Pene 10

Te Taviniraa Faaroo e te Here a te Autahuʻaraa

Nahea te taviniraa faaroo e te here a te autahuʻaraa i te haamaitai i te mau melo paatoa o te Ekalesia?

Omuaraa

Ua faatia mai te Peresideni Harold B. Lee i te aamu i muri nei no niʻa i te Hiero o Salt Lake City: “I te tau a opuahia ai te Hiero rahi o Salt Lake City, ua anihia’tu ia Truman O. Angell, oia te taata papai hohoa fare, ia papai i te tahi irava … e ia faaite i to te Ekalesia eaha te hiero, eaha te taime e oti ai i te patu, eaha to’na huru. … I roto i te mau mea ta’na i papai, ua parau oia i te hoê mea o ta outou e ite atu i niʻa i te hiti o te hiero i te pae tooa o te râ. … I raro aʻe i te oeoeraa no ropu, i te hiti i te pae tooa o te râ, tapiri i te fare menemene, e ite outou i te mea e parauhia ra no te mau fetia e, te Pea Rahi. E ite outou e, te hiʻo ra te oeoeraa o te Pea Rahi i niʻa i te hoê fetia anaana o ta tatou e parau noa nei e, te Fetia Apatoerau. I to Truman O. Angell faataaraa e, eaha te iteahia i taua vahi ra, ua parau oia e, ‘Te auraa no te reira maori râ, na roto i te autahuʻaraa e iteahia i te feia tei moʻe ra, to ratou haerea.’ ”

Ua haapapu mai te Peresideni Lee e, “Na roto i te autahuʻaraa e na roto anaʻe i te autahuʻaraa e iteahia ai ia tatou, te mau tamaiti e te mau tamahine a te Atua, to tatou eʻa no te hoʻi i te fare.”¹

Te mau haapiiraa a Harold B. Lee

Eaha te autahuʻaraa?

E piti manaʻo tei faahiti tamau-noa-hia e rave rahi matahiti te maoro, no te tatararaa i te auraa o te parau autahuʻaraa. Te manaʻo matamua, oia ïa, te autahuʻaraa o te tura ïa tei horoʻahia mai e to tatou Metua i te Ao ra i te taata nei no te faatia i te taata ia faatere i roto i te mau mea atoa no niʻa i te faaoraraa o te taata i niʻa i te fenua nei. Te tahi atu manaʻo, o te manaʻo ïa e parau ra e, te autahuʻaraa o te mana ïa na roto hoi i te reira e rave ai te Atua i te ohipa na roto i te taata nei.²

Tei ô nei te autahuʻaraa o te Atua e ua horoʻahia mai te reira mai te taime a faahoʻi-faahou-hia mai ai te Ekalesia na roto i te mau veʻa tei tonohia mai no te faahoʻi mai i taua tura ra, ia nehenehe i te mau oroʻa o te faaoraraa ia faaterehia no te mau taata faaroo atoa o te fenua nei. Te mau nei te autahuʻaraa o te Atua i te mau taviri no te faaoraraa.³

Ua parau atu te Fatu ia Petero e i te tahi atu mau aposetolo i te parau no te hoê mana tei hau atu i to te taata nei o ta’na i pii e, te mau “taviri no te basileia o te raʻi,” e te parau ra oia e, na roto i te reira mana, “ta oe e haamau i raro nei, e haamau-atoahia ïa i te ao.”(Mataio 16:19). E parauhia taua mana ra e taua tura ra, na roto hoi i te reira e ravehia ai te mau oroʻa moʻa, te autahuʻaraa moʻa, e e tiʻa i te reira ia vai tamau noa i roto i te Ekalesia a Iesu Mesia i roto i te mau tau tuuraa atoa o te evanelia i niʻa i te fenua nei.⁴

[Te autahuʻaraa] o te tura ïa no te faatereraa i te mau oroʻa mai te au i te hohoa ta [te Fatu] i heheu mai. Teie mana … o te tiʻaraa ïa tei horoʻahia e te Fatu i te taata no te rave i te ohipa i roto i To’na ra iʻoa no te faaoraraa o te varua o te taata nei. …

