Lesona 25: O Le a Toe Foi Mai Iesu Keriso I Se Aso
Lesona 25
O Le a Toe Foi Mai Iesu Keriso I Se Aso
Folasaga
Na vavalo mai perofeta i tupulaga uma o le a toe foi mai Iesu Keriso i le lalolagi. Na faamaumauina e Isaia, “Ona faaalia mai ai lea o le pupula o Ieova, e vaaia lava e tagata uma faatasi” ( Isaia 40:5). O nei valoaga e fesoasoani i soo o Iesu Keriso e saunia ai i latou lava ma isi mo lenei mea e tasi ma ia maua ai le faamoemoe, i le iloa e silafia e le Tama Faalelagi le lumanai ma o loo saunia le lalolagi mo le toe foi mai ma le mamalu o Lona Alo.
O le a se mea ua e aoao mai lenei fuaitau e uiga i le Afio Mai Faalua? (A o tali mai tamaiti aoga, faamamafa atu le upumoni lenei: Pe a toe afio mai le Faaola, o le a Ia afio mai i le mana ma le mamalu faatasi ma au agelu uma o le lagi. Tusi le upumoni lenei i luga o le laupapa.)
Faamatala i tamaiti aoga e tele vaega o le Afio Mai Faalua o Iesu Keriso e mafai ona suesueina i tusitusiga paia, e pei o faailoga o le a muamua mai i Lona afio mai ma le faafanoga o e amioleaga i Lona afio mai. O lenei lesona o le a taulai faapitoa lava i le Faaola, Lona afio mai i le mana ma le mamalu ma pe faapefea ona tatou saunia mo lena mea maoae o le a tupu . Ia saunia se kopi o le siata mo tamaiti aoga uma “Valoaga o le Afio Mai Faalua.” Valaaulia tamaiti aoga e galulue i paga, ma tuu atu i paga taitasi le lua pe tolu laina o fuaitau o mau e suesue i ai (ia mautinoa ua atofaina atu laina taitasi). Fai atu i paga taitasi e tusi i le siata le mea o loo aoao mai e a latou fuaitau atofaina e uiga i le Afio Mai Faalua o Iesu Keriso. A uma se taimi talafeagai, fai i tamaiti aoga e lipoti mai mea na latou maua.
E tusa ai ma mea na e suesueina, o le a faapefea ona faaalia mai le mana ma le mamalu o Iesu Keriso i Lona afio mai?
O a valoaga e uiga i le Afio Mai Faalua e tulagaese ia te oe? Aisea?
(Manatua: Ao lei faaauauina, e mafai ona e tagai i tua i le siata ma fesili i tamaiti aoga po o lea le taua o le suesueina o tusitusiga paia i lenei auala—vaai mo fesootaiga, mamanu, ma autu.)
E saunia i tatou e perofeta mo le Afio Mai Faalua o Iesu Keriso
Faaali atu le saunoaga lenei a Elder Sterling W. Sill (1903–1994) o le Fitugafulu, ma valaaulia se tamaitiiti aoga e faitau leotele:
Ata
Elder Sterling W. Sill
“O le afio mai faalua o Keriso e sili atu ma le 1,500 taimi o loo taua ai i le Feagaiga Tuai ae 300 taimi i le Feagaiga Fou. Afai na silafia e le Atua o lenei mataupu e taua tele, e tatau la ona ia finagalo ia i tatou e fai i ai se mea” (i le Conference Report, Ape. 1966, 19).
Aisea i lou manatu e taua ai le faaaofia e tusitusiga paia le tele o valoaga e uiga i le Afio Mai Faalua?
Faaali atu fuaitau o mau nei, pe tusi i le laupapa. Valaaulia tamaiti aoga e faatusatusa le leoa ma sue eseesega o nei fuaitau, ma vaai mo ni auala se lua tatou te saunia ai mo le Afio Mai Faalua.
A uma se taimi talafeagai, talanoaina nisi po o fesili uma nei:
O le a mafai faapefea ona e otootoina i se fuaitau se tasi upumoni na aoaoina mai i nei fuaitau? (Ia mautinoa e faaleo mai e tamaiti aoga se manatu faapea: O valoaga e uiga i le Afio Mai Faalua o Iesu Keriso na tuuina mai ma faamaumauina i tusitusiga paia ina ia tatou saunia ai i tatou lava ma isi mo lena aso.
