“Mataupu 3: Lesona 4—Avea ma Soo o Iesu Keriso i le Olaga Atoa,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)
“Mataupu 3: Lesona 4,” Tala’i La’u Talalelei
Mataupu 3: Lesona 4
Avea ma Soo o Iesu Keriso i le Olaga Atoa
Aoaoina Atu o Lenei Lesona
O le papatisoga o se sauniga fiafia o le faamoemoe. Pe a papatisoina i tatou, ua tatou faaali atu lo tatou naunautaiga e mulimuli i le Atua ma ulu atu i le ala e tau atu i le ola e faavavau. Tatou te faaalia foi la tatou tautinoga e avea ma soo o Iesu Keriso i le olaga atoa.
O lenei lesona ua faatulagaina e tusa ai ma feagaiga tatou te osia i le papatisoga. E aofia ai vaega autu nei, o vaega taitasi e tofu ma soavaega:
Fesoasoani i tagata ia malamalama o mataupu faavae ma poloaiga e te aoaoina atu o se vaega o le feagaiga lea o le a latou osia i le papatisoga. Faaali atu ia i latou le auala o le a fesoasoani ai vaega taitasi o lenei lesona ia i latou e “o mai ia Keriso … ma taumamafa i lana faaolataga” (Ominae 1:26; tagai foi i le 1 Nifae 15:14).
O le a e manao e aoao atu lenei lesona i ni nai asiasiga. E seāseā ona iai se asiasiga mo le aoaoina o se lesona, e sili atu ma le 30 minute. E masani lava ona sili atu le faia o ni asiasiga pupuu ma sili atu e aofia ai vaega laiti o anomea.
Fuafua mea o le a e aoao atu, o afea o le a e aoao atu ai, ma pe o le a le tele o le taimi o le a e faaaluina. Mafaufau i manaoga o tagata o loo e aoaoina, ma saili le taitaiga a le Agaga. Ua ia te oe le fetuunaiga e aoao atu ai e tusa ma mea o le a sili ona fesoasoani i tagata e saunia ai mo le papatisoga ma le faamauga.
O nisi vaega i lenei lesona e aofia ai ni valaaulia patino. Saili musumusuga i le filifiliga pe faapefea ma o afea e tuuina atu ai valaaulia. Ia mafaufau i tulaga o le malamalama o tagata taitoatasi. Fesoasoani ia te ia ia ola i le talalelei ia tasi le laa i le taimi.
O La tatou Feagaiga Ia Naunau e Tauave i o Tatou Luga le Suafa o Iesu Keriso
Pe a papatisoina i tatou, ua tatou osifeagaiga e mulimuli ia Iesu Keriso “ma le faamoemoe atoa o le loto.” Tatou te molimau atu foi ua tatou “loto e ave i o tatou luga le suafa o Keriso” (2 Nifae 31:13; tagai foi i le Mataupu Faavae ma Feagaiga 20:37).
O le tauaveina i o tatou luga o le suafa o Iesu Keriso o lona uiga tatou te manatua o Ia ma taumafai e ola o ni Ona soo i le olaga atoa. Tatou te faasusulu atu Lona malamalama i isi, e ala mai ia i tatou. Tatou te vaai ia i tatou lava o Ona tagata ma faamuamua o Ia i o tatou olaga.
O vaega nei o loo faamatala mai ai ni auala se lua tatou te manatua ma mulimuli ai ia Iesu Keriso.
Tatalo e lē Aunoa
O le tatalo e mafai ona avea o se talanoaga faigofie ma le Tama Faalelagi lea e sau mai le loto. I le tatalo, tatou te talanoa sa’o ma faamaoni ia te Ia. Tatou te faailoa atu le alofa mo Ia ma le lotofaafetai mo o tatou faamanuiaga. Tatou te ole atu foi mo se fesoasoani, puipuiga, ma le taitaiga. A o tatou faaiuina a tatou tatalo, e tatau ona tatou faaalu se taimi e mapu teisi ane ma faalogo.
Na aoao mai Iesu, “E ao ina outou tatalo atu pea i le Tama i lo’u igoa” (3 Nifae 18:19, faaopoopo le faamamafa; tagai foi i le Mose 5:8). A o tatou tatalo i le suafa o Iesu Keriso, tatou te manatuaina o Ia ma le Tama Faalelagi.
Ua faatuina e Iesu le faataitaiga mo i tatou e mulimuli ai a o tatou tatalo. E tele mea e mafai ona tatou aoaoina e uiga i le tatalo e ala i le suesueina o tatalo a le Faaola i tusitusiga paia (tagai i le Mataio 6:9–13; Ioane 17).
O a tatou tatalo e mafai ona aofia ai vaega nei:
-
Amata i le ta’u atu o le Tama Faalelagi.
-
Faailoa atu lagona o o tatou loto, e pei o le lotofaafetai mo faamanuiaga ua tatou mauaina.
-
Fai fesili, saili le taitaiga, ma ole atu mo faamanuiaga.
-
Faauma i le faapea atu, “I le suafa o Iesu Keriso, amene.”
Ua apoapoai mai tusitusiga paia ia i tatou ia tatalo i le taeao ma le afiafi. Ae ui i lea, e mafai ona tatou tatalo i soo se taimi ma soo se nofoaga. Mo a tatou tatalo faaletagata lava ia ma faaleaiga, e mafai ona anoa le tootutuli pe a tatou tatalo. E tatau ona i ai pea se tatalo i o tatou loto. (Tagai i le Alema 34:27; 37:36–37; 3 Nifae 17:13; 19:16.)
O a tatou tatalo e tatau ona magafagafa ma mai le loto. A tatou tatalo, e tatau ona tatou aloese mai le faia o faamatalaga lava e tasi i le ala lava e tasi.
Tatou te tatalo ma le faatuatua, faamaoni, ma le faamoemoega moni e galulue i luga o tali tatou te maua. A o tatou faia lenei mea, o le a taiala i tatou e le Atua ma fesoasoani ia i tatou e faia faaiuga lelei. O le a tatou lagonaina lo tatou latalata atu ia te Ia. O le a Ia tuuina mai ia i tatou le malamalama ma le upumoni. O le a Ia faamanuiaina i tatou i le mafanafana, filemu, ma le malosi.
Suesuega o Tusitusiga Paia
Aoao Atili e uiga i Lenei Mataupu Faavae
Suesue i Tusitusiga Paia
Na aoao mai Nifae, “Ia taumamafa fiafia i afioga a Keriso; aua [o le a latou] ta’u mai ia te outou mea uma e tatau ona outou faia” (2 Nifae 32:3; tagai foi i le 31:20).
O le suesueina o tusitusiga paia o se auala taua lea e manatua ai ma mulimuli ia Iesu Keriso. I tusitusiga paia tatou te aoao ai e uiga i Lona soifuaga, auaunaga, ma aoaoga. Tatou te aoao foi e uiga i Ana folafolaga. A o tatou faitau i tusitusiga paia, tatou te lagonaina Lona alofa. E faalauteleina o tatou agaga, e faateleina lo tatou faatuatua ia te Ia, ma faamalamalamaina o tatou mafaufau. O a tatou molimau o Lana misiona paia o le a sili atu ona malolosi.
