E tusa ai ma perofeta o aso nei, o Iesu Keriso “na aoao atu upumoni e faavavau, ma le tulaga moni sa tatou i ai i le muai olaga, o le faamoemoega o lo tatou ola ai i le fogaeleele, ma le tomai e mafai ona ausia e atalii ma afafine o le Atua i le olaga a sau” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). I lenei lesona, o le a aoao tamaiti aoga faapea i le muai-olaga, o lo latou faatuatua o Ieova (Iesu Keriso) o le a faia le Togiola na mafai ai ona latou manumalo ia Satani i le Taua i le Lagi. O le a vaai foi tamaiti aoga faapea i le muai olaga, na sili mamao atu le lelei o Ieova i fanau uma a le Atua i uiga mamana uma.
Faitauga Faaopoopo
Richard G. Scott, “O Iesu Keriso, Lo Tatou Togiola,” Liahona, Iulai 1997, 66–67, 72.
“O le Tama ma le Alo: O Se Faamalamalamaga Faamataupu Faavae a le Au Peresitene Sili ma le Korama a Aposetolo e Toasefululua,” Liahona, Ape. 2002, 13–18.
Tusi le upu taua i le laupapa, ma fesili atu i tamaiti aoga pe o a ni ata e oo mai i le mafaufau pe a latou mafaufau i le taua. Ona valaaulia lea o i latou e vaai faatopetope i le Faaaliga 12:7, 9 ma faailoa mai le taua o loo faamatalaina iina (le Taua i le Lagi). Fai atu i tamaiti aoga e faamatala mai lo latou malamalamaaga pe o le a le mea na tupu i lena taua.
Faaali atu le saunoaga lenei a Elder Bruce R. McConkie (1915–85) o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder Bruce R. McConkie
“O le a le ituaiga taua [na i ai le Taua i le Lagi]? Le ituaiga lava lea o loo fai i le lalolagi; na o le pau lea o le ituaiga e mafai e Satani ma agaga ona fai—se taua o upu, se gaogaosa o manatu, se feteenaiga o talitonuga; se taua i le va o le mea moni ma le mea sese” (Doctrinal New Testament Commentary, 3 vol. [1965–73], 3:518).
Fesili atu i tamaiti aoga:
E tusa ai ma le saunoaga a Elder McConkie, e faapefea ona tutusa le Taua i le Lagi ma le taua o loo fai e Satani e faasagatau i fanau a le Atua i le faaletino?
Valaaulia se tamaitiiti aoga se toatasi e faitau leotele le Faaaliga 12:10 ma le isi tamaitiiti aoga e faitau leotele le Mose 4:3. Atonu e te manao e fautua atu ia fesootai e tamaiti aoga nei fuaitau e lua i le tusia o le Mose 4:3 i autafa o a latou mau e sosoo ma le Faaaliga 12:10 ma fesuiai. Faamatala atu o “le ua molia o tatou uso” Faaaliga 12:10 o Satani. Ona fesili atu lea:
E tusa ai ma Mose 4:3, na faapefea ona tuliesea Satani i fafo o le lalolagi o le muai olaga?
Fai i tamaiti aoga e faitau le leoa le Faaaliga 12:11. Fesoasoani ia i latou e tau mai se mataupu faavae o aoao mai i lenei fuaiupu i le fai atu o fesili nei:
E faapefea ona e otootoina le mea o loo aoao mai i le fuaiupu 11 e uiga i aafiaga o le Togiola a Iesu Keriso? (E tatau i tamaiti aoga ona faailoa mai le upumoni lenei: Ona sa mautinoa lava o le a faataunuuina e Iesu Keriso le Togiola, o ona aafiaga na i ai lava i le muai olaga. O lea ua taua ai o Ia o “le Tamai Mamoe na fasia talu mai le faavaeina o le lalolagi” [Faaaliga 13:8; tagai foi i le Mosaea 4:7; Mose 7:47].)
E mafai faapefea ona e faaaoga mea o loo faamaumauina i le Faaaliga 12:11 e fesoasoani ia te oe i lau taua patino agai ia Satani i lenei olaga? (A uma ona tali mai tamaiti aoga, tusi mataupu faavae nei i le laupapa: E mafai ona tatou manumalo ia Satani pe a faalagolago ia Iesu Keriso, na faia le Togiola, ma le tuuina atu ma ia faamaoni ia tatou molimau.)
Tau atu i tamaiti aoga faapea i le muai olaga, sa tatou saunia ai e o mai i le lalolagi. Faaali atu le saunoaga lenei a le Perofeta o Iosefa Samita (1805–44), ma fai i se tamaitiiti e faitau leotele.
Ata
Perofeta o Iosefa Samita
“O le Atua lava ia, i le silafia ai ua i ai o Ia i le lotolotoi o agaga ma le mamalu, ma talu ai e sili atu lona atamai, sa silasila atu ai e tatau ona faatulagaina ni tulafono e mafai ai e le toatele ona maua le avanoa e alualu ai i luma e pei o Ia lava. O lo tatou sootaga ma le Atua ua tuuina ai i tatou i se tulaga e alualu ai i luma i le poto. O loo ia te Ia le mana e faatulagaina ai ni tulafono e faatonu ai malamalama e vaivai, ina ia faaeaina i latou faatasi ma Ia” (Aoaoga a Peresitene o le Ekalesia: Iosefa Samita [2007], 210).