Te hoê o te mau tumu o te autahuʻaraa teitei, o te faatereraa ïa i te mau oroʻa, no te horoʻa i te taata nei i taua iteraa i te Atua ta te Fatu i parau e, e mea titauhia, e ta te Aposetolo Paulo i parau, no niʻa i te faatiaraa i te Ekalesia, e mea titauhia ïa no “te ite i te Tamaiti a te Atua, ia taea te faito ra i te î o te Mesia i te rahi.” [Ephesia 4:13]. E te vai atoa ra te mana no te autahuʻaraa iti no te faatere i te tahi atu mau oroʻa, mai teie nei feia apî e faatere maitai nei i te opereraa i te oroʻa moʻa i teie pô. Te parau ra te Fatu e, te Autahuʻaraa Aarona, o te autahuʻaraa ïa “o tei mau i te mau taviri no te utuuturaa o te mau melahi, e no te evanelia no te tatarahapa, e no te bapetizo na roto i te utuhiraa no te haamatararaa i te hara,” [PH&PF 13:1] e te ture hoi no te mau faaueraa tino nei. E no reira … e mea titauhia te autahuʻaraa no te tumu hoê roa, oia te horoʻaraa i te mana i te feia tei piihia no te faatere i te mau oroʻa e titauhia no te faatupu i te faaoraraa ta te Fatu i faataa no Ta’na opuaraa.⁵

E faatere te Fatu i rotopu i te to’na ra Feia Moʻa na roto i to’na autahuʻaraa, o ta’na i horoʻa mai i te taata nei.⁶

Nahea ia faaohipa i te autahuʻaraa?

I roto i te hoê heheuraa rahi roa o tei riro mai ei tuhaa 121 no Te Parau Haapiiraa e te Mau Parau Fafau (Buka Fafau) e o tei horoʻahia mai i te Peropheta Iosepha Semita ra na roto i te faaurûraa a te Fatu, te faahiti ra te Fatu i te tahi mau mea faufaa roa. Te parau ra oia e, e faaohipahia te autahuʻaraa mai te au i te mau ture o te parau tiʻa, e mai te mea e, e faaohipa tano ore tatou i to tatou toroʻa autahuʻaraa “no te tapoi mai i ta tatou mau hara, e a ore râ ia haamauruuru i to tatou teoteo, to tatou hoi opuaraa hahavai ra, e a ore râ ia faatere e a ore râ ia hau e a ore râ ia haavî atu … e oto te Varua o te Fatu.” (A hiʻo PH&PF 121:37). …

Te faautuʻaraa no te faaohipa-tiʻa-ore-raa tatou i to tatou autahuʻaraa, maori râ ïa, e faananaue atu te mau raʻi ia ratou iho, e e oto te Varua o te Fatu. Ia moʻe ê te Varua ia tatou, e iriti-ê-hia’tu ïa te tura o to tatou autahuʻaraa ia tatou nei, e e vai noa tatou anaʻe “no te tu’e i te tara,” ia riri anaʻe tatou i te mau aʻoraa e te mau haapiiraa a to tatou mau tiʻa faatere. E i reira tatou e haamata ai i te hamani ino i te feia moʻa, oia hoi, te faainoraa, e i te pae hopea, e aro tatou i te Atua, e i reira te mau mana o te poiri e tae mai ai i niʻa ia tatou mai te mea e, aita tatou e tatarahapa e e fariu ê atu i te haerea ino ra. [A hiʻo PH&PF 121:37–38].

Te faaite-atoa-hia ra i roto i teie heheuraa, te mau huru tano no te hoê faatereraa autahuʻaraa. Te hoê o te reira, o te faatereraa ïa i te Ekalesia na roto i te faaoromai e te faaoromai-tamauraa, na roto i te mărû e te haehaa e na roto hoi i te here mau ra. Mai te mea e, e hinaaro te hoê taata e faatitiaifaro e e faahapa na roto i te parau papu, e na reira oia ia au i te faaurûraa a te Varua Maitai, e i muri iho ra, a faaite atu ai i te here rahi, oi manaʻo hoi te taata tei faahapahia e, e enemi oe no’na. [A hiʻo PH&PF 121:41–43]. I roto i to tatou mau piiraa atoa i roto i te autahuʻaraa, eiaha roa’tu ia moʻehia ia tatou e, te ohipa a te Ekalesia e te basileia o te Atua o te faaora ïa i te mau varua, e te mau taata atoa ta tatou e faatere nei, e mau tamarii anaʻe ïa na to tatou Metua, e e tauturu mai Oia ia tatou i roto i ta tatou mau tautooraa no te faaora i te taata tataitahi.

