BŪRABŌĻ eo kein kajilu
Nejin eo Ejerwaan
Ļaddik eo nejin eaar bōk jāān eo im ilo̧k jān m̧weo. E eaar etal n̄an bar juōn ene. Ļaddik eo eaar jerawiwi im bar jerawiwi. E eaar kōjerbal aolepen jāān eo an.
Āliktata ļaddik eo eaar maat an jāān n̄an wia kijen mōn̄ā. E eaar lukkuun ko̧le. E eaar kajjitōk ippān juōn em̧m̧aan n̄an jipan̄. Em̧m̧aan eo eaar kōjerbale n̄an naajdik piik ko an.
Ļaddik eo eaar lukkuun ko̧le jon̄an e eaar kōņaan mōn̄ā men ko kijen piik ko. E eaar jeļā bwe rijerbal ro ilo im̧weo im̧ōn jemen enno ļo̧k mōn̄ā ko rej kan̄i jān e.
E eaar ļōmņak n̄an ukweļo̧k im kajjitōk bwe en juōn rijerbal ilo im̧weo im̧ōn jemen. Ke ļaddik eo eaar rool n̄an m̧weo, jemen eaar loe an itok.
Jemen eaar ettōrļo̧k im wōnm̧ae ļaddik eo nejin. E eaar likūt pā ko pein ipeļakin im kar mejān maik e.
Ļaddik eo eaar jiron̄ ļo̧k jemen bwe e eaar jerawiwi. E eaar en̄jaake bwe e ejjab erreo n̄an kūr e ļaddik eo nejin jemen.
Jemen eaar jiron̄ ļo̧k juōn rijerbal n̄an bōktok nuknuk ko rem̧m̧an tata im kanuknuk ļaddik eo nejin. Rijerbal eo eaar kōļaak juuj ko ilo neen ļaddik eo im juōn riin̄ ilo addi in pein.
Jemen eaar jiron̄ ļo̧k rijerbal eo n̄an kōpooj juōn iien mōn̄ā eļap. E eaar kōņaan bwe aolep ren itok im m̧ōņōņō. Ļaddik eo eo me eaar jerawiwi emōj an kar ukweļo̧k im bar rool n̄an m̧weo im̧ōn.
Ļaddik eo erritto eaar jerbal ilo melaaj eo. Ke eaar ilo̧k n̄an m̧weo , e eaar ron̄ kōjan̄jan̄ im eeb. Juōn rijerbal eaar jiron̄ ļo̧k e bwe ļaddik eo jatin emōj an jepļaak n̄an m̧weo. Jemen eaar kōņaan bwe aolep ren m̧ōņōņō.
Ļaddik eo errito eaar illu im eaar jab deļo̧n̄ ļo̧k m̧weo. Jemen eaar diwōjļo̧k n̄an kōnono ippān.
Jemen eaar kanooj kam̧oolol bwe ļaddik eo errito nejin eaar pād wōt ippān. Aolep men otemjeļo̧k an jemen enaaj an. Jemen eaar barāinwōt ba bwe eaar jim̧we n̄an m̧ōņōņō. E eaar m̧ōņōņō bwe ļaddik eo edik nejin emōj an kar ukweļo̧k im jepļaak n̄an m̧weo.
Jisōs eaar jiron̄ ļo̧k Parasi ro būrabōļ ko jilu kōnke E eaar kōņaan bwe ren jeļā ewi jon̄an an Jemed Ilan̄ iakwe aolep kajjojo. E ej iakwe armej ro rej pokake E. E ebarāinwōt iakwe rijerawiwi ro, bōtaab Jemed Ilan̄ ejjab maron̄ kōjeram̧m̧an er m̧ae iien rej ukweļo̧k. E ekōņaan bwe rijerawiwi ro rej ukweļo̧k im jepļaak n̄an Ippān. Im E ekōņaan bwe jān jipan̄ er kōm̧m̧ane menin im n̄an m̧ōņōņō n̄e rej bar rool tok.