Pene 17

Te Faaite-haere-raa i te Evanelia

Nahea tatou ia faaoti i te hopoiʻa ta te Atua i horoʻa mai ia tatou, oia te faaite-haere-raa i te evanelia ia vetahi ê?

Omuaraa

I te tahi mau taime, e ratere o Elder Gordon B. Hinckley, no te Pŭpŭ No te Tino Ahuru Ma Piti, e ta’na vahine o Marjorie, na muri iho i te Peresideni e te Tuahine ra Harold B. Lee. “E piti taime to maua ratereraa na muri iho i te Peresideni e te Tuahine Lee i Peretane, Helemani, Auteria, Italia, Hereni, e i te Fenua Moʻa, i reira to matou farereiraa i te mau misionare, te mau melo, te feia apî, e te mau faʻehau,” te na reira ra te Tuahine Hinckley. “Aita atu e na hoa ieie, faatura, e te maitai ia tere haere na muri iho.”

“Tei te fenua Peretane matou i te hoê Sabati. E mea ohipa roa matou i taua mahana ra: e piti tuhaa pureraa no te amuiraa e hoê pureraa pae auahi i te pô. I to matou hoʻiraa mai i te hotera i te hora 9:30, ua rohirohi matou e te poia atoa. Ua haere atu matou i te vahi tamaaraa o te hotera no te amu i te tahi maa iti. Ua oti ïa mahana—e nehenehe matou e faafaaea rii. O te reira ïa te manaʻo o tei tupu mai i roto i to’u feruriraa. Te ohipa taʻu i ite i muri iho, te vahine tuati ïa, te tapeʻa noa ra oia i ta’na peni tara no te tapaʻopaʻo i te maa ta matou e hinaaro e amu. Ua hi’o atura te Peresideni Lee i niʻa ia’na e na ô atura, ‘Eaha ta oe ekalesia?’ Aita â te mahana i oti atura no’na. Ua rave aʻera oia i te ohipa pororaa evanelia. Hou a paʻia ai matou, ua ite oia i te mau mea atoa no niʻa i teie nei vahine apî. Ua pohe ta’na tane faaipoipo e o oia anaʻe iho i teie nei, e tei roto oia i te mataʻu. Ua fafau mai oia e, e farerei oia i te mau misionare no te faananea atu â i to’na ite. E mea nehenehe mau ia hiʻo i te peresideni o te Ekalesia ia faaohipa i te mau mea ta’na i poro i taua mahana taatoa ra. I to te vahine tuati (mai te mea ra e, e toru ahuru e ma pae matahiti to tera vahine) iteraa e, te taata o ta’na i paraparau aʻe nei, o te peresideni ïa, te peropheta, te hi’o e te heheu parau no te Ekalesia a Iesu Mesia, aita oia i manaʻo e, e nehenehe taua huru taata ra e tauʻa parau e te hoê taata mai ia’na te huru. Ua putapû roa oia.”¹

No niʻa i te parau no te faaite-haere-raa i te evanelia, ua parau te Peresideni Lee e, “Ia ite mai tatou e, e hopoiʻa teie o ta te Fatu i horoʻa i ta’na ra Ekalesia i te mau tau tuuraa evanelia atoa, … ia haapii i te evanelia i te taata atoa, ia vaiihohia’tu te taata atoa nei ma te otohe ore i te mahana haavâraa ra, e ia faaorahia hoi te taata atoa i te hiʻaraa, e ia faahoʻi-faahou-hia i mua i te aro o te Fatu ra.²

Te mau haapiiraa a Harold B. Lee

No te aha e mea faufaa no tatou ia faaite-haere i te evanelia ia vetahi ê?

