Pene 14
Te Here i Roto i te Utuafare
Nahea te mau metua ia haapaari i te mau taamuraa o te here i rotopu ia ratou iho e i ta ratou mau tamarii?
Omuaraa
“Ote utuafare te mea faufaa roa aʻe i roto i ta tatou tautooraa ia roaa te faateiteiraa i roto i te basileia o to tatou Metua i te Ao ra,” o te haapiiraa ïa a te Peresideni Harold B. Lee.1 Mai te tapeʻa maite i teie opuaraa i roto i to’na feruriraa, ua faahiti pinepine oia i te faufaa o te here i roto i te parau no te faaitoitoraa i te taamuraa utuafare. Ua faaitoito oia i te mau metua e te mau tamarii ia faaau i te parau no te varua o te misioni a Eliaha i niʻa i te mau melo ora o to ratou utuafare, e ia faafariu i to ratou aau te tahi i te tahi i roto i te here. Te na ô ra oia e:
“Te haamanaʻo ra outou i te hoê parau o ta outou i faaau i niʻa anaʻe i te ohipa no te hiero—oia te misioni a te peropheta Eliaha, o ta Malaki i parau, e o tei faahiti-faahou-hia i roto i te hoê heheuraa o teie nei tau: ‘Inaha, e faaite atu vau ia outou te Autahuʻaraa, na roto i te rima o Eliaha te peropheta, hou te taeraa mai o te mahana rahi e te mea riʻariʻa o te Fatu ra. E na’na e tanu i roto i te mau aau o te mau tamarii te mau fafauraa i fafauhia i te mau metua, e e riro te mau aau o te mau tamarii i te fariu i to ratou ra mau metua. Ahiri aita te reira e tupu, e riro to te ao taatoa nei ei mea faufaa ore i to’na taeraa mai.’ (PH&PF 2:1–3).
“I teie mahana e mea papu maitai e, e auraa faufaa atu â to teie nei papairaa. Inaha hoi, ia ore te aau o te mau tamarii ia fariu i to ratou ra mau metua, e ia ore hoi te aau o te mau metua ia fariu i ta ratou ra mau tamarii i teie mahana, i roto i te tahuti nei, e haamouhia ïa te fenua nei i To’na taeraa mai. Aitâ i iteahia aʻe nei i te hoê taime te hinaaro-rahi-raa-hia te mau mea e rave rahi no te utuafare e no te ao nei, mai te itehia ra i teie mahana. Te tumu rahi o te mau maʻi e haapeʻapeʻa nei i te feia apî i teie mahana, o te amahamaharaa ïa o te mau utuafare. E mea tiʻa i te aau o te mau metua ia fariu i ta ratou ra mau tamarii, e to te mau tamarii i to ratou ra mau metua, ia faaorahia hoi teie nei ao, e ia ineine hoi te mau taata no te taeraa mai o te Fatu.”2
Te mau haapiiraa a Harold B. Lee
Nahea tatou ia faaitoito ia rahi atu te here e te oaoa i roto i to tatou mau utuafare?
