Pene 4
Te Mau Parau Tumu e te mau Oroʻa Matamua o te Evanelia
Nahea e tiʻa ai ia tatou ia haapaʻo maitai atu i te mau parau tumu e te mau oroʻa matamua o te evanelia e ia tamau noa e tae roa’tu i te hopea ra?
Omuaraa
Te hinaaro o te Feia Moʻa haapaʻo o te Mau Mahana Hopea Nei, o te riroraa ïa ei feia mâ e te moʻa i roto i te oraraa e i roto i to’na iho huru taata. Ua haapii mai te Peresideni Harold B. Lee e, te raveʻa no te riroraa ei taata mâ e te moʻa, o te fariiraa ïa i na parau tumu e na oroʻa matamua e maha o te evanelia—te faaroo i te Fatu ia Iesu Mesia, te tatarahaparaa, te bapetizoraa, e te fariiraa i te horoʻaraa i te Varua Maitai—e ia tamau noa i te haapaʻo i te mau faaueraa atoa a te Atua e tae roa’tu i te hopea ra. Te na ô ra oia e:
“Tei roto i te evanelia te faaiteraahia te mau ture a te Atua tei horoʻahia mai i te taata nei, e tei te Ekalesia a Iesu Mesia te hopoiʻa no te haapii i te reira mau ture i to te ao nei. Na to tatou Metua i te Ao ra i horoʻa mai i te reira no te hoê noa iho tumu, oia hoi, o outou o tei faaterehia e te ture ra ia faaora-atoa-hia ïa e te ture, e ia haamaitai-roa-hia e ia haamoʻahia hoi e te reira (a hiʻo PH&PF 88:34). Te horoʻa hau roa i te mau horoʻa atoa a te Atua ia tatou nei, o te horoʻa ïa no te faaoraraa i roto i te basileia o te Atua.”1
Ua haapii atoa mai oia e, “E mea faufaa no te ora mure ore te iteraa i te Atua e ia Iesu, Ta’na Tamaiti; area râ, e na mua te haapaʻo i te mau faaueraa a te Atua hou a roaa mai ai taua iteraa ra e aore râ, taua maramarama ra.”2
I roto i teie pene, e tuatapapahia te parau no te iteraa e, nahea teie na parau tumu e na oroʻa matamua e maha o te evanelia, e te haapaʻo-tamau-raa e tae roa’tu i te hopea ra, i te aratai atu ia tatou i te ora mure ore ra.
Te mau haapiiraa a Harold B. Lee
Eaha te faaroo, e e mea nahea te reira i te aratai ia tatou i roto i ta tatou mau tautooraa ia roaa te ora mure?
Te faaroo, o te parau tumu faufaa ïa no te Ekalesia, e no reira mai hoi te mau parau tiʻa atoa, e na te reira e aratai i te taata i roto i ta’na mau tautooraa ia roaa te ora mure ore i roto i te ao a muri aʻe. Ua faatumuhia te reira i niʻa i te Atua te tumu no te mana e te paari i roto i te ao atoa nei, te Maramarama e aratai nei i “te mau mea atoa e itehia e aore râ, e ite-ore-hia e te mata, tei riro ei faaiteraa no to’na paari.” No reira, na roto i te faaroo i te Atua e nehenehe atoa outou e hiroʻa i te mau mea mure ore, e na roto i te mana e te paari no ô mai i to outou Metua i te ao ra, e nehenehe ta outou e haavî i te mau puai o te ao nei e ia faariro ia ratou ei tavini no outou i te mau taime a titau ai outou i te mau raveʻa no te faatitiaifaro i te mau fifi tei riro ei mau fifi rahi roa no to outou puai taata e aore râ, te maramarama taata.
