Jebta 24
Leddik eo Nejin Jairus Ej Jerkak jān Mej
Juōn raan Jairus, juōn ritōl an juōn jikin jar, eaar bun̄ pedo ioon neen RiLo̧mo̧o̧r.
Jairus eaar ba bwe leddik eo nejin 12-an-iiō eaar lukkuun nan̄inmej. E eaar akweļap n̄an Jisōs n̄an ilo̧k im kōjeram̧m̧an e. E eaar tōmak bwe Jisōs emaron̄ in kar kōm̧m̧an bwe en ājmour.
Jisōs eaar jino an ļoor ļo̧k Jairus n̄an m̧weo im̧ōn, bōtaab E eaar pōjrak n̄an an kemour juōn kōrā. Ke E eaar kōnono n̄an e, juōn eo eaar itok n̄an jiron̄ Jairus bwe erumij—leddik eo nejin em̧ōj an mej.
Jisōs eaar ron̄ ta kar kōnono kake. E eaar jiron̄ ļo̧k Jairus bwe en jab mijak ak en tōmak ilo E.
Innem Jisōs eaar etal ippān Jairu n̄an m̧weo im̧ōn Jairus. M̧weo eaar obrak kōn armej ro me raar jan̄ kōn mej eo an leddik jidikdik eo.
Jisōs eaar jiron̄ ļo̧k er bwe leddik eo eaar jab mej bōtaab eaar kiki. Armej ro raar ettōn̄ kōn E. Er raar jeļā leddik eo eaar mej.
RiLo̧mo̧o̧r eo eaar kōm̧m̧an bwe aolep rej diwōjļo̧k jān m̧weo ijjelo̧kin rikaļoor ro An, Jairus, im kōrā eo ippān Jairus. Er raar etal n̄an ruum̧ eo ijo leddik eo eaar babu ie.
Jisōs eaar bōk leddik eo kōn pein. E eaar jiron̄ ļo̧k e n̄an jutak. E eaar jutak im eaar etetal. Jemen im jinen raar bwilōn̄. Jisōs eaar jiron̄ ļo̧k er bwe ren jab ba n̄an juōn ta eo eaar waļo̧k. Innem E eaar jiron̄ ļo̧k jemen im jinen leddik eo n̄an leļo̧k kijen bwe en mōn̄ā.