Pene 12

Te Opuaraa Hanahana o te Faaipoiporaa

Eaha ta tatou e rave no te haapuai i to tatou faaipoiporaa mure ore e no te faaineine i te feia apî ia faaipoipo i roto i te hiero?

Omuaraa

Ua haapii mai te Peresideni Harold B. Lee i te faufaa no te faaipoiporaa i roto i te hiero e i te faufaa no te tahoêraa te tane e te vahine faaipoipo i roto i to raua oraraa no te haapaari i to raua faaipoiporaa:

“Te faaipoiporaa o te hoê ïa apitiraa. Te parau ra te hoê taata e, i roto i te aamu no te poieteraa i roto i te Bibilia, aita te vahine i hamanihia i te hoê tuhaa o te upoo o te tane, no te faatere i te tane, aita atoa i hamanihia i te hoê tuhaa o te avae o te tane, ia taataahihia oia e te tane. Ua ravehia mai râ te vahine mai roto mai i te aoao o te tane no te faaite e, i piha‘i iho noa te vahine i te tane e vai ai ei apiti e ei hoa no’na. Ua fafau te tahi i te tahi i mua i te fata o te faaipoiporaa e, mai taua mahana ra, e rohi amui raua i roto i te mau tuhaa atoa o to raua oraraa. Te parau ra te Aposetolo Paulo no ni‘a i te faaipoiporaa e: ‘Eiaha outou ia amuiau-ore-hia.’ (II Korinetia 6:14). Te parau nei oia no ni‘a i te aifaitoraa te taata i roto i te mau mea no te haapa‘oraa e i roto i te mau hinaaro pae varua, area râ, eiaha e tau‘a ore i te faahohoaraa o teie nei parau ta’na. Mai na puaatoro toopiti e ume i te tugo na ni‘a i te purumu, mai te mea e, e haaparuparu te tahi, e faahupehupe e e faataere, e aore râ, e riri e e faaetaeta, e ino te tugo e e mou roa te reira i muri iho. Mai te reira atoa te tahi mau faaipoiporaa; mai te mea e, eita te hoê e aore râ, eita na pae toopiti atoa ra e amo i ta raua mau hopoia, e ino ïa to raua faaipoiporaa. …

“Tera râ, taa‘e noa’tu to orua ‘hoêraa’ i roto i te mau mea o te tino nei, e mea faufaa roa’tu to orua hoêraa i roto i te mau mea no te pae varua. … E mea papu maitai e, te mau utuafare atoa e haamauhia ma te opuaraa ia vai te reira e a muri noa’tu, e i reira hoi te mau tamarii e fariihia ai ei ‘tufaa no ô ia Iehova ra’ [a hi‘o Salamo 127:3] e mea papu a‘e ratou i te vai ora noa no te mea, e mea mo‘a te utuafare.”¹

Te mau haapiiraa a Harold B. Lee

No te aha te faaipoiporaa mure ore e riro ai ei mea faufaa no to tatou faateiteiraa?

E hi‘o ana‘e tatou i te parau no te faaipoiporaa matamua tei faatuppuhia i muri a‘e i te faanahonahohia ai te fenua nei. Ua hamanihia o Adamu, te taata matamua, e tae noa’tu i te mau animala e te mau manu o te reva e te mau mea ora atoa i ni‘a iho i te fenua nei. I muri iho, teie tei papaihia: “Ua parau ihora te Atua ra o Iehova, E ere ïa i te mea maitai ia parahi noa Adamu oia ana‘e ra; e hamani au i te tahi tauturu au na’na ra.” Ia oti te Fatu i te hamani ia Eva, “ua aratai maira oia ia’na ia Adamu ra. E ua na ô ihora Adamu, i teie nei, e ivi teie no to’u nei ivi, e i’o hoi no to’u nei i’o: e parauhia oia e, e vahine, no te mea, no roto oia i te taata i te noaaraa mai. No reira e faaru’e ai te taata i ta’na metua vahine, a ati atu ai i ta’na vahine, e e riro hoi raua ei hoê.” (Genese 1:28, 22–24). … Ia oti taua faaipoiporaa ra, ua faaue maira te Fatu ia raua “ia fanau orua, e ia rahi roa, e faaî i te fenua nei, e e haavî iho.” (Genese 1:28).