Nahea tatou ia faananea i teie faaro? Te pahonoraa, na roto ïa i te haapiiraa, na roto i te ohipa e na roto i te pure. Te ui ra te Aposetolo Paulo i teie uiraa e, “Eaha hoi ratou e tiaʻi ia faaroo ia’na, i tei ore ratou i ite ia’na? e eaha hoi ratou e ite ai i te faaite ore?” (Roma 10:14). E pahono tatou e, e ore e tiʻa ia ratou. No reira e roaa te faaroo na roto anaʻe i te faarooraa i te parau a te Atua mai roto mai i te orometua faaite parau mau. Ua faaauhia te faaiteraa i te parau mau no niʻa i te Atua e ta’na mau opuaraa, i te huru no te ueueraa i te huero, inaha, mai te mea e, e haamata te hoê huero maitai i te oteo e i te tupu i roto i to outou aau mai te reira te huru: A tahi, ua tanuhia ïa te reira i roto i te repo maitai o te aau parau tiʻa e te hinaaro mau; a piti, ua aupuruhia te reira na roto i te haapiiraa e te tuatapaparaa tamau; e a toru, ua pîpîhia te reira i te “hupe” o te varua e ua tamahanahanahia i te mau hìhì o te faaururaa o te pure haehaa. Te taata e ooti i teie huru raau, o te taata anaʻe ïa tei faaohipa i te mau parau mau tei apohia mai e a’na, e tei faatitiaifaro i to’na oraraa hara e ua rave i te mau ohipa maitai i te mau mahana atoa na roto i te haapaʻoraa i te mau faaueraa a te Atua ta’na e tiaturi nei, e na roto i te taviniraa i to’na ra taata tupu.3
Na roto i te faaroo, i tauihia ai na ture hoê ahuru ra o te Mouʻa Sinai, mai te tahi mau parau mataro-noa-hia a te hoê philosopho, tauihia ei reo haruru puai o te hoê mana no niʻa mai, e i riro mai ai te mau haapiiraa a te mau peropheta, ei parau na te Atua tei heheuhia mai, no te aratai ia tatou i to tatou utuafare i te raʻi ra. … Na roto i te faaroo e ite ai tatou e, te mau mea atoa ta tatou e rave i roto i te oraraa nei no te faatia i ta Iesu titauraa, “Ia maitai roa hoi outou mai to outou Metua i te ao e maitai roa ra” [Mataio 5:48], e riro ïa ei maitai e ei haamaitairaa mure ore no tatou noa’tu te etaeta o te parau a te hoê Atua paari hope no te faatitiaifaro ia tatou, inaha hoi,“O ta te Fatu e here ra, o ta’na ïa e aʻo mai, e e păpă’i â oia i te mau tamarii atoa ta’na e ite maira.” [Hebera 12:6].4
Ia ite hoi te tamarii tataitahi e, te faaroo e titauhia no te maitai-roa-raa, e tupu te reira i te rahi na roto anaʻe i te faatusiaraa, e ia ore oia e haapii i te faatusia i to’na mau hiaai e to’na mau hinaaro [tino] i roto i te haapaʻoraa i te mau ture o te Evanelia, e ore roa oia e haamoʻahia i mua i te Fatu.5
No te aha e mea titauhia ia tatarahapa i te mau mahana atoa?
No te faaʻuʻaá i te maitai, e mea tiʻa i te reira ia aupuru-maitaihia e ia faaohipa-tamau-noa-hia, e no te riroraa ei taata paieti mau, e titauhia i te mau mahana atoa ia faaore i te ino i roto i to tatou huru na roto i te tatarahaparaa i ta tatou hara i te mau mahana atoa. …
I teie nei eaha te mau taahiraa e titauhia i niʻa i te eʻa o te tatarahaparaa, ia nehenehe ia tatou ia farii i te faaoreraa hara a te Atua, na roto i te faaoraraa a te tusia taraehara a te Fatu, e ia farii atoa i te mau haamaitairaa o te ora mure ore i roto i te ao a muri aʻe? No to’na ite-atea-raa e, e hiʻa te tahi pae o tatou i roto i te hara, e e titauhia i te taatoaraa ia tatarahapa, ua horoʻa mai te hoê Metua paari i roto i te mau haapiiraa o ta’na evanelia e na roto i ta’na Ekalesia, i te faanahoraa no te faaoraraa, o te faaite mai nei i te eʻa maramarama o te tatarahaparaa.