Tatou te manatua ma mulimuli ia Iesu a o tatou faaaogaina Ana afioga i o tatou olaga. E tatau ona tatou suesue i tusitusiga paia i aso taitasi, aemaise lava le Tusi a Mamona.
O tusitusiga paia O le Ekalesia a Iesu Keriso o le Au Paia o Aso e Gata Ai o le Tusi Paia, o le Tusi a Mamona, le Mataupu Faavae ma Feagaiga ma le Penina Tautele. Ua ta’ua foi nei mea o “tusitusiga faavae.”
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia, “Tusitusiga Paia”
-
Autu o le Talalelei: “Tusitusiga Paia”
O La Tatou Feagaiga e Tausi Poloaiga a le Atua
Faamatalaga: E tele auala e aoao atu ai ia poloaiga o loo maua i le lesona lenei. Mo se faataitaiga, atonu e te aoaoina i latou i ni nai asiasiga. Pe e mafai foi ona e aoao atu nisi o i latou o se vaega o lesona muamua e tolu. Pe a aoao atu poloaiga, ia mautinoa e faafesootai atu i latou i feagaiga o le papatisoga ma le ata o le faaolataga.
Pe a papatisoina i tatou, ua tatou osifeagaiga ma le Atua o le a tatou “tausia ana poloaiga” (Mosaea 18:10; Alema 7:15).
Na tuuina mai e le Atua ia i tatou poloaiga ona e alofa o Ia ia i tatou. E finagalo o Ia i le mea sili mo i tatou, i le taimi nei ma le faavavau. I le avea ai ma o tatou Tama Faalelagi, Na te silafia mea tatou te manaomia mo lo tatou manuia faaleagaga ma faaletino. Na te silafia foi le mea o le a aumaia ia i tatou le fiafiaga silisili. O poloaiga taitasi o se meaalofa paia, ua tuuina mai e taiala ai a tatou faaiuga, puipuia ai i tatou, ma fesoasoani ai ia tatou tuputupu a’e.
O se tasi o mafuaaga na tatou o mai ai i le lalolagi o le aoao ma tuputupu a’e e ala i le faaaogaina ma le poto o lo tatou faitalia (tagai i le Aperaamo 3:25). O le filifili e usitai i poloaiga a le Atua—ma ia salamo pe a tatou lē atoatoa—e fesoasoani ia i tatou e faatautaia ai lenei malaga i le olaga nei lea e masani ona tumu i luitau.
O poloaiga a le Atua o se punavai o le malosi ma faamanuiaga (tagai i le Mataupu Faavae ma Feagaiga 82:8–9). O le tausia o poloaiga, ua tatou aoao ai e lē o ni tulafono mamafa ia e faasa ai lo tatou saolotoga. O le saolotoga moni e sau mai le usiusitai i poloaiga. O le usiusitai o se punavai o le malosi lea e aumaia ia i tatou le malamalama ma le iloa e ala i le Agaga Paia. E aumaia ia i tatou le fiafia sili atu ma fesoasoani ia i tatou ia ausia o tatou gafatia paia o ni fanau a le Atua.
Ua folafola mai le Atua e faamanuia i tatou pe a tatou tausia Ana poloaiga. O nisi o faamanuiaga e patino i ni poloaiga patino. O Ana faamanuiaga silisili o le filemu i lenei olaga ma le ola e faavavau i le lalolagi a sau. (Tagai i le Mosaea 2:41; Alema 7:16; Mataupu Faavae ma Feagaiga 14:7; 59:23; 93:28; 130:20–21.)
O faamanuiaga a le Atua e faaleagaga ma faaletino. E i ai taimi, e manaomia ai ona tatou onosai i le faatalitali mo i latou, ma le talitonu o le a oo mai e tusa ai ma Lona finagalo ma Lana taimi (tagai i le Mosaea 7:33; Mataupu Faavae ma Feagaiga 88:68). Ina ia iloatino nisi o faamanuiaga, e manaomia ona tatou gauai atu faaleagaga ma mataala. E faapitoa lava le moni o lenei mea i faamanuiaga e oo mai i ni auala faigofie ma auala e foliga mai o ni vaega masani lava.
O nisi o faamanuiaga atonu e faatoa manino lava pe a toe mafaufau i ai. O isi atonu e lē oo mai seia mavae lenei olaga. E tusa lava po o le a le taimi po o le natura o faamanuiaga a le Atua, e mafai ona faamautinoa mai ia i tatou o le a oo mai pe a tatou taumafai e ola i le talalelei a Iesu Keriso (tagai i le Mataupu Faavae ma Feagaiga 82:10).
E alofa atoatoa le Atua i Ana fanau uma. E onosai o Ia i o tatou vaivaiga, ma e faamagalo mai o Ia pe a tatou salamo.
O Poloaiga Sili e Lua
Ina ua fesiligia Iesu, “O le fea poloaiga ua sili?” Sa Ia tali atu, “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.”
Ona fetalai atu lea o Iesu o le poloaiga sili lona lua e pei lava o le muamua: “E te alofa atu i le lua te tuaoi, ia pei o oe lava ia te oe” (Mataio 22:36–39). “E leai lava se tasi poloaiga e sili i na poloaiga” (Mareko 12:31).
I le avea ai ma fanau agaga a le Atua, ua ia i tatou se gafatia tele mo le alofa. O se vaega o lo tatou tofi faaleagaga. O le ola ai i poloaiga sili e lua—ia alofa muamua i le Atua ma ia alofa i o tatou tuaoi—o se uiga iloga lea o soo o Iesu Keriso.
Alofa o le Atua
E tele auala e mafai ona faaalia ai lo tatou alofa mo le Atua. E mafai ona tatou tausia Ana poloaiga (tagai i le Ioane 14:15, 21). E mafai ona tatou faamuamua o Ia i o tatou olaga, ma gauai atu o tatou loto i Lona finagalo. E mafai ona tatou faaogatotonuina o tatou manaoga, mafaufauga, ma loto ia te Ia (tagai i le Alema 37:36). E mafai ona tatou ola i le lotofaafetai mo faamanuiaga ua Ia tuuina mai ia i tatou—ma ia agalelei i le faasoaina atu o na faamanuiaga (tagai i le Mosaea 2:21–24; 4:16–21). E ala i le tatalo ma le auauna atu i isi, e mafai ai ona tatou faaali atu ma faalolotoina lo tatou alofa mo Ia.
E pei o isi poloaiga, o le poloaiga ia alofa i le Atua e mo lo tatou manuia. Aua o mea tatou te alolofa i ai e fua i ai mea tatou te sailia. O mea tatou te sailia e fua i ai mea tatou te mafaufau i ai ma fai. Ma o mea tatou te mafaufau i ai ma fai, e fua i ai o tatou ituaiga tagata—ma ituaiga tagata o le a avea ai i tatou.