Teie ïa te hoê faaipoiporaa tei ravehia e te Fatu i rotopu i na taata tahuti ore e piti, inaha hoi, aita to raua tino i topa i roto i te pohe e tae roa’tu i te taime a tae mai ai te hara i ni‘a i te ao nei. Ua faariro oia ia raua ei hoê, eiaha no teie ana‘e tau, eiaha atoa no te hoê tau faataahia; ua titauhia râ ia raua ia vai hoê noa e a muri noa’tu. … Aita te pohe i riro ei faataa‘eraa i to raua faaipoiporaa; ua riro râ ei taa‘eraa no te tahi maa taime iti noa. Ua riro te ti‘a-faahou-raa tae atu i te tahuti ore ei tahoêraa ia raua e ei fafauraa mure ore o te ore roa e mou faahou. “Mai te taata i hope i te pohe ia Adamu, e hope atoa i te faaorahia i te Mesia.”(I Korinetia 15:22).

Mai te mea e, ua haapa‘o maitai outou i te haamaramaramaraa o teie faaipoiporaa matamua, ua ineine ïa outou no te ite i te auraa o te heheuraa o tei horo‘ahia mai i te Ekalesia nei i to tatou nei tau na roto i teie mau parau:

“Mai te mea e faaipoipo te hoê taata i te hoê vahine na roto i ta‘u parau, o ta‘u ïa ture, e na roto i te fafauraa apî e te mea mure ore hoi, e ua taatihia’tu te reira ia raua ra e te Varua Mo‘a no te fafauraa, e a’na o tei faatahinuhia, o ta‘u i faataa no teie nei mana e te mau taviri hoi no teie nei autahu‘araa …, e ravehia ïa i ni‘a ia raua ra te mau mea atoa ta ta‘u tavini e tuu atu i ni‘a ia raua, i roto i te taime noa nei, e na roto hoi i te tau mure ore atoa ra; e e haamana-roa-hia ïa vai ai raua i rapae i te ao nei e e mareva ê atu hoi raua na te mau melahi, e te mau Atua, o tei tuuhia’tu i reira, i to raua faateiteiraa e te hanahana hoi i roto i te mau mea atoa ra, mai te au i tei taatihia’tu i ni‘a i to raua na upoo.” (PH&PF 132:19). …

Te faaipoiporaa no teie tau e no te tau a muri atu, o te uputa afaro ïa e te e‘a piriha‘o (o te parauhia ra i roto i te mau papairaa mo‘a) “o te aratai atu i te faateiteiraa e te haere-noa-raa o te mau ora, e aita rea o te ite mai i te reira,” area râ, “ua aano te uputa, e ua aano roa hoi te e‘a o te aratai atu i te mau pohe; e e rave rahi ïa o te haere i roto i te reira.” (PH&PF 132:22, 25). Mai te peu e, e nehenehe ia Satane e to’na mau taata ia faahema ia outou ia haere na te e‘a aano o te faaipoiporaa o te ao nei, o te hope ia tae i te poheraa ra, ua haamou ïa oia ia outou i roto i ta outou titauraa i te faito teitei a‘e o te mau oaoa mure ore na roto i te faaipoiporaa e ia faarahihia e a muri noa’tu. Te maramarama ra outou i teie nei e, no te aha te Fatu i parau ai e, no te farii i te tufaa teitei a‘e i roto i te hanahana Tiretiera, ia tomo atu ïa te taata i roto i te fafauraa apî e te [mea] mure ore no te faaipoiporaa e ti‘a ai. E ia ore oia ia na reira, e ore roa e noaa te reira ia’na. (PH&PF 131:1–3).²

Te feia e faatiamâ ia ratou e o te tomo atu i roto i te fafauraa apî e te mure ore o te faaipoiporaa no teie tau e no te tau a muri atu, te haamau ra ïa ratou i te ofa‘i tihi matamua no te hoê utuafare mure ore i roto i te basileia tiretiera o te vai e a muri noa’tu. Ta ratou haamauruururaa, “e faarahihia ïa to ratou hanahana a muri, e a muri noa’tu” (a hi‘o Aberahama 3:26).³

Eaha te ti‘a i te mau tane e te mau vahine faaipoipo ia rave no te haapaari i to ratou faaipoiporaa hiero e hope noa’tu to ratou oraraa?