A tahi, te feia tei roto i te hara, ia faʻi ratou i te reira e tiaʻi. “Na roto i teie nei mea e ite ai outou e mai te mea ua tatarahapa te taata i ta’na ra mau hara—inaha, e faʻi mai oia i te reira e e haapae ê roa’tu hoi.” (PH&PF 58:43). E ravehia taua faʻiraa ra na mua roa i te taata tei fifi roa i te ohipa ta outou i rave. Te faʻiraa mau e ere ïa te farii-noa-raa i to outou hape inaha, ua itea-ê-hia na ïa te reira. Mai te mea e ua “faahapa outou e rave rahi taata i te vahi taata ra,” e mea tiʻa ïa ia outou ia faʻi atoa i te vahi taata e i mua i te feia ta outou i faahapa ra, ia tiʻa ia outou ia faaite i to outou haamâ e to outou haehaa e to outou hinaaro mau ia farii i te hoê faahaparaa tano. Mai te mea e, e ohipa moʻemoʻe tei ravehia e outou e aita te hoê taata ê atu i fifi maori râ o outou iho, e faʻi atoa ïa outou i te reira i te vahi moʻemoʻe, na to outou Metua i te Ao ra te faaroo mai i te vahi moʻemoʻe, e faautuʻa mai ia outou. Te mau ohipa o te faataupupu i to outou tiʻaraa i roto i te Ekalesia, e aore râ, e faataupupu i te fariiraa outou i te mau haamaitairaa e aore râ, e faataupupu i to outou haereraa i mua i roto i te Ekalesia, e tiʻa ïa ia faʻi oioihia te reira i te episekopo ra, na te Fatu hoi oia i maiti ei tiaʻi i niʻa i te nănă e ua haamana ia’na ei haavâ i Iseraela. E faaroo oia i te reira faʻiraa i te vahi moʻemoʻe, e e faaafaro oia i te fifi tataitahi ma te tiʻa e te here. … Ia oti te faʻiraa, e mea tiʻa i te taata tei rave i te hara, ia faaite i te hotu o to’na tatarahapa na roto i te mau ohipa maitai. E mea tiʻa ia’na ia faahoʻi mai te au i te maraa ia’na ia faahoʻi i te mea ta’na i rave ê atu, e aore râ, ia tataʻi i te fifi ta’na i rave. O oia o te na reira i te tatarahapa i ta’na mau hara e ia faaru’e roa i te reira, eiaha e rave faahou, e faaorehia ïa ta’na mau hara mai tei fafauhia mai ra, mai te mea e, aita oia i rave i te hara matara ore ra, mai ta te Peropheta Isaia i parau ra, “Ia uteute roa ta outou mau hara ra, e riro ïa mai te hiona; e ia uraura noa’tu mai te faaio ra, e riro ïa mai te vavai ra i te teatea. (Isaia 1:18).6
E farii anaʻe tatou i te reira. Ua rave tatou paatoa i te tahi mea o te ore e tiʻa ia tatou ia rave, e aore râ, aita tatou i rave i te tahi mau mea tei titauhia ia tatou ia rave. E no reira, ua rave tatou paatoa i te hape, e ua titauhia ia tatou tataitahi ia tatarahapa. E imi te diabolo tahito i te raveʻa ia tiaturi outou e, mai te mea e, ua rave outou i te hoê hape, eaha te peapea ia tamau noa outou i te rave i te hape? Oia hoi, te tamata nei o Satane i te parau ia outou e, aita hoê raveʻa faahou no te otohe. Area râ, a fariu-tiʻa’tu outou i te mea tiʻa ra, e na roto i te tatarahapa, a faaru’e i te mau mea ino ta outou i rave ra, e eiaha e rave faahou i te reira. Te na ô ra te Fatu e, “A haere atu na i to outou mau tere e eiaha e hara faahou; tera râ o te taata o te hara [faahou ra ] e faahoʻihia ïa ta’na mau hara mutaa iho, te na reira maira te Fatu o to Atua” (PH&PF 82:7).7
I teie nei, mai te mea e, ua rave outou i te hape, a faariro i teie mahana ei haamataraa no te hoê tauiraa o to outou oraraa. A fariu-ê atu i te mea ino o ta outou e rave na. Te faaueraa faufaa roa aʻe i roto i te mau faaueraa atoa a te Atua o te faaueraa ïa ta outou e fifi na i te haapaʻo i teie mahana. Mai te mea e, e parau tiʻa ore, mai te mea e, e peu viivii, mai te mea e, e peu taviri, e parau ore i te parau mau, ua riro ïa teie mahana ei mahana no te haaraa e tae roa’tu i te taime ua vî taua ino ra ia outou. Ia upootia outou i niʻa i te reira, a haamata i te haa i niʻa i te tahi atu ino tei riro ei mea fifi roa na outou ia haapaʻo. Tera ïa te raveʻa no te haamoʻa ia outou iho na roto i te haapaʻoraa i te mau faaueraa a te Atua.8
No te aha te bapetizoraa i riro ai ei faaineineraa titauhia no te farerei i te Atua?