Ua fanaʻo vau i te mea e, ua tiʻa iaʻu e i te tahi atu mau Hui Mana Faatere, ia ratere tamau na roto i te mau utuafare maitai roa o to tatou mau taata; e e mea na roto i taua mau ratereraa ra i roaa mai ai iaʻu te tahi … mau manaʻo no te faatupu i te paari e te oaoa i roto i te utuafre. …
Ua ite au i teie mau utuafare i te faaiteraa i te faatura te tahi i te tahi; te metua tane i te metua vahine, e te here ia’na, e te metua vahine i te metua tane; aita e tamaʻi, aita e manianiaraa i mua i te tamarii; te mau mea aita e papu maitai ra, te paraparauhia ra ïa te reira ma te mŭrû—Ua ite au i te hoê o te reira huru utuafare, e iva rahiraa tamarii nehenehe mau i roto o tei faaite i to ratou iteraa papu ma te parau e, aitâ ratou i faaroo aʻe nei i to ratou metua tane e te metua vahine i te tatamaʻiraa. Eaha te mea o tei roaa mai, teie ïa, oia hoi, i roto i na utuafare e iva o teie mau tamarii, i muri mai i te pu’e tau no te haapiipiiraa, e na roto hoi i te hohoa maitai o te mau metua, ua tupu mai e iva utuafare tei mua faahou atu te neheneheraa e te hau e te ora amui ra ma te oaoa. …
Te tapeʻa-maite-raa i te taamuraa pae varua, te faaohiparaa i te mau pureraa fetii, te haapaʻo-tamau-raa i te mau hopoiʻa o te Ekalesia, o tera ïa te tahi mau mea o tei tauturu i teie mau utuafare ia manuïa.3
I te tahi tau matahiti i mairi aʻe nei, ua haere mai te hoê metua tane e farerei iaʻu ma te peʻapeʻa rahi i te mea e, pauroa te mau melo o to’na utuafare—te taatoaraa o ta’na mau tamarii—tei faaipoipohia i teie nei, te farerei nei ratou i te fifi i roto i to ratou mau utuafare tataitahi. Ma te oto rahi ua na ô mai ra oia iaʻu e, “Eaha te fifi i roto i to’u utuafare i farii ai ratou paatoa i te peʻapeʻa? Aita hoê aʻe o ratou e ora nei i roto i te hoê utuafare oaoa e te maitai.” Aita vau i parau, tera râ, ua ite au i te reira i roto i te utuafare o taua taata ra, i te taime a amui mai ai taua mau tamarii ra i niʻa i te amuraa maa, aitâ ïa ratou i faaipoipohia i taua taime ra. Ua ite au i roto ia ratou i te huru pipiri, te hinaaro ore ia faatusia no te maitai o te tahi pueraa. Ua ite au i te haru i reira, te vaha rahi, te mutamuta, te aro e te tamaʻi. Ua ite au eaha te mea e faaamuhia ra ia ratou a vai apî ai ratou. Aita vau i maere i te mea e, aita i roaa ia ratou te utuafare oaoa.4
No roto mai te oaoa i te ohipa taviniraa ma te titau ore i te faahoʻiraa. E te mau utuafare oaoa, o te mau utuafare anaʻe ïa i reira e iteahia ai te tautooraa ia faatusia i te mau mahana atoa ia roaa te oaoa o te tahi e te tahi.5
E ere te here i te Atua mai te hoê mea o te roaa mai ia outou na roto noa i te aniraa. O Ioane iho tei parau e, “Ia parau te hoê taata e, te hinaaro nei au i te Atua; e aore oia i aroha i ta’na taeae, e haavare oia: o tei ore i aroha i ta’na taeae tei hiʻohia e a’na ra, eaha e tiʻa ai ia’na ia hinaaro i te Atua, tei ore i hiʻohia e a’na ra?” (1 Ioane 4:20). Eita e tiʻa ia outou ia here i te Atua a faaino atu ai i to outou taeae tei riro ei apiti no outou. Te taata o te feruri nei e, e taata rahi oia i te pae varua, area to’na utuafare ra tei roto ïa i te haapaʻoraa ore, no to’na tauʻa ore e to’na manuïa ore i te aupururaa i ta’na vahine e ta’na iho mau tamarii, taua taata ra, aita oia i roto i te parau no te faatupuraa i te here i te Atua.6
Eiaha ia aramoinahia ia tatou te haapiiraa paari a Paulo a parau ai oia e “e faaite papu atu” tatou i to tatou here i te feia e haati nei ia tatou, ia ratou ihoa râ o te riro i te horomii-noa-hia e te oto rahi (a hiʻo 2 Korinetia 2:7–8). E parau rahi atoa te reira na Petero i roto i te 1 Petero, i te pene matamua, no te faaitoito i te mau melo eiaha ia faaite noa i “te aroha taeae haavare ore” e mea tiʻa râ “ia aroha uʻana maite outou ia outou iho ma te aau poraʻo ore” (1 Petero 1:22). I roto i te basileia, e mea faufaa roa te parau no te here i te mea e, te ora nei tatou i te hoê tau “e toetoe roa te aroha o te mau taata” (PH&PF 45:27).7
A haapaari i te mau taamuraa o to outou utuafare e a haapaʻo maite i ta outou mau tamarii. … A haapapu e ua riro to outou utuafare ei vahi paari i reira e roaa ai i te mau tamarii te tutau e hinaarohia e ratou i roto i teie tau peʻapeʻa e te arepurepu. E a faaite i te aroha uʻana, i reira hoi to outou oaoa e rahi ai.8
Nahea te mau metua tane e te mau metua vahine ia faaite i te here rahi aʻe i ta ratou mau tamarii?
