Pene 19

A Faataa na i te Taime no te Haamoʻa ia Outou

Nahea tatou ia haa i te mau mahana atoa no te faaamu i to tatou varua?

Omuaraa

E mea pinepine te Peresideni Harold B. Lee i te haapii i te faufaa no te faaamuraa i to tatou varua. Te parau ra oia e, e au to tatou tino i te hoê patu paari o te titauhia ia haamaitai tamau noa, ia vai paari noa oia i roto i te mau taime aroraa a te enemi.

Te parau ra oia e, “Te enemi o to outou ‘haapuraa’ tino nei, e enemi ïa no te pae tino e no te pae varua.” Teie taua mau enemi ra, “te oto manaʻo-ore-hia, te haamâ o te utuafare, te fifi i te pae no te moni, te [taviriraa] a te hoê hoa, e aore râ, te ofatiraa i te mau ture a te Atua na roto i ohipa huna.” Ia tupu anaʻe taua mau mea ra i roto i to tatou oraraa, e titau tatou “i te tahi tauturu taaʻe i te pae varua. … Mai te mea e, ua faaatea outou i te Ekalesia na roto i te haapaʻo-ore-raa, e ua paruparu to outou faaroo i te Atua, e mai te mea e, na roto i te haapiiraa aita outou i maramarama i te huru no te faaoreraa o ta outou hara, e aore râ, mai te mea e, aita outou i farii na roto i te pure, te haapapuraa mau o te hoê faautuaraa maitai no te hoê faatusiaraa e te mauiui, ua mutu ïa to outou reni pae varua, e ua mo’e te puai e hinaarohia e to outou varua. … Ua ineine roa to outou haapuraa i te haruhia e te mau puai o Satane. E au outou i reira mai te taata maamaa o tei patu i to’na fare i niʻa i te one, e ia farara mai te vero ra, e parari rahi to’na i reira. [A hiʻo i te Mataio 7:24–27].

“E no reira te taparu atu nei au ia outou … A ora ia nehenehe outou e farii mai roto mai i te pihaa o te maramarama [te] maa e te puai e tano no te mau mea e hinaarohia i te mahana tataʻi tahi. A rave i te hoê taime no te haamoʻa i te mahana tataʻitahi o to outou oraraa.”¹

Te mau haapiiraa a Harold B. Lee

Nahea tatou ia faaamu i to tatou varua?

Te vai ra i roto ia outou tataitahi te hoê varua o tei riro ei hohoa no to outou iho tino. No te tapeʻaraa i to outou tino ia vai maitai noa e ia vai itoito noa, ua titauhia ia faaamu tamau noa outou ia’na i te maa. I niʻa i te mau “cellule” atoa o to outou tino te vai ra te hoê tuatiatiraa uaua, e na te reira tuatiatiraa uaua e tapeʻa noa i te faanahoraa o te ora. Ia ore anaʻe teie tuatiatiraa uaua e haapao-maitai-hia, e aore râ, ia ore ratou ia faaamu maitaihia, e riro te reira i te pe, i te vai-noa- raa i te hoê faito, te maʻi e i te pae hopea, e pohe te tino tahuti.

E titau to outou tino varua ia faaamu tamau-noa-hia oia, ia tiʻa ia’na ia vai maitai noa e ia vai itoito noa. E ere râ te maa tino nei o te titauhia no te reira tino. Te maa e titauhia no to outou varua, o te maa ïa no te roto mai i te mau pihaa pae varua. Te mau parau tumu o te parau mau mure ore, mai tei faaitehia i roto i te evanelia, e te faaohiparaa i te reira na roto i te raveraa i te mau ohipa pae varua, tera ïa te mau mea e titauhia no to outou varua. E vai maite te ora o te varua mai te mea e, e tapeʻa-maite-hia te tuatiraa i niʻa i te mau pihaa pae varua o te parau mau. Te auraa o te maʻi e te pohe pae varua, oia hoi, te faatearaa ïa i te pihaa o te maramarama pae varua, o te muturaa ïa te tuatiraa i niʻa i te uaua rahi pae varua, oia te Ekalesia a Iesu Mesia.²

