Pene 22
Ei Hau i Roto i To Outou Varua
No te aha e mea titauhia ia vai te patoʻiraa no te faatupu i te mau opuaraa mure ore a te Fatu?
Omuaraa
Te parau ra o Harold B. Lee e, “E tamata te mataʻi o te patoʻiraa i te feia atoa i ora i niʻa i te fenua nei.”1 Aita e taata ite-ore-hia e te patoʻiraa, ua pohe te vahine a Harold B. Lee, o Fern Tanner Lee, e ta’na tamahine o Maurine Lee Wilkins i roto i te mau ma-tahiti 1960. Ua farerei atoa oia i te mau fifi i te pae no te ea i roto i te mau matahiti a tiʻa ai oia ei Hui Mana Faatere Rahi. Ua faaaite mai oia i roto i te amuiraa rahi i te matahiti 1967: “Ua ravehia te tahi mau hiʻopoʻaraa i niʻa iaʻu, e mau hiʻopoʻaraa paari, i mua i te Fatu, e o taʻu e feruri nei e, e mau hiʻopoʻaraa no te hiʻo e, e tiʻa anei iaʻu ia faahaehaa iaʻu i mua i te mau mea atoa o ta te Fatu e tuu mai i niʻa iaʻu, mai te hoê tamarii naʻinaʻi e faahaehaa ia’na i mua i to’na ra metua tane.”[Hiʻo Mosia 3:19].2
Area râ, te púpú mai nei te Peresideni Lee i te tamahanahanaraa noa’tu te ati: “Te taata e hiʻo ma te tiʻaturi papu i te hoê utua mure ore no ta’na mau tautooraa i te tahuti nei, e paturu-tamauhia oia i roto i to’na mau ahoaho rahi. Ia mauiui hoi oia i roto i te parau no te here, eita ïa oia e haapohe ia’na. Ia pohe anaʻe to’na mau fetii, eita oia e paruparu; ia ore anaʻe oia e manuïa i roto i te hoê tataʻuraa, eita oia e haaparuparu; ia faaore roa anaʻe te tamaʻi e te vavahiraa i to’na oraraa amuri aʻe, eita oia e topa i roto i te maʻi rahi. E vai oia i niʻa aʻe i to’na ao e eita roa e mo’ehia ia’na te opuaraa hopea o to’na faaoraraa.”3
“E mea ino e e mea teitei te eʻa e tae atu ai i te faateiteiraa. E rave rahi o te tafifi te avae e o te haruru i raro, e no te paruparu te manaʻo, aita ratou i tiʻa faahou i niʻa no te haamata apî faahou. Na te mau puai o te ino i haapoiri i te eʻa i te rupehu o te taparuparuraa, ma te tamata i te faahaere ia tatou na niʻa i te mau eʻa haavare. Area râ,” te haapapu maira te Peresideni Lee e, “i roto i teie tere, te vaira te haapapuraa e, ia maiti tatou i te maitai, e manuïa tatou, e ia hope taua tere ra ia tatou, e roaa ia tatou te huru o te taata e fariihia i mua i te aro o te Atua. Te fariiraa i te mau mea atoa na te Atua, eaha ïa te manuïaraa rahi atu i te reira?”4
Te mau haapiiraa a Harold B. Lee
Nahea te patoʻiraa i te tauturu ia tatou ia riro roa’tu â mai te Atua te huru?
Te vai ra te hoê raveʻa no te haamaitai-roa-raa ia tatou, oia hoi, na roto i te mauiuiraa, ia manaʻo vau, e o te ore e fanaʻohia e ta-tou maori râ na roto ïa i te mauiuiraa. … E fatata roa’tu tatou i pihaʻi iho Ia’na o tei horoʻa i To’na ora ia vai te taata nei. E ite ta-tou i te hoê autaatiraa o tei ore â i iteahia aʻe nei e tatou na mua aʻe nei. … Ua mauiui oia i te hoê mamae aita e tiʻa ia tatou ia fe-ruri. No te mea râ e ua mauiui tatou, e au ra e, na te reira i haafatata roa’tu ia tatou i te mea hanahana ra, na te reira i tauturu ia tatou i te tamâraa i to tatou varua, tauturu ia tatou ia faarue i te mau mea au ore i mua i te aro o te Fatu.5
Te parau ra o Isaia e: “Area oe, e Iehova, o oe to matou metua; e araea matou, e na oe matou i hamani: e ohipa anaʻe matou na to rima.” (Isaia 64:8).