Ua roaa iaʻu te hoê iteraa o tei haapii mai iaʻu i te hoê mea i roto i to’u tiʻaraa papa ruau. Ua tupu te reira i te pô taurua-oriraa na te hoê ekalesia i niʻa i te tahua faahororaa popo, inaha, i taua pô ra, ua huru fifi rii taʻu tamahine i te haapaʻoraa i ta’na na tamaiti iti paari. No reira, na ô atura vau ia’na e, “Eita anei oe e hinaaro ia afaʻi au i ta oe na tamaiti iti i te taurua-ori-raa i niʻa i te tahua faahororaa popo?”
Na ô maira oia e, “Aue e papa e, e oaoa roa vau mai te mea e, e na reira oe.”
Aita vau i ite eaha ra te mea e tupu. … I te haamataraa te taurua, aita roa vau i ite e, te vai ra te hoê taaʻeraa rahi i rotopu i te hoê tamarii e hitu matahiti e te hoê tamarii e pae matahiti. Ua au roa te tamaiti paari i te taurua e tupu ra i niʻa i te tahua hautiraa. Area tera e pae matahiti ra, aita ïa e maoro te mataitairaa ua fiu. Ua faaauore, e ua titau ia haere e hoo i te hoê “hot dog” na’na, e i muri iho, ua hinaaro ia haere e hoo i te tahi inu na’na, e ua hinaaro e haere i te piha haumitiraa, e mai tera noa oia i te hahaere noa aita e faaearaa. Te parahi ra hoi au i mua roa i pihaʻi iho i te mau Hui Mana Faatere, e ua ataata noa ratou a hiʻo noa ai ratou i te hauti a teie tamarii, e iaʻu i te hutiraa i taʻu mootua iti i tera vahi e i tera vahi no te tamata i te faahau ia’na. I te pae hopea, ua fariu maira taua tamaiti iti e pae matahiti ra i niʻa iaʻu, e ua poara i toʻu paparia e na ô maira, “E papa ruau, eiaha oe e turairai noa iaʻu!” E ua ite oe, e mea huru mauiui. I taua ahiahi ra, ua ite au e, ua ata rii to’u mau taeae i to ratou iteraa i taua ohipa ra, e te ohipa matamua o taʻu i hinaaro e rave i taua taime ra, o te paipai-maitai-raa ïa ia’na; tera te tano ia’na. Area râ, te ite ra vau i to’na metua vahine iti i te raveraa i te hoê ohipa. Te ite ra vau ia’na, i te taime a riri ai ta’na tamaiti iti, i te parauraa e, “E mea tiʻa ia oe ia here i ta oe mau tamarii noa’tu e, aita roa’tu te hinaaro e vai ra no te here ia ratou. E no reira, ua feruri aʻe ra vau e tamata vau i te reira raveʻa. Aita vau i manuïa i roto i te tahi atu mau raveraa.