Alofa i Isi
O le alofa i isi o se faalautelega lea o lo tatou alolofa mo le Atua. Sa aoaoina i tatou e le Faaola i le tele o auala e alolofa ai i isi (tagai, mo se faataitaiga, i le Luka 10:25–37 ma le Mataio 25:31–46). Tatou te aapa atu ma faafeiloaia i latou i o tatou loto ma olaga. Tatou te alolofa e ala i le auauna atu—e ala i le tuuina atu o i tatou lava e oo lava i ni auala laiti. Tatou te alolofa i isi e ala i le faaaogaina o meaalofa ua tuuina mai e le Atua ia i tatou e faamanuia ai i latou.
O le alofa i isi e aofia ai le onosai, agalelei, ma le faamaoni. E aofia ai le loto faamagalo. O lona uiga o le taulimaina o tagata uma ma le faaaloalo.
A tatou alolofa i se tasi, e faamanuiaina uma i tatou ma lena tagata. E tuputupu a’e o tatou loto, o le a sili atu ona anoa o tatou olaga, ma faateleina ai lo tatou olioli.
Faamanuiaga
O poloaiga sili e lua—ia alofa i le Atua ma alofa i o tatou tuaoi—o le faavae lea o poloaiga uma a le Atua (tagai i le Mataio 22:40). Pe a tatou alolofa muamua i le Atua, ma alolofa foi i isi, o le a agai atu mea uma i o tatou olaga i lona tulaga e tatau ai. O lenei alofa o le a aafia ai la tatou vaaiga, le faaaogaina o o tatou taimi, o mea tatou te fiafia e fai, ma le faasologa o mea tatou te faamuamuaina.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia, “Alofa Mama,” “Alofa”
-
Autu o le Talalelei: “Alofa Mama,” “Alofa”
Mulimuli i le Perofeta
E valaauina e le Atua perofeta e avea ma Ona sui i le lalolagi. E ala mai i Ana perofeta, Na te faaali mai ai upumoni ma tuuina mai le taitaiga ma lapataiga.
Na valaauina Iosefa Samita e le Atua e avea ma uluai perofeta o aso e gata ai (tagai i le lesona 1). O e na suitulaga ia Iosefa Samita sa valaauina foi e le Atua e taitaia Lana Ekalesia, e aofia ai le perofeta o loo taitaia i aso nei. E tatau ona tatou maua se talitonuga maumaututu i le valaauga paia o le perofeta soifua ma mulimuli i ana aoaoga.
O aoaoga a perofeta ma aposetolo soifua ua tuuina mai ai se taula o upumoni e faavavau i se lalolagi o le fesuisuiai o tulaga faatauaina. A o tatou mulimuli i perofeta a le Atua, o le a lē lofituina i tatou i le fenumia’i ma finauga a le lalolagi. O le a tatou maua le fiafia sili atu i lenei olaga ma maua le taitaiga mo lenei vaega o la tatou malaga e faavavau.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia: “Perofeta,” “Perofeta fafine,” “Valoia, Valoaga”
-
Autu o le Talalelei: “O Perofeta,” “Valoia”
Tausi Tulafono e Sefulu
Sa faaali atu e le Atua Tulafono e Sefulu i se perofeta anamua e igoa ia Mose e taiala ai ona tagata. Ua tutusa lava le faatatau o nei poloaiga i o tatou aso. Latou te aoaoina i tatou ina ia tapuai ma faaali atu le faaaloalo i le Atua. Latou te aoaoina foi i tatou i le auala tatou te taulimaina ai isi.
-
“Aua ne’i e fai mo oe ni atua ese i o’u luma” (Esoto 20:3). O isi “atua“ e mafai ona aofia ai le tele o mea, e pei o oa, mana, po o le lauiloa.
-
“Aua e te fai mo oe se tupua ua ta” (Esoto 20:4).
-
“Aua e te ta’u fua le suafa o Ieova lou Atua” (Esoto 20:7
-
“Ia e manatua le aso sapati e te faapaiaina” (Esoto 20:8
-
“Ia e ava i lou tama ma lou tina” (Esoto 20:12
-
“Aua e te fasioti tagata” (Esoto 20:13
-
“Aua e te mulilua” (Esoto 20:14
-
“Aua e te gaoi” (Esoto 20:15
-
“Aua e te molimau pepelo i le lua te tuaoi” (Esoto 20:16).
-
“Aua e te manao” (Esoto 20:17).
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia: “Tulafono, e Sefulu”
-
Autu o le Talalelei: “Tulafono e Sefulu”
Ola i le Tulafono o le Legaviā
O le tulafono o le ola legaviā o se vaega taua o le fuafuaga a le Atua mo lo tatou faaolataga ma le faaeaga. O feusuaiga i le va o le tane ma le ava ua faauuina e le Atua mo le foafoaga o fanau ma mo le faaalia o le alofa i totonu o le faaipoipoga. O lenei sootaga vavalalata ma le mana e foafoa ai le ola o le tagata ua faamoemoe ia matagofie ma paia.
O le tulafono a le Atua o le legaviā o le mama mai i sootaga feusuai i fafo atu o se faaipoipoga faaletulafono i le va o se alii e toatasi ma se tamaitai e toatasi. O lenei tulafono o lona uiga foi o le i ai o le faamaoni atoatoa ma le faamaoni i le toalua o se tagata pe a uma le faaipoipoga.
Ina ia fesoasoani ia i tatou e tausia le tulafono o le legaviā, ua apoapoai mai ai perofeta ia tatou mama i o tatou mafaufauga ma upu. E tatau ona tatou aloese mai tusi ma ata mataga i soo se ituaiga. I le tausisia o le tulafono o le legaviā, e tatau ona tatou tauagafau i a tatou amioga ma foliga vaaia.
O i latou o le a papatisoina e tatau ona ola i le tulafono o le legaviā.
Salamo ma le Faamagaloga
I le silafaga a le Atua, o le solia o le tulafono o le legaviā e matua’i ogaoga lava (tagai i le Esoto 20:14; Efeso 5:3). E faaaoga sese ai le mana paia ua Ia tuuina mai e foafoa ai le ola. Ae e faaauau pea ona Ia alofa mai ia i tatou e tusa lava pe ua tatou solia lenei tulafono. Ua Ia valaaulia i tatou ia salamo ma ia mama e ala i le taulaga togiola a Iesu Keriso. O le faanoanoa o le agasala e mafai ona suia i le filemu matagofie o le faamagaloga a le Atua (tagai i le Mataupu Faavae ma Feagaiga 58:42–43).
Faamanuiaga
Ua tuuina mai e le Atua le tulafono o le legaviā e faamanuia ai i tatou ma fanau agaga ua Ia auina mai i le lalolagi. O le usitaia o lenei tulafono e taua i le filemu o le tagata lava ia ma le i ai o le alofa, faatuatuaina, ma le lotogatasi i a tatou sootaga faaleaiga.
A o tatou ola i le tulafono o le legaviā, o le a puipuia i tatou mai le faatama’iaga faaleagaga lea e sau mai le sootaga vavalalata faalefeusuaiga i fafo atu o le faaipoipoga. O le a tatou aloese foi mai faafitauli faalelagona ma faaletino ia e masani ona o mai faatasi ma na ituaiga o sootaga. O le a tatou tuputupu a’e i lo tatou talitonuga i luma o le Atua (tagai i le Mataupu Faavae ma Feagaiga 121:45). O le a sili atu ona tatou tatala atu i le uunaiga a le Agaga Paia. O le a sili atu ona tatou saunia e osia feagaiga paia i le malumalu lea e tuufaatasia ai o tatou aiga mo le faavavau.