E rave rahi taime to’u taiʻoraa i taua irava ra, aita râ i roaa iaʻu te taatoaraa o to’na auraa tae roa’tu i te taime a haere ai au i te fenua Mexico i te tahi nau matahiti i mairi aʻe nei, i Telacapa, i reira to’u iteraa i te taata i te hamaniraa i te faarii araea ua rau te huru. I reira to’u iteraa i te taata i te raveraa i te araea o tei faarapuhia ia au i te mau raveraa tahito ra. I muri iho, e tuuhia te reira i niʻa i te hoê huira e i reira te taata hamani e haamata ai i te faanehenehe i taua faarii araea ra, no te tuu atu i niʻa i te matete no te hoo. E i to matou mataitai-noa-raa, ua ite aʻera matou i te tahi taime e, no te tahi fifi i roto i te araea i faarapuhia, e mea tiʻa ïa ia iritihia te taatoaraa o te tapu araea e ia faahoʻi faahou i te reira i roto i te vahi faarapuraa no te faarapu faahou, e i te tahi mau taime, e nehenehe te reira e na niʻa iho noa e rave rahi taime hou a tano maitai ai te faito o te araea e faarapuhia ra.
I muri aʻe i te reira, ua haamata aʻera vau i te ite i te auraa o taua irava ra. Oia mau, o tatou atoa, e tiʻa tatou ia tamatahia, ia hiʻopoahia i roto i te veve, te maʻi, te poheraa o tei herehia e tatou, na roto hoi i te faahemaraa, e i te tahi taime, na roto i te taviriraa a te mau hoa, na roto hoi i te auhune e te taoʻa rahi, na roto i te maitai e te fanaʻo, na roto i te mau haapiiraa hape, e na roto i te haavareraa a to te ao nei. Teie te parau a te hoê metua tane i ta’na tamaiti no niʻa i teie nei tumu parau:
“E ia faatupu i ta’na mau opuaraa mure ore i te taata nei, i muri aʻe i to’na hamaniraa i to tatou na metua matamua, e te mau puaa o te fenua, e te mau manu o te reva, oia hoi te mau mea atoa i hamanihia ra, ia vai na pae e piti e tiaʻi; oia hoi te maa i rahuihia ra i te tahi pae, e i te tahi pae, o te raau o te ora ïa; e mea monamona te tahi, e e mea avaava te tahi.”[2 Nephi 2:15].
Ua parau te Peropheta Iosepha Semita no niʻa i teie raveʻa haamaitai-roa-raa, oia hoi, e au oia mai te hoê ofaʻi rahi taratara i te ohuraa na niʻa mai i te mouʻa, e te raveʻa noa iho e anaana ai oia, ia tano te mau vahi tara o te ofaʻi i niʻa i te tahi atu mau mea, hoê tara i tera vahi e hoê tara i tera vahi. Tera râ, te na ô ra oia e, “I reira vau e riro ai ei … ohe anaana i roto i te piha ohe a te Manahope ra.” [History of the Church, 5:401].
No reira, ia haamaitai-roa-hia tatou e tiaʻi; e tiʻa tatou ia hiʻpoahia no te faaiteraa i te puai e te mana e vai ra i roto ia tatou.6
Ia artaihia tatou e te faaroo i haapiihia mai e te parau a te Atua, i reira tatou e hiʻo ai i te oraraa nei mai te hoê raveʻa faaineineraa varua. I raro aʻe i te mata ara o te hoê Metua here, e haapii tatou na roto i “to tatou mau ati,” e roaa te puai ia tatou na roto i te upootiʻaraa i niʻa i te mau fifi, e e vî te riʻariʻa ia tatou na roto i to tatou upootiʻaraa i te vahi fifi [a hiʻo Hebera 5:8]. Na roto i te faaroo, ia au i ta te parau a te Atua i haapii mai, ua maramarama tatou e, te mau mea atoa o ta tatou e rave i roto i te oraraa nei no te titau i te huru o Iesu— “Ia maitai roa hoi outou mai to outou Metua i te ao e maitai roa ra” (Mataio 5:48)—e riro ïa ei maitai no tatou e ei maitai mure ore, noa’tu e, e mea etaeta te Aʻo a te hoê Atua paari hope i roto i teie nei hamaniraa, “O ta te Fatu e here ra, o ta’na ïa e Aʻo mai, e e papai â oia i te mau tamarii atoa ta’na e ite maira.” (Hebera 12:6).