I to tatou bapetizoraahia ua fafau tatou i te Fatu e, e rave tatou i te mau mea atoa ma to tatou puai atoa no te haapaʻo i te mau faaueraa a te Atua, ma te ite e, e roaa ia tatou te mau mea ta te Fatu i fafau mai ra, e e horoahia mai to’na hanahana e a muri e a muri noa’tu, e e vaiiho tatou i te Atua ia aratai i to tatou oraraa ia riro tatou ei ite no te Atua i te mau vahi atoa e tae noa’tu i te poheraa. [A hiʻo Mosia 18:8–10]. O tera ïa te fafauraa ta tatou i fafau i te taime a bapetizohia ai tatou ei melo no teie Ekalesia.9
Ua riro te bapetizoraa utuhi ia matara te hara … ei bapetizoraa no ratou o tei taeʻahia te matahiti iteraa i te haapaʻoraa, te hoê faaineineraa titauhia no te farerei i te Atua. O teie te raveʻa e riro ai outou “E tamarii anaʻe … na te Atua i te faaroo ia Iesu Mesia ra. O to outou atoa hoi i bapetizohia i roto i te Mesia ra, ua ahu ïa i ta te Mesia ra,” (Galatia 3:26–27) e aore râ, e nehenehe atoa e parau e, na roto i te bapetizoraa e farii ai outou “i te mana ia riro outou ei tamarii tamaroa e ei tamarii tamahine na te Atua ra.” [A hiʻo Mosia 5:7]. E mea na roto i te reira e tiʻa ai ia outou ia faaohipa i te toto taraehara o te Mesia, ia tiʻa ia outou ia farii i te faaoreraa i ta outou ra mau hara, e ia tamâhia to outou aau. [A hiʻo Mosia 4:2] No te farii i taua faaoreraa hara ra i muri aʻe i te bapetizoraa, ia faahaehaa outou i to outou aau e tiaʻi e ia tiaoro atu i te Fatu i te mau mahana atoa e ia haere papu na roto i te maramarama o te mau haapiiraa o te evanelia. …
… Te feia tei tatarahapa e tei bapetizohia ia matara ta ratou mau hara, o ratou anaʻe te titau i te toto faaora o to’na ra taraehara.10
Te Faaora iho, ua bapetizohia oia e Ioane Bapetizo, mai Ta’na i parau ra, “no te faatia i te mau parau-tia atoa e au ai.” (Mataio 3:15) Mai te mea e, ua na reira oia iho, eaha’tu ïa tatou? O Nikodemo tei parauhia’tu e: “Ia ore te taata ia fanau i te pape e te Varua, e ore oia e ô i te basileia o te Atua ra.” (Ioane 3:5). Aita te Fatu i vaiiho i te manaʻo tapitapi no niʻa i te tumu o te bapetizoraa o Ta’na i haapii ra.
“E ore e ô te mea viivii i roto i to’na basileia; no reira e ore te taata e tomo i roto i to’na faaearaa, maori râ, o tei mâ to ratou ahu i to’u ra toto, no to ratou faaroo, e te tatarahapa i ta ratou mau hara, e ta ratou tamau-maite-raa e tae noa’tu i te hopea.” (3 Nephi 27:19).
No reira o Petero i aʻo atu ai i te feia tei faaroo mai ia’na ra, “E tatarahapa, e ia bapetizohia outou atoa i roto i te iʻoa o Iesu Mesia ia matara te hara, e horoahia mai ïa te Varua Maitai ia outou.” (Ohipa 2:38). Ia bapetizohia hoi te taata e te hoê tei mau i te mana, te horoi mau ra ïa te taata i bapetizohia i to’na ahu i te toto o te Tamaiti a te Atua, tei riro ei taraehara no te hara a te feia atoa tei farii Ia’na, e ua na te uputa i te tomo i roto i te aua mamoe ra, na roto i te bapetizoraa. “Tera râ, mai te mea e aita ratou e tatarahapa,” te na reira ra te Faaora i te haapapuraa, “ia roohia ratou i te mamae rahi e tiaʻi ia au i taʻu i faaoromai ra.” (PH&PF 19:17).11
Nahea te Varua Maitai ia aratai ia tatou i pihaʻi iho i te Fatu?
