Pene 15

Te Mana Parau Tiʻa o te mau Metua Vahine

Nahea te mau metua vahine ia rave i ta ratou ohipa moʻa o te haapiiraa e te aupururaa i ta ratou mau tamarii?

Omuaraa

I te hoê taime te faatia ra te Peresideni Harold B. Lee i te parau no te hoê metua vahine o te faaanaana ra i te mau auʻa hamanihia i te ario, no te faaineine i te hoê oroʻa i te pô. “Te rave ra oia i te mau ohipa no te faaineineraa, inaha, ua haere maira ta’na tamaiti iti e vau matahiti e ta’na afata faarii moni mai te puaa te hohoa, e na ô atura i to’na metua vahine, ‘E mama, nahea oe ia aufau i ta oe tuhaa ahuru?’

“O teie mau te taime aita roa oia e hinaaro ra ia maumau ta’na ohipa, tera râ, ua tamaro aʻera oia i to’na na rima e ua parahi ihora i raro e ua tutu aʻe ra raua i te afata moni ia puehu mai te mau toata i rapae, e ua haapii atura i ta’na tamaiti nahea oia ia aufau i te tuhaa ahuru. Ia oti ta’na haapiiraa, ua tapii maira ta’na tamaiti i to’na arapoa e na ô maira, ‘Mauruuru roa e Mama, no to oe tautururaa mai iaʻu; I teie nei, ua ite au e nahea ia aufau i taʻu tuhaa ahuru.’ ”

No niʻa i teie ohipa tei tupu, ua parau te metua vahine i te hoê mea o tei riro ei “parau faufaa roa no te mau … metua vahine paatoa, ‘E taime to’u no te faaanaana i te ario i te taatoaraa o to’u oraraa, area teie taime ra, o teie anaʻe paha ïa te taime e haapii ai au i taʻu tamaiti iti i te parau tumu o te tuhaa ahauru.’ ”¹

Te haapii ra te Peresideni Lee e, “E tiʻa te manuïaraa o te me-tua vahine i te vairaa e rave rahi matahiti e a muri noa’tu.” ² Ua haapapu oia e, te opuaraa hanahana a te hoê metua vahine “o te paturaa ïa i te hoê utuafare i ô nei e te haamauraa i te hoê niu no te hoê utuafare i roto i te ao a muri aʻe.”³

Te mau haapiiraa a Harold B. Lee

Nahea te mau metua vahine ia faatupu i te hoê mana parau tiʻa i niʻa i ta ratou mau tamarii?

Tei roto i te vahine te mana no te poieteraa ma te apitihia mai e ta’na tane tei haamanahia e te ture i ô nei, e mai te mea e, ua taatihia raua i roto i te faaipoiporaa mure ore, ia roaa ia’na te faarahiraa mure ore i roto i te ao a muri aʻe. O te vahine te haapaʻo i te utuafare i roto i to’na iho utuafare, e o te hiʻoraa oia no to ’na huaai i roto i te mau u’i i muri mai ia’na. E apiti te vahine no ta’na tane faaipoipo, e e nehenehe na roto ia’na e maitai roa ai ta’na tane. E nehenehe te mana o te vahine e haamaitai i te oraraa o te hoê oire e aore râ, o te hoê nunaa mai te mea e, e puai oia i te pae varua e i roto i te mau horoʻaraa no te raʻi ta te natura i tuu i roto ia’na. … I roto i te roaraa o to’na oraraa, e faa ite oia i te hau e i te maitai ia tiʻa i to’na huaai ia fanaʻo i te mau raveʻa atoa no te faatupu hope roa i to ratou huru pae varua e te huru pae tino.⁴

Na te mau metua vahine e faatupu i te hoê huru i roto i te utuafare e na ratou e rave i te mau mea e rave rahi no te horoʻa i te niu paari no ta ratou mau tamaiti e ta ratou mau tamahine, no te horoʻa i te puai ia ratou i te taime a taaʻe atu ai ratou i te mana o to ratou utuafare.⁵

