O molimau a ona po nei ua folafola mai: “Matou te molimau atu i le avea ai ma Ana Aposetolo faauuina i le ala e tatau ai—o Iesu o le Keriso Soifua”(“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3). Ona o le lalolagi ua foliga mai ua le amanaiaina le natura moni o Iesu Keriso ma Lana sootaga i le Atua le Tama, e taua le i ai o ni molimau faamaoni o le Alo Pele o le Atua. O lenei lesona o le a fesoasoani i tamaiti aoga e faailoa mai lenei manaomia ma aoao pe faapefea ona latou mafaia ona sili atu ona molimau ia Iesu Keriso i aiga, uo, ma tuaoi.
O ai Iesu Keriso, ma aisea e te talitonu ai ia te Ia?
Tau atu i tamaiti aoga o le toatele o tagata e tali i lenei fesili i le tuuina atu o se molimau. O se tasi o na molimau ua faaleoina i le viiga “Ua Ou Iloa Lou Faaola” (Viiga, nu. 73). Saunia upu o lenei viiga mo le vasega, ma vaevae tamaiti aoga i ni vaega se fa. Atofa atu se fuaiupu e ese o le viiga i vaega taitasi, ma fai atu ia i latou e faitau upu. A maea le taimi talafeagai, fai atu fesili nei:
O a upu po o fuaitau ua faaaogaina i lenei viiga e faaleo ai po o ai Iesu Keriso ma le mea ua Ia faia mo i tatou? (O tali e tatau ona aofia ai “lou Tupu faavavau,” “lau uo lelei, alofa tumau,” “lou Tupu, lou Alii paia,” “lou Faaola.” Ua Ia faamanuiaina i tatou i Lona alofa, fautua mo i tatou, taiala i tatou, faamafanafana i tatou, ma tuuina mai ia i tatou meaai o aso uma.)
O a upu ua faaaoga e lenei viiga e faamatala ai le ala e aafia ai i tatou i se molimau ia Iesu Keriso? (O tali e tatau ona aofia ai “lagolelei” ma le “olioli.”)
Tau atu i le vasega o le Au Peresitene Sili ma le Korama a Aposetolo e Toasefululua na folafola faalauaitele mai le latou molimau faatasi ia Iesu Keriso i le “O Le Keriso Soifua: O Le Molimau a le Au Aposetolo” (tagai i le Ensign po o le Liahona, Ape. 2000, 2–3). Saunia mo tamaiti aoga taitasi se kopi o lenei molimau, ma faamatala atu o lenei kosi e aumaia le tele o ana autu o lesona mai aoaoga ma mataupu faavae i lenei tusiga musuia. Valaaulia se tamaitiiti aoga e faitau leotele le parakalafa muamua:
“A o tatou faamanatuina le soifua mai o Iesu Keriso i le lua afe tausaga talu ai, matou te tuuina atu la matou molimau i le moni o Lona soifua lē mafaatusalia ma le mama e lē gata o Lana taulaga togiola maoae. E leai lava se isi ua i ai se aafiaga ua matuai loloto naua o i latou uma na soifua ma o le a soifua ai i luga o le fogaeleele” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2).
O le a le faatosinaga e te manao i lau suesuega ia Iesu Keriso ma Lana talalelei faavavau ia e mauaina i lenei kuata? (A o tali mai tamaiti aoga, atonu e te manao e faamamafa atu o se suesuega faamaoni o le soifuaga o Iesu Keriso o le a fesoasoani ia i tatou e faafetaia le faatosinaga maoae na ia te Ia ma e mafai ona tatou maua i o tatou olaga.
O a ni auala na faatosina ai e le Faaola i latou uma na soifua ma o le a soifua i le lalolagi? (A o tali mai tamaiti aoga, ia mautinoa e faamamafa atu le Togiola aoao a le Faaola.)
Tau atu i tamaiti aoga o lenei kosi o le a taulai atu i le galuega faavavau a le Faaola i Lona muai olaga, faaletino ma le olaga ina ua mavae le olaga faaletino. A o suesue e tamaiti aoga le Faaola ma le tele o ana matafaioi faalelagi, o le a faalolotoina lo latou alolofa ma le molimau ia te Ia.
Na tusia tusitusiga paia ina ia mafai ona talitonu tagata ia Iesu Keriso
Fesili atu i tamaiti aoga pe fia ni tusi latou te manatu na tusia e uiga ia Iesu Keriso. Faamatala atu soo se suesuega lelei lava o le soifuaga o Iesu Keriso e tatau ona totonugalemu i tusitusiga paia. Valaaulia ni tamaiti aoga se toatolu e feauauai i le faitauina leotele o fuaitau o mau nei: Ioane 20:30–31; 1 Nifae 6:4; ma 2 Nifae 25:23, 26. Fai atu i le vasega e mulimuli i le faitauga, ma vaai mo mafuaaga e avea ai tusitusiga paia ma punaoa taua pe a suesueina le galuega faavavau a le Faaola.
O a mataupu faavae o loo aoaoina mai e nei fuaitau e uiga i le faamoemoega o tusitusiga paia? (E ui atonu e faaaogaina e tamaiti aoga ni upu eseese, e tatau ona latou faailoa mai le mataupu faavae lenei: A o tatou suesue i fuaitau o mau e uiga i le Faaola, o la tatou molimau ia te Ia o le a faamalosia ma o le a tatou faalatalata atili atu ia te Ia.