Toe tulitatao e ala i le fai atu o fesili nei:
O le a se mea ua e aoao mai le saunoaga a Iosefa Samita e uiga i manaoga o le Tama Faalelagi mo i tatou? (E finagalo Tama Faalelagi ia tatou agai i luma ma atiina ae faaleagaga—ina ia avea faapei o Ia.)
Tusi fesili nei i le laupapa, ma fai i tamaiti aoga e suesue le Aperaamo 3:24–25 ia maua ai tali:
O ai le ” se tasi i totonu o i latou sa pei o le Atua”? fuaiupu 24
O le a le matafaioi na ia faia?
O le a le mea na ia fai mai o le faamoemoega e tasi o le olaga faaletino?
A maea se taimi tatau ai, fai i tamaiti aoga e faasoa mai a latou tali i le vasega. Ona valaaulia lea o tamaiti aoga e suesue le Mataupu Faavae ma Feagaiga 138:55–56 mo ni vaaiga i le mea na fai e saunia ai fanau a le Atua ina ia faamanuiaina i le olaga faaletino. Ina ia fesoasoani i tamaiti aoga e faatusatusa lenei fuaitau ia i latou lava, fesili atu:
E tusa ai ma nei fuaiupu, na faapefea ona tatou saunia e o mai i le lalolagi?
Valaaulia tamaiti aoga e mafaufau loloto mo sina taimi po o a uiga na i ai i le Faaola i le muai olaga. Valaaulia se tamaitiiti aoga e faitau leotele le Aperaamo 3:19, 21. Fai atu i le vasega ia mulimuli i le faitauga, ma vaavaai mo mea na aoao mai e uiga ia Iesu Keriso. A uma ona tali mai tamaiti aoga, tuu atu i tamaiti aoga se kopi o saunoaga nei a Elder Neal A. Maxwell (1926–2004) ma Elder Bruce R. McConkie (1915–85) o le Korama a Aposetolo e Toasefululua. Fai atu ia i latou e faitau saunoaga ma faailoga upu ma fuaitau o loo aoao mai e uiga i le Faaola:
Ata
Elder Neal A. Maxwell
“E le mafai ona fatusalia le poto ma mea na faia e, [Iesu Keriso] i le atamamai ma mea maoae uma ua faia e tagata o ona po ua mavae, ma ona po nei, faapea foi ma le lumanai! (Tagai i le Ape. 3:19.)” (Neal A. Maxwell, “E, le Faaola Paia e,” Liahona,Ian. 1982, 9).
Ata
Elder Bruce R. McConkie
“I le usiusitai i tulafono, ma maua lo latou saolotoga, o agaga o tagata uma, ao latou iai i le Nofoaga Faavavau, atiinae taleni, mea maoae, ma tomai o vaega eseese, ituaiga, ma tikeri. I le vaitaimi umi o le olaga lea sa faapea, o ni taleni eseese le mafaitaulia ma tomai ua oo mai i le ola. …
“Na faapaiaina i tatou uma i le saolotoga, na Ia tuuina mai tulafono ina ia mafai ai ona faalautele ma alualu i luma lo tatou faapei o Ia, ma Ia fautuaina i tatou e faatumauina le aoaoina o vaega e taitai atu ai i le mamalu ma le faaolataga. O Ia lava o le faaletino ma le faaleagaga o mea lelei uma. O uiga manaomia uma ma lelei o loo i totonu ia te Ia i Lona faavavau atoatoa. O ana fanau usiusitai uma lava ua mafai ona latou faapei o Ia i le tasi auala po o le isi. Sa maoae le eseese ma le tulaga o taleni ma tomai ia i tatou iina e pei ona i ai ia i tatou iinei. O nisi e sili atu i se tasi itu, o isi i le isi itu. O le Ulumatua na sili atu i mea uma ia i tatou” (Bruce R. McConkie, The Mortal Messiah, 4 vol. [1979–81], 1:23).
Toe tulitatao e ala i le fesili i tamaiti aoga po o ai na tulagaese ia i latou i nei saunoaga. Afai e manaomia, fesili atu:
O a ni mea ua e aoao mai nei Aposetolo e toalua e uiga i uiga tulagaese o Ieova i le muai olaga? (E tatau ona malamalama tamaiti aoga faapea i le muai olaga, na sili atu le maoae o Ieova i malosiaga tuufaatasi ma mea na ausia e fanau uma a le Tama Faalelagi.
Tuu atu i tamaiti aoga ni nai minute e mafaufau loloto ai i le galuega a le Faaola i le muai olaga ma tusi ni manatu ma lagona latou te maua. Valaaulia nisi o i latou e faasoa mai i le vasega ni mea sa latou tusiaina. Faaiu le lesona i le uunaia o tamaiti aoga e mafaufau pe faapefea e le iloaina e uiga i le galuega a le Faaola i le muai olaga ma uiga tulagaese e mafai ona fesoasoani ia i latou ia maua se alofa sili atu ma le faatuatua ia te Ia.