Ua farii te melo tataitahi tei bapetizohia i te tuuraa rima i niʻa i to’na ra upoo, e ia oti oia i te haamauhia ei melo no te Ekalesia, ua parau te mau peresibutero e, “A farii mai i te Varua Maitai.” I muri iho, e riro e ua faahiti atoa ratou i te mau parau ta te Fatu i parau atu i Ta’na ra mau pipi i te taime a paraparau atu ai Oia ia ratou no niʻa i te Faaaʻo e aore râ, te Varua Maitai, o te haere mai: Na’na e faahaamanaʻo ia outou i te mau mea atoa ra. Na’na e haapii ia outou i te mau mea atoa ra. Na’na e faaite ia outou i te mau mea atoa e tupu mai. [A hiʻo Ioane 14:26; 16:13] E no reira ahiri e haamau vau ia outou ei melo no te Ekalesia, e horoʻa atu ïa vau i te horoʻa o te Varua Maitai ia outou na, o te riro hoi ei lamepa i to outou na avae e ei aratai i roto i to outou na haereʻa, o te haapii ia outou i te mau mea atoa ra e o te faaite faahou mai ia outou i te mau mea atoa ra e o te faaite mai ia outou i te mau mea e tupu mai.12
Te na ô ra te Fatu: “E o teie taʻu nei evanelia—te tatarahapa e te bapetizoraa na roto i te pape, e ei reira e tae mai ai te bapetizoraa no te auahi e te Varua Maitai ra, oia te Faaaʻo ra, o te faaite mai i te mau mea’toa ra, e o te haapii hoi i te mau mea hau no te basileia nei.” (PH&PF 39:6).
Ia roaa i te hoê taata te horoʻaraa i te Varua Maitai, tei ia’na ïa taua mea ra e titauhia no te heheu ia’na i te mau parau tumu e te mau oroʻa tataitahi o te faaoraraa o te mauhia e te taata i niʻa i te fenua nei.13
\E mea tano roa ia parau e, ia bapetizo-anaʻe-hia te hoê taata i te pape e ia roaa ia’na te mau haamaitairaa o te Varua na roto i te tuuraa rima, e fanauraa apî teie. E fanauraa apî inaha, mai te pohe varua ua arataihia mai oia i mua i te hoê o te Torutahi, oia te Varua Maitai. No reira matou e parau atu ai ia outou e “A farii mai i te Varua Maitai” i te taime a haamauhiaʻi outou. E horoahia taua horoʻaraa ra i te taata tei tiaturi e tei haapaʻo e tei ora no te titau i taua haamaitairaa ra, te tiʻaraa no’na ia aparau i te hoê o te Torutahi no te upootia i niʻa i taua pohe varua ra.14
E taipe te bapetizoraa utuhi no te pohe e te hunaraa o te natura hara o te taata; e te tiʻaraa mai roto mai i te pape ra, e taipe ïa no te tiafaahouraa i te hoê oraraa varua apî. Ia oti te bapetizoraa, e tuuhia te rima i niʻa i te upoo o te taata faaroo tei bapetizohia, e e haamaitaihia oia no te farii i te Varua Maitai. E mea na reira hoi e roaa ai i te taata bapetizohia te fafauraa e aore râ, te horoʻaraa i te Varua Maitai, e aore râ, te haamaitairaa no te faahoʻi-faahou-raa-hia mai oia i mua i te Torutahi; na roto i to’na haapaʻo, e to’na faaroo, e aratai te Varua Maitai i teie taata haamaitaihia i roto i to’na mau haerea e i ta’na mau paraparauraa i te Atua i te mau mahana atoa, mai ia Adamu hoi i haere na e i paraparau na i te Atua to’na Metua i te Ao ra, i roto i te Ô i Edene ra. No te farii i taua aratairaa a te Varua Maitai ra, e mea tiʻa ïa ia fanau-faahou-hia i te varua.15
I roto i te mau parau tumu matamua o te evanelia—te faroo, te tatarahapa, te bapetizoraa, e te fariiraa i te Varua Maitai, na roto hoi i te reira mana e heheuhia mai ai te mau mea atoa—i reira ïa tatou e haamata ai i te ite i te auraa o te parau ta te Peropheta Iosepha Semita i parau i te hoê taime a anihia’tu ai ia’na e, no te aha teie ekalesia i taaʻe ai i te tahi atu mau ekalesia—te tumu no te mea ua farii tatou te Varua Maitai. [A hiʻo History of the Church, 4:42]. E no te mea tei ia tatou nei taua mana ra e tiʻa ai i te mau mea atoa ia heheuhia mai, no reira, na roto i te reira mana e faatiahia ai te îraa o te evanelia a Iesu Mesia.16
Nahea tatou ia haapao tamau noa e tae noa’tu i te hopea ra?
