Pene 9
Faaroo i te Veʻa Mau a Iesu Mesia
Nahea tatou ia pee papu atu â i te peropheta ora?
Omuaraa
Ua riro mai o Harold B. Lee ei ahuru e ma hoêraa o te Peresideni o te Ekalesia i te poheraa o te Peresideni Joseph Fielding Smith i te avaʻe Tiurai 1972. Aita i maoro i muri iho, ua haere atu te Peresideni Lee e mataitai i te hoê piha i roto i te hiero no Salt Lake City, tei reira te faatautauraahia te hohoa o te mau peresideni hoê ahuru tei na mua’tu ia’na. Te parau ra oia e, “Ma te aau pure, i reira to’u hiʻohiʻoraa i te mau hohoa peni o taua mau taata no te Atua ra—e mau taata mau e te viivii ore, e mau taata teitei na te Atua—tei na mua’tu iaʻu i roto i teie atoa nei piiraa.” Ua mataitai maite oia i to ratou huru e te mau ohipa i ravehia e teie mau peropheta tataitahi no teie tau tuuraa hopea e tae roa’tura i niʻa i te hohoa hopea. “Tei reira te Peresideni Joseph Fielding Smith e to’na mata ataata, oia to’u peropheta-faatere here, aita oia i faahuru ê i te parau mau. … Mai te mea ra i taua taime poto ra e, te horoʻa maira oia iaʻu nei i te sepeta no te parau tiʻa mai te parau mai e,‘E haere oe, e na reira atoa.’ …
“Ua ite au e, na roto i te hoê iteraa papu puai atu i tei ite-matahia, mai ta te Fatu i parau ra, ‘Ua horoahia’tu te mau taviri no te basileia o te Atua i te taata nei i niʻa i te fenua nei [mai te Peropheta Iosepha Semita e tae mai i to’na mau mono e tae roa mai i teie tau], e mai reira atu te evanelia e tere atu ai e tae noa ’tu i te mau hopea o te ao nei.’ ” [PH&PF 65:2].1
Te Peresideni o te Ekalesia anaʻe te taata hoê roa i niʻa i te fenua nei tei faatiahia no te faaohipa i te mau taviri atoa o te autahuʻaraa. Ua haapii mai te hoê peropheta no te tau hopea nei e: “Ia maʻihia te hoê Peresideni no te Ekalesia, e aore râ, ia ore e tiʻa faahou ia’na ia rave-hope-roa i te taatoaraa o te mau ohipa o to’na toroʻa, na to’na ïa na tauturu e piti, inaha hoi, ia amuihia o’na e na tauturu, ua riro ïa ratou ei pŭpŭ no te Peresideniraa Matamua, na raua ïa e faahaere i mua te ohipa a te Peresideniraa. Te mau uiraa, te mau aratairaa ture, te mau faanahonahoraa, e aore râ, te mau parau haapiiraa, e hiʻopoʻa-maite-hia ïa te reira e na Tauturu i roto i te Peresideniraa Matamua e te Pŭpŭ no te Tino Ahuru Ma Piti Aposetolo, na roto i te pure, i roto i te apooraa. Aita roa’tu e faaotiraa e matara mai na roto mai i te Peresideniraa Matamua e te Pŭpŭ no te Tino Ahuru Ma Piti ma te ore te taatoaraa e tahoê. E haere te Ekalesia i mua ma te maumau ore na roto i te peeraa i teie hohoa faaurûhia.”2
I roto i to tatou tiʻaraa melo no te Ekalesia a te Fatu, e nehenehe tatou e tiaturi-hope-roa i te aratairaa a te peropheta ora, ta te Peresideni Lee i parau e, “te veʻa mau” a te Fatu. Ua haapii mai te Peresideni Lee e, “mai te mea e, e faaroo te mau tamarii a te Fatu, oia hoi, te mau taata atoa i niʻa i te fenua nei, taaʻe noa’tu to ratou tiʻaraa aiʻa, te iri, e aore râ, te faaroo, i te tiaororaa a te veʻa mau no te evanelia a Iesu Mesia. … e tae mai te tau e hiʻo ai te taata tataitahi i te Fatu, e a ite ai e, te vai mau ra Oia.”3
Na roto i te peeraa i te peropheta a te Fatu, e tapae tatou ma te peʻapeʻa ore i te vahi ta tatou e titau nei—oia hoi, i mua i te aro o to tatou Metua i te Ao ra.