Ma te haapiihia e ma te parau-tamau-hia no taua faatitiauaraa ra e te mau mana o te poiri e te mau ino i te pae varua, “ua ati [tatou] i te pohe, aita râ i apiapi; ua peʻapeʻa [tatou], aita râ i ahoaho;Ua hamani-ino-hia, aita râ i faarue-roa-hia; ua hurihia i raro, aita râ i pohe roa.” (2 Korinetia 4:8–9).7
Te taata e iteraa papu to’na no niʻa i te opuaraa o te oraraa nei, e faariro ïa oia i te mau ati e te mau tamataraa o te oraraa nei mai te au i te mau raveʻa no te fariiraa i te ite e titauhia no te ohipa o te tau mure ore. …
Mai te mea e, tei mua te hoê taata i te pohe, e ore roa ïa taua taata ra e mataʻu mai te mea e, ua faatamaahia to’na avae “i te faa-ineineraa o te evanelia ra o te hau,” [Ephesia 6:15] e te feia ua mo’e ê tei herehia e ratou ra, ei faaroo ïa to ratou mai to Moroni ra, te raatira o te nuu faʻehau, o tei parau e, “Te tuu ra hoi te Fatu i te feia parau tiʻa ia taparahihia, ia tae ta’na parau tiʻa e ta’na parau faautuʻaraa i niʻa i te feia parau ino; no reira, eiaha outou e manaʻo e, ua mo’e te feia parau tiʻa, i te mea ua taparahihia ratou; inaha râ, e ô ratou i roto i te faaearaa o te Fatu, o to ratou Atua.” (Alama 60:13)8
A faaroo na i te haapiiraa a te Fatu i roto i te parau no te utuuturaa i te taata — “E te mau amaa hotu atoa ra, e faaruehia ïa [e aore râ, e topehia ïa] ia rahi atu te hotu” (a hiʻo Ioane 15:2). …
E mea varavara roa te hoê varua teitei aita i tamatahia e i hiʻopoʻahia na roto i te roimata, e te ati- –mai te huru e ua topetopehia e te rima o te hoê fatu aua. Ma te faaohipa i te tipi naʻinaʻi e te tipi topetope, e tapupuhia te amaa ia au i te hohoa puai hope a te Atua, ia rahi te hotu.
