau; atonu ua tatou maua i se faamai ua tatou atuatuvale ai; atonu o i ai ni o tatou luitau faalegaluega ma ua avea ma avega mamafa ona o le masalosalo po o le fefe; pe atonu ua tatou lagonaina le tuuatoatasi po o le le alofaina.

“Ae e ui atonu tatou te lagonaina le le mautonu i le lotolotoi o o tatou tulaga o i ai nei, ae ua folafola mai e le Atua le faamoemoe o Lona malamalama—Ua Ia folafola mai e faamalamalama le ala o loo i o tatou luma atu ma faaali mai ia i tatou le auala e alu ese ai mai le pogisa” (“O le Faamoemoe o le Malamalama o le Atua,” Ensign po o le Liahona, Me 2013, 70).

  • O a ni tulaga e mafai ona maua ai e se tagata le lagona o le siomia e le pogisa?

  • O le a le saunoaga a Peresitene Uchtdorf i le mea e mafai e le Atua ona fai pe a tatou maua lenei lagona?

A uma ona tali mai tamaiti aoga, faamatala atu o lenei lesona o le a taulai atu i le ala tatou te maua ai le malamalama ma le faamoemoe mai le Atua, e tusa lava po o le a le tulaga o i ai.

Fai i se tamaitiiti aoga e faitau leotele le Ioane 1:1–5. Valaaulia le vasega e mulimuli i le faitauga, ma vaai mo upu ma fuaitau na faaaoga e Ioane e faamatala ai le Faaola. A o lipoti mai e tamaiti aoga mea na latou maua, tusi le aoaoga faavae lenei i le laupapa: O Iesu Keriso o le Malamalama o le Lalolagi.

Ina ia fesoasoani i tamaiti aoga e faateleina lo latou malamalama i lenei aoaoga faavae, fai ia i latou e faitau le leoa le Ioane 1:6–9. Ona fesili atu lea:

  • O a mea ua aoao mai e nei fuaiupu e uiga i le matafaioi a Iesu Keriso o le Malamalama o le Lalolagi?

  • E faapefea ona fesoasoani vaefaamatalaga mo le fuaiupu 9 e te malamalama ai i le ala e mafai ai ona avea Iesu ma Malamalama o le Lalolagi i tagata uma?

Tau i tamaiti aoga faapea i tusitusiga paia, o le malamalama “lea na te faamalamalamaina tagata uma” Ioane 1:9, po o le Malamalama o Keriso, “e masani ona taua i nisi taimi o le Agaga o le Alii, o le Agaga o le Atua, o le Agaga o Keriso, po o le Malamalama o le Ola.” (Faamaoni i le Faatuatua: O se Tusitaiala o le Talalelei [2004], 101). O le Malamalama o Keriso ua faamatalaina i le Mataupu Faavae ma Feagaiga 88.

Tofi tamaiti aoga e galulue taitoalua. Fai ia i latou e suesue le Mataupu Faavae ma Feagaiga 88:6–13 ma faailoa mai le ala ua avea ai Iesu Keriso ma punaoa o le malamalama o le ola. A maea se taimi talafeagai, fai atu fesili nei:

  • E faapefea e le malamalama o Keriso ona aafia ai foafoaga uma a le Tama Faalelagi?

  • O a mea ua tau mai e upumoni ua faamaumauina i nei fuaiupu e fai e le Malamalama o Keriso mo se tagata?

  • Aisea e fesoasoani ai le iloa faapea o le malamalama lea e pulea le lalolagi “o le malamalama lava lea e tasi ua faapupulaina o outou malamalamaaga”? (MF&F 88:11).

Faaali atu le saunoaga lenei a Dieter F. Uchtdorf, ma fai i se tamaitiiti aoga e faitau leotele:

Peresitene Dieter F. Uchtdorf

“E moni lava le malamalama o le Atua. Ua avanoa mo tagata uma! Na te avatua le ola i mea uma [tagai i le MF&F 88:11–13]. Ua i ai le mana e faamāmā ai le tiga o se manua aupito loloto. E mafai ona faamaloloina le tuuatoatasi ma le gasegase o o tatou agaga. E oo lava i taimi o faigata, na te mafai lava ona aumaia se faamoemoe susulu. E mafai ona faamalamalamaina ni taimi aupito sili ona faanoanoa. E mafai ona faamalamalamaina le ala i o tatou luma ma taitai atu i tatou i pouliuli aupito sili ona pogisa i se folafolaga o se taeao fou.

“O le ‘Agaga lava lea o Iesu Keriso,’ lea e tuu maia le ‘malamalama i tagata taitoatasi e sau i le lalolagi’ [MF&F 84:45–46]” ( “O le Faamoemoe o le Malamalama o le Atua,” Ensign po o le Liahona, Me 2013, 75).

Talanoaina fesili nei ma lau vasega:

  • I le saunoaga a Peresitene Uchtdorf, o a faamanuiaga e oo mai le malamalama ua ofoina mai e le Tama i le Lagi ia i tatou e ala mai ia Iesu Keriso?

  • O anafea na e maua ai faamanuiaga na saunoa i ai Peresitene Uchtdorf?

Tusi le faamatalaga lenei e lei maea i luga o le laupapa:

O Le Malamalama o le Lalolagi e tuuina mai …

Valaaulia tamaiti aoga e toe faitau le Mataupu Faavae ma Feagaiga 88:13, ma vaai mo se fuaitau e faauma ai le saunoga i le laupapa. Fesili atu:

  • E faapefea e le matafaioi a le Faaola i le avea ai ma Malamalama o le Lalolagi ona fesootai ma Lana matafaioi o le Ola o le Lalolagi?

