Omuaraa

OHarold B. Lee, te ahuru ma hoêraa o te Peresideni no te Ekalesia, e e Aposetolo atoa hoi hau atu i te toru ahuru matahiti te maoro, tei faaite ma te haehaa e te manaʻo mau e, “te ora nei te Atua, e o Iesu te Taraehara o te ao nei.”¹ E na roto i te hoê iteraa tei roaa ia’na i roto i te rahiraa matahiti o to’na taviniraa, ua parau oia e, “Te pure nei au ma te aau haehaa ia hau atu te maramarama o te mau taata atoa i te mau vahi atoa, i te auraa o te taraehara a te Faaora o to te ao nei, tei horoa mai ia tatou nei te faanahonahoraa no te faaoraraa, o te aratai atu ia tatou i te ora mure ore, te vahi tei reira te Atua e te Mesia i te parahiraa.”²

Ua riro te tere-hoʻiraa i pihaʻi iho i to tatou Metua i te Ao ra ei tumu parau rahi i roto i te mau haapiiraa a te Peresideni Lee i te mau melo o te Ekalesia. Ua faaitoito oia i te mau tamarii tataitahi a to tatou Metua i te Ao ra ia “farii ratou iho i te hoê iteraa papu aueue ore, e na te reira hoi e haapapu i to ratou taahiraa avae i niʻa i te haereʻa e tae atu ai i te titauraa hanahana o te tahuti ore e o te ora mure ore.”³

“Te poroʻi faufaa aʻe o te nehenehe iaʻu ia horoa’tu ia outou nă e i to te ao atoa nei, o te haapaoraa ïa i te mau faaueraa a te Atua,” te na reira ra te Peresideni Lee, “inaha e mea na reira hoi outou e farii ai i te aratairaa no te raʻi mai a ora ai outou i niʻa i te fenua nei, e ia ineine hoi no te farerei i to outou Taraehara i roto i te ao a muri aʻe, e ia faateiteihia outou i mua i te aro o te Metua e te Tamaiti.”⁴

Ua hamani te Peresideniraa Matamua e te Pŭpŭ no te Tino Ahuru Ma Piti Aposetolo i te mau buka Te mau Haapiiraa a te mau Peresideni o te Ekalesia no te tauturu i te mau melo o te Ekalesia ia faahohonu i to ratou iteraa i te mau haapiiraa tumu o te evanelia e ia haafatata atu ia ratou ia Iesu Mesia na roto i te mau haapiiraa a te mau peropheta i roto i teie tau tuuraa evanelia. Tei roto i teie buka te faaiteraahia te mau haapiiraa a te Peresideni Harold B. Lee, oia tei parau e:

“Tei roto i te evanelia te mau ture a te Atua tei horoahia mai i te taata nei, e tei te Ekalesia a Iesu Mesia te hopoia no te haapiiraa i te reira i to te ao nei.”⁵

“E mata na i te haamau i teie mau haapiiraa i roto i te păpă o to outou aau, ia rotahi maite to outou mata i niʻa i te opuaraa mure ore, ia ore hoi outou ia hiʻa i roto i te misioni o te oraraa nei, e na roto i te reira, noa’tu te poto e aore râ, te roa o to ou-tou oraraa, e ineine ïa outou ia tae i te mahana e haere atu ai outou i mua i te aro o te Taata no’na te iʻoa ta outou e amo nă i roto i to outou tiʻaraa ei melo no te Ekalesia a Iesu Mesia i roto i teie mau mahana hopea nei.”⁶

I roto i te pene tataitahi o teie nei buka, te vai ra e maha tuhaa: (1) Hoê uiraa no te faaite poto noa i te manaʻo tumu o te pene; (2) te “Omuaraa,” no te faataa i te mau parau poroʻi o te pene ma te turuhia mai te reira e te hoê aamu e aore râ, te hoê aʻoraa na te Peresideni Harold B. Lee (3) “Te mau haapiiraa a Harold B. Lee,” o te hohora mai i te mau parau tumu faufaa no roto mai i ta’na mau parau poroʻi e ta’na mau aʻoraa; e te (4) “Te mau manaʻo tauturu no te haapiiraa e te aparauraa,” tei riro ei tautururaa i te taata tataitahi i roto i ta’na hiopoa-faahou-raa e ta’na tuatapaparaa, tauturu atoa i te tahi atu â aparaparauraa, e te faaohiparaa i roto i to tatou oraraa i teie mahana na roto i te mau uiraa.