Suesuega o Tusitusiga Paia
Aoao Atili e uiga i Lenei Mataupu Faavae
Tausi le Tulafono o le Sefuluai
O se avanoa maoae o le auai i le Ekalesia o le avanoa lea e totogi ai le sefuluai. A tatou sefuluai, tatou te fesoasoani e faalautele le galuega a le Atua ma faamanuia Ana fanau.
O le tulafono o le sefuluai, sa i ai lava talu mai vaitaimi o le Feagaiga Tuai. Mo se faataitaiga, na totogi sefuluai a Aperaamo le perofeta o le Feagaiga Tuai mai mea uma sa ia maua (tagai i le Alema 13:15; Kenese 14:18–20).
O le upu sefuluai o lona uiga moni lava o le tasi-vaesefulu. A tatou totogi le sefuluai, tatou te foai le tasi vaesefulu o mea tatou te maua i le Ekalesia (tagai i le Mataupu Faavae ma Feagaiga 119:3–4; tupe tului e malamalama i ai o lona uiga o tupe maua). O mea uma tatou te maua o se meaalofa mai le Atua. Pe a tatou totogiina le sefuluai, tatou te faaali atu le lotofaafetai ia te Ia e ala i le toe faafoi atu o se vaega o mea ua Ia tuuina mai ia i tatou.
O le totogi o le sefuluai o se faaaliga lea o lo tatou faatuatua. O se auala foi e faamamalu ai le Atua. Na aoao mai Iesu e tatau ona tatou “saili … muamua le malo o le Atua” (Mataio 6:33), ma o le sefuluai o se auala e faia ai lena mea.
Faaaogaaga o Tupe o le Sefuluai
O Tupe o le Sefuluai e paia. Tatou te tuuina atu a tatou sefuluai i se tasi o le au epikopo, po o le tele o eria e mafai ona tatou totogia i luga o le initoneti. A maua e le au epikopo le sefuluai, latou te auina atu i le laumua o le Ekalesia.
O se aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu e fuafuaina pe faapefea ona faaaoga tupe o le sefuluai i le galuega a le Atua (tagai i le Mataupu Faavae ma Feagaiga 120:1). O nei faatulagaga ua aofia ai:
-
Fausiaina ma le faatumauina o malumalu ma falelotu.
-
Faaliliuina ma le lolomiina o tusitusiga paia.
-
Lagolagoina o gaoioiga ma faatinoga a aulotu o le Ekalesia i le lotoifale.
-
Lagolagoina o galuega faafaifeautalai i le lalolagi atoa.
-
Lagolagoina o galuega o talafaasolopito o aiga.
-
Faatupeina o aoga ma aoaoga.
E lē faaaogaina le sefuluai e totogi ai taitai o le Ekalesia i le lotoifale. Latou te auauna atu ma le lotofuatiaifo e aunoa ma se tupe totogi.
Faamanuiaga
Pe a tatou totogiina le sefuluai, ua folafola mai e le Atua faamanuiaga e sili atu nai lo mea tatou te tuuina atu. Ua folafola mai e “toina … pupuni o le lagi mo outou, ma sasaa … atu le manuia mo outou, ina seia silisili ona tele” (Malaki 3:10; tagai i le fuaiupu 7–12). O nei faamanuiaga e mafai ona faaleagaga ma faaletino.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia, “Taulaga, Sefuluai”
-
Autu o le Talalelei: “Sefuluai”
Usitai i le Upu o le Poto
O Le Tulafono a le Alii mo le Soifua Maloloina
O o tatou tino o ni meaalofa paia mai le Atua. Tatou te manaomia taitoatasi se tino faaletino ina ia avea atili ai e faapei o Ia. E taua tele o tatou tino lea e faatusatusa ai e tusitusiga paia i malumalu (tagai i le 1 Korinito 6:19–20).
E finagalo le Alii ia tatou taulimaina o tatou tino ma le faaaloalo. Ina ia fesoasoani ia i tatou e faia lenei mea, sa Ia faaali mai ai se tulafono o le soifua maloloina ua ta’ua o le Upu o le Poto. O lenei faaaliga ua aoao mai ai i tatou e uiga i le aai i meaai paleni ae lē o le faaaogaina o mea e faaleagaina ai o tatou tino—aemaise lava o le ava malosi, tapaa, ma meainu vevela (o lona uiga o le lauti ma le kofe).
I le agaga o le Upu o le Poto, ua lapatai mai ai perofeta o aso nei e faasaga i le faaaogaina o isi mea e faataumaoi, faasolitulafono, pe ua fai ma vaisu. Ua lapatai mai foi perofeta e faasaga i le faatautala ma le soona faaaoga o talavai fualaau. (O le a taliina e lau peresitene o le misiona ia fesili e uiga i isi mea i lau eria faalefaafanua e lē tatau ona faaaogaina.)
Faamanuiaga
Na saunia e le Alii le Upu o le Poto mo lo tatou manuia faaletino ma le faaleagaga. Ua Ia folafola mai faamanuiaga silisili a o tatou tausia lenei poloaiga. O nei faamanuiaga e aofia ai le soifua maloloina, poto, ’oa o le malamalama, ma le puipuiga (tagai i le Mataupu Faavae ma Feagaiga 89:18–21).
O le usitaia o le Upu o le Poto o le a fesoasoani tatou te gauai atili atu ai i uunaiga a le Agaga Paia. E ui tatou te oo uma lava i luitau o le soifua maloloina, o le usitaia o lenei tulafono o le a fesoasoani tatou te maloloina atili ai i le tino, mafaufau, ma le agaga.
O sui o le a papatisoina e tatau ona usitai i le Upu o le Poto.
Mo le taitaiga e uiga i le fesoasoani atu i tagata o loo tauivi ma vaisu, tagai i le mataupu e 10.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia: “Upu o le Poto”
-
Autu o le Talalelei: “Soifua Maloloina,” “Upu o le Poto”
-
Fesoasoaniga o le Olaga: “Vaisu”
Tausi le Aso Sapati ia Paia
O Se Aso mo Malologa ma Tapuaiga
O le Sapati o se aso paia ua vaetofia e le Atua mo i tatou i vaiaso taitasi e malolo ai mai a tatou galuega i aso taitasi ma tapuai atu ia te Ia. O se tasi o Poloaiga e Sefulu na tuuina atu ia Mose o le “manatua o le aso sapati, ia tausia ia paia” (Esoto 20:8; tagai foi i le fuaiupu 9–11).
I se faaaliga i aso nei, ua faamautinoa mai e le Alii o le Sapati “o se aso lenei ua tofia mo oe e te malolo ai mai i au galuega, ma avatu ai au tapuaiga i le Silisili Ese” (Mataupu Faavae ma Feagaiga 59:10). Sa Ia fetalai mai foi o le Sapati e tatau ona avea o se aso o le olioli, tatalo, ma le faafetai (tagai i le fuaiupu 14–15).
