Seminare ma Inisitituti
Lesona 20: Na Auauna Atu le Faaola i Ana ‘Isi Mamoe’

Lesona 20

Na Auauna Atu le Faaola i Ana “Isi Mamoe”

Folasaga

E pei ona molimauina i le “O Le Keriso Soifua: O Le Molimau a le Au Aposetolo,” o le Faaola “na asiasi atu foi i isi o Ana ‘mamoe’ (Ioane 10:16) i Amerika anamua” (Ensign po o le Liahona, Ape. 2000, 3; tagai foi i le 3 Nifae 11:1–17). A o tatou suesueina faamaumauga o le Tusi a Mamona i le galuega a le Faaola, ua tatou aoao i le ala ua Ia auauna atu ai i Ona soo i atunuu uma ma saili e siitia ma faafaileleina i latou taitoatasi.

Faitauga Faaopoopo

  • Ronald A. Rasband, “Taitoatasi,” Liahona, Ian. 2001, 36–37.

Fautuaga mo le Aoaoina Atu

Ioane 10:14–16; 3 Nifae 15:16–21; 16:1–3

Na aoao atu e Iesu Keriso tagata Iutaia e uiga i Ana “isi mamoe”

faafanua o le lalolagi

Faaali atu se kelope po o se faafanua o le lalolagi, ma valaaulia se tamaitiiti aoga e faailoa mai po o fea na faia ai le galuega a Iesu Keriso i tagata Iutaia (o le atunuu o ona po nei o Isaraelu i Sasae Tutotonu). Fai i tamaiti aoga e sue i le Ioane 10 ma autilo i ni nai fuaiupu, ma vaai mo mea na aoao mai e Iesu e uiga ia te Ia ma Lana sootaga ia i latou na mulimuli ia te Ia. Fai atu ia i latou e lipoti mai mea ua latou mauaina. (E tatau i tamaiti aoga ona lipoti mai o Ia o le Leoleo Mamoe Lelei, e silafia e Ia Ana mamoe, latou te iloa Lona leo, e na te faapotopoto ia i latou i Lana lafu mamoe, ma isi mea faapena). Ona valaaulia lea o se tamaitiiti aoga e faitau leotele le Ioane 10:14–16 a o mulimuli le vasega i le faitauga. Fesili atu i tamaiti aoga:

  • O le a le fetalaiga a le Faaola e uiga i Ana “isi mamoe”?

  • O ai “isi mamoe” na faatatau i ai Iesu?

Valaaulia ni nai tamaiti aoga e feauauai i le faitauina leotele o le 3 Nifae 15:16–21. Ona fesili atu lea:

  • O a upumoni taua na faaalia e Iesu i sa Nifae e uiga i Ana “isi mamoe”? (O le tasi upumoni o le ina ua fetalai atu Iesu i tagata Iutaia e uiga i “isi mamoe,” sa Ia faatatau i isi tagata na mulimuli ia te Ia, e aofia ai tupuaga o Liae na soifua i le konitineta o Amerika.)

  • Aisea na le iloa ai e tagata Iutaia i Ierusalema Ana “isi mamoe”?

Faasino atu le atu Amerika i le faafanua, ma valaaulia tamaiti aoga e faitau le leoa le 3 Nifae 16:1–3 ma le Mosaea 27:30. A uma se taimi talafeagai, fesili atu:

  • O fea le isi nofoaga na fetalai atu Iesu o le a Ia faaalia ai o Ia lava i Ona tagata?

  • Aisea e taua ai le iloa o le a asiasi atu le Faaola i Ana “mamoe” i isi atunuu? (Faamanino atu e ui lava e mafai ona asiasi atu le Faaola i isi tagata po o atunuu i la le tino, o le tele o taimi e faaalia ai o Ia lava e ala atu i le galuega a le Agaga Paia. Faamamafa atu i tamaiti aoga e ala atu i le auauna atu i Ana mamoe, na fesoasoani Iesu e faataunuu le feagaiga a Lona Tama e faapotopoto mai i latou i Lona afioaga.)