Mai te mea e, i te taime o to ratou faaipoiporaa e faaoti [te feia apî] e, mai te reira taime atu, e faaoti ratou ia rave i te mau mea atoa i roto i to ratou mana no te faaoaoa i te tahi e te tahi i roto i te mau mea ti‘a, e tae roa’tu i te faatusiaraa i to ratou iho mau oaoaraa, to ratou iho mau hiaai, to ratou iho mau hinaaro, i reira te fifi no te faatanotanoraa i roto i te oraraa faaipoipo e afaro ai ia’na iho, i reira to ratou fare e riro ai ei fare oaoa. E patuhia te here rahi i ni‘a i te faatusiaraa rahi; e te fare i reira e faaitehia ai i te mau mahana atoa te parau no te faatusiaraa no te maitai o te tahi e te tahi, o te fare ïa tei reira te here rahi.⁴

Tei reira te here rahi a‘e, oia ïa, te mana‘ona‘oraa rahi a‘e aitâ i itehia a‘e nei e outou, inaha hoi, eiaha ia mo‘ehia ia outou e, e patuhia te here rahi i ni‘a i te faatusiaraa rahi; e mai te mea e, te vai ra te hinaaro tuutuu ore i roto i te tahi e te tahi no te faaoaoa na roto i te mau mea ti‘a, e riro te reira ei haamauraa i te hoê niu papu no te hoê utuafare oaoa. Ia riro hoi taua hinaaro haamaitai te tahi i te tahi ra, ei hinaaro no na pae e piti atoa ra, eiaha râ no te hoê ana‘e pae e aore râ, eiaha te pipiri. Ia aifaito noa te mana‘o o te tane e te vahine i roto i te mau hopoi‘a e te mau titauraa no te haapii te tahi i te tahi. E piti na mea e faaino nei i te oraraa maitai o te mau utuafare i teie tau, oia hoi, aita roa’tu te mau tane apî e taa papu ra i ta ratou hopoi‘a no te patururaa i te hoê utuafare, e ua ape te mau vahine i te hopoi‘a no te haapa‘oraa i te utuafare e no te faatupuraa i te hoê utuafare.⁵

Tei roto i te faaipoiporaa te oaoa teitei a‘e, area râ, tei reira atoa te mau hopoi‘a teimaha roa a‘e te ti‘a ia amohia e te tane e te vahine i roto i te tahuti nei. Te hinaaro hanahana e vai ra i roto i te tane e te vahine haapa‘o, o te turai i te tahi ia apiti atu i te tahi, na to tatou ïa Taata Poiete te reira i faaoti ia riro ei hinaaro mo‘a no te hoê opuaraa mo‘a—eiaha hoi te reira ia ravehia no te faatia- noa-raa i te hoê hiaai rahi o te tino e aore râ, te hoê hiaai o te tino i roto i te taotoraa i te tahi e te tahi; ia faahereherehia râ te reira ei rave‘a faaiteraa i te here papu i roto i te faaipoiporaa mo‘a.⁶

E rave rahi taime to’u parauraa i te mau taata faaipoipo apihia i mua i te fata no te faaipoiporaa: Eiaha roa’tu e vaiiho i te mau peu here o to outou oraraa faaipoipo ia tupu noa na ma te otia ore. Ia riro hoi to outou mau mana‘o mai te mahana ra i te anaana. Mai te mea e, e hinaaro outou ia vai noa te hoê varua faahinaaro i roto i te taatoaraa o to outou faaipoiporaa, e mea ti‘a ïa i ta outou mau parau ia riro ei mau parau maitai, e to outou amui-tahi-raa ei mea faauru, ei mea faateitei.⁷