No reira, ua rave maira vau ia’na i roto i to’u na rima e ua parau atura vau ia’na, “E taʻu tamaiti, ua here o papa ruau ia oe. E hinaaro rahi to’u ia tupu oe i te rahi e ia riro mai ei tamaiti maitai roa. To’u noa hinaaro, maori râ, ia ite oe e, ua here au ia oe, e taʻu tamaiti.” Haamata ihora to’na tino iti riri i te [mŭrû], e ua tauahi mai ra oia i to’u aʻi e ua apa mai ra i to’u paparia, e ua here mai ra iaʻu. Ua rê vau ia’na na roto i te here. E no reira, ua rê atoa oia iaʻu na roto i te here.9
Te hoê metua vahine e mau tamaiti e e mau tamahine ta’na e o tei manuïa, e parau mai oia ia outou e, te titau nei te mau tamarii apî ia herehia ratou e ia hau roa’tu ratou i te herehia i te taime aita roa’tu te hinaaro e vai ra no te here ia ratou. A haamanaʻo i te reira e te mau metua tane e te mau metua vahine.10
Te haamanaʻo nei au i te tahi fifi iti tei tupu i roto i to’u iho utuafare, inaha, te tamaʻihia ra te hoê o taʻu mau mootua tamahine na to’na metua tane no te oreraa oia e atuatu maitai i to’na piha taotoraa, te oreraa e faanehenehe i to’na roʻi, e te vai atu râ. E ma te manaʻo papu, na ô atu ra teie tamahine iti e, “E papa, no te aha oe i hiʻo noa ai i te mau mea ino e aita roa aʻe oe e hiʻo ra i te mau mea maitai o taʻu e rave nei?” Ua riro taua mau parau ra ei haaferuri-hohonu-raa i te metua tane, e i taua pô ra, ua tuu atu ra oia i raro aʻe i te turuʻa o ta’na tamahine, te hoê rata no te here e te faaiteraa ia’na i te mau mea popou i roto ia’na, e na roto i te reira, ua haamata oia i te rapaau i te fifi tei tupu na roto i ta’na mau tamaʻiraa tamau ma te faaite ore i te mauruuru no te mau ohipa maitai.11
Te haamanaʻo nei au i te hoê ohipa tei tupu a vai tamarii ai au. Te vai ra ta matou mau puaa tei etu haere na roto i te aua, e ua ino roa to matou aua. Ua faaue to’u papa iaʻu ia haere i te fare toa, i te atearaa e toru kirometera, no te hoo mai i te hoê taoʻa no te patia i te ihu o te mau puaa. E ere i te ohipa ohie no te haaputuputuraa mai i te mau puaa i roto i te aua, e i to’u horo-haerenoa-raa e taua taoʻa ra o tei faauehia iaʻu ia haere e hoo mai, ua puai roa taʻu uumiraa i roto i te rima, fati aʻera te reira. Ua tano ïa ahiri to’u papa i tamaʻi iaʻu i reira iho, inaha, ua mauʻa te taime e te moni, tera râ, ua hiʻo maira oia iaʻu, ua ata, e ua na ô maira, “E taʻu tamaiti, te manaʻo nei au e, eita taua e patia i te ihu o te mau puaa i teie mahana. A tuu ia ratou, e ananahi e hoʻi faahou mai taua no te tamata faahou.” Aue ïa to’u here i taua metua tane ra, i te mea e, aita oia i tamaʻi iaʻu no te hoê hape iti naʻinaʻi roa, oi faatupu hoi te reira i te hoê amaharaa i rotopu ia maua.12
E mea tiʻa i te hoê metua tane ia faatitiaifaro i ta’na tamarii, area râ, eiaha roa’tu oia e rave i te reira na roto i te riri. E faaite râ oia i te hoê here rahi atu i muri aʻe ra, oi manaʻo hoi te taata i faahapahia e, e enemi oe no’na (a hiʻo PH&PF 121:43). E opani te Fatu i te tamarii ia feruri e, e enemi to’na metua tane e to’na metua vahine no’na.13