E mea tiʻa ia outou paatoa ia itoito noa i roto i te mau tamataraa, te mau hamani-ino-raa, te mau mauiui o te aau e te manaʻo paruparu. Ia tupu te oto e te ahoaho, mai te mea e, te haamanaʻo ra outou, e tamahanahanahia outou mai te mea e, e apo outou i teie nei haapiiraa: “O ta te Fatu e here ra, o ta’na ïa e Aʻo mai, e e papai â oia i te mau tamarii atoa ta’na e ite maira” (Hebera 12:6)—e teie faahou â: “Eiaha oe e inoino, e taʻu tamaiti, i te Aʻo a Iehova, eiaha hoi e fati-mauu i ta’na Aʻoraa mai: o tei herehia e Iehova ra, o ta’na ïa e Aʻo mai, mai te metua e Aʻo i te tamaiti ta’na e here ra” (Maseli 3:11–12).9
Ua haapeʻapeʻa te Peropheta Iosepha [Semita]… i to’na manaʻo no te mau hamani-ino-raa e ravehia ra i niʻa i te Feia Moʻa, e i roto i to’na ati rahi, te haamanaʻo ra outou, ua piihua oia, “E te Atua, eaha te maoro e ite ai to oe na mata, e e faaroo ai to oe tariʻa i te tiʻaororaa aroha a te Feia Moʻa e ia tahoo atu i te mau hape i ravehia i niʻa ia ratou i niʻa i te upoo o to ratou ra mau enemi?”[A hiʻo PH&PF 121:1–6]. E mai te huru ra e, ua rave te Fatu i te hoê tamarii tei pohe roa i te riʻariʻa i roto i to’na ra rima a parau ai e:
“E taʻu tamaiti, ia hau mai na to oe aau; e vai poto noa mai to oe enemi e to oe mau ati hoi;
“E i reira, mai te mea e faaoromai maite oe i te reira, e faateitei mai te Atua ia oe i te vahi teitei roa ra; e upootiʻa ïa oe i niʻa i to oe mau enemi atoa ra.” (PH&PF 121:7,8)
I muri iho ua parau oia i te hoê parau faahiahia mau:
“… a ite mai oe, e taʻu tamaiti nei e, e noaa ia oe te ite i te ohipa na roto i teie mau mea atoa nei, e e riro hoi ei maitai no oe na.”(PH&PF 122:7)
… I reira na ô aʻera te Fatu e:
“Ua haere roa’tu te Tamaiti a te Taata i raro aʻe i teie mau mea atoa ra. Ua hau anei oe ia’na ra?
“No reira, a tapeʻa noa na oe i to haerea. … Eiaha e mataʻu i ta te taata nei e rave, no te mea e vai noa te Atua i pihaʻi iho ia oe na e a muri e a muri noa’tu.” (PH&PF 122:8,9)
Ua tae i te hoê tau i roto i te oraraa nei ua titauhia iaʻu ia faaohipa i te reira i niʻa iaʻu iho. Ua hope teie mau mea atoa i te ravehia e te Tamaiti a te Taata nei.10
Ua faaite-maramarama-maitai-hia te tumu i tae mai ai tatou i ô nei, i roto i te heheuraa a te Fatu ia Mose. Te na ô ra oia, “Teie hoi taʻu ohipa e to’u hanahana—te faatupuraa i te tahuti ore e te ora mure ore o te taata nei.” [Mose 1:39]. Te auraa no te parau ra “Te ora mure ore o te taata nei” o te hoi-faahou-raa ïa i mua i te aro o te Atua te Metua e Ta’na Tamaiti no te ora i pihaʻi iho ia raua e a muri noa’tu. I teie nei, aita oia i parau e, Ta’na opuaraa, ia ora Ta’na mau tamarii atoa i niʻa i te fenua nei i roto i te oraraa taoʻa rahi, ma te fanaʻo i te taoʻa e te mau mea atoa, e eita ratou e roohia i te mamae e te oto. Aita oia i parau i te reira. No te mea i te tahi taime, mai ta Isaia i parau ra, e monohia hoi te tataramoa i te hoê hedesa nehenehe roa [a hiʻo Isaia 55:13]. … Te mea o ta tatou e manaʻo ra i teie taime e, e riro ei ati, ia au hoi i te hiʻoraa ta tatou e ite ra mai te haamataraa e tae roa’tu i te hopea ra, i roto hoi i te paari o to tatou Metua ra, e nehenehe ïa e riro ei hoê o te mau haamatairaa rahi roa, eiaha râ te hoê hopearaa ino rahi mai tei manaʻohia e tatou.11
Nahea e iteahia ai ia tatou te puai e te hau i roto i te mau taime fifi?