Aisea tatou te manaomia ai le saunia o isi ae le na o i tatou lava mo le Afio Mai Faalua o Iesu Keriso?
O a nisi auala e mafai ona tatou fesoasoani ai i isi e saunia mo le toe foi mai o le Alii?
Pe e te manatu o le fesoasoani i isi ia saunia mo le Afio Mai Faalua o le a fesoasoani foi ia te oe e saunia ai?
Valaaulia se tamaitiiti aoga e faitau leotele mai le faamatalaga lenei mai ia Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“E ui ina leai so tatou malosiaga e fetuunai ai le Afio Mai Faalua ma e le mafai ona iloa lona taimi tonu, ae e mafai ona tatou faateleina a tatou lava sauniuniga, ma taumafai e uuna’ia sauniuniga a i latou o tatou tuaoi. …
“E faapefea pe afai o taeao le aso e afio mai ai o Ia? Afai sa tatou iloa o taeao le aso tatou te faafetaia’i ai i le Alii—e ala i lo tatou oti faafuasei, po o Lona toetu faafuase’i mai foi—o le a sa tatou mea e fai i le aso? O a ni mea o le a tatou ta’uta’u atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?
“Afai o le a tatou faia na mea i lena taimi, aisea e le fai ai nei loa? Aisea e le sailia ai le filemu a o mafai ona maua? Afai ua lata ina uma a tatou lamepa o sauniuniga, ia tatou amata nei loa ona toe utu” (“Sauniuniga mo le Afio Mai Faalua,” Ensign po o le Liahona, Me 2004, 8, 9).
O le a se mea e mafai e se tagata ona fai e faanatinati ai ana sauniuniga mo le Afio Mai Faalua?
O le a le tulaga pagatia o le faatuai o la tatou sauniuniga?
Faamatala i tamaiti aoga, i le toe o ni nai aso maliu Iesu Keriso, na fesili ai Ona soo e uiga i faailoga o le a muamua mai i Lona Afio Mai Faalua (tagai i le Mataio 24:3; Iosefa Samita—Mataio 1:4). E maua le tali a le Faaola i le Mataio 24–25. Valaaulia ni nai tamaiti aoga e feauauai i le faitauina leotele o le Mataio 25:1–13, ae fai i le isi vaega o le vasega e mulimuli i le faitauga. Ona taitaia lea o tamaiti aoga i le talanoaina o le faataoto i taupou e toasefulu e faaaoga ai nisi po o fesili uma nei ma upusii:
O le a le mea e te mafaufau e valea ai mea na fai e nei taupou e toalima? (O taupou valea e lei faia mea e tatau ona fai e saunia ai mo le afio mai o le Faaola. O le tauivi ma le maelega e saunia mo le afio mai o le Faaola e ala i le faia o mea ua tatou iloa e sao e aumaia ai faamanuiaga maoae, e aofia ai le saunia e faatasi atu i le Faaola pe a afio mai o Ia.)
O le a le taua o i ai i le fuaitau “ina o ia outou e faafetaiai ia te ia”? (fuaiupu 6). Aisea e le faatalitali ai ma le onosai sei afio mai o Ia ia te oe? (Tagai foi i le MF&F 133:5, 10, 14, 19.)
Aisea na le mafai ai e taupou popoto ona faasoa mai a latou suauu i taupou valea?
O le a le mea ua aoao mai e lenei faataoto ia te oe e uiga i le saunia e faafetaiai le Faaola? (E ui atonu latou te faaaogaina ni upu eseese, e mafai e tamaiti aoga ona faaleo mai se mataupu faavae faapei o lenei: E ala mai i le usiusitai i poloaiga a le Atua, e mafai ai ona tatou saunia mo le Afio Mai Faalua o Iesu Keriso. Tagai foi i le MF&F 45:56–57.)