I te tahi mau taime, ia ratere haere matou na roto i te Ekalesia, e haere mai te hoê tane e te vahine faaipoipo—faaipoipohia i roto i te hiero— e farerei ia matou ma te ani mai e, e ere anei i te mea tano ia faataa‘e raua ia raua iho, e ia imi te tahi e te tahi i te hoê hoa ê atu tei tano ia raua, i te mea hoi e, aita raua iho e afaro faahou ra i roto i to raua faaipoiporaa. Ei ia outou paatoa na e teie nei feia, te parau atu nei matou e, te feia tei faaipoipohia i roto i te hiero a parau ai ratou e, ua fiu raua i te tahi e i te tahi, e mea papu roa ïa e, hoê i roto ia raua, e aore râ, o raua toopiti atoa anei, aita e haapa‘o faahou ra i ta raua mau fafauraa no te hiero. Te feia atoa tei faaipoipohia i roto i te hiero e tei haapa‘o i ta ratou mau fafauraa, e tupu tamau te faufaa o te tahi i te tahi, i te rahi, e i reira te here e tae‘ahia ai i to’na ra faito hohonu ia tae i te oro‘a auro no to raua faaipoiporaa [te pae ahururaa o te matahiti o to raua faaipoiporaa], hau atu i tei te mahana a faaipoipohia ai raua i roto i te fare o te Fatu. Eiaha outou ia hape i te reira.⁸

Te feia e haere atu i mua i te fata o te faaipoiporaa ma te here i roto i te aau, te parau papu atu nei matou ia ratou e, mai te mea e, e haapa‘o ratou i ta ratou mau fafauraa o ta ratou i rave i roto i te hiero, ia tae i te pae ahururaa o te matahiti i muri a‘e i to ratou faaipoiporaa, e ti‘a ia ratou ia parau atu te tahi i te tahi e: “E riro e, aita maua i papu maitai i te auraa no te here mau i te taime a faaipoipohia ai maua, i te mea e, ua rahi roa to maua mana‘ona‘oraa i te tahi e te tahi i teie mahana!” E o te reira atoa ïa te huru mai te mea e, e pee ratou i te a‘oraa a to ratou mau ti‘a faatere e e haapa‘o hoi i te mau aratairaa mo‘a e te hanahana tei horo‘ahia mai i roto i te oro‘a no te hiero; e rahi roa’tu to ratou here e tae roa’tu i te îraa i mua i te aro o te Fatu iho.⁹

E mea faufaa ore te mau hapa e te mau manuia-ore-raa e tae noa’tu i te mau faatianianiraa o te tino, ia faaauhia te reira i te faahiahia o te huru maitai o te hoê taata, inaha, e vai tamau noa te reira e e haviti roa’tu hoi ia maoro noa’tu te tau. Oia atoa outou, e ti‘a atoa ia outou ia fana‘o i te oaoa faito ore o to outou utuafare e tae roa’tu i to outou ruauraa mai te mea e, e imi tamau noa outou i te maitai i roto i te tahi e te tahi, mai te taiamoni ra te huru, e na te manuia e te manui-ore, na te ati e te oaoa, e faahinuhinu i te reira, ia anaana e ia purapura noa, noa’tu e tei roto roa i te poiri ta‘ota‘o o te po.¹⁰

Eaha te a‘oraa tei horo‘ahia i te feia aita â i farii i te faaipoiporaa mure ore?

Te vai nei te tahi pae o outou aita to ratou e hoa i te utuafare. Te tahi pae o outou ua mo‘e ta outou vahine e aore râ, ta outou tane e aore râ, aitâ te hoê hoa i itehia’tura ia outou. Tei rotopu ia outou te tahi mau melo faahiahia roa o te Ekalesia—e mau melo haapa‘o, e te itoito, e o te tautoo nei ia haapa‘o i te mau faaueraa a te Fatu, no te patu i te basileia i ni‘a i te fenua nei, e no te tavini i to outou mau taata tupu.

E faufaa rahi ta te oraraa nei i faaineine no outou. A rohi ia upootia outou i roto i ta outou mau titauraa. Ua rau te mau rave‘a e iteahia ai ia outou te oaoa rahi, i roto i te taviniraa i te feia tei here-roa-hia e outou, i roto i te rave-maitai-raa i te mau ohipa e vai ra i mua ia outou i roto i ta outou vahi ohiparaa e aore râ, i roto i te utuafare. Ua rau te mau rave‘a o ta te Ekalesia e horo‘a nei ia outou no te tauturu i te mau varua, haamata na ni‘a ia outou iho, ia roaa ia ratou te oaoa o te ora mure ore.