Te mau varua atoa o tei hahaere i niʻa i te fenua nei, outou e o vau nei, tatou pauroa—tei rahi te taoʻa e tei veve, tei maitai e aore râ, tei ino, tei apî e tei ruhiruhia—e hope paatoa tatou i te hiʻopoahia e i te tamatahia e te vero o te ati, te mataʻi o ta tatou e paruru ia tatou iho. E te feia anaʻe e ore e topa, o te feia ïa o tei patuhia i niʻa i te păpă. E eaha te păpă? Te păpă ïa o te haapaʻo i te mau parau tumu e te mau haapiiraa o te evanelia a Iesu Mesia mai tei haapiihia mai e te Fatu.12
Aita vau e tatarahapa … ia ani atu ia outou i teie poʻipoʻi, ia tiaturi mai iaʻu i roto i te parau no te ture mau o te haapaʻoraa mau—te faaroo i te Atua e i Ta’na Tamaiti o Iesu Mesia ei Faaora no to te ao nei, e na roto hoi i To’na ra iʻoa i tupu ai te mau temeio e o te tupu nei i teie mahana, e na roto anaʻe hoi i te fariihope-raa i teie nei mau parau mau e tiʻa ai ia outou e iaʻu nei, ia haamauhia i niʻa i te niu paari a farara mai ai te mau vero o te oraraa nei i niʻa ia tatou nei.
No reira, te titau manihini nei au ia outou ia faahaehaa ia outou .…e ma te aau pure, a tiaturi i te mau mea atoa ta te mau peropheta moʻa i haapii mai ia tatou no niʻa i te evanelia mai roto mai i te mau Papairaa Moʻa mai te haamataraa mai â.13
No reira te ohipa faufaa roa aʻe i roto i te oraraa nei e ere ïa te mea e tupu mai i niʻa ia outou, te mea faufaa mau, o te huru no to outou fariiraa i te reira. O tera ïa te mea faufaa. I te pae hopea o te Aʻoraa i niʻa i te Mouʻa, te haamanaʻo ra anei outou, ua horoʻa mai te Fatu i te hoê parabole. Ua parau oia e:
“E teie nei, o te faroo mai i taʻu nei mau parau, e haapaʻo atura, e faito vau ia’na i te hoê taata paari, o tei faatia i to’na fare i niʻa i te păpă:
“E mairi ihora te ûa, e tahe ihora te pape pue, e te mataʻi hoi i te uihiraa mai i niʻa iho i taua fare ra e aore roa i parari, no te mea e păpă te tiʻaraa. …”[Mataio 7:24–25].
Eaha Ta’na e tamata nei i te haapapu mai? Te tamata nei oia i te parau mai e, e tae mai te mau mataʻi o te ino, te mau pape pue o te ati, e te mau fifi, i niʻa i te mau taata atoa i niʻa i te fenua nei; e te feia anaʻe o te ore e topa—ia topa te fare moni, ia mo’e tei herehia e outou, i roto i te tahi atu huru ati— hoê noa iho mea e tapeʻa ia tatou i roto i teie mau vero atoa e teie mau ati o te oraraa, maori râ, to tatou paturaa i niʻa i te păpă na roto i te haapaʻoraa i te mau faaueraa a te Atua. …
A tiʻai maite i te Fatu i roto i te tau hamani-ino-raa e i te tau oto rahi. Ua parau te Fatu e,
“Oia mau te parau atu nei au ia outou taʻu mau hoa, eiaha e mataʻu, ia tamahanahanahia to outou mau aau; oia ïa, e oaoa noa’tu â, e faaite i te mauruuru i roto i te mau mea atoa ra;
“Mai te tiaʻi maite i te Fatu, no te mea ua tomo ta outou mau pure i roto i te tariʻa o te Fatu Sabaota, e ua papaihia hoi ma teie taatiraa e te parau faaite hoi—ua tăp∂ e ua faaue mana mai te Fatu ia faatiahia te reira.” (PH&PF 98:1–2)14
Eaha ta tatou e parau i te feia e titau nei i te hau no te tamărû i to ratou mau mataʻu, no te haamama i te aau mauiui, no te hopoi i te maramarama, no te hiʻo i ô atu i te mau tamataraa ino o teie tau, e ia ite i te tupuraa o te mau tiairaa e te mau moemoea i roto i te hoê ao i ô atu i te tahuti nei? …
Ua faaite mai te Fatu i te vahi i reira e itehia ai te hau a parau atu ai oia i ta’na ra mau pipi e, “E hau taʻu e vaiiho ia outou nei, o to’u nei hau taʻu e ho atu no outou; e ere mai ta to te ao nei horoʻa taʻu horoʻa ia outou. Eiaha e taiâ to outou aau, eiaha hoi e mataʻu.” (Ioane 14:27).15