O se vaega o la tatou tapuaiga i le Sapati, tatou te auai i le sauniga faamanatuga i vaiaso taitasi. I lenei sauniga, tatou te tapuai ai i le Atua ma aai ma feinu i le faamanatuga e manatua ai Iesu Keriso ma Lana Togiola. Pe a tatou aai ma feinu i le faamanatuga, tatou te faafouina a tatou feagaiga ma le Atua ma faaali atu ua tatou naunau e salamo ia tatou agasala. O le sauniga o le faamanatuga o le totonugalemu lea o lo tatou tausia o le Aso Sapati.
I le lotu tatou te auai foi i vasega lea tatou te aoao atili ai e uiga i le talalelei a Iesu Keriso. E tuputupu a’e lo tatou faatuatua a o tatou suesue faatasi i tusitusiga paia. E tuputupu a’e lo tatou alofa a o tatou auauna atu ma faamalosi le tasi ma le isi.
E faaopoopo atu i le malolo mai a tatou galuega i le Sapati, e tatau foi ona tatou aloese mai faatauga ma isi gaoioiga ia o le a lagona ai e pei o se aso masani. Tatou te faataatiaese gaoioiga a le lalolagi ma taulai atu o tatou mafaufauga ma faatinoga i mataupu faaleagaga.
O Se Aso mo le Faia o Mea Lelei
O le faia o mea lelei i le aso Sapati e matua taua lava e pei o mea tatou te taofia mai le faia ina ia tausia ai ia paia. Tatou te aoaoina le talalelei, faamalosia le faatuatua, fausia sootaga, tuuina atu auaunaga, ma auai i isi gaoioiga faagaeetia faatasi ma aiga ma uo.
Faamanuiaga
O le tausia o le aso Sapati ia paia o se faailoaga lea o lo tatou tuuto atu i le Tama Faalelagi ma Iesu Keriso. A o tatou faia a tatou gaoioiga o le Sapati ia ogatusa ma le faamoemoega o le Atua mo lea aso, o le a tatou lagonaina le olioli ma le filemu. O le a fafagaina i tatou faaleagaga ma faafouina faaletino. O le a tatou lagona foi le latalata atili atu i le Atua ma faalolotoina lo tatou sootaga ma lo tatou Faaola. O le a sili atu ona tatou tausia atoatoa i tatou lava ia “lē pisia mai le lalolagi” (Mataupu Faavae ma Feagaiga 59:9). O le Sapati o le a avea ma “se aso fiafia” (Isaia 58:13; tagai foi i le fuaiupu 14).
Suesuega o Tusitusiga Paia
Aoao Atili e uiga i Lenei Mataupu Faavae
-
Autu o le Talalelei: “Aso Sapati”
-
Taiala i Tusitusiga Paia, “Aso Sapati”
Usitai ma Faamamalu le Tulafono
O Au Paia o Aso e Gata Ai e talitonu i le usiusitai i le tulafono ma i le avea ai ma tagatanuu lelei (tagai i le Mataupu Faavae ma Feagaiga 134; Mataupu Faavae o le Faatuatua 1:12). Ua fautuaina tagata o le Ekalesia e tuuina atu auaunaga e faaleleia ai o latou nuu ma malo. Ua fautuaina foi i latou ina ia avea ma se faatosinaga mo tulaga faatauaina lelei i totonu o nuu ma malo.
Ua valaaulia tagata o le Ekalesia ina ia auai i faiga faalemalo ma faaupufai e tusa ai ma le tulafono. O tagata o le ekalesia e umia tofiga i le malo e galulue i tulaga e avea o ni tagatanuu māgafagafa, ae lē o ni sui o le Ekalesia.
Suesuega o Tusitusiga Paia
Aoao Atili e uiga i Lenei Mataupu Faavae
-
“Gaoioiga Faapolokiki ma Faalemalo” i le vaega 38.8 o le Tusitaulima Aoao
-
Autu o le Talalelei: “Sitiseni”
O La Tatou Feagaiga e Auauna Atu i le Atua ma Isi
Auauna atu
Pe a tatou papatiso, tatou te osi feagaiga e auauna atu i le Atua ma isi. O le auauna atu i isi o se tasi lea o auala autu tatou te auauna atu ai i le Atua (tagai i le Mosaea 2:17). Na aoao e le perofeta o Alema i latou o e sa naunau ina ia papatisoina e tatau ona latou “loto e tauave avega a le tasi, … ioe, ma ua loto e faanoanoa faatasi ma e e faanoanoa … , ma faamafanafana atu ia te i latou o e e manaomia le faamafanafanaga” (Mosaea 18:8-9).
E masani lava, e lē umi se taimi talu ona mae’a le papatisoga, ae maua e tagata fou se valaauga e auauna atu ai i le Ekalesia. O nei valaauga e ofofua atu ma e lē totogia. A o tatou taliaina i latou ma auauna atu ma le filiga, tatou te tuputupu a’e i le faatuatua, atiina a’e taleni, ma faamanuia isi.
O le isi vaega o la tatou auaunaga i le Ekalesia o le avea ma se “uso o auaunaga” po o se “tuafafine o auaunaga.” I lenei tiutetauave, tatou te auauna atu ai i tagata taitoatasi ma aiga ua tofia i ai.
I le avea ai ma so’o o Iesu Keriso, tatou te vaavaai mo avanoa e auauna atu ai i aso taitasi. E faapei o Ia, tatou te “o e agalelei” (Galuega 10:38). Tatou te auauna atu i o tatou tuaoi ma isi i lo tatou nuu. E mafai ona tatou auai i avanoa auauna atu e ala i le JustServe i le mea o loo maua ai. E mafai ona tatou lagolagoina taumafaiga agaalofa a le Ekalesia ma auai i le tali atu i faalavelave.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia, “Auauna Atu”
-
Autu o le Talalelei: “Auauna Atu”
Faasoaina Atu o le Talalelei
I le avea ai ma se vaega o a tatou feagaiga o le papatisoga, ua tatou folafola atu ai e “tutu o ni molimau a le Atua” (Mosaea 18:9). O se tasi o auala tatou te tutu ai o ni molimau o le faasoa atu lea o le talalelei a Iesu Keriso. O le fesoasoani i isi ia maua le talalelei o se tasi lea o ituaiga auaunaga e sili ona faafiafiaina ai e mafai ona tatou tuuina atu (tagai i le Mataupu Faavae ma Feagaiga 18:15–16). O se faaaliga mamana o lo tatou alofa.
Pe a tatou o’o i faamanuiaga o le ola i le talalelei, e masani lava ona tatou mananao e faasoa atu na faamanuiaga i isi. O tagata o le aiga, uo, ma e masani e masani ona fiafia a o tatou faatuina se faataitaiga faamaoni ma latou te vaaia le ala e faamanuiaina ai o tatou olaga e le talalelei. E mafai ona tatou faasoa atu le talalelei i auala masani ma faalenatura (tagai i le Tusitaulima Aoao, mataupu 23).