E te mau metua vahine, a tiʻa i niʻa i te maaraa purumu o te utuafare. I te tahi mau taime i mairi aʻe nei, tei roto vau i te hoê amuiraa tĭtĭ. …Ua parau atura vau i te peresideni tĭtĭ e,… “Te vai ra anei te tahi mau metua vahine i o nei, te metua vahine paari aʻe, e utuafare rahi to’na, e tei farii i te oaoa i te iteraa i te melo tataitahi o to’na utuafare i te faaipoipo-raa-hia i roto i te hiero?”

Ua hiʻo atura oia i te amuiraa e na ô aʻera, “Oia, te vai ra hoê Tuahine (E pii au ia’na o te Tuahine Jones), hoê ahuru e ma hoê ta’na tamarii, e ua hope ratou paatoa i te faaipoipohia i roto i te hiero.”…

E a tiʻa ai teie metua vahine rouru hinahina e te nehenehe i pihaʻi iho iaʻu i mua i te paraparauraa “micro”, na ô atura vau e, “E tiʻa anei ia oe ia iriti mai i te hoê haapiiraa mai roto mai i te buka o to oe oraraa e ia faaite mai ia matou e, eaha tei ravehia e oe i taeʻahia ai ia oe teie manuïaraa nehenehe roa mau?”

Ua pahono mai ra oia e, … “E horoʻa atu vau ia outou e piti manaʻo tauturu. Teie te matamua, a tupu noa ai to matou utuafare i te rahi, ua tiʻa tamau noa vau i niʻa i te maaraa purumu o te utuafare, i te vahi e na reira taʻu mau tamarii i te haere mai e i te haere atu. E te piti: te mau mea atoa ta matou i rave, ua rave amui matou e to te utuafare taatoa. Ua hauti amui matou, ua pure amui matou i to matou pureraa, ua rave amui matou i te ohipa, ua amui hoê matou i te raveraa i te mau mea atoa. Iaʻu i manaʻo, tirara atu ai te mea o te tiʻa iaʻu ia feruri.”

Na ô atura vau ia’na e, “E piti ïa aʻoraa rahi ta oe i aʻo iho nei.”⁶

A tuʻu i te metua vahine o to outou utuafare i te “maaraa purumu” o te utuafare. Te vaira te hoê fifi rahi i teie mahana no te amahamaharaa te utuafare, na roto i te mau faaturoriraa e turai nei i te mau metua vahine ia faaru’e i to ratou mau utuafare, te vahi i reira te mau tamarii e haere mai ai, e te vahi atoa e na reira atu hoi ratou i te haere ê atu. I teie nei, te taa atoa ra iaʻu te titauraa i niʻa i te tahi mau metua vahine no te imi i te ora no to ratou utuafare. Tera râ, i ô nei atoa, e mea tiʻa i te mau peresideni Sotaiete Tauturu e te mau episekopo ia haapaʻo maitai eiaha ia moʻehia ia ratou i te horoʻa i te mau tauturu atoa e vai ra, i te metua vahine e tamarii naʻinaʻi ta’na, e ia tauturu ia’na i te faanahoraa i te huru o te ohipa e aore râ, i te faanahoraa i to’na taime. Tei roto teie mau mea atoa i te hopoiʻa a te Sotaiete Tauturu i te haaraa e te utuafare.⁷

I teie mahana te feruri nei au e, te fifi nei te mau vahine i mua i te parau no te oraraa rû o teie tau. Mai te mea râ e, e vai te itemanaʻo-metua-vahine i roto ia ratou, e tae noa’tu i taua haafatataraa faahiahia to ratou i ta ratou mau tamarii, i reira e tiʻa ai ia ratou ia ite eaha te manaʻo e te feruriraa o ta ratou mau tamarii, e ia apo mai i te mau tapaʻo matamua o to ratou fifi, to ratou ati e te ahoaho, e mai te mea e, e rapaau oioihia te reira, ua ora ïa ratou i te hoê ati rahi.⁸

