Seminare ma Inisitituti
Lesona 22: Na Faaali Atu le Tama ma le Alo ia Iosefa Samita

Lesona 22

Na Faaali Atu le Tama ma le Alo ia Iosefa Samita

Folasaga

O loo faapea mai le “O Le Keriso Soifua: O Le Molimau a le Au Aposetolo”: “I le lalolagi i nei ona po, na faaali atu ai o Ia ma Lona Tama i le taulealea o Iosefa Samita, i le amataga o le oo mai o le ‘sauniga o le faaatoaga o tausaga’ (Efeso 1:10)” (Ensign po o le Liahona, Ape. 2000, 3). O lenei lesona o le a taulai atu i le matafaioi autu a le Uluai Faaaliga i aoaoga faavae o le Ekalesia a Iesu Keriso o le Au Paia o Aso e Gata Ai ma le vaega a le Faaola i lena faaaliga. O le a faamamafa atu foi i lenei lesona faapea o le suesueina o le Uluai Faaaliga e faamalosia ai lo tatou faatuatua i le Atua le Tama ma Iesu Keriso.

Faitauga Faaopoopo

Fautuaga mo le Aoaoina Atu

Iosefa Samita—Talafaasolopito 1:14–17

Na vaai Iosefa Samita i le Atua le Tama ma Lona Alo, o Iesu Keriso

Faatulaga le tusiga o lenei lesona e ala i le iloiloina puupuu o le Iosefa Samita—Talafaasolopito 1:5–12. Ona fai lea i tamaiti aoga e faatatau lenei fuaitau i o tatou aso e ala i le faasino mai o mea e tutusa ai le aafiaga o Iosefa Samita o le sailia o le upumoni ma aafiaga o i latou na saili mo le upumoni i o tatou aso. (O tali e tatau ona aofia ai le mea lenei: Sa tele naua fefinauaiga i lotu eseese. Na le mafai ona iloa e Iosefa Samita po o le fea lotu e moni i le mafaufau po o le atamai. O taitai faalelotu e faaliliuina le fuaitau lava lea o mau i ni auala eseese.)

Valaaulia se tamaitiiti aoga e faitau leotele le Iosefa Samita—Talafaasolopito 1:14–15. Ona fesili lea i le vasega:

  • Aisea e te manatu ai sa taumafai Satani e taofi Iosefa Samita mai le tatalo? (O tali e ono aofia ai le mea lenei: Na iloa e Satani Iosefa Samita mai le muai olaga ma na iloa le muai misiona faauuina a Iosefa e fesoasoani e toefuatai mai le upumoni i le lalolagi. Na taumafai Satani e taofia le tupu mai o lenei mea.

Fai i tamaiti aoga e faitau le leoa le Iosefa Samita—Talafaasolopito 1:16–17 ma tusi i lalo aoaoga faavae na oo mai le molimau a Iosefa Samita. A uma se taimi talafeagai, valaaulia tamaiti aoga e faasoa atu aoaoga faavae na latou faailoaina.

Mafaufau e faaali atu le saunoaga lenei a Elder Christoffel Golden o le Fitugafulu:

Elder Christoffel Golden

“Na tusia e le Perofeta: ‘Sa ou vaaia ni Tagata se toalua e le mafaamatalaina lo laua mamalu ma lo laua pupula, o tutu mai i ou luga ae i le ea. Sa fetalai mai le tasi o i laua ia te au, ma fofoga mai ia te au i lou igoa ma fetalai mai, ao tusi ane i le tasi—O Lou Atalii Pele lenei. Faalogo ia te Ia!’ [Iosefa Samita—Talafaasolopito 1:17].

“O lenei aafiaga a le taulealea o Iosefa, lea na sosoo ma le tele o isi faali’ali’aga ma faaaliga, ua faaali mai ai o loo i ai moni lava le Atua; le Tama ma Lona Alo, o Iesu Keriso, o ni tagata tulaga ese ma mavaevae se toalua; na foafoaina le tagata i foliga o le Atua; o lo tatou Tama Faalelagi o le tama moni lava o Iesu Keriso; o loo faaauau pea ona faaali mai le Atua o Ia lava i tagata; O loo latalata mai pea le Atua i taimi uma ma fiafia ia i tatou; ma e tali mai o Ia ia tatou tatalo” (“O le Atua le Tama,” Ensign po o le Liahona, Me 2013, 100).

  • O le a faapefea ona e faamatala atu le taua o le Uluai Faaaliga a Iosefa Samita i aoaoga a le Au Paia o Aso e Gata Ai? (A o tali mai tamaiti aoga, faamamafa atu le mea lenei: O le faaaliga a Iosefa Samita i le Tama ma le Alo na toefuatai mai ai le tele o upumoni i le lalolagi.)

  • O le a faapefea ona e faamatalaina le sao lelei o le Uluai Faaaliga a Iosefa Samita i e o loo sailia le upumoni i le aso?