Eiaha e vaiiho i te oto e te haaparuparu ia faaatea ê ia outou i te e‘a o ta outou i ite e, e e‘a ti‘a. A horo‘a i to outou feruriraa i roto i te tautururaa ia vetahi ê. No outou nei, e auraa taa‘e to te mau parau a te Fatu: “O tei tape‘a i to’na ora, e ere ïa oia i te ora; area te tuu noa i to’na ora no’u nei, e ora ïa to’na.” (Mataio 10:39).¹¹

E haavâ te Fatu ia tatou nei eiaha i ni‘a noa i ta tatou mau ohipa, i ni‘a atoa râ i te mana‘o o to tatou aau. …No reira, [te mau vahine] tei ere i te mau haamaitairaa o te ti‘araa vahine e aore râ, o te ti‘araa metua vahine i roto i te oraraa nei—e tei parau hoi i roto i to ratou aau e, ahiri e, e ti‘a ia‘u ia rave, e rave mau ihoa vau, e aore râ, e horo‘a mau vau ahiri e te vai ra ta‘u, tera râ, aita ta‘u e vai ra—e haamaitai mai te Fatu ia outou mai te huru e, ua na reira mau outou, e na te ao i muri nei e horo‘a i ta ratou o tei faatupu i roto i to ratou aau i te hinaaro i te mau haamaitairaa ti‘a o tei ore hoi e roaa ia ratou, i te mea e, e ere i te hape no ratou.¹²

Outou e te mau vahine e titau maoro nei ia riro ta outou mau tane ei mau taata itoito i roto i te Ekalesia, ma te hinaaro ia parahi mai ratou i ô nei i teie mahana, eiaha râ te aau etaeta i roto ia ratou, ma te feruri e, eaha o te ti‘a ia ravehia ia nehenehe ia outou i te hoê mahana … ia haere atu e o ratou i roto i te hiero o to tatou Atua. E o outou e te mau tane faaipoipo o te hinaaro nei ia parahi ta outou mau vahine i piha‘i iho ia outou. Te parau atu nei matou ia outou e, mai te mea e, e haapa‘o maite outou i ta outou ohipa, e roaa te here ia outou i ta outou mau tane, e i ta outou mau vahine, e e tamau outou i te pure i te ahiahi e i te po-‘ipo‘i, i te ao e i te po, e na roto i te mana o te Varua Maitai, i reira te hoê mana e tae mai ai i roto ia outou, outou e te mau melo o te Ekalesia, o tei bapetizohia e tei haapa‘o, inaha, e ti‘araa to outou no te farii i te reira. E ia faaohipa outou i taua mana ra, e ti‘a ïa ia outou ia haamou i te aau pato‘i e vai ra i roto i to outou mau hoa faaipoipo e ia haafatata mai ia ratou i te faaroo ra.¹³

E riro paha te tahi pae o outou i te faaoti ia faaipoipo ia outou i rapae i te Ekalesia ma te tiaturi e, e faafariu mai outou i to outou hoa faaipoipo i roto i ta outou faaroo. E mea papu roa a‘e outou i te farii i te oaoa i roto i to outou oraraa faaipoipo mai te mea e, e tupu taua faafariuraa ra na mua a‘e i te faaipoiporaa.¹⁴

Eaha te ti‘a ia tatou ia rave no te tauturu i te feia apî ia haroaroa i te mau haamaitairaa o te faaipoiporaa hiero e ia faaineine ia ratou no te reira?