E tapeʻa tatou i to tatou mau iteraa papu na roto i te oraraa i roto i te ekalesia, na roto i te pureraa, e na roto i te vai-itoito-noaraa i roto i te ekalesia, e na roto i te haapaʻoraa i te mau faaueraa a te Atua. Ei reira te Varua aratai e vai ai i pihaʻi iho ia tatou, inaha, o te hoê te reira o te mau taoʻa faufaa rahi roa aʻe o te tiʻa i te hoê melo no te ekalesia ia farii.

Na roto i teie nei iteraa papu, e hopoiʻa ïa na tatou paatoa ia ite e, ua titauhia ia tatou ia faaite i te misioni hanahana a te Fatu i te mau vahi atoa e tiʻa ia tatou ia na reira. Mai te mea e, e na reira tatou, e iteahia ia tatou te mau raveʻa e rave rahi no te haapii i te evanelia, i tera mahana e i tera mahana, i tera hora e i tera hora, noa’tu eaha te vahi. Mai te mea e, ua ora tatou no te reira tumu ohipa, mai te mea e, ua faaineine tatou i te reira e mai te mea e, ua imi tatou i te reira, e horoʻa mai ïa te Varua aratai ia tatou nei i te ite no te haapiiraa. A haamanaʻo na, i roto i te ohipa haapiiraa i te evanelia, e vai noa te parau ei parau mai te mea e, aita e apitihia i te Varua o te Fatu. …

Ta tatou hopoiʻa o te hopoiraa ïa i te parau poroʻi o te parau mau i to te ao nei, o te faaiteraa ïa i to te ao nei e, i roto i te mau haapiiraa o te evanelia a Iesu Mesia e iteahia ai te mau raveʻa faatitiaifaroraa i te mau fifi atoa e haapeʻapeʻa nei i te taata.³

E farii tatou i te mau raveʻa atoa no te hopoiraa i te ite i te evanelia ia vetahi ê—i to tatou mau hoa melo paruparu no te Ekalesia, i to tatou mau hoa melo ore i te fare haapiiraa tuarua, i roto i te aua faʻehau, e i roto i te vahi ohiparaa, i to tatou mau taata tupu e to tatou mau hoa.

Ua horoʻa mai te Fatu i teie heheuraa i te Peropheta: “No te mea te vai nei â te mau taata e rave rahi i niʻa i te fenua nei i rotopu i te mau haapaʻoraa atoa, te mau pŭpŭ, te mau huru ekalesia, o tei haamatapohia na roto i te paari huna o te taata nei, na roto i te reira ratou e tiʻa ai ia haavare atu, e o tei faaerehia’tu i te parau mau no te mea anaʻe aita ratou i ite i te vahi te reira e itea mai ai.” (PH&PF 123:12).⁴

Aita e reo farii faahou i te feia aau parau tiʻa maori râ, te reo o te veʻa mau i te poro-haere-raa i te evanelia a Iesu Mesia.⁵

Te haamanaʻo ra outou ia [Elder Charles A. Callis] i to’na faatiaraa mai ia matou i to’na haereraa i te hoê taime i Montana no te farerei i te hoê taata o tei rave i ta’na tau misioni i te fenua Irirane. Ia itea ia’na taua taata ra, e taata ruau roa ïa i teie nei, ua faaite atura oia i to’na iʻoa e ua parau atura, “O oe anei taua misionare ra tei rave i ta oe tau misioni i te fenua Irirane e toofanu matahiti i mairi aʻe nei?” E ua parau maira taua taata ra e, e. Na ô atura oia e, “o oe anei taua taata ra i roto i te misioni o tei parau i roto i ta oe aʻoraa no te taaʻeraa e, ia feruri anaʻe oe, aita oe i manuïa i roto i na matahiti e toru to oe faaearaa i reira, no te mea, hoê anaʻe tamaiti iti Irirane reporepo o ta oe i bapetizo? Ua parau anei oe i taua parau ra?” “E, te haamanaʻo ra vau e, ua parau vau i taua parau ra.” Na ô aʻera te taeaʻe Callis, “Te hinaaro nei au e faaite atu ia oe e, o vai au nei. O Charles A. Callis to’u iʻoa, no te Pŭpŭ no te Tino Ahuru Ma Piti Aposetolo o Te Ekalesia a Iesu Mesia i te Feia Moʻa i te Mau Mahana Hopea Nei. O vau taua tamaiti iti Irirane reporepo ra o ta oe i bapetizo a haa ai oe ei misionare i te fenua Irirane.” Hoê varua o tei riro mai ei aposetolo no te Ekalesia e te Basileia o te Atua.⁶