“A haapaʻo i te mau faaueraa a te Atua,” no te mea tei reira te eʻa e roaa ai te hau ta te Fatu i parau ra i te taime a aroha hopea ai oia i Ta’na mau pipi: “I parau atu vau ia outou i teie nei mau parau, ia hauhia to outou iaʻu nei. E pohe to outou i teie nei ao. E faaitoito râ, ua riro te re o teie nei ao iaʻu.” (Ioane 16:33) No reira, i roto i te arepurepuraa e haati nei ia outou, e mata na outou tataitahi i te imi i taua hau o te raʻi ra no ô mai i te Fatu ra o tei here ia tatou paatoa, o te tiʻavaru ê i te mau mataʻu atoa, ia riro anaʻe te rê o te mau mea atoa o te ao nei ia outou, mai ta te Fatu i na reira.16
I hea e itehia ai te hau i roto i te ao nei i teie mahana? Eita te hau e roaa na roto i te pereoo auri e te pupuhi e te manureva e te tupita atomi. Hoê noa iho vahi tei reira te hau, tei roto ïa i te mana o te Atua Manahope o ta’na e horoʻa i te feia e haapaʻo i ta’na mau faaueraa e o te faaroo i to’na reo, ia paraparau mai oia na roto i te mau reni ta’na i faataa no te reira tumu. …
Ei hau outou, eiaha te hau no roto mai i te ture o te faatereraa hau fenua, te hau râ o te noaa, mai ta te Fatu i parau, na roto i te riroraa te re i te mau mea atoa o te ao nei. Ia tauturu mai te Atua ia tatou ia maramarama, e ia ite outou e, ua ite au ma te tapitapi ore e, na’na teie ohipa, te aratai nei oia ia tatou i teie mahana, mai ta’na i na reira i roto i te mau tau tuuraa atoa o te evanelia.17
I teie mahana, mai tei tohuhia ra, mai te huru ra e, e arepurepu roa te ao paatoa nei, e e ahuehue te manaʻo o te taata nei. E mea tiʻa mau ia tatou ia ora e taua hau ra o te tupu mai na roto i te faaohiparaa i te evanelia a Iesu Mesia i roto i te ao ati e te ino. E tupu mai te hoê tuhaa ahuehue te manaʻo o te taata mai roto mai i te ahoaho, e i te taime ihoa râ e toeote roa ai te aroha o te taata. E mea tiʻa ia titauhia te mana o te autahuʻaraa i niʻa ia tatou i teie mahana, e e mea tiʻa ia tatou ia here i te feia e faaohipa nei ia tatou ma te au ore, e ia vai noa te aau maitai i roto ia tatou mai ta te Aposetolo Paulo i Aʻo atu ia Timoteo. [A hiʻo 2 Timoteo 1:7]. Ia ore tatou ia na reira, e riro tatou ei feia faufaa ore. Eita te hau papu e roaa ia tatou. E no te reira, eita e titauhia i to tatou enemi ia turai ia tatou ia ofati i te mau faaueraa e aore râ, ia taiva. Inaha, ua pau aʻe na to tatou puai i te haamauʻahia.18
Ua tamata te hoê taata imi faufaa no Atlanta, i Georgie, e hoa apiti maua i roto i te ohipa … i te tamahanahana iaʻu i roto i te hoê ati rahi; ua farerei oia iaʻu e ua parau maira, “I teie nei, te hinaaro nei au e parau ia oe i te hoê mea. E mea paari roa aʻe au i ia oe. E toru ahuru ma maha matahiti i mairi aʻe nei ua taʻi mai te niuniu i te fare moni o taʻu e faatere ra. Te faaite maira taua niuniu ra iaʻu e, ua pepe roa taʻu vahine i roto i te hoê ati pereoo uira. Ua parau taʻue aʻera vau e, ‘Eita te Atua e faatia ia tupu noa’tu te hoê ohipa i niʻa i teie nei vahine here taʻu—no te mea, e vahine nehenehe oia, e te maitai, e te haviti.’ Tera râ, hoê hora i muri aʻe, ua tae faahou maira te parau e, ua pohe oia. Ua oto roa toʻu aau i taua taime ra, ‘Te hinaaro nei au e pohe; aita vau e hinaaro e ora faahou; te hinaaro nei au e faaroo i to’na reo.’ Aita râ vau i pohe, e aita vau i faaroo i to’na reo. E ua parahi ihora vau i raro no te feruri maite. Eaha te auraa no teie nei vai otareraa e no teie nei ati rahi o te faaino i te haereʻa o tatou paatoa? E ua tupu maira te manaʻo i roto iaʻu e, o teie te hiʻopoʻaraa etaeta roa o te titauhia ia aro atu i roto i te oraraa nei. E ia manuïa hoi outou ra, aita ïa e hiʻopoʻaraa faahou atu e ore outou e manuïa.”