Te vai ra hoê hiʻoraa mataro-maitai-hia no niʻa i te huru o ta te Faaora e hinaaro ia na reira tatou i niʻa i te feia e titau ra i ta tatou tauturu. Mai tei papaihia i roto i te buka o te Mau Ohipa a te Mau Aposetolo, ia fatata’tu o Petero raua o Ioane i te hoê taata tei ore e haere na, e tei parahi i te uputa o te hiero i te taparuraa i te taoʻa, aita te aposetolo Petero i horoʻa i te moni na’na, te haamanaʻo ra outou i te reira, ua parau atu râ oia ia’na e, “Aita aʻu ario e te auro; o taʻu râ e vai nei, o taʻu ïa e horoʻa‘tu na oe: A tiʻa oe i niʻa, a haere i te iʻoa o Iesu Mesia i Nazareta ra.” (Te Ohipa 3:6).

I muri iho, ua papaihia te hoê parau faufaa roa no niʻa i taua ohipa ra. Ua rave atura Petero i ta’na rima atau, faatiʻa aʻera ia’na i niʻa. [A hiʻo Te Ohipa 3:7]. A haamanaʻo e, aita i navaʻi i te faauenoa-raa o Petero ia’na ia haere; ua rave roa râ oia i ta’na rima, e faatia aʻera ia’na i niʻa.

No reira, i niʻa i to tatou mau feia moʻa paruparu, eiaha tatou ia riro noa ei mau autahuʻaraa tahitohito, faahapahapa e te faautuʻa. E mea tiʻa râ ia tatou, mai te aposetolo Petero, ia rave i to ratou rima, ia faaitoito ia ratou, e ia faatupu i te hau i roto ia ratou e te faatura ia ratou iho, e maraa noa’tu ratou i niʻa aʻe i to ratou mau fifi, e tiʻa noa’tu hoi i niʻa i to ratou na avae.

Mai tera ïa te huru to te autahuʻaraa a te Atua hopoiraa mai i te faaoraraa e te aupururaa i te feia tei paruparu, ia roaa hoi ia ratou te puai.⁷

E faitohia … te tahi tuhaa o to tatou manuïa i niʻa i te huru o to tatou hereraa i te feia ta tatou e titau nei ia aratai e ia tavini. Mai te mea e, e here mau to tatou ia vetahi ê, e iriti ê atu te reira i te mau manaʻo iino tei vai papu i roto i te mau autaatiraa o te taata nei. Mai te mea e, e here mau to tatou ia vetahi ê, e rave ïa tatou i te mau mea o te tauturu ia ratou i roto i te mau mea no to ratou oraraa no amuri aʻe, eiaha râ no te pahono i to tatou noa mau hinaaro.⁸

Nahea te mau melo o te autahuʻaraa “ia haapaʻo i ta to [ratou] Metua e tiaʻi”?

I te ahuru e ma pitiraa o to’na matahiti, i muri aʻe i to Iosepha raua o Maria iteraa’tu ia’na i roto i te hiero, no te pahonoraa i ta raua aniraa, ua ui atura Iesu ia raua i te hoê uiraa faufaa roa: “Aita orua i ite e, ia haapaʻo vau i ta tau metua e tai’i?” (Luka 2:49). Eaha te auraa no te parau ta’na e parau ra e, ta To’na Metua?

I roto i te tahi atu heheuraa, ua faaite mai te Fatu i te auraa no te uiraa a taua tamaiti apî ra. Ua haapapu atu Oia i te mau peresibutero o te Ekalesia tei putuputu i Kirtland, Ohio, i ta ratou mau hopoiʻa rahi i roto i to ratou tiʻaraa ei feia tei mau i te toroʻa peresibutero i roto i te autahuʻaraa moʻa. Te na ô ra oia e, “No reira, no te mea e mau taata haapaʻo faufaa outou, te rave nei ïa outou i te ohipa a te Fatu; e te mau mea atoa ta outou e rave mai te au i te hinaaro o te Fatu nei o te ohipa ïa na te Fatu.” (PH&PF 64:29).