Aita e taata e faatoro noa i to’na rima no te tauturu i te tahi, e aita oia e farii noa i te faaoraraa na roto i to’na hinaaro ia tauturu ia vetahi ê. I teie nei, a haamanaʻo noa e, e mau tamarii anaʻe tatou na to tatou Metua, i riro na ei melo no te Ekalesia e aore râ, aita. Te haapeʻapeʻa nei tatou no teie mau tamarii melo ore a to tatou Metua. E here rahi atoa To’na ia ratou mai Ta’na hoi i here i tei riro na ei melo no te Ekalesia. Mai te mea e, e rave te hoê taata i te ohipa no te aratai mai ia vetahi ê i roto i te náná, te parau ra te Fatu e, te faatae ra ïa taua taata ra i te ora i niʻa i to’na iho varua [a hi’o PH&PF 4:4].⁷

No te aha te hinaaro ia faatusia i riro ai ei ohipa faufaa i roto i te parau no te faaite-haere- raa i te evanelia?

E itehia te auraa mau no te parau ra e cherisetiano, i roto i te parau a te taata tei papaʻi i te evanelia a Ioane, tei roto i reira to’na faahitiraa i te faaiteraa a te Fatu no niʻa i ta’na iho misioni hanahana ei Faaora no to te ao nei. Teie ta’na mau parau:

“I aroha mai te Atua i to te ao, e ua tae roa i te horoʻa mai i ta’na Tamaiti fanau tahi, ia ore ia pohe te faaroo ia’na ra, ia roaa râ te ora mure ore.” (Ioane 3:16)

Teie ïa te faahitiraa no te ohipa taviniraa teitei roa aʻe o te tiʻa ia tatou ia rave i roto i te tahuti nei, oia te hinaaro ia faatusia ia tatou iho no te maitai o vetahi ê. Ua faataa mai te Peropheta Iosepha Semita i te vairaa no te parau no te faatusiaraa e te taviniraa i roto i te ohipa no te haamoʻaraa i te oraraa:

“Te hoê haapaʻoraa faaroo aore e titau i te faatusiaraa i te mau mea atoa, e ore ïa e roaa te mana e au no te faatupu i te faaroo e hinaarohia no te oraraa nei e no te faaoraraa. …

“Na roto hoi i teie faatusiaraa, e i teie anaʻe, i faatoroʻa ai te Atua i te taata nei no te farii i te ora mure ore.” [Lectures on Faith (1985), api 69].

Mai te mea e, e faaohipa tatou i taua parau tumu ra i niʻa ia tatou iho e i roto i to tatou iho oraraa, na roto hoi i te reira e tiʻa ai ia tatou ia mau papu i taua horoʻaraa faufaa ra, e roaa ïa te paari ia tatou. O te Arii Beniamina o tei haapii atu i to’na ra mau taata i roto i ta’na aʻoraa opaniraa:

“… a tavini ai outou i te taata nei, te tavini [ra] ïa outou i to outou Atua ra.” (Mosia 2:17) …

No reira, ua riro te horoʻaraa ei tapaʻo no te here o te hoê taata, e ia horoʻa mau hoi te hoê taata ia’na iho, e tapaʻo faaite te reira no te hoê here mau i roto i taua taata ra, no reira oia e horoʻa ai. …