E haamaitai tatou i to tatou varua na roto i te faaohiparaa ia’na. … Mai te mea e, e hinaaro tatou ia maitai roa to tatou varua, e mea tiʻa ïa ia tatou ia atuatu ia’na mai ta tatou e atuatu i to tatou nei tino. E mea tiʻa ia tatou ia atuatu i to tatou varua i te mau mahana atoa na roto i te pure, na roto i te raveraa i te ohipa maitai i te mau mahana atoa, na roto i te horoʻaraa i ta outou na vetahi ê. E mea tiʻa ia tatou ia faaamu i to tatou varua i te mau mahana atoa na roto i te taiʻoraa i te mau papairaa moʻa i te mau mahana atoa, na roto i te faatupuraa i te [pô utuafare], na roto i te haereraa i te mau pureraa, na roto i te amuraa i te oroʻa moʻa. E ara ia tatou i te ino e tupu mai na roto i te ofatiraa tatou i te hoê o te mau faaueraa a te Atua. E au hoi te reira mai te raau taero i roto i to tatou tino varua. …

E tupu te hi’opoʻaraa i to tatou varua i te taime e tiʻa atu ai tatou i mua i te mau taote varua a te Atua—to tatou mau episekopo, to tatou mau peresideni títí, e i te tahi mau taime, i mua i te mau Hui Mana Faatere Rahi, i roto i te tahi mau uiuiraa, o te ravehia no te faaineine ia tatou no te hoê faanuuraa i mua i te pae varua. I te tahi mau taime, i muri aʻe i teie mau uiuiraa, e titauhia ia rave i te tahi mau tapuraa i niʻa i to tatou varua.³

Te mau mea atoa aita i au i te hinaaro o te Atua, e riro ïa mai te raau taero no to outou oraraa pae varua, e e mea tiʻa ïa ia haapaehia, mai ta outou atoa e haapae i te mau raau taero i roto i ta outou afata vairaa raau i te fare.⁴

E tutava te taata parau-tiʻa i te faaravaʻi-roa’tu ia’na na roto i to ’na iteraa e te vai nei to’na hinaaro tatarahapa i te mau mahana atoa no ta’na mau hape e aore râ, no to’na haapao ore. Aita oia e tauʻa rahi i te mea e roaa ia’na maoti râ, e tauʻa rahi aʻe oia i te mea o ta’na e horoa na vetahi ê, ma te ite e, i te hopea o taua eʻa ra, e roaa ia’na te oaoa. E tamata oia te faariro i te mahana tataitahi ei mahana maitai aʻe, ia nehenehe oia ia parau i roto ia’na iho e i to’na Atua ia hope taua mahana ra e, te mea o tei na roto atu i to’na rima i taua mahana ra, ua rave ïa oia ma to’na itoito mau.⁵

Nahea te haamoʻaraa i te Mahana Sabati i te faaamu i te varua?

E ere te Sabati i te hoê mahana faafaaearaa noa i te mau ohipa o ta tatou i mataro noa i te rave i roto i te roaraa o te hepetoma. Eiaha e faariro i te reira mahana ei mahana faahupehuperaa e te faatauraa, e aore râ, ei mahana arearearaa e te amuraa maa. E mahana faaoaoaraa te reira no to outou tino varua. Te vahi no te faaoaoaraa pae varua, tei roto ïa i te fare haamoriraa. I reira e iteahia ai ia outou te autaeaeraa o te feia e imi atoa ra i te maa varua, mai ia outou. Ua faauehia ia outou ia himene e ia pure e ia haamori atu i tei Teitei Roa ra, e ia amu i te oroʻa moʻa ei haamanaʻoraa i ta outou hopoiʻa ei tamaiti e aore râ, ei tamahine na te Atua i roto i te tahuti nei, e ei haamanaʻoraa i te taraehara a te Faaora, e no te haapapu faahou i to outou tiaturiraa i to’na ra iʻoa. …