E te mau metua, a haamanaʻo e, no outou teie taime; e riro paha e, ua hope outou i te rohirohi i te huru o te hoê tamarii faaroo ore, tera râ, tei roto outou i te mau matahiti oaoa roa aʻe e te faufaa roa aʻe o to outou oraraa. I te taime a tuu atu ai outou ia ratou i roto i to ratou roʻi i te pô, a faaite i te maitai ia ratou. E vaiiho ia ratou ia faaroo i te hoê reo maitai i rotopu i te mau reo riri e te ino o ta ratou e faaroo i roto i te taatoaraa o to ratou oraraa. A faatupu i te hoê tutau i reira teie mau tamariirii e fariu atu ai ia fifi te mau mea atoa. E tauturu te Atua ia outou no te raveraa i te reira.14
Ua haere mai te hoê taote e farerei iaʻu. E taote tapu upoo oia. … Ua farii ta’na tamaiti naʻinaʻi i te hoê faahee hiona ei taoʻa horoʻa no te noela tera râ, aita roa’tu e hiona i taua taime ra. Ua topa mai te hiona matamua e toru ahuru mahana i muri mai i te Noela i taua matahiti ra. Teie te parau a [te taote] i te taime a rû noa’tu ai oia i te haere i te fare maʻi, “Ia hoʻi mai au, i reira taua e haere ai e faahee i roto i te hiona,” e ua pahono atura taua tamaiti iti ra, “Eita oe e na reira, e papa, aita to oe e taime no’u.” I tera poʻipoʻi taatoa ua haapeʻapeʻa noa to’na feruriraa i tera parau ta tera tamaiti iti, i te mea e, ua tano ihoa te reira, ua rahi roa to’na taime e pau i roto i ta’na ohipa e aita oia i faataa i te tahi taime no ta’na mau tamariirii. No reira, teie ta’na uiraa ahoaho, “E nehenehe anei ta oe e faataarii mai e, nahea vau ia faaau maite i to’u nei oraraa? Na roto i te tere-vitiviti o te ohipa tapu upoo, e nehenehe taʻu e huna iaʻu i raro i te repo e eiaha e feruri faahou i te tahi atu ohipa, e i reira e tiʻa ai iaʻu ia taiʻo noa i te mau mea atoa no niʻa i teie nei toroʻa.” I roto i ta maua paraparauraa, ua faaoti aʻe ra maua e, e hopoiʻa ta te hoê taata no niʻa ia’na iho, e hopoiʻa ta’na no niʻa i to’na utuafare, e hopoiʻa ta’na no niʻa i te Ekalesia, e e hopoiʻa ta’na no niʻa i to’na toroʻa; e no te faaau maite i to’na oraraa, e mea tiʻa ia’na ia tamata i te imi i te raveʻa no te faito maitairaa i to’na oraraa e ia tamata i te imi i te mau eʻa e nehenehe ai ona e tavini i roto i te hoê o teie mau tufaa.15
Mai te mea e, e here puai to te hoê metua tane no ta’na mau tamaiti, e mai te mea e, i to ratou tamariiriiraa mai ua rave oia ia ratou i roto i to’na na rima ma te here e ma te faaite ia ratou i to’na here ia ratou, te tiaturi nei au e, na taua huru auhoaraa ra e faatupu i te paari, e e tapeʻa fatata mai ia ratou i te taime e tupu mai ai te hoê fifi i roto i te oraraa o te tamaiti, e e titauhia hoi na rima tauturu papu o te hoê metua tane o tei taa maitai i te auraa. Te metua vahine o te tiʻai maite i te maororaa pô i te hoʻiraa mai o ta’na tamahine na te oriraa, no te apa mai ia’na hou a taoto atu ai, e o te tuatapapa amui i te tahi mau manaʻo anaanatae, e roaa ïa ia’na te here hope ore o ta’na tamahine o te riro hoi ei paruru mure ore i mua i te hara no te mea te tiaturi nei to’na metua vahine ia’na.