Faaali atu le saunoaga lenei a Elder D. Todd Christofferson o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder D. Todd Christofferson
“O le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama ma Lona Alo, o Iesu Keriso. …
“… O le faatuatua e oo mai mai le molimau a le Agaga Paia i o tatou agaga, Agaga i le agaga, a o tatou faalogo i le afioga a le Atua. Ma e matua le faatuatua pe a faaauau pea ona tatou fiafia i le afioga a le Atua” (“O Le Faamanuiaga o Tusitusiga Paia,” Ensign po o le Liahona, Me 2010, 32, 35).
O a auala e mafai ai e tusitusiga paia ona fesoasoani ia i tatou e faamalosia lo tatou faatuatua ma faalatalata atili ia Iesu Keriso?
Na faapefea ona faamalosia lou faatuatua ma lau molimau ia Iesu Keriso e ala i le suesueina o tusitusiga paia?
Tuu atu i tamaiti aoga taitasi se kopi o punaoa ua lisiina atu i le vaega Faitauga a le Tamaitiiti Aoga i lenei kosi. (E mafai ona fai se kopi pepa, po o le mafai ona e faamatala i tamaiti aoga le mea e mafai ona latou maua ai kopi faafuainumera.) Uunai tamaiti aoga ia faia le faitauga a le tamaitiiti aoga mo lenei kosi o se vaega o lo latou suesuega faaletusitusigapaia i aso uma i lenei kuata. Ia faamautinoa i tamaiti aoga a o latou usitai e galue i lenei luitau, o le a aoaoina i latou e le Agaga Paia ma o le a faalatalata atili ai i le Faaola.
Avea ma Molimau a Iesu Keriso
Faamatala i tamaiti aoga e le lava le na ona suesue e uiga i le Faaola i tusitusiga paia. E tatau foi ona tatou maua se molimau faaleagaga patino po o se molimau e ala mai i le mana o le Agaga Paia faapea o Iesu o le Keriso, le Toatasi na Faauuina, lo tatou Faaola ma le Togiola. Faasoa atu i le vasega le saunoaga lenei a Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“E le mafai ona tatou faalagolago i molimau a isi tagata. E ao ona tatou iloaina mo i tatou lava. Na saunoa Peresitene Gordon B. Hinckley, ‘Ua i ai i Au Paia taitasi o Aso e Gata Ai, le matafaioi e iloa ai mo ia lava, faatasi ai ma se mautinoa e aunoa ma se masalosalo, o Iesu o le Alo soifua toetu o le Atua’ (“Aua le Fefe e Faia Mea Lelei,” Liahona, Iulai 1983, 132).
“O le faapogai o lenei malamalama mautinoa ma le talitonuga maumaututu, o le faaaliga mai le lagi, ‘aua o le agaga o le valoaga o le mau lea ia Iesu’ (Faaaliga 19:10).
Tatou te mauaina lenei molimau pe a saunoa mai le Agaga Paia i le agaga o i totonu ia i tatou. …
“O le autu o lenei molimau o le faatuatua lea e le aunoa, ma le malamalama ia Iesu Keriso ma Lana misiona paia” (“O Le Mana o se Molimau Patino,” Ensign po o le Liahona, Nov. 2006, 38).
Aisea e te manatu ai e tatau ona totonugalemu Iesu Keriso ia tatou molimau?
O le a sou lagona i le mea e finagalo Iesu Keriso e te faia i lau molimau ia te Ia?
Faaali atu le saunoaga lenei a Elder D. Todd Christofferson o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder D. Todd Christofferson
“E tatau ona vaaia e tagata ia i tatou se vaega o Iesu Keriso. O a tatou amio, tautala, vaai, e oo lava i manatu ia atagia mai ai o Ia, ma Ona ala. … E ui lava tatou te le’i i ai i le taimi o Lana galuega, a tatou saili i tusitusiga paia, ua tatou vaaia Iesu ma mea na Ia fetalai mai ai ma faia. Ma, a’o tatou mulimulitaia lea alafua, ua tatou molimau atu mo Ia.” (“Avea o se Molimau a Keriso,” Liahona, Mat. 2008, 60).
Toe tulitatao i le fesili atu i tamaiti aoga:
E faapefea ona e vaaia isi o molimau atu ia Iesu Keriso ia latou amioga?
A o e mafaufau i le lalolagi o loo e ola ai, o le a se mea e mafai ona tatou faia ina ia mafai ai ona aoga la tatou mau ma le molimau i le Faaola i isi?
Molimau atu a o tatou mauaina se molimau ia Iesu Keriso e ala i le mana o le Agaga Paia, ua i ai tatou se tiutetauave e faasoaina atu.
Ia luitauina tamaiti aoga e ola i aso uma ia saunia e molimau atu ia Iesu Keriso e ala i a latou upu ma amioga. Uunaia i latou e o mai i le vasega ua uma ona faitau i le faitauga a tamaiti aoga ua atofaina atu ma se naunau e faasoa mai manatu, fai fesili, ma auai i le talanoaga i le vasega.