A tiʻa noa’tu râ, i to’u hoʻiraa mai i te fare na niʻa i te manureva i taua pô ra, ua ite au i te hau, e no te taime matamua, ua haamata vau i te mahuti i rapae i te maru o te mau ata. E ua tupu aʻera i roto iaʻu te mea ta te Aposetolo Paulo i parau no niʻa i te Fatu, “E tamaiti noa iho oia”— oia hoi, te Tamaiti na te Atua— “i ite oia i te auraro i to’na ra mau pohe; e no te mea ua haamoʻaroa-hia oia, riro atura oia ei tumu no te ora mure ore no te feia atoa e faaroo ia’na ra” (Hebera 5:8–9). I teie nei, mai te mea e, e feruri outou i niʻa i te reira, oia hoi, i niʻa i te raveʻa haamaitai-roaraa o te faataa-ê-raa, o te vai otareraa, o te ati-roa-raa, te manaʻo nei au e, e tae mai te hoê mea o te titauhia hou a ineine ai tatou no te pahonoraa i te tahi atu o te mau hiʻopoʻaraa o te oraraa.19
Ua piihia tatou ia amo i te tahi mau ohipa teimaha i te hoê faito matahiti huru teimaha atoa, tera râ, e nehenehe te reira e riro no tatou tataʻitahi, ei taime no te hoê aamu faahiahia, ei taime rahi no te haapiiraa, ei taime oaoaraa rahi. Inaha, te mau faaheporaa o te tamaʻi, te tauiuiraa te huru o te fenua, te ruri-ê raa-hia te mau haapiiraa tumu, e te toparaa o te poritita, o tera ïa to tatou ati rahi, te itoito-noa-raa i roto i te maramarama ore, te haamauraa i te hoê basileia i te ao nei i roto i te ati. Te pure nei au ia tiʻa ia tatou ia rave i ta tatou tuhaa i roto i teie tere, e ia vai i roto i te fauraʻo o te Ekalesia e ia faatere i te reira fauraʻo ia tomo atu oia i roto i te vahi hopea ra—I mua i To’na aro.20
Te Mau Manaʻo Tauturu no te Haapiiraa e te Aparauraa
-
I hea e itehia ai te parururaa e te hau i roto i te mau taime ati? Eaha te mau mea tei faaitoito ia outou e tei horoʻa ia outou i te hau i roto i te mau tamataraa o to outou oraraa?
-
No te aha te mau taata atoa—tei parau tiʻa e tei parau tiʻa ore— e hiʻopoʻahia ai e e farii ai i te ati?
-
Nahea te ati e riro ai ei haamaitairaa no to outou oraraa? Nahea te mau hiʻopoʻaraa i te tauturu ia tatou ia puai atu â e ia tavini maitai atu â i te Fatu?
-
No te aha tatou e tuu ai i to tatou tiaturiraa i roto i “te hohoa puai hope” a to tatou Metua i te Ao ra? Eaha te auraa no te parau ra, ia riro mai te araea i roto i te rima o te Fatu?
-
Eaha te auraa no te parau ra, a tiaʻi maite i te Fatu i te mau taime hiʻopoʻaraa? Eaha te haapiiraa i roaa mai ia outou i to outou na reiraraa?
-
Nahea te Atua i te horoʻa mai ia tatou nei i te hau no te turu ia tatou i roto i te mau taime ati?