No te rahi o te ohipa a te tahi mau metua, e aore râ, no te rahi o to ratou rohirohi, aita atura ratou e hinaaro ia haapeʻapeʻahia ratou i te mau maniania a te mau tamarii, no reira, turai atura ratou i te mau tamarii i te hiti e aore râ, i rapae i te fare no to ratou riʻariʻa ia hue-haere-hia na roto i te fare; e riro ïa te reira huru raveraa i te turai atu i te mau tamarii i roto i te hoê oraraa tei reira te hara, te taparahiraa taata e te taiata, i te mea e, o ratou anaʻe iho i taua taime ra. Eaha te faufaa no te hoê metua tane ia farii i te Basileia Tiretiera mai te mea e, ua moʻe ê ta’na tamaiti e aore râ, ta’na tamahine i roto i te hara na roto i to’na tauʻa oreraa? Noa’tu eaha te rahiraa o te mau taatiraa totauturu maitai e vai nei i te ao nei, taatiraa totauturu totiare anei, e aore râ, no te faaroo anei, eita te reira e faahoʻi i ta te metua vahine i rave no te moʻeraa te mau varua i roto i to’na iho utuafare, a tamata ai oia i te faaora i te taata nei, e aore râ, i te hoê ohipa, i rapae i to’na utuafare, noa’tu eaha te faufaaraa o te reira ohipa.16
E mea pinepine au i te parau, e te parau faahou atu nei au ia outou, ia outou paatoa na i o nei: “Te ohipa faufaa aʻe a te Fatu o ta outou e rave, o te ohipa ïa i rotopu i te mau pápáʻ i o to outou iho fare.” Eiaha roa te reira ia moʻehia ia outou.17
Eaha ta te here metua e ta te haapiiraa o te evanelia e faatupu i niʻa i te mau tamarii o tei hahi ê te haerea?
I te tahi aʻe nei mahana, ua haere mai te tahi na taata e farerei iaʻu ma te peʻapeʻa rahi. Inaha, te vai ra ta raua tamahine matahiapo hoê ahuru e maono matahiti, teie e faatupu nei i te fifi rahi. Ua fatata roa raua i te taora i te tauera. Ua faahiti atura vau ia raua i te parau ta te Taeae Marvin J. Ashton i parau e, eita te utuafare e hiʻa mai te mea e, aita taua utuafare ra e tuʻu (a hiʻo Conference Report, no Eperera 1971, api 15). I teie nei, e parau mau tera. E tamau noa te utuafare i te here e i te haapaʻo i te [feia apî], e tae roa’tu i te taime e mahuti atu ai ratou i rapae i taua area matahiti fifi ra. Eita te utuafare e hiʻa maori râ, ia faaea oia i te tamata i te tauturu.18
Te faaiteraa rahi aʻe o te mana o te Manahope e itehia i teie mahana, o te faaoraraahia te varua taata mai roto mai i te poiri pae varua tae atu ai i te maramarama pae varua. Aita i maoro aʻe nei ua ite e ua faaroo vau i te hoê temeio mai te reira te huru; inaha, i roto i te oroʻa hunaraa o to’na metua vahine ruhiruhia, ua paraparau mai ta’na tamaiti; e tamaiti teie o tei riro na ei taata ino i roto i te tuhaa rahi o to’na oraraa; i teie nei ua paari oia. E na taata haapaʻo to’na metua tane e to’na metua vahine i te parau na te Atua, e ua tamau noa raua i te haapii i ta raua mau tamarii, tae roa’tu i teie nei tamaiti, o tei faaetaeta e ua patoʻi uʻana i ta raua mau tautooraa. Noa’tu râ teie patoʻiraa, ua tamau noa te metua tane i te rave i ta’na hopoiʻa mai te au i ta te hoê metua tane haapaʻo e tiʻa