I te tahi aʻe nei mahana, ua taiʻo faahou vau i te mau parau a te metua vahine moʻa o te Peropheta Iosepha, i te pô a haere atu ai oia e tii i te mau papaa parau. Teie ta’na i papai:

“I te arui no te [21 no Setepa] ua maoro to’u parahi-noaraa. … Aita vau i taoto e mairi noa’tu te hora ahuru e ma piti i te pô. Ua fatata i te hora ahuru e ma piti, ua haere mai ra o Iosepha i pihaʻi iho iaʻu e ua ani mai ra e, e afata auri anei taʻu ma te ponao e te taviri. Ua ite oioi au i te tumu i hinaaro ai oia i te reira, e ua tupu te mataʻu rahi i roto iaʻu i te mea e, aita taʻu i te reira, inaha, ua feruri au e, e ohipa faufaa roa o te tupu ra. Area râ, no to Iosepha iteraa i to’u peʻapeʻa, ua parau mai ra oia, ‘Aita e peʻapeʻa, e nehenehe taʻu e faaafaro i te reira i teie taime noa ’tu e, aita e afata—a faaea noa ma te hau—aita e fifi. ’

“Aita i maoro i muri iho, ua haere mai ra te vahine a Iosepha na roto i te piha, to’na taupoo ea to’na ahu faahoro puaahorofenua, e tau minutirii i muri iho, rereva anaʻe atura raua, na niʻa i te pereoo puaahorofenua o Knight tane. I tera pô taatoa ua pure e ua taparu noa vau i te Atua, no te mea aita taʻu e nehenehe e taoto no te peʻapeʻa o to’u feruriraa. …” [Lucy Mack Smith, History of Joseph Smith, neneʻiraa a Preston Nibley (1958), api 102].

Te parau atu nei au ia outou e te mau metua vahine, mai te mea, e riro ta outou mau tamaiti e ta outou mau tamahine mai te au i tei titauhia ia ratou i roto i te nei ao, te tumu rahi, no te mea ïa e, ua farii ta outou mau tamarii i te hoê metua vahine o tei tuturi i raro e rave rahi mau pô, i roto i te pure, no te ani i te Atua eiaha ta’na tamaiti, ta’na tamahine, ia hiʻa. Te haamanaʻo nei au i te mau matahiti maamaa o to’u oraraa taurearea, inaha, ua haere mai to’u metua vahine iaʻu, ma te manaʻo-ite-atea, e te faa-ara, e o taʻu i haafaufaa ore, mai te au ihoa i te peu e ravehia nei e te mau taurearea maamaa. “E hoa e mama, e parau maamaa te reira,” o taʻu ïa parau ia’na, e i roto noa i te maororaa hoê avaʻe, te farerei nei au i te faahemaraa o ta to’u metua vahine i faaara mai. Aita noa aʻe i roaa iaʻu te puai no te hoʻi e farerei ia’na no te parau atu e, ua tano mau oia, ua vai araara noa râ vau no te mea ua faaara te hoê taata iaʻu—to’u metua vahine.⁹

Te parahi ra to te utuafare i mua i te uputa fare, to’u mama ruau, to’u metua vahine, e e piti e aore râ, e toru o te mau tamarii naʻinaʻi, te mataitai ra matou i te ahitiri purapura a te natura, inaha, i taua taime ra, te tupu ra te hoê vero rahi i pihaʻi iho i te mouʻa tei reira te tiʻaraa to matou fare. Na te anapa o te uira, apee-oioi-hia mai e te hoê haruru patiri, i faaite mai e, e mea fatata roa mai te paainaraa o te anapa.