Te mau haapiiraa a Harold B. Lee
Mea nahea te Peresideni o te Ekalesia i te riroraa ei tiaʻi no te basileia o te Fatu?
Eiaha ia moʻehia ia outou e, te upoo o teie ekalesia e ere ïa te Peresideni no te Ekalesia. Te upoo o teie ekalesia o te Fatu iho, o Iesu Mesia, o te faatere nei e o te aratai nei. … I roto i te mau fifi e vai nei, e tiʻa ia tatou ia ite papu e te aratai nei oia, eiaha te reira ia moʻehia ia tatou.4
“[O Iesu] hoi te upoo o te tino ra o te ekalesia nei: o te matamua oia, te matahiapo o te feia i pohe ra; ia hau ê atu â oia i te mau mea atoa nei.” (Kolosa 1:18). Tera râ, e parau mau atoa hoi e, i roto i te mau tau tuuraa tataitahi a vai ai ta’na evanelia i niʻa i te fenua nei e a faatiahia ai ta’na Ekalesia, ua maiti te Fatu e ua horoʻa i te mana i te hoê taata i te taime hoê i roto i taua mau tau tuuraa ra, e ua parauhia oia, te peresideni o te Ekalesia, e aore râ, te peropheta, te hiʻo e te heheu parau no te Ekalesia. E ere na teie mau tiʻaraa, e aore râ, e ere na teie horoʻaraa i te mana, e faariro i te hoê taata ei “Upoo no te Ekalesia,” inaha hoi, no Iesu Mesia te reira tiʻaraa. E faariro râ te reira ia’na ei auvaha parau no te Atua, e ei taata o te rave i te ohipa ei mono no te Atua, e na roto ia’na hoi te Atua e paraparau mai ai i to’na nunaa na roto i te haapiiraa, e horoʻa mai ai, e aore râ, e iriti ê atu ai i te mau parau tumu e te mau oroʻa, e aore râ, e faaara mai ai i te mau haavâraa. …
… O te Peresideni o te Ekalesia te tiʻai i te Fare e aore râ, i te Basileia o te Fatu. Tei roto i to’na rima te tuuaraahia te mau taviri o te mau tuhaa atoa. Na roto i te faaueraa a te Fatu e horoʻa oia i te mau taviri o te mana i te tahi mau melo ê atu o te Ekalesia no te bapetizo, no te poro i te evanelia, no te tuu i te rima i niʻa i te feia maʻi, no te faatere e aore râ, no te haapii i roto i te mau huru toroʻa atoa. E horoʻa oia i te tahi anaʻe mau taata ra, i te mana no te faatere i te mau oroʻa o te hiero e aore râ, no te rave i te faaipoiporaa i reira “no te haamau i te fenua nei e i te ao ra.”5
Te peropheta, o te faaite ïa e te tatara hoi i te manaʻo e te hinaaro o te Atua. Tei ia’na ra te mau taviri no te basileia o te Atua i to tatou nei anotau, mai tei horoʻahia’tu ia Petero ra, oia te upoo o te Ekalesia i te fenua nei i to’na ra anotau.6
Te hinaaro nei au e taiʻo atu ia outou i te tahi parau tei papaihia [e te Peresideni J. Reuben Clark Jr]. i te hoê taime: “Ia haamanaʻo noa tatou e … o te Peresideni anaʻe o te Ekalesia, oia te Tahuʻa Rahi Faatere, … o te tiʻa ia farii i te mau heheuraa no te Ekalesia, e heheuraa apî anei e aore râ, e mea faahuru-ê-hia anei, e aore râ, ia horoʻa i te tatararaa mana o te mau papairaa moʻa no niʻa i te Ekalesia. … O oia anaʻe iho te auvaha parau no te Atua i niʻa i te fenua nei no Te Ekalesia a Iesu Mesia i te Feia Moʻa i te Mau Mahana Hopea Nei, oia te Ekalesia mau aita’tu. Na’na anaʻe e faaite mai i te manaʻo e te hinaaro o te Atua i to’na mau taata. Aita roa’tu e tiʻa faatere no te tahi atu Ekalesia i te ao nei e mau nei i teie tiʻaraa teitei e teie haamaitairaa hanahana.” [Church News, i te 31 no Tiurai 1954, api 10].7
Te taata hoê roa o tei faatiahia no te horoʻa mai i te tahi parau haapiiraa apî, o te Peresideni anaʻe ïa o te Ekalesia, e ia na reira hoi oia, e parau oia i te reira ei heheuraa no ô mai i te Atua ra, e e fariihia ïa te reira e te Apooraa no te Tino Ahuru Ma Piti e e paturuhia hoi e to te Ekalesia taatoa.8
E mea nahea ia maiti i te Peresideni o te Ekalesia?