Molimau atu o Iesu Keriso e alofa ia i tatou uma lava ma o le a faaalia o Ia lava ia i latou uma lava ua faitauina faatasi ma Ana mamoe. Ua Ia saili e toe faapotopoto uma fanau a le Tama Faalelagi, po o fea lava o i ai i latou, i le afioaga o le Tama.

3 Nifae 11:8–17

Ua auauna atu Iesu Keriso i Ona soo taitoatasi

Faitau leotele le 3 Nifae 11:8–17, ma valaaulia tamaiti aoga e mulimuli i le faitauga ma vaai faalemafaufau pe vaai ua latou i ai i le malumalu i le laueleele o Nuumau. A uma ona e faitau, fai i tamaiti aoga po o le a le mea ua uunaia ai i latou e uiga i upu ma gaoioiga a le Faaola i nei fuaiupu. E pei ona manaomia, fai atu nisi po o fesili uma nei.

  • O le a sou manatu i le mea na finagalo Iesu Keriso e aoao e le motu o tagata i le malumalu e uiga ia te Ia i lena aso? (Faatasi ma isi upumoni, e tatau i tamaiti aoga ona faailoa mai mea nei: Na auauna atu le Faaola i Ona soo “taitoatasi” [3 Nifae 11:15; tagai foi i le 3 Nifae 17:21].)

Mafaufau pe tusa ma le 2,500 le motu o tagata (tagai i le 3 Nifae 17:25), o le a le mea ua aoao mai ia i tatou i le valaaulia a le Faaola i tagata taitoatasi e tagotago i manua i Lona itu, lima, ma vae e uiga i Lona popole mo i tatou taitoatasi?

  • E faapefea ona aoga ia i tatou i le aso le valaaulia a Iesu Keriso i le 3 Nifae 11:14?

  • E faapefea i lou manatu ona aafia oe i le vaai ma tagotago i manua o le Faaola?

Mo se faataitaiga lena e faaalia ai le naunau o le Alii ia i tatou taitoatasi, e mafai ona e faasoa atu lenei aafiaga, e pei ona faamatalaina e Elder Ronald A. Rasband o le Au Peresitene o Fitugafulu:

Elder Ronald A. Rasband

“I masina faaiu o le ma misiona … , i le tausaga na tea nei, na ma oo ai i se mea na tupu lea na toe aoaoina ai foi lenei mataupu faavae malosi faapea oi tatou uma ua silafia ma e alofagia e le Atua.

“Sa malaga atu ia Elder Neal A. Maxwell i le aai o Niu Ioka mo ni pisinisi faaleEkalesia ma sa logoina mai i matou faapea e finagalo foi o ia ina ia faia se konafesi a le misiona. Sa matou matuai fiafia lava i lenei avanoa e faalogologo atu ai mai se tasi o auauna filifilia a le Alii. Na talosagaina au ina ia filifilia se tasi o a matou faifeautalai e saunia le tatalo amata mo lena fonotaga. Sa mafai lava ona ou soona filifilia se faifeautalai e tatalo, ae sa ou lagonaina e ao ona ou mafaufau loloto ma filifili ma le agaga tatalo se tasi e finagalo le Alii ou te talosaga i ai. I le tilotilo i ai i le lisi o faifeautalai, na tulagaese mai ai lava se igoa ia te a’u: Elder Joseph Appiah o Accra, Kana. O ia lea na ou lagona ua finagalo le Alii e tatalo i le sauniga.