Te tiʻa noa ra vau i te uputa, a ite ai vau i toʻu peeraa’tu, te avae i niʻa, na taʻu metua vahine i turai iaʻu i rapae i te uputa ma te puai e ma te faaara ore mai. E i taua taime mau ra, ua tere mai ra te uira na roto mai i te haapupuraa auauahi o te umu tunuraa maa, e na roto atura i te uputa i te tereraa’tu i rapae, e û atura i niʻa i te tumu raau rahi i mua noa i te fare, e ăfâ atura taua tumu raau ra mai niʻa e i raro roa. Ahiri au i tiʻa noa i ropu i te uputa, aita ïa vau e papai i teie aamu i teie mahana.

Aita roa’tu e tiʻa i to’u metua vahine ia faataa mai i te faaotiraa vitiviti roa tei ravehia e a’na. Taʻu noa i ite, maori râ, ua ora mai au na roto i te ohipa manaʻo-ore-hia e te faaurûraa o ta’na i rave.

E rave rahi matahiti i muri aʻe, ia ite atu vau i te mutu hohonu i niʻa i taua tumu raau rahi ra i pihaʻi iho i te fare metua tahito, hoê noa parau taʻu e parau ma te aau mehara: Mauruuru e te Fatu no taua horoʻaraa faufaa roa i roto i to’u metua vahine e i roto hoi i te tahi atu mau metua vahine, na roto hoi ia ratou e tiʻa ai i te raʻi ia fatata roa mai i te mau taime e hinaarohia.¹⁰

Nahea te mau metua vahine ia faaoti i ta ratou hopoiʻa no te haapiiraa i te evanelia i ta ratou mau tamarii?

Ua riro te mafatu o te hoê metua vahine ei piha haapiiraa no te hoê tamarii. Te mau haapiiraa e fariihia e te tamarii mai roto mai i to ratou metua vahine, te mau haapiiraa a te mau metua e tae noa’tu i te mau haamanaʻoraa faaroo e te auhia o te pureraa pae auahi, e ore roa te reira mau mea e mou i roto i te varua.

Te parau ra te hoê taata e, te vahi maitai roa aʻe no te haapii i te haapaʻo, o te utuafare ïa, no te mea, o te oraraa utuafare te faanahoraa a te Atua no te haapii i te feia apî; e te utuafare, na te metua vahine te reira e faatupu. ¹¹

No reira, eaha ta te metua vahine ohipa i roto i te tereraa ohipa o te basileia? Ta’na ohipa matamua e tei hau roa i te faufaa, o te haamanaʻoraa ïa i te haapii i te evanelia i roto i te utuafare. ¹²

[Te hinaaro nei au ia parau i] te parau no te tiʻaraa o te vahine i roto i te haapiiraa i to’na utuafare. … Ua parau te Fatu e:

“Tera râ inaha, te parau atu nei au ia outou e, ua faaorahia mai te mau tamarii rii mai te faatumuraahia mai o te ao nei na roto i to’u Fanau Tahi ra;

“No reira, aita e tiʻa ia ratou ia rave i te hara, no te mea aita te mana i horoahia’tu ia Satani ia faahema i te tamarii rii, e tae noa ’tu i te taime e riro ai ratou ei feia manaʻo papu i mua iaʻu nei;

“No te mea ua horoahia’tu te reira ia ratou mai te au i to’u nei hinaaro, mai te au hoi i to’u iho nei oaoa, ia tiʻa ia titauhia te mau mea rarahi i te rima o to ratou ra mau metua tane ra.” (PH&PF 29:46–48).

… Eaha taua mau mea rarahi ra o ta te Atua e titau nei i te mau metua tane o te mau tamarii ra (e au atoa te reira parau no te mau metua vahine) i roto i te area taime hou a roaa ai i te mau tamarii naʻinaʻi te manaʻo papu i mua i te Fatu ra? … Te faauehia’tu nei te mau metua ia bapetizo i ta ratou mau tamarii ia tae anaʻe to ratou matahiti i te vau, e ia haapii ia ratou i te mau parau tumu faufaa o te evanelia. E bapetizohia ta ratou mau tamrii no te haamatararaa i ta ratou ra mau hara e ia farii hoi i te tuuraa rima. Ia haapiihia ratou ia pure e ia afaro noa to ratou haereraa i mua i te Fatu e tiʻa ai.