Ia mau anaʻe te hoê taata i te autahuʻaraa, e riro mai oia ei taata haapaʻo faufaa na te Fatu. E tiʻa ïa ia’na ia feruri i to’na piiraa mai te huru e, te rave nei ïa oia i te ohipa na te Fatu. To’na auraa ra, oia hoi ïa, ia faahanahana i te autahuʻaraa. A feruri na e, o te Fatu teie e ui mai nei ia outou tataitahi, mai ta teie tamaiti apî i na reira i niʻa ia Iosepha raua o Maria, Aita outou i ite e ia haapaʻo vau i ta tau Metua e tiaʻi? Te mau mea atoa ta outou e rave mai te au i te hinaaro o te Fatu nei o te ohipa ïa na te Fatu.⁹

Ia faatere anaʻe tatou na roto i te iʻoa o te Fatu, tatou tei mau i te autahuʻaraa, te na reira nei ïa tatou i roto i te iʻoa e ei mono no to tatou Metua i te Ao ra. Te autahuʻaraa o te mana ïa na roto hoi i te reira e rave ai to tatou Metua i te Ao ra i te ohipa na roto i te taata nei. …

… Te peʻapeʻa nei au i te mea e, te vai nei te tahi pae o to tatou mau peresibutero aita ratou e taa ra e, ia faatere anaʻe ratou ei mau peresibutero no te Ekalesia … e aore râ, ei mau tahuʻa rahi, i roto i te raveraa i te oroʻa, mai te huru e, na roto ia ratou, o te Fatu teie e rave nei i niʻa i te upoo o te feia ta ratou e utuutu ra. Ua feruri pinepine au i te hoê o te mau tumu aita tatou e faahanahana nei i to tatou autahuʻaraa, no te mea ïa e, aita tatou e taa maitai nei e, i roto i to tatou tiʻaraa ei feia tei mau i te autahuʻaraa, te haa nei Oia na roto ia tatou na roto i te mana o te au-tahuʻaraa moʻa, e te tiaturi nei au e, e vai tera feruriraa i roto ia tatou paatoa, e ia haapii i to tatou feia apî i te auraa no te mauraa i te autahuʻaraa e te faaohiparaa i te reira.¹⁰

Eaha te auraa no te parau ra e, ia tuuhia te rima i niʻa i to outou upoo? E hiʻo tatou i roto i te tuhaa toru ahuru e ma ono o Te Parau Haapiiraa e te Mau Parau Fafau e e taiʻo atu vau ia outou i te hoê irava o ta outou i taiʻo na niʻa ê noa. E heheuraa teie tei horoʻahia mai na roto ia Iosepha Semita te Peropheta, ia Edward Partridge, oia te Episekoporaa Faatere Rahi matamua. Teie te parau a te Fatu: “E e tuu atu vau i to’u rima i niʻa iho ia oe na [Edward Partridge] na roto i te rima o tau tavini ra [o] Sidney Rigdon ra, e e farii oe i to’u nei Varua, te Varua Maitai, oia te Faaaʻo, o te haapii atu ia oe [i] te mau mea hau no te basileia” (PH&PF 36:2).

Te taa ra anei ia outou eaha Ta’na e parau nei—oia hoi, ia rave noa’tu outou i te hoê ohipa na roto i te tura o to outou autahuʻaraa, mai te huru ra ïa e, o te Fatu teie e tuu nei i To’na rima i niʻa i taua taata ra na roto i to outou rima ia tiʻa ia outou ia horoʻa atu i te mau haamaitairaa o te oraraa, o te ora maitai o te tino, o te autahuʻaraa, e aore râ, te tahi atu. E ia faaohipa anaʻe tatou i to tatou autahuʻaraa, te na reira ra ïa tatou mai te huru e, tei reira iho te Fatu i pihaʻi iho ia tatou, e na roto ia tatou, e tauturu oia ia tatou ia rave i taua oroʻa ra.¹¹