ia rave; aita râ oia i haapii noa, ua haapae atoa râ oia i te maa e ua pure hoi i te mau Sabati atoa, no ta’na ihoa râ tamaiti aau etaeta. I roto i te hoê taoto na’na, mai te huru ra e, no te tamaru rii ia’na, ua faaitehia mai ia’na ta’na tamaiti faaroo ore te haere ra na roto i te rupehu. I roto i te taoto, te ite ra oia i ta’na tamaiti i te haereraa i rapae i te rupehu e a tomo atu ai i roto i te maramarama anaana o te mahana, ma te tamahia e te tatarahapa mau. Ua ite faahou tatou i taua tamaiti ra, ua taui roa to’na huru i teie nei, e te fanaʻo nei oia i te tahi o te mau haamaitairaa taaʻe a te Fatu i roto i te Ekalesia, maoti hoi to’na na metua haapaʻo o tei ore i faaru’e ia’na.19
I teie nei, te hinaaro nei au e parau ia outou e te mau metua vahine: Eiaha e taora i te tauera no ta outou tamaiti e aore râ, ta outou tamahine [aau etaeta]; ia tae i te hoê mahana, mai te Tamaiti tei Haere i te Fenua Roa (e aore râ, te Tamaiti Puhura Taoʻa), e riro oia i te hoʻi i te utuafare no reira mai oia i te haereraa mai, mai te hoê pahi e tapapa i te vahi tipaeraa papu ia tae mai te vero ra.20
E nehenehe te hoê taurearea e faataaʻe ia’na i te mana o te hoê utuafare maitai e ia riro mai ei taata haapaʻo ore e te aau etaeta, tera râ, mai te mea e, ua vai i roto i to’na aau te mau haapiiraa maitai a te metua vahine, a vai apî noa ai oia, e hoʻi mai oia i niʻa i te reira, mai te hoê pahi e tapapa i te vahi tutauraa hau ia tae mai te vero ra.21
Eiaha e taora i te tauera no te tamaiti e aore râ, no te tamahine mai teie te huru [faaroo ore] inaha, tera iho â te eʻa e haerehia e te tahi mau taurearea. Te taparu nei au ia outou no taua mau tamaiti ra e no taua mau tamahine ra. Eiaha e taora i te tauera no te tamaiti e aore râ, no te tamahine tei titau i te tiamaraa ma te faaru’e i te parau no te faatura i roto i te utuafare. Eiaha e taora i te tauera ia rave mai ratou i te tahi mau peu o tei faaite mai e, aita e furiraa i roto i te upoo. Te hoê taata tei ite i te mau mea atoa, tei navaʻi oia ia’na iho, eita oia e farii faahou i te hoê noa aʻe parau aʻo, i to’na feruriraa, e pororaa te reira no te tau tahito, aita hoi e tuati faahou i niʻa i te huru o te feia apî …Te vai ra hoê mootua misionare ta maua i roto i te Misioni no te pae Apatoerau o te Fenau Peretane [North British]. Aita oia i maoro i reira, papai maira i te hoê rata faahiahia ma te parau mai e, u hoi mai i roto i to’na feruriraa ma te puai, te mau aʻo a to’na na metua. E au ïa mai te hoê buka i niʻa i te paepae vairaa buka tei vai i reira hoê ahuru e ma iva matahiti i teie nei, e te haamata nei oia i te raveraa mai no te taiʻo no te taime matamua. Mai tera ïa te huru o ta outou tamaiti e o ta outou tamahine. E manaʻo paha outou e, aita ratou e faaroo ra. Te manaʻo ra ratou e, aita ratou e faaroo ra, tera râ, ia tae i te hoê taime, e riro e, o ta outou te buka e ravehia mai e ratou e e taiʻo faahouhia te reira ia tupu mai te hinaaro rahi i roto ia ratou.