I te feia e ui nei i te uiraa e: Nahea ia maiti i te Peresideni o te Ekalesia? te pahonoraa tano e te ohie, o te faahitiraa parau ïa no te hiroʻa faaroo pae: “Te tiaturi nei matou e, hou te taata e aʻo ai i te Evanelia e hou oia e faatere ai i te mau oroʻa no te reira, e mea tiʻa ia’na ia maitihia e te Atua na roto i te tohu e te tuuraa rima o te feia i haamanahia.”
E haamata te piiraa o te hoê taata ei Peresideni no te Ekalesia i te taime e piihia ai oia, e faatoroʻahia ai e e faataahia ai ei melo no te Pŭpŭ no te Tino Ahuru Ma Piti Aposetolo. E ravehia te reira piiraa na roto i te tohu, e aore râ, e nehenehe atoa ia parau e, na roto i te faaurûraa a te Fatu i te taata tei mau i te mau taviri o te peresideniraa; na taua piiraa ra, e tae noa’tu i te faatoroʻaraa e te faataaraa na roto i te tuuraa rima no taua tiʻa mana ra, e tuu i te Aposetolo tataitahi i roto i te hoê pŭpŭ autahuʻaraa, hoê ahuru e ma piti rahiraa ratou i roto, e o tei mau i te tiʻaraa aposetolo.
Te Aposetolo tataitahi tei faatoroʻahia i raro aʻe i te rima o te Peresideni o te Ekalesia, oia tei mau i te mau taviri no te basileia o te Atua, e te tahi atu mau Aposetolo faatoroʻahia, ua horoʻahia ïa ia’na te mana autahuʻaraa e au no te raveraa i te mau huru tiʻaraa atoa i roto i te Ekalesia, e tae roa’tu i te tiʻaraa peresideniraa i niʻa i te Ekalesia mai te mea e, e piihia oia e te mana faatere e ma te paturuhia e te hoê amuiraa melo no te Ekalesia.
… I muri noa iho i te poheraa o te hoê Peresideni, e riro te tino i muri mai, oia te Pŭpŭ no te Tino Ahuru Ma Piti Aposetolo, ei mana faatere, e o te Peresideni no te Tino Ahuru Ma Piti te riro ei Peresideni mono no te Ekalesia e tae roa’tu i te taime e faatoroʻahia ai e e paturuhia ai te hoê Peresideni no te Ekalesia i roto i to’na toroʻa. …
E paturu tamauhia te mau melo atoa o te Peresideniraa Matamua e te Tino Ahuru Ma Piti ei “peropheta, ei hiʻo, e ei heheu parau.” … To’na auraa ra, maori râ ïa, e nehenehe ta te mau Aposetolo atoa tei maitihia e tei faatoroʻahia, e faatere i te Ekalesia mai te mea e, “e maitihia oia e te tino [oia hoi, te Pŭpŭ no te Tino Ahuru Ma Piti], i faataahia e i faatoroʻahia hoi i te reira toroʻa, e i turuhia hoi e te tiaturiraa, te faaroo, e te pure atoa no te ekalesia,” ia au i te faahitiraa o te hoê heuheuraa no niʻa i teie nei parau, tera râ, e tiʻa te reira mai te peu e, o oia te melo maoro roa aʻe, e aore râ, te Peresideni no taua tino ra ( a hiʻo PH&PF 107:22).9
A parahi ai au ei melo apî roa aʻe i roto i te Pŭpŭ no te Tino Ahuru Ma Piti, te faaapîraa matamua o te Ekalesia tei faatiahia iaʻu ia amui atu, o te faaapîraa ïa tei tupu i te taime a pohe ai te Peresideni [Heber J]. Grant. … I te taime a maiti ai te Peresideni [apî] i to’na na tauturu e a haere ai ratou e parahi i mua, ua tupu ihora te hoê faaiteraa i roto i te hohonuraa o to’u aau e, teie mau te mau taata ta te Fatu i hinaaro ia riro ei Peresideniraa no te Ekalesia. Ua roaa te reira iteraa iaʻu mai te otoraa pu te huru i roto i to’u taria.