Sui le talanoaga i saunoaga nei a Elder Dallin H. Oaks ma Elder David A. Bednar o le Korama a Aposetolo e Toasefululua:
Ata
Elder Dallin H. Oaks
“O [le faataoto i taupou e toasefulu], na fetalai mai ai le Alii: ‘E faataunuuina foi i lea aso, ou te sau ai i lo’u mamalu le faataoto na ou fai atu ai e uiga i taupou e toasefulu’ (MF&F 45:56).
“I le mataupu e 25 o le Mataio, o lenei faataoto o loo faatusatusa ai taupou valea e toalima ma taupou popoto e toalima. Sa valaaulia taupou uma e toasefulu i se tausamaaga o le faaipoipoga, ae na o le afa o i latou sa saunia a latou suauu i a latou lamepa ina ua sau le faatoafaiava. O le toalima sa saunia, sa ulufale atu i le tausamaaga, ona tapuni ai lea o le faitotoa. O le toalima sa leai ni a latou sauniuniga, sa tuai mai. Ua tapuni le faitotoa, ma sa le i faaulufaleina mai i latou e le Alii, ma sa ia faapea atu, ‘Ou te le iloa outou’ [Mataio 25:12]. ‘O lea ia outou mataala ai’ sa faaiu atu ai le fetalaiga a le Faaola, ‘aua tou te le iloa le aso po o le ituaso e sau ai le Atalii o le tagata’ [Mataio 25:13].
“O le matua taufaamata’u lava o le savali o lenei faataoto. O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava. Ae sa na o le afa o i latou sa saunia ina ua sau o ia” (Dallin H. Oaks, “Sauniuniga mo le Afio Mai Faalua,” Ensign po o le Liahona, Me 2004, 8).
Ata
Elder David A. Bednar
“Pe na manatu faapito ea taupou popoto ma lē mananao e faasoa atu, pe na latou ta’u sa’o atua e le mafai ona nonoina le suauu o le liuaina? Pe mafai ea ona e tuuina atu i se isi tagata le malosiaga faaleagaga lea e te maua mai i le usiusitai e le aunoa i poloaiga? Pe mafai ona pasi atu i se tasi o manaomiaina, le malamalama e maua mai i le suesue o tusitusiga paia ma le maelega ma le mafaufau loloto? Pe mafai ona sii atu i se tagata o loo feagai ma mafatiaga po o se luitau tele, le filemu e aumaia e le talalelei i se tagata faamaoni o le Au Paia o Aso e Gata Ai? O le tali manino lava i nei fesili o le leai.
“E pei ona faamamafa lelei mai e taupou popoto, e tatau ia i tatou taitoatasi ona ‘faatauina mo i tatou lava.’ E pei ona faamamafa lelei mai e taupou popoto, e tatau ia i tatou taitoatasi ona “faatauina mo i tatou lava.” Sa le’i faamatalaina e nei tamaitai musuia se faiga faapisinisi; ae, sa latou faamamafaina lo tatou tiutetauave faaletagata lava ia, e faamumu a tatou lamepa o molimau ma ia lava se sapalai o le suauu o le liuaina. O lenei suauu taua, e maua i le tasi le mataua i le taimi—“o lea upu [ma] lea upu lea mataupu ma lea mataupu” (2 Nifae 28:30), i le onosai ma le faifai pea. E leai ni auala ‘alo o i ai; leai ni taimi faafuasei e tapena ai” (David A. Bednar, “Faaliliuina i le Alii,” Ensign po o le Liahona, Nov. 2012, 109).
Aisea e tatau ai ona tatou faananatiina a tatou sauniuniga mo le Afio Mai Faalua o Keriso?
Mafaufau e tusi le fuaitau lenei e leo uma i le laupapa ma fai i tamaiti aoga e mafaufau loloto ona tusi lea i lalo pe faapefea ona latou faaumaina:
Ina ia faanatinatiina lau sauniuniga mo le Afio Mai Faalua o Keriso, o le a ou .
Uunaia tamaiti aoga e mafaufau i ni auala faapitoa e mafai ona latou fesoasoani ai i aiga, uo, ma isi ia malamalama i le taua o le saunia mo le toe afio mai o Iesu Keriso. Uunaia tamaiti aoga e fai se tautinoga i le Alii o le a latou mulimuli i soo se uunaiga lava latou te mauaina.