Faaali atu le saunoaga lenei a Gordon B. Hinckley (1910–2008), ma fai i se tamaitiiti aoga e faitau leotele:

Peresitene Gordon B. Hinckley

“O la tatou mataupu atoa lava i le avea ai ma tagata o Le Ekalesia a Iesu Keriso o le Au Paia o Aso e Gata Ai, e faalagolago i le moni o lenei Uluai Faaaliga mamalu. … E leai se mea e faavae ai a tatou aoaoga faavae, e leai se mea tatou te aoaoina atu, leai se mea o tatou ola ai, e sili atu le taua nai lo lenei uluai tautinoga. Ua ou ioe, afai na talanoa Iosefa Samita ma le Atua le Tama ma Lona Alo Pele, o lona uiga la, o isi mea uma na ia saunoa e uiga i ai e moni. O le taofi lea o loo feliua’ia le pa lea e tau atu i le ala o le faaolataga ma le ola e faavavau“ (”O a Mea o Tuu Fesili ai Tagata ia i Tatou?” Liahona, Ian. 1999, 82).

  • Aisea e faalagolago ai “lo tatou tulaga atoa i le avea ai ma tagata o Le Ekalesia a Iesu Keriso o le Au Paia o Aso e Gata Ai” i luga o le moni a’ia’i o le Uluai Faaaliga? (E tatau i tamaiti aoga ona malamalama afai e sese le tala a Iosefa Samita, o lona uiga e lei tupu le Toefuataiga o le Ekalesia a Iesu Keriso; ae ui i lea, afai e moni le tala a Iosefa Samita, o lona uiga na tupu le Toefuataiga ma e moni le talalelei toefuataiina.)

  • Na faapefea ona e maua se molimau i le moni o le Uluai Faaaliga?

Valaaulia tamaiti aoga e amata ona mafaufau e uiga i le mea latou te ono fai e saili ai se faamautinoaga fou o le moni o le Uluai Faaaliga. Mafaufau e faasoa atu le saunoaga lenei a Elder Neil L. Andersen o le Korama a Aposetolo e Toasefululua:

Elder Neil L. Andersen

“Mo le autalavou o loo faalogologo mai i lenei aso pe o faitauina nei upu i aso o i luma, ou te tuuina atu se lui faapitoa: Ia maua sau oe lava molimau e uiga i le Perofeta o Iosefa Samita. … Faitau le molimau a le Perofeta o Iosefa Samita i le Penina Tau Tele. … O le molimau lenei a Iosefa e uiga i le mea tonu lava na tupu. Faitau soo i ai. Mafaufau e pu’eina le molimau a Iosefa Samita i lou lava leo, ma faalogologo pea i ai, ma faasoa atu i uo. O le faalogologo i le molimau a le Perofeta i lou lava leo o le a fesoasoani e aumaia le molimau o e sailia” (“Iosefa Samita,” Ensign po o le Liahona, Nov. 2014, 30).

A o lei faaauauina, faamatala i tamaiti aoga o le Uluai Faaaliga e le pau lea o le taimi na asia ai e le Faaola Iosefa Samita ma isi i lenei tisipenisione. Mo se faataitaiga, na faaali atu Iesu Keriso ia Iosefa Samita ma isi taitai o le Ekalesia i ni nai taimi i le popofou o le Toefuataiga (mo se faataitaiga, tagai i le MF&F 76:22–24; 110:1–10).

Iosefa Samita—Talafaasolopito 1:17–20

“O Lo’u Atalii Pele Lenei. Faalogo ia te Ia!”

Fai i tamaiti aoga e toe iloilo le Iosefa Samita—Talafaasolopito 1:17, ma fesili ia i latou pe o le a le mea na fai e le Tama Faalelagi ina ua Ia faaali atu ia Iosefa Samita. (Na Ia faailoa mai Lona Alo.) E mafai foi ona e fesili i tamaiti aoga pe na i ai se taimi na latou mafaufau ai pe aisea e taua ai lenei vaega faapitoa o le Uluai Faaaliga. Faitau i au tamaiti aoga saunoaga nei a Peresitene Iosefa Filitia Samita (1876–1972):

Peresitene Iosefa Filitia Samita

“O faaaliga uma talu mai le pau na oo mai e ala mai ia Iesu Keriso. … E lei toe talanoa sao lava pe patino le Tama ma le tagata talu mai le pau, ma e lei faaali mai lava sei vagana le faailoaina mai ma molimau i le Alo” (Doctrines of Salvation, comp. Bruce R. McConkie, 3 vol. [1954–56], 1:27).