Matou te valaaulia isi e auai faatasi ma i tatou i auaunaga, nuu, gaoioiga faafiafia, ma faale-Ekalesia. E mafai ona tatou valaaulia i latou i se sauniga a le Ekalesia po o se sauniga o le papatisoga. E mafai ona tatou valaaulia i latou e matamata i se vitiō i luga o le initoneti o loo faamatala mai ai le talalelei a Iesu Keriso, e faitau le Tusi a Mamona, pe asiasi i se faletatala o le malumalu. E faitau selau valaaulia e mafai ona tatou tuuina atu i isi. E masani lava, o le valaaulia o lona uiga e faaaofia ai o tatou aiga, uo, ma tuaoi i mea o loo tatou faia.
Afai tatou te ole atu, o le a fesoasoani mai le Atua ia i tatou ia iloa avanoa e faasoa atu ai le talalelei ma tau atu i isi e uiga i le ala e faamanuiaina ai o tatou olaga.
Mo nisi faamatalaga e uiga i le faaaogaina o mataupu faavae o le alofa, faasoa atu, ma le valaauliaina,tagai i le “Tuufaatasia ma Tagata o le Ekalesia” i le mataupu e 9.
Suesuega o Tusitusiga Paia
Aoao Atili e uiga i Lenei Mataupu Faavae
-
Taiala i Tusitusiga Paia: “Galuega Faafaifeautalai”
-
Autu o le Talalelei: “Galuega Faafaifeautalai”
Anapogi ma Taulaga Anapogi
Na faavaeina e le Atua le tulafono o le anapogi o se auala mo i tatou e atiina a’e ai le malosi faaleagaga ma fesoasoani ai ia i latou e manaomia le fesoasoani.
O le anapogi o lona uiga o le lē faaaogaina lea o meaai ma vaiinu mo se taimi. E masani lava ona faataatia ese e le Ekalesia le Aso Sa muamua o masina taitasi o se aso o le anapogi. O se aso anapogi e masani lava ona aofia ai le alu e aunoa ma se meaai ma se vaiinu mo se periota e 24-itula pe afai tatou te mafaia faaletino. O isi vaega taua o le Aso Sa anapogi e aofia ai le tatalo ma le tuuina atu o molimau. E uunaia foi i tatou e anapopogi i isi taimi pe a tatou lagonaina le manaomia.
Fausiaina o Malosiaga Faaleagaga
O le anapogi e mafai ona fesoasoani ia i tatou ia lotomaualalo, faalatalata atili atu ai i le Atua, ma lagona ai le faafouina faaleagaga. A o le’i amataina Lana galuega, sa anapogi Iesu Keriso (tagai i le Mataio 4:1–2). O loo tusia i tusitusiga paia le tele o tala e uiga i perofeta ma isi o loo anapopogi ina ia mafai ona faateleina lo latou malosi faaleagaga ma sailia faamanuiaga faapitoa mo i latou lava po o isi.
E o faatasi le anapogi ma le tatalo. Pe a tatou anapopogi ma tatalo ma le faatuatua, o le a sili atu ona tatou fiafia i le mauaina o faaaliga faaletagata lava ia. E sili atu foi lo tatou taliaina o le iloaina o le upumoni ma le malamalama i le finagalo o le Atua.
Fesoasoani atu i E Manaomia le Fesoasoani
Pe a tatou anapopogi, tatou te foai atu tupe i le Ekalesia e fesoasoani ai e tausia tagata e lē tagolima. Ua ta’ua lenei mea o se taulaga anapogi. Ua valaaulia i tatou e tuuina atu se taulaga ia lē itiiti ifo ma le tau aofa’i o ‘aiga lea o le a lē taumafaina. E fautuaina i tatou ina ia limafoai ma foai ia sili atu nai lo le tau o nei ‘aiga pe afai tatou te mafaia. O le tuuina atu o se taulaga anapogi o se tasi lea o auala e mafai ona tatou auauna atu ai i isi.
O taulaga anapogi e faaaoga e tuuina atu ai meaai ma isi mea e manaomia i tagata e lē tagolima, i le lotoifale ma le lalolagi atoa. Mo faamatalaga e uiga i le auala e foai atu ai taulaga anapogi, tagai i le “Foaiina Atu o Sefuluai ma Isi Taulaga” i le lesona lenei.
Suesuega o Tusitusiga Paia
Anapogi
Tausiga mo i Latou e lē Tagolima
Aoao Atili e uiga i Lenei Mataupu Faavae
-
Taiala i Tusitusiga Paia: “Anapogi, Anapogi”
-
Tusitaulima Aoao: 22.2.2
-
Autu o le Talalelei: “Anapogi ma Taulaga Anapogi”
O La Tatou Feagaiga ia Tumau e oo i le Iuga.
A papatisoina i tatou, tatou te osifeagaiga ma le Atua e “tumau e oo i le iuga” i le ola ai i le talalelei a Iesu Keriso (2 Nifae 31:20; tagai foi i le Mosaea 18:13). Tatou te taumafai ia avea ma so’o o Iesu Keriso i le olaga atoa.
Na faamatalaina e le perofeta o Nifae i le Tusi a Mamona le papatisoga o le faitotoa lea tatou te ulu atu ai i le ala o le talalelei (tagai i le 2 Nifae 31:17). A uma le papatisoga, e faaauau pea ona tatou “fetaomi atu i luma ma le tumau ia Keriso” (2 Nifae 31:20).
A o tatou “fetaomi atu i luma” i luga o le ala o le avea ma soo, ua tatou saunia e o i le malumalu. O iina o le a tatou osia ai feagaiga ma le Atua pe a tatou maua sauniga o le malumalu. I totonu o le malumalu, o le a faaeeina mai ia i tatou le mana ma e mafai ona faamauina o ni aiga mo le faavavau. O le tausia o feagaiga tatou te osia i le malumalu o le a matala ai le faitotoa i avanoa uma faaleagaga ma faamanuiaga ua i ai a le Atua mo i tatou.
A o tatou faaauau pea ma le faatuatua i luga o le ala o le talalelei, o le a i’u ina tatou maua le meaalofa silisili a le Atua—o le meaalofa o le ola e faavavau (tagai i le 2 Nifae 31:20; Mataupu Faavae ma Feagaiga 14:7).
O vaega nei o loo faamalamalama mai ai nisi o mea ua saunia e le Atua e fesoasoani ai ia tatou e tumau e oo i le iuga o la tatou malaga i le olaga nei—ma maua le olioli i ai.
Perisitua ma Faalapotopotoga o le Ekalesia
O le perisitua o le pule ma le mana a le Atua. E ala i le perisitua, ua faataunuuina ai e le Tama Faalelagi Lana galuega “ia aumaia le tino ola pea ma le ola faavavau o le tagata” (Mose 1:39). Ua toina mai e le Atua le pule ma le mana i Ona atalii ma afafine i le lalolagi e fesoasoani ai i le faatinoina o lenei galuega.
O Le perisitua e faamanuiaina i tatou uma lava. O sauniga e pei o le papatisoga ma le faamanatuga e maua e ala mai ia i latou o e umia tofi o le perisitua. E mafai foi ona tatou maua faamanuiaga o le faamalologa, faamafanafanaga, ma le fautuaga.