I te fare anei e aore râ, i te fare pureraa anei, e mea tiʻa to outou mau feruriraa e ta outou mau peu ia tuati tamau noa i te huru o te varua e te tumu o te Sabati. I roto i te parau no te mau vahi faaoaoaraa e te hautiraa, noa’tu e, i te tahi taime, e riro te reira mau vahi ei tautururaa i te tahi mau hinaaro, e ere râ te reira i te mau vahi maitai no te tupuraa pae varua, e eita hoi te reira mau vahi e paruru ia outou ia ore outou “ia viivii i te mau mea no teie nei ao,” e faaere râ te reira ia outou i “te îraa o te fenua nei” o tei fafauhia mai i te feia e haapaʻo i te ture o te Sabati. [A hiʻo PH&PF 59:9, 16]. O outou o te faariro nei i te haapaʻo-oreraa i te Sabati ei peu na outou, na roto i te oreraa outou e “haa-moʻa i te reira,” te ere ra ïa outou i te hoê varua o tei î i te oaoa, no te farii i te hoê ponao o tei î roa i te arearea. E rahi aʻe ta outou haafaufaaraa i te mau hinaaro o te tino nei i te haafaufaa i to outou maitai pae varua. Eita e maoro, e itehia i roto i te taata haapaʻo ore i te Sabati, te mau tapaʻo no te inoraa o to’na faaroo na roto i te haapae roa-raa i to’na mau pureraa fetii i te mau mahana atoa, na roto hoi i te iteraa i te hape i te mau vahi atoa, na roto i te oreraa e aufau i ta’na tuhaa ahuru e te mau ô; e ia haamata te feruriraa o te hoê taata i te haapoirihia i te mea e, aita oia e farii faahou ra i te maa pae varua, eita e maoro, e haamata atoa oia i te mataʻu e i te riʻariʻa, e na te reira e tapeʻa ia ore te iteraa e aore râ, ia ore te haereraa i mua i te pae varua i roto i te parau tiʻa e roaa ia’na. O tera ïa te mau tapaʻo no te hiʻaraa pae varua e te maʻi pae varua o te tiʻa ia rapaauhia na roto anaʻe i te faaamuraa i te maa pae varua tano.

Taaʻe noa’tu te mau ohipa haamoriraa o ta tatou e rave i te Mahana o te Fatu, e tiʻa atoa ia tatou ia faaiti roa i te mau ohipa atuaturaa i te utuafare, e na rapae i te fare, o te mau ohipa titaumau hia anaʻe o te tiʻa ia faaotihia. A faariro i teie mahana ei mahana taiʻo-maite-raa i te mau papairaa moʻa e i te tahi atu mau buka maitai na roto i te aau pure. Ma te aau o tei î i te oaoa o te Sabati, a papai i te rata i tei herehia e outou, e aore ra, i te hoê taata tei taaʻe ia outou e o ta outou i here, e aore ra, i te hoê hoa e titau ra i to outou puai pae varua. A faariro i to outou fare ei vahi no te himeneraa e no te faatairaa i te tahi mau pehe maitai o tei au i te varua no taua mahana ra. I te ahiahi, ia haaputuputu outou i to outou utuafare no te hoê pureraa pae auahi outou anaʻe, e aore râ, e to outou atoa mau hoa, a tauaparau i te mau parau faufaa rahi o te evanelia, e a opani i te reira na roto i te haamaitairaa o te hoê pureraa fetii. Na to’u iteraa rau i haapii mai iaʻu e, ua riro te muhumuhuraa o te aau ei faaiteraa papu i te melo faaroo e, eaha te mea aita e tano i te varua haamoriraa o te Mahana Sabati.

… Tera râ, eiaha e feruri e, te haapaʻo-papu-raa i te ture no te Sabati, ua ravai noa ïa i reira no te tapeʻa i to outou tino varua ia vai maitai noa. E mea tiʻa ia faaamu i to outou tino varua i te mau mahana atoa o te hepetoma i te maa no to outou varua. Te pure fetii e te pure o te taata iho, te taiʻoraa i te mau papairaa moʻa, te here i roto i to outou utuafare e te taviniraa ma te pipiri ore ia vetahi ê, e mau mâna anaʻe te reira no te raʻi mai no te faaamu i to outou varua. Te haapaʻo- maite-raa i te Pô Utuafare i te mau hepetoma atoa, o tera atoa te tahi puai rahi no te faatupu i te parau tiʻa i roto i te utuafare. …