… Mai te mea e, aita te mau melo o teie nei ekalesia e farii i te iteraa e, te arataihia nei ratou i roto i te eʻa mau, e mai te mea e, aita ratou e tiaturi e, teie mau taata na te Atua, e mau taata faaurûhia ïa e tei maitihia na roto i te rima o te Atua, aita ïa ratou i faafariu-mau-hia.10
E heheu mai [te Fatu] i te ture e Na’na e maiti, e aore râ, e faataa i te feia toroʻa, e na’na atoa e faahapa, e aʻo, e aore râ, e iriti ia ratou ia au i to’na ra hinaaro. No reira i titauhia ai te hoê [para-parauraa] tamau na roto i te heheuraa, i rotopu Ia’na e i Ta’na Ekalesia. Ei haamataraa no te mau mea i parauhia’tu na, e hiʻo tatou i te mau hiʻoraa o te mau u’i atoa tei papaihia i roto i te mau papairaa moʻa. Ua haamata teie huru faatereraa i roto i Edene. Ua faataa te Atua ia Adamu no te faatere i te fenua nei e ua horoʻa i te ture ia’na. Ua tere noa te reira huru faanahoraa no te monoraa, mai ia Adamu e tae mai ia Noa, e mai ia Noa e tae mai ia Melehizedeka, Aberahama, Isaaka, Iakoba, Iosepha, Mose, Samuela te peropheta, Ioane, Iesu, e Ta’na mau Aposetolo, o ratou paatoa, ua maitihia ratou na te Fatu eiaha râ na te taata.
Oia mau e nehenehe te taata e parau i te parau i roto i te faatereraa o te basileia o te Atua, aita râ ratou e horoʻa i te mana i roto i te parahiraa matamua, aita atoa ratou e iriti ê i te reira. Hoê hiʻoraa: E ere na te nunaa i maiti i na Aposetolo hoê ahuru e ma piti a Iesu Mesia, e ere atoa na te nunaa i iriti ê i to ratou tiʻaraa aposetolo. I vai na te faatereraa o te basileia i mutaa iho ra, o te reira atoa ïa tei faahoʻi-faahou-hia mai. E ere na te taata i maiti i te Peropheta e te Aposetolo rahi o teie tau, o Iosepha Semita, na te Atua râ i maiti ia’na, mai ta’na i maiti i te tahi pueraa na mua’tu ia’na—na roto i te orama e na roto i to’na iho reo no te raʻi mai.11
A feruri ai au i niʻa i teie hopoiʻa [e peropheta], e a parahi ai au i pihaʻi iho i te mau Taeae e rave rahi matahiti i teie nei, ua ite au e, te taata tei piihia i roto i teie nei tiʻaraa, tei raro aʻe ïa oia i te hiʻopoʻaraa tamau a te Taata o ta tatou e tavini nei. Eita roa’tu Oia e vaiiho i te hoê taata i roto i teie tiʻaraa ia aratai ê i te ekalesia. E parau papu teie. Ia feruri anaʻe au i te raveraa e tiʻa mai ai te hoê taata i niʻa i te tiʻaraa faatere i roto i te Ekalesia, e feruri au iaʻu iho i roto i te roaraa e toru ahuru e ma hoê matahiti e te afa, e i te mau mea atoa tei tupu mai i roto i to’u nei oraraa—aue ïa faanahoraa faahiahia no te faaineineraa! Ia tae mai te taime no te tauiraa i te Peresideniraa Matamua, e faaau vau i te reira i te huru o to te mau pŭpŭ porotita faautaraa i te peresideni o te Hau Marite i niʻa i to’na tiʻaraa, e aore râ, i te huru no te haamanaraa i te hoê arii, ei faaiteraa e, na roto i te faanahoraa a te Fatu, te ravehia nei te reira mau tauiraa ma te mainoinoraa ore, ma te tamaʻi ore. Ua papu te faanahoraa e aita te Fatu e hape, Ta’na ïa parau ia tatou.12
No te aha tatou e pee ai tatou i te peropheta?