Na roto i teihea ture e i teihea raveʻa e roaa ai ia tatou [te haamaitairaa o te hanahana tiretiera]? Tei ia tatou nei te mau parau tumu e te mau oroʻa matamua o te Evanelia—te faaroo, te tatarahapa, te bapetizoraa, e te Varua Maitai; e i roto i te basileia o te Atua te vaira te mau ture e haapii mai ia tatou i te eʻa e tae atu ai i te maitai-roa-raa ra. Ia haapii te hoê melo o te Ekalesia i te haapaʻo maitai roa i te mau ture tataitahi o te basileia, te haapii ra ïa oia i te raveʻa e maitai roa ai oia. Aita e melo to teie Ekalesia te ore e nehenehe e haapaʻo i te ture, te mau ture atoa o te evanelia. E nehenehe ta tatou paatoa e haapii ia paraparau i te Atua na roto i te pure. E nehenehe ta tatou paatoa e haapii ia haapaʻo maitai roa i te Ture no te Parau Paari. E nehenehe ta tatou paatoa e haapii ia haamoʻa maitai roa i te Mahana Sabati. E nehenehe ta outou paatoa e haapii ia haapaʻo maitai roa i te ture no te haapaeraa maa. Ua ite tatou e nahea ia haapaʻo maitai roa i te ture no te viivii ore. I teie nei ua ite tatou e nahea ia haapaʻo maitai roa i teie mau ture, tei niʻa ïa tatou i te eʻa o te maitai-roa-raa.17
E ui mai paha outou iaʻu e, nahea te hoê taata i te haamoʻa ia’na, ia ineine hoi oia no te haere i pihaʻi iho i te Fatu? … Te parau ra te Fatu e, “E teie faahou â, oia mau te parau atu nei au ia outou na, o tei faaterehia e te ture ra ua faaora-atoa-hia ïa e te ture, e i haamaitai-roa-hia e i haamoʻahia hoi e te reira” (PH&PF 88:34). Teihea ture? Te mau ture ïa a te Fatu i roto i te evanelia a Iesu Mesia, e ia haapaʻohia hoi te reira mau ture e te reira mau oroʻa ra, e tamâhia ïa tatou e e faarirohia ei mea moʻa. Ua riro te haapaʻoraa i te ture tataitahi ta te Fatu i horoʻa mai ia tatou nei ei taahiraa e tiʻa ai ia tatou i te hoê mahana ia tomo atu i mua i te aro o te Fatu.
I roto i te tahi atu heheuraa ua horoʻa mai oia i te raveʻa e tiʻa ai ia tatou ia faaineine ia tatou i roto i te roaraa o te tau. “Oia mau, te na reira mai nei te Fatu: E tupu mai â teie o te mau varua atoa o te faaru’e i ta’na mau hara ra e o te haere mai iaʻu nei, e o te pii mai i to’u nei iʻoa, e o te haapaʻo i to’u nei reo, e o te haapaʻo hoi i taʻu mau faaueraa, e ite mai ïa i to’u nei mata e e ite mai hoi e te vai nei au” (PH&PF 93:1). E mea ohie roa, e ere anei? Tera râ, a faaroo mai na â. Ta outou noa e rave, o te faaru’eraa ïa i ta outou mau hara, ia haere mai Ia’na ra, ia pii i To’na ra iʻoa, ia haapaʻo i To’na ra reo, e ia haapaʻo i Ta’na mau faaueraa, i reira outou e ite ai i To’na ra mata e ia ite e te vai ra oia.18
Na te Fatu teie ohipa e ia horoʻa oia i te hoê faaueraa i te mau tamarii a te taata nei, e horoʻa atoa oia i te hoê raveʻa ia tupu mau taua faaueraa ra. Mai te mea e imi ta’na mau tamarii i te mau raveʻa atoa no te tauturu ia ratou iho, e haamaitai mai te Fatu i ta ratou mau tautooraa.