Te maitai o te hoê utuafare no te Feia Mo‘a i te mau Mahana Hopea Nei tei roto ïa i te huru o te faaipoiporaa i ravehia no taua utuafare ra. Te hoê faaipoiporaa tei ravehia no ô nei noa e no teie noa nei tau, e mea papu ïa e, no teie noa nei ïa ao to’na ti‘araa. Te hoê faaipoiporaa tei ravehia no te tau mure ore, e mea taa‘e roa ïa to’na hi‘oraa e to’na haamauraa. …

… Oia mau, e ite tatou e, ia haere noa tatou i te hiero ma te faaineine ore ia tatou i roto i te mau tuhaa atoa, eita ïa te reira e hopoi mai i te mau haamaitairaa o ta tatou e titau nei. Ua faatumuhia te faaipoiporaa mure ore i ni‘a i te paari e te fafauraa, na roto hoi i te reira—e na roto i te oro‘a hiero e te mau oro‘a—e matara ai te mau uputa o te ra‘i, a manii mai ai te mau haamaitairaa e rave rahi i ni‘a ia tatou nei.

…E ere te faaipoiporaa hiero i te hoê noa vahi i reira e faatupuhia ai taua oro‘a ra; Ua riro râ ei aratairaa tumu no te oraraa, no te faaipoiporaa e no te utuafare. E faaiteraa te reira no to tatou hinaaro hohonu ia patu i te Ekalesia, e faaiteraa hoi no te taiata ore, e no to tatou auraa e te Atua– -e no te tahi atu â mau mea e rave rahi. No reira, eita e nava‘i i te poro-noa-raa i te parau no te faaipoiporaa hiero. E mea ti‘a i to tatou mau pô utuafare, ta tatou mau haapiiraa evanelia na te feia apî e te feia apî paari, e te mau p∂p∂ tauturu, ia faatumuhia i ni‘a i teie opuaraa—eiaha na roto noa i te faaitoitoraa—na roto râ i te faaiteraa e, te mau mana‘o e te mau peu e titauhia i roto i te faaipoiporaa hiero, o te mau mana‘o e te mau peu ïa o te hopoi mai i ô nei e i roto i te tau mure ore, i te huru oraraa o ta te rahiraa o te mau taata e hinaaro papu nei no ratou. Ia rave maitaihia hoi te reira, e ti‘a ïa ia tatou ia faaite i te huru-ê-raa i “tei mo‘a e tei faanoa ra” [Ezekiela 44:23] i reira te mau mana‘o metua vahine e vai ai i roto i te tamahine apî o te otiatia noa ra i rotopu i taua mau mana‘o ra e i te e‘a o te arearearaa. Na roto i te haavâraa papu e te rohiamuiraa i te haapiiraa, e nehenehe ta tatou e faaite i te feia apî e, te haerea o te ao nei,—noa’tu te huru faateniteni e te aminamina o te mau peu faatiani o teie nei ao—e haerea ïa no te oto; e haerea ïa o te faaino roa i te mau mana‘o hohonu i roto ia’na no ni‘a i to’na utuafare e i te mau oaoa o te ti‘araa metua tane.¹⁵

Eita paha te taatoaraa o te mau fifi o te oraraa nei e hope i te faatitiaifarohia na roto i te hoê faaipoiporaa hiero, e mea papu râ e, no te feia atoa e tomo i roto i te reira ma te tiama, e riro mai ïa ei vahi no te hau mai te ra‘i ra, e ei tutau no te varua, ia farara mai te mau vero o te oraraa nei. …

Ua roaa ia‘u te hoê iteraa faufaa roa, inaha, no te hoê roaraa fatata e piti ahuru matahiti, i te mau hopea hepetoma atoa, ua fariihia vau i roto i te tahi o te mau utuafare maitai roa o te Ekalesia, e i te tahi atoa a‘e pae, fatata atoa pauroa te hepetoma, ua ti‘a atoa ia‘u ia apetahi atu to’u mata i roto i te tahi pae o te mau utuafare oaoa ore. Na roto i te reira mau iteraa, ua tupu mai i roto i to’u feruriraa te tahi mau haapapuraa: A tahi, to tatou mau utuafare oaoa roa a‘e, o te mau utuafare ïa ua faaipoipohia na metua i roto i te hiero. A piti, e mea manuïa a‘e te faaipoiporaa hiero mai te mea e, e rave te tane e te vahine faaipoipo i te mau oro‘a mo‘a o te hiero ma te tino, te mana‘o e te aau ma e te viivii ore. A toru, e mea mo‘a a‘e te faaipoiporaa hiero mai te mea e, ua haapii- paari-hia na pae e piti atoa ra, i te tumu mau o te oro‘a hiero mo‘a, e i te mau hopoi‘a a te tane e a te vahine i muri a‘e, ia au i te mau haapiiraa tei fariihia e raua i roto i te hiero. A maha, te mau metua aita i tau‘a maitai roa i ta ratou mau fafauraa no te hiero, eiaha atoa ïa ratou e tiaturi e, e maitai roa atoa’tu ta raua mau tamarii na roto i to raua iho hi‘oraa ino.