E no reira, te taparu nei au ia outou eiaha e faaere i to outou varua i taua puai faufaa ra, na roto i te haapaʻo-ore-raa i te Mahana Sabati, te faaitoito nei râ vau ia outou ia ora outou i te mau mahana atoa ia nehenehe ia outou ia farii mai roto mai i te pihaa o te maramarama, i te maa e te puai e titauhia i te mau mahana atoa.⁶

Nahea te haapaeraa i te maa e te aufauraa i te ô e riro ai ei maitai no tatou i te pae varua?

Ua ui au iaʻu iho e, “Eaha te ture no te haapaeraa maa?” e ua iteahia iaʻu te mau parau a te Peresideni Joseph F. Smith no te tatararaa i te reira e o taʻu e feruri nei e, e tatararaa maitai roa:

“E no reira, ua titauhia i te Feia Moʻa atoa o te Mau Mahana Hopea Nei ia horoʻa i to’na episekopo, i te mahana haapaeraa maa, i te maa o tei ore i amuhia e a’na e aore râ, e to’na utuafare, e ia horoahia’tu hoi te reira i te feia veve ra ei maitai e ei haamaitairaa no ratou; e aore râ, mai te mea e, e ere te maa, te hoo ïa o te reira maa, e aore râ, mai te mea e, e mea navaʻi te faufaa a taua taata ra, ia faataa oia i te hoê tino moni no te horoʻa atu na te taata veve.” [Gospel Doctrine, Te 5raa o te neneʻiraa. (1939), api 243].

E ua ui au iaʻu iho e, “Eaha te mau haamaitairaa o ta te Fatu e fafau mai nei ia tatou no to tatou haapaeraa i te maa e te aufau-raa i te ô?” Na te Peresideni [Heber J]. Grant i horoʻa tino roa mai iaʻu i teie nei pahonoraa, e o tei papai-roa-hia: a tahi, te haamaitairaa i te pae faufaa e i muri iho, te haamaitairaa i te pae varua. Teie ta’na i parau no niʻa i te haamaitairaa i te pae faufaa:

“Te fafau atu nei au ia outou i teie mahana e, mai te mea e, mai teie atu mahana, e haapaʻo te Feia Moʻa i te Mau Mahana Hopea Nei i te haapaeraa maa i te mau avaʻe atoa ma te parau tiʻa e te hinaaro mau, e ia horoʻa atu i roto i te rima o to ratou episekopo te tino moni tiʻa o tei ore e haamauʻahia e ratou no na tamaaraa e piti o ta ratou i haapaʻo mai …e roaa ïa ia tatou te moni e titauhia no te aupuru i te feia faatau e i te feia veve atoa.” [Gospel Standards, Haaputuraa a G. Homer Durham (1941), api 123].

Teie ta’na i parau no niʻa i te mau haamaitairaa o te pae varua:

“Te mau varua ora atoa i rotopu i te Feia Moʻa i te Mau Mahana Hopea Nei o te haapae e piti tamaaraa i te avaʻe hoê, e haamaitaihia ïa ratou i te pae varua, e tupu to ratou faaroo i te rahi no niʻa i te evanelia a te Fatu ra o Iesu Mesia—oia hoi, e haamaitaihia ratou i te tahi atu mau mea maitataʻi.” [Gospel Standards, api123].

Ia taiʻo anaʻe au i taua faahitiraa parau ra, e haamanaʻo vau i te parau ta te Peropheta Isaia i parau no niʻa i te mau haamaitairaa e fariihia e te taata o te haapae e o te tufa i ta’na maa i te feia i poia ra. … Teie na fafauraa pae varua nehenehe roa e maha o ta te Fatu i fafau mai i te feia e haapae i te maa e a tufa ai i ta ratou maa i tei poia ra; mai tei papaihia i roto ia Isaia, te fafauraa matamua:

“Ei reira to oe maramarama e puroro noa mai ai mai te poʻi-poʻi ra, e e ati vave hoi to oe ra mau puta; e na mua hoi to parau tiʻa ia oe i te haere; e te hanahana o Iehova te pee mai ia oe ra.”