No te here rahi o te Peropheta Iosepha Semita i te parau mau o tei heheuhia mai ia’na ra, i faatusia ai oia i te mau mea atoa na’na i te ao nei, ma te tapeʻa ore i to’na ora, ma te rave i te mau mea atoa e tiʻa ai ia’na ia faaite i taua iteraa ra e ia faaroohia mai te reira e to te mau nunaa atoa o te fenua nei. …

I te tahi tau avaʻe i mairi aʻe nei, ua tere atu vau i roto i te hoê tĭtĭ e ua anihia mai iaʻu ia uiui au i te tahi mau taurearea e tiʻa ia riro ei misionare. Ua faaite mai te peresideni tĭtĭ iaʻu e, hoê o taua mau taurearea ra, ua vai maoro oia i roto i te fare maʻi, na roto i te rohirohi rahi tei tupu i niʻa ia’na a ora ai oia i roto i te nuu faʻehau. A hiʻo ai au i teie nei taurearea no te uiui ia’na, ua ani atu vau ia’na, “Eaha te tumu oe i hinaaro ai e haere i te misioni?”

Ua feruri maite oia e mea huru maoro, e i muri iho, pahono maira, “I to’u oraa i roto i te nuu faʻehau, o te taime matamua te reira a atea ai au i to’u utuafare. Ua huru ê au i te huru o te oraraa i reira. Te ite au i te faahemaraa ati tiʻa aʻe iaʻu e tae noa’tu i te umeraa ia rave i te hara. Ua hinaaro vau i te puai ia ore au ia rave i te hara, e ua haere au i mua i to’u Metua i te Ao ra e ua pure au Ia’na ma te faaroo, ia horoʻa mai oia i taua puai ra no te patoʻiraa i te ino. Ua faaroo mai te Atua i taʻu pure e ua horoʻa mai oia i taua puai ra. Ia hope te pue tau faaineineraa e e mea fatata matou i te tahua aroraa, ua faaroo matou i te haruru pupuhi tei riro ei faaite tamau i te parau no te pohe. Ua mataʻu vau e ua rurutaina hoi. Ua pure au i te Atua no te ani i te itoito, e ua horoʻa mai oia iaʻu i te itoito, e ua tae mai i niʻa iaʻu te hoê hau aita â i itehia aʻe nei e au. … Ua riro vau ei taata hiʻohiʻo, to’na auraa ra, tei mua ïa vau i te nuu tamaʻi i te vairaa, e i te tahi mau taime, tei ropu roa vau i te enemi. Ua ite au e, hoê anaʻe mana i niʻa i te fenua e nehenehe e faaora iaʻu, e ua pure au i taua mana ra ia paruru mai iaʻu, ia faaora iaʻu, e ua faaroo mai te Atua i taʻu pure e ua faahoʻi mai oia iaʻu i roto i taʻu nuu.”

I muri iho na ô maira oia iaʻu: “E te taeaʻe Lee, te mauruuru nei no teie mau mea atoa. E ohipa iti haihai roa ïa teie o te tiʻa iaʻu ia rave, i te haereraa i teie nei ei tiʻa no Iesu Mesia, no te haapii i te taata i teie mau mea maitai o taʻu i farii i roto i te utuafare i toʻu tamariiraa.”

I to’u faarooraa i teie huru faaiteraa o te faaroo mai roto mai i taua taurearea ra, ua faaau vau i te reira ia ratou o taʻu i faaroo i te parauraa e, te feruri ra ratou e, na roto i te raveraa i te ohipa misionare, e roaa ia ratou te hoê faaineineraa, e ite ratou i te ao nei, e roaa ia ratou te tahi mau iteraa faufaa roa o te riro ei maitai no ratou iho. …

Te hoê nounou no te maitai o te taata iho, e ere ïa no roto mai i te mau haapiiraa o te parau mau, no roto mai râ i te mau haapiiraa a te enemi o te parau mau. …