  • O a auala e fesootai ai le malamalama ma le ola? (E mafai ona e faasino atu faapea o Iesu o le ”ola o le lalolagi aua o lona toetu ma lana togiola ua faaolaina ai i tatou mai le oti faaletino faapea le oti faaleagaga” [Dallin H. Oaks, “O le Malamalama ma le Ola o le Lalolagi,” Liahona, Ian. 1988, 60].)

  • O le a le taunuuga pe afai o le malamalama ma le mana o le Faaola o le a le toe faatumauina mea uma? (O le a le toe i ai se ola.)

Faamatala atu o tusitusiga paia ua maua ai faataitaiga o ala ua avea moni ai Iesu ma Malamalama o le Lalolagi. I le taimi o le maliu o le Faaola, na tolu aso o le pogisa, o se faatusa o le Malamalama o le Lalolagi ua tuua le lalolagi (tagai i le 3 Nifae 8:20–23). I le isi itu, o le fanau mai o le Faaola na faatasi ai ma se fetu ma malamalama tetele i le lagi faapea ma le malamalama mo aso e tolu (tagai i le Helamana 14:3–5; 3 Nifae 1:15, 21).

Salamo 146:5; Roma 5:3–5; 15:13; Eteru 12:4, 32; Moronae 7:3, 40–41

O Iesu Keriso o le faamoemoe o le lalolagi

Faamatala i tamaiti aoga faapea o le upu faamoemoe e mafai ona tele uiga. I le tusiga o le talalelei a Iesu Keriso, o le faamoemoe o “o le faalagolago i le faamoemoe ma moomooga i faamanuiaga folafolaina o le amiotonu” (Taiala i Tusitusiga Paia, “Faamoemoe”; scriptures.lds.org). O le Faaola e ta’ua i nisi taimi “o le faamoemoe o le lalolagi” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3).

Faaali atu fesili ma mau fesootai nei, pe tusi i luga o le laupapa:

O le a le totonugalemu o le faamoemoe moni? (Eteru 12:4, 32; Moronae 7:3, 40–41)

O le a le mea e fai e le faamoemoe mo i tatou i lenei olaga? (Salamo 146:5; Roma 5:3–5; 15:13)

Vaevae le vasega i ni vaega toalaiti. Valaaulia vaega e suesue fuaitau o mau taitasi, ma vaai mo upu ma fuaitau taua e uiga i le faamoemoe, ma talanoaina a latou tali i fesili. A uma se taimi talafeagai, fai i vaega e fatu se tasi pe lua ni fuaitau o aoaoga po o mataupu faavae e otootoina mea na latou aoaoina e uiga i le aoaoga faavae o le faamoemoe. Valaaulia vaega e faasoa mai a latou fuaitau i le vasega. Ia mautinoa ua malamalama tamaiti aoga faapea o le faamoemoe o le mautinoa lea, e ala mai le Togiola a Iesu Keriso ma le usiusitai i poloaiga, o le a tatou maua ai faamanuiaga folafolaina, e aofia ai le ola faavavau. Pe a lava le taimi, atonu e te manao e talanoaina fesili nei:

  • O le a le uiga o le upu moni lava i le fuaitau “e mafai moni lava ona  faamoemoe mo se lalolagi sili atu ona lelei” (Eteru 12:4) e tau mai ia te oe? (Mautinoa, mausali, po o le moni lava. Atonu e te manao e fautua atu i tamaiti aoga e tusi lenei faamatalaga i a latou tusitusiga paia i talaane o le Eteru 12:4.)

  • E mafai faapefea e le faamoemoe, e pei ona faamatalaina i nei fuaiupu, ona “fai ma  taula i agaga o tagata” ma fesoasoani ia i tatou “ia mautinoa ma mausali ai, ma faatumulia ai pea i galuega lelei e le aunoa”? (Eteru 12:4).

Faaali atu le saunoaga lenei, ma fai i se tamaitiiti aoga e faitau leotele:

“Pe a maua e i tatou le faamoemoe, tatou te faatuatuaina folafolaga a le Atua. Ae ia iloa o ia o lē e “faia galuega o le amiotonu” o le a tatou ‘maua [lo tatou] taui, o le filemu lea i le lalolagi lenei ma le ola e faavavau i le lalolagi a sau’ (MF&F 59:23). Na aoao mai e Mamona e faapea o sea faamoemoe ua na o le pau le auala e oo mai ai, e ala lea i le Togiola a Iesu Keriso [tagai i le Moronae 7:41]” (Faamaoni i le Faatuatua: O se Tusitaiala o le Talalelei [2004], 85).

  • E faapefea e le faatuatua ia Iesu Keriso ma Lana Togiola ona taua i le atiina ae o le faamoemoe moni? E mafai faapefea e lenei mea ona fesoasoani ia te oe ia malamalama ai i le ala e avea ai Iesu Keriso ma faamoemoe o le lalolagi? (Afai tatou te maua le faamoemoe ia Iesu Keriso, e mafai ona tatou vaai i tua atu o o tatou faigata ma faanoanoa o le olaga nei ae taulai atu i faamanuiaga e maua mai i Lana Togiola, e pei o le toetu ma le ola faavavau.)

  • O le a se mea e mafai ona e faia ina ia ola ai ma se faamoemoe e sili atu i lenei olaga?

Pe a uunaia e le Agaga Paia, e mafai ona e fai i tamaiti aoga e faasoa mai se taimi na avea ai lo latou faamoemoe i le toetu ma le ola faavavau e ala atu ia Iesu Keriso o se faamanuiaga ia i latou lava ma isi.

Faitauga a Tamaiti Aoga