… Te titau mai nei te Fatu ia imi tatou i te mau raveʻa atoa no te faaora ia tatou iho, e … ia hope te mau mea atoa i te ravehia e tatou no te faaora ia tatou iho, i reira tatou e turu’i ai i niʻa i te aroha o to tatou Metua i te Ao ra. Ua horoa mai oia i ta’na Tamaiti, e na roto i te haapaʻoraa i te mau ture e te mau oroʻa o te evanelia, e roaaʻi ia tatou te ora, i muri noa aʻe râ i to tatou raveraa i te mau mea atoa te tiʻa ia tatou ia rave no tatou iho.19
Ua horoʻa mai te Fatu na tatou tataitahi te hoê lamepa ia taʻitaʻi, tera râ, no te parau e, e hinu anei to roto e aore râ, aita, tei ia tatou noa ïa te parau i te reira. E haapaʻo anei tatou i te mau faaueraa ia roaa te hinu no te turama i to tatou haerea e no te aratai ia tatou i niʻa i to tatou purumu, tei ia tatou tataitahi ïa te parau i te reira. Eita e tiʻa ia tatou ia rave i ta te mau melo o te Ekalesia. Eita e tiʻa ia tatou ia rave i ta to tatou tupuna haapaʻo. E hinu anei to roto i ta tatou lamepa e aore râ, aita, te parau faahou nei â vau e, tei ia tatou tataitahi noa ïa te parau i te reira; tei te huru o to tatou itoito i te haapaʻoraa i te mau faaueraa a te Atua ora ra.20
Ua riro te mau parau tumu e te mau oroʻa taatoa o te evanelia ei titau-manihini-raa noa ia tatou ia haapii i te evanelia na roto i te faaohiparaa i ta’na ra mau haapiiraa. Tera noa to ratou tumu— e titau-manihini-raa ia outou ia haere mai e ia faaohipa, ia nehenehe ia outou ia ite. … No’u nei, e mea maramarama roa mai te mea e parau taatou e, aita tatou i ite papu i te hoê noaʻe o te mau haapiiraa o te evanelia maoti râ, ia hope tataihoê te reira i te faaohipahia e tatou i roto i to tatou oraraa. No reira, e nehenehe ia parau e, e ite tatou i te evanelia na roto i te oraraa i te reira.21
Te parau poroʻi rahi aʻe ta te hoê taata i niʻa i teie tiʻaraa e nehenehe e horoʻa i te mau melo o te Ekalesia, o te haapaʻoraa ïa i te mau faaueraa a te Atua, no te mea, tei roto hoi i te reira, te ora o te Ekalesia e te ora o te taata hoê roa. E mata na outou i te haapaʻo i te mau faaueraa. Aita e mea ê atu te tiʻa iaʻu ia parau o te riro ei parau poroʻi puai aʻe, e aore râ, faufaa aʻe, i teie mahana.22
Te Mau Manaʻo Tauturu no te Haapiiraa e te Aparauraa
-
Nahea tatou i te faarahi i te faaroo i te Fatu ra ia Iesu Mesia? Nahea te faaroo ia tauturu ia tatou ia haapaʻo i te mau faauera, eiaha râ na roto i te haafaufaa-ore-raa? I nahea to outou faaroo i te Atua i te tautururaa ia outou ia arai i te mau fifi tei riro ei mau fifi rahi roa no to outou puai taata e aore râ, te maramarama taata?
-
No te aha e mea faufaa te faʻiraa no te tatarahaparaa? No te aha tatou e haamata ai i te tatarahapa i ta tatou mau hara i teie mahana e ia taui i to tatou oraraa, eiaha e tiaʻi i te tahi atu mahana?
-
Nahea tatou i “te horoi i to [tatou] ahu i te toto o te Tamaiti a te Atua”?
-
Ia au i te parau a te Peresideni Lee, nahea te fariiraa i te horoʻaraa a te Varua Maitai ia tauturu ia tatou ia upootia i niʻa i te pohe varua? Eaha te tiʻa ia tatou ia rave ia rahi atu te aratairaa a te Varua Maitai i roto i to tatou “mau haerea e ta tatou mau paraparauraa i te mau mahana atoa”?
-
Eaha ta Te Parau Haapiiraa e te Mau Parau Fafau 93:1 e haapii nei no niʻa i te faufaa o te haapaʻo-tamau-raa i te mau faaueraa e tae noa’tu i te hopea ra?
-
Nahea te haapaʻoraa outou i te hoê haapiiraa o te evanelia i te tautururaa ia outou ia ite e, ua tiʻa mau te reira?