Inaha, te taata tei nounou i te taoʻa e te maitai no’na iho ra, e ere ïa i te taata oaoa, i te mea e, te mau mea atoa ta’na e titau i roto i te oraraa nei, e maʻue ê atu te reira ma te haavahavaha mai i ta’na mau tamataraa ia roaa mai e ia titau. Te taata e tavini ma te aau pipiri ore, e taata oaoa ïa.⁸

Te ite nei tatou i roto i ta tatou ohipa misionare i te nehenehe o te feia apî tamaroa e te feia apî tamahine [i te haereraa] … i te mau hopea atoa o te fenua nei, e na roto i ta ratou taviniraa ma te aau pipiri ore, te tiʻa nei ratou ei mau ite i te mau mahana atoa e i te mau vahi atoa, no te hopoiʻa hanahana a te Ekalesia, oia te haapiiraa i te evanelia.⁹

Nahea tatou ia haapii i te evanelia ma te puai e te mana?

Ua reva o Alama … e te mau tamarii tamaroa a Mosia e rave i ta ratou misioni, e ua rave ratou i te hoê ohipa misionare rahi. … Ua ite o Alama i to’na mau taeaʻe, te mau tamarii tamaroa a Mosia, i te ratereraa no te haere i Zalahemela.

“E teie nei, tei pihaʻi-atoa-iho teie nei mau tamarii tamaroa a Mosia ia Alama i taua tau ra i fâ mai na ai te melahi ia’na ra; no reira ua oaoa roa oia i te ite i to’na ra mau taeae; e ua rahi atura to’na oaoa i te mea te vai noa ra ratou e mau taeae no’na i te Fatu ra; oia ïa, ua tupu to ratou ite i te parau mau i te rahi; e mau taata manaʻo papu hoi ïa ratou, e i imi maite ratou i te parau i papaihia ra, ia ite ratou i te parau a te Atua.

“E ere râ te reira anaʻe; I pinepine ratou i te pure, e i te haapae i te maa; no reira i noaa ai ia ratou te varua tohu, e te varua hoi o te heheuraa parau, e ia haapii ratou, ua haapii ma te mana e te toroʻa no ô mai i te Atua. ” [Alama 17:2-3].

I teie nei, te[taa] ra anei outou i te raveraa e tiʻa ai ia outou ia hapii ma te mana e te toroʻa no ô mai i te Atua ra? Ia tupu i te rahi te ite i te parau mau, ia riro ei mau taata manaʻo papu, e imi maite i te parau i papaihia, ia ite tatou i te parau a te Atua. E ere râ te reira anaʻe. E pure tatou, e haapae tatou i te maa, e titau ia roaa te varua tohu; e ia hope taua mau mea atoa ra i te ravehia, ei reira tatou e haapii ai ma te puiai e te mana no ô mai i te Atua ra.¹⁰

Ua parau … te Fatu e: “E te horoʻa’tu nei au i te hoê faaueraa ia outou ia haapii atu outou te tahi i te tahi ra i te haapiiraa evanelia no te basileia,” e na ô faahou maira oia, “A haapii itoito atu outou e e vai noa to’u maitai ia outou na” (PH&PF 88:77–78). Ua tamata vau i te tatara i te auraa no te parau ra “itoito” e te parau ra “maitai.” Itoito, te faaite ra te buka faatoro parau [Dictionnaire] e, “haapaʻo-tamau-maite, rave tamau ma te haapaʻo maitai,” e ua taaʻe ïa te reira i te mau parau ra, hupehupe, e aore râ, haapaʻo ore, e aore râ, tauʻa ore. …