“A o i ai Atamu i le Faatoaga o Etena, sa i ai o ia i le afioaga o le Atua lo tatou Tama Faavavau. Ina ua pau o ia, sa tulia o ia i fafo o le afioaga o le Tama. … Ona, e tusa ai ma tusitusiga paia, na avea Iesu Keriso ma Fautua mo Atamu ma ana fanau [tagai i le 1 Ioane 2:1; MF&F 29:5; 110:4], ma o latou Puluvaga foi [1 Timoteo 2:5; Eperu 9:15] na tu i le va o le tagata ma le Tama Faavavau, ma faatoga mo i tatou. Mai i lena taimi o Iesu lava na taitaia ana auauna i le lalolagi ma tuuina atu faaaliga ma le taiala i perofeta. Ana faapea o Iosefa Samita o se taufaasese … semanu na te le mafai lava ona faapea mai o le Tama na faailoaina mai le Alo ma o le Alo na tuuina mai le tali” (Answers to Gospel Questions, tuuf. Joseph Fielding Smith Jr., 5 vol. [1957–66], 3:58).

  • I le Uluai Faaaliga, ina ua fesili atu Iosefa Samita po o le fea lotu ua sao, o ai le Tagata na tali mai i lana fesili?

  • E tusa ai ma le saunoaga a Peresitene Iosefa Filitia Samita, aisea na taua ai mo Iosefa Samita le faamaumauina faapea o le Tama Faalelagi na faailoaina mai Iesu Keriso ma o Iesu Keriso lea na tali mai i fesili a Iosefa? (E tatau ona malamalama tamaiti aoga i le upumoni lenei: Talu mai le Pau o Atamu ma Eva, ua oo mai uma faaaliga e ala mai ia Iesu Keriso.)

  • Ua faapefea e le malamalama i lenei mamanu o faaaliga ona uunaia lou talitonu i le moni o le tala a le Perofeta i lana faaaliga?

E fesoasoani le Uluai Faaaliga ia i tatou e atiina ae le faatuatua ia Iesu Keriso

Valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:

Peresitene Dieter F. Uchtdorf

“O le auala lenei na faamanuiaina ai e le Uluai Faaaliga a Iosefa Samita o tatou lava olaga patino, o olaga o aiga, ma faapea ai ma le aiga atoa o tagata soifua—ua tatou talitonu ia Iesu Keriso e ala i le molimau a le Perofeta o Iosefa Samita. Na maua e perofeta ma aposetolo i le talafaasolopito atoa o tagata ia faaaliga mai le lagi e pei o lea na oo ia Iosefa. …

“… O nei faaaliga uma, i aso anamua ma ona po nei, na taitaiina atu ai i latou o e na talitonu i le pogai paia o le amiotonu uma ma le faamoemoe—i le Atua, lo tatou Tama Faalelagi, ma i Lona Alo, o Iesu Keriso. …

“E ala i lo tatou faatuatua i le molimau patino a le Perofeta o Iosefa, ma le moni o le Uluai Faaaliga, e ala i le suesue ma tatalo, loloto ma le faamaoni, o le a faamanuiaina ai i tatou i se faatuatua mausali i le Faaola o le lalolagi, o le na fetalai ia Iosefa “o le taeao o se aso matagofie lava ma le manino, i le amataga lava o le tautotogo o le afe valu selau luasefulu” (Iosefa Samita—Talafaasolopito 1:14)” (“O Fua o le Uluai Faaaliga Vaaia,” Ensign po o le Liahona, Me 2005, 38).

  • E tusa ai ma le saunoaga a Peresitene Uchtdorf, o le a le faamanuiaga e oo mai le aoaoina o le Uluai Faaaliga? (E ui atonu latou te faaaoga ni upu eseese, e tatau i tamaiti aoga ona faailoa mai lenei mataupu faavae: A o tatou aoao e uiga i le Uluai Faaaliga, tatou te atiina ae le faatuatua sili atu i le Atua le Tama ma Lona Alo, o Iesu Keriso.)

  • E faapefea e le aoaoina e uiga i le asiasiga a le Tama ma le Alo ia Iosefa Samita ona faateleina lo tatou faatuatua ia i Laua? (O tali e ono aofia ai le mea lenei: O le Uluai Faaaliga o le isi molimau o loo soifua i Laua; ua faamautinoaina ia i tatou o loo La popole mo le manuia o tagata; o le faamaoniga faapea La te faafofoga ma tali i tatalo.)

  • O le a le matafaioi a le Uluai Faaaliga i lau molimau o le Toefuataiga?

  • O le a se mea e mafai ona e faia i le vaiaso a sau e faamalosia ai ma maua ai le faamautinoaga o lau molimau o le Uluai Faaaliga?

Ia luitauina tamaiti aoga e faaalu se taimi i aso oi luma e mafaufau loloto ai ma tatalo e uiga i le Uluai Faaaliga. Valaaulia i latou e tusi manatu ma lagona latou te maua e uiga i aafiaga paia o Iosefa Samita.

Faitauga a Tamaiti Aoga