I teie nei, ei ia outou na e te mau melo tane o te Ekalesia: E tiʻaraa to outou no te mau i te mea o te parauhia nei e, te autahuʻaraa o te Atua. … Te vai ra te tahi pae ua tuuhia te rima i niʻa i to ratou upoo no te farii i teie mana e teie tura, aita râ ratou i farii noa aʻe i te reira. E no te aha aita ratou i farii i te reira? E piti mea ta te Fatu i parau mai ia tatou: no te mea ua faatumuhia to ratou aau i niʻa i te mau mea no teie nei ao, e te piti, te titau nei ratou i te mau faaturaraa o te taata (a hiʻo PH&PF 121:35). A feruri na i te mau taata ta outou i matau e a hiʻo na e, no te aha te tahi pae o ratou i mairi ai i te pae aratia, i roto i te mau mea pae varua, e i reira outou e ite ai i te pahonoraa i roto i te hoê o na mea e piti nei. Ua faatumuhia to ratou aau i niʻa i te mau mea no teie nei ao—te moni anei? te tiʻaraa totiare anei? te mau haapiiraa anei no teie nei ao?—e aore râ, te titau ra anei ratou i te mau faaturaraa o te taata aita’tura ratou e hinaaro ia haapeʻapeʻahia ratou e te mau mea o te Ekalesia. Oia ïa, mai te mea e, e riro outou ei feia faatere i roto i te Ekalesia e e mau hoi i teie … mau fanaʻoraa atoa, e aufau ïa outou i te hoo e tiaʻi.¹²

E te mau Taeae, ua horoʻahia i roto i to outou rima te hoê tiaturiraa moʻa eiaha no te farii-noa-raa i te tura ia rave i te ohipa i roto i te iʻoa o te Fatu, no te faaineineraa râ ia outou ia riro ei mau faarii mâ e te viivii ore, ia iteahia te mana o te Atua Manahope na roto ia outou, a aratai ai outou i te mau oroʻa moʻa o te autahuʻaraa. Eiaha roa’tu e hopoi i to outou autahuʻaraa i te mau vahi e haamâ ai outou ia ite mai te Peresideni o te Ekalesia ia outou i reira.¹³

E tiʻa ia tatou ia parau e, “No te mea hoi e, te mau nei au i te autahuʻaraa o te Atua ora, ua riro ïa vau ei tiʻa no to tatou Metua i te Ao ra, e te mau nei au i te autahuʻaraa na roto hoi i te reira e tiʻa ai Ia’na ia ohipa na roto iaʻu; Eita e tiʻa iaʻu ia rave i te tahi mau mea o taʻu e nehenehe e rave no toʻu faahoaraa i te autahuʻaraa o te Atua.”…

E te mau Taeae e, te tiaturi atu nei matou ia outou no te amo i te reva o te autahuʻaraa moʻa o te Atua. … A faatutonu anaʻe to tatou mata i niʻa i te mau faufaa mure ore, ma te mata rotahi i te hanahana o te Atua, e ia parau te taata ia’na iho e, “mai teie atu taime, na roto i te tauturu a te Atua, e ore roa vau e faao iaʻu i roto i te hoê noa aʻe ohipa maori râ, e tauturu te reira iaʻu ia haere i mua i te titauraa i te ora mure, e ia hoʻi faahou i mua i te aro o to’u Metua i te Ao ra.”¹⁴

E te mau taeae o te autahuʻaraa nei, ia pii-anaʻe-hia outou i niʻa i te hoê tiʻaraa, outou e te mau metua i roto i te utuafare, e tiʻaraa to outou no te farii i te mau haamaitairaa o te autahuʻaraa, e e tiʻaraa to outou no te farii i te mau heheuraa a te Varua no te aratai ia outou mai te mea e, e ora outou i te hoê oraraa e tiʻa ai i te Fatu ia iriti mai i te mau haamaramarama o te raʻi e ia horoʻa mai ia outou i te aratairaa e au no te mau piiraa tei faautahia i niʻa ia outou. E te mau taeae e, no te fariiraa i te reira, e mea tiʻa ia outou ia ora i te hoê oraraa e au no te reira. E titauhia ia outou ia faaineine ia outou no te reira.¹⁵

A haamanaʻo na i te mau fafauraa nehenehe ta te Fatu i fafau mai ia outou mai te mea e, e î noa to outou aau i te aroha i te mau taata atoa e “ia faaunauna noa te taiata ore i to outou mau feruriraa i te mau taime atoa; ei reira to outou tiaturiraa e puai roa ai i mua i te aro no te Atua; e e mairi mai ai te haapiiraa no te autahuʻaraa i niʻa i to outou aau mai te hupe no te raʻi maira.