E ohipa rahi tei titauhia i te mau metua tane e te mau metua vahine hou a horoʻahia ai te mana ia Satane no te faahema i te mau tamarii rii. E hopoiʻa na te mau metua ia haamau i te hoê niu paari na roto i te haapiiraa i te mau ture tumu o te Ekalesia e na roto i te hiʻoraa maitai e na roto i te ture.

No te mau tuahine, teie ïa te auraa, oia hoi, e faariro ratou i te tiʻaraa metua vahine ei toroʻa no ratou. Eiaha ratou e vaiiho i te tahi atu huru ohipa e na niʻa aʻe i teie toroʻa.¹³

Aita i maoro aʻe nei, ua faaroo vau i te hoê aʻoraa tei horoʻahia e te hoê o taʻu mau tamahine, i te hoê pŭpŭ o te mau metua vahine e ta ratou mau tamahine. Ua parau oia i te parau no ta’na tamaiti matahiapo o tei haamata i te haapii ia’na i te mau hopoiʻa o tei titauhia ia’na ia rave i roto i to’na tiʻaraa metua vahine. Ua parau oia e, “E rave rahi matahiti i mairi aʻe nei, te naʻinaʻi noa ra â taʻu tamaiti matahiapo, i te hoê pô, te rû ra vau i te faaoti i te tamohinaraa i te tahi mau maa hotu.” Ua papu roa iaʻu e, te taa mai ra ia outou e te mau metua vahine apî i te auraa o tee nei ohipa. Mai te mea ra e, e rave rahi ohipa teie faataupupu ia ore teie opuaraa ia faaotihia. I teie nei ua taoto te aiu, ua reva to outou hoa i ta’na apooraa i te hora tiʻa, e te oomo ra na tamarii e toru matahiti e te maha matahiti i to raua ahu taotoraa e te faaineine ra no te haere i niʻa i te roʻi. Feruri aʻera outou e, “I teie nei, e haamata vau i te tamohina i taua mau maa hotu ra.”

[Te parau faahou ra taʻu tamahine e:] “Tera ïa to’u huru i taua pô ra, a haamata ai au i te tipitipi e i te tatara i te huero o te hotu, i reira, ua haere maira taʻu na tamaiti iti i roto i te piha tunuraa maa e ua faaara maira e, ua ineine raua no te pure i to raua pure.” Tera râ, no to’u hinaaro ia ore e mutu taʻu ohipa, pahono oioi atura vau i taʻu na tamaiti iti e, “ ‘E haapeepee orua i te haere i roto i te piha e ia faaoti i to orua pure orua anaʻe, e haapao noa Mama i ta’na mau maa hotu.’ Ua tiʻa maira o David i mua iaʻu ma te pautuutu e ua ani maira ma te mărû, ‘A tae hoi, e Mama, eaha te mea faufaa aʻe, te pure e aore râ, te hotu?’ I te reira taime, feruri ihora vau ei metua vahine apî roa e te ohipa hoi, e rave rahi atu â mau haafifiraa e vai i mua iaʻu a amo ai au i teie nei hopoia ei vahine e ei metua vahine atoa hoi i roto i te utuafare.