I teie nei, ia riro teie mahana ei mahana feruriraa-hohonu no tatou, no te haamanaʻoraa i te mau mea ta te Fatu i parau aʻe na mai ia tatou. Tei te fenua nei To’na peropheta i teie mahana, e mai te mea e, e hinaaro outou ia ite i te heheuraa hopea roa tei horoʻahia mai i te taata nei, e haere outou e hiʻo i roto “conference report” [te parau faataaraa ohipa o te amuiraa] hopea nei, e i reira outou e taiʻo maitai ai i te mau parau ihoa râ ta te Peresideniraa Matamua i faahiti. … E iteahia ia outou te mau parau maitai roa e te mau parau hopea roa tei horoʻahia mai e to tatou Metua i te Ao ra. Eiaha tatou e tiaturi noa i niʻa anaʻe i te mau mea i papaihia i roto i te mau buka tumu a te Ekalesia. Taaʻe noa’tu te mau parau i roto i te mau papairaa moʻa, te vai atoa ra te mau parau ta te mau peropheta e parau mai nei ia tatou i ô nei e i teie nei, e na tatou hoi te reira e faaroo e e haapaʻo mai te mea e, e hinaaro tatou ia faaorahia tatou i niʻa i te mouʻa o Ziona ra.13
I teie tau, ia paraparau anaʻe mai to tatou mau taeae faatere na roto i te mana, e mea pinepine roa i te iteahia te tahi mau taata ia tiʻa mai no te faahapa ma te parau mai e, “I teie nei, i hea e iteahia ai iaʻu te tahi mana o te tiʻa ia outou ia faahiti no niʻa i te mea ta outou e parau na?” E tupu roa mai te hinaaro i roto ia matou no te parau e, “E hoʻi outou e taiʻo i te aʻoraa a te tiʻa faatere o te Ekalesia i teie mahana no niʻa i teie tumu parau, i reira outou e ite ai i te taatoaraa o te mana ta outou e imi na, no te mea, teie te raveraa a te Fatu. Tei ô nei To’na peropheta, e ua tiʻa hoi te heheuraa mai te au i te hinaarohia, e e mea papu maitai te reira mai te au i tei tupu na i roto i te mau huru tau tuuraa atoa o te evanelia i niʻa i te fenua nei.”14
I teie nei, te parururaa hoê roa e vai nei i niʻa ia tatou te mau melo no te Ekalesia, o te rave-tia-raa ïa i te mea ta te Fatu i parau atu i to te Ekalesia i te mahana a faatiahia ai te Ekalesia. E mea tiʻa ia tatou ia haapii i te haapaʻo i te mau parau e te mau faaueraa ta te Fatu e horoʻa mai na roto i To’na peropheta, “mai te noaa ia’na ra, i te haereraa moʻa i mua iaʻu nei; … mai te mea ra e no roto i to’u iho nei vaha, mai te faaoromai e te faaroo” (PH&PF 21: 4–5). Te vai ra te tahi mau mea e titauhia te faaoromai e te faaroo. Eita paha outou e au roa i te mau mea no ô mai i te feia faatere o te Ekalesia. Ua taaʻe paha te reira i to outou mau manaʻo no niʻa i te porotita. Ua taaʻe paha te reira i to outou mau manaʻo no niʻa i te oraraa totiare. Te tito rii ra paha te reira i te tahi mau mea o to outou iho oraraa totiare. Area râ, mai te mea e, e haapaʻo outou i teie mau mea, mai te huru e, no roto mai ïa i te vaha o te Fatu iho, ma te faaoromai e te faaroo, ua fafauhia e, “e ore roa outou e noaa i te mau uputa o hade; oia ïa, e na te Fatu ra o te Atua e haapurara ê atu i te mau mana no te pouri [poiri] mai mua atu ia outou, e e faaaueue hoi i te raʻi ei maitai no outou na, e i to to’na iʻoa ra hanahana hoi” (PH&PF 21:6).15
E ia outou na e te Feia Moʻa i te Mau Mahana Hopea Nei i te mau vahi atoa, e roaa ia outou taua fafauraa ra [i roto i te PH&PF 21:4–6] mai te mea e, e pee outou i te mau tiʻa faatere ta te Fatu i tuu mai i roto i te Ekalesia, ma te haapaʻo i ta ratou aʻoraa ma te faaoromai e te faaroo.16