“E e riro te Varua Maitai ei apiti no outou i te mau taime atoa, e to outou sepeta ei sepeta taui ore no te parau-tia e te parau mau; e e riro to outou mana ei mana mure ore, e e tahe mai te reira ia outou ma te faahepo ore e a muri e a muri noa’tu.” (PH&PF 121:45–46).

No ô mai i te Fatu ra teie mau parau faaurûhia, e te faahiti faahou atu nei au i te reira ei faahaamanaʻoraa ia outou tataitahi i ta outou mau hopoiʻa ei mau taata tei mau i te autahuʻaraa, e i te mau haamaitairaa rarahi e roaa ia outou mai te mea e, e faahanahana outou i to outou mau piiraa ei mau tavini no te Atua Teitei Roa.¹⁶

Nahea te taatoaraa o te mau melo o te Ekalesia e haamaitaihia ai ia tavini anaʻe te mau melo autahuʻaraa ma te parau-tiʻa?

Ua riro te mau melo autahuʻaraa ei mau tiaʻi niʻa i te pare o Ziona. O outou tei faataahia no te faatere i te mau amaa o te Ekalesia e ia mata-ara i te mau fifi e vai nei i roto i te ao nei, te ite- mata-hia e te ore hoi e ite-mata-hia. O outou o te tahi pae o tei mau i te autahuʻaraa, e au outou i te mau tiaʻi no te mau nănă, oia te mau nănă o te mau melo o te Ekalesia i te mau vahi atoa. E rave rahi ta outou mau hopoiʻa. Ua titauhia ia outou ia aupuru i te mau melo apî ia tomo anaʻe mai ratou i roto i te Ekalesia nei; ia imi i te feia parau tiʻa e imi ra i te parau mau e ia haafarerei ia ratou i te mau misionare; ia haapaʻo tamau noa i te mau hinaaro o te otare e te vahine ivi. Oia ïa, ia rave outou i te reira, e ia haapaʻo maitai ia outou iho eiaha ia viivii i teie nei ao, te parau ra te aposetolo Iakobo, o “te paieti mau [ïa] e te ino ore.” (Iakobo 1:27). Ua titauhia ia outou ia hiʻo eiaha te ino ia tupu i te rahi, e ia hiʻo e, te vai ra te hinaaro i roto i te mau melo atoa ia itoito i roto i te Ekalesia. Ua titauhia ia outou ia haapii i te mau parau tumu tiʻa ia nehenehe i te mau melo, te feia faatere, e te mau orometua ia ite e, nahea ia faatere ia ratou iho. …

Outou e te mau mana faatere rahi, tei ia outou na te hopoiʻa no te nănă, e aore râ, te mau amaa, te mau mataeinaa, te mau paroita, e aore râ, te mau tĭtĭ o ta outou e faatere na. Ia riro outou mai te mau metua te huru, i te haapii-maitai-raa e te haapii-tamau-raa i te mau metua tane i te hopoiʻa no te aupururaa i to ratou iho utuafare e ia faariro ia ratou iho ei mau paruru no te faroo, ia horoʻa- anaʻe-hia ia ratou te mau hopoiʻa huru rau i roto i te Ekalesia.¹⁷

Tei roto te puai mau o teie ekalesia i te mana e te tura o te autahuʻaraa moʻa o ta to tatou Metua i te Ao ra i horoʻa mai ia tatou i teie mahana. Mai te mea e, e faaohipa tatou i te reira mana ma te tiʻa e ia faahanahana i to tatou mau piiraa i roto i te autahuʻaraa, e ite tatou i te haereraa te ohipa misionare i mua, i te aufauraahia te tuhaa ahuru, te tupu-maitai-raa te ohipa totauturu, te vai-hau- noa-raa to tatou mau utuafare, e te paruru-raa-hia te parau no te viivii ore i te pae morare i rotopu i te feia apî no Iseraela.¹⁸