… Te tiaturi nei au e, te tatararaa no te parau ra “maitai” e itea ïa te reira i roto i te tuhaa maha o te Parau Haapiiraa e te Mau Parau Fafau, tei reira to te Fatu fafauraa’tu i te feia e rave papu i te ohipa misionare: “… e inaha, o oia o te maoa i te mauhaa ooti ma to’na puai, o oia ïa o te haaputuputu mai ia ore oia ia mou, e noaa râ te ora noa i to’na varua.” [PH&PF 4:4]. E horoʻahia te “maitai” faaora o te mana o te taraehara a te Fatu i te feia e horoʻa i te mau oroʻa faaora o te evanelia e tae noa’tu i te feia e farii i te reira mau oroʻa faaora o te evanelia.¹¹

I teie nei, i te hopea roa, teie hoê mea o taʻu e feruri nei e, e mea faufaa atoa, e aore râ, e mea faufaa roa’tu paha i te tahi atu mau mea:

“E e horoahia’tu te Varua ia outou na roto i te pure faaroo; e mai te mea e ore roa outou e farii i te Varua ra e ore hoi outou e haapii atu.” [PH&PF 42:14].

I teie nei e nehenehe ta matou e horoa’tu ia outou i te mau mauhaa i roto i teie faanahoraa ohipa misionare no te vauvauraa e no te hapiiraa i te evanelia; te vai nei te reira mau mea atoa. Area râ, mai te mea e, aita te misionare e pure itoito, e ore roa e roaa ia’na te Varua, na roto hoi i te reira e tiʻa ai ia’na ia poro i te evanelia. O te auraa ïa o te parau a Nephi [a parau ai] oia e:

“E teie nei, eita e tiʻa iaʻu, ia Nephi, ia papai i te mau mea atoa i haapiihia i toʻu ra mau taata; aore hoi au i puai i te papai mai taʻu i puai i te aʻo ra: no te mea ia parau te taata na roto i te mana o te Varua Maitai, na te mana o te Varua Maitai e faatae i taua parau ra i roto i te aau o te tamarii a te taata nei.” (2 Nephi 33:1).

… Ia roaa anaʻe ia outou te Varua, e ia faaroo anaʻe outou i te varua faaite, e ia arataihia anaʻe outou e taua varua faaite ra, o ta outou tataitahi e farii ia piihia anaʻe outou i Ta’na ra ohipa, ei reira outou e ite ai, e e arataihia ai, e e apeehia ta outou mau parau e te mana o te Varua Maitai, inaha, ia ore hoi te reira ra, e ore roa ïa te hoê taata e riro ei orometua haapii maitai i te evanelia a Iesu Mesia.¹²

No te aha te haapaʻoraa i te evanelia i riro ai ei ohipa faufaa no te faaite-haere-raa i te evanelia

Te raveʻa maitai roa aʻe i te ao nei no te faatupu i roto i te taata te anaanatae i te evanelia, o te haapaoraa ïa i te mau manaʻo e te mau ture o ta tatou e tiaʻi nei ia haapaʻo te feia e parau nei e, e melo ratou no te Ekalesia. O te ohipa matamua ïa e haaputapu i te taata èê. Tatou o te parau nei e, e melo tatou, eaha te huru ta tatou e faaite i roto i to tatou tiʻaraa ei mau melo no te Ekalesia? …

… Aore e tane e aore râ, aore e vahine e nehenehe e haapii i te evanelia mai te mea e, aita oia e haapaʻo nei i te reira. Te ohipa matamua ta outou e rave e tiʻa ai ia outou ia riro ei misionare, o te haapaʻoraa ïa i te mau parau tumu o ta outou e haapii nei. I to outou manaʻoraa, e riro anei te hoê taata rave hara ei orometua papu no te haapii i te parau no te tatarahapa? Ia manaʻo outou, e tiʻa anei te hoê taata ia haapii maitai i te tahi atu mau taata ia haamoʻa i te mahana Sabati mai te mea e, aita oia iho e haamoʻa nei i te mahana Sabati? Ia manaʻo outou, e tiʻa anei ia outou ia haapii i te tahi atu mau parau tumu o te evanelia mai te mea e, aita outou iho e tiaturi papu ra i te reira no te faatumuraa i te reira i roto i to outou iho oraraa?¹³