“A o lei oo i le konafesi a le misiona, sa faia le ma faatalanoaga e pei ona masani ai ma Elder Appiah ma ta’u atu ai ia te ia le musumusuga na ou maua mo ia e tatalo. Faatasi ai ma le ofo ma le faamaualalo na vaaia i ona mata, sa amata ona tagi masusu o ia. Sa ou tau maofa i ona uiga, sa amata ona ou ta’uina atu ia te ia o le a lelei mea uma, ma o le a le tatalo foi, ae sa ia ta’u mai ia te au e fiafia e tatalo, ae ona o ona lagona na mafua ona o le alofa o loo ia te ia mo Elder Maxwell. Na ia ta’u mai ia te au faapea o lenei Aposetolo e matuai faapitoa lava i le Au Paia i Kana ae maise lava i lona aiga. Na valaauina e Elder Maxwell lona tama e avea ma peresitene o le itu i Accra, ma sa ia faamauina lona tina ma lona tama i totonu o le Malumalu o Sate Leki.

“Ou te le’i iloaina se mea e tasi o mea na ou faamatalaina atu nei e uiga i lenei faifeautalai po o lona aiga, ae na silafia e le Alii, ma musuia ai se peresitene o le misiona mo se ‘tasi’ o faifeautalai e tuuina mai e mea ua leva i lona olaga e manatuaina pea ma se mea na oo i ai e fausia ai le molimau” (“Taitoatasi,” Liahona, Ian. 2001, 36-37).

Tuu atu i tamaiti aoga se taimi e toe vaai ai i le 3 Nifae 11:15–17. Ona fesili atu lea:

  • O anafea na e lagona ai e silafia lelei oe e le Tama Faalelagi ma Iesu Keriso?

  • O le a le mea na fai e le motu o tagata i le malumalu ina ua latou maua ma molimauina ni molimau patino i le paia o le Faaola?

Fesili i tamaiti aoga pe i ai se tasi o i latou e fia tuuina atu se molimau i le Faaola ma le alofa na latou lagonaina mai ia te Ia. Molimau atu e ui lava tatou te lei tagotago faaletino i lima ma vae o le Faaola, e auauna mai lava o Ia ia i tatou i se auala patino. Uunaia tamaiti aoga e mafaufau loloto pe faapefea ona latou faafetai i le Tama Faalelagi ma Iesu Keriso mo le alofa latou te lagonaina patino mai ia i Laua.

3 Nifae 11–28

Na auauna atu le Faaola i sa Nifae

Ina ia fesoasoani i tamaiti aoga ia iloa isi vaega taua o le galuega a le Faaola i sa Nifae, tuu atu ni nai minute ia i latou e vaai ai i autu o mataupu mo le 3 Nifae 11–28. Fai i le vasega e faailoa mai ma tusi i lalo elemene taua o le galuega a le Faaola i sa Nifae. A o suesue tamaiti aoga, savali faataamilo i le potu ma matau mea ua latou maua. Afai e i ai nisi o loo tauivi mo ni tali, uunaia i latou e vaai i se tasi o fuaitau nei (o upu o loo puipuia e na o mo le faiaoga):

A maea se taimi talafeagai, valaaulia ni tamaiti aoga e faasoa mai ni mea na latou mauaina ia latou suesuega i mau. A o faamatala mai e tamaiti aoga elemene o le galuega a le Faaola na latou mauaina, mafaufau e faaaoga nisi po o fesili uma nei e faalautele ai le talanoaga a le vasega:

  • Mata o le a le aoga o lenei vaega o le galuega a le Faaola i tagata?

  • Aisea o le a fesoasoani ai le iloaina ma suesue mea na faia e Iesu Keriso i le avea ai ma taitai po o se faiaoga?

Valaaulia tamaiti aoga e mafaufau loloto i le fesili lenei ma tusi i lalo o latou manatu:

  • Mafaufau i mea na tatou aoaoina i le aso, o le a sou lagona i le mea e finagalo le Tama Faalelagi e te faia e mulimuli ai i le faataitaiga a Iesu Keriso i le ala e te auauna atu ai ia i latou o loo siomia oe, e aofia ai tagata ese, aiga, uo, po o latou o loo e auauna atu i ai i lou valaauga i le Ekalesia?

Faaiu le lesona e ala i le faasoa atu o lau molimau i upumoni na aoaoina i le vasega i le asō.

Faitauga a Tamaiti Aoga