Te vaira te tahi mau puai o te tuati mai i roto i teie ohipa i muri aʻe i to te mau metua faaohiparaa i te mau raveʻa atoa e roaa ia ratou no te haapii i ta ratou mau tamarii. O taua huru puai ra ïa tei faaurû ia Alama tamaiti, o tei opua e te mau tamaiti a Mosia, i te haamou i te ohipa a to ratou mau metua paari. Te haamanaʻo ra outou, ua tonohia mai te hoê melahi, e ua tairi ia Alama. Ua tarava noa o Alama i raro e toru mahana e e toru pô mai te huru e, ua pohe oia, e ua parau atura te melahi:
“Inaha, ua faaroo aʻenei te Fatu ra i te pure a to’na ra mau taata, e te mau pure hoi a to’na ra tavini [o] Alama, to oe ra metua; e ua pure hoi oia ia oe ma te faaroo rahi, ia arataihia oe i te ite i te parau mau: e no reira i haere mai ai au e faaite atu ia oe na i te mana e te puai o te Atua ra, ia faatiahia te pure a to’na ra mau tavini mai te au i to ratou ra faaroo.” (Mosia 27:14).22
Aita paha e metua vahine e aore râ, e metua tane aita i parau e, “Ia tauturu mai te Fatu iaʻu ia ora ‘e piti ahuru e ma pae’ hora i te mahana hoê no te horoʻa i to’u ora i roto i te tiʻaraa metua vahine e te tiʻaraa metua tane, ia ore te hoê tamarii taʻu ia parau e, aita vau i faaohipa i te mau mea atoa i roto i to’u mana no te taparu ia’na ia haapae i te ino.” Te tahi pae o ta tatou mau tamarii e vai papu noa ratou e te haapaʻo, area te tahi pae ra, e haamata ïa ratou i te hahi ê, e i te tahi mau taime aita tatou e taa e, eaha ra te tumu. Area râ, e tiʻa anei ia tatou paatoa ia faaoti e, i roto i to tatou tiʻaraa metua i teie mahana, e parahi tamau tatou i pihaʻi iho i ta tatou mau tamarii, e paraparau tatou e o ratou, e horoʻa tatou ia ratou i te mau parau tumu faufaa roa aʻe o te parau mau hanahana.23
Te Mau Manaʻo Tauturu no te Haapiiraa e te Aparauraa
-
I roto i to outou tiʻaraa metua, eaha te mea tei tauturu ia outou no te haapapu i te here i rotopu ia outou e ta outou mau tamarii? Nahea te mau metua ia haapaʻo i te mau hinaaro taaʻe o te tamarii tataitahi?
-
No te aha i titauhia ai i te mau metua ia faaite tamau noa i te faatura te tahi i te tahi i te vahi taata e i roto hoi i to raua utuafare?
-
Nahea te mau metua ia faaitoito i te parau no te oreraa e titau i te faahoʻiraa e no te faatusiaraa, no te maitai o vetahi ê, i roto i to ratou utuafare?
-
No te aha e mea faufaa no te mau metua ia here i ta ratou mau tamarii noa’tu e, tei roto ratou i te hoê faito aita e hinaarohia ia here? Eaha te mau raveʻa no te faaiteraa te mau metua i to ratou mauruuru no te mau ohipa maitai e ravehia ra e ta ratou mau tamarii?
-
Nahea te mau metua ia faaau maite i te mau titauraa o te utuafare, o te Ekalesia, e o te ohipa?
-
I to outou manaʻoraa, eaha ta te Peresideni Lee e parau ra, a na ô ai oia e, “Te ohipa faufaa aʻe a te Fatu o ta outou e rave, o te ohipa ïa i rotopu i te mau pápáʻi o to outou iho fare.”?
-
Nahea te evanelia i te tauturu i te mau metua ia tapeʻa i ta ratou mau tamarii eiaha ia hahi ê? No te aha e mea faufaa ia ite e, ia hope te mau mea atoa i te ravehia e tatou, e riro ta tatou mau tamarii i te rave noa â i te mau maitiraa tiʻa ore? Eaha te mau tamaruraa ta te evanelia e horoʻa mai i te mau metua haapaʻo o te tamau noa i te here e i te haa i pihaʻi iho i ta ratou mau tamarii?
Ua matau-maitai-hia te Peresideni Harold B. Lee no ta’na mau a’oraa i te mau metua: “Te ohipa faufaa a’e a te Fatu o ta outou e rave, o te ohipa ïa i rotopu i te mau pápá’i o to outou iho fare.”