Tera ïa te titauraa e aniohia ia outou e te mau metua vahine, ia onoono mai ta outou mau tamarii rii ia parahi outou i pihaʻi iho ia ratou, e ia tauturu ia ratou ia tupu i te rahi. …

E te mau metua vahine e, ia haamata anaʻe ta outou mau tamarii i te uiui i te mau uiraa, noa’tu e, e mau uiraa no niʻa i te tahi mau mea huru fifi rii o te oraraa, eiaha e patoʻi i te reira. A horoʻa i te taime no te haamaramarama i to ratou mau feruriraa tamarii, e aore râ, i to ratou mau feruriraa huru paari rii aʻe, a tupu ai ratou i te paariraa. Te hoê metua vahine manuïa, o te metua vahine ïa o te ore e rohirohi ia haere mai ta’na mau tamaiti e ta’na mau tamahine e faaite ia’na i to ratou mau oaoaraa e to ratou mau otootoraa.¹⁴

Te pure nei au ia vai mai te mau haamaitairaa a te Fatu i niʻa ia outou [e to’u mau tuahine here]. E mana rahi mau to outou i roto i te parau no te ora maitai o teie nei Ekalesia, aita outou e ite maitai ra i te reira. Te huru o te tereraa o te Ekalesia, tei te huru ïa o to outou faaotiraa i ta outou hopoiʻa metua vahine. Te pure nei au ma te haehaa ia tauturu mai te Fatu ia outou i te raveraa e i te haamauraa i te hoê niu paari no te utuafare, e te faaite nei au ia outou i to’u iteraa papu haehaa e, i roto i Te Ekalesia a Iesu Mesia, e itehia ai te mau haapiiraa e te mau faanahoraa no te paruru i to tatou mau utuafare, e te faaite nei au i te reira iteraa papu na roto i te iʻoa o te Fatu o Iesu Mesia.¹⁵

Te Mau Manaʻo Tauturu no te Haapiiraa e te Aparauraa

Eaha te mau faatusiaraa ta te hoê metua vahine e rave no ta’na mau tamarii? Eaha te mau haamaitairaa e manii mai na roto mai i taua mau faatusiaraa ra?
Nahea “te manuïaraa o te metua vahine i teie mahana” i te haamaitairaa i te mau u’i i muri nei no te ora mure ore?
Eaha te auraa no te parau ra, ia tiʻa i te maaraa purumu o te utuafare? No te aha e mea faufaa ia tiʻa te mau metua vahine i te mau maaraa purumu i roto i te oraraa o ta ratou mau tamarii?
Mea nahea te mau vahine ia faataipupu anaʻehia e te mau ohipa huru rau o te oraraa i ta ratou mau opuaraa moʻa? Nahea ia faaiti i teie mau mea arearea?
Eaha ta te aamu o te metua vahine o Iosepha Semita e te aamu o te metua vahine o te Peresideni Lee e haapii mai nei no niʻa i to te mau metua vahine riroraa ei faaurûraa maitai no ta ratou mau tamarii?
Nahea to te mau pure a to outou metua vahine haamaitairaa i to outou oraraa? Nahea ta outou mau pure e te mau metua vahine i te haamaitairaa i ta outou mau tamarii?
Nahea te mau tane faaipoipo e te mau metua tane ia tauturu i te mau metua vahine ia faaoti i ta ratou mau hopoiʻa i roto i te utuafare? Nahea te feia faatere no te autahuʻaraa e no te Sotaiete Tauturu ia tauturu?
No te aha i titauhia ai i te mau metua vahine ia faariro i ta ratou hopoiʻa haapiiraa i te evanelia i roto i te utuafare ei hopoiʻa matamua roa? Nahea te mau metua vahine ia rave i te reira?
Nahea te mau metua ia faaineine i ta ratou mau tamahine ia riro mai ei mau metua vahine maitai?

Na roto i ta ratou mau tautooraa no te here e te rohirohi ore, te rave nei te mau metua vahine haapaʻo i te ao atoa nei, i te mau mea atoa e tiʻa ia ratou ia rave no te haapapuraa e, “e fanaʻo to ratou huaai i te mau raveʻa atoa no te faatupu hope roa i to ratou huru pae varua e te huru pae tino.”