O Le Perisitua ma Taitaiga ma Valaauga o le Ekalesia
O le Ekalesia o loo taitaia e Iesu Keriso e ala mai i perofeta ma aposetolo. O nei taitai ua valaauina e le Atua, faauuina, ma tuuina atu i ai le pule o le perisitua e galulue ai i le suafa o le Faaola.
I aso anamua, sa tuuina atu ai e Keriso i Ana Aposetolo lenei lava pule o le perisitua, lea na mafai ai e i latou ona taitai Lana Ekalesia ina ua afio a’e o Ia i le lagi. Na i’u lava ina leiloa lena pule ina ua teena e tagata le talalelei ma maliliu ai Aposetolo.
Na toefuatai mai e avefeau faalelagi le perisitua i le 1829 e ala mai i le Perofeta o Iosefa Samita, ma sa toe faatuina e le Alii Lana Ekalesia i aposetolo ma perofeta. (Tagai i le lesona 1.)
I le lotoifale, ua i ai i epikopo ma peresitene o siteki le pule o le perisitua e taitai ai aulotu a le Ekalesia.
Pe a valaauina alii ma tamaitai ma vaetofia e auauna atu i le Ekalesia, e tuuina atu ia i latou le pule mai le Atua e galulue ai i lena valaauga. O lenei pule e tuuina atu i faifeautalai, taitai, faiaoga, ma isi seia oo ina faamaloloina i latou mai o latou valaauga. E tuuina atu i lalo o le taitaiga a i latou o i ai ki o le perisitua.
O le pule o le perisitua e na’o le amiotonu e mafai ona faaaogaina ai (tagai i le Mataupu Faavae ma Feagaiga 121:36). O lenei pule o se faatuatuaina paia e fai ma sui o le Faaola ma galue ai i Lona suafa. E faaogaina ma lona faamoemoega lava e faamanuia ma auauna atu ai i isi.
Perisitua Arona ma le Perisitua Mekisateko
I le Ekalesia, o le perisitua e aofia ai le Perisitua Arona ma le Perisitua Mekisateko. I lalo o le taitaiga a i latou o e umia ki o le perisitua, e faaee atu ai le Perisitua Arona ma le Perisitua Mekisateko i alii agavaa o le Ekalesia. A uma ona faaee atu le perisitua talafeagai, ona faauu lea o le tagata i se tofi i lena perisitua, e pei o le tiakono po o se toeaina. E tatau ona faauuina o ia e se tasi ua i ai le pule e tatau ai.
A maua e se alii po o se alii talavou le perisitua, na te osia se feagaiga ma le Atua e faataunuu tiute paia, auauna atu i isi, ma fesoasoani e fausia le Ekalesia.
O alii talavou e mafai ona mauaina le Perisitua Arona ma faauuina o ni tiakono i le amataga o Ianuari o le tausaga e atoa i ai lo latou ta’i 12 tausaga. E mafai ona faauuina i latou o ni aoao i le tausaga e atoa i ai lo latou ta’i 14 tausaga ma ositaulaga i le tausaga e atoa i ai lo latou ta’i 16. O alii liliu mai o e ua matutua e mafai ona mauaina le Perisitua Arona i le taimi lava e maea ai le papatisoga ma le faamauga. O i latou e umia le Perisitua Arona e faatautaia sauniga e pei o le faamanatuga ma le papatisoga.
A uma ona auauna atu mo se taimi o se ositaulaga i le Perisitua Arona, e mafai e se alii agavaa e lē itiiti ifo ma le 18 ona maua le Perisitua Mekisateko ma faauuina o se toeaina. O alii e mauaina le Perisitua Mekisateko e mafai ona faatinoina sauniga o le perisitua e pei o le tuuina atu o faamanuiaga o le faamalologa ma le faamafanafanaga i tagata o le aiga ma isi.
Tagai i le Tusitaulima Aoao, 38.2.9.1, mo faamatalaga e uiga i tagata fou ua mauaina le perisitua.
Korama ma faalapotopotoga o le Ekalesia
Korama a Perisitua. O se korama o se vaega faatulagaina o ē umia le perisitua. O uarota taitasi e i ai se korama a toeaina mo alii matutua. O korama a tiakono, aoao, ma ositaulaga e mo alii talavou.
Aualofa. O le Aualofa e aofia ai tamaitai ua ta’i 18 tausaga ma matutua atu. E faamalolosia e sui auai o le Aualofa ia aiga, tagata taitoatasi, ma le nuu.
Tamaitai Talavou. E auai atu tamaitai talavou i le faalapotopotoga a Tamaitai Talavou i le amataga o Ianuari o le tausaga e atoa i ai lo latou ta’i 12.
Peraimeri. O tamaiti uma mai le 3 e oo atu i le 11 tausaga o i latou ia o le vaega a le faalapotopotoga a le Peraimeri.
Aoga Sa. E auai tagata matutua uma ma le autalavou i le Aoga Sa, lea latou te potopoto faatasi ai e suesue faatasi i tusitusiga paia.
Mo nisi faamatalaga e uiga i le perisitua, tagai i le Tusitaulima Aoao, mataupu 3.
Mo nisi faamatalaga e uiga i korama o le perisitua ma faalapotopotoga a le Ekalesia, tagai i le Tusitaulima Aoao, mataupu 8–13.
Suesuega o Tusitusiga Paia
Aoao Atili e uiga i Lenei Mataupu Faavae
-
Tusitaulima Aoao, mataupu 3: “Mataupu Faavae o le Perisitua”
-
Autu o le Talalelei: “Perisitua Arona,” “Perisitua Mekisateko,” “Perisitua”
Faaipoipoga ma Aiga
Faaipoipoga
O le faaipoipoga i le va o se alii ma se tamaitai ua faauuina e le Atua. O le aiga o le totonugalemu lea o le fuafuaga a le Foafoa mo le taunuuga e faavavau o Lana fanau.
O le tuufaatasiga o se tane ma se avā i le faaipoipoga e tatau ona avea ma a la’ua sootaga faalelalolagi sili ona faapelepeleina. Ua ia i latou se tiutetauave paia ina ia faamaoni le tasi i le isi ma faamaoni i a la’ua feagaiga o le faaipoipoga.
O se tane ma se avā e tutusapau i le silafaga a le Atua. E lē tatau ona pulea malosi e le tasi le isi. O a la’ua faaiuga e tatau ona faia i le lotogatasi ma le alofa, ma le auai atoatoa o i la’ua uma.
I le avea ai ma se tane ma se avā e alolofa le tasi i le isi ma galulue faatasi, o le la faaipoipoga e mafai ona avea ma puna o lo la fiafiaga silisili. E mafai ona latou fesoasoani i le tasi ma le isi ma a la’ua fanau ia alualu i luma i le ola e faavavau.
O Le Aiga
E pei o le faaipoipoga, o le aiga ua faauuina e le Atua ma e totonugalemu i Lana fuafuaga mo lo tatou fiafia e faavavau. O le a sili ona fiafia o tatou aiga pe a tatou ola i aoaoga a Iesu Keriso. E aoao e matua a latou fanau i le talalelei a Iesu Keriso ma faia se faataitaiga i le ola ai. E saunia e aiga avanoa mo i tatou e alolofa ma auauna atu ai le tasi i le isi.