A tiaturi i niʻa i te Peresideni o te Ekalesia no ta outou mau haapiiraa. Mai te mea e, e tupu noa mai te tahi mau umeumeraa, a faaroo e a pee i te Peresideni mai te mea e, e hinaaro outou ia haere na roto i te maramarama.17
Mai te mea e, e hinaaro to outou mau taata ia arataihia ratou ma te hau i roto i teie mau tau [fifi] o te haavare e te mau parau hape, e mea tiʻa ïa ia ratou ia pee i to ratou mau aratai e ia titau i te aratairaa a te Varua o te Fatu ia ore ratou ia riro ei haavareraa na te feia haavare, inaha, na roto i te tahi mau feruriraa pi’o, te imi nei ratou ia faafariu ia outou i niʻa ia ratou e ia riro outou ei pípí na ratou no te haapaʻo i to ratou mau manaʻo, e i te tahi mau taime, to ratou mau hinaaro riʻariʻa.18
I teie nei, i te anotau o te Fatu ra, e rave rahi mau taata tei ore i farii Ia’na ei Tamaiti na te Atua. Te vai ra tei parau e, “Te tamaiti hoi te raʻe na Iosepha, te taata tamuta fare,” Te na ô ra te tahi e, “E Tamaiti Hui Arii Oia na Belezebuba,” oia hoi, te tamaiti a te diabolo. I To’na raveraa i te tahi pae o teie mau temeio, ua parau aʻera ratou e, “E taata aamu e te inu uaina,” oia hoi, ua taero roa oia i te uaina puai. E mea iti roa o tei parau e, “O te Mesia oe, te Tamaiti a te Atua ora ra.” (Mataio 16:16) Eaha te tumu aita e tiʻa i te mau taata atoa ia ite Ia’na ei Tamaiti na te Atua?
Te himene nei tatou e, “Ahani pai e, tei pihaʻi iho vau Ia’na i taua tau ra, a rave ai Oia i te mau aiu i roto i To’na ra rima.” [See “I Think When I Read That Sweet Story,” Children’s Songbook, 56]. E rave rahi to tatou mau taata o te ore e farii Ia’na ahiri tei tera ra tau ratou, mai ta ratou hoi e ore nei e farii i te mau parau haapiiraa no roto mai i te mau orometua haapii parau tiʻa tei faaurûhia hoi e taua Faaora nei â. Mai te mea e, eita tatou e farii i To’na mau tiʻa i ô nei, e ere ïa i te ohipa ohie ia farii i te Fatu iho, ia fâ mai Oia ra. …
I te tau a rave ai au i taʻu tau misioni, i te hoê taime, ua haere atu matou, hoê pŭpŭ misionare e to matou peresideni misioni, i te fare tapearaa i Karategi. Ua putapû to matou aau i te huru varua e vai ra i te vahi i reira to te Peropheta e to’na taeae o Hairamu fariiraa i te maratiri, ua ani atura matou ia’na ia faatia faahou mai i te mau mea i tupu i reira e taeroa’tu i te maratiri. Ua putapû roa to’u aau i to te peresideni misioni parauraa e: “I te poheraa te Peropheta Iosepha Semita, e rave rahi tei pohe i muri iho ia’na i te pohe varua. Ua tupu noa te reira huru i te mau taime atoa e taui te faatereraa i roto i te basileia o te Atua. I te poheraa o Brigham Young, e rave rahi tei pohe na muri iho ia’na i te pohe varua, mai te reira atoa te huru i te tau o John Taylor, e tae noa’tu i te poheraa o te Peresideni tataitahi o te Ekalesia.” …
I te tahi mau taime te pohe nei tatou i te varua e te faaatea ê nei tatou ia tatou iho i te maramarama mau o te varua, e te moʻehia nei ia tatou e, i teie mahana, i ô nei e i teie nei, e peropheta to tatou.19