E i muri iho, ua fafau mai te Fatu e:

“E parau oe i reira, e na Iehova e parau mai; na oe e tiʻaoro, e na’na e parau mai e, Inaha, teie Au.”

E ua fafau mai â te Fatu e:

“Ia hopoi mai oe i ta oe maa na tei poia ra, e paʻia aʻera te taata i roohia e te ati ra, ei reira to oe maramarama e hiti mai ai i roto i te pouri, e to oe ra pouri e riro mai te avatea ra.”

E i te hopea ra, teie te fafauraa:

“E na Iehova e aratai tamau ia oe ra, e na’na e haamâhâ i to va-rua i te poʻihâ rahi ra; e na’na e faaetaeta faahou mai ia oe: e riro hoi oe mai te ô faararirari-maitai-hia i te pape ra, e mai te pape pihaa eita roa e pohe ra.” [Isaia 58:8–11].

Ia tuu-anaʻe-hia teie mau haamaitairaa i roto i te mau fifi e te mau peʻapeʻa o te oraraa nei, e itehia to ratou hohoa papu i roto i te hoê fifi o tei faatiahia mai e te hoê o to tatou mau peresideni misioni, i niʻa i te Mau Hui Mana Faatere Rahi i te tahi tau matahiti i mairi aʻe nei. A ora ai tatou i roto i te huru papu ore o taua tau tamaʻi ra, ua faatia mai teie metua tane i teie nei fifi:

E mahana haapaeraa maa taua mahana ra. Ua tiʻa oioi oia i niʻa i taua poʻipoʻi ra, ua oti te mau ohipa i rapae i te fare faaapu i te ravehia, e i teie nei, tei roto oia i ta’na faaapu no te tahi tau minutirii hou a haere atu ai oia i te pureraa Autahuʻaraa i taua poʻipoʻi ra. …

I taua poʻipoʻi ra, i to’na haereraa i roto i te faaapu, aita to’na e manaʻo rahi no niʻa i ta’na na tamaiti te vaira i niʻa i te tahua tamaʻiraa, tera râ, a haere noa ai oia na roto i te faaapu, ua tupu te huru-ê-raa i niʻa ia’na mai te mea ra, e fifi to te hoê o taua na tamaiti ra. Ua hoʻi maira oia i te fare. Te parau ra oia e, “Aita vau i haere noa, ua horo râ vau, e ua haaputuputu mai au i to’u utuafare i roto i te piha i mua, e ua parau atu vau ia ratou e, ‘I teie nei, aita vau e hinaaro i te hoê melo o to’u utuafare ia amu i te hoê noa aʻe maa i teie mahana, te ani nei au ia outou ia haapae i te maa, te ani nei au ia outou ia pure, e te hinaaro nei au ia tuturi outou i raro i pihaʻi iho iaʻu e ia pure tatou i to tatou pure fetii, no te mea, ua tupu iho nei te hoê manaʻo i roto iaʻu e, ua roohia te hoê tamaiti ta tatou i te fifi i roto i te tamaʻi.’ ”

E no reira ua haaputuputu aʻera ratou e ua faaoti ihora i to ratou pureraa i te poʻipoʻi. Ua haapae ratou i te maa, e aita ratou i faaea i te haapae, ua tamau noa râ ratou i te haapae i muri aʻe i taua mahana ra. Ua mairi hoê ahuru mahana peʻapeʻa, i reira, ua tae maira te parau na roto mai i te taatiraa no te Tatauro Ura, i te faaiteraa mai e, i taua poʻipoʻi ra (e ia faaau anaʻe ratou i te taime a tupu ai te reira, o te taime mau ïa i tupu ai taua manaʻo ra i niʻa i te metua tane), ua taahi ta’na tamaiti e to’na hoa i niʻa i te hoê “tupita huna” e ua huʻahuʻa roa to’na hoa, area teie tamaiti ra, ua mutumutu roa ïa, e ua vai noa oia i reira fatata i te pohe.