E tatau i mātua ona avea o latou aiga ma faamuamua aupito maualuga. O se avanoa paia ma se tiutetauave mo mātua le tausia o le fanau e mafai ona la fanauina pe vaetamaina.
E tofu aiga uma ma luitau. A o tatou sailia le lagolago a le Atua ma tausi Ana poloaiga, o luitau faaleaiga e mafai ona fesoasoani ia i tatou e aoao ma tuputupu a’e ai. O nisi taimi o nei luitau e fesoasoani tatou te aoao ai ia salamo ma faamagalo atu.
Ua fautuaina e taitai o le Ekalesia ia tagata o le Ekalesia e faia a latou afiafi faaleaiga i vaiaso taitasi. E tatau i mātua ona faaaoga le taimi lenei e aoao ai a latou fanau i le talalelei, faamalolosia a latou sootaga ma i latou, ma fiafia faatasi. Ua tuuina mai foi e taitai o le Ekalesia se folafolaga o loo aoao mai ai upumoni taua e uiga i le aiga (tagai i le “O Le Aiga: O Se Folafolaga i le Lalolagi,” ChurchofJesusChrist.org).
O isi auala e faamalosia ai le aiga e aofia ai tatalo faaleaiga, suesueina o tusitusiga paia, ma le tapuai faatasi i le lotu. E mafai foi ona tatou sailia talafaasolopito o aiga, ao mai tala o aiga, ma auauna atu i isi.
E toatele tagata e utiuti avanoa mo faaipoipoga pe mo sootaga alofa faaleaiga. E toatele ua aafia i le tatalaina o faaipoipoga ma isi tulaga faigata faaleaiga. Peitai, e faamanuiaina i tatou taitoatasi e le talalelei e tusa lava po o a o tatou tulaga faaleaiga. Ma a tatou faamaoni, o le a saunia e le Atua se ala mo i tatou e maua ai faamanuiaga o aiga alolofa, pe i lenei olaga po o le olaga a sau.
Suesuega o Tusitusiga Paia
Faaipoipoga
Aiga
Aoao Atili e uiga i Lenei Mataupu Faavae
-
Taiala i Tusitusiga Paia, “Aiga,” “Faaipoipoga, Faaipoipo”
-
Tusitaulima Aoao, mataupu 2: “O Le Lagolagoina o Tagata Taitoatasi ma Aiga i le Galuega o le Faaolataga ma le Faaeaga”
-
Autu o le Talalelei: “Faaipoipoga,” “Aiga,” “Tulaga Faamatua”
Galuega o le Malumalu ma Talafaasolopito o Aiga mo Tuaa ua Maliliu
E alofa le Tama Faalelagi i Ana fanau uma ma e finagalo i lo latou faaolataga ma le faaeaga. Ae e faitau piliona tagata ua maliliu e aunoa ma le faalogo i le talalelei a Iesu Keriso po o le mauaina o sauniga faaola o le talalelei. O nei sauniga e aofia ai le papatisoga, faamauga, faauuga i le perisitua mo alii, faaeega paia i le malumalu, ma faaipoioga faavavau.
E ala i Lona alofa tunoa ma le alofa mutimutivale, ua saunia ai e le Alii se isi auala mo nei tagata e talia ai le talalelei ma ona sauniga. I le lalolagi o agaga, e talai atu ai le talalelei ia i latou o e ua maliliu e aunoa ma le mauaina (tagai i le Mataupu Faavae ma Feagaiga 138). I totonu o malumalu, e mafai ona tatou faatinoina sauniga mo o tatou tuaa ua maliliu ma isi. Ona mafai lea e nei tagata ua maliliu i le lalolagi o agaga ona talia pe teena le talalelei ma sauniga e faatinoina mo i latou.
A o le’i mafai ona tatou faatinoina nei sauniga, e manaomia ona tatou faailoaina o tatou tuaa o e e le’i mauaina ia sauniga. O le faailoaina o tagata o o tatou aiga ina ia mafai ona latou maua sauniga o se faamoemoega autu lea o a tatou galuega o talafaasolopito o aiga. Pe a tatou maua faamatalaga e uiga ia i latou, tatou te faaopoopoina i le utuofaamatalaga a le FamilySearch.org. Ona mafai lea e i tatou (po o isi) ona faia sauniga sui mo i latou i totonu o le malumalu.
A o tatou faailoaina o tatou tuaa ma faia sauniga mo i latou, e mafai ona tuufaatasia o tatou aiga mo le faavavau.
Suesuega o Tusitusiga Paia
Aoao Atili e uiga i Lenei Mataupu Faavae
-
Tusitaulima Aoao, mataupu 28: “Sauniga o le Malumalu mo Ē ua Maliliu”
-
Autu o le Talalelei: “Papatisoga mo ē ua Maliliu,” “Talafaasolopito o Aiga”
Malumalu, o Faaeega Paia, Faaipoipoga e Faavavau, ma Aiga e Faavavau
Malumalu
O le malumalu o le maota o le Alii. O se nofoaga paia lea e mafai ona tatou osia ai feagaiga ma le Atua pe a tatou mauaina Ana sauniga paia. A o tatou tausia nei feagaiga, o le a tatou maua le mana o le faaleatua e faaalia i o tatou olaga (tagai i le Mataupu Faavae ma Feagaiga 84:19–22; 109:22–23).
O Le Faaeega Paia
O se tasi o sauniga tatou te maua i totonu o le malumalu e ta’ua o le faaeega paia. O le upu faaeega paia o lona uiga o “se meaalofa.” O lenei meaalofa o le malamalama ma le mana e sau mai le Atua. I le taimi o le faaeega paia, tatou te osia ai feagaiga ma le Atua lea e fusia ai i tatou ia te Ia ma Lona Alo, o Iesu Keriso (tagai i le mataupu 1).
E mafai ona agavaa tagata matutua e maua o latou lava faaeega paia o le malumalu pe a mavae le lē itiiti ifo ma le tasi le tausaga talu ona avea ma tagata o le Ekalesia. Mo nisi faamatalaga e uiga i le faaeega paia, tagai i le Tusitaulima Aoao, 27.2.
Faaipoipoga e Faavavau ma Aiga e Faavavau
O le fuafuaga a le Atua o le fiafia ua mafai ai ona faaauau sootaga faaleaiga i talaatu o le tuugamau. I totonu o le malumalu e mafai ona tatou faaipoipo ai mo le olaga nei ma le faavavau. O lenei mea ua mafai ai e aiga ona faatasia e faavavau.
A uma ona maua e ulugalii faaipoipo o latou faaeega paia o le malumalu, e mafai ona faamauina i laua pe faaipoipoina mo le faavavau. E mafai ona faamauina a latou fanau ia i latou.
O se tane ma se avā ua faamauina i le malumalu e tatau ona tausia feagaiga na la osia ina ia maua ai faamanuiaga o le faaipoipoga e faavavau.
Suesuega o Tusitusiga Paia
Aoao Atili e uiga i Lenei Mataupu Faavae
-
Tusitaulima Aoao, mataupu 27: “Sauniga o le Malumalu mo Ē o Soifua”
-
Autu o le Talalelei: “Malumalu,” “Faaeega Paia,” “Faaipoipoga”