[Na ô maira] Iesu: “No reira, e faateitei i to outou maramarama, ia anaana’tu i to te ao nei. Inaha, o vau ïa te maramarama ta outou e faateitei i niʻa—maori râ o taʻu i rave i mua ia outou ra. Inaha, i hiʻo aʻenei outou iaʻu a pure ai au i te Metua ra, e ua riro anaʻe outou ei ite i te reira.” (3 Nephi 18:24). Ta tatou ohipa, o te “faateitei” ïa i to te ao nei i te ohipa ta Iesu i rave no te taata nei: te parau no te taraehara, te hohoa Ta’na i faaite mai, e te mau haapiiraa Ta’na iho i horoʻa mai ia tatou nei, e na roto mai hoi i Ta’na ra mau peropheta i tahito ra e i teie nei anotau. Ua haapii atoa mai te Fatu ia tatou e: “Oia atoa to outou maramarama, ia anaana ïa i mua i te aro o te taata nei, ia hiʻo ratou i ta outou parau maitai, e ia haamaitai i to outou Metua i te ao ra.” (Mataio 5:16). …

I roto i te mau tiʻaraa atoa no te ohipa faatereraa na roto hoi i te reira e titau ai tatou ia haamaitai i te huru o te taata nei, e ere i te mea ohie ia feruri teitei i te mana o te hiʻoraa—no te mau metua anei i te faaiteraa e i te haapiiraa i ta raua mau tamarii i te parau no te faufaa o te faaipoiporaa hiero e aore râ, no te hoê anei misionare tei faaoti i ta’na misioni i te faaiteraa i te mau tauiraa e te paari o ta te evanelia i faatupu i roto ia’na.¹⁴

“O outou te maramarama o teie nei ao; e oire faatiahia i niʻa i te mouʻa ra.” [A hiʻo Mataio 5:14]. Eaha te auraa no teie parau? …

… Te hoê noa’tu Feia Moʻa i te Mau Mahana Hopea Nei i roto anei i te mau ohipa o te Ekalesia, i roto anei i te nuu faʻehau, i roto anei i te oraraa sotiare, e aore râ, i roto anei i te ohipa imiraa faufaa o te oire, ua riro ïa oia, eiaha ei hohoa no’na noa iho, ei hohoa atoa râ no te Ekalesia i teie mahana. Te parau ra te hoê taata e: “A haapaʻo maitai i te ohipa ta oe e rave, no te mea, e riro paha oe ei Buka Papairaa Moʻa na te Ekalesia o ta te mau taata e taiʻo.” Te faaara mai nei te Fatu ia tatou ia faariro i to tatou oraraa i roto i te Ekalesia nei, ei oraraa teitei aʻe i te huru oraraa o to te ao nei.¹⁵