Nahea ia Faaohipa i Teie Buka

No te faaohiparaa a te taata hoê e aore râ, a te utuafare. Ua faataahia teie buka no te faaravai i te ite o te mau melo no niʻa i te mau parau tumu o te evanelia ta te Peresideni Harold B. Lee i haapii mai ma te puai rahi. Ia taiʻo e ia tuatapapa anaʻe te hoê melo i teie buka na roto i te pure e te feruriraa hohonu, e roaa ia’na te hoê iteraa papu no niʻa i teie mau parau mau. E vai teie buka i roto i te apaparaa buka evanelia a te hoê melo, e e riro ïa ei ravea tauturu faufaa no te haapiiraa i to te utuafare.

No te aparauraa i roto i te mau pureraa i te Sabati. E buka haapiiraa teie na te pŭpŭ Autahuʻaraa Melehizedeka e na te Sotaiete Tauturu i roto i ta ratou mau pureraa i te Sabati. Ua haapii mai o Elder Dallin H. Oaks e, tei roto i te mau buka Te mau Haapiiraa a te Mau Peresideni o te Ekalesia, “te mau haapiiraa e te mau parau tumu. E faufaa rahi to roto i te reira, e ua tano maitai i te mau hinaaro o to tatou nei anotau, e e mea faahiahia hoi no te haapiiraa e no te aparauraa.” E mea tiʻa i te mau orometua haapii ia faatumu i ta ratou haapiiraa i niʻa i te mau parau e te mau papairaa moʻa i papaihia i roto ra. Mai ta Elder Oaks i faataa mai, “Aita te hoê orometua i piihia no te maiti i te tumu parau o te haapiiraa, ua maitihia râ oia no te haapii e no te aparau i te mea i faataahia.”⁷

E faaohipa te mau orometua i te mau uiraa i te pae hopea o te pene no te tauturu i te aparauraa i roto i te piha haapiiraa. Mai te mea e, e hiopoʻa oia i te mau uiraa hou a taiʻo ai i te mau parau a te Peresideni Lee, e roaa ia’na te tahi atu mau manaʻo haamaramaramaraa no ta’na mau haapiiraa.

Ia riro te mau pureraa i te Sabati ei taime no te haapiiraa i te mau parau tumu o te evanelia, ei taime no te tuatapaparaa i te tahi mau hiʻoraa o te hoê taata tei riro ei haapiiraa i taua mau parau tumu ra, e ei taime no te haapapuraa i te iteraa papu o te parau mau. Mai te mea e, e titau te mau orometua i te Varua ma te aau haehaa i roto i ta ratou faaineineraa e te faatereraa i te haapiiraa, e puai te iteraa i te parau mau o te feia atoa e amui mai i roto i te haapiiraa. E tiʻa i te feia faatere e i te mau orometua ia faaitoito i te mau melo o te piha haapiiraa ia taiʻo i te mau pene hou a tuatapapahia ai te reira i roto i te mau pureraa i te Sabati. E tiʻa atoa ia ratou ia faahaamanaʻo i te mau melo o te piha haapiiraa ia hopoi mai i ta ratou mau buka i te mau pureraa, e ia faatura hoi i te faaineineraa o te mau melo o te piha haapiiraa na roto i te haapiiraa i te mau parau a te Peresideni Harold B. Lee. Ia taiʻo anaʻe te mau melo o te piha haapiiraa i te pene na mua aʻe, e ineine ïa ratou no te haapii e no te faaitoito te tahi i te tahi.

Aita e titauhia i te mau melo ia hoo mai i te tahi atu mau buka e aore râ, i te tahi atu mau papairaa no te turu i te mau papairaa i roto i teie buka. Te faaitoitohia nei râ ratou ia taiʻo i te mau papairaa moʻa tei faaitehia no te faananearaa i te tuatapaparaa o te parau haapiiraa.

Ua faataahia teie buka ei buka haapiiraa no te taata hoê, e ei buka haamaramaramaraa i te evanelia; no reira, e rave rahi mau pene eita e hope ia haapiihia i roto i te roaraa o te mau pureraa i te Sabati, no te rahi o te mau parau i papaihia i roto ra. No reira, e mea faufaa roa ia taiʻo te taata i te reira i te utuafare ia roaa ia ratou te îraa o te mau haapiiraa a te Peresideni Harold B. Lee.

Ua ite teie peropheta a te Atua i te eʻa no te hoʻi atu i pihaʻi iho i to tatou Metua i te Ao ra, e ua horoa mai oia i te aveiʻa i te feia atoa e faaroo. “Mai te mea e, e faaroo outou e e faaohipa i te mea ta outou i faaroo ra, e arataihia ïa outou i taua vahi hanahana ra tei parauhia, te oaoa. Te auraa o te parau oaoa, o te oraraa ïa tei orahia e outou, a ineine ai outou no te tomo atu i mua i te aro o te Fatu.”⁸