I teie mahana, ua faaino roa te mau peu, te faahohoaraa, te mau faahuaraa, e te haapi’oraa a te ao nei, i te mau ture mo‘a o te utuafare e o te faaipoiporaa, e tae roa’tu i te oro‘a iho o te faaipoiporaa. Ua haamaitaihia te metua vahine paari o tei faaite i te hoê hohoa ora i mua i ta’na tamahine no ni‘a i te hoê oro‘a mo‘a e tupu i roto i te hoê piha taatiraa hanahana au maitai, i reira hoi te hoê tamahine e te hoê tamaiti faaipoipo nehenehe e tuiau ai i to raua rima na ni‘a iho i te fata mo‘a, ma te paruruhia raua i te mau mea atoa o te ao nei, e i mua i te aro o te mau metua e o te mau hoa piri roa o te utuafare. Haamauruuru i te Atua no taua metua vahine ra o tei faaite i ta’na tamahine e, i teie nei vahi, oia te vahi fatata roa a‘e i te ra‘i i ni‘a i te fenua nei, e paraparau te aau e te aau, ma te here te tahi e te tahi, e na taua here ra e omua i te tahi hoêraa, o te aro ia mou te mau ino o te ati, o te aau oto, e aore râ, o te mauruuru ore, e o te faatupu hoi i te faaitoitoraa puai no te rave i te mau ohipa teitei a‘e o te oraraa nei!¹⁶

E farii te Atua ia haamaitaihia te mau utuafare o te Feia Mo‘a i te Mau Mahana Hopea Nei, e ia vai i reira te oaoa i ô nei, e te niu no te faateiteiraa i roto i te basileia tiretiera i roto i te ao a muri a‘e.¹⁷

Te Mau mana‘o Tauturu no te Haapiiraa e te Aparauraa

Eaha te ti‘a i te mau tane e te mau vahine faaipoipohia ia rave no te faariro noa i ta ratou fafauraa no te faaipoiporaa mure ore ei mana‘ona‘oraa matamua na ratou i roto i to ratou oraraa i te mau mahana atoa? Ia faaipoipohia ana‘e te tane e te vahine no te tau mure ore, eaha ta te reira e faatupu i ni‘a i to raua huru te tahi i ni‘a i te tahi, e i ni‘a atoa i te tamarii?
Nahea tatou ia haapii i te faufaa o te faaipoiporaa mure ore i ta tatou mau tamarii?
No te aha “te here rahi. … i patuhia‘i i ni‘a i te faatusiaraa rahi”? Nahea te haamo‘eraa ia’na iho i te haapaariraa i te hoê faaipoiporaa?
Eaha ta te feia e ere to ratou hoa faaipoipo i te mea itoito roa i roto i te Ekalesia e ti‘a ia rave no te haapaari i to ratou faaipoiporaa? E te feia aitâ i faaipoipohia, nahea ratou i te faaî i to ratou oraraa i te here o te Atua e te faatusiaraa?
I to outou feruriraa, eaha te auraa no te parau ra e, “te hoêraa” i roto i te faaipoiporaa?
Nahea te mau apiti i roto i te faaipoiporaa e tupu ai i te “rahi roa’tu [i roto i] to ratou here e tae roa’tu i te îraa i mua i te aro o te Fatu iho”?

Ua haapii mai te Peresideni Harold B. Lee e, “E patuhia te here rahi i ni‘a i te faatusiaraa rahi; e te fare i reira e faaitehia ai i te mau mahana atoa te parau no te faatusiaraa no te maitai o te tahi e te tahi, o te fare ïa tei reira te here rahi.”