Aita i maoro aʻe nei [1954], ua tere atu vau i Seoul i te fenua Korea, e te vai ra i taua fenua ra te hoê o to tatou mau taata maitai roa aʻe, o te Taote Ho Jik Kim to’na iʻoa. To’na tiʻaraa …e tauturu haamaramarama ïa i roto i te faatereraa hau no Korea. E taata faatere oia no te hoê o te mau pŭpŭ haapiiraa e vai ra i reira, e toru ahuru e ma maha melo faafariuhia o ta’na i haaputuputu mai i pihaʻi iho ia’na, e mau taata maramarama te rahiraa o ratou. Ua taeʻahia e piti hora to matou paraparauraa ia’na no te tamata i te haamau i te hoê niu o te riro i muri iho ei omuaraa no te ohipa misionare i roto i te fenua Korea. Ua faatia oia ia matou i te huru no to’na faafariu-raa-hia. Te parau ra oia e, “Te mea o tei ume mai iaʻu i roto i te Ekalesia nei, o te taime ïa a titau-manihini-hia ai au i roto i te utuafare o na Feia Moʻa i te Mau Mahana Hopea Nei tei noho i te fare haapiiraa teitei no Cornell University. … Te mea tei haaputapu roa iaʻu, o te huru ïa o to ratou oraraa utuafare. Aitâ vau i ite aʻe nei i roto i te mau utuafare, i te hoê huru auraa mai tera i rotopu i te tane e te vahine, i rotopu hoi i te metua tane e te metua vahine e te mau tamarii. Ua ite au ia ratou i te faatupuraa i te pureraa utuafare. No te putapû rahi o toʻu aau, ua haamata aʻera vau i te titorotoro i te huru o teie haapaʻoraa ta ratou. E i te hoê pô, i muri aʻe i taʻu mau tuatapaparaa maoro, e i toʻu fariiraa i te hinaaro ia apiti atu i taua huru pŭpŭ taata ra, ua ite aʻera vau e, e haamata vau na roto i te fariiraa i te hoê iteraa papu. Ua tuturi ihora vau i raro e ua pure aʻera i taua pô taatoa ra, e ua farii aʻera vau i te hoê iteraa papu no nia i te hanahana o teie nei ohipa.” Tera râ, eiaha ia aramoinahia e, ua haamata teie ohipa na roto i te hiʻoraa maitai roa o te hoê utuafare o tei ora i te hoê oraraa utuafare o ta te evanelia e titau nei i te Feia Moʻa mau i te Mau Mahana Hopea Nei.¹⁶

Te Mau Manaʻo Tauturu no te Haapiiraa e te Aparauraa

Eaha te tahi o te mau raveʻa ta tatou no te haapii i te evanelia “i tera mahana e i tera mahana … noa’tu eaha te vahi”? Eaha te tahi mau huru o te taata e manuïa ai i roto i te ohipa faaitehaere-raa i te evanelia ia vetahi ê?
Eaha te mau haapiiraa o te tiʻa ia tatou ia apo mai i roto i te ohipa i ravehia e te Peresideni Lee no niʻa i te faaite-haere-raa i te evanelia i roto i te vahi tamaaraa o te hotera?
Eaha te mau haamaitairaa tei fariihia e outou i roto i to outou oraraa na roto i to outou tutavaraa ia faaite-haere i te evanelia ia vetahi ê?
Eaha te mau faatusiaraa i titauhia ia tatou no te faaite-haereraa i te evanelia? Eaha to tatou huru ia rave tatou i taua mau faatusiaraa ra? Eaha te mea o tei haaputapu ia outou no niʻa i te huru o te taurearea o tei hoʻi mai na te tamaʻi e haere atura e rave i ta’na tau misionare?
Eaha te haapiiraa e roaa ia tatou mai roto mai i te Alama 17:2–3 no niʻa i te huru o te faaite- haere-raa i te evanelia ma te mana e te toroʻa?
No te aha e mea titauhia te hoaraa o te Varua Maitai ia hinaaro tatou ia riro ei mau misionare maitai? Eaha te tiʻa ia tatou ia rave no te farii rahi atu â i te aratairaa a te Varua a faaite-haere ai tatou i te evanelia?
Nahea tatou ia upootia i niʻa i to tatou huru otiatia e te mataʻu i te faaite-haere-raa i te evanelia?
No te aha to tatou hiʻoraa taata oraraa parau tiʻa e riro ai ei mauhaa puai no te ohipa haapiiraa?

Te misionare Harold B. Lee teie, i roto i te Misioni no Western States. Ua tavini oia mai te avaʻe Novema 1920 e tae atu i te avaʻe Titema 1922.

E mau feia apî tamaroa e e mau feia apî tamahine teie ati tiʻa aʻe te ao nei, te tiʻa nei ratou ma te pipiri ore, ei mau ite i te mau mahana atoa e i te mau vahi atoa, no te hopoiʻa hanahana a te Ekalesia, oia te haapiiraa i te evanelia.