Te parahiraa o teie mau veʻa no te raʻi, tei riro ei tiʻa no te Fatu i roto i te mau tau tuuraa atoa o te evanelia i niʻa i te fenua nei, e nehenehe ïa ia faahohoahia i te hoê aamu tei faatiahia e te hoê taata ratere i Europa apatoerau. Te faaru’e nei teie taata ratere to tatou i Stockholm, i te fenua Tuete, na niʻa i te pahi, no te tere tiʻa’tu na niʻa i te moana Baltic. I roto i te reira tere, e titauhia i te pahi ia tere na rotopu e tauatini rahiraa motu e aore râ, hau atu. Tei mua i te pahi teie ratere i te tiʻaraa, e e oaoa rahi to’na i te mea e, ua manaʻo oia e, e tere fifi ore to ratou. No te aha aita te pahi e tere na pihaʻi iho i tera motu e aore râ, i te tahi atu motu, e mea au aʻe paha ïa te reira purumu i teie ta te pairati i maiti? Ua parau noa oia i roto ia’na iho ma te au ore e, “Eaha te fifi o teie pairati ruau? Ua moʻehia anei ia’na e, te haere nei oia i hea?” I taua taime mau ra, ua ite atura oia i te mau tapaʻo na niʻa i te reni o te purumu i faataahia, mai te aufau poromu ra te huru i te tiʻa-noa-raa i rapae i te miti. Ua oti i te hoê taata i te hiʻopoʻa maite i teie reni e ua tapaʻo i te reni tereraa maitai roa aʻe no te mau pahi. Mai te reira atoa ïa i roto i te tere o te oraraa nei e tae atu ai i te tahuti ore e te ora mure ore: “Na roto i te peeraa i te hoê hohoa tei hamanihia i te raʻi ra, ua tapaopao te mau feia aravihi [ingénieurs] o te Atua i te reni tereraa hau roa aʻe e te oaoa mau, e ua faaara mai ratou ia tatou i te mau vahi fifi.20
E faaurû te Fatu i To’na mau tavini ia aratai i Ta’na Ekalesia ma te afaro. E farii To’na mau peropheta i te faaurûraa no ô mai i te Fatu ra ia parau i te mau melo o te Ekalesia e, “Teie te eʻa, e na reira i te haere” (Isaia 30:21). I roto atoa i te mau taime fifi o te tupu mai i te mau mahana e orahia nei e tatou, mai tei faaitehia i roto i te heheuraa o teie nei anotau, te hohoa ta te Fatu e faaite ia tatou o te hohoa ïa no te vai-papu-raa e no te tautururaa te tahi i te tahi. Te haamanaʻo ra outou i To’na parauraa’tu i Ta’na ra mau pípí, “Tera râ e tiʻa noa taʻu mau pípí i roto i te mau vahi moʻa ra, e e ore roa ratou e faanuuhia’tu” ( PH&PF 45:32).21
Te Mau manaʻo tauturu no te Haapiiraa e te Aparauraa
-
O vai te Upoo mau o te Ekalesia? Na roto ia vai te Fatu i te horoʻa mai ai i te aratairaa e te haapiiraa i Ta’na Ekalesia?
-
E mea nahea te parau haapiiraa apî i te faatae-raa-hia mai i te Ekalesia?
-
E mea nahea te Peresideni o te Ekalesia i te faaineine-raa-hia no ta’na mau hopoiʻa rahi? E mea nahea to te Fatu aratairaa i te maitiraa o te Mau Peresideni o Ta’na Ekalesia?
-
Eaha te aʻoraa tei horoʻahia mai e te peropheta ora tei haamaitai papu i to outou oraraa?
-
I to outou manaʻoraa, no te aha te tahi mau taata e auraro ai i te mau peropheta no tahito ra, e aita e auraro i te peropheta ora? Eaha te mau mea e tupu mai no te oreraa e haapaʻo i te mau parau a te peropheta ora e aore râ, no te faahaparaa i to’na mana?
-
Eaha tei fafauhia mai i te feia o te haapaʻo i te mau parau e te mau faaueraa a te peropheta ora?
Te faaite nei teie hohoa i te patururaa te Peresideniraa Matamua i te Peresideni Harold B. Lee ei Peresideni no te Ekalesia i roto i te hoê amuiraa hanahana i te 6 no Atopa 1972. O te Peresideni N. Eldon Tanner teie e tiʻa nei i te purupiti, e o te Peresideni Marion G. Romney i te pae atau o te Peresideni Lee.