I te tahi tau matahiti i mairi aʻe nei, ua haere atu vau i te hoê amuiraa tĭtĭ i te pae apatoa no Utah, i te vahi tei reira te tiaraa te hiero no Manti. E mea poiri roa i taua pô ra, e te vero hoi e te hiona atoa. I muri aʻe i ta matou mau apooraa, a hoʻi atu ai matou i te fare o te peresideni tĭtĭ, ua tapeʻa matou i te hiero, e mai roto atu i te pereoo, ua mataitai matou i te hiero tei faatiahia i niʻa roa i te hoê aivi. A parahi noa ai matou ma te putapû te aau i te hiʻoraa i taua hiero nehenehe ra tei turamahia e te mori, e tei anaana i roto i taua pô poiri ra e te hiona hoi, ua parau mai ra te peresideni tĭtĭ iaʻu i te hoê mea faufaa roa. Ua na ô mai ra oia e, “Te taime nehenehe roa aʻe o teie hiero, o te taime ïa e turamahia oia i roto i te vero e aore râ, i roto i te rupehu rahi.” No te iteraa i te faufaa o te reira parau, te hinaaro nei au e parau atu ia outou e, aita’tu e taime e riro ai te evanelia a Iesu Mesia ei mea faufaa rahi roa no outou maori râ, i roto i te taime vero, e aore râ, i te taime tei roto outou i te fifi rahi. Aita’tu e taime nehenehe roa aʻe te mana o te autahuʻaraa o ta outou e mau na maori râ, i te taime a tupu ai te hoê fifi i roto i to outou fare, te hoê maʻi rahi, e aore râ, te hoê faaotiraa rahi o te titauhia ia rave, e aore râ, ia faaroohia te parau no te pape rahi e tupu mai, e aore râ, te auahi, e aore râ, te o’e no te tahi mau mea. Tei roto i te mana no te autahuʻaraa, oia te mana o te Atua Manahope, te mana no te faatupuraa i te temeio mai te mea e, e hinaaro te Fatu, tera râ, mai te mea e, e hinaaro tatou ia faaohipa i taua autahuʻaraa ra, e mea tiʻa ïa ia tatou ia riro ei mea tiamâ no te faaohiparaa i te reira. Ia ore tatou ia taa i teie nei parau tumu, eita atoa ïa tatou e farii i te mau haamaitairaa no to tatou mauraa i taua autahuʻaraa rahi ra.¹⁹

Te Mau Manaʻo Tauturu no te Haapiiraa e te Aparauraa

E nahea te autahuʻaraa i te tauturu ia tatou “ia iteahia ia tatou to tatou eʻa no te hoʻi i te fare” i pihaʻi iho i to tatou Metua i te Ao ra?
No te aha e mea faufaa no te feia tei mau i te autahuʻaraa ia haamanaʻo e, e faaohipahia te autahuʻaraa no te faaora i te mau varua e no te utuutu i te feia ravai ore? I roto i te mau parau i papaihia i roto i Te Mau Ohipa 3:1–9, eaha te hiʻoraa no te faaohipa-tia-raa i te mana autahuʻaraa ta Petero raua o Ioane i faaite mai?
Eaha te mea ta tatou e haapii mai i roto i Te Parau Haapiiraa e te Mau Parau Fafau 121:41–44 no niʻa i te huru no te faaohiparaa te melo autahuʻaraa i te autahuʻaraa?
No te aha e mea tiʻa i te mau melo autahuʻaraa ia riro ei feia parau tiʻa no te raveraa i te mau ohipa taviniraa? Ia au i te manaʻo o te Peresideni Lee, eaha te faahaparaa no te faaohipa-tiaore- raa i te autahuʻaraa?
I roto i to outou tiʻaraa autahuʻaraa, mai te mea e, ua ite outou e, te rave nei outou i te ohipa a te Fatu, e nahea te reira iteraa i te tauturu ia outou ia faarahi i to outou mau piiraa autahuʻaraa?
Nahea te mau tuahine ia tauturu i te mau melo autahuʻaraa ia faahanahana i to ratou mau piiraa autahuʻaraa?
Eaha te tahi mau hiʻoraa tei faaite mai e, ua haamaitai te mana autahuʻaraa i to outou oraraa?

Te aʻo nei te Peresideni Harold B. Lee i te mau melo autahuʻaraa, “no te faaineine ia outou ia riro ei mau faarii mâ e te viivii ore, ia iteahia te mana o te Atua Manahope na roto ia outou, a aratai ai outou i te mau oroʻa moʻa o te autahuʻaraa.”

E mea tiʻa i te melo autahuʻaraa tataitahi “ia feruri i to’na piiraa mai te huru e, te rave nei oia i te ohipa na te Fatu. To’na auraa ra, oia hoi, ia faahanahana i te autahuʻaraa.”