Te haapaeraa maa e te pure— “E parau oe i reira, e na Iehova e parau mai; na oe e tiaoro, e na’na e parau mai e, Inaha, teie au.”⁷

Nahea te feruri-maite-raa i te haafatata ia tatou i te Fatu?

Ua parau te Peresideni [David O]. McKay e, “Aita e ravai te taime o ta tatou e rave no te feruri maite.” Te tiʻa oioi nei au i niʻa i te poʻipoʻi …, hora pae, te taime ïa e mea maramarama maitai to’u varua e ua mâhă maitai te rohirohi. Ei reira vau e feruri maite ai. Ia haapii outou i te feruri maite, eita outou e manaʻo e, e nehenehe outou e fatata roa i pihaʻi iho i te Fatu. A vaiiho i to outou varua ia haapiihia e te Varua.⁸

Eita e mo’ehia oioihia i te Tino Ahuru Ma Piti te aʻoraa a te Peresideni David O. McKay i roto i ta matou apooraa i te hoê po ʻipoʻi, inaha, ua faaite papu mai oia i te faufaa rahi no te raveraa i te taime no te feruri maite, ia vai maitai noa i te pae varua. … “E ohipa faufaa roa ia vai araara noa i te muhumuhuraa a te Varua, e ua ite tatou e, ia tae mai teie mau muhumuhuraa, e horoʻa ïa e e haamaitairaa hoi ia farii tatou i te reira. E tae mai te reira i te taime a vai ai tatou i roto i te hau, eiaha râ i roto i te aehuehuraa o te mau farereiraa.”

I muri iho, ua faatia maira te Peresideni i te hoê ohipa o tei tupu i roto i te oraraa o te Episekopo John Wells, e melo oia i roto i te Episekoporaa Faatere Rahi i mua aʻe nei. Ua pohe te hoê tamaiti a te Episekopo Wells i Emigration Canyon, i niʻa i te aroa tereraa pereoo auahi. … Ua tere te pereoo auahi na niʻa i ta’na tamaiti. Aita e raveʻa no te tamaru i te oto o te tuahine Wells. Ua taʻi noa oia i na mahana e toru hou te oroʻa hunaraa, e aita ihoa i mărû i te mahana o te hunaraa, e ua fifi roa oia i te pae no te feruriraa. Te mahana i muri mai i te hunaraa, te tarava noa ra oia i niʻa i to’na roʻi ma te oto, te faaite ra oia e, ua fâ mai ta’na tamaiti ia’na e ua parau mai e, “Mama, eiaha e oto. Eiaha e taʻi. E mea maitai roa vau.” Ua parau mai teie tamaiti ia’na e, aita oia i ite e mea nahea te fifi i te tupuraa mai. Ua faataa mai oia e, te horoʻa ra oia i te tapaʻo i te taata faahoro ia faatere i te pereoo auahi e a tapapa oia no te haru i te aua paruru o te pereoo auahi, mai tei matarohia e a’na; i to’na râ tapaparaa, ua tafifi to’na avae i niʻa i te hoê a’a raau, aita’tura i roaa ia’na i te haru i te aua paruru, e ua topa oia i raro aʻe i te pereoo auahi. E mea papu maitai e, e ati tei tupu. Te parau ra oia e, i to’na iteraa e, tei roto ona i te hoê ao ê, ua tamata oia i te imi i to’na metua tane, aita râ oia e nehenehe ia tapeʻa’tu i to’na metua tane. Tei roto to’na metua tane i ta’na piha toroʻa, aita tura oia e nehenehe e pahono i ta’na pii; no reira, ua haere mai oia e farerei i to’na metua vahine e na ô atura ia’na e, “E parau oe ia Papa e, e mea maitai roa vau. Te ani nei au ia oe eiaha oe e oto faahou.”

E te parau ra te Peresideni McKay e, te mea ta’na e hinaaro ra e parau ei faahiʻoraa, ia parahi anaʻe tatou ma te hau i roto i te hoê piha, i reira ïa tatou e farii ai i taua mau mea ra, no’na iho ra, e roaa ia’na te mau feruriraa maitai i muri aʻe i te taime a tiʻa mai ai oia i niʻa i te poʻipoʻi ma te hau, e ma te opua i te mau ohipa o te reira mahana, e i reira, e tae mai taua mau manaʻo ma te maramarama mau mai te huru ra e, te faaroo ra oia i te hoê reo, e mai te mea atoa ra e, ua tiʻa mau taua mau manaʻo ra. Mai te mea e, te haapeʻapeʻa ra tatou i to tatou manaʻo no niʻa i te hoê mea, e te vai ra te au ore i roto i to tatou feruriraa, eita ïa te faaurûraa e tae mai. Tera râ, ia ora tatou ma te haapeapea ore e ma te feruriraa tiamâ e te maramarama maitai e ma te tauʻa i te tahi e te tahi, te ohipa ta te varua o te Fatu e rave i niʻa i to tatou varua, e ohipa papu mau ïa, e au ïa mai te huru e, te rave ra tatou i te niuniu paraparau; tera râ, ia tae anaʻe mai te reira, a faaroo mai, e mea tiʻa ia ravaʻi to tatou itoito no te faaohiparaa i te mea i horoʻahia mai. …

A haamanaʻo maitai i te reira—e na reira atoa outou. A rave i te taime no te feruri-maite-raa. E rave rahi te taime e tapito outou i te mau fifi, e iteahia râ te raveʻa i te pae varua no te faatitiaifaro i te reira.⁹

Eiaha e faarahi-roa’tu ta outou ohipa ia ore hoi to outou e taime no te feruri maiteraa. A faataa i te taime. Eita te iteraa papu faufaa roa aʻe e roaa na roto mai i ta te mata e ite ra, na roto roa mai râ i te hohonuraa o te aau. Ua fatata roa mai paha te Mesia, i ta tatou i manaʻo na. “Tei rotopu vau ia outou na e aita hoi ou-tou e ite mai iaʻu nei. Na te Varua Maitai e faaite papu. Tei niʻa to’u nei mata ia outou na. Te fatata mai nei râ te mahana outou e ite ai e te vai nei au.” [A hiʻo PH&PF 38:7–8].¹⁰

Te Mau Manaʻo Tauturu no te Haapiiraa e te Aparauraa

No te aha i titauhia ai ia tatou ia rave i te taime no te faaamu ia tatou i te pae varua? Eaha ta tatou e rave i te mau mahana atoa no te faaravai i to tatou huru pae varua?
Eaha te mea e faataupupu i ta tatou mau tautooraa no te faaamu ia tatou i te pae varua?
Nahea tatou ia fariro i to tatou utuafare ei vahi faaamuraa i te varua o te melo tataitahi o te utuafare?
E mea nahea te faturaraa i te mahana Sabati i te tautururaa ia outou ia tupu i te rahi i te pae varua? Eaha te mau ohipa e rave i te Sabati e tiʻa ia tauturu ia outou e i to outou utuafare no te tapearaa i te hoê varua haamori e hope noa’tu taua mahana ra? Ia haapaʻo ore anaʻe tatou i te Sabati, no te aha “te ere ra ïa outou i te hoê varua o tei î i te oaoa, no te farii i te hoê ponao o tei î roa i te arearea”?
Eaha te mau haamaitairaa e roaa i te feia e haapae i te maa? (A hiʻo Isaia 58:8-11). E mea nahea to outou iteraa i teie mau haamaitairaa i te tupuraa?
Eaha ta tatou i apo mai i roto i te aamu o te Episekopo John Wells no niʻa i te faufaa no te raveraa i te taime no te feruri maite i niʻa i te mau mea o te varua? E mea nahea i tiʻa ai ia outou ia faaô i te feruri-maite-raa i niʻa i te mau mea o te varua i roto i to outou oraraa?

Ua haapii te Peresideni Harold B. Lee e: “A ora ia nehenehe outou e farii mai roto mai i te pihaa o te maramarama [te] maa e te puai e tano no te mau mea e hinaarohia i te mahana tataʻi tahi. A rave i te hoê taime no te haamoʻa i te mahana